نورماندى تو

و الأن , أيها الأخوان , المجتمعون فى هذا الصوان , من سالف العصر و الأوان , أهدى حسن أفندى القبطان و أبن حميدو أفندى القرصان المفتاح الذهبى للباخرة العظيمة ... نورماندى تو .. تو ... تو

---

عبد الفتاح القصرى

فيلم أبن حميدو

---

الأهداء

الى المعارضة و الموالاة فى لبنان

---

تناكُح

لبنان يتناكح فى سبيل المجد

---

مصر رجالتها بخير

الصراحة , قد تكون هذه التدوينة هى اخر ما أكتبه , قد تكون اخر تدوينة .

و الأسباب فى كده كتير و لكن اهمها :

-1-

أنى خالفت مبدأ شخصى و هو انى لا اهاجم شخص و لكنى أختلف فقط – ولا أهاجم -  مع أفكاره و أراءه , و لكنى فى هذه التدوينة أهاجم شخص بعينه لفعله المتنافى مع اى أنسانية او رجولة .

-2-

انى خالفت مبدأ أخر و هو انى لا أهين أحد او " أشتم " أو " استعمل الفاظ خارجة " و لكنى فى هذا البوست قد يفلت منى أو من اى شخص اخر لفظ خارج .

-3-

ان البعض مِن مَن يبحثون تماماً عن أشعال الحرائق , سيحولون هذا البوست - و أنا مش عارف أزاى بس هم شطار فى الموضوع ده – سيحولونه الى خلاف دينى . و متسئلنيش ازاى ؟ هم عارفين سكتهم .

و لكن من قبل ما تقرأ البوست و مش تهريج الى حقوله ....

الى ضغطه عالى أو عنده السكر او سريع الغضب أو لسانه فالت , ميردش علطول .... يهدأ شوية و بعد كده يكتب الى هو عايزه . لأن الى حتقروه يحرق الدم بجد ...!

=========

يقول الشاعر ( و هى مهنته كما يقول ) صاحب هذه المدونة أنه أثناء عودته الى منزله و كان مشغل الموبايل على سورة ال- عمران , وجد فتاة مغتصبة . و لما طلبت الفتاة المغتصبة منه المساعدة رفض و الحت البنت عليه و كانت كما يقول بنت ناس متبهدله خالص وشها بينزف و شفتها وارمة و بتتكلم بصعوبة و لما ألحت عليه تانى رفض و قالها مينفعش يمسك أيديها و طبعاً لأن الموبايل كان شغال على سورة ال- عمران – الى بتتكلم عن العذراء مريم و حملها الأعجازى و الى البنت دى كانت زيها عذراء قبل مما يغتصبوها – مهنش عليه يوقف القراءة و يتصل لا بالبوليس و لا حتى بالأسعاف , و وقف يتخيل منظر الشباب و هم بيغتصبوها و قام بعملية تنظير سريعة كده عن انها ضحية نظام فاسد و سابها و مشى . و لأنه شاعر مرهف الحس , روح البيت و جلس بكل هدوء الرجال و الشباب الملىء بالنخوة يكتب تدوينة فكرية تنظيرية أيديولوجية يحمل فيها الفتاة و المرأة  عامة مسئوليتها عن الأغتصاب لأنها مخدوعة بما اطلقوا عليه الحرية و انها لابد من دافعة للثمن لخروجها الى سوق العمل .

و لان هذا الشاب هو من النوع المملوء بالرجولة و النخوة و من النوع الى بيقول وا-أقصاه , و مستعد يستشهد فى سبيل تحرير القدس و يعشق الجهاد فى سبيل تحرير الأراضى العربية من المستعمر الأمريكى- الصهيونى , لكنه ميقدرش يمسك أيدها لشدة ورعه ,  فأقدر أقول و بكل هدوء أن : مصر رجالتها بخير ...!!!

------

اليكم تدوينة الرجولة و النخوة و الشهامة و الكرامة

اليكم تدوينة الشعر و الادب و النثر

اليكم تدوينة المحبة و السلام و السماحة

اليكم تدوينة الأيديولوجيا و التنظير و الفكر و التفكير

التدوينة التى ستعيد الى الشباب العربى امجاد الماضى و حضارة المستقبل

التدوينة بعنوان : عفواً سيدتى .

=========

طبعاً علشان مظلمش حد , فى ناس كتير ردت عليه و ناقشته و هاجمته و كتبت الى ما يتكتبش هجوما و تجريحاً و توضيحا و غضباً و أنفعالاًً , و لانه بيعانى من رجولة مفرطة مسح جميع التعليقات زى ما حضرتك قريت فى اخر البوست و كتب بوست تانى يتهم فيه الناس بالجهل و السلبية , شفت الحلاوة , بيتهم الناس بالسلبية و بيقول فى هذه التدوينة الى بترد على تعليقات الجهلاء و السلبيين من امثالنا : اعتقد ان كلامى لا يوجد به خطأ و لما الكلام معجبش الناس ردوا عليه تانى برضه فراح ماسح التعليقات تانى . و ادى كلامه الجميل الى بيقول على المعلقين أنهم بقوا سلبيين فى المجتمع , احنا و الحمد لله سلبيين و سبنالك الأيجابية و الرجولة كلها . البوست التانى .

=========

و لما لقى الناس فى كامل غبائها و محدش مقدر رجولته المفرطة و تنظيره المتين و فكره المستنير و لان الناس ولاد كلب جهلاء و بهايم و حمير و محدش فيهم يرتقى لمستواه كتب الجملة الى بتدل على انه مظلوم من شوية رعاع حيوانات , كتب تدوبنة بيقول فيها :

لو جادلنى مئة عالم لغلبتهم ولو جادلنى جاهل واحد لغلبنى
مقولة لعمر بن الخطاب

----

على أساس اننا جهلاء و لاد كلب و هو من العلماء

شوفوا الحلاوة

هو من العلماء و احنا بهايم
----

التدوينة التالتة

.

.

.

.

.

============

 لما كتبت قبل كده فى تدوينة سابقة " فى التعليق رقم أربعة فى ترتيب التعليقات ":

----

" اما المشهد الى انا خايف منه 
انك تطلع الاوتوبيس و انت لابس الكوفية الفلسطينى و تى-شيرت مكتوب عليه غزة فى القلب , تلاقى الناس واقفين صفوف بيهتفوا بسقوط اسرائيل و على الكنبة فى اخر الاوتوبيس واحد بيغتصب واحدة و هى عمالة تستنجد و الناس يبوصولها و يقولوا لبعض " ايه الى ركبها فى عز الزحمة , هى الغلطانة " و بعدين يدوروا و يكملوا هتاف بسقوط اسرائيل 
و بعض ما تشوف المنظر ده الدم يغلى فى نافوخك فتسب للناس و تختلف معاهم ايديولوجيا و تهب لنجدة الفتاة بأنك تسيبها و تنزل الشارع و تدعو لمظاهرة مناهضة لزحمة الاوتوبيس الى اوصلنا الى هذه الدرجة و تهتف بسقوط الاوتوبيس 
هو ده التجديد الثورى الى بيدور عليه المثقفين . "

----

كنت فاكر ان المشهد ده مستقبلى ممكن يحصل كمان 50 أو 100 سنة , واضح انى كنت ساذج لأنه اهه بيحصل و بكل فخر , واحد ساب البنت و كاتب تدوينة " ذات رؤية تهتف مجازاً بسقوط الاوتوبيس " .  شخص بيكتب و زعلان قوى أن محدش مقدر مجهوده العظيم و بيهتف ضد " سلبية المجتمع " . تخيلوا لما واحد يكتب كده و يتهمنا أحنا بالسلبية و يتهم الفتاة بأنها مسئولة عن أغتصابها , ده يبقى أسمه أيه ؟ .

الناس الى هاجمتنى فى البوست السابق و قالت عمر الى أنت بتقوله ده ما حيحصل .

و اهه حصل , رأيكم أيه بقى ؟ .

=========

أسف لحرق دمكم .

انا مسافر انهاردة عندى " أمتحان " فى أحدى المواقع يتوقف عليه الكثير , صلولى .

الصراحة انا مش عارف أركز و حاجة مقرفة جداً و الله يسامحه الى كان السبب . و يمكن أتغيب أربع او خمس أيام سفر , علشان محدش يفتكر أنه هروب ولا حاجة .

أسيبكم فى سلام , و أشوف وشكم بخير .

سامحونى من ألأسلوب ,,,, أنا فعلاً قرفان و بشدة من أنى اكون مدون او حتى مصرى , زى زى البنى ادم العالم الأيجابى المنظر العظيم ده .

--------