Wednesday, July 30, 2008

الضربة الحادية عشر

1 ثم قال الرب لممدوح “ضربة واحدة ايضا اجلب على مصر, بعد ذلك أخرجكم من هنا." 2 و كان ممدوح رجلاً عظيما جدا في ارض مصر 3 وقال ممدوح : هكذا يقول الرب " اني نحو نصف الليل اخرج في وسط البحر. 5 فيموت كل من فى العبارة من القبطان الجالس على كرسيه حتى الطفل الرضيع. 4 ويكون صراخ عظيم في كل ارض مصر لم يكن مثله ولا يكون مثله ايضا.5 ولكن جميع بني ممدوح لا يسنّن كلب لسانه اليهم , لا الى الناس ولا الى البهائم.لكي تعلموا ان الرب يميّز بين المصريين و بنى ممدوح. 6 فينزل اليّ جميع الشعب  ويسجدون لك قائلين اخرج انت و جميع اهل بيتك .وبعد ذلك تخرج الى الخارج."  7 وقال الرب لممدوح " لا يسمع لكم أحد و لا تنفذ عليكم شريعتى لكي تكثر عجائبي في ارض مصر.  " 8 وكان ممدوح يفعل كل هذه العجائب امام شعب مصر و فرعونه . ولكن شدّد الرب قلب فرعون و نظامه فلم يرحم بني مصر و شعبها من حكم عجائبه .

--

و المجد للرب دائماً

--

سفر الهروب

الأصحاح رقم صفر .

--------

 

Tuesday, July 29, 2008

الى أهالى العبارة

هذا الفيديو يظهر معاناة الشعوب

اهداء الى أهالى العبارة لعلهم يتعلمون .

===




Saturday, July 26, 2008

علمانية

هذه التدوينة ل" المثقفين و الفلاسفة الشباب فقط " .

--

تنقسم العلمانية من وجهة نظر عبد الوهاب المسيرى الى علمانية جزئية و علمانية شاملة , و قد صدر له مجلدان عن العلمانية من دار الشروق , الأ أن الحق يقال , فقد أغفل المسيرى اهم نوع من انواع العلمانية و هى علمانية الطريق !!! .

--

فى الطريق بين سوهاج و القاهرة , على الطريق الزراعى , وسط تأملاتى , و زنقتى المحمومة , على صوت عربات التريلا و النقل و المقطورة , و صوت كلاكس السيارة و التوقف و الأنتظار لعبور الجاموس و البقر , و على انغام طارق الشيخ , أثناء بحثنا عن مكان " نفك فيه زنقتنا " سواء كان رست أو مكان مدّارى ... اكتشفت تلك الإشكالية \ العلمانية : " زنقة الطريق " .

--

تنبع تلك العلمانية من نظرية " طرطر , طرطر فى أى مكان ... صحرا إن كان أو بستان " و هى تدعو للفصل كأى علمانية , تدعو ل" فصل الحمام عن الطرطرة " . و من النموذج الإدراكى تعرف انها علمانية عنصرية زمنية أداتية مكانية طبيعية حلولية كمونية أستبطانية داروينية غريزية..

عنصرية لأن الأنثى لن تستطيع ان تمارسها , زمنية انية لحظية لأن لحظة ما تتزنق لازم تعلمن نفسك فى أى حتة آنياً حالاً , مكانية طبيعية لأنها تتدعو الى أستغلال الطبيعة لأنك تتوحد معها و لأن الحدث لا دينى و لا ما- ورائى , لحظى آنى بتعملها فى موقعك و على طبيعتك جنب اول شجرة , و بطبيعة الحال حُلولية لأنها تدفعك الى حل ازرار البنطلون و سوسته , و كُمونية لأنه يكمن فى داخل الجسم البشرى و لازم يخرج , و إستبطانية لأنه ما ينفعش حد يشوفك و أنت فى لحظات علمنتك و الأ حتبقى فضيحة , طبعاً داروينية لأنها غريزية .

بدأ أنتشار تلك العلمانية بين اوساط المثقفين و بشدة , و قد حكى لى كراكيب أنه قابل أحد أهم المثقفين المصريين فى حمام أحدى الفنادق , الذى قال له أثناء عملية العلمنة الشاملة : ما أحلى طرطرة المزنوق . ( و هنا يظهر مدى سيطرة الفكرة و ربطها بالحلاوة و الراحة و الأستمتاع – قطاع اللذة ) 

مشكلة تلك العلمانية أنها " محصورة " فقط فى العلمانية الشاملة , لا يمكن تجزئتها , لابد من عملية تفريغ كامل , و الا ستصاب بالأمراض , أول ما تتزنق لازم تتشملل و تقوم بسرعة و تفك زنقتك كلياً بغض النظر لأى أعتبارات , و هنا تتحول الطبيعة الى مادة إستعمالية , لأنك تستغل الشجر أو الصحراء للتخلص من كمونك و أستبطانك الداخلى , حيث تنفصل القيمة عن الواقع \ عن البشر , فأنت تقف معطياً ظهرك للطريق \ السيارات \ البشر و لا تبالى بهم , حيث يتم أختزال الزمن و العمر و المسافة بين أول شجرة تقابلها و بين حمام أول رست قادم .

و يلاحظ إن قطاع الدولة القومية قد طور مؤسساته الأمنية و التربوية , بجانب تطور قطاع الأعلام و قطاع اللذة :

 فالأمن يستطيع و بكل سهولة ان يعلمنك و يجعلك مادة إستعمالية , و يتم تسليعك و تشييئك , فهو قادر أن يأخذك الى القسم و يرنك علقة يخليك " تتعلمن " و تعملها على روحك . اما المدارس و التعليم فأصبحت مباءة و حمامتها دليل على نظافة مستوى الطلاب المعرفى . اما قطاع الأعلام فقد تطور و أصبح ما يبثه من برامج يمكن ان نسميه اكبر عملية طرطرة فكرية فى نافوخ البشر , اما قطاع اللذة فمع أنتشار محلات درينكيز و أرتفاع نسبة شرب البيرة التى تحول الأنسان الى منتج نهائى قابل للتعاقد و التحييد و الأغتراب عن الواقع , يتم شربها فى سفح المقطم و الطرق النائية و البعيدة و الجانبية و المناطق العشوائية حيث الأستنارة المظلمة و الشوارع مضلمة تجعل فك الزنقة يتم بسهولة . 

تلك العلمانية هى أعلى درجات العلمانية الشاملة تلغى الدين و تستبعده , تساوى بين الجميع , فلا فرق بين مزنوق مسلم و مزنوق مسيحى و مزنوق يهودى و مزنوق بوذى , تقصى الدين و المؤسسة الدينية و تستبعدهم , لا مكان للميتافيزيقيا و ما- الورائيات , تنفصل القيمة عن الحدث عن الأخلاقية الأنسانية المطلقة , يظهر و بشدة المفهوم الداروينى الحيوانى الأولى للحاجة الأنسانية المادية لأشباع \ إفراغ مكبوتاته \ غرائزه \ طرطرته , لا غرب و لا شرق , عولمة إجبارية عابرة للقارات , توحيدية إختزالية نمطية , عضوية تفكيكية , ففى لحظة الأنزناق العضوى , عقلك بيفك و متبقاش عارف تفكر فى حاجة تانية . لا يستطيع مسلم متطرف أن يهاجم مُطرطر مسيحى , و لا يمكن لزكريا بطرس أن يهاجم مُطرطر مسلم , ففى تلك اللحظات يندفع الجميع نحو نداء المادة الأستعمالية \ الطبيعة . يعنى من الأخر ... لا قيم مسيحية و لا قيم إسلامية فى زنقة الطريق , إستبعاد كامل للمنهجية الدينية .

إما إشكالية اختلاط الحقل الدلالي للمصطلح فهى عميقة و مركبة و ان كانت شاملة , و إذا رجعنا للقاموس و النصوص حنلاقى " افك زنقة , افك حصرة , اقضى حاجتى فين ؟ , نداء الطبيعة ( و له دلالة لفظية خاصة مادية رمزية ) , مزنوق , عايز أطرطر ,  عايز أعمل الخفيفة , عايز أقول رأيى فى الحكومة , رايح للعميد , ... " .

 و يتساوى هنا فى تعريف المصطلح Irving Kristol , Agnes Heller  , max Weber  , فهمى هويدى , محمد أركون و حسن حنفى ,  ليس بصفتهم مفكرين و دارسى لعلم الأجتماع فحسب و لكن لأنهم أكيد و أيضاً بيتزنقوا و بيتعلمنوا علمنة شاملة فى أى لحظة من لحظات اليوم . 

--

بعد أن توقفنا فى الطريق , فى الوصلة بين أسيوط و المنيا , لنقوم بالعملية الأجرائية . أفرغنا كل النموذج الكامن المستبطن التعاقدى و استرحنا بشدة , فتلك الوصلة لا يوجد بها أى رست فى الطريق .

عم علام سائق السيارة نزل من السيارة و سبقنا جميعاً و قام بالعملية الأجرائية التطبيقية الدريدية بعيداً عنا , قام بالتفكيك و إعادة التركيب , فك أزرار البنطلون و قام بعملية التطبيق \ الترشيد و بعد ان أستراح أعاد تركيب أزرار البنطلون , و عاد الى السيارة سعيداً مرتاحاً مما يعنى نجاح سيطرة قطاع اللذة , و نجاح سريان قانون طبيعى مادى واحد على الطبيعة و الأنسان هو قانون " الصرف " .

و هو دليل مادى قاطع واضح على إن الفلسفة و الفكر التفكيكى الدريدى و مقابله الفكر المسيرى ,  لهما تأثير مباشر على عامة الشعب . فهنيئاً لعامة الشعب مرتين , مرة لتغلغل الفكر الفلسفى العلمانى , و مرة لعم علام و لى شخصياً بفك زنقتنا . و نشكر فى النهاية نداء الطبيعة \ الأنسان . و نخص بالذكر و الشكر الشجرة الى فى مدخل قرية بنى حسن و التى إستضافت علمانيتنا الشاملة و اكدت نظرية دريدا فى التفكيك و إعادة التركيب , و ينصح عم علام بأن تتحول تلك الشجرة الى مزار سياحى للمثقفين و الفلاسفة للوقوف و مشاهدة " أثار "  أخر تطورات الفكر العلمانى .

===

Friday, July 25, 2008

قلة أدب

فى الحلقة الأسبوعية من برنامج " الطبعة الأولى " , الذى يقدمه احمد المسلمانى , و التى تذاع كل خميس الساعة  7 و نص , على قناة دريم 2 ...  كان الضيف الدكتور مراد وهبة , أستاذ الفلسفة المصرى الشهير , و كان يحكى عن فترة التكوين الأولى , و عن الألحاد و علاقته بالفلسفة , و رؤية الفلاسفة ل- الله .

المهم , وصل الحديث الدكتور مراد لحياة سقراط , الذى عُقدت له محاكمة تتهمه بإنكار الألهه و إفساد عقول الشباب , و حكم عليه بالأعدام , و قيل له إذا أعلن انه سيتوقف عن التفلسف , سيوقفون حكم الأعدام , الأ إن سقراط رفض و قال أنه لن يتوقف أبداً عن التفلسف , و شرب الكأس المسمومة و مات .

علق أحمد المسلمانى , مقدم البرنامج , انه فى العصر الحالى كلمة " يتفلسف " معناها " بيقول كلام فارغ ... بطل فلسفة أو متتفلسفش ... معناها بلاش تفاهه " 

ضحك الدكتور مراد و هبة و قال له : فعلاً , الكلمة أصبحت مرادف للهراء و الكلام الفارغ  . و حكى التالى :

كنا قد سمعنا أن الملك قد أنشأ قرية نموذجية أسمها " بهتيم " , فقلنا نذهب و نشاهدها , فلما دخلناها , بدأ الأطفال فى قذفنا بالحجارة , و خفنا الأصابة , و أردنا تخويفهم , فأنحنيت و ألتقط حجر من الأرض لأقذفه عليهم , فوجدت فلاح خلفى يسئلنى " حتعمل إيه يا أستاذ ؟ " , فأجبته " أنت مش شايف العيال الصغيرة عمالة تحدفنا بالطوب , فقلت أخوفها أحسن تعورنا " , فقال الفلاح " معهلش يا بيه , أصل دى عيال متربتش , اهلهم بدل ما يربوهم ... علموهم الفلسفة و قلة الأدب " ... !!!

Thursday, July 24, 2008

مشكلة بسيطة

لا يعتقد الله فى صنيعة يديه , الأنسان , المخلوق من روحه . لا يعتقد الله أن الإنسان المخلوق الحر  سيختار بحريته الخير , لذا فقد صنع جهنم .

لا يعتقد الأنسان فى الله , عز و جل . لا يعتقد أن خالقه قد جبله روحاً حرة , لذا فقد صنع الأنسان الشر لكى يؤكد لخالقه انه حر فى فعل الخير .

---

ملحوظة :

إذا أردت أن تكون مؤمناً عليك أن تحل تلك المعضلة : أن تكون حراً فى صنع الخير دون أن تكون " مؤمناً " .

---

Monday, July 21, 2008

صف أول

" أنت عارف انك بقيت قُريب خلاص و حتتنقل للصف الأول , انت كبرت يا أبنى و محققتش أى حاجة من الى أنت عايزها , و أنت صغير كنت بتسمع عن الموت , كنت من الصف الرابع , عم والدك مات , خالة والدتك توفت , كانوا بعيد , ناس متعرفهمش , ناس بعيد عنك , مشفتهمش كتير .

و بعد كده انتقلت للصف التالت , جدك مات و جدتك , حضرتهم شوية , و حسيت بالفراق , كانوا بيحبوك و بتروح تنام عندهم , كنت صغير , بس فاكر الأحداث , بيتهم هو البيت الى كنت بتقابل فيه ولاد خالتك و ولاد عمتك , اول مرة تلعب مع بنت عمتك كان فى بيت جدك , ماتوا , حسيت بوجع جواك , صحيح مكنتش فاهم سببه , بس فى حاجة نقصت من جواك . مش فاكر الجنازة , بس فاكر أنك سئلت مامتك : هو إحنا مش حنشوف جدو تانى ؟ , و لما ماتت جدتك , كنت بتحبها علشان بتخرج معاها و تجيبلك حاجات حلوة . كرهت أبونا و كرهت يسوع , فاكر لما سئلت مامتك : هى تيته راحت فين ؟ و جاوبتك : راحت عند يسوع , قلتلها : انا بكره يسوع , علشان اخد تيته و سابنى لوحدى هنا .

انت بتضحك لما تفتكر الحاجات دى , كنت فى الصف التالت , لسه بعيد , صغير , كل حاجة بتتنسى , بتسيب أثرها طبعاً , ذكريات جميلة , بس انت كبرت دلوقتى , عارف يعنى أيه كبرت , كنت صف تالت و حتنتقل للصف التانى , ابوك و امك كبروا , عدوا الستين , و السبعين , و قريب حتلاقى المسئولية فى وشك , و كبيرة عليك , انت دلوقتى مش حاسس , زمان لما حد بيموت, كنت بتروح الجنازة مع أبوك , و تسلم و تعزى بالليل فى القاعة و تروّح , تحزن شوية و تنسى , لكن دلوقتى , ممكن أبوك يموت قبل عمك أو امك تموت قبل خالتك , و انت الى حتنزل تحجز الكنيسة , أو تقف بالليل فى القاعة تستقبل العزى , أنت لسه مجربتش , لما تروح لطواف أو عزيز * علشان تنقى الصندوق و الصليب , و الورد , حتطلع فلوس من جيبك , ممكن تبقى امك اللى ماتت , تخيل معايا , بتطلع فلوس من جيبك لسواق العربية الى حتروح تدفنها , او تنزل مع صديقك و أنت منهار , تنقى لوالدك الى لسه ميت الصندوق , تخيل كده و انت واقف و الدموع بتنزل من عينيك و مسنود على كتف صديقك بتنقى صندوق أبوك , و تقول للراجل : لأ ده كبير , لأ ده صغير , عايزه أعرض شوية ...  بتدور على مقاس جثمان أبوك , تخيل نفسك و انت بتدفع إكرامية للى حيشيلوا الصندوق , إكرامية تخيل , تيبس للى حيدفنوه , و تقف تستقبل العزى على باب الكنيسة . حتروح الترب , ايوه , متستغربش , علشان انت الى معاك مفتاح التربة بتاعة العائلة , حتروح علشان تفتحها , علشان تدفن امك و تشيل الصندوق كمان و تنزله فى التربة الى أنت فاتحها الصبح , و ترجع على الكنيسة فى القاعة , و تخدم الناس و انت مش عارف الناس الى جت و لا حتى بيعزوك ليه , و لا بيقولوا إيه ؟ , كله حيتم و انت مش فى وعيك .

انت صف تانى , دى مسئلة وقت و حتلاقى كل أهلك , ابوك و أمك , و عِمامك و خالاتك , ماتوا , دى حاجة أكيدة . أنسى كلام الضحك على الدقون بتاع " بعد الشر عنهم , و طولة العمر ليهم , و ربنا يجعل يومى قبل يومهم  , و متقلش كده على أهلى , فال الله و لا فالك , متفَوّلش عليهم " , كل ده هبل و ما يسواش حاجة , دى حقيقة ... كلنا حنموت , حيموتوا قدام عنيك , حتشوفهم و بأيدك حتدفنهم , و ممكن تبقى الحكاية مش سهلة , أدعى إنها تبقى سهلة , أنت ممكن تشوفهم بيموتوا ببطء و بيتعذبوا فى موتهم , و بيعذبوك معاهم و مش قادر من جواك تتمنى موتهم , رغم أنك عارف انهم كده كده حيموتوا , أبوك و أمك , ممكن يكون حد مشلول , عنده القلب , عندها السكر , الضغط , الكبد أو الكلى , أو حتى المرض الوحش , مش عارف يخش الحمام , مش عارفه تنزل من على السرير , مش قادر ياكل , و ده ممكن يحصلك برضه , صلى و ادعى أن يكون يومهم سهل و يموتوا موتة ربنا على سريرهم , بدل ما يتعذبوا فى موتهم و يعذبوك معاهم  , حيموتوا كده كده , بس الطريقة مهمة برضه .

و تترقى يا عم و تبقى صف اول , يبدأ عدك التنازل , بتقترب من الموت بخطى ثابتة و اثقة , كلنا رايحيين , كلنا حنموت , بس أدعى يبقى يومنا سهل برضه و بتاع ربنا , الموت موت , دى حاجة أكيدة , متخفش , مفيش مهرب , و الموضوع و لا هو جد و لا تهريج , ده زى شرب الميه , حاجة طبيعية ,  لازم حتشرب . لما تبقى صف أول حتستريح , حتتعامل مع الدنيا بأكثر سعادة و رحابة , حتبقى سعيد حتنبسط , أنت بتكبر , و كل ما تكبر كل ما من جواك حتصفى أكتر , انت بتاع كنيسة و بتصلى , من جواك حتبقى مستريح , حتشوف ولادك و حتربيهم , و يمكن تشوف أحفادك , فاكر الحفيد , صف تالت , افتكره و أنبسط معاه , كنت زيه قبل كده , صف تالت , بس ربنا كرمك و بقيت صف أول , و هو جايلك فى السكة , حيكبر و حيقرب منك , ده عمر , مش تهريج , و الدنيا مش حتقف , و لا العمر حيقل , و لا أنت حتصغر تانى ,  ابوك و امك حيموتوا , و انت حتموت , و ابنك حيموت , و حفيدك حيموت , كله حيموت , متزعلش , و لا تضايقك , أنت راجل مؤمن , و المؤمن ميزعلوش الموت و لا يخوفه , و لا حتى الملحد و لا الكافر , لأن كله حيموت , ميغركش الى أحنا فيه دلوقتى فى الدنيا , ده تهريج , أخرها متر فى متر , كفن و صندوق , و تربة و مفتاح و دموع , دى ثوابت زى ما قلتلك , لو حتعرف تبطل تشرب ميه , يبقى ممكن تبطل تموت .

 صف أول يعنى راحة , عارف ليه حتستريح ؟ علشان أنت الى حتموت .. مش حتشيل هم موتك , صف أول يعنى غيرك هو الى حيزعل عليك , غيرك حيشيل همك , غيرك هو الى حيدفنك , حد تانى حيشيل المسئولية , ما أنت شيلتها برضه , شفت الدنيا أزاى ؟ , زى ما شيلت أنت غيرك حيشيل , زى ما غيرك مات أنت كمان حتموت , كلنا حنموت , ربنا يرحمنا جميعاً , ربنا يرحمنا , قول أمين "

===========

* طوّاف و عزيز : محلات بيع صناديق الموتى و تأجير سيارات الدفن الخاصة بالمسيحيين . 

Thursday, July 17, 2008

ملحوظة سريعة جداً

خطاب سماحة السيد حسن نصر الله الذى القاه فى الأحتفالية التى أقيمت بمناسبة نجاح عملية تبادل الأسرى ( عملية الرضوان ) , و خروج سمير القنطار عميد الأسرى العرب ! من المعتقلات الأسرائيلية , خطاب مستفز لأقصى درجة , سواء على الصعيد العربى أو الدولى أو الداخل اللبنانى أو حتى بالنسبة للعدو الأسرائيلى .

--

و الخطاب المستفز , أى خطاب مستفز , بيحوى معنى من أتنين , أما ثقة مفرطة زائدة أو بداية الغرور .

لو ثقة مفرطة زائدة , فأن لكل جواد كبوة , يعنى فى كبوة للمقاومة فى الطريق !! و حتعدى .

اما بداية الغرور أو الغرور نفسه , فهو سقطة بلا قومة .

ربنا يستر .

--

 ملحوظة أسرع :

الكلمة التى القاها سمير القنطار نفسه , أكثر أستفزازاً من خطاب السيد حسن نصر الله , لكن لن يهتم بها احد , بل سينصب الأهتمام كله على خطاب نصر الله , لأن ده سمير القنطار , و التانى سماحة السيد حسن نصر الله . 

Tuesday, July 15, 2008

every body respects the gun.

You don’t become a cop because you wanna serve and protect, anybody believes that is an idiot, you do it because you get respect,

Because they let you carry a gun and a badge,

 Most people respect the badge,

 Every body respects the gun.

===

Nothing wrong with a little shooting,

 As long as right people get shot.

===

Robert deniro

Righteous Kill

“New movie “

This fall

--



Tuesday, July 08, 2008

حائط صد

" عارف , على الرغم من أختلافى الشديد مع السلفيين الأسلاميين فى كل الى بيعملوه , و أختلافى الأشد مع بتوع الصخرة المتزمتين * , بس عارف لولاهم و لولا إن بيتعمل ليهم حساب بدون ما حد يشعر , كنا عشنا فى مسخرة , صحيح هم بيغالوا فى بعض ردود أفعالهم , لكنهم برضه يعتبروا حائط صد , بيشيل بلاوى , بنبقى مستريحين ان فى حد بيشيل قرف الى جى من بره و زبالة الفكر الى جوه , و فى نفس الوقت بنقدر نهاجمهم على تزمتهم الزيادة ده , لأن من جواك , صراحة يعنى , بتبقى مبسوط مهما حصل منهم , ان لما المسخرة حتزيد حتلاقى حد يشيل عنك و يقف وقفة تصد كل الزفت و المسخرة . كل الى بيهاجموهم بيبقوا موافقين على كده من جواهم , و لا أنت أيه رأيك ؟ "

--

سؤال موجه لى من صديق مسيحى فى حوار لم ينته أبداً

===

* : بتوع الصخرة المتزمتين ... لفظ يطلق على المتشددين الأورتودوكس

للتدليل على مدى تزمت هولاء الأورتودوكس , اقدر اقول انكم لو قارنتوا بينهم و بين الجماعات السلفية الأسلامية , ممكن المسيحيين الأورتودوكس يتهموا الجماعة الأسلامية و الجهاد الأسلامى و الأخوان المسلمين و التكفير و الهجرة بأنهم ليبراليين منحلّين !!! .

 

 

Saturday, July 05, 2008

أحيه يعنى بجد

-1-

عرفت الى قالوه على صاحبك ؟

قالوا  ايه ؟

مش حقولك .

طيب صاحبى مين ؟

مش حقدر اقولك .

طيب مين الى قال ؟

مقدرش اقول على أسمائهم .

طيب بتقوليلى ليه ؟

علشان لازم تعرف .

أعرف ايه ؟

اكيد مش ححكيلك لأنهم حلفونى .

حلفوكى على ؟

انى مقلكش .

طيب بتقوليلى ليه ؟

علشان ده صاحبك .

---

حصل موقف عندنا جامد جداً .

حصل ايه يا بنتى ؟

مشاكل فى البيت و ناس زعلت من ناس و انا مخنوقة .

حصل ايه ؟

مش ححكيلك .

ليه مش حتحكى ؟

علشان دى اسرار بيوت .

طيب خلاص مش عايز اعرف و بلاش تحكى

يعنى ايه مش عايز تعرف ؟ , بقولك مخنوقة و انت صاحبى و لازم احكيلك.

طيب احكى

لأ مش حينفع , دى اسرار بيوت .

---

هو يستاهل ضرب النار و الجزم , انه كان مصاحب بنت زى دى . 3 شهور مش فاهم و لا كلمة و بيشتكيلى انه بيسمع طلاسم من دى يومياً . و لما قرر يسيبها علشان اتخَنق خلاص و كلّمها و قال لها ان القصة خلصت , تتهمه بأن " انت غامض و غريب و كلامك مش مفهوم لأنه مفيش سبب يخلينا نسيب بعض " , و كمان تعمله مشكلة مع أهله .

--

أحيه يعنى . يلعن ابو البنات الى بشكل ده .

=========

-2-

المسيرى مات , الله يرحمه و يرحمنا جميعاً .

لكن عايز افهم نقطة واحدة فى قصة المسيرى و المدونات , لقيت مدونات بكل برود كاتبه " صدمة وفاة المسيرى , مفاجأة وفاة المسيرى , فاجعة وفاة المسيرى " ...

هو المسيرى مثلاً كان " خالد و مطوّل و حيعيش لأخر يوم " و مرة واحدة مات على خوانه ؟ انضحك عليه مثلاً , عَقده كان يخلص 2015 , و خَمُوُه فى 7 سنين ؟؟!!!!.

ما كلنا حنموت ... صحيح المسيرى مفكر معروف , لكن كان حيموت حيموت , ايه المفاجأة و لا الصدمة فى موته ؟ انا مش عارف .

 اعرف نقول حزانى على موته , ماشى . انما صدمة و مفاجأة !!!

--

أحيه يعنى . هو كله بيظيط دلوقتى ؟ , و محدش فاهم حاجة .

=========

 -3-

راجع من أسكندرية تعبان جداً , وصلت الصبح الساعة 7 و نص . قررت أروح البنك علشان ادفع الفيزا بسبب الجواب الى بعتهولى , وصلت الساعة 8 و نص , و قفت تالت واحد عند الشباك , لما وصلت للشباك مكنتش قادر خلاص .

 الراجل الى شغال بوّش أمه التِنح , بيرد علىّ بكل برود : حضرتك جى تعمل ايه ؟

رديت على بواخة ابوه الّى طافحة فى نبرة صوته : جى اسدد الفيزا .

ضحك بخنقنة كده , و فتح الكمبيوتر على البيانات بتاعتى و قاللى بكل سذاجة : حضرتك جى بدرى ليه ؟ ده ميعادك يوم 16 و انهاردة 3 فى الشهر .

كتمت غيظى و تفافتى الى كانت حتنط على وش امه و رديت : انتم مش بعتولى جواب و قولتولى لازم أسدد فى ميعاد أقصاه 3 فى الشهر ؟

ضحك ضحكة طويلة بعد ما خلصها حسيت ان مرارتى طارت منى و قاللى : أأااااااااه , معلهش يا بشمهندس , هههههههه , هو جالك الجواب ده ؟ , دى جوابات طلعت غلط , و بعدين انت عارف ان ميعادك يوم 16 , فالمفروض تيجى يوم 16 .

قلته و انا بموت من التعب و الخنقة : خلاص مش مشكلة حسدد دلوقتى .

لأ , تعالى يوم 16 .

لأ , حسدد دلوقتى .

لأ , هههههههه , تعالى يوم 16 .

أتنرفزت جداً و صرخت فى وشه الى عايز ضرب الجزم : ما تخلص , انت حتهرج معايا ؟

--

أحيه يعنى , ناقصه هى هبل ميتين ابوهم على الصبح , يلعن ابو البنوك على أبو الناس الى بالشكل ده .

=========

-4-

ادى ام الجوازة باظت .

و البنت و الولد , قرب يجيلهم  ذهول كامل و ذُهان و غثيان و حالة هذيان و تخلف عقلى و انهيار عصبى من الصدمة , محدش فاهم منهم هم الأتنين لحد دلوقتى سبب بوظان الجوازة .

احيه يعنى , علشان ولاد البهايم  الى بوظوها ينبسطم ,

يا ولاد الكلب يا بعدا .

========

-5-

اسبوع زفت تمام .

اما عن حالتى النفسية , فأحب اطمنكم على , انا تمام جداً و الحمد لله ,

معنوياتى ارتفعت كتير اخر يومين , من زبالة بقت خرى , بس .

---

و حتى تكتمل الأبعاد الأسطورية للأيام بنت الكلب دى , تنصحنى إحداهم لكى أريح أعصابى , بأن أشاهد مسلسل اسمه " نور " و لا مش عارف ايه . إيه المسلسل ابن الهبلة ده ؟

حد يفهمنى ؟

البنت مش حينفع تفهمنى لسبب بسيط جداً , انى سَبّيت لها ميت ملة و خسرتها للأبد .

ممكن حد يفهمنى ايه المسلسل ابن الهبلة ده ؟

احيه يعنى . هو فى هبل كده ؟

=========

 

 

Tuesday, July 01, 2008

انا مش عارفنى

ana mesh 3arefni.mp3 - abd-elbasset hamouda

انا مش عارفنى

انا تهت منى

انا مش أنا

لادى ملامحى و لا الشكل شكلى

و لا ده أنا

--

ابص لروحى فجاة لقيتنى

لقيتنى كبرت فجأة كبرت

تعبت من المفاجأة و نزلت دمعتى

قوليلى أيه يا مرايتى

قوليلى أيه حكايتى

تكونش دى نهايتى و اخر قصتى

--

يا دنيا طفيتى شمعى

يا ناس كترتوا دمعى

و العمر راح منى

كتبت الأه بقلمى

كسرتوا سن قلمى

و برضه بقول قدرى

حزين من صغر سنى

و مين على الأه يعنى

مودانى الخطاوى لسكة تايهة منى

--

يا ليل , الجرح قاللى

معايا زى ضلى مئانس وحدتى

سرقت عمرى كله

خلاص مبقاش فاضلى

غير جرحى و دمعتى

جريح و ده مش بيدى

مخدتش بس بدى

زرعت يا ناس ورودى

جنيت الشوك لوحدى

-

عبد الباسط حمودة

===========