Thursday, February 28, 2008

فى مدح جمال مبارك

الاهداء

الى بيسو حتى يتفتح وعيه السياسى

.................

جمال مبارك هو وعى المستقبل رغم انف الساخطين

وعى المستقبل

.............

رجال المستقبل

نحن وجمال مبارك لا نحرث ماء بل نبنى وعى المستقبل فكرا

مخبزة المنهـــــــــج اصطفت صورتة ترســــــــــــــــم قنديل الامل لمســــــــــــتقبل وطــــــــن يعشــــــــــقة جمـــــــال نجتاز بثبات مســـــــــافة رائحة سنين

نسد شقوق تكية زمن يجترة خمــــــــــول نخترق نفق هواء ركـــــــــود الفتنــــــــة بمشيــــــــــمة فكـــــــــر ينســــــــجةجمال مبارك مئــــــــــذنة الصـــــــــبرلكن صناع النقمة،،،،شر برية وطنى،،،،،،يصفـــــــــــوننى،،،،،انى مخدوع ،،،وان ولاءى لجمال قد قيد فكرى واختلط مصبى وصرت معــــــــة وحيدا تلقى على كتفى تبعـــــــــات قرارى قلوب سوداءتدنو بحراب تطعننى بحــــــــــضن الخبث تخت لليأس قبضتهم تتنـــــــــاسل دائرة قنوط ومصـــــــــــــــالح تمتلىء بحبوب لقـــــــــــاح سقيتها احجـــــــــار تيبـــــــــــس سور يحتكر المنصب مجانى البزنس دروع حصـــــــــــــــانة خلجــــــــة سلطةغـــــــــــــرفة نـــــــــوم لغيبوبة مستقبل بلدى

لهــــــــم اؤكــــــــــد

كمــــــــا اكدها من قبل جمــــــــــــــــال مبــــــــــــــــارك

لا يكفينـــــــــا للمستقبل

فقط الفكـــــــــــر

فهـــــــــــذا الفكـــــــــــر يحتــــــــــــاج،،،،،،،،رجـــــــــــــــــــــال

................

مع تحيات

مركز المصداقية للشفافية السياسية

احمد قرة - خبير سياحى و فندقى

gse_multipart32081

لمزيد من الشعر الوطنى الحر و الوعى السياسى

اقرأ فى المدونة

العمود الى فى النص

=================

صديقى ساندريل اتصل بى فى الفجر و صحانى من النوم و هو فى حالة هيستريا و قالى افتح الكمبيوتر و ملانى عنوان السايت

و لما سئلته فى ايه ؟

رد و قالى مفيش حاجة , مش السايت بيحمل ؟

قلته ايوة

رد و هو حيفطس من الضحك : حسيبك انا دلوقتى تعيش مع نفسك و ربنا يصبرك بس امانة , امانة يعنى , تكتب عن الى حتقراه لأنى مش فاضى من كتر الشغل , و تهديه لبيسو علشان المسابقة و قله يعتذر لوائل عباس

......

هذا البوست اهداء لقراء المدونة من صديقى

ساندريل

=================

Tuesday, February 26, 2008

اليهم وحدهم - الى الوحدويين


……….



…………….


صحف من زمن الوحدة المصرية السورية

..........

مختارات من الصفحات الاولى للصحف المصرية

بين 8 سبتمبر 1957 الى 28 سبتمبر 1961

..........

نقلا عن جريدة القاهرة

...............


Sunday, February 24, 2008

الله يخرب بيتك يا هيكل

تصدقوا انا مكنتش واخد بالى خالص

ان محمود صاحب دار سوسن للنشر عمل واجب معايا و انا كنت نسيت رغم انه قالى قبل كده و طلب منى رأى فى صورة الغلاف

محمود مشكورا نشر مجموتى القصصية ( الى تجاوزا نسميها مجموعة و قصصية كمان ) . متشكر جدا يا محمود و كمان شكرا لدار سوسن على الواجب الجامد ده

sawsan logo

انا لسه واخد بالى من انها اتنشرت انهاردة على الرغم من انها منشورة من فترة

..........

اليكم رائعة رامز شرقاوى الى هو انا

تحفتى الخالدة

الله يخرب بيتك يا هيكل

2249766635_319da40bd0

للتحميل

..........

الصراحة انا سعيد جدا

سعيد جدا جدا جدا

....

متنسوش تقروا اصدارات دار سوسن التانية

فى حاجات احلى بكتير من الى انا كاتبه

اقروا كل حاجة

Saturday, February 23, 2008

السياسى

السيد عبد الله كمال رئيس تحرير روزاليوسف

abdullah kamal

........

مدونة السيد عبد الله كمال بعنوان

السياسى

........

موقعه على الفيس بووك

المجموعة التى انشأها على الفيس بووك

و لكن

..............................................

Friday, February 22, 2008

طربوش شريف افنذم

احتجت مشيخة الازهر على ادارة الامن العام المشرفة على الرقابة لسماحها بمشهد لمحمد عبد الوهاب و هو يقبل سميرة خلوصى بطلة الفيلم بينما كان يرتدى الطربوش , و ذلك لأن الطربوش هو شعار مصر القومى .

.........................

الحدث سنة 1933

من كتاب اخبار المصريين فى القرن العشرين

سعيد هارون عاشور

Thursday, February 21, 2008

طرد ناسف طاهر و شريف

الدستور , العدد الاسبوعى رقم 153

الاربعاء 20 فبراير 2008

صفحة 8 و 9

نشرت الجريدة تحقيق بعنوان اسطورة الرجل صفر

تحقيق عن اهم عمليات الاغتيال التى قامت بها الموساد لتصفية بعض العناصر المخابراتية العربية التى ازعجت الموساد ! و منها اغتيال مغنية و العقيد مصطفى حافظ و خليل الوزير و على حسن سلامة

المهم , اقرأ التالى

من المقال المنشور بخصوص على حسن سلامة المعروف بأسم الامير الاحمر :

" استقر ابو حسن بالعاصمة اللبنانية بيروت 1970 و تولى قيادة العمليات الخاصة ضد الموساد فى العالم , و من العمليات التى تسند اليه و لرجاله قتل ضابط الموساد زودماك اوفير فى بروكسل , و ارسال الطرود الناسفة من امستردام الى العديد من عملاء الموساد فى العواصم الاوروبية , ردا على حملة قامت بها الموساد ضد قيادين فلسطينيين , و من الذين قتلوا بهذه الطرود ضابط الموساد فى لندن امير شيشورى "

طريقة اغتيال على حسن سلامة :

" الى ان حانت لحظته عندما نجحت احدى عميلات الموساد و هى رسامة انجليزية اسمها ايركا روفائى , فى مراقبة الامير الاحمر و رصد تحركاته و نقلها الى رؤسائها .

و بأسلوب قذر اعتاد عليه الموساد تم تفخيخ سيارة من نوع فولكس فاجن و ضعت بالقرب من الطريق الذى يمر منه موكب ابو حسن المكون من سيارة شيفروليه و سيارتى رانج روفر , و عندما وصل الامير الى هذه النقطة فى الساعة الثالثة من عصر يوم 22-1-79 ضغطت عميلة الموساد على الزر لتتطاير اشلاء ابو حسن "

...............................

ادينى عقلك بقى

يعنى ارسال طرود ناسفة دى عمليات نظيفة طاهرة و تفخيخ سيارة من الموساد لنسف احدهم دى عمليات قذرة , يا سلام

طبعا انا عارف انه حيخرج على اخوة لا تصالح و حيقولولى :

لا تصالح على الدم.. حتى بدم!
لا تصالح! ولو قيل رأس برأسٍ
أكلُّ الرؤوس سواءٌ؟
أقلب الغريب كقلب أخيك؟!
أعيناه عينا أخيك؟!
وهل تتساوى يدٌ.. سيفها كان لك
بيدٍ سيفها أثْكَلك؟

و حيقولولى انت بتتكلم عن عربى زى اسرائيلى ؟ ازاى تساوى بينهم ؟ انت معندكش احساس بالعروبة ؟ انت مبتكرهش الاسرائيليين ؟ انت مش ضد الصهيونية ؟ انت باين عليك عميل لأحفاد القردة و الخنازير !! يا اما انت تطبيعى معفن يا اما انت من الاعناق الملتوية غربا , و بعدين يطلعلى واحد تكفيرى , و يبتسم ابتسامة ساخرة خفيفة كده غير ظاهرة و يقول فى سره " ههه , ما انت اصلك مسيحى , متفهمش "

......

لو انت عصبى قوى حتقول عليهم صهاينة

لو انت عادى حتقول اسرائيليين

لو انتى يمينى حتقول يهود

لو انتى بقى يمينى متشدد و سلفى حتقول يهود احفاد القردة و الخنازير

....

اخوية لا تصالح حيقولولى

ازاى دم الاسرائيلى زى دم العربى

احب اوضح نقطة مهمة انى مبتكلمش عن حد معين , انا بتكلم عن فكرة القتل , و الموت نفسها

ايه الفرق بين عمليات نسف بالقنبلة الذرية و عملية نسف بسيارة مفخخة و عمليات ارسال طرود مفخخة , سواء الميت عربى او اسرائيلى او امريكى او افغانى او جيبوتى , او حتى مسيحى او مسلم او بوذى

و لما عمليات النسف الموسادى قذرة , ممكن ناخد فكرة عن العمليات الطاهرة النظيفة ؟

......

احنا دايما بنعتبر ان تصرفاتنا هى الصح

شهدائنا فى الجنة و قتلاهم فى النار

فى حين ان اى قارىء عادى قرأ التوراة و دارس لتاريخ اليهود , حيعرف انهم بيقولوا " ان شهدائهم فى الجنة و قتلانا احنا فى النار "

.....

احنا عملياتنا طاهرة و نظيفة و هم عملياتهم قذرة و شهدائنا فى الجنة و قتلاهم فى النار

الجملة الى فاتت دى لو قراها اى حد سواء اسرائيلى او امريكانى او هندى او تنزانى او اسبانى او واق واق , حيقول عليها صح , لانها متوافقة مع رأيه

كل الناس شايفة انه

احنا عملياتنا طاهرة و نظيفة و هم عملياتهم قذرة و شهدائنا فى الجنة و قتلاهم فى النار

...........

عملية التصنيف دى ملهاش حل

نفس الرؤية و الافكار و المبادىء و الاهداف , ممكن يتبناها خصمين او عدوين , و الاتنين يسعوا لتنفيذها و محاولة تطبيقها على الاخر , هم شايفين و احنا شايفين , و اللى احنا و هم شايفينه واحد

ملهاش حل

لمجرد ان عمليات النسف بالطرود بيقوم بيها عربى تبقى " نظيفة " لكن لما يقوم بالنسف اسرائيلى تبقى " قذرة " و كل يغنى على نسفاه

.............

لو عندك جريدة الدستور العدد الاسبوعى عايزك تقرأ لو فاضى يعنى

المقالة المكتوبة عن العقيد مصطفى حافظ و الى على يمنيها علطول عن صبرى البنا ابو نضال

و انت حتعرف انا قصدى ايه و ممكن تعرف ايه الفرق الى انا اقصده بين النظافة و القذارة فى العمليات

....

واحد لئيم طبعا حيقولى :

الله الله الله , ما انت عملت زي الناس الى انت بتهاجمها و بتصنف العمليات و بتقول انه شهدائنا فى الجنة و منحاز للعقيد مصطفى حافظ و معحب بالى عمله هو و رجالته

حتكسف شوية و اضحك و ارد و اقوله :

طيب ما انا اعمل ايه ؟ ما انا مصرى برضه و بحبها و لازم انحاز لسيادة العقيد و لفدائييين , و للعمليات الى عملوها ضد العدو , امال انحاز لمين يعنى ؟

و لا انتم شايفين غير كده ؟

.......

Monday, February 18, 2008

تعاطفا مع غزة

اقوى منافسة رياضية رأيتها حتى الان

انفعالات قوية , حادة و مثيرة

لا لضعاف القلوب

......

شاهد

و ادعى ان الاتحاد الاوروبى ينقل مباريات تلك البطولة هنا

تعاطفا مع غزة

........



Sunday, February 17, 2008

كله من ده

بعد ان فتشوا بيته و وجدوا عنده كتاب " تاريخ الوطنية المصرية ل " شهدى عطية الشافعى " , تم اعتقال حلمى ( محمد صبحى ) و بعد تعذيبه و رميه فى زنزانة مظلمة عقابا له على وجود هذه الكتب فى بيته , دخل خالد صفوان ( كمال الشناوى ) ليستجوبه ماسكا الكتاب بيده و مشيرا الى بعض الخطوط و الهوامش به مستفسرا عن سبب قراءة حلمى لهذا الكتاب !

سئله خالد صفوان : ايه رأيك فى الافكار الى فى الكتب دى ؟

حلمى : اكيد بتعبر عن رأى صاحبها و بعدين الكتب دى بتتباع فى السوق

خالد صفوان : و هو علشان بتتباع فى السوق , معنى كده انك تشتريها ؟

من فيلم الكرنك

..............

صحيح

هو علشان بتتباع يبقى نشتريها ؟

عالم تخاف , متختشيش

و اهو كله من ده

Saturday, February 16, 2008

مغنية

قصة حياة عماد مغنية



....................

جزء من كلمة السيد حسن نصر الله

فى تشييع جنازة عماد مغنية



.............


احبائى

جوليا بطرس



...............

Wednesday, February 13, 2008

اغتصاب سيجمون فروته

التدوينة دى رجالى جدا

انا حذرت و مليش دعوة

...................

هو القبطان

كما يحب ان يطلق على نفسه

شاب قوى

و كما يقال طويل , عريض المنكعين , شنكول الحركات , شلولخ

و هو صراحة يتمتع بكثير من هذا الشلولخ

يؤمن بان كل شىء يبدأ من عنده و ينتهى عنده , يخرج منه و يعود اليه .

و ان كل شىء صالح و مفيد فى المتعة

او كما يقول

كل حاجة .... تنفع فى الجنس

كل شىء صنع من اجله و من اجل رغباته و من اجل امتاعه

انا الوحش , لو نمت مع واحدة ليلة واحدة حغير ملامحها

مش حخليها تنفع تانى , حتصحى تبص فى المرايا مش حتعرف نفسها

كل شىء

عارف افلام السبعينات دى يا برنس , الى فيها النسوان عريانة و بوس و مليطة ؟

ايوه يا قبطان

كانوا بيعملوها علشانى

ازاى و انت مكنتش لسه اتولدت ؟

ايوا , اتعملت علشانى , كانوا " بيهيجوا الناس " علشان لما اتولد انا , اكيفهم صح .

كانوا بيجهزوهم لمجىء القبطان , الى لما تشوفوا واحدة , مسام جسمها تصرخ عايزاه

.....

لغة القبطان و كلماته , مختلفة تماما , لا علاقة لها بحروفنا الابجدية

فحروفه كما يقول ... حروف جنسية ملزقة و مندية , طويلة و منتصبة فى النطق

لا يخاطب الا اقرب الاقربين بكلماتهم

كلمة واحدة تفى بالغرض كما يقول

كارفه ,,, الكلمة هى كارفه

عندى " كارفه " بكره الصبح .... معناها فى شغل

عندى " كارفه " مع حرمه بالليل .... واضحة طبعا

اشوف اى " كارفه " اكلها ....... واضحة برضه

اما من لا يعرفهم و خصوصا البنات , فلكل واحدة يقابلها فى الشارع او تمر بجواره , فلها لقبها , خطابه مباشر و فى وضح النهار و بدون اى خجل او شعور بالاهانة او المهانة , شجاع , جرىء ,

ايه الحلاوة دى يا م...

ايه الجسم ده يا ش...

ايه ال.... دى يا بنت بنت الك...

فشتائم القبطان مركبة , لا يشتم احد بامه

انما بجدته

فهو لا يقول يا ابن الكلب , انما يا ابن بنت الكلب

لحكمة لا يعلمها الا هو

كل شىء صنع من اجله و صنع منه .

عارف حبة الفراجرا دى ؟ عارفها

خدوا عينة منه , و حللولها و حقنوها فى القرص و عبوها فى بلاستيك و باعوها للناس

المفروض يسموها حبوب القبطان .

..............

المشكلة الحقيقية تكمن فى يده

فهو ذواقة , يقدر الجمال و ينجذب له , و يشجعه بنفسه ,

فهو ان راى مؤخرة اعجبته و هو راكب سيارة , بجوار السائق

لا يجد اى حرج ابدا فى ان يخرج يده و يربط عليها مشجعا صاحبتها للمحافظة عليها

حتى و هو يجيب على فتاته

حتة الانوثة الى مرافقها ... كما يسميها

الو ... ايوة يا دجاجة ... كما يجيبها فى التليفون

انت عارف ليه انا ماشى مع البنت دى .... دى هضبة , جبل , وحش الحموكشات

هى الوحيدة الى بتستحمل معايا للتاسع و العاشر

تاسع و عاشر !!!!!!!!!!؟

انتم تعبانين ... اخركم التانى و التالت , انما القبطان , يخرق الجبل و ينفده للناحية التانية

الحضور يا عمنا الحضور , انت بتتكلم مع القبطان .

.........

ايوة يا قبطان , حنتقابل انهاردة الساعة 9 فى التحرير عندنا شغل

يعنى فى "كارفه" انهاردة . كويس . ماشى يا هندسة . حتلاقينى هناك من 8 و لا حاجة , حدور على " كارفه " و لا اتنين , اغتصبهم ولا حاجة لغاية ما تيجوا , اسلى نفسى

...........

القبطان

يعمل معنا فى نفس القسم

فنى تركيبات مع مهندس زميل , هو من حكى لى كل ماسبق و هو يبكى

فالمهندس زميلنا , متدين جدا , ملتزم , و مش عارف يتصرف معاه

" الحقنى , انتى ليك فى الصنف ده و تعرف تروضه

انت عارف انا مليش فى السكة دى و مش عارف اشتكيه لان شغله ممتاز و مبيغلطش خالص فى اى حد و ملتزم فى مواعيده و فى الشغل مبيفتحش بقه , بيشتغل بس و هو ساكت , بس لسانه علطول فى العربية فى الكلام عن الستات و البنات و الشتيمة و كمان ايده بتتمد على اى واحدة . صحيح مبيعملهاش قدامى , بس بيعملها , و للاسف شغله مغطى على سمعته "

الاسبوع الى فات لقيناه واقف مستنينا و هو بيوضب هدومه

فى ايه يا قبطان ؟

ابدا , عيل سيس , كان لازم اغتصبه , مش عاجبه انى قيمت البت الى ماشية معاه , معجبوش

عاكستها ليه يا قبطان و هى مع راجل ؟

انا ما عكستهاش و لا فتحت بقى , ابن بنت الم... بيتبلى على , انا متكلمتش ولا كلمة , كل الى حصل انى لقيت جسمها مربرب و شديد كده , قلت امسكه و اقلب فيه , اشوفه بلاستيك عمليات و لا اصلى , علشان لو مغشوش بلاستيك , انبه الواد الى معاها , و لو اصلى يبقى اطمنت على خير بلدنا

...............

خلاص ماشى

" بجد ممكن نبدل ؟ , تاخده معاك فى التيم و انا اخد اى تكنيشن ان شالله حتى يكون جديد و اعلمه "

مفيش مشكلة , احنا نخدم بعض عادى يعنى و لا يهمك

" تعال معايا , هو فى الكافيتريا , مستنيين الوورك اوردر و حنمشى علطول "

ذهبت مع زميلى حيث يجلس مع باقى الفنين و انا اعرف تماما هذا الصنف و اعلم كيف اروضه ,

انا استاذ يا استاذ مع الاصناف دى , حخليهولك يلم نفسه خالص و يبطل الكلام الى بيقوله , انا مدرسة مع الاشكال دى , خبرتى كبيرة معاهم .

طمئنت صديقى ان محنته اوشكت على الانتهاء

صباح الخير يا قبطان

صباح الخير يا هندسة

ظللنا نتكلم فى العمل حتى دخلت سكرتيرة المدير , ممتلئة هى .

نظر اليها نظرة غريبة , و بدأ يتكلم عن ان فى جبال حتتهد و ان الوحش لو خرج من القفص حيزلزل الارض و الى مهديه بس ان له حبايبه زينا كده و هو خايف علينا لأنه لو عملها , المبنى حيغرق و ارواح حتروح و ناس حتفطس .

ازاى يعنى ؟

انا بحر , طوفان , خرطوم المطافى بالنسبالى خلة سنان

بدا يشرح لى ان كل حاجة علشان الجنس و ان الستات عاملة كده فى نفسيها و ملغوطة و ملغوصة اللاغاويص علشان القبطان , كل نساء العالم عايزين القبطان "مسام جسمها بتصرخ عايزة القبطان يروقها " و ان التاريخ كله بسبب النسوان و الجنس و انه هو من اغتصب التاريخ و مفرتكه و مخرمه و مغربله

اتكئت كالحكيم و بدأت فى اعطائه درس لن ينساه . قلت له :

انت عارف يا قبطان , فى واحد اسمه سيجموند فرويد , دكتور نفسانى هو , قال نفس الكلام ده و هو مقتنع بان كل حاجة بتتأثر و بتتفاعل و بيتم تفسيرها من منطلق جنسى و من رؤية جنسية , بيقول زيك بالظبط كده , بس بعد كده علم النفس غلطه و طلع كلامه غلط و مفيش حاجة اسمها الجنس محرك للتاريخ زى ما انت بتقول و لا الكلام الفارغ ده .

..........

ما ان سمع كلمتى سيجموند فرويد و دكتور نفسى حتى احمر وجهه و ما ان انتهيت من كلامى حتى نهض من مكانه و بدأ فى تحريك يديه الاثنين جيئة و ذهابا فى اشارة واضحة و معنى مفهوم

انت عارف سوجمون فروته ده لو عايش كنت عملت فيه ايه ؟

انا كنت اغتصبته و وريته يعنى ايه جنس من اول و جديد , كنت بوظته و غيرت ملامحه

كنت فرتكتلك نافوخه و خرمتهوله خالص , الحضور يا عمنا الحضور , انت قاعد مع القبطان .

....

ضحك الجميع

حتى انا لم اتمالك نفسى و أبتسمت

نهضت متثاقلا و خرجت لأشعل سيجارة فخرج زميلى المهندس و سئلنى

" ها , حتاخده معاك فى التيم ؟ "

فأجبته :

اخد مين يا عم , ده اذا كان حيغتصب سيجموند فروته نفسه . امال حيعمل فينا ايه ؟ , الحضور يا عمنا الحضور , انت بتتكلم عن القبطان . سلام يا هندسة , علشان عندى " كارفه " . عربية الشغل بره و مش عايز اتاخر , سلام .

Sunday, February 10, 2008

تاج و العياذ بالله

هذا التاج اهداء من بنت القمر

..............

-1-

هل توافق علي حذف خانة الديانه من البطاقه الشخصيه؟

اولا حكاية حذف خانة الديانة من البطاقة دى اكبر خدعة اخترعها العقل المصرى بحجة عدم التمييز ,

ليه ؟

لأن لو حد رايح يتقدم لوظيفة و دخل على المدير و هو داقق صليب فى ايده اليمين و عايز يحطه فى عين المدير علشان المدير يعرف , حفتكره ايه ؟ ملحد

او بنت داخلة بحجاب او نقاب مثلا حفتكرها ايه ؟ بوذية

او واحدة داخلة الشغل و لابسة سلسلة فيها صليب و مطلعاها من بره و عمال تلعب فى السلسلة علشان الاعمى ياخد باله , حفتكرها ايه ؟ بهائية

او واحد داخل عليك بجلابية بيضا و مطول دقنه و عنده زبيبة صلاة فى وشه , حفتكره ايه ؟ من كفار قريش

الهدف من حذف خانة الديانة هو الغاء التمييز المبنى على الدين

لما نقتنع انه مفيش فرق بين الاشخاص على اساس دينهم , نبقى نتنقل للشكل اننا نشيل خانة الديانة

ده البهائيين فى ازهى عصور الديموقراطية و قبول الاخر حطلوهم شرطة و كمان مش طويلة حتى علشان يفرحوا

..........

-2-

ما رايك في المثليين؟هل تري انها حرية شخصيه؟ هل توافق علي الاعتراف بالمثليين؟هل لك اصدقاء من المثليين؟

الموضوع ده معقد

ليه ؟

يعنى اصله مثلا لو الشواذ دول بنتين فى فيلم , يبقى تمام , ليه تشوف واحدة لما ممكن تشوف اتنين ؟!!

اما حكاية ليك صحاب ! فانا معرفش الواحد يعرف ازاى

يعنى اول ما اشوف واحد لأول مرة و انا بقوله اسمى

اقوله انا عادة , و اسئله : هو الاخ عادة و لا شاذ ؟

اما حكاية اوافق و لا موافقش فدى مشكلة لسبب

انه لا يمكن الحكم على انسان نتيجة ميوله الجنسية , يعنى لو عرفت واحد مثلا لازم كل خميس يسنتر المسائل , ما هو برضه مينفعش لانه زانى

المسئلة اعقد من كده

ايه الفرق بين حيوان بتاع بنات و زنا و واحد تانى بتاع رجالة و شاذ

الاتنين عايزين حل و علاج

............

-3-

هل تعتقد بوجود اضطهاد للمسيحيين في مصر؟

طبعا , و عندى الدليل

بص على عدد التعليقات فى اى مدونة زى بنت القمر و شهروزة و مختار , و عدد التعليقات فى اى مدونة زى هانى كراكيب و بلو و قداستى , حتلاقى فرق كبير

عندهم الخير كله و التعليقات متقلش عن قوة : 100 أو 120 تعليق فى التدوينة , اما الغلبانة بلو مع المصيبة الى حصلتلها مكملوش 30 تعليق , ظلم فادح و اضطهاد علنى

موضوع الاضطهاد ده بيفكرنى بنكتة سمعتها زمان

بيقولك

واحد مسيحى راح يتقدم لمهنة " قارىء نشرة فى الاذاعة " , فأبوه وصله و تحت مبنى الاذاعة وقفوا و ابوه قاله : قبل ما تبتدى صلى و قول ابانا الذى و متنساش فلنشكر صانع الخيرات و ربنا ان شاء الله لا يمكن انه ينسى ابنه و ان شاء الله الروح هى الى حتتكلم مكانك

طلع الولد و امتحن و خلص و طلعت النتيجة : مرفوض

فنزل الولد حزين

فأبوه سئله " ايه الى حصل

فرد الولد : ادتهدونى يا بابا و رفزونى علثان انا مثيحى

...

الفكرة فى الاضطهاد هو مدى تقبلك للفكرة و الموافقة عليها

الموروث الدينى المتمثل فى فكرة الاستشهاد نتيجة الاضطهاد فى العصور الاولى للتكوين سواء على المستوى الاسلامى او المسيحى يخليك تقبل الفكرة الى حد الاستمتاع و مترفضهاش او حتى تتصدى ليها و بالتالى الى قصادك يتمادى , لانه محدش يقبل ابدا انه تجيله فرصة انه يبقى مضطهد و بالتالى شهيد فى نظر الرب و يفوتها , دى بركة روحية جامدة جدا فى نظره طبعا

يعنى تفتكره لو واحد مسيحى او حتى المسيحيين فى مصر مضطهدين و مظلومين ممكن يقاوموا الظلم ؟ , لأ طبعا , ده بالنسبة لهم يا جماله . حتى المسلمين فى الغرب بيستمتعوا بالحكاية دى , بأنهم مضطهدين

انما من ناحية الاحتقان فأكيد و من الجانبين

لازم حيكون فى مسلمين بيكرهوا المسيحيين و مسيحيين بيكرهوا المسلمين , ملهاش حل . بس النسبة اد ايه و مدى تأثيرهم فى المجتمع و ايه النظام القانونى الى بيحكم الدولة و ازاى بنطبق نظام دفاع و حماية قانونى للمواطنين ضد المجانين من الجانبين ؟, هو ده السؤال

لأن الاضطهاد محوره الاساسى هو النظام . يعنى الدولة او القبيلة او نظام الحكم هو الى بيضطهد زى ما كنت بتعمل قريش فى حالة الاسلام او الدولة الرومانية فى حالة المسيحية

السؤال : هل الدولة المصرية تمارس الاضطهاد ضد " شعبها " و مواطنيها " ( المسيحيين ) ؟ , سؤال اجابته تحتاج الى تدوينة لوحدها

...............

-4-

من هو الشخص الذي تختاره لرئاسة الجمهوريه؟

و الهى الموضوع ده شائك , لأن الواحد مينفعش يمدح فى نفسه

لكن لو اتكلمنا عن واحد من تلاميذى النجباء

ممكن اذكر عمرو موسى .

و ان كنت افضل انى اجى للسلطة بالانتخاب المباشر فى انتخابات نزيهة و عادلة

................

-5-

اذا قمت بتأسيس حزب سياسي ،فمن هم الاشخاص الذين سوف تضمهم للحزب ليشاركوك الحكم؟

الشيخ يوسف البدرى ... وزارة الثقافة

بيسو ... وزارة التربية و التعليم

شعبان عبد الرحيم ... وزارة الخارجية

احمد عز ... وزارة الاقتصاد و التجارة

اسكندرانى ... وزارة الاوقاف و الشئون الدينية

نائل الطوخى ... وزارةالاعلام

نوارة نجم ... وزارة الداخلية

اما عن سفراء مصر فى الدول الهامة :

مهدى عاكف ... سفير مصر فى اسرائيل

عبد الله السناوى ... سفير مصر فى الولايات المتحدة الامريكية

د.زغلول النجار ... سفير مصر فى الصين الشيوعية

الانبا موسى ... سفير مصر فى السعودية

د. محمد عمارة ... سفير مصر فى الفاتيكان

.............

-6-

هل توافق علي مشاركة الاقباط و الاخوان في حكم مصر؟

و بعدين فى الزن ده

مش كنتم عايزين اقباط يشاركوا

اهم جابو بطرس غالى فى المالية , ايه رأيكم بقى مبسوطين من المسيحيين الى فى سلطة ؟

اهم وصلوا اهم , عايزين ايه اكتر من كده ؟

عايز النمساوى ... اهو جالك النمساوى يا حبيبى

اقعدتم تزنوا لغاية ما ربنا كرمكم ببطرس الى قرب يخرب بيتنا كلنا, الله الموفق

...

الصراحة انا لا عايز اقباط فى السلطة و لا اخوان فى السلطة

انا عايز مصريين فى السلطة , يكونوا مسلمين , يكونوا مسيحيين , يكونوا يهود , مش فارقة

المهم يكون عندهم انسانية , رحمة بالشعب , علشان خلاص كده ... كفاية ذل بقى

طبعا انا ضد الاخوان المسلمين علطول الخط بلا تفكير

و ضد الاخوان المسيحيين علطول الخط بلاتفكير

لا انا عايز اخوان من دول و لا من دول و لا حتى احزاب على اساس دينى

....................

-7-

ما هي افضل مدونه زرتها؟

الصراحة كل المدونات الى بزورها بحبها , بس ممكن نخص بالذكر

الدين و الديناميت ... لأنى بحس ان القضايا الدينية الى بيثيرها لو غيرنا الالفاظ الاسلامية بلاقيها نفس المشاكل فى المسيحية و كنت احب انه يناقشها – القضايا – بمفهوم عام لا مسيحى و لا اسلامى و خصوصا لأنه اسلوبه فى الشرح و الكتابة ممتاز و قوى جدا و سهل

اخر الحارة ... اسلوبه فى مناقشة القضايا العامة و المطروحة قوى جدا و كشخص ممتاز و خاصة انى قابلته فى المعرض و اكتشفت البعد الانسانى الجميل فيه

نائل الطوخى .... سخرية تجعلك تتأمل

بيسو .... لأنه بيسو

مختار العزيزى ... ثقافة واسعة و روح مرحة و عنيد , مش حنسى ابدا ردوده فى القضية الى اثارتها شهروزة , فضل يكتب فى تدوينات لغاية ما الناس كانت حتجنن , تدوينة واحدة من شهروزة اثارت فكرة واحدة و هوب ...... راح رازع فوق الخمشاشر خمسوميت تدوينة , محدش يقف قصاده , حيغرقوا تدوينات

حمود ستوديو ... مدون جزائرى متميز و خصوصا كتابه الى على جنب ده ... مفاجأة و خصوصا انه له اسلوب مماثل للدين و الدينامين و بن عبد العزيز

اسكندرانى ... روحى روحى روحى , طرح جرىء و صادم

..............

-8-

هل توافق علي الزواج من مطلقه؟

هو المطلقة عامة خبرة و حيبقى الجواز منها فى التمام

بس المشكلة انه مفيش عندنا مطلقات

.............

-9-

اذا انجبت ولدين و بنتين ، فاي الاسماء ستختارها لهم؟

يعنى للأمانة , انا مش متأكد من موضوع الانجاب ده اساسا لسببين

اولا انا مش متزوج

ثانيا , من زمان بناكل فراخ بيضا و بنشرب مية من الحنفية و كبده و سجق من سمير كوكو , يعنى ربنا يعوض على , مبقاش فاضل غير الاحترام .

بس , يخلق الداء و معه الدواء .

نشكر الله على التلقيح المجهرى و الفياجرا و العبوة الزرقا للرجال و الصفرا للسيدات .

و ربنا يعوض عليكم عوض الصابرين .

اما لو ربنا كرمنا بكام طفل انابيب فمنعا للتفرقة الدينية على اساس اسم الولد او البنت فحسميهم اسماء لا تدل على هوية معينة

الولدين ... عبد المسيح و مصطفى

البنتين .... تيريز و خديجة

و الاجر و الثواب عند الله

...........

-10-

هل تعتقد ان توريث الحكم في مصر سيحدث فعلا؟

طبعا , يعنى الفيلم ده كله و فى الاخر ميورثش , دى هى دى تبقى المسخرة بجد

و بعدين دى المعارضة تتشل فيها لو مصر قلبت ديموقراطية بجد و مفهاش توريث

دول هم عايشين على التوريث

امال مين الى يقبض من بره و مين يقبض من جوه و من ليبيا و من السعودية و من امريكا

ده كده ناس كتير تجوع و بيوت تتقفل و معارضة تتشرد

تف من بقك انت و هو

دى المعارضة هى الى حتجيب جمال محمولا على اعناقها

فى حاجات مفهاش تهريج , زى السؤال ده كده

جمال جى جى

..............

-11-

ما هو افضل انجاز لمبارك ؟ و ما هو اسوء سقطات حكمه؟

افضل انجاز طبعا , اننا عايشين لحد دلوقتى و كل المصايب دى فوق نافوخنا

تلوث و فساد و حوادث و سرقة و نصب و موت

اسوء سقطات حكمه , احنا طبعا , هو فى شعب زيينا فى اى حتة فى الدنيا !!!!

........

-12-

لمن تمرر هذا التاج؟

و الله و من هذا المزنق , و بفضل توجيهات السيد الرئيس

امرر هذا التاج ان شاء الله الى

اسكندرانى

محمد المصرى

احمد ساندريل

بلو-ستون

هانى كراكيب

الدين و الديناميت

مختار العزيزى

ابو باشا