Saturday, October 27, 2007

الصفتازين فى السلانكاتيه

من كتر البريبء
حاسس ان الصفتازين بقى فى السلانكاتيه
و بقيت هستس
محتاج انننح خومشات
علشان ابقى فى الامان يا لالالى
و اعرف ادشمل الحشوم
و اهوبس تسعتشرات
ماشى يا هندسة ؟
حتفخدنى و لا ليثى ؟

............
محمود --- فنى تركيبات
احدى العاملين بفريق العمل بالشركة
بيطلب اجازة خمسة ايام
لأنه مرهق من كثرة العمل
و يحتاجها حتى يعود الى كامل لياقته
علشان يقدر يشتغل و يعمل ساعات اضافى
و كان بيسئل المدير
اذا كانوا موافقين عليها و لا لأ ؟
.......
تم رفض الاجازة
لأسباب غير معروفة من قبل مدير العمليات
............
فى الغالب
المدير مفهمش انه بيطلب اجازة
علشان كده رفض

Wednesday, October 24, 2007

banners

الصراحة
انا لقيت ان اى مدونة اخشها
لازم الاقى بانر
banner
مؤيد لأى حاجة
و معارض لأى حاجة
و دى حاجة جميلة
بس الشىء الى يزيد عن حده
يخنق و بعيد عنكم يجيب المرض
و محسوبكم صاحب عيا
و مش حمل اى حاجة زيادة
...........
فى مدونين حطين بانرز
كتير جدا فى المدونة
و مدونين حاطين بانرز بس
من غير مدونة
................
و لما فكرت فى الموضوع
قلت لازم اشارك
فى موضوع البانرز ده
كواجب تدوينى نحو اشقائى المدونين
حاجة كده على ما قسم ... واجب مع الاخوة
و من قدم شىء بيداه التقاه
و هنيالك يا فاعل البانر
و ربنا يقدرنى
...........
مثلا
البانر التالى
ينفع اخوتنا المتضامنين مع ابراهيم عيسى

ربنا يوفقكم يا ولاد
و يكون البانر وش الخير عليكم و عليه
...................
البانر التالى مناسب جدا لموضوع حرية الصحافة


حاجة زى كده
تفتح النفس
و كلكم مفهومية
و رخيص مش غالى
حيوفر لكم تمن اربع جرايد
.............

اهدى هذا البانر لحركة كفاية
تعاونا و حبا
و شفقتن بيك يا رمضان

ربنا يوفقك
يا جورج
ربنا يوفقك
...................

اما اخوتنا بتوع الفتنة الطائفية
فانا منستهمش
فده املهم فى الحياة

ربنا يوفقكم
و تولعوا فيها

........
مقدرش انسى اخويا فى الايمان و صديقى من ايام الديزة
مينا .... مراقب مصرى
البانر ده علشانك يا مينا
و علشان يرصع مدونتك

............

اما نوارة حبيبة قلبى
انا عارف انها بتحبه
اهه ... يا ست نوارة
بيعترفلك بالى فى قلبه

................
طبعا مسك الختام
مقدرش انسى اخوتنا
علشان ميقولوش انى بتاع تفرقة و اكمنى مختلف معاهم
يقولوا انى نسيتهم
ابدا ........ انتم فى القلب
الى .... الاخوان المسلمين



ربنا يسعدكم و يوفقكم

...........
ربنا دايما يقدرنى على فعل الخير
و اى حد عايز اى بانر
انا فى الخدمة
...............
عندى حاجات كويسة جدا عن التحرش الجنسى
بس مش للنشر
علشان نشرها صعب شوية
ايون .... يا ليئيم
فهمتونى طبعا
..........
اتخنقت من البانرز
اتخنقت

Tuesday, October 23, 2007

فريدة ندهت سعد

-1-
why playin angel
if
i can play god ?
........
demi moore
charlie's angel
-2-
اذا حاول احدهم اغتصابك و لم تستطع المقاومة فحاول ان تستمتع
........
شعار عربى لهذه المرحلة
-3-
فريدة ندهت سعد
هذا قالت امى عندما علمت بوفاة عم سعد
و فريدة هى والدة سعد
اصلها كانت بتحبه قوى و كانت عايزاه جنباهه
يا ماما ده كان 82 سنة
انت متفهمش فى الحاجات دى فريدة ندهت سعد... خلاص !...فهمت
خلاص يبقى
فريدة ندهت سعد
-4-


رمان و لاب توب و كتب و اشياء اخرى

-5-
خديهم على تحت يا حماتى علشان يعملوا بروفة
و انا كمان حاجى معاهم
حتعمل ايه ؟
حسقفلهم
خلاص ... بدل حتزودوا الايراد ... تعال
يلا يا ولاد .... ربنا يجعل فى وشكم القبو
القبول يعنى

Monday, October 22, 2007

jerusalem

شاهد كيف يفكر
الاسرائيليون
........
حملة اسرائيلية - امريكية
لمنع تقسيم القدس
........





................
اقرأ الوثيقة
هنا
........
كل عام و انتم بخير


Hilarious video

شاهدت هذا الفيديو
عند
شباك
.......
استمتعوا
........


Friday, October 19, 2007

A little romance

هى لازم تفهم انى مش مدب

كنت جالس بجوار صديقى على المقهى

امسك لى الشيشة بيد و اشيح بألاخرى فى وجهه

انا مش مدب .... انا مش عارف هى جابت الكلام ده منين

اهدى بس

كل ما اقولها حاجة .... تقولى انا مدب ... حمارة مبتفهمش فى المشاعر

احكيلى ايه الى حصل

اسمع يا سى زفت انت كمان

.........

قاعدين فى الكافيه

قاعدين على ترابيزة مدورة و هى قدامى

قولتلها ادينى جايبك حتت نضيفة اهه مرحتيهاش قبل كده

طلبنا برتقان و موكا هازلنت

و بكلمها يا عم و عمال اقولها الكلام الكبير بتاع المشاعر

و هى غاية فى الغباء

عمال المح لها و اقولها

انا بتصل بيكى كتير و بكلمك كتير

و بسئل عليكى .... لكن مش معنا كده انى مهتم بيكى

انا بعمل كده مع الناس كلها

علشان انا مهتم بالانسان مش بيكى انتى بس

علشان تفهم انى اجتماعى

و هى اخر غباء

اقولها انها تخنت و المفروض تقلل من البيبسى و

تبطل اكل شوية بالطفاسة الى هى فيها دى علشان تفهم

انى مهتم بيها و برشاقتها و خايف عليها من كتر الاكل

و هى اخر حمورية

اقولها حاولى تلبسى لنسيز علشان النضارة دى مبيناكى

عجوزة و مش حلوة على وشك و خصوصا انه مش حلو قوى

علشان تفهم انى باخد بالى من التفاصيل

و دى الى طالع عليها بتخلف

اقولها ان بعض تصرفاتها مش عجبانى و انها بترغى كتير

فى الموبايل

تقولى ... ما انا بكلمك برضه

اقولها ما هو ده قصدى انتى بترغى و بتكلفينى كتير فى الفاتورة

علشان تفهم انى مدبر و اقتصادى

و هى اخر جهل

لما جه الشيك علشان ندفع

كانت حتدفع فاخدت منها الشيك و قولتلها انا الى حدفع

و ضحكت و قلتلها مفهاش حاجة لما ادفع ده كمان

ما احنا المرتين الى خرجنا فيهم انا الى صرفت عليكى

علشان تفهم انى جدع معاها

و هى نازل عليها بغباء

قعدت تحكى فى القراءة و الثقافة

و انت عارف محسوبك تقيل فى الحاجات دى

لغاية ما قلتلى على الكاتب الى بتقراله دلوقتى

و مدى حبها ليه و بكتاباته

قلتلها انه حمار و الى بيقروله بهايم

علشان تفهم انى مثقف و دارى بما يدور فى الساحة الثقافية

و مطلع على جميع الكتاب و الاصدارات

و لا حياة لمن تنادى

دفعنا الشيك و خرجنا

سيبتها عند الباب و لما قالتلى مش حتوصلنى

قلتلها لأ طبعا

سيبتها فى الشارع و ركبت العربية و مشيت

علشان تفهم انى مش مدلوق عليها

حلو لحد كده يا عم ؟

.............

شوف بقى غباوتها الى جيه

محدش بيعمل كده مع بنت علشان يبينلها حبه

مفيش رومانسية اكتر من كده بروح امها

عاطفة و اشواق و حب على ابوه من الاصلى

قلت اكلمها بالليل و انهى الموضوع و اقولها

انى معجب بيها و الكلام الاهبل ده بتاع الارتباط و الحب و الجواز

و انها هى الكسبانة و الموضوع حيقع على بخسارة

كلمتها و قلتلها الكلمتين

قالتلى انى ظريف و طيب بس هى عايزة واحد رومانسى

ضحكت و قلتلها

انتى حمارة بقى .... هههه .... كل ده و مش رومانسى

انتى لازم تعملى اختبار ذكاء .... ههههه ..... غباء غريب

دا انا وديتك اماكن مرحتيهاش و صرفت عليكى

و كلمتلك عن وشك و جسمك يا تخينة ... هههههه

دا احنا مثقفين زى بعض و بلاش كده

و لا لازم تحملى منى علشان نتجوز .....هههههه

عجبتنى قوى اخر جملة دى .... رحت عديتها تانى

سكتت كتير

و قعدت اقول

الو الو الو

و محدش رد

قفلت و اتصلت بيها و محدش رد

و فى الاخر البنى ادمة

تبعتلى مسج تقولى

" انت مدب ... مدب ... و مبتحسش .... انت مدب ... مبتفهمش" .... شفت

اخرتها

انا مدب

بنت غبية.... مبتفهمش .... مبتفكرش

........

فى حمورية و غباء كده .... قولى

فى حد كده ؟

...........

Thursday, October 18, 2007

track of the week

lena shamamyan
.....
لينا شماميان
.....
بالى معاك
......
اذا رغبت فى المزيد
اضغط هنا
.........
استمع لها
.........






.......

Wednesday, October 17, 2007

الولد الشقى


محمود السعدنى

رب الكتابة الساخرة

لا اعرف ماذا اكتب عنه

انا احب هذا الرجل الى المنتهى

ابكى كلما تذكرت صمته الحالى

و تجاهل اجهزة دولتنا العظيمة له

اكتفت دار الهلال بأصدار عدد خاص عنه


.......

محمود السعدنى

اعشق هذا الرجل

و كتابات هذا الرجل


........

ادخل هذه المدونة

و قم بتنزيل اهم كتابات السعدنى

......

حكايات قهوة كتكوت

.......

وداعا للطواجن

...........

الطريق الى زمش

........

مذكرات الولد الشقى

............

صامت هو الان .... لا يتكلم

يسخر من احوالنا بصمته

........

لا اعرف ماذا اقول عن هذا الرجل

انه اسطورة الكتابة الساخرة

......

الف سلامة

الف سلامة

Monday, October 15, 2007

facebook


الفيس بووك

Facebook

........

كلنا تقريبا على الفيس بووك

فى اثناء بحثى عن بداياته وجدت

قصته كاملة

عند السندباد

اقرأ عن بدايات الفيس بووك

القصة كاملة

............

الجزء الاول

قصة بداية موقع الفيس بووك

........

الجزء الثانى

رحلة الحظ الى كاليفورنيا

..........

الجزء الثالث

وجها لوجه مع فوهة مسدس

........

الجزء الرابع

الحلقة الاخيرة

Sunday, October 14, 2007

من الركابى الى الوثيقة ... يا قلبى لا تحزن

قرأت هذا المقال عند جبهة التهييس الشعبية

و هو بعنوان

هى دى اوروبا يا هبلة ؟

و قد صدمت تماما عند قراءة المقال

المقال عبارة عن صراع بين مدرستين

المدرسة الدينية و المدرسية العلمية

او اختلاف بين نظريات الخلق و التكوين

المدرسة الدينية صاحبة .... نظرية الخلق

و المدرسة العلمية .... بنظرية التطور و الأنتقاء الطبيعى

فهو بأختصار شديد

يدل على ردة و رجعية و قمة فى التخلف

ان يعود الاوروبيون الى عبادة الاوثان

لذا فانى قد طلبت منها لينكات الموضوع

حتى اقراه من مصدره و قد قامت هى مشكورة

باعطائى اللينكات

..........

اللينك الاول

لكاتب اسمه

زين العابدين الركابى

و اسم المقال المنشور فى الشرق الاوسط

انتصار للمعرفة العلمية ...ام عودة لوثنية ( تعدد الالهة ) ؟

اللينك بطىء ... يأخذ وقت طويل حتى تظهر الصفحة

برجاء قراءة اكثر من مقال للوقوف على فكر الكاتب

ستجد مجموعة من مقالاته فى اقصى اليمين اسفل صورته

فى صفحة مقاله

.......

اللينك الثانى

من البرلمان الاوروبى و هى بعنوان

خطر الخلقية على التعليم

او

خطر نظرية الخلق على التعليم

The dangers of creationism in education

..............

بعد قراءة الثلاث مقالات السابقة لى بعض الملحوظات

-1-

تتكلم الوثيقة الصادرة من البرلمان الاوروبى عن خوفها من انتشار

نظرية الخلق او تطورها .... نظرية التصميم الذكى (intelligent design )

و ان تلك النظرية تخالف العلم كلية و انهم يرفضون تدريسها فى الجامعات و المدارس

و ان انتشار تلك النظرية يهدم العلم و البحث العلمى و التطور الدوائى

و يؤثر بالسلب على النظر الى الطبيعة و الخلايا و الباكتيريا و الامراض و عقول الاطفال

و الحرية و حقوق الانسان و الديموقراطية و كل هذا الكلام ... كما قرأتموه

...........

-2-

لا اعرف من اين اتى السيد الركابى بفكرة الوثنية و تعدد الالهة

اذا كان هم يرفضون فكرة ان الكون قد خلق على يد خالق

و انه اتى نتيجة نظرية التطور

فأذا كان يرفضون فكرة اله خالق .... سيوافقون على وجود الهه خالقة ؟؟!!!

كلمة الله لم تذكر اساسا فى مقال البرلمان الاوروبى الا فى شرح نظرية الخلق

على اساس انه الخالق الجزء الخاص بشرع نظرية الخلق

............

-3-

فى الفقرة الرابعة يقول البرلمان

انه اذا كان اصحاب نظرية الخلق يقولون بان نظرية التطور و الانتقاء الطبيعى

لم تكتمل و لا توجد ادلة كافية عليها

فأن نظرية الخلق من اساسها غير علمية

4. Creationists question the scientific character of certain items of knowledge and argue that the theory of evolution is only one interpretation among others. They accuse scientists of not providing enough evidence to establish the theory of evolution as scientifically valid. On the contrary, they defend their own statements as scientific. None of this stands up to objective analysis.

........

-4-

هناك ازمة دائمة بين العلم و الدين

بين الخلق فى المفهوم الكتابى الدينى و بين نظرية التطور الداروينية و الانتقاء الطبيعى

و هى ازمة و تعارض قديم لم تفجره المقال الخاص بالبرلمان

و لكن ما يدفع للتفكير بعد نهاية القراءة هو نقطتين

الاولى

ما الذى دفع البرلمان الى كتابة هذه " الوثيقة " الان اذا كانت تلك الازمة قديمة

منذ ايام جالليلو كما استشهدت الوثيقة ذاتها ؟

الثانية

الاخ الركابى .... عن ماذا يكتب ؟

...........

-5-

فى الفقرات من 9 الى 28 .... يشرح فكرة التطور

مبسطة و بتحليل علمى بسيط

و فى الفقرات من 29 الى 37 .... يشرح الخلق

..........

-6-

نعود الى السؤال الاول

ما الذى دفع البرلمان الى كتابة هذه " الوثيقة " الان اذا كانت تلك الازمة قديمة

منذ ايام جالليلو كما استشهدت الوثيقة ذاتها ؟

الاستمرار فى قراءة الوثيقة يصلنا الى

هارون يحيى ... التركى !

مؤلف كتاب او مجلد اسمه .... اطلس الخليقة (the Atlas of Creation )

و يبدا هجوم الوثيقة على هذا الهارون و انه ارسل بكتابه هذا الى كافة الدول

محاولة منه لنشر الفكرة

اى ان هذا التركى هو السبب فى هذه الوثيقة

اقرأ الفقرة رقم 54

........

-7-

اذا نحن امام رفض اوروبى للاخوة الاتراك فكرا و شكلا و موضوعا

لماذا ؟

لان الاتحاد الاوروبى من يرفض نظرية الخلق فى وثيقته

تمارس اكثر من نصف دوله نشر نظرية الخلق

و رفض نظرية التطور الداروينى و الانتقاء الطبيعى

راجع فقط كمثال صارخ و واضح

الفقرات رقم 65 و 66و 67و 68 و 69 و 70

الخاصة ببولندا و ايطاليا و روسيا و اليونان و المملكة المتحدة و صربيا

...........

-8-

المرجعية الدينية

على الرغم من اختلاف التوجه بين المدرستين

الا ان الوثيقة تستشهد بالفاتيكان و بمرجعيات اسلامية اوروبية

و الهدف الهجوم على تركيا

كلام بابا الفاتيكان .... فقرة 75 و 76

The Pope rejects both a creationism that categorically excludes science and the theory of evolution, which hides its own weaknesses and does not want to see the questions that arise beyond the methodological capacities of science

و المرجعية الاسلامية .... فقرة78

Islam has never been afraid of science … Islam does not need to be afraid of Darwinism … Islam does not fear the story of evolutions and of the mutations of the human race

ثم يبدأ الهجوم مرة اخرى على تركيا

The Atlas of Creation is the product of a sectarian organisation close to the Turkish extreme right, which disseminates “truths” on glossy paper that have nothing to do with Islam

..........

-9-

اذا هم يرفضون ما يأتى من تركيا رفضا قاطعا

على الرغم من وجود مماثل اوروبى بل و امريكى لنفس الفكرة

و تقابل فكرى بين الكنيسة و المرجعية الاسلامية

بأختصار

الديموقراطية الاوروبية كما هو واضح و جلى

لا تريد انضمام تركيا اليها مهما كان تشابه الافكار

و لكنها لا تقوى على اعلانها صراحة

فيبدأ " التلكيك " لتدمير تلك الفكرة و نسف اى امل او رجاء لتركيا للانضمام

........

-10-

اى ان السيد الركابى كما هو واضح او بالاحرى كما هو ليس واضح

يكتب عن هلاوس لا اعلم من اين يستقيها و لا من اين جاءته

الوثيقة واضحة .... وضوح الشمس و هى لا تحوى اى كلمة مما قاله

ثم انه استخدم وسيلة غريبة

اذ قام بتقرير فرضين بالاتحاد الاوروبى

اما

حنين الى ايام الوثنية

اما

جهل بالحقائق العلمية

حتى يتجه عقلك فورا الى انه حنين الى ايام الوثنية

محاولة بيسطة للتكفير ليس الا

اما انا اقول

يا اخ ركابى

ان تثبت انهم فى حالة جهل بالحقائق العلمية

فأخر حد يثبت انهم جهلاء علميا .... اكيد احنا .... العرب اقصد

لأنه – العلم - لا هو سكتنا و لا حيبقى سكتنا و لا احنا بتوع علم و لا حنتعلم

طول ما حضرتك موجود

اما انه ارتداد الى عصور الوثنية

فسلملى على الوضع الدينى فى المنطقة العربية

الى بيته من زجاج ميحدفش الناس بالطوب

ربك هو الشافى

............

-11-

طبعا انا لا اؤمن بأوروبا و بافكار اوروبا و بلا بمنظومة قيمها

و لست مع لا نظرية الخلق و لا نظرية التطور

كل ما هناك

ان منظومة القيم العربية التى تتبنى هذا الخطاب تسعى بكل هدوء

لتدمير عملية النقد و تحويل عقولنا الى " عقل جمعى " فقط

ان نستمع و نقتنع .... فنرضى و نقبل

فألاخ الركابى قد تعمد استفزاز الناس بدون ان يحترم ابسط القواعد

و هو ان يضع لينك للوثيقة او حتى عنوانها

بل هاجم على طول الخط

طيب يا اخى سيب الناس تقرأ و هم يحكموا

اعتقد ان تلك هى الازمة العربية الحقيقية

لا نقرأ .... نثور فقط .... دون ان نعرف

............

-12-

طبعا انا لا اهاجم جبهة التهييس

فهى تعرف كيف اقدرها و احترمها

يكفى ان تقرأ ما كتبته عنها صحيفة البديل

حتى ترفع لها القبعة و تنحنى احتراما لما تقوم به من خدمة

يحتاج اليها الوطن

كل ما هنالك ان صدمة المقال جعلتنى لا اصدق

و ان ابحث عن الوثيقة لأقرأها

فمقال الاخ الركابى مصيبة لمن يقدر

و انا اعتذر لجبهة لو اتخذ كلامى على انه هجوم

فهى تعرف ما اقصد

اعتذر مرة اخرى

........

شكرا لسعة صدركم

و اعتذر لطول التدوينة

Saturday, October 13, 2007

اقراص فوار

الدنيا فطار

كل سنة و انتم طيببين

......

انا اكلت رنجة و بصل اخضر

رنجة عليها زيت و لمون و طحينة

و تقريبا 15 بصلة خضراء

دماغى نملت ... و اطرافى مفككة

مش قادر اصلب طولى

شربت لتر سفن و لا له لزمة

عم سيد جارنا كعادته كل عام

اتحفنا بطبق كحك محشو و مشتملاته

قلت يمكن يهضم

كلت نصه تقريبا

و بعديه لتر بيبسى

برضه مفيش فايده

مفيش هضم

حموت

عايز فوار

......

قلت

اروق نفسى

و احاول اهضم

 اخدت تلات اقراص فوار
.....

كل سنة و انتم طيبين

روقوا نفسيكم معايا

و خدوا فوار ينفع للهضم

اهضموا معايا

القرص الاول




 

لو دى منفعتش

دى تهضم

القرص التانى




 

 

اما لو الاتنين الى فاتوا مهضموش

دى اكيد حتشتغل

القرص التالت


Friday, October 12, 2007

1428



غدا الاول من شوال 1428 هجريا

يحتفل مسلمو هذه الدولة و هم اكثرية

بعيد الفطر رقم 1428

و هو كما نعلم دليل تسامح قوى و شهادة

مستحقة للوحدة الوطنية

بان تركنا نحن مسيحيو هذه الدولة هؤلاء

المسلمين يحتفلون بعيدهم لوحديهم

......

بدءا من الغد

سيبدأون فى اكل الكعك وحدهم

و ستنتشر رائحة السمك الذين ياكلوه وحدهم ايضا

و ستنتشر البهجة و السعادة و تعم ارجاء الوطن

و يا ليلة العيد انستينا

........

مش كفاية بيعرضولهم مسلسلات طول الشهر

و افلام جديدة فى السينما على العيد

و كمان ياكلو كحك و بسكويت و بتى فور لوحديهم

حرام

و يا ريت فى مصلحة جية من وراهم

طبق كحك

عزومة سمك

شوية بمب

خروجة نضيفة

لأ .... كل حاجة بيعملوها لوحديهم

ماشى .... ماشى

مش كفاية سيبناكم تحتفلوا بالعيد 1428 مرة و مفتحناش بقنا

ماشى .... ماشى

ده غير خراب البيوت

لأن بما انهم اكثرية .... فشوف حتهنى كام واحد بالعيد

كتير .... يا خراب بيتك من مكالمات الموبايل

انما بما اننا اقلية .... فشوف هما بيدفعوا قد ايه موبايل

لما يهنونا بالعيد .... كلام فارغ

حرام

....

على العموم

انا حطلع احسن منكم

و بدون حقد و لا طمع فى اى طبق كحك يكون محشى عجمية و لوز

انا حقولكم

كل سنة و انتم طيبين

و ربنا يعود الايام علينا و عليكم بخير

و يارب يبقى عيد سعيد على كل المصريين .... مسلمين و مسيحيين

....

ممكن يا رجالة

اقضى التهانى بكرة رنات بس و لا لازم اتصل ؟؟؟؟؟؟؟؟

العملية ناشفة و مشفناش منكم حاجة

..........


كنت عايز احطلكم صورة الخروف

زى ما بيحصل معانا فى التلفزيون المصرى

يهنونا بالعيد الكبير فى العيد الصغير و العيد الصغير فى العيد الكبير

بس قلت يطلعلنا واحد اخونجى او سلفى مبيفهمش التهريج

يهاجمنا ولا حاجة

........


و مرضتش برضه احط صورة عيد مبارك

لبتوع المعارضة يقاطعوا المدونة علشان كلمة مبارك

..........

عملت كل احتياطاتى

.......

كل سنة و انتم طيبين

و مصر كلها بخير


Tuesday, October 09, 2007

هامديلله الا السلاماه

عصام العريان

خرج عصام العريان من السجن

اقرأ عن عبد المنعم محمود

مدونة انا اخوان

.......

انقل لكم جزء مهم من التدوينة

مهم فى نظرى

" وحول رأيه في إغفال البرنامج لرأي واضح في مسألة ولاية الأقباط والمرأة لرئاسة الجمهورية قال أن ساد رأي ألا يتطرق إلي هذه النقاط ويترك التعامل معها للقواعد العرفية في الدستور والتي قد لا تكون مكتوبة لكنها أقوي بكثير في التطبيق من النصوص المكتوبة وضرب مثالا بأمريكا فلا يمكن أن يحكمها رئيس كاثوليكي وهذا طبقا للقواعد العرفية في الدستور الأمريكي والمرة الوحيدة الذي جاء كاثوليكي لحكم أمريكا هو كنيدي والذي قتل بعد عام ونصف من رئاسته للولايات المتحدة

ومع ذلك العريان وافق علي تصريحات قيادات الجماعة المتداولة في وسائل الإعلام بعدم جواز ولاية الأقباط والمرأة لرئاسة الجمهورية وعبر أن هذا ليس معناه كفرا بفكرة المواطنة فالمواطنة مشروطة بضوابط عامة لا يجب تجاوزها فمثلا رئيس الجمهورية لابد أن يكون سنة أربعين سنة وقال المواطنة معناه المساواة بين الأفراد أمام القانون والدستور و في الشئون العامة

وأكد العريان حسب نص قوله : "أما فكرة أن واحد يبقي رئيس جمهورية أو واحدة تبقي رئيسة جمهورية أنها لا تخدش فكرة المواطنة وهو تزيد في الموضوع "

وسألته بوضوح هل معني ذلك أن المواطنين المصريين المسيحيين لا يحق لهم الترشح لرئاسة الجمهورية

فأجاب : " أه زي ناس كثيرة بلاد كثيرة جدا عندهم نصوص بتمنع ذلك مثل ماليزيا فيها دستور بينظم ذلك أن الملايو لهم حقوق والباقي لهم حقوق أخري "

................

انا مش عارف ايه حكاية ماليزيا معاهم

مرة المرشد العام السيد مهدى عاكف يستشهد بيها

و ادى السيد عصام العريان كمان بيستشهد بيها

لو عجباهم اوى يروحوا يقعدوا فيها و يروقوا نفسيهم

يستريحوا و يريحوا

بدل ما هم حارقين دمهم كده

و ماليزيا راحت ... ماليزيا قالت ... ماليزيا عملت

يشوفوا مهاتير و ربنا يوفقهم

.............

على العموم بعض الكلمتين دول

حمد الله على السلامة يا اخ عصام

حمد الله على السلامة

..........

بلدى و مقدرش ابقى فيها اى حاجة

علشان بتوع ماليزيا ممكن يقولوا ان

كده خرجنا عن قانون ماليزيا ولا حاجة

ممنوع مسيحى يوصل لأى ولاية علشان عصام العريان

خرج من السجن و معجب بماليزيا البلد

........

و بعدبن حتى لو وصلنا .... كبرنا اوى سنة و نص و حنتقتل

زى ما حصل مع كنيدى ( مش هو الى استشهد بالحادثة دى )

الحدق يفهم قصده ايه

..........

المشكلة انى ضد سجن اى حد

و طبعا سجنه ميعجبنيش حتى لو انا مختلف معاه

بس مش عارف اقول ايه

..........

حمد الله على سلامتك يا سيدى

حمد الله على سلامتك

.............

عبد المنعم محمود بجوار
عصام العريان ماسكا تليفون ماليزى
يتحدث مع الناس بتوع ماليزيا
الذين يهنئونه بالخروج من السجن
( هامديلله الا السلاماه ) الى هى حمد الله على السلامة بالماليزى