Sunday, August 31, 2008

قراءات




كان الأطفال يغنون للقمر المكسوف و كنت أود أن أغنى معهم , و لكنى كنت أجلس لأرتل القرآن امام أبى . و من عجيب الصدفة أن ذكر القمر قد ورد فى الآيات التى كنت أقرأها تلك الليلة .

و فى الصباح كنت أجلس امام المنزل بعد عودتى مع ابى من صلاة الفجر انتظر شروق الشمس . فلما رأيت قرصها الأحمر المستدير خلف النخيل أشرت بأصبعى اليها و قلت " هذا ربى هذا أكبر ! " كنت أعرف القصة من أولها الى أخرها فبدأت بالشمس مباشرة من باب الأختصار , لأننى قد عرفت انه لا قائدة من مناجاة النجوم و القمر كما علمت من سورة الأنعام .

و كان أبى على مقربة منى و سمع ما قلت فجاء الى و سألنى مبتسماً ماذا أفعل ؟ فقلت له :

" انا بدور على ربنا . "

" ربنا مش ضايع يا أبنى علشان تدور عليه " قال و أبسامته غير المألوفة لاتزال على شفتيه .

" طب و هو كان ضايع لما سيدنا أبراهيم كان بيدور عليه ؟ " سألته بمكر

" لأ .. إن الله موجود قبل الموجودات . هو الأول و الآخر و هو الظاهر و الباطن " قال أبى بصبر و أستمر فى خطبته المصغرة " و بعدين سيدنا أبراهيم وجد ربنا بفطرة الأنبياء و حكمة الحكماء " .

" بس سيدنا أبراهيم رفض دين قومه . ممكن أنا ارفض دين قومى ؟ " سألته بتحد لم يعهده منى .

" سيدنا أبراهيم رفض دين قومه لأنه كان دين الضلال . اما دينّا فهو دين الحق " رد أبى ببلاغته التى لم تجدينى .

" بس قوم أبراهيم كانوا برضه مفكرين إن دينهم هو دين الحق . و سيدنا أبراهيم كسر أصنامهم . مش ممكن ديننا النهارده بقى دين الضلال و ان احنا محتاجين دين جديد ؟ " سألت أبى و انا أشعر انى تخطيت حدودى .

فجأة تحول ابتسامة المعرفة المرتسمة على وجه أبى إلى أبتسامة حرج ثم الى تجهم صامت ثم قال بعدها :

" و أنت بقى عايز تدوّر على ربنا ليه ؟ "

"عايز أعرف هو مين و عايز مننا إيه "

" أسمع يا أبنى مفيش حاجة أسمها تدور على ربنا . الموضوع مش سبهللة ! البحث عن الإدراك إدراك و البحث فى ذات الله إشراك . يدرك الأشياء و لا تدركه الأشياء "

" ربنا كان فين قبل ما يخلقنا . و كان بيعمل إيه ؟ و خلقنا ليه ؟ " سألته من جديد .

" كان عرشه على الماء و كان كنزاً مخفياً و كان يريد أن يعُرف فخلق الخلق ليعرفوه و يعبدوه " جاءت إجابة أبى المحترفة دون أدنى تأخير .

" يعنى ربنا كان وحيد علشان كده خلقنا ؟ " أنفلت منى السؤال دون ان أفكر فى تبعاته .

" اخرس يا سافل يا أبن الكلب ! " قال أبى متضجراً و عيناه محمرتين من الغضب " أنا مش عارف مين الى بيحشى دماغك بالكلام الفارغ دا . الظاهر إن قعادك مع المجاذيب الدراويش بوظ نافوخك .. ما تصدقش المخابيل دول الى عايشين عالة على حساب خلق الله .. ربنا مخلقناش علشان نرقص و نذكر . ربنا خلقنا علشان نعمر الأرض و نسبح بحمده . إنسى الكلام الفارغ ده نهائى , و لو سمعتك بقول العك ده تانى حاقطم رقبتك "

ذهب أبى غاضباً و ترك عشرات الأسئلة تتراقص فى رأسى . ما الفرق بين أبى و أب أبراهيم ؟ " أنى أراك و قومك فى ضلال مبين " ! يا إلهى ! إلى من أذهب ؟ من أسأل أذا أردت السؤال عنك ؟ أنت لا تجيبنى كما وعدت فى قرآنك . و أبى – ظلك على الأرض – يغضب إذا أطلت الحديث عنك ! لم يفهم أبى أسئلتى و لكنى حاولت ان افهم غضبه . ربما أحس أبى ان أبنه الذى كان يريد ان يورثه القرآن غير جدير بهذه المهمة . ربما فهم للمرة الأولى ان حفظ القرآن يحتاج لأكثر من ذاكرة فولاذية . ربما أحس أن كل مجهوده طوال السنين السابقة ضاعت هباءً منثوراً ..

-------

الرواية : " وداعاً أيتها السماء "

حامد عبد الصمد

دار ميريت

====================

" أريد كاتباً إخوانجياً مشهوراً , و أخر ماركسياً عتويلاً و كاتباً شيوعياً من التائبين و اخر ناصرياً متهوراً , و صحفياً ناصرياً عقلانياً .. أريد باقة تساعدنى فى الخلطة التى أتمنى ان اقدمها , و على مرجان قد يساعدنى فى ذلك .. و فى الوقت نفسه أبحث عن من يدير عملية أشباك قوية و مخططة بدقة مع الصحف التى تهاجمنى .. على مرجان هذا قد يفيدنى فى ذلك .

--

مقال على مرجان بعنوان " الله لا يحب الفساد " يتحدث فيه عمن تاجروا بالوطن و باعوه .. عن اللذين اخذوا مئات الافدنة بملاليم و باعوها بملايين .. يطعم كتاباته بآيات قرآنية و احاديث شريفة و كلام شيوعيين .. لم احذف كلمة واحدة من مقاله . فالمقال رسالة فحواها أن فاروق عوض ليس الفاسد الوحيد .. هناك المئات لم يمسهم احد بسوء و لم تهاجمهم الجرائد و لم ينهش لحمهم الصحفيون الذين ظهروا فجأة على الجرائد و فى التلفزيونات . اكثر من مسئول سابق و حالى أشادوا بمقال على مرجان هذا .. فى الزمان الأول , عندما كان يشدي احد بمقال أو تحقيق كتبه احد المحدريين , أنقله على الفور الى الأرشيف او قسم الأستماع و لا أسمح له مرة أخرى بكتابة حرف واحد .. الأمر يختلف الأن .. انا فى حاجة الى أكثر من على مرجان واحد و اذا أستطعت استدراجه و إقناعه بكتابة اكثر من مقال فى الأسبوع للجريدة سيصبح إضافة لها .. طلبت السكرتارية ليطلبوا لى رقم تليفون على مرجان .

-------

الرواية : " الواطى "

محمد غزلان

دار أكتب 

===============



التابوت

--

إختارها تابوتاً له

و أحبها

بكل ما تبقى فيه من قلب

 

و فى الليلة الأولى أهداها

خاتماً و وردة و أهدى جسدها بريق سكينه

 

فصار حضنه

تابوتها

و صارت هى

 

جثته المفضلة

-------

شعر : " أقراص المسكن "

هانى سامى

دار ملامح


 

Friday, August 29, 2008

التدوينة !

أنتجت الحركة اليسارية المصرية في حقبتيها الستينيه والسبعينيه الكثير، لكن خير ما أبدعت في أنتاجه كان الأنتهازيين الزائفين، أنتجت أنتهازيين زائفين من نوعية مصطفى محمود ومحمود السعدني، ومن عيار أمل دنقل و عبد الرحمن الأبنودي، لكنها أبدعت فعلا في تحفتها المتفردة و درتها اليتيمة المسمى (أحمد فؤاد نجم) صبي تاجر المخدرات الذي تواجد صدفة في عنابر الشيوعيين المعتقلين بالستينيات و الذين وجدوا فيه تسلية مثيرة، و وجد فيهم معنى لهرتلته التحشيشيه، نجم ذو اللسان الزفر الذي وجد فيه البهوات المتعاصين ماركسية نموذجا يشبه تخيلهم الزائف عن الشعبي ، و وجدت فيه الهوانم الملوثات باليسارية نموذجا للذكر الشعبي المنفلت ، المنفلت من كل حته والذي يمنح تهتكهن الشخصي مسحة ثورية تطهريه، وحده أمام عيسى الضرير كان يرى البلياتشو الأنتهازي ، وحده أمام عيسى الضرير كان ثاقب الرؤية لحد فضحه - ولو متأخرا جدا- و الموت متحسرا على ربط أسميهما معا ، نجم أو الفاجومي والذي أنطفأت شعلته بموت الفنان الحقيقي في المعادله ( الشيخ أمام عيسى)...

--

تلك اليرقات الذين يجمعهم أنهم ولدوا جميعا بعد عام 1978، والذين يظنون أن (رجل المستحيل) التي قرأوها في طفولتهم أدب مغامرات بجد ، وأن الدكتور نبيل فاروق كاتب حقيقي و ليس ماكينة أستنساخ للأفلام والمسلسلات الأمريكيه ، هؤلاء الذين يصنعون من محمد منير (أيقونة جيلنا الموسيقية) إلها للموسيقى وهو من لم يقدم حتى الأن شيئا يتجاوز ألبوم (وسط الدايره ) الخرافي المستوى الإبداعي ، تلك اليرقات التي لم ننتجها من اين أتت؟ ينص القانون الطبيعي على أن الطبيعة لا تحتمل الفراغ وأنه لا يمكن أن يبقى أحد المجالات الطبيعية خاويا، بمعنى أنه لو أنقرضت الطيور جميعا وخلت منها السماء لتطورت كائنات أخرى لتحتل موقعها، هكذا ما كان، بخلو الساحة بالموت المفاجىء للتسعينيين أصبح المجال الطبيعي خاويا لكائنات أمثال أحمد العايدي و من يقرأون له و يمتلكون صفاقة تكفي للأعجاب به و بالتفاهة التي يلوث بها الصفحات، تلك اليرقات التي وضعت بويضاتها في جثة جيل التسعينيين لتفقس خارجة من الجثة المتعفنة لجراد نهاية القرن تروج لعالم جديد ، حيث النضال السياسي شيء شبيه بألعاب الكمبيوتر ، والأدب تكرار أبله للرغي و أعادة أنتاج للأفلام الأمريكيه ، الجيل الذي يجهز لخوض ثورة ملونة جديدة تسقط الكهنة القدامى و تأتي بألعوبة أمريكية ملونة تقودنا لليبراليه والحريه على النموذج اللبناني والأوكراني والجورجي والذي بدأها بأكتشافه للملكيه متأثرا بالمصدر الأعظم لثقافته (المسلسلات التلفزيونيه ) .

--

أقرأ التدوينة كاملة ... اسكندرانى

Thursday, August 28, 2008

سؤال فلسفى


" فى الأفلام العربى , لما واحد بيبوس واحدة بتحبل منه علطول و تولد فى المشهد الى بعديه .

السؤال الذى يطرح نفسه و بشدة

إذا كانت من بوسة بتحبل , امال لو نام معاها حيحصل إيه ؟ "

---

هكذا تسائل عم علام بعد مشاهدة فيلم " دعاء الكروان " . 



 

Tuesday, August 26, 2008

زينة


---

أخيراً , و لأول مرة فى مصر

لعلاج أسباب تأخر الأنجاب

لمعرفة مراحل نمو الجنين

أزاى تستبعدى العيوب الخلقية

الولادة بدون ألم

---

فى مشاكل فى العلاقة الزوجية ؟

فى مشاكل فى العلاقة الجنسية ؟

عندك مشاكل فى الحمل ؟

عندك مشاكل فى الانجاب ؟

عايزة تعرفى عن فترة الحمل و فترة الرضاعة ؟

عايزة تعرفى عن الريجيم أثناء الحمل ؟

فى مشاكل فى البوس و الأحضان و الذى منه ؟

عايزة تعرفى تاخدى القرص الأصفر , و لا العبوة الزرقا ؟

عندك مشكلة فى التبويض و لا فى التلقيح و لا فى التخسيس ؟

عايزة تعرفى عن الأكل و الشرب أثناء الحمل ؟

جوزك بيجيب صاحبته ينام معاها قدامك علشان انت تخينة , و خايفة إن ده يأثر على الصحة النفسية للجنين ؟

جوزك عنده مشاكل فى الأنتصاب أو الأرتخاء , أو مبقتيش تعرفى تهيجيه زى زمان ؟

طيب جربتوا تشوفوا أفلام جنسية حلال ؟

 جربتى الأعشاب الطبية و الاقراص الجنسية , و برضه مفيش فايدة ؟

طيب جربتى تنامى مع واحد تانى ؟

عايزة تعرفى رأى الدين فى المرأة الحامل بدون زواج ؟

بتابعى مع دكتور و لا دكتورة , و لا داية ؟

عايزة تعرفى عن العلاقة الجنسية و انت بطنك منفوخة من الحمل ؟

عندك السكر أو الضغط و خايفة على الحمل  ؟

بتضربى سجاير و حشيش و كحوليات أثناء الحمل , و عايزة تعرفى طرق " الضرب " الآمن على الحمل ؟

بتعملى رياضة أثناء الحمل ؟

بتنامى مع اكتر من واحد و خايفة يأثر على الجنين و عايزة حل ؟

حاسة بدوخة و غثيان و نفسك غمّة عليكى ؟

الى فى بطنك ده مش أبنه و عايزه تعرفى إزاى تخبى عليه ؟

صدرك كبر و خايفة ما يرجعش نفس المقاس ؟

الهرمونات أرتفعت فى جسمك و أبتدت تأثر عليكى و تخنقك و عايزة حل ؟

فى مشاكل زوجية على مصروف البيت , محتارين تولدى فى أى مستشفى ؟

مش عارفة ترضعى طبيعى كويس , علشان جوزك قاللك " الواد واحد و انا واحد " ,  "انا مرة و هو مرة " ؟

مش عارفه ترضعى طبيعى , علشان جوزك بيحب يشرب شاى بلبن الأم ؟

عملتم كل التحاليل ؟

--

جوزك العيب منه و عايزه تخلفى ؟؟

اتصلى بى على النمرة دى و انا حخليكى تحبلى بنفسى

يلا و الف مبروك و عقبال ما نخاويه .

--

أتصلى على

0900990990

و انا ححل كل مشاكلك ... بس لو أكيد العيب منه  .

=============================

الله يخرب بيت إعلانات التلفزيون .

قاعدين عند واحد صاحبنا و بنتفرج على التلفزيون و جت الأعلانات إياها و بعد ما خلص إعلان منهم , بنته بتلعب معايا و  مرة واحدة سئلتنى :" هى انهى بتاعة الستات , العلبة الزرقا و لا العلبة الصفرا ؟ " . 

Saturday, August 23, 2008

معاك حاجة تاخد فيها ؟

هذه التدوينة " أبيحة " شوية .

--

الخميس , ليلة العيد و  اخر يوم فى الصيام , نزلت أفطر فول من عم شعبان , اهم بائع فول فى مصر و الشرق الأوسط . وصلت لعم شعبان , لقيت زحمة طبعاً , و ناس كتير , الّلى واقف يفطر و الّلى عايز ياخد فول و يروح . وقفت مستنى لما يشوفنى , هو يعرفنى و عارف طلبى و عارف إن أنهاردة ليلة العيد , فأكيد حيظبطنى . جه راجل كبير فى السن و طلب بجنيه فول و احنا واقفين , الراجل شكله مريض كده و طيب و غلبان و فى حاله . طلب الراجل الحاجة من عم شعبان , فالناس بحكم  العادة و اننا فى مصر قالت لعم شعبان  " مشّى الراجل البركة ده يا شعبان " , طبعاً بغض النظر عن دور مين . فى شاب شكله صنايعى واقف جنب العربية ,  قعد يبرطم و مش عاجبه أن الراجل يجى بعديه و يمشى قبليه و مرة واحدة قعد يضحك على الحوار بين الراجل و عم شعبان ...

الراجل : عايز بجنيه

عم شعبان : معاك حاجة تاخد فيها ؟

الراجل : لأ , عندك اكياس ؟

عم شعبان : أيوه , أديك فى الكيس ؟

الراجل : يا ريت , ادينى فى الكيس . 

عم شعبان ( بصوت عالى ) : و عندك واحد فى البلاستيك .

--

الواد الصنايعى قعد يضحك بصوت عالى , يغمز و يقول لعم شعبان " بدل ما معهوش حاجة ياخد فيها , ما تديله فى الكيس , و ريحه يا عم شعبان " ... !!! , عم شعبان بص بقرف للواد و قاله : " ما تحترم نفسك , عيب الكلام ده , ده راجل كبير و قد والدك " , الواد يرد عليه و يقوله : " ما هو علشان راجل كبير , عايزك تريحه و تروقه و تديله الى هو محتاجه , مش هو عايز واحد فى الكيس ... هههههههههههه " .

بينى و بينكم , كنت واقف عايز أضحك , بس الراجل كبير و عيب و الموقف ما يصحش خالص , و مش حضحك على كلام صنايعى , و خصوصاً ان عم شعبان يعرفنى , و بيظبطلى طبق من  الأصلى . المهم , الكلام و الموقف ظاط خالص , و عم شعبان راجل كبير بس صايع و فاهم , بص للواد

و قاله :  قدم السبت علشان تلاقى الحد , مسيرك حتكبر و حتلاقى الى يضحك عليك .

الواد :  قول يا باسط , طولة العمر ليك يا حج .

عم شعبان :  قول يا رب .

الواد :  امال شايفنى بقول يا حمادة , ما انا بقول يا رب .

عم شعبان : ما تلونش علشان متزعلش .

الواد : ابوه لسه منطّش على امه , الّلى ييجى و يزعلنى يا عم شعبان .

عم شعبان : قصر فى الكلام , و سيبها على الله .

الواد : امال سايبها على المحارة ؟ , ما هى على الله يا شعبو . 

--

الناس ابتدت تقرف , و تأفف و الى بقى يستغفر ربنا من ردود الواد . عم شعبان قصّر مع الواد و بقى يخلص فى الزباين , و مشّى بتاع 4 كده , و الواد لسه عمال يلابط , و عم شعبان مطنشه . لمحنى عم شعبان , صبّح على , و قاللى : " ثوانى و طلبك يجهز يا هندسة , كل سنة و أنت طيب , عيد العدرا أنهاردة صح ؟ فاكر انا مش ناسى , ما هى تبعنا برضه يا بشمهندس " . الواد الصنايعى بصلّى , و خصوصاً انى جيت بعده , فقال لشعبان : " ما تخلص يا عم , انت حتمشى الى جايين بعدينا , و عمال تكلمنى عن الأمانة و الأحترام , ماتخلص يا عم و مشينى " . الناس زهقت من الواد , و أدخل واحد كبير

و قال للواد : ربنا يهديك يا أبنى , ما يصحش كده .

الواد : انت شايفنى هيجان يا عم .

الراجل : ما تكلم كويس يا أبنى !!!

الواد : أمال إيه يهديك دى , أنت شايفنى موَئفُه و بتنطط عليه ؟

أدخل عم شعبان فى الحوار ...

عم شعبان : انت يله , خلص , عايز بكام ؟

الواد : عايز بأربعة جنيه محوج

عم شعبان ( بسخرية واضحة ) : معاك حاجة تاخد فيها و لا أديك فى الكيس ؟

--

موتنى عم شعبان , موتنى من الضحك , الناس كلها بقت تضحك و الواد مبقاش عارف يعمل إيه ... و مشى .... و لا خد في الحاجة و لا خد فى الكيس !!!! .

=================

 

Thursday, August 21, 2008

ذهنية الأرهاب

لا يتعلق الأمر أذاً لا بصدام حضارات و لا بصدام أديان , كما يتعدى بكثير الأسلام و أمريكا اللذين تجرى المحاولات لحصر النزاع فيهما لتوليد وهم مجابهة مرئية و وهم حلِّ بالقوة . صحيح ان فى الأمر تضاداً أساسياً , لكنه تضاد يبين , عبر طيف أمريكا ( التى ربما كانت المركز السطحى , و لكنها ليست بفردها , تجسيد العولمة ) و عبر طيف الأسلام ( الذى هو أيضاً , ليس تجسيد للأرهاب ) , أن العولمة المنتصرة تخوض صراعاً مع ذاتها .

و فى هذا المعنى يمكننا الحديث عن حرب عالمية , ليست الثالثة , بل الرابعة و هى الوحيدة العالمية حقاً , لأن رهانها هو العولمة بالذات . الحربان العالميتان الاوليان كانتا مطابقتين لصورة الحرب الكلاسيكية . الاولى أنهت تفوق اوروبا و العهد الكولونيالى . الثانية أنهت النازية . الثالثة , التى جرت بالفعل , تحت ستار حرب باردة و حرب رادعة , أنهت الشيوعية . و من حرب الى اخرى كنا نتقدم , كل مرة , خطوات أبعد فى الطريق الى نظام عالمى وحيد , و ها أن هذا الأخير و قد بلغ اليوم , منتهاه , يخوض صراعات مع القوى المضادة المنتشرة حيثما كان فى قلب العالمى نفسه , و فى كل التشنجات الراهنة . حرب كسرية لكل الخلايا , لكل الخصوصيات التى تتمرد فى هيئة اجسام ضدية . مجابهة , عصية على الأدراك المباشر بحيث انها تقتضى من حين الى حين , إنقاذ فكرة الحرب عبر مسرحات مشهدية من قبيل مسرحة حرب الخليج و حرب افغانستان اليوم . لأن الحرب العالمية الرابعة تجرى فى مكان أخر . إنها ما يقلق كل نظام عالمى , و كل سيطرة هيمنية – فلو كان الأسلام مسيطراً على العالم لنشط الأرهاب ضد الأسلام . ذلك ان العالم نفسه هو الذى يقاوم العولمة .

الأرهاب لا- اخلاقى . و حدث المركز العالمى للتجارة , هذا التحدى الرمزى , هو لا- أخلاقى , و يرد على عولمة هى الأخرى لا- أخلاقية . اذاً , فلنكن نحن أيضاً لا – أخلاقيين , و أذا أردنا ان نفهم شيئاً فلنذهب قليلاً الى ما – وراء الخير و الشر . و لنحاول , و قد قيض لنا أن نشهد حدثاً لا يتحدى الاخلاق و حسب , بل كل أشكال التأويل أيضاً , ان نمتلك فهماً للشر . جوهر المسألة يكمن هاهنا : فى التفسي الخاطىء كلياً الذى أنتجته الفلسفة الغربية , فلسفة الأنوار , لمسألة الخير و الشر . نحن نعتقد ان تقدم الخير أى أرتقاء بالقوة فى الميادين كافة ( العلوم  , التقنيات , الديموقراطية , حقوق الأنسان ) يتماشى مع هزيمة الشر و تقهقره . إذ يبدو ان احداً لم يدرك ان الخير و الشر يرتقيان بالقوة فى الوقت نفسه و وفق الحركة نفسها . و أنتصار أحدهما لا يؤدى الى زوال الأخر , بل العكس تماماً . غالباً ما ينظر الى الشر , من الناحية الميتافيزيقية , بوصفه هفوة طارئة , غير ان هذه المسلمة التى تشتق منها كل الأشكال الاثنينية فى الصراع بين الخير و الشر , هى مسلمة باطلة . الخير لا يقلل من حجم الشر , و الشر لا يقلل من حجم الخير : إن احداهما لا يختزل الأخر , و صلتهما لا فكاك منها . ففى الجوهر لا يقدر الخير أن يحبط الشر الا بتخليه عن كونه خيراً , لأنه , بأستئثاره بالحكر العالمى للقوة إنما يتسبب بشرارة لأشعال عنف موازٍ .

فى العالم التقليدى , كانت لا تزال هناك موازنة بين الخير و الشر , وفق علاقة جدلية تضمن على الرغم من تقلبات الظروف . توتر العالم الأخلاقى و توازنه – كما كانت المواجهة , خلال الحرب الباردة , بين القوتين العظميين تضمن توازن الرعب . إذاً لا تفوق لأحد على الأخر . و يختل هذا التوازن عند الشروع بتعميم كلى للخير ( هيمنة الايجابى على أى شكل من أشكال السلبية , أستبعاد الموت و كل قوة محتملة للعداء – انصار قيم الخير دائماً أبداً ) . عندئذ يختل التوازن و يصبح كأن الشر قد استعاد أستقلالية خفية , نامياً على نحو أسى , توسعى .

===

أسم الكتاب : ذهنية الأرهاب

مقال ل : جان بودريار

-- 

Monday, August 18, 2008

عالم معفنة

الساعة الثالثة صباحاً

راجع من الشغل فى العربية , سايقها عم علام و معايا الأتنين الفنيين , لقينا الشارع واقف و العربيات ماشية بطىء , افتكرنا لجنة , رحنا شَدين الحزام و طافيين السجاير , لغاية ما وصلنا للمشكلة اللى موقفة الطريق .

عربية " بى ام دبليو ثرى سيريز " واقفة بالعرض على اليمين متخرشمة خالص , عاملة حادثة منيلة بنيلة , و جنبها واقفة عربية " مرسيدس إس 240 " , و فى عربية ونش بتسحب ال" بى ام " من على الأرض , و أحنا معديين من جنبهم , لقينا راجل كبير واقف جنب شاب صغير , و الراجل الكبير وشه احمر و عمال يشخط  للشاب و عمال يشاور بايده على العربيات المعدية من جنبه , بيزعق للشاب و بيقوله :

" انت قليل الأدب , أنت عديم الاحساس , انت عديم المسئولية , و معندكش دم , منزلنى من البيت علشان عملت حدثة ... انا معرفتش أربيك , بس أرجع و أقول أنا الغلطان , أنت متستحقش النضافة , ما هو انا لو كنت جبتلك " كورولا و لا ميتسوبيشى"  زى بتاعة الغلابة و العالم المعفنة ديه , كنت أتربيت و عرفت الصح من الغلط .. !!! " .

عم علام قاعد جنبى سايق , الدم ضرب فى نافوخه و قال لى : " يعنى أنزل أخد الراجل الكبير ده قلمين على وشه و لا أعمل أيه بالظبط ؟ "

ضحكت و قلتله : " ما تسيبه يا عم علام يربى أبنه ... سيبه يعلمه الصح من الغلط "

---

آه ... أسف نسيت أقولكم حاجة

عربية الشغل الى راجعين فيها , عربية دايو موديل 2006 , يعنى أقل من بتاعة العالم المعفنة !!!!! 

Saturday, August 16, 2008

إستخارة

جمعتنى الصدفة و الحظ مع مجموعة من " المثقفين " فى واحدة من اهم الأماكن الثقافية فى مصر . كنت بقابل مجموعة من الأصدقاء و قابلتهم هناك . الصراحة , هم مجموعة من العلمانيين " المتعصبين " للعلمانية بطريقة تبدو كأنك امام شخص من جماعة " التكفير و الهجرة "  بس من منظور علمانى . حاجة غريبة فعلاً , أول مرة أشوفها , لا يقبلوا أى رؤية دينية , او حتى مناقشتها , فهم مقتنعين تماماً بأن الدين " اقصائى " , " استبعادى " , مرجعيته مطلقة و تلك المرجعية لا تصلح للتطبيق على النسبى . المهم , خرجت من اللقاء بمعارف جدد , و تشرفت بمقابلة ناس لم أقابلهم  من قبل رغم أنى أقرأ لهم بأنتظام , و فوق ده كله , خرجت بمجموعة ضخمة و مهمة من الأفكار و الرؤى الجديدة تستحق التأمل و الدراسة و التفكير و إعادة النظر .

المهم , فى أثناء الحديث , وصلنا لصدام بينى و بين واحد منهم لأنى من وجهة نظره متدين !!! فقال لى : ححكيلك حاجة مهمة ... و حكى لى قصة تستحق بالفعل التفكير و التأمل ( قلت أشاركم بيها ) ... القصة حكاها هذا الشخص كالتالى : أمه دكتورة فى الجامعة , صديقتها دكتورة فى تخصص مختلف عنها  , لجئت الى والدته تسئلها المشورة و ازاى تتصرف علشان مش عارفه تقيم بحث احد الطلبة , مش عارف تديله " جيد " و لا " جيد جداً " , و عايزه تاخد قرار قبل ما تعلن الدرجات الأسبوع الى بعديه , المهم , والدته قالتلها : اقرى البحث تانى كويس و أنتى اكيد حتوصلى لنتيجة , و بعد يومين , قابلتها تانى و سئلتها عملتى إيه فى البحث ؟ ... ردت الدكتورة : قريته و معرفتش أوصل لحاجة , فقررت انى أصلى " صلاة أستخارة " , و بعدها احط الدرجة !!!!

هو : شفت بقى مسخرة أكتر من كده , أدى الحل العلمى فى نظرها , أدى الى أخدناه من الفكر الدينى .

أنا : أنت شايف إيه المشكلة من وجهة نظرك ؟

هو : هههه , هو ده العلم و التقييم العلمى من وجهة نظر المتدينين , صلاة الأستخارة , فاكره انه ربنا حيوشوشها و هى بتصلى و حيقولها حطى جيد جداً مثلاً ,

انا : يعنى المشكلة من وجهة نظرك هى لجوئها لصلاة الأستخارة , طيب , امال الحل الصح يبقى إيه ؟ الحل العلمى يعنى من وجهة نظرك ؟

هو : مش عارفة تحط الدرجة , تروح لدكتور زميلها تسئله , و تستشيره و تناقشه مناقشة علمية فى البحث , و على أساسها تحط التقيم بتاعها ... ليه السؤال ؟ , يعنى بما أنك متدين , هل عندك حل دينى أفضل يعنى ؟ , هههههه

انا : شوف , انت عندك مشكلة مع الصلاة و مع المتدينين , دى حاجة ترجعلك , لكن المشكلة زى ما انا شايفها , مش كده خالص

هو : المشكلة أيه بقى , من وجهة نظرك الدينية ؟

انا : المشكلة فى الحمار الى حطها دكتورة , المشكلة فى النظام الى سمح أن دى تبقى دكتورة , الصلاة فى الموضوع ده , لا هى مشكلة و لا ازمة و لا مرض , دى عرض , دى أخر حاجة تفكر فيها ,

ازاى دى بقت دكتورة , مش عارفة تاخد قرار , مترددة , مش عارفة تقيم بحث و بالتالى يحطنا قدام نقطتين , الأولى :

مين قال انه يستحق " جيد " و لا " جيد جداً " , و هى مش عارفه تقيمه , مش جايز يستحق : مقبول , او لاغى أو يمكن أمتياز !!!! , محدش عارف , و ده يشككنى , بالتالى , فى بقية التقييمات الى حطتها للطلبة , مش جايز ظلمت طالب بدرجة أقل من الى يستحقها ؟

و التانية :

و حتى لو فرضنا انها لجئت للحل " العلمى " الى أنت قلته , و راحت سئلت دكتور زميلها , هل حتسئله كل مرة ؟ , و هل كل مرة حتروح تسئل حد ؟ ,  يا سيدى الفاضل العيب مش فى الصلاة , العيب فى النظام الى حط واحدة فاشلة و وصلها تبقى دكتورة . حط واحدة مش عارفه تقييم بحث طالب بينها و بينه على الأقل عشر سنين من الدراسات المتخصصة , العيب فى السيستم , مش فى الصلاة .

هو : و مالك محموق قوى و بتدافع عن صلاة الأستخارة , مع إنك مسيحى ؟

أنا : ما هى دى المصيبة , و هو ده الى جايبنا ورا , انا مقبلش أن حد يعمل كده مع صلاتى و بالتالى مقبلوش على صلاة غيرى

---

طبعاً الحوار تطور و تشعب و تفرع لمليون حديث تانى , و مليون نقطة و كانت قعدة جميلة و مثمرة انك تعرف أفكار جديدة و تتكلم مع ناس مختلفة و فكر مختلف , لما رجعت البيت كتبت كتير من المواضيع الى أتناقشنا فيها , انا مقتنع بمبدأ إن مفيش حد كلامه صح مية فى المية و مفيش حد كلامه غلط مية فى المية , و بالتالى كلامهم فى حاجات صح و تستحق إعادة النظر و التفكير .

--

تعليق أخير :

اوقات كتير المتدين بينسى انه " مخلوق " و انه " الله هو الخالق " و بيتعامل مع الله بطريقة تنزل من مكانة الله عز و جل , يعنى ربنا إدانا مخ و أسباب للعلم , مفيش داعى أنى اسئل على الفاضية و المليانة و مفيش داعى أكتر انى أحشر حاجات ليها مكانتها و احترامها و أقلل منهم و ارميها على الله و أتواكل عليه فى حاجة المفروض ان الأنسان المتدين هو الى يعملها , لانه اكيد كمان ربنا مش حينزل يصلح البحث و يحطله درجة .

--------------

 

 

 

Thursday, August 14, 2008

خلوة مع النفس

حظر بيع الملابس التى تحمل صور مهند و نور فى السعودية

--

حذرت وزارة التجارة و الصناعة السعودية أصحاب محال بيع الملابس من إغلاق محالهم فى حالة بيعها قمصاناً تحمل صور ممثلى و ممثلات المسلسلات التركية , و اشهرها مسلسل نور لأن هذه الملابس منافية للعادات و الأخلاق و القيم الأسلامية و هددت الوزارة اصحاب المحال بشطب السجل التجارى لكل من يخالف القيم الأسلامية ... و كانت هيئة الأمر بالمعروف قد رفعت شكوى لوزارة التجارة و الصناعة ضد المحال التى تبيع الملابس التى تحمل صور ممثلى و ممثلات المسلسلات التركية الشهيرة فى الوطن العربى كما صرحت الهيئة أن دورها قد اقتصر فقط على حصر كميات هذه الملابس فى المحال و تحرير محاضر ضد أصحابها و ورفع شكوى لوزارة التجارة و نصح الشباب و الفتيات الذين يرتدون هذه الملابس .

===

الصينيون يبتكرون معابد مصغرة للصلاة فى بيوتهم

--

توفيراً للوقت فى الذهاب الى المعابد الكبيرة أبتكرت الجالية الصينية التى تعيش فى العاصمة الماليزية كوالالمبور مجسمات مصغرة للمعابد التى تقام فيها طقوس دياناتهم من البوذية و التاوية و الكونفوشيوسية ... و يقول أتباع هذه الديانات إن وجود مثل هذه النسخ المصغرة من المعابد فى البيت يدل على ألتزام صاحب البيت بمعتقده كما يسهل عليه الحفاظ على اداء واجباته الدينية و الصلاة فى أوقات العبادة الدينية اليومية دون الحاجة للذهاب الى المعبد الكبير و الذى لا يزار إلا فى المناسبات الكبرى و الأعياد كما أن وجود مثل هذه النماذج المصغرة يبعث على الشعور بالأمن و السلام و يمنح صاحب البيت لحظات من التأمل و الخلوة مع النفس بعيداً عن ضجيج الحياة .

===

جريدة القاهرة

العدد 434

 12-08-2008 

---

 

 

Wednesday, August 13, 2008

هم


---

رضينا بالهم و الهم مرضيش بينا

جتنا نيلة فى حظنا الهباب

---

Monday, August 11, 2008

و أهو كله بيرزق

---


محمود درويش مات ... الله يرحمه ... الله يرحمه .

--

حتلاقى بعض المدونين كل واحد فيهم عامل مرثية ببيت شعر  من أشعاره و لا حاجة , و شوية تانيين حاطين صورته و تحتيها وداعاً , و تالتين حيحوطولوا فيديو صوت و صورة .

و الجرايد مش حتسكت , الدستور حينزل بعدد خاص ... جريدة القاهرة حترزعنا بكام صفحة متخصصة ... غير إن الحد جى حتلاقى بتوع اخبار الأدب , حيهبدونا بملحق عسل ... الهلال و وجهات نظر اول الشهر الجى بعدد خاص ( وجهات نظر صعبانة علىّ , لسه عاملة عدد عن المسيرى , حتلاحق على مين و لا مين ؟!! ) .

الفضائيات حتدلدق بدلوها  , الجزيرة طبعاً حتنزل بتلاتة أربعة وثائقى ... العربية على إستحياء كده بحاجة برضه ... قناة النيل الثقافية حيجيبوا مذيعة متعرفش أساساً محمود درويش , و حتتكلم بلغتن عربيتن سليمتن عن أنها " بتستفقده " شخصياً ... منى الشاذلى مرثية سريعة ... الاخوة فى الحياة و المحور حيقلدوا نفس البرنامج .

طبعاً , دار الشروق حتشتغل عسل , حتنزل بالأعمال الكاملة فى طبعة ظريفة ... و مكتبة ديوان حتروح نازله بالطبعات الفاخرة بتاعة رياض الريس و المدى و الساقى , من أم الديوان الواحد ب70 جنيه ... و حتلاقى الناس أبتدت تتكلم  عن محمود درويش كأنه كان ابوها الروحى , و الى مقرلوش فى حياته حتلاقيه شايله ديوان و لا أتنين , و ماشى بسيرته الذاتية فى الشارع و تلاقوهم لما يتقابلوا , كل واحد فيهم يعزى التانى فى محمود درويش .

و اساسى حيكشف الناصريين على جرائدهم انه الناصرى الأخير ... و اليساريين حيعلنوا الحقيقة انه اليسارى الأول ...  و الأخوان , مش عارف حيعملوها أزاى , بس حيطلع أنه كان اخوانى و كان فى التنظيم السرى , انه منه لمهدى عاكف علطول , بس هم شاطرين و حيتصرفوا ... و اكيد حيطلع صديق الحزب الوطنى ... انه كان ليبرالياً وفدياً متفتحاً ... و اكيد حتندلع معركة على الهامش بين العلمانيين و الأسلامين عن توجه محمود درويش الشعرى و فى الغالب حيطلع عميل امريكانى !!! .

و حيخش حد طبعاً حيتهمنى أنى بهاجم درويش علشان أتشهر !!!

و أهو كله حيبيع و كله حيشترى , و كله حيتكلم و كله حيسمع , و ربنا ما بينساش حد و اهو كله بيرزق , و مصائب قومن عند قومن تانيين مصالحو , و أهى أيام و بنعيشها  .

الله يرحمك يا محمود , الله يرحمك .

===

مديح الظل العالى

--

صبرا- تنام. وخنجر الفاشي يصحو

صبرا تنادي.. من تنادي

كل هذا الليل لي، والليل ملح

يقطع الفاشي ثدييها – يقل الليل –

يرقص حول خنجره ويلعقه. يغني لانتصار الأرز موالا،

ويمحو

في هدوء.. في هدوء لحمها عن عظمها

ويمدد الأعضاء فوق الطاولة

ويواصل الفاشي رقصته ويضحك للعيون المائلة

ويجن من فرح وصبرا لم تعد جسدا:

يركبها كما شاءت غرائزه، وتصنعها مشيئته.

ويسرق خاتما من لحمها، ويعود من دمها الى مرآته

ويكون – بحر

ويكون – بر

ويكون – غيم

ويكون – دم

ويكون – ليل

ويكون – قتل

ويكون – سبت

تكون – صبرا.

صبرا – تقاطع شارعين على جسد

صبرا نزول الروح في حجر

وصبرا – لا أحد

صبرا – هوية عصرنا حتى الأبد.

---

الأعمال الكاملة


Thursday, August 07, 2008

جراء الشرور

إن صورة الأله الذى لا ينتابه الألم , و ينظر مطمئناً هادئاً من علياء سمائه الى شرور العالم و تعاسته , مازالت قائمة تحيا سراً فى أعماق البشرية و لاوعيها . و عبارة لا ينتابه الألم تعنى انه لا يشعر , و من ثم لا يبالى . هذا إن تجاهلنا أو رفضنا الأنصياع لما تمليه الفروق الدقيقة بين العبارات و هى على كل حال , و بالرغم مما تأتى به من توضيح , لا تمس جوهر الصورة التى ترسمها و ما تعكسه من قوة و دينامية .

--

و يقول أخرون : يسوع لم يتألم الا حيناً , اما الام البشر فهى فى كل حين . إنى أتالم الأن , اما هو فقد حمل صليبه فى الماضى و هو الأن فى المجد . و كم من زوجة مسيحية راسخة الأيمان الى ذلك , إذ ترى زوجها يصارع السرطان و تخنقه حشرجة النزاع , تئن ملتاعة : " الام المسيح لم تدم الا بضع ساعات , اما الامك فعدة شهور ! " ... إيانا ان ننعت تلك المرأة بالمجدفة و لكن لابد , عند سماع كلامها , من رفض المقارنة بين زمن البشر و أبدية الله .

--

 قال جاك ماريتان يوماً : " لو علم الناس ان الله يتألم معنا و أكثر منا بكثير من جراء الشرور التى تعيث فى الأرض , لتبدلت امور و امور و لتحررت نفوس كثيرة " .

لا شك ان هذا الفيلسوف , الأمين للفكر التومائى , كان يميل الى فهم ألم الله بحسب معناه المجازى . إلا انه كان على بينه من أمره لما تكلم على اليأس الروحى الذى يهّيج الناس أحياناً على الله .

و كتب فى هذا الصدد :

" أعرف عدد غير قليل من المسيحيين يسيِّرهم نوع من أنواع الازدواجية أساسها جهل الحقائق اللاهوتية جهلاً مطبقاً و الثقة بترهات العقلانية المتطفلة السقيمة , فيرسخ فى أذهانهم فكرة ضبابية – تلقفوها من حيث لا يدرون – مفادها ان الله محبة , فى حين ينظرون من جهة ثانية لا نظرتهم الى آب ... بل الى سلطان هذا العالم , الى متسلط – مُخرج , و هذا المتسلط \ المُخرج هو فى رأيهم السبب الأول فى وجود سائر خطايا العالم و كل مافيه من تعاسة , لأنه يسمح مسبقاً بتعثراتنا و يتخلى مسبقاً عن خليقته , لينعم بمشاهدة مسار التاريخ البشرى الملىء بالشرور و الأرجاس . و هذه الفكرة الغير معقولة و الغير مقبولة , فكرة المتسلط \ المُخرج , القابع فى سمائه غير متحسس لألام من فُرض عليهم التمثيل فى مأساته , هذه الفكرة هى السبب فى ثورة عدد كبير من غير المسيحيين على الله "

==========

من كتاب

إلهنا يتألم

ل-الأب فرنسوا فاريون اليسوعى

--

 

 

Saturday, August 02, 2008

لامؤاخذه يعنى

" ... عارف  يا بشمهندس , قالولى روح للحج محمود و إن شاء الله ورقك حيخلص , سئلت عليه لغاية ما وصلت مكتبه , اول ما دخلت , فرحت قوى , لقيته راكع على السجادة و بيصلى , لامؤاخذه يعنى , خلص صلى و قام قعد على مكتبه , اديته الورق , بَص فيه و قاللى الورق ناقص يا بيه , أقوله ازاى ؟ ... يقولى حضرتك حتعرفنا شغلنا ؟ ... اقوله لأ العفو , بس ممكن تقولى ناقص إيه و انا اكمله ؟ ... مردش علىّ و عاد الكلام تانى , و قاللى الورق ناقص يا بيه . قلتله , ما هو لازم حضرتك تقولى الورق ناقص إيه ؟ أمال – لا مؤاخذه يعنى – حكمله ازاى ؟ . رد زميل قاعد على المكتب الى جانبه و قاللى يا أستاذ تعال ... رحتله يا بشمهندس , قاللى الورق ناقص ... و راح مشاورلى كده ... فهمت علطول , طلعت بريزة , و رجعت للحج محمود , قاللى الورق ناقص , طلعت بريزتين , قاللى الورق ناقص , المهم مش حطول عليك , وصلنا للورقة ام مدنى , ميت جند يا هندسة , ميت عفريت يركبوه , اخد الورق و مضاه و قاللى أطلع للأستاذ يوسف حيخلصهولك و إن شاء الله ربنا يسهلك ... بيقولى إن شاء الله ... إن شاء الله يا أبن الحرامية !!!!... المهم طلعت لسى يوسف ده ... الحمد لله طلع ما بيصليش ... ههههههه ... أديته الورق ... و هو بياخده بأيده لمحت فى أيده , لامؤاخذه يا بشمهندس , لامؤاخذه يعنى , شفت صليبكم مدقوق على أيده , بينى و بينك فرحت , قلت بس مسيحى يبقى اكيد لامؤاخذه نضيف ملوش فى مد الأيد ... ليه ؟ ... حقولك انا ليه ... قلت مسيحى لوحده وسط ناس كلهم مسلمين يبقى أكيد لامؤاخذه حيعمل نضيف علشان يعنى يبقى فُنط و مسيحى و كده , يرسم يعنى , أنت فاهمنى يعنى يا هندسة ... ههههههه .... المهم , اخد الورق و بص فيه و راح قاللى , ورقك ناقص ... يا أبن الكاااااالب !! , ورقى ناقص !!!! , طلع ما يتخيرش عن الحج محمود , طلعت البريزة , و بعدها عشرين , و اخد فى الأخر ورقة بميت بلبل , الواطى , لامؤاخذه يعنى , نسى نفسه و أنه مسيحى , هههههه , عمل رأسه براس الحج محمود الراجل المصلى التقى , هههههه , و أخد ورقة بمية زيه زى المسلم .

و الله يا بشمهندس ... و لا مسيحى نافع , لامؤاخذه يعنى , و لا مسلم نافع , أحنا شعب فرعون أبن كلب , نستحق الى بيحصل فينا , لازم يمشونا زى العبيد , يا اما يرجّعوا الأحتلال بتاع الأنجليز و يمشونا بالكرباج , زى الكلاب .

 تخيل يا بشمهندس , الورق بس علشان يخلص عايز بتاع الف جنيه ورق و دمغات و وصولات و كده . رشاوى بقى , ما هى أسمها رشاوى مش إكراميات , ما هم بياخدوا مرتب , أكرمهم على شغلهم ؟!!! , رشاوى بس 2000 جنيه , طيب واحد سواق زيى يجيب منين ؟ , العين بصيرة و الأيد قصيرة يا هندسة , 3 الاف جنيه علشان الورق يخلص , و كله بقى طوابير , عيش طوابير و اكل طوابير , حتى البنزين بقى طوابير , علشان تدفع الرشوة تقف طابور يرضه , هههههه . و شاكرين و حامدين , ربنا يصبرنا , و ربك بيقطع من هنا و بيوصل من هنا , و أدينى ماشى حتة حتة على الورق , كل ما ربنا يكرمنى بقرشين اخلص جزء منه . فلوس ؟ ... فلوس أيه يا هندسة !!! , ربك كريم , طول ما فينا صحة و ربنا مبارك لنا فيها و قادرين نشقى و نجيب قرش , عمرى ما أمد ايدى لحد و الحمد لله , حتى لو حاكلها دقة , ربنا كبير يا بشمهندس , ربنا ده بتاع الغلابة , بتاعنا أحنا يا بشمهندس , و لامؤاخذه يعنى , لا عندنا مصنع حديد و لا عندنا عبارة , و لا بنرقص فى أغانى , و لا بنشرب خمرة و الحمد لله , و بنصلى الفرض بفرضه . ربنا يكملها بالستر و أهو بيكرمنا بناس عسل زيك كده  يهونوا علينا العيشة , الله يخليك يا هندسة , من القلب للقلب و الله يا بشمهندس , دا أحنا بينا عيش و ملح , و العشرة متهونش الا على ولاد الحرام , و أحنا و الحمد لله ولاد حلال  .

انما انت عارف إيه الى مضايقنى و خانقنى فى الموضوع بتاع الورق ده , لامؤاخذه يعنى , أزاى الواد المسيحى ده يأخد ورقة بميت جند زيه زى الحج محمود  , هو نسى نفسه و لا أيه ؟ ... ههههههههههههه .

أضحك يا بشمهندس , أضحك , محدش واخد منها حاجة , ربنا يسهلك و يسهلنا ... صدعتك معايا , الشغل فين انهاردة ؟ أطلع على فين ؟ ... "

===

عم علام يروى مشكلته مع تخليص بعض الأوراق فى أحدى المصالح الحكومية .