غدا الاول من شوال 1428 هجريا
يحتفل مسلمو هذه الدولة و هم اكثرية
بعيد الفطر رقم 1428
و هو كما نعلم دليل تسامح قوى و شهادة
مستحقة للوحدة الوطنية
بان تركنا نحن مسيحيو هذه الدولة هؤلاء
المسلمين يحتفلون بعيدهم لوحديهم
......
بدءا من الغد
سيبدأون فى اكل الكعك وحدهم
و ستنتشر رائحة السمك الذين ياكلوه وحدهم ايضا
و ستنتشر البهجة و السعادة و تعم ارجاء الوطن
و يا ليلة العيد انستينا
........
مش كفاية بيعرضولهم مسلسلات طول الشهر
و افلام جديدة فى السينما على العيد
و كمان ياكلو كحك و بسكويت و بتى فور لوحديهم
حرام
و يا ريت فى مصلحة جية من وراهم
طبق كحك
عزومة سمك
شوية بمب
خروجة نضيفة
لأ .... كل حاجة بيعملوها لوحديهم
ماشى .... ماشى
مش كفاية سيبناكم تحتفلوا بالعيد 1428 مرة و مفتحناش بقنا
ماشى .... ماشى
ده غير خراب البيوت
لأن بما انهم اكثرية .... فشوف حتهنى كام واحد بالعيد
كتير .... يا خراب بيتك من مكالمات الموبايل
انما بما اننا اقلية .... فشوف هما بيدفعوا قد ايه موبايل
لما يهنونا بالعيد .... كلام فارغ
حرام
....
على العموم
انا حطلع احسن منكم
و بدون حقد و لا طمع فى اى طبق كحك يكون محشى عجمية و لوز
انا حقولكم
كل سنة و انتم طيبين
و ربنا يعود الايام علينا و عليكم بخير
و يارب يبقى عيد سعيد على كل المصريين .... مسلمين و مسيحيين
....
ممكن يا رجالة
اقضى التهانى بكرة رنات بس و لا لازم اتصل ؟؟؟؟؟؟؟؟
العملية ناشفة و مشفناش منكم حاجة
..........
كنت عايز احطلكم صورة الخروف
زى ما بيحصل معانا فى التلفزيون المصرى
يهنونا بالعيد الكبير فى العيد الصغير و العيد الصغير فى العيد الكبير
بس قلت يطلعلنا واحد اخونجى او سلفى مبيفهمش التهريج
يهاجمنا ولا حاجة
........
و مرضتش برضه احط صورة عيد مبارك
لبتوع المعارضة يقاطعوا المدونة علشان كلمة مبارك
..........
عملت كل احتياطاتى
.......
كل سنة و انتم طيبين
و مصر كلها بخير
كل سنة وانت طيب
ReplyDeleteأكلت طبق الكحك والبتي فور والغريبة اللى بعته لك على فيس بوك ؟؟
اجري الحقه قبل ماحد يعلقه من على الحيطة
كل سنة وانت طيب
ههههههههههه
ReplyDeleteوحضرتك بالصحه والسلامه
لفته اطيفه بجد
بس يا ساتر هو الحقد كمان في الكحك يا عم المحلات مفتوحه للكل والمسلسلات معروضه للجميع وكمان السينيمات
ههههههههههههه انا بخصوص مكالمات الموبايل ياعم احنا عندنا يومين يتما
لكن انتو طول السنه صيام وفطار
وحد زعف
وهابي استر
وشم نسيم
طب تصدق انا مسجلاهم عشان منساش وبعيد علي جارتي واصحابي المسيحيات في كل عيد ومناسبه
وبرضه الفاتورة بتجمع
تحياتي من غير حئد
كل سنة وانت اطيب يا أحلى قبطى ومسلم ومسيحى وملحد فى الدنيا كلها
ReplyDeleteكل سنة وانت طيبة يا عم رامز ، ربنا يجعل أيامك كلها محشية عجمية باللوز ومتزوقه بالسكر ، وبعدين لما انت بتتصل بصحابك عشان تعيد عليهم مين اللي بيستنفع مش ساويرس
ReplyDelete:DDDDDDDDDD
كل سنه وانت كمان طيب
ReplyDeleteودايما يارب تكون بخير
كل سنة واحنا كلنا طيبين يا رامز
ReplyDeleteوعيد سعيد علينا كلنا
وقضيها ميسدات ياعم ولا يهمك
رامز- لو اي حد جابلك طبق كحك اعمل حسابي ماشي
ReplyDeleteوانت طيب يا عم ورنات وكده
اية دةةةةةةةة؟؟
ReplyDeleteعيد مبارك؟؟
كل عيد ورمضان يبقا مبارك؟
هم خلاص؟
خصخصوا رمضان والعيد؟؟
أعاااااااااا
.................
كل سنة وانت طيب
يلا بقا وأمرنا لله
اعتبرها من صدقة العيد
ماهو الابتسامة فى وجة أخيك صدقة
ماشى
لو عالعزومة أعزمك انا على الحاجات اللى قلتها دى كلها
ميتنقطعش من بيتنا
(وش مفروس)
bella
ReplyDeleteكل سنة و انت طيبة
بنت القمر
طيب كويس
يعنى انا ضمن حد يعيد على فى العيد
مصلحة برضه
ما انا عايف طبعا
كل سنة و انت طيب يا احلى لا دينى فى الدنيا
ما هى دى الى انت نسيتها
هبة
كل سنة و انت طيبة
هو صحيح ساويروس بيستفيد
بس هو مش بيعيد على البخيل
رأفتولوجى
كل عام و انت بخير
تسنيم
بيب
ميسد اهه زى ما طلبتى
كراكيب
كل عام و انت بخير
فين الرواية الجديدة ؟
شهروزة
ما انا مرضتش احط كلمة رمضان مبارك محدش يقاطعنى اهه
.....
كل سنة و انتم طيبين
الآن فقط بدأت أفهم طبيعة المجتمع المصري
ReplyDeleteالمشكلة الدينية...!
مسيحي، مسلم....
إذا احتكمتم للدين فستختلفون، اجعلوا المصلحة الوطنية فوق كل الاعتبارات
كل عام وأنتم بخير، ليس بمناسبة عيد المسلمين، ولكن هذه المرة بمناسبة التعليق.
هههههه
ReplyDeleteو الله انت مالكش حل