ذيل

المفروض ان يتم تنظيف وتطهير كل المؤسسات من بقايا نظام مبارك، وتجديد كل اللجان التنفيذية (الوزارات)...
خيرت الشاطر، فى حديثه لصحيفه الفيجارو. 

---

 

لما مرة واحدة تحب توقف عجلة مثل عجلة دولة بهذه الضخامة، لازم حتواجه حالة من القصور الذاتى تدفعها للأمام، يعنى بعد فترة حتلاقى ان السلطة بتعيد انتاج نفسها حتى لو فى شكل مختلف. علشان نقدر نفهم بنية النظام السابق او بنية الأنظمة او السلطة عامة، ممكن نقول المثال بالطريقة دى:

شخص وصل الى قمة السلطة، الرئيس. هذا الشخص اختار 10 من المقربين اليه ووضعهم فى اماكن هامة  فى الدولة حتى يكونوا سنده ومعونته (نظرية اهل الثقة وليس اهل الخبرة).

تخيل الاتى: كل واحد من العشرة دول حط عشرة من اهل ثقته فى اماكن هامة فى مؤسسات الدولة حتى يضمن الولاء والطاعة للامر و للفكرة وللرئاسة الأعلى. وكل واحد من المائة دول عمل كده برضه اختار عشرة مقربين لنفس الاسباب السابقة للحفاظ على الولاء والطاعة برضه. وهكذا الالف يبقوا عشر الاف، وال10000 يبقوا 100000، وتستمر الحلقة فى كل المؤسسات والوزارات والهيئات حتى فى اصغر فروع تلك الهيئات فى ابعد المحافظات وفى ابعد الكفور والنجوع والقرى النائية...

بتتحول السلطة فى الوقت ده  كما الاخطبوط ذراعه فى كل مكان، بتنقسم خلاياها ذاتيا وبتتكاثر اوتوماتيكيا وبتبقى موجودة فى كل حتة وكل جزء ، من قمة الدولة الى اصغر قاعدة شعبية من المنتفعين. لا تعتمد على المنتمين الى الحزب بشكل مباشر، لكن بقاعدة المنتفعين، حتى لو كانوا المنتفعين دول فى صورة مستهلكين لنمط حياة معين، نمط الحياة ده متوفر لوجود تلك السلطة وهذا النظام، حتى لو ملهمش فى العمل السياسى، لكن شبكة المصالح الاقتصادية بتربطهم بقوى النظام وبيستفيدوا منها... من اول امين الشرطة لغاية رجال الاعمال كلهم جزء من بنية النظام رغم انهم لا يعملوا بالسياسة... لكن مستفدين بشكل ما من السلطة من اول رشوة الامين فى اشارة مرور لغاية ارض لمنتجع سياحى تمنها ومرافقها متاخد عليها تسهيلات...

بعد فترة ومع مرور الوقت والزمن وعند الوصول لحالة الترهل، بيتحول رأس النظام الى "ذيله" وتصبح القاعدة الهرمية، وهى الأضخم بالطبيعة، الى محرك جبار بيدفع الدولة فى اتجاهات رغبات تلك القاعدة ... علشان كده بنية النظام موجودة مستقرة فى القواعد، نظام مبارك سقط ذيله اللى هو مبارك نفسه، مبارك نفسه كان مجرد ذيل لهذه البنية، واول عشرة تحتيه، كمثال مش الرقم بالضبط، هم مجرد جزء من الذيل، علشان كده الحرس الجديد بالحزب الوطنى لم يجد اى مشكلة او خوف من انه يمشى العشرة الكبار زى الشاذلى وامثاله، وبعدها بفترة يمشى مبارك نفسه واستبداله بذيل جديد شاب، دماء جديدة نقية افرزتها القاعدة لتسيير مصالحها. وهو ده اللى عمله العسكر، لم يتردد لحظة، بعد الثورة، بأقصاء مبارك ونجله وحزبه للحفاظ على النظام اللى هم جزء منه ومستفيدين من استمراره، اللى بيفسر بكل بساطة حنين الكثيرين لأحمد شفيق او عمر سليمان.

السلطة بتعيد انتاج نفسها لأن ده جزء من بنيتها، ومن بنية النظام، وهذا النظام بيسعى بكل الطرق لأعادة انتاج نفسه حتى لو فى اشكال اخرى وبتحالفات جديدة، حتى لو كانوا الأخوان، الاخوان هم جزء من السلطة وبنية النظام اللى بتحاول انتاج نفسها وهو ده اللى قصده خيرت الشاطر بحل المؤسسات وتجديد الوزارات. تجديد فى صورة اخوان، عايز يشيل مريدى الحزب الوطنى ويحط اتباعه ومريديه ومحبى الجماعة والمستفيدين من وراها. يعنى من الاخر استبدال المستفيدين من شبكة المصالح السابقة للحزب الوطنى، بشبكة مصالح جديدة للمستفيدين من الأخوان. وهو ده اللى يفسر الحرب الشرسة للدفع بعمر سليمان بأى ثمن. (من رآنى فقد رأى الذى ارسلنى ... كتاب مقدس).

النظام مش مفهوم ضيق مقصور على الحزب الوطنى السابق. النظام هو شبكة مصالح لها نفس الهدف بتكرر نفسها فى دوائر لا نهائية طالما القواعد المحركة موجودة. زى ما قلنا، الحزب الوطنى كان مسيطر على الدولة بتنفيذ سياسات قمعية لخدمة بنيته من رجال اعمال واهداف شخصية ونهب وسرقة واستثمارات للمقربين والحبايب... الاخوان المسلمين نفس النظام، سياسة قمعية واستثمارات للمقربين. يعنى الاتنين نفس النظام بنفس طريقة القواعد وحتؤدى لنفس الهدف فى الاخر...

هو ده المعنى لما كنا بنطالب بحل مؤسسات الدولة، تفكيك مؤسسات الدولة واعادة هيكلتها لأستبعاد اذرع النظام من القواعد لأن السلطة حتعيد انتاج نفسها وحتى ولو فى شكل جديد. وده عكس اللى بيطالب به خيرت الشاطر حتى لو استخدم نفس الكلمات.

الطوفان

وَرَأَى اللهُ الأَرْضَ فَإِذَا هِيَ قَدْ فَسَدَتْ، إِذْ كَانَ كُلُّ بَشَرٍ قَدْ أَفْسَدَ طَرِيقَهُ عَلَى الأَرْض. فَقَالَ اللهُ لِنُوحٍ: «نِهَايَةُ كُلِّ بَشَرٍ قَدْ أَتَتْ أَمَامِي، لأَنَّ الأَرْضَ امْتَلأَتْ ظُلْمًا مِنْهُمْ. فَهَا أَنَا مُهْلِكُهُمْ مَعَ الأَرْضِ. اِصْنَعْ لِنَفْسِكَ فُلْكًا مِنْ خَشَبِ جُفْرٍ. تَجْعَلُ الْفُلْكَ مَسَاكِنَ، وَتَطْلِيهِ مِنْ دَاخِل وَمِنْ خَارِجٍ بِالْقَارِ.فَهَا أَنَا آتٍ بِطُوفَانِ الْمَاءِ عَلَى الأَرْضِ لأُهْلِكَ كُلَّ جَسَدٍ فِيهِ رُوحُ حَيَاةٍ مِنْ تَحْتِ السَّمَاءِ. كُلُّ مَا فِي الأَرْضِ يَمُوتُ. وَلكِنْ أُقِيمُ عَهْدِي مَعَكَ، فَتَدْخُلُ الْفُلْكَ أَنْتَ وَبَنُوكَ. وَمِنْ كُلِّ حَيٍّ مِنْ كُلِّ ذِي جَسَدٍ، اثْنَيْنِ مِنْ كُلّ تُدْخِلُ إِلَى الْفُلْكِ لاسْتِبْقَائِهَا مَعَكَ. تَكُونُ ذَكَرًا وَأُنْثَى. لأَنِّي بَعْدَ سَبْعَةِ أَيَّامٍ أَيْضًا أُمْطِرُ عَلَى الأَرْضِ أَرْبَعِينَ يَوْمًا وَأَرْبَعِينَ لَيْلَةً. وَأَمْحُو عَنْ وَجْهِ الأَرْضِ كُلَّ قَائِمٍ عَمِلْتُهُ. فَفَعَلَ نُوحٌ حَسَبَ كُلِّ مَا أَمَرَهُ بِهِ الرَّبُّ. وَحَدَثَ بَعْدَ السَّبْعَةِ الأَيَّامِ أَنَّ مِيَاهَ الطُّوفَانِ صَارَتْ عَلَى الأَرْضِ. انْفَجَرَتْ كُلُّ يَنَابِيعِ الْغَمْرِ الْعَظِيمِ، وَانْفَتَحَتْ طَاقَاتُ السَّمَاءِ.
 وَكَانَ الْمَطَرُ عَلَى الأَرْضِ أَرْبَعِينَ يَوْمًا وَأَرْبَعِينَ لَيْلَةً. وَتَكَاثَرَتِ الْمِيَاهُ وَرَفَعَتِ الْفُلْكَ، فَارْتَفَعَ عَنِ الأَرْضِ.
فَكَانَ الْفُلْكُ يَسِيرُ عَلَى وَجْهِ الْمِيَاهِ. فَمَاتَ كُلُّ ذِي جَسَدٍ كَانَ يَدِبُّ عَلَى الأَرْضِ مِنَ الطُّيُورِ وَالْبَهَائِمِ وَالْوُحُوشِ، وَكُلُّ الزَّحَّافَاتِ الَّتِي كَانَتْ تَزْحَفُ عَلَى الأَرْضِ، وَجَمِيعُ النَّاسِ. كُلُّ مَا فِي أَنْفِهِ نَسَمَةُ رُوحِ حَيَاةٍ مِنْ كُلِّ مَا فِي الْيَابِسَةِ مَاتَ. وَتَعَاظَمَتِ الْمِيَاهُ عَلَى الأَرْضِ مِئَةً وَخَمْسِينَ يَوْمًا.

ثُمَّ ذَكَرَ اللهُ نُوحًا وَكُلَّ الْوُحُوشِ وَكُلَّ الْبَهَائِمِ الَّتِي مَعَهُ فِي الْفُلْكِ. وَأَجَازَ اللهُ رِيحًا عَلَى الأَرْضِ فَهَدَأَتِ الْمِيَاهُ.  وَانْسَدَّتْ يَنَابِيعُ الْغَمْرِ وَطَاقَاتُ السَّمَاءِ، فَامْتَنَعَ الْمَطَرُ مِنَ السَّمَاءِ. وَرَجَعَتِ الْمِيَاهُ عَنِ الأَرْضِ رُجُوعًا مُتَوَالِيًا. وَبَعْدَ مِئَةٍ وَخَمْسِينَ يَوْمًا نَقَصَتِ الْمِيَاهُ، وَحَدَثَ مِنْ بَعْدِ أَرْبَعِينَ يَوْمًا أَنَّ نُوحًا فَتَحَ طَاقَةَ الْفُلْكِ الَّتِي كَانَ قَدْ عَمِلَهَا وَأَرْسَلَ الْغُرَابَ، فَخَرَجَ مُتَرَدِّدًا حَتَّى نَشِفَتِ الْمِيَاهُ عَنِ الأَرْضِ. ثُمَّ أَرْسَلَ الْحَمَامَةَ مِنْ عِنْدِهِ لِيَرَى هَلْ قَلَّتِ الْمِيَاهُ عَنْ وَجْهِ الأَرْضِ، فَلَمْ تَجِدِ الْحَمَامَةُ مَقَرًّا لِرِجْلِهَا، فَرَجَعَتْ إِلَيْهِ إِلَى الْفُلْكِ لأَنَّ مِيَاهًا كَانَتْ عَلَى وَجْهِ كُلِّ الأَرْضِ. فَمَدَّ يَدَهُ وَأَخَذَهَا وَأَدْخَلَهَا عِنْدَهُ إِلَى الْفُلْكِ.فَلَبِثَ أَيْضًا سَبْعَةَ أَيَّامٍ أُخَرَ وَعَادَ فَأَرْسَلَ الْحَمَامَةَ مِنَ الْفُلْكِ، فَأَتَتْ إِلَيْهِ الْحَمَامَةُ عِنْدَ الْمَسَاءِ، وَإِذَا وَرَقَةُ زَيْتُونٍ خَضْرَاءُ فِي فَمِهَا. فَعَلِمَ نُوحٌ أَنَّ الْمِيَاهَ قَدْ قَلَّتْ عَنِ الأَرْضِ. فَلَبِثَ أَيْضًا سَبْعَةَ أَيَّامٍ أُخَرَ وَأَرْسَلَ الْحَمَامَةَ فَلَمْ تَعُدْ تَرْجعُ إِلَيْهِ أَيْضًا. أَنَّ الْمِيَاهَ نَشِفَتْ عَنِ الأَرْضِ. فَكَشَفَ نُوحٌ الْغِطَاءَ عَنِ الْفُلْكِ وَنَظَرَ، فَإِذَا وَجْهُ الأَرْضِ قَدْ نَشِفَ. وجَفَّتِ الأَرْضُ.
 وَكَلَّمَ اللهُ نُوحًا قَائِلاً: اخْرُجْ مِنَ الْفُلْكِ أَنْتَ وَامْرَأَتُكَ وَبَنُوكَ وَنِسَاءُ بَنِيكَ مَعَكَ. وَكُلَّ الْحَيَوَانَاتِ الَّتِي مَعَكَ مِنْ كُلِّ ذِي جَسَدٍ: الطُّيُورِ، وَالْبَهَائِمِ، وَكُلَّ الدَّبَّابَاتِ الَّتِي تَدِبُّ عَلَى الأَرْضِ، أَخْرِجْهَا مَعَكَ. وَلْتَتَوَالَدْ فِي الأَرْضِ وَتُثْمِرْ وَتَكْثُرْ عَلَى الأَرْض. وَبَنَى نُوحٌ مَذْبَحًا لِلرَّبِّ. وَأَخَذَ مِنْ كُلِّ الْبَهَائِمِ الطَّاهِرَةِ وَمِنْ كُلِّ الطُّيُورِ الطَّاهِرَةِ وَأَصْعَدَ مُحْرَقَاتٍ عَلَى الْمَذْبَحِ،

سفر التكوين

الطريق الى مصر عتيقة

عندما تعرف بوفاة والدتك فى المستشفى، ينبغى عليك تجهيز الأتى:
متعيطش. جهز عدد 5 اظرف بيضاء. بقية حساب المستشفى. عدد 2 صورة البطاقة لوالدتك المتوفية وعدد 2 صورة لبطاقة المبلغ وده لمكتب الصحة لأستخراج تصريح الدفن. تنزل بنفسك تحجز الصندوق الخشبى (ويكون شيك وعليه صليب كبير علشان فى ناس بنت كلب بتبص للحاجات دى وبتقول ده مستخسر فى امه صندوق حلو!!!). كلم ابونا علشان يفتح الكنيسة تانى يوم للخارجة (ده اول ظرف حتحط فيه فلوس)، واتفق معاه انك حتحجز القاعة بالليل علشان العزاء (تانى ظرف)، وتحجز الكنيسة تالت يوم علشان صلاة التالت صلاة صرف روح الحزن (تالت ظرف). روح يا اما لجورج عزيز او طواف تحجز العربية (متنساش تاخد نمرة السواق علشان بيتأخروا).

تانى يوم انزل روح المستشفى من بدرى (على اساس انك نمت يعنى !!!!)، خلص حساب المستشفى علشان يدوك الورقة اللى حتعمل بيها تصريح الدفن (ومفيش حاجة اسمها معلش بعد الدفن اكملكم بعد كده !!!)، خد ورقة الوفاة واطلع على مكتب الصحة اعمل تصريح الدفن (ب20 جنيه). صور تصريح الدقن 4 نسخ. ارجع المستشفى تانى واديهم صورة. متنساش تاخد معاك سبحة وكتاب الصلوات اللى بتحبه امك واحسن فستان عندها كانت بتحبه علشان بعد الغسل تلبسهلها. اوعى تعيط علشان انت راجل ولازم تستحمل. بعد ما تخلص ده كله اتصل بالسواق اللى اتاخر عليك علشان تستعجله فيقولك الطريق واقف. متقفش معاه لأنه ملوش ذنب. اول ما ييجى اتأكد انه معاه الكفن والبرنس. بعد ما تحط والدتك فى الصندوق الشيك ومعاها كتاب الصلوات فى العربية، اجرى هات عربيتك علشان تمشى وراهم لغاية الكنيسة. اول ما توصل الكنيسة (متنساش تسلم ال3 اظرف للسكرتير زى ما اتفقنا) وتحط الصندوق قدام الهيكل على الترابيزة علشان الصلاة، اقعد صف اول. استمع للصلاة بتركيز شديد (علشان ماحدش يقول انك مش بتحب امك وسرحان عيب !!!!). ابونا حيفكرك فى كلمته بأن امك ست صالحة (على اساس انك نسيت !!!) وانها مع القديسين وفى حضن الأباء ابراهيم ويعقوب فى ملكوت الرب وانها تركت ذرية وخلف صالح يرفعوا اسمها (اوعى تفكر بأن لماذا لا يموت ولاد الوسخة علشان عيب تشتم فى الكنيسة). اوعى تعيط علشان انت راجل ولازم تستحمل. اول ما يخلص الصلاة،  اجرى على باب الكنيسة علشان تاخد العزا من اللى بيحبك واللى بيكرهك، من اللى بيحترمك ومن اللى بينافقك، من اللى جاملته قبل كده ومن الناس اللى متعرفهمش. خلص العزا واجرى على عربيتك واطلع ورا العربية اللى فيها الصندوق علشان تتطلعوا على المدافن قبل الغروب. اوصل للمدافن، افتح المدفن ودخلها بأيدك للتربى يستلم منك الصندوق وانت بتسمع صويت الناس اللى حواليك. اوعى تعيط علشان انت راجل ولازم تستحمل. بعد ما تخلص الدفنة، اجرى على باب المقابر علشان تاخد العزا تانى فى والدتك. استحمل الناس اللى حتتخانق معاك علشان انت مستنتش الاوتوبيس اللى جايب بقية الناس اللى كانت عايزة تشوف الصندوق وهو بيخش التربة. متستغربش علشان فى ناس حتتخانق معاك. خد عربيتك واطلع جرى على البيت علشان تاكل لقمة تصلب طولك زى ما كل الناس بتقولك (على اساس انك عندك نفس تاكل وتشرب وخصوصا انك ما اكلتش من امبارح !!!!). اقعد الساعة دى وانزل على الكنيسة وانت رايح متنساش تجيب بن وسكر وشاى وكراتين مياه علشان المعزيين بالليل. اقف مركز وفايق واحفظ مين الناس اللى جاتلك كويس (علشان تبعتلهم الكارت بتاع الاربعين) علشان لو نسيت حد ممكن يزعل منك. متستغربش علشان فى ناس بنت كلب بتزعل. استحمل كل واحد داخل ويفكرك بأنه ابن عم مرات خال والدتك او زوج ام بنت عم والدتك، او جار جدك فى العمارة اللى كان جدك ساكن فيها من 30 سنة. واستحمل كل بارد منهم بيقولك انه زعلان انك نسيته (المفروض تبقى مركز كويس لأن ده عزاء والدتك !!!!). اول ما ابونا يبتدى كلمته فى القاعة، اقعد واسمعه وهو بيفكرك تانى بأن والدتك احسن ام فى الدنيا وان فقدها شىء صعب !!! وان الرب يعزيكم !!!. اوعى تعيط علشان انت راجل ولازم تستحمل. بعد ما تخلص الليلة دى حتكون حكيت اسباب الوفاة 300 مرة كل مرة لشخص يقعد جنبك يقولك إيه اللى حصل دى كانت زى الفل زى ما شفها اخر مرة من 5 سنين!!!. وبعد ما كل واحد يقولك استريحت ويقوم ويمشى اوعى تقول لماذا لا يموت ولاد الوسخة وانت باصصله (عيب طبعا انت فى إيه ولا فى إيه). حتكون سلمت على ناس متعرفهمش، جيران واصحاب واصدقاء وناس جاية تجامل خالك وخالتك وياخدوك من ايدك تسلم على ده وعلى ده وعلى ده (ركز ركز اوعى تتعب او تتخنق او تعيط ده مش حقك). لو حد جه وحضنك وعيط على والدتك لأنها كانت انسانة عظيمة وعزيزة على الكل، انت اوعى تعيط معاه علشان انت راجل ولازم تستحمل ( لأن العياط من حق الجميع الا انت)... خلص وادى الظرف الرابع للواد اللى عمل الشاى والقهوة والميه اللى وزعها على الناس طول العزاء.

فى التالت ، اصحى بدرى (ده لو نمت اصلا علشان بتوع الصعيد وصلوا وحيفضلوا طول الليل يعيدوا ويزيدوا فى سفالة الطب والأطباء) وروح هات الفطار (كرواسون وباتيه وساليزونات وباتون ساليه) واطلع على الكنيسة وبعد ما يخلص ابونا الصلاة وبفكرك بأمك تالت مرة (طبعا انت عارف اوعى تعيط علشان انت راجل ولازم تستحمل). والناس بتاكل فى الاكل اللى انت جايبه بعد الصلاة، حتسئلك نفس الاسئلة فمتنساش تعيد نفس الحكايات اللى حكيتها امبارح لنفس الاشخاص عن وفاة والدتك من غير ما قلبك يوجعك او حتى تعيط (الناس مابتزهقش من حكاية وفاة والدتك ، حظك كده بقى حتعمل إيه)... بعد ما تخلص، متنساش تدى الظرف الخامس للواد اللى حينضف القاعة. روح البيت استنى بقية المعزيين اللى حيقعدوا بكل برود لغاية 10 بالليل يسمعوا منك نفس القصة (اوعى قلبك يوجعك)..

خش نام علشان تستريح ... اه اسف قبل ما تنام نسيت اقولك:

عيط

عيك متتكسفش

عيط علشان دى امك

عيط علشان مش عيب انك تعيط على امك

عيط لأنها ام واحدة فقط هى امك

عيط لأنها ماتت وولاد الوسخة لسه مماتوش

عيط علشان هى اللى ربيتك

عيط لأنها امك اللى ماتت

عيط علشان كنت بتحبها ومش حتشوفها تانى

عيط علشان قلبك وجعك عليها

عيط علشان انت فقدت اعز عزيز عندك

عيط علشان ربنا يعزيك

عيط علشان تفوق وتستريح

عيط لأنك لازم تعيط

عيط وانت بتصلي لها وادعيلها انها تصلي لكم

عيط ... مامتك ماتت وقلبك وجعك عليها ومش حتشوفها تانى وهى عزيزة عليك

عيط علشان بتحبها ومش حتشوفها تانى

عيط...  عيط...  عيط... مش عيب تعيط على امك مش عيب صدقنى

عيط وبعد ما تفوق ، قووم اعمل اى حاجة ... او اكتب اى حاجة (زى ما انا كتبت كده) علشان تقدر تتماسك شوية ...

ربنا يعزي الجميع

الله يرحمك يا امى ... الله يرحمك