عمر

ليه كل حاجة حلوة عمرها قصير ؟!!

ليه كل شىء فى عيوننا دايماً بيتغير ؟!!

---

حمادة هلال

-

 

حناكة المحتاجة

فى حاجة غلط بجد . جايز انا مش قادر ادركها بعقلى الضعيف بس بتؤثر بالسلب على أعصابى .فعلاً فى حاجة غلط .

عن المسخرة الكونية أحدثكم .

=========

ثقافة رخيصة

مصر فيها مسخرة غريبة . و المسخرة المصرية دى ليها أبعاد أسطورية و أذا كان الزمالك هو البعد الكروى ليها , فان التدوين أصبح هو البعد الثقافى للمسخرة دى .

---

ذهبت الى حفل توقيع " مدونات مصرية للجيب " الى كان فى " عمر بووك ستورز"  لمدة خمس دقايق و مستحملتش أكتر من كده . الجو كان حر موت و الريحة " معفنة " بمعنى الكلمة و بدون أى مبالغة . أشتريت نسختين من الكتاب و مشيت علطول . لما روحت فوجئت بالخناقة العظيمة عند هرطقة و كراكيب . و أنا رايح كنت منشغل بأنى ممكن أقابل " احمد مهنى " , بس و انا راجع نسيت خالص موضوع " احمد مهنى " و فكرت فى حاجة شغلتنى لدرجة ان سواق التاكس قالى " انت بتكلم نفسك يا أستاذ " ... كنت مشغول بالكتاب " مدونات مصرية للجيب " 270 صفحة من القطع أقل من المتوسط و أكبر من الصغير و ب4 جنيه !!!!!!! يعنى رجل المستحيل أغلى منه !!!

اساساً , مشكلة مصر هى الثقافة " الرخيصة " , الناس بتقرا الكتب الى على الرصيف و الى بتتوزع فى الأوتوبيسات و القنوات الفضائية من الى بتجيى على الوصلة علشان " رخيصة " رغم انها لا تمثل أى ثقافة فعلية من نوعية " فضائح الفنانات " , " أنحرافات صلاح نصر " , " التاريخ السرى لعبد الناصر " , غير الكتب الدينية و القنوات الى بتقدم ثقافة غريبة . فييجى المدونين الى هم " مدونين " ينزلوا كتاب يدخل فى بند الثقافة الرخيصة .

-1-

تدوينة منشورة من مدونة قصاقيص ورق أسمها " عن فلسطين أتحدث " 1 و 2 .... للمدون "شمعى أسعد " و دى أقدر أنقدها لأنى أعرف شمعى و أتكلمنا مع بعض قبل كده و مش حيزعل . التدوينة مبتقولش أى حاجة و لا بتقدم أى حاجة , كنت كلمت شمعى فى الموضوع ده قبل كده . التدوينة منزوعة من سياقها و من طريقة كتابات شمعى و مبتقدمش أى حاجة . و بالتالى الى حيقراها مش حيستفيد أى حاجة .

-2-

و تدوينة تانية للأستاذ " احمد شقير "  حكاوى اخر الليل , الى أعرفه شخصياً و قابلته و مش حيزعل منى لأنه حيفهم قصدى . منشور له تدوينة اسمها " أستغر الله العظيم " , ملقيتش اللينك بتاعها للأسف , لكن مبتقولش أى حاجة , لأن الى يعرف احمد شقير و يعرف كتاباته " مش حيستفيد أى حاجة " من التدوينة المنشورة فى الكتاب لأنها مش بتقدم احمد شقير و لا فكر أحمد شقير و لا حتى هو عايز يقول أيه .

دول الى أنا أقدر اتكلم عليهم و مش حيزعلوا منى .

تخيل كده جابوا تدوينة من نائل و بيسو و جبهة و مختار و بلو و بنت القمر و أبو فارس و الصارم الحاسم و أسكندرانى كل تدوينة شكل و حطيناهم فى كتاب , حيبقى خربوطلى خالص و الناس حتقول عليهم مجانين و مش بيفهموا حاجة .

يعنى لا الكتاب غالى علشان الدار تكسب , و لا بيقدم نص ادبى متماسك متكامل زى غادة " عايز أتجوز " أو رحاب بسام  علشان نقول انه لازم يبقى رخيص علشان ينتشر , و لا حتى نصوص عن قضية معينة تهدف الى تعريف الرأى العام برأى المدونين فيها ....... مفيش أى سبب يخليك تفهم أى حاجة .

و بالتالى , للأسف الكتاب يخش فى بند الثقافة الرخيصة . مرة " عندما أسمع كلمة مدونات " و مرة " مدونات مصرية للجيب " و ان شاء الله قريب و على أيدين الناس دى حنوصل زى ما قال جيمى-هوود " ل " مشروع مدونات روزاليوسف " !!!

دار " أكتب " ليها أصدارات فى القصة و الرواية والشعر محترمة فعلاً .... لكن الكتاب ده ..... ؟؟؟؟؟؟؟

=========

الأنسان و الحمار

من المعروف ان نهيق الحمار أعلى من صوت الأنسان و دى حاجة طبيعية . لا تعيب الأنسان ان صوته ضعيف و لا تميز الحمار أن نهيقه عالى . لكن تبقى انسان مش صوتك واطى بس لأ و عبيط كمان لو رحت زعقت للحمار و قلتله وطى نهيقك شوية .

---

حناكة المحتاجة

الصراحة لما بتخنق قوى بروح لعكاشة صديقى , اخد الحكمة منه و أروح البيت مستريح نفسياً . رحتله أخر مرة قاللى حكمة العدد

قاللى : عارف حوكة بن حناكة ؟

قلتله : لأ .

قالى : كويس ... امه حناكة بقى .... طلعت " محتاجة "

قلتله : مش واضح .

قاللى : بالظبط .... كده انت فهمت كل حاجة . ممكن تروح دلوقتى

قلتله : ازاى ؟

قاللى : حناكة المحتاجة . تلخص الوضع كله فى مصر , محدش عارف مين حناكة و لا هى محتاجة أيه  ؟  و لا أى حاجة , حتى أبنها حوكة , مش معروف , فهمت ؟ بس لازم كمواطن مصرى سعيد و محترم أنك تلبى الى هى عايزاه , عارف ليه لازم تلبى الى هى عايزاه ؟

قلتله : لأ

قاللى : علشان حناكة محتاجة . فهمت  ؟

قلت : أزاى , مش فاهم ؟

قاللى : تمام , كده ممكن تروح و انا مطمن عليك .

---

قانون المخابرات العامة المصرية لحقوق و واجبات المدونين .

السيد أحمد شقير عايز يخلص على بواقى مخى , بس هو يشكر على انه عرفنى على جمعية " ام ترتر " للمدونين المحنكين . جمعية أم ترتر دى ليها رؤية لا يمكن أدراكها بالعقل البشرى , النص التالى ده من أهم النصوص الكونية الى قريتها فى حياتى :

إلتزام المدونين بحماية الأمن القومي المصري و العربي. وفقا  للقوانين التالية:

1-

القانون رقم 121 لسنة 1975 الخاص بحظر استعمال أو نشر الوثائق الرسمية.

2-

 القانون رقم 35 لسنة 1960 بشأن الإحصاء والتعداد .

3-

 القانون رقم 313 لسنة 1956 المعدل بالقانون 14 لسنة 1967 بحظر نشر أية أخبار عن القوات المسلحة .

شوف بقى البند الى جى ده ......

4-

 قانون المخابرات العامة رقم 100 لسنة 1971

---

النص السابق ده منقول من تدوينة بعنوان  " حقوق و واجبات المدونين " تبع أم ترتر برضه. الواد عكاشة ده دماغه متكلفة , فعلاً حناكة طلعت محتاجة . الناس دى بتروح بالليل و بتنام الضهر و بتتغدى الفجر و بتشرب بعد ما تنام . و لما بتصحى بالليل بتكتشف أنها لسه مرجعتش من هناك . لأ و ليهم رئيس و كافة شىء يرضى رب كريم . فى حلاوة اكتر من كده

شوف النص الحنكولولى ده :

أتــــحــاد الــمـدونـيــن الــمــصـريـيـــن ( تحت التأسيس):
اتحاد يضم كل المدونيين المصريين من مختلف المواقع التدوينية ويعمل على حماية المدونيين وحفظ حقوقهم والعمل على تطوير العملية التدوينية وتبادل الخبرات فيما بين المدونيين و ندعوا الى مراعاة الله عز وجل فى كل كلمة نكتبها او ننطق بها فسوف نحاسب على ذلك ان شاء الله .

--

واحد بيقولك " تطوير العملية التدوينية " و " مراعاة الله عز وجل " ..... يبقى انت اكيد مش حتعرف ترد , الراجل حيطورك و كمان بيجهزك " ليوم الحساب " علشات تبقى صاخ سليم .

تخيلوا كده لما بلو ستون المعروفة بكامل لياقتها فى التدوين تخرج عن شعورها و تكتب " احيه يا سوسو أحيه " يبقى اكيد الناس دى جامدة و احنا مش واخدين بالنا .

الجمال بقى و الى جى من الشمخ الجوانى و طالع لجواب جواب السيكا حاجة من الأصلى فعلاً , الجواب الى جالهم ... أقرأ الجواب و أدعى على أم ترتر

=========

حرام

كان فى موضوع مثار عن الأخت الفاضلة دينا راقصتى المفضلة و هى انها رقصت فى حفل تخرج طلاب احدى المدارس الثانوية . و بعدين عرفت من مارفل انها دى لاسال , أى انها مدرستى الكريمة و هى مش مدرسة ثانوى زى ما كتب الفلاحين , دى مدرسة تخشها من اولى حضانة لغاية ما تخلص ثانوى . و كل سنة بيعملوا حفلة البروم أى حفلة التخرج مش منتشرة زى ما بيقولوا الفلاحين من سنتين بس . فى كل المدارس و الجامعات الأجنبية و المحترمة بيعملوا حفلة تخرج و أسمها بالأنجليش و الفرنسيه " بروم " انا الى مخلص مدرسة من 13 سنة عملولى حفلة بروم .

طبعاً الخلاف اخلاقى , ازاى رقاصة ترقص فى حفلة تخرج طلبة سنهم أقل من 17 سنة و كمان تجيبها مدرسة عريقة ؟ حاجة غريبة و مستفزة فعلاً و تحرق الدم , ولاد اللذينا البعدا , حاجة مترضيش حد , مفيش لا حزم و لا ربط و لا ثبات على موقف , و فعلا ضايقتنى شخصياً لأنها تخص سمعة دفعتنا . حفينا علشان نقنعهم أنهم يجيبوها فى حفلة تخرجنا احنا من 13 سنة و مرضيوش .....  دلوقتى جابوها ! فين الثبات على الموقف ؟ , و كمان معزمونيش ! فين كرم الأخلاق ؟, يا ولاد اللذين هو ده الى بتعلموه للولاد فى المدرسة ؟ لا أخلاق كريمة و لا ثبات على موقف ؟ , دينا حبيتى ترقص فى حفلة تخرج  و بملابس خليعة و كمان مشوفهاش  , يعنى المصايب لما تهل تهل بالجملة . رقصت فى حفلة تخرج مدرستى و كمان بملابس خليعة و مروحش  أحضر الحفلة , حرام . أيه النحس ده ؟ دى ملابس خليعة يا جدعان , ملابس خليعة , مش أى كلام .

=========

دعاء

يا رب , خللى بابا يوافق أروح السينما مع بلبل يوم عيد ميلادى .

يارب , ممكن أروح السينما و أشوف المنتقم و دستة أشرار , و كل فيلم حشوفه حصلّيلك قصاده عشر مرات .

---

نعيم

فيلم بحب السيما

 

 

كلمات سبارتكوس الأخيرة

( مزج أول)

--- 
المجد للشيطان...معبود الرياح 
من قال "لا" في وجه من قالوا "نعم" 
من علم الإنسان تمزيق العدم 
من قال "لا" فلم يمت، 
و ظل روحاً أبدية الألم! 

( مزج ثان) 

---
معلق أنا على مشانق الصباح 
و جبهتي- بالموت- محنية 
لأنني لم أحنها... حية! 
يا إخواني الذين يعبرون في الميدان مطرقين 
منحدرين في نهاية المساء 
في شارع الإسكندر الأكبر: 
لا تخجلوا... و لترفعوا عيونكم إلىّ 
لأنكم معلقون جانبي... على مشانق القيصر 
فلترفعوا عيونكم إليّ 
لربما.. إذا التقت عيونكم بالموت في عينيّ: 
يبتسم الفناء داخلي...لأنكم رفعتم رأسكم ...مرة 
"سيزيف" لم تعد على أكتافه الصخرة 
يحملها الذين يولدون في مخادع الرقيق 
و البحر... كالصحراء... لا يروي العطش 
لأن من يقول " لا" لا يرتوي إلا من الدموع ‍ 
فلترفعوا عيونكم للثائر المشنوق 
فسوف تنتهون مثله...غداً 
و قبلوا زوجاتكم ... هنا ... على قارعة الطريق 
فسوف تنتهون ها هنا... غداً 
فالانحناء مر... 
و العنكبوت فوق أعناق الرجال ينسج الردى 
فقبلوا زوجاتكم...إني تركت زوجتي بلا وداع 
و إن رأيتم طفلي الذي تركته على ذراعها بلا ذراع 
فعلموه الانحناء‍... 
علموه الانحناء‍... 
الله، لم يغفر خطيئة الشيطان حين قال "لا" 
و الودعاء الطيبون... 
هم الذين يرثون الأرض في نهاية المدى 
لأنهم... لا يشنقون 
فعلموه الانحناء‍ 
و ليس ثم من مفر 
لا تحلموا بعالم سعيد 
فخلف كل قيصر يموت: قيصر جديد 
و خلف كل ثائر يموت: أحزان بلا جدوى 
و دمعة سدى 

( مزج ثالث) 

---
يا قيصر العظيم: قد أخطأت...إني أعترف 
دعني- على مشنقتي- ألثم يدك 
ها أنذا أقبل الحبل الذي في عنقي يلتف 
فهو يداك، و هو مجدك الذي يجبرنا أن نعبدك 
دعني أكفر عن خطيئتي 
أمنحك- بعد ميتتي- جمجمتي 
تصوغ منها كأساً لشرابك القوي 
فإن فعلت ما أريد: 
إن يسألوك مرة عن دمي الشهيد 
و هل تُرى منحتني "الوجود" كي تسلبني "الوجود" 
فقل لهم: قد مات ... غير حاقد علىّ 
و هذه الكأس- التي كانت عظامهما جمجمته- 
وثيقة الغفران لي 
يا قاتلي: إني صفحت عنك 
في اللحظة التي استرحت بعدها مني 
استرحتُ منك 
لكنني...أوصيك إن تشأ شنق الجميع 
أن ترحم الشجر 
لا تقطع الجذوع كي تنصبها مشانقا 
لا تقطع الجذوع 
فربما يأتي الربيع 
و العام عام جوع 
فلن تشم في الفروع ...نكهة الثمر 
و ربما يمر في بلادنا الصيف الخطر 
فتقطع الصحراء، باحثاً عن الظلال 
فلا ترى سوى الهجير و الرمال و الهجير و الرمال 
و الظمأ الناري في الضلوع 
يا سيد الشواهد البيضاء في الدجى 
يا قيصر الصقيع 

( مزج رابع )

---
يا أخوتي الذين يعبرون في الميدان في انحناء 
منحدرين في نهاية المساء 
لا تحلموا بعالم سعيد 
فخلف كل قيصر يموت: قيصر جديد 
و إن رأيتم في الطريق "هانيبال" 
فأخبروه أنني انتظرته مدى على أبواب "روما" المجهدة 
و انتظرت شيوخُ "روما"- تحت قوس النصر- قاهر الأبطال 
و نسوة الرومان بين الزينة المعربدة 
ظللن ينتظرن مقدم الجنود ذوي الرؤوس الأطلسية المجعدة 
لكن "هانيبال" ما جاءت جنوده المجندة 
فأخبروه أنني انتظرته... انتظرته 
لكنه لم يأت 
وأنني انتظرتُه.. حتى انتهيت في حبال الموت 
و في المدى: "قرطاجة" بالنار تحترق 
"قرطاجة" كانت ضمير الشمس: قد تعلمت معنى الركوع 
و العنكبوت فوق أعناق الرجال 
و الكلمات تختنق 
يا أخوتي: "قرطاجة" العذراء تحترق 
فقبلوا زوجاتكم...إني تركت زوجتي بلا وداع 
و إن رأيتم طفلي الذي تركته على ذراعها بلا ذراع 
فعلموه الانحناء‍ 
علموه الانحناء‍ 
علموه الانحناء‍