Wednesday, April 29, 2009

يا مرحب بأم حسن

-1-

جيل محظوظ

هذا الجيل محظوظ و ينبغى ان يعترف بحظه و يشكر ربه و ينتظر " يوم القيامة " فى تمهل و إيمان و عن قناعة انه لن يرى أكثر مما رأى و أنه ليس بالأمكان أفضل مما كان , " ان ما لم تراه عين و لم تسمع به أذن و لم يخطر على قلب بشر " , قد حدث و تم و أُكمل . هذا الجيل بعد أن يستغفر ربه و يشكره , عليه ان يقذف بكتب التاريخ من أقرب شباك . فما حاجتنا الأن الى التاريخ ؟ " ما أحنا شفنا كل حاجة " .....

مجاعات زى القرون الوسطى و شفنا فى أفريقيا و شفنا طوابير العيش عندنا !

انهيار اقتصادى زى بداية القرن , عايشنه و أتخرب بيتنا و الحمد لله !

محاكم تفتيش و حرق كتب و مصادرتها زى القرون الوسطى , شغال على ودنه و على عينك يا تاجر و مش محرومين من حاجة  !!

بطالة و سرقة و قتل و أغتصاب و تحرش .. اللهم بارك و زيد , هو احنا عندنا غير الحاجات دى !!

حروب نووية !! .. قريب إن شاء الله , كوريا بتهدد و طالبان فاضلها شوية و تاخد ترسانة و ربنا يقدم ما فيه الخير و نعوم فى النووى .

حرائق زى حريق القاهرة و روما .. شغال الله ينور بيتنا .. ينور بيتنا بحريقة !!

فاضل إيه يا واد يا عبس ؟ فاضل إيه يا واد يا عبس ؟ أه .. فاضل " وباء يحصد مليون و لا أتنين من البشر " .. الحمد لله جالنا الوباء أهه و فاضل بس ان الناس تموت  , و بكده يبقى الجيل ده شاف كل حاجة , و ملوش حجة .

-2-

يا مرحب بالوباء يا مرحب

واحد صديقى متزوج و عنده أسرة و من اللى فقدوا وظايفهم ( و فقدان الوظيفة ده طيرله مخه فى الغالب ) , فرحان قوى بالوباء اللى شغال دلوقتى , و بيقول لو التوقعات بتاعة منظمة الصحة العالمية تصدق و يموت خلال 6 أشهر مليار بنى أدم حيبقى سعيد جداً و أخر أنبساط . و لما سألته ليه ؟ .. ضحك و قاللى :

ما هو انت أصلك مش فاهم , لو مات مليار واحد حيحصلى حاجة من الأتنين .. يا اما اموت و أستريح , يا اما لو الناس ماتت و انا عايش , عدد الناس حيقل , الأيد العاملة تقل , فيزيد الطلب على العمالة تانى و ساعتها الاقى وظيفة بدل اللى راحت منى .. فهمت ؟ يعنى يا اما اموت و استريح يا اما الاقى شغل ... يا مرحب بالوباء يا مرحب !! .

-3-

دعاء

اللهم انى لا أسئلك رد القضاء و لكنى أسئلك اللطف فيه ! .. يعنى يا رب هى مصر ناقصة ؟

-4-

دعاء

اطلق عبدك بسلام فأن عينى قد رأت خلاصك

-5-

شر البلية ما يضحك

حسب تصريحات جريدة اليوم السابع , ان اللانشون و البولوبيف اللى سعرهم رخيص بتوع الغلابة , دول معمولين من لحم الخنزير !! ..

يعنى بما ان خط الجريدة تخصص كلام فى الأضطهاد فهى عايزة تقول : أن المسلمين بيضطهدوا المسيحيين و المسيحيين بياكلوهم لحم خنزير , يعنى خالصين .. ههههههههههه .

-6

للمجانين

برضه علشان اخوتنا بتوع نظرية المؤامرة يلاقوا لقمة عيش , حسب تصريحات جريدة اليوم السابع , أشهر مربى خنازير فى مصر أسمه " إسرائيل عياد "  ..  واخد بالك من إسرائيل دى ؟

يعنى من اسمه كده ,, مسيحى صهيونى صليبى .. يكونش الوباء ده مؤامرة على الأسلام ؟ ههههههه .

-7-

من احمد عدوية الى أم حسن فى المكسيك :

سلامتك يا أم حسن 




Salamtaha oum hassan [mawaly.com] - Ahmad adawya

Sunday, April 19, 2009

قطع العوايد


بمناسبة عيد القيامة

كل سنة فى عيد القيامة , بنلاقى التلفزيون المصرى بيتقدم بالتهنئة للأخوة الأقباط " بمناسبة عيد الميلاد المجيد " !!! . و دى حاجة انا مش فاهم سببها من ساعة ما أتولدت لحد دلوقتى . كل سنة نفس المعايدة مع اختلاف القنوات طبعاً . مرة على القناة الأولى , و السنة اللى بعدها تاخد القناة الأولى بالها من الحكاية دى , تلاقى القناة التانية قامت بالدور . و بعدها القناة التالتة و اللى بعدها مش عارف أى القناة الفضائية . 30 سنة هى عدد سنواتى على الأرض حضرت فيهم 30 عيد قيامة و سمعت فيهم 30 معايدة ب"عيد الميلاد المجيد " !!! . شكراً للتلفزيون المصرى على الأصالة و الريادة . و كأنه بيقولنا انتم غلطانين و مش عارفين مواعيد اعيادكم و احنا حنعرفكم تحتفلوا بأى عيد و امتى . حسبى الله و نعم الوكيل . تحس أن المسيحيين المصريين دول متخفيين و محدش عارفلهم صبح من ضهر من ليل و كأن فى تجاهل او تجهيل متعمد . عامة ..

و لأن قطع العوايد فال زى ما بيقولوا .. و بمناسبة عيد القيامة, فان المدونة تتقدم بالتهنئة للأخوة الأقباط بمناسبة " عيد الفطر المبارك " !!! .  

--

ملحوظة على جنب كده :

انهاردة الصبح على احدى قنوات النيل , المذيعة المصرية بعد ما " هنئت الأخوة الأقباط كالعادة " , قالت " أن من دلائل الوحدة الوطنية بين عنصرى الأمة ان لما الدنيا بتبقى حر بتبقى حر على المسيحيين و المسلمين مع بعض " !!!! .. يا كوكى , يا حلوة .. , أنتى حرانة و لا إيه ؟!!! .  

و

كل سنة و انتم طيبين

--

اقرأ عمرو عزت

لماذا حمل جارك المسيحى السعف الأحد الماضى ؟

لحن حزاينى بين لحنين فرايحى  

شكراً يا عمرو .. 

Wednesday, April 15, 2009

انهم يزغطون البط


.. " انقذوا البطة المقدسة " ..

" و لأن كل أفعال الرب أفعال واجبة التقديس , لذا فأن كان الرب يزغط البط , فالبطة اذاً " بطة مقدسة " . فاذا سعى البعض الى رفض هذا الفعل , فأنه يرفض بذلك احد افعال الرب المقدسة , اما اذا سعى البعض الى القضاء على البطة , فانه يقضى على فعل التقديس هذا و يسعى الى القضاء على البطة المقدسة . "


--

ضربات

اربع ضربات ثقافية هزت مصر فى هذا الشهر الجميل , تجعلنا نعيد التأمل فى الواقع المصرى الأصيل ..

مترو : اتهام مؤلف الرواية " مجدى الشافعى " و الناشر " محمد الشرقاوى " صاحب دار ملامح , بانهما " صنعا و حازا بقصد الأتجار !! مطبوعات منافية للأداب " .. ( التوصيف بتاع "بقصد الأتجار ده بيفكرنى بتوصيف تانى بتاع " بقصد الأتجار و التعاطى"  بتاع المخدرات !! ) .

شارع الصحافة : مجلة شهرية جديدة , صدرت حديثاً , تنشر أهم مقالات الصحف عن الشهر السابق , تم سحب عدد شهر أبريل بكامله لأنه يحوى ملف عن التوريث !! .. ( اللى انا مش فاهمه , انها مجلة بتنشر مقالات من صحف تانية , يعنى جمعت مقالات الملف من الصحف الأخرى , طيب ليه الصحف الأخرى متسحبتش من السوق و دى اتسحبت !! ) .

البديل : ستتحول البديل من صحيفة يومية الى صحيفة أسبوعية بدءاً من الخامس من مايو . ( حسب روايات البعض أن الحكومة منعت عن الجريدة المية و الهوا , المية اللى هى الأعلانات و الهوا بتاع النفس بأنها كانت بتمنع الباعة من إظهار النسخ الموجودة لديهم !!! ) .

إبداع : تم وقف مجلة إبداع بعد ان أقام احد المحامين برفع دعوة لسحب الترخيص لأنها نشرت " قصيدة تهين الذات الألهية و تتطاول عليها !!! " و لنا مع هذا الحدث وقفتين مهمين جداً ( من وجهة نظرى ) .. القصيدة بعنوان : شرفة ليلى مراد  , اما عن القصيدة فالجزء الذى بسببه رُفعت الدعوة هو الأتى :

                                                                 الأحرار 
الرب ليس شرطيا 
حتى يمسك الجناة من قفاهم، 
إنما هو قروى يزغط البط، 
ويجس ضرع البقرة بأصابعه صائحا: 
وافر هذا اللبن 
الجناة أحرار لأنهم امتحاننا 
الذى يضعه الرب آخر كلّ فصلٍ 
قبل أن يؤلف سورة البقرة 

الطائر 
الرب ليس عسكرى مرور 
ان هو إلا طائر، 
وعلى كل واحد منا تجهيز العنق 
لماذا تعتبين عليه رفرفته فوق الرءوس؟ 
هل تريدين منه 
أن يمشى بعصاه 
فى شارع زكريا أحمد 
ينظم السير 
ويعذب المرسيدس؟

 

القصيدة كاملة

شرفة ليلى مراد

--

وقفتان :

الوقفة الأولى : اهانة و تطاول

إيه اللى جابك يا صعلوك بين الملوك ؟

الصراحة انا لا افهم كيف يمكن لأنسان عاقل متدين يؤمن بالله – عز و جل – يعتقد إن هناك من يستطيع ان يهين او يتطاول على الذات الألهية !! . دى حاجة بجد انا مش قادر افهمها . لأنه اهانة شخص معناها " الندية و المساواة " و ده مش ممكن يكون ابداً أنه واحد يكون " ند لله " " او مساوى له " علشان يعرف يهينه , استغفر الله العظيم , حاجة بالعقل كده .

و لو فرضنا إن فى واحد مجنون او ملحد او قليل الأدب فكر انه يتطاول على الذات الألهية , اخره حيعمل إيه ؟ ولا حاجة . تروح أنت فين يا صعلوك بين الملوك ؟ !!! . ده مثل مصرى بيقولوه لما واحد يحب يعمل نفسه قال يعنى " فونط " و صايع " و بيتنطط على أسياده " , قوم نصدق أن فى واحد يقدر يتطاول على الذات الألهية ؟ , و بعدين لو فرضنا أن فى واحد عملها , فى حد فى الدنيا يعرف يجيب حق ربنا ؟ , استغفر الله العظيم , ليه هو ربنا ما يعرفش يجيب حقه ؟ .

علشان واحد يجيب حق التانى لازم يكون اعلى شأناً , القضاء اعلى شأناً مثلاً من حق الأنسان الغلبان و بالتالى ممكن يجيب له حقه بالقانون . طيب معنى كده انه واحد لازم يكون أعلى شاناً , اعوذ بالله , علشان يجيب حق ربنا . الصراحة التوصيف ده عمره ما نزلى من زور و بحس انى قليل الأدب قوى و انا قاعد اقراه . حاجة الصراحة قليلة الأدب جداً , انى افترض انى وصى على الغفور الرحيم . و بعدين أيش عرفنا , مش جايز ربنا يغفر له و يسامحه ؟

انا عارف ان الكلام اللى فات ده يبان ساذج , بس اصله بالعقل , جريمة غريبة ملهاش معنى و لا يمكن تحدث ابداً .. انا افهم تطاول على مقدسات مثلاً , تطاول على انبياء ممكن , اهان عقيدة أخرى ماشى , انما يتطاول على الذات الألهية ؟ دى مش قادر افهمها .

-

الوقفة التانية : عن المسخرة احدثكم

كل ما اقرى قصيدة المدعو حلمى سالم دى , و اللى بسببها اتوقفت مجلة من اقوى المجلات الثقافية فعلاً , اقعد اضحك . اول مرة اقرا قصيدة كوميدية كده . خلونا بس نعرف فى الأول شوية مصطلحات ..

ماهية النص :  

 اصل الكلمة " ن.ص.ص " نصص , و نصّ الشىء : رفعه و أظهره .. و الكلمة فى اللغات الأجنبية تعنى "   text او texte  " و مصدرها  textus أى نسيج . ويتوفر في مصطلح (نص) في العربية، وفي مقابله في اللغات الأجنبيةTexte معنى النسيج، فالنص نسيج من الكلمات يترابط بعضها ببعض، هذه الخيوط تجمع عناصره المختلفة والمتباعدة في كلٍ واحد ، هو ما نطلق عليه مصطلح "نص" . و هو ليس مجموعة من الإشارات المغلفة المحملة بمعنى يجب العثور عليها، ولكنه حجم من المعانى التي لا تكفّ عن الانتقال من منتج النص الى متلقيه .. و النص مفتوح، ينتجه القارئ في عملية مشاركة، لا مجرد استهلاك . هذه المشاركة لا تتضمن قطيعة بين البنية والقراءة ، وإنما تعني اندماجهما في عملية دلالية واحدة، فممارسة القراءة إسهام في التأليف .

النص و الا- نص :

تخضع عملية تحديد ما هو نص وما ليس نصا إلى ثقافة الأمة، وصيغة تصورها للأشياء، وفق ما تمليه المنظومة اللغوية. فالكلام الذي تعتبره ثقافة ما نصا، قد لا يُعتبر نصا من قبل ثقافة أُخرى حتى داخل الأمة الواحدة . حيث يتمتع النص بخاصية التنظيم الفريد الذي يعزله عن "اللا- نص"، لذلك يعتبر النص الأدبي جهازا ينظمه تماسك لغوي خاص ..

ماهية النص الأدبى :

يحاول الاديب في اثناء ابداعه الشعري تقديم الانفعالية التي لا وجود موضوعيا لها الا بعد تجسيدها في تشكيل لغوي، ومن ثم فان تذوقها وفحص عناصرها ومكوناتها يتم عبر هذا الوسيط اللغوي الذي يتميز بخصائصه الاسلوبية .. اما ما يتم في ذهن الاديب في اثناء الابداع وقبله فهو امر لا يمكن تتبعه ما دام العمل الابداعي لم يتشكل لغويا . ويبذل الادباء جهودا مضنية من اجل ان يكون النص الادبي محيطا بالتجربة الانفعالية ومعبرا عنها وشاملا لجوانبها المتعددة .

--

لذا فان كل من ينتج كلاماً مفهوماً هو منتج ل" نص " حسب التعريف . و له الحق فى ان يدافع عنه , و لكن ليس كل ما هو منتج " كنص " هو " نص أدبى " , فشروط النص الأدبى واضحة جداً و هو مرتبطة بشروط النص . الا و هى ان يكون النص " مفهوماً " , غير مستغلق على القارىء , مترابط , واضح و يجب أن يكون معبراً عن التجربة الأنفعالية للأديب و ان ينتقل المعنى من الكاتب الى القارىء و ان يعيد القارىء أكتشاف النص و قراءاته على مستويات أعمق حيث لا يكون هناك قطيعة بين البنية " التأليف " و القراءة .

تقدر تقولى لو سمحت , عزيزى القارىء , انت فهمت إيه من قصيدة حلمى سالم ؟ فين الأبداع فيها ؟ انا كل ما اقعد اقراها أضحك , الراجل بيقول يزغط البط و يعذب المرسيدس , أى رص فى أى حتة و كله فى الكلتش , و محدش فاهم حاجة .. و لما تقول لحد الكلمتين دول , يقولك انت " انت اللى مش فاهم حاجة , ده كلام حداثى و ما بعد حداثى , ايش وصلك انت ليه "  . اكلتم دماغنا و فى الأخر المجلة اتقفلت علشان قصيدة كوميدية محدش فاهم منها حاجة  ومحدش عارف كان فى دماغ المؤلف إيه بالظبط و هو بيكتب الكلمات العجيبة اللى تفطس من الضحك دى ( الغريب انه واخد عليها جايزة .. يعنى فى ناس فهمتها !!!!!!!! ) . بيقولك " يحاول الاديب في اثناء ابداعه الشعري تقديم الانفعالية التي لا وجود موضوعيا لها الا بعد تجسيدها في تشكيل لغوي ,, اما ما يتم في ذهن الاديب في اثناء الابداع وقبله فهو امر لا يمكن تتبعه ما دام العمل الابداعي لم يتشكل لغويا " ,,,  اى انفعالية و اى ذهن أبداعى انتج الكوميديا دى ؟ الراجل ده دماغه كان فيها بالظبط و هو قاعد بيكتب ؟ عمرك سمعت عن إبداع بيتزغط و محشى فريك ؟ و لا إبداع بيرضع لبن من ضرع البقرة ؟ و فى الأخر دول بيقبضوا من فلوسنا ,, من الضرايب .

يعنى انا اشقى و اتعب 15 ساعة فى اليوم و ادفع على مرتبى ضرايب , علشان واحد يزغط البط و يرضع من البقرة !! . حسبى الله و نعم الوكيل .. بجد المفروض انهم يتقوا الله فينا و فى نافوخنا .. ما هو مش كل واحد كتب شوية كلام مرصوص يقولك حداثى و نص و خطاب و مفكر و أديب و ابصر إيه و مناخوليا معرفش إيه .. احنا بنى أدمين برضه و لينا طاقة و بسبب شوية مجانين خسرنا مجلة فعلاً جميلة جداً انا عن نفسى كنت بجمع اعدادها القديمة , كانت بتنشر فلسفة و فكر و ادب .. كانت فوق الممتازة .. شكراً لمزرعة البط و زريبة البقر و اجنس العربيات .

--

نقطة أخيرة :

و دى انا سايبها لوجهة نظرك عزيزى القارىء , هل المفروض نمنع نشر النصوص و نصادرها لو اختلفنا معاها ؟ و لا ندافع عن حرية النشر حتى لو الكلام عبيط او غريب او مختلفين معاه ؟ انت مع الحجر ولا مع حرية النشر و حرية انتاج النصوص حتى لو تبان مش إبداع او ملهاش معنى ؟

انا عن نفسى موافق على حرية النشر , اللى عايز ينشر أى حاجة ينشرها , بس مش على حسابى و لا على حساب الضرايب اللى بدفعها . لما المؤلف يعرف انه حيتحط فى مباراة حقيقة ساعتها حيتنشر للمبدع فعلاً و ساعتها حيعرفوا ان الله حق , و ان بتوع البط و الوز و البقر و الجاموس دول ملهمش مكان , ما هو اصل المال السايب يعلم الهبل و تزغيط البط !! .


Friday, April 10, 2009

عبيد و أقزام

إن حياة الناس في ظلها قائمة على مستندين أساسيين : الخوف , والترويض .

---

ثقافة العبيد


انتعشت ثقافة العبيد منذ أن نشأت الدول المركزية ذات الحكم المطلق حيث اعتمد مبدأ العقاب وبث الرعب في قلوب العامة لتسيير الحياة العامة . في مثل هذه الأنظمة، إن من يمتلك السلطة، يمتلك الأرض وما عليها، ويبقى هو فوق القانون، الذي يسري على العامة . والمواطن الصالح هو من يطيع والطاعة ليست باعتدال، ولكن طاعة عمياء تحقق التوافق لا التناقض مع أهل الحكم.

في مثل هكذا ظروف، ولكي يأمن الضعيف شر القصاص يلجأ لاعتماد سلوك مبطن، كأن يظهر موالاته للحاكم بينما يخفي امتعاضه وعدم رضاه، ثم اعتماد الخداع و الدس والمؤامرات لتحقيق غاياته، مع خوف دائم من أخطار الآخر . وهذا الخوف، يتوالد إلى مخاوف:

مخاوف من العمل السياسي : حيث أن فنون التعذيب الجسدية والنفسية وأساليب الترهيب والترغيب تجعل من هذا العمل محفوف بالمخاطر مما يؤدي إلى استكانة جماعية مبنية على الخوف من خوض هذا الغمار.

مخاوف دينية: يشكل الله هنا رهاباً جماعياً، تستخدم سطوته غير المرئية على الضعفاء، وذلك اعتماداً على جوهر الإحساس الديني داخل الإنسان، الذي يؤمن أن في هذا الكون الكبير الواسع قوة كبيرة تسيره .. " الفكر مثل الكفر من ذات الحروف.. فلا تفكروا كي لا تكفروا "

مخاوف جنسية: حيث يعجز الإنسان الغير متوازن عن تحقيق الاتفاق بين الحب الذي أنسن الجنس، وبين الغريزة الجنسية . وفي غالبية العلاقات الحميمة يفصل هذين الأمرين بطريقة بائسة .

أما في الترويض .. و هذا قائم على ترويض الكتلة البشرية على مجموعة من الأخلاق تنسجم وسياسة الخوف، وتراجع الفعل الايجابي، والإبداعي لدى السواد الأعظم، وتقبل السلوكيات الخشنة والغير حضارية على أنها من بداهة الحياة .

هذان المستندان هما قانونين قاسيين إلى حد الرعب. تتجلى خطورتهما بنتائج مرئية قوامها اعتماد العنف في حل المسائل السياسية والاجتماعية والثقافية في بلد ثقافته ثقافة عبيد . وخطورة غير مرئية تأخذ أبعاداً نفسية ، تتجلى بأمراض قد تصل إلى حد الاستعصاء في الحل. تنعكس كما نوهنا سابقاً في العلاقات الحميمة.

في هذه الثقافة تصبح "قائمة" المحظورات لها أول وليس لها آخر.

في سلوكيات أبناء ثقافة العبيد:

الازدواجية. الرياء. البحث عن التفوق.. السلطوية.. السيطرة. الاستعلاء على الآخر. التمييز العنصري والطائفي. العطاء المزيف ..هي بعض من مفاهيم الهرم الأخلاقي لثقافة العبيد.

وفي هذه الثقافة فإن طرح أية مشكلة تتعلق بالشـأن العام أو أي ظاهرة اجتماعية فستندرج تحت:

" نحن غير قادرين على أن نفهم المشكلات فهماً واسعاً لأننا نعاني الخوف. ولن نستطيع أن نضع حلولاُ لأمراض متفشية لأننا نحن أنفسنا سقماء"

إن الانعتاق من ثقافة العبيد تحتاج لجهود دولة و أفراد. نظام سياسي ينفتح على الشعب لا يقف بمواجهته. مؤسساته تقوم على أخلاقيات عمل جديدة كالاستقامة ونبذ المرتشين والفاسدين ومحاسبتهم. هيكلها الإعلامي حر لا أداة.. حين ذاك فقط.. وفقط تنتفي ثقافة العبيد.

---

دولة الأقزام

الدولة التي تقزّم مواطنيها لكي تحوّلهم إلى أدوات مطواعة في يديها، حتى ولو كانت الغايات نبيلة، ستجد أنها لن تقدر على تحقيق أي إنجاز عظيم بمواطنين أقزام.

جون ستيوارت ميل، "عن الحرية" – 1859                                                            

 

Friday, April 03, 2009

بعضشى و ابو شأفة


-1-

تكنيك نضال البروليتاريا الثورى

حرق 3 منازل للبهائيين  :  

قام مجهولون يوم الثلاثاء الماضى ، بإشعال النار فى ثلاثة منازل يمتلكها بهائيون فى قرية الشوارنية التابع لمركز المراغة بمحافظة سوهاج، عقب ظهور أحد البهائيين فى برنامج الحقيقة على قناة دريم الذى قدمه الإعلامى وائل الإبراشى، والذى استضاف الصحفى جمال عبد الرحيم الذى هاجم البهائيين، ووصفهم بالكفر عقب احتفالات البهائيين بعيد النيروز فى حديقة الميرلاند فى مصر الجديدة.

وعلق محمد يسري، أمين شباب الحزب الوطني بقرية الشورانية، أحد زوار مدونة «جمال عبدالرحيم» علي مقالته المعنونة بـ"مغالطات زعيمة البهائية"  بقوله: "تجمع أهالي القرية مساء أمس الأول، ردا علي ظهور أحد البهائيين في قناة دريم، وأحرق الأهالي بيوت البهائيين، وضربناهم وطردنا المرتدين من قريتنا بمن فيهم الأطفال الرضع، وأحببت أن أبلغكم بهذا، وأنا علي استعداد لأي معلومات" .

أكدت الدكتورة بسمة موسى الناشطة البهائية ، أن ما حدث من إحراق منازل البهائيين بسوهاج الذى تم أمس، كان بفعل التحريض ضد البهائيين من قبل الصحفى جمال عبد الرحيم فى برنامج الحقيقة، الذى يذاع على قناة دريم، ومقاله الذى نشر فى جريدة الجمهورية .

وتؤكد بسمة أن اختلاف العقيدة لا يعنى الكراهية وحرق بيوتنا وطردنا وأشارت إلى أنها تعرضت لتهديدات بالقتل فى أحد البرامج مطالبة الدولة بحمايتها من بعض المتشددين الذين يتهمونهم بالكفر، مؤكدة أنها تقوم بإجراء عمليات جراحية لمواطنين مصريين من مختلف الديانات مؤمنة بدورها تجاه المجتمع .

--

علشان ينبسط بتوع حركة الجماهير و اندفاع الجماهير . انبستطوا !! اهى اتحركت الجماهير اهو و حرقت بيوت الناس و الدكتورة بتكلمهم عن قبول الأخر !! .. لأ و التحريض جى من صحفى !! سلملى على تنوير البروليتاريا..  علشان يفرحوا بتوع كارل ماركس ابو شأفة و ثورة الجماهير .

-2-

سكمن بكمن

مترو :

تنظر محكمة جنح قصر النيل ، القضية رقم 4732 لسنة 2008 جنح قصر النيل، والمتهم فيها كلا من"مجدى الشافعى" مؤلف رواية "مترو"، و"محمد الشرقاوى" ناشر الرواية ،بعد أن احالتهم نيابة حوادث القاهرة للمحاكمة بعد أن اتهمتهم بأنهم" صنعا وحازا بقصد الاتجار والتوزيع مطبوعات منافية للآداب العامة بأن قام المتهم الأول(مجدى الشافعى) بتأليف كتاب"مترو" وضمنه عبارات منافية للآداب العامة وقدمه المتهم الثانى(محمد الشرقاوى) الذى قام بطباعته ونشره وتوزيعه .. !!

--

الا ما سمعنا حاجة من " الأدباء و المثقفين " إياهم  و الّلى كل يوم ليهم إصدار و كل يوم حفل توقيع و كل يوم ندوة و كل يوم نشر فى الجرايد ,  كل واحد عاملى فيها كاتب ذو رؤية تقدمية ثورية و بيحلل المواقف و يحلل التحاليل و بيحافظ على كتاباته من النشر دون أذن , لأ ما انشرش , لأ لازم يستأذنونى .. كل واحد عامل فيها شكسبير .. و لما زميل وقع فى مشكلة كلهم " سكمن بكمن " .. فالحين بس يلقحوا بالكلام على خلق الله و فى الجد طلعوا شكسبير بعضشى !! .

---

سلطة الخطاب

"  أفترض أن إنتاج الخطاب في كل مجتمع٬هو في نفس الوقت إنتاج مراقب ٬ومنتقى ومنظم ومعاد توزيعه من خلال عدد من الإجراءات التي يكون دورها الحد من سلطاته ومخاطره٬التحكم في حدوثه المحتمل وإخفاء ماديته الثقيلة والرهيبة .إننا نعرف طبعا٬ في مجتمع كمجتمعنا٬ إجراءات الاستبعاد. وأكثر هذه الإجراءات بداهة٬ وأكثرها تداولا كذلك هي المنع ..

من مدونة خماسين