المرشد الأعلى
أية الله عباس العبد فى طفولته
---
لازم نعترف ان الشعب المصرى شعب مش طبيعى بجد و ان مخه ضرب رسمى و أن الهلاوس السمعية و البصرية قد سيطرت عليه لدرجة أصبح الواحد معها خايف من انه يصاب بجنون رسمى . سيبك من اننا الدولة الوحيدة الفخورة بانها ذبحت الخنازير و مازالت مستمرة فى ذبحهم مع ان كل الحالات المرضية اللى ظهرت , ظهرت عن طريق بشر !!! . و سيبك من جنون الناس باننا احتمال ناخد كاس القارات و نخش بعديه على كأس العالم و احنا اساساً موقفنا منيل بنيلة فى المجموعة بتاعتنا بعد هزيمتنا من الجزائر . و سيبك من التحليل النفس- عصبى و الجمهو- ديموقراطى و التفسيرات المصطاباوية – القهوجية لأنتخابات لبنان و اللى تحس معاها أن المصريين كلهم بقوا يقولوا " شو يا زلمة ؟ " .. و إن علشان المصريين هم المحللين الرئيسيين لأنتخابات لبنان , ربنا ستر و محصلش أى اشتباكات طائفية و أن اللبنانيين ربنا هدى سرهم علشان خاطر مصر أم الدنيا !! ..
كل اللى فات كوم و الأنتخابات الإيرانية كوم تانى .. مفيش واحد فى مصر و الحمد لله متحولش الى " أيات الله " .. كل الشعب المصرى من اول راكبى الأوتوبيسات مروراً بمترو الأنفاق و سواقين التاكس وصولاً الى بائعى الخضار و الصحفيين حتى القنوات المتخصصة كلهم بيحللوا الموقف الأيرانى كأن احمدى نجاد و مير موسوى ولاد منطقتهم و واجب عليهم يتدخلوا . و ناس تتكلم عن حق التظاهر و ناس تتكلم عن التزوير و هيصة و مولد و محدش فاهم أى حاجة من أى حد ..
و يا سلام بقى لو ربنا رزقك و قعدت على قهوة و كان فى حد بيحلل أحداث إيران .. يا حالولى .. حتسمع احلى كلام و احتمال تضرب نفسك بالنار فى ميدان عام .. تبقى متابع خطبة خامنئى و قاريلك 5 او 6 كتب عن النظام الأيرانى و متابع الأنتخابات من اولها و طلعان عينك علشان تقدر تُلم بالموضوع يدوبك .. و هوب تلاقى واحد حاطط رجل على رجل و فى إيده كوباية شاى و سيجارة كلوباترا و قاعد دَش فى نافوخ 3 او 4 بنى أدمين بيهزوا فى دماغهم منبهرين بكلام الراجل و كأنهم قاعدين بيسمعوا الخومينى بذات نفسيته !!! . او تركب اوتوبيس و تلاقى واحد ساحل نافوخك بتحليلات سياسية ما انزل الله بها من سلطان و كأنه واحد من أهم خمس ملالى فى طهران !! او تروح الشغل تلاقى واحد جامع زمايلك و بيتكلم عن الأصلاحيين كأن مير موسوى يبقى جوز خالته !!! ..
الجميل فى الموضوع ده أن الكل بيتكلم عن التزوير و الأنتخابات و الحركات "القرعة " الأيرانية دى .. كأننا فى سويسرا و عادى خالص خالص الأنتخابات بالنسبة لينا . لأ و الأحلى انك تلاقى ناس فوجئت يا عين امها و مستغربة – يا قلبى - من أن فى " تزوير " فى الأنتخابات كأنها أول مرة تسمع الكلمة دى . و ناس تانية ( مصريين برضه صدقنى ) مندهشين و حيموتوا أزاى يحصل تلاعب بأصوات الناخبين !!! ..
اللى دمهم خفيف أوى بقى الناس اللى بتدين " منع خروج مظاهرات سلمية " .. كأن المظاهرات فى مصر شىء عادى و ان المواطن بيخرج فى مظاهرة و لا أتنين كل أسبوع ينشط بيها الدورة الدموية و أنك ممكن ب3 جنيه تاخد دورة تدريبية على المظاهرات فى مركز شباب طوخ ! .
احنا بقينا بنفتى فى كل حاجة و نحلل كل حاجة ببساطة مستفزة و كأننا فاهمين فى كل حاجة .. بقينا ممللين و عندنا كم من اللامبالة مش طبيعى .. لدرجة انه أذا كان اليهود بيطلقوا على أنفسهم شعب الله المختار فأحنا لازم نطلق على انفسنا بكل صراحة و وضوح و بدون كسوف :
شعب الله الممل
---
كتبها اليكم :
أية الله الشاه عباس خامئى العبد بهلوى
مرشد ثورة ملالى أم ترتر بطهقان
15 comments:
ابصم بالعشرة
مش بس الناس العادية
لو قريت "تحليلات" الصحفيين "المتخصصين" في الشأن الإيراني و اللبناني حتمسك صفارة و تنزل الشارع تنظم المرور .. مش بس علشان الاستنتاجات العجيبة و الإدانات و التهاني .. بس في كم من الجهل بأبسط الحقايق و المعلومات يخلي الواحد مذهول فعلاً
أنا خلاص صدقت إن اللي بنوا الهرم ناس جت من الفضاء .. و احنا أكيد أحفادهم
بيقول لك أحلى ماتش تتفرج عليه هو الماتش اللي بيلعب فيه فرقتين ما بتشجعهمش بشكل شخصي
ساعتها ممكن تجيب كيس فشار .. أو قرطاس لب .. تخش تطرطر في وسط ما اللعيب ها يشوط البلنتي مش إشكال
أنت جاي تشجع اللعبة الحلوة
الى
المرشد الأعلى أية الله عباس العبد
سيب الشعب يهيص
يا على
و مش عيب تبقى مرشد
وتمارس مهنة الارشاد على الشعب الغلبان
وتقولهم انه ممل
انت هتفتى
أحييك على هذا المقال، ناس بتفتي و احن لازم نشرب ،
انا ناوى افتح حسينية ، شرفونا
:D lol
قداستك، شفت،، هذا الاسم يصلح لكل زمان و مكان و ديانة، المهم و ما علينا
يا قداستك
غير انك مبيعجبكش العجب ولا الصيام في عاشورا، فاانا مستغربة انت ليه مندهش من ام الفلسفة اللي بتنزل على الشعب المصري في ايتها موقف في ايتها مناسبة؟؟
بص
و ما لك عليا حلفان
وغلاوة الفول و الطعمية و كشري ابو طارق اللي بينا
لسه من ساعة كنت بقول لرفيق اننا مؤكد حنتغلب من امريكا النهاردة، يا ترى ليه؟
1- عشان احنا افتكرنا انه و بهزميتنا لايطاليا يبقى خلاص حطينا الكاس في جيوبنا و بقية اللعب دي من باب سد الذرائع
2- بنتهكم على ايطاليا و بنتكلم عن الموضوع و نحلله كما لو كان لينا باع طويل الامد ممتد المفعول ف يهزيمة الفرق و المنتخبات الطبيرة
3- كعادتنا اول ما بنكسب في حاجة بنخسوع و نهدي خالص و نطنش
اما بقى عن الانتخابات الايرانية
فحدث ولا حرج
طبيعي لازم نحلل و انا مستعدة اقطع دراعي من عند الترقوة ان اغلب الشعب المصري فاكر ان الشيعة هما نفسهم الشيوعيين
و دي سمعتها بودني و شفتها بتحصل قدامي مش مرة
ولا اتنين
بل ثلاث مرات على الاقل
فحسبي الله و نعم الوكيل
و هلم بنا نفتح مزار "لطميات" او نكسب من اليلة دي اي حاجة
و دمتم
حفصت مشهدي قم
والله يا قداستك الناس العادية معزورة انها بتفتي لأنها شايفة طول الليل و النهار ناس المفروض ان هي فاهمة وبرضه بتفتي يبقي لما نيجي نعيب علي حد لازم يكون الشخص اللي المفروض ان هو فاهم وبيفتي
وفعلا بقينا شعب الله الثرثار الممل جداا
بس اللي انا مستغربله انك عندك شك في فريقك ومش واثق في انهم ممكن ياخدوا كأس القارات او علي الاقل يوصولوا للنهائي
شوف
احلى حاجة موضوع المفاجئة و سويسرا
هو ده هدف المباراة
جول حلو يا رامز
ساندريل
يا صديقى العزيز الغائب من زمن
كل الناس بتفتى لدرجة انه ساعات الواحد بيحس فعلاً إن الصفارة بقت فى أيده خلاص و ان العربيات بتسمع كلامه و تم ترشيحه للقيادة المركزية لأدارة مرور القاهرة
ههههههههههههههه
===
على باب الله
كلامك تمام .. بس احنا بنطرطر فى وسط ما العالم شغال ديموقراطية
هههههههههه
===
ناقص الحلم
يعنى جت علينا انا فى الأفتا و حُرمت يعنى
سيبونا بقى ناخد فرصتنا
candle cube
لازم نشرب
===
راجى
إن شاء الله
===
كراكيب
لول اللول
===
حفصت
اتغلبنا اهه يا حفصت
علشان يصدقونا بعد كده
تامر
شفت الماتش ؟
استريحت ؟
عرفت ليه بنقول و نعيد
احنا بنفتى حتى فى الكورة
===
الكومى
الله يخليك يا باشا
آية الله عباس
رغم مرورى على مدونتكم اكثر من مره واعجابى بالمواضيع التى تعرض فيها الا ان هذا الموضوع المكتوب بعنايه وبروح الفكاهه والسخريه الغير مبتذله ،كان حقيقيا وصريحا وكأنك مراسل صحفى ينقل الصوره الواقعيه من القهاوى والميكروباصات.. وذكرتنى باستاذ الجامعه صاحب المدونهالذى جادلته فى انهم الايرانيين لديهم قدر كبير من الديمقراطيه فاجابنى بان دكتاتورية نظامنا المصرى افضل من ديمقلراطية ايران الالاف المرات..وعموما سعدت بزيارتك وشكراا
رامز انت غيرت الملة يبني ؟
انا دخلت المدونة لقيت البانر فوق كله ملالي اتفزعت
:))
كل ده من كثر القراية في احداث ايران يخرب عقلك ..اوعي تكون بتنشر خلايا تشيع ف البلد ؟
على فكرة موضوع ايران ده توقيته محير شوية
بس اللي انا فاهمه من بين السطور
هو فشل الاتنين
سواء نجاد او موسوي
لان احتمال تزوير 11 مليون صوت دي واسعة شوية والا كان ليها سابقة قبل كدة
يعني الدورة اللي فاتت لم يحدث اتهامات بهذا القدر من التزوير
اللي انا متخيله ان نجاد لم يفز بهذا القدر من الاصوات يعني مش فارق كاسح
بس فاز
وتبقي لموسوي الذي يعرف ان قطاع عريض من الايرانيين قرف ان يستخدم النتيجة للضغط
بس في النهاية ..لا نجاد ولا موسوي يمثلون ايران كلها كدة لكشة واحدة
برضة من اللي انا برجحه من خلال قراءة مواقع بتحلل مدونات الايرانيين او بعض البوستات الهامة
هو الاحباط من نظام السلطة العلوية اللي كابسة على انفاسهم
وده ف جيل الشباب
بالذات
طبعا فيه احباط اقتصادي
ودولة زي ايران بترولية المفروض انها تحرز خطوات اقتصادية متقدمة افضل
وده محصلشي
قريت تحليلات غربية على ان نجاد بيؤيده الطبقات الاكثر فقرا وبيخالفه الطبقات الاكثر تعليما والمستخدمة للتكنولوجيا الحديثة اكثر ودول حتلاقيهم في الغالب طبقة متوسطة وطلاب ومتعلمين
برضة ان خطاب امريكا الهادئ لم يجعل نجاد قادر على التعلل به كثيرا لاثبات ان ايران في حاجة الى صقر مثله
بتهيالي فيه اسباب كثيرة للي حصل ف ايران
ومش عارف هل التوقيت ده طبيعي؟
واللا لا
فيه شوية اسئلة كدة كلنا بنفتي فيها وما اظنش ان عندنا اجابات
اهو كلنا بنحلل
ناس بتحلل احداث
وناس بتحلل براز
:)
ربنا يوفقك فضيلتك لنشر المذهب العباسي في ارجاء مصر المنهوبة
وكثر الله من ملاليك
امين
Post a Comment