موز

احنا الدولة الوحيدة اللى ما بتقدمش أى حاجة للمواطنين، لا صحة ولا تعليم ومياه ولا شوارع و لا حتى أمن.. كل اللى انت شايفهم دول معاهم باسبورات غربية وتأشيرات مفتوحة وتذاكر طيران جاهزة، أول ما الأكل حيخلص والفيلم ينتهى، كله حيلم شنطه ويركب الطيارة وباى باى كمبورة، ساعتها محدش حيفتكر "مصر هى أمى"، كله حيقولك " خالتى عندكو مجتش؟"..

حيسيبوا الشعب ده يمشى مسيرة الأبل فى الصحراء بس الفرق أن الأبل بيبقى معاها ميه تقتر وتشرب منها اما الشعب فمعاه الغضب والعنف والحقد واليأس هم دول اللى حيقتر منهم.. احنا البديل الوحيد لينا هو جمهوريات الموز الملونة بصبغة دينية نستبدلها كل صباح بجمهورية جديدة بدين جديد، متفتكرش ان بعد الطوفان حيفضل محمد بيحب جرجس، انسى يا عمر، اذا كان الدم كان بيوصل لركب الخيل فانا اضمنلك ان الخيل نفسها حتغرق، محمد حياكل جرجس، والمسلم الغنى حيخلص على المسلم الضعيف، و المسيحى القادر حيفترى على المسيحى الضعيف، ما تفتكرش ان التاريخ حيشفع ولا ابو الهول حيبكى ولا المعابد حتنزل مهدودة على الأرض من الغضب، حتيجى ايام بياض الخروب ولا سوادها، كلام الدين حيتبخر و كلمة " دين امك" هى اللى حتفضل، ولا غضب ساطع حييجى و لا نهار جديد و لا أى سفالات من دى حتفضل، مش حيبقالك لزمة لأنه من الاصل مكنش ليك!!.. هييجى اليوم اللى الرؤوس حتعلق على ابواب ومداخل القاهرة، ونظرية حب الوطن فرض علىّ حتبقى فعلاً فرض واللى حيحصل ساعتها أن سليمان الحلبى فى تربته حيشكر ربنا على موته السهلة البسيطة. انتهى الدرس يا غبى.

---

كلمات رجل عجوز غضبان