Wednesday, April 30, 2008

to relief

ABBA - ONE OF US
---


=========
DEMIS ROUSSOS - FAR AWAY
---


==========
HELENE SEGARA - ELLE , TU L' AIME
---


=========
METALLICA ( حبيب قلبى ) - MEMORY REMAINS
---


=========

Saturday, April 26, 2008

قد أكمل

حالة

الدنيا حر جداً و الجو ملزق. شربت مية ساقعة من التلاجة مفيش فايدة و الحكاية دى زهقتنى . و أخدت دش مية ساقعة معملش حاجة . الحل التمام فى رأيى و كل الى أنا عايزه دلوقتى حالاً زجاجة سبيرو سباتس مشبرة من عند عم كامل بتاع الحاجة الساقعة .

=========

نكتة

مواطن مقهور خايف موت و عمال يتكعبل فى مشيته و مخنوق من الأسعار , رفع أيده للسما و دعى  قائلا : "الله يخرب بيتك يا سيد " . فلقى أيد واحد من الأمن طرقعت على قفاه  وصوت الظابط بيقوله :  "وكمان مش عارف اسم الريس" 

=========

خروج

اسراء خرجت من السجن و اكتشف الجميع انها ليست بطلة . هو مين افتكرها بطلة ؟ و اتصدم فيها – يا روح قلبى – جامد جداً . حركة الفيسبوكيين كما يطلقون على أنفسهم و نضال الأنترنتيين , بالنسبة لى أمر مثير للغثيان . الأن أصبح مثير للسخرية و الضحك و أتابعه من باب الفكاهة .

=========

إصرار ... مختلف

كافر . من لوازم الايمان فى الاسلام : الاعتقاد بكفر غير المسلم . مسيحيا , يهوديا , بوذيا أو  بهائياً . وهذا لا علاقة به لا بالتعصب ولا بالاضطهاد .  كما يعتقد المسيحى , اليهودى , البوذى و البهائى بالبديهة بكفر المسلم .

----

قرأت الجملة السابقة و ما يوازي معناها فى اكثر من مدونة و صحيفة و موقع

أن أصرار البعض على نشر كلمة " كافر " و " كفر " و تحويلها الى بديهية مجتمعية و مرادف لكلمة مختلف شىء يدعو للدهشة و التأمل .

الدهشة لأن مدلول الكلمة فى الموروث و الوجدان الشعبى هو ببساطة " ان الأخر كافر " بكل ما تحمله الكلمة من سيئات و اتهامات للأخر .

و التأمل لأن العالم -  لأعتقاد كل طرف بكفر الأخر -  سيتحول بكل بساطة الى عالم من الكفار  . لا هوادة و لا رحمة بينهم لما تحمله كلمة " كافر " من معانى .

=========

حكمة

لو كان نيلك يا مصر صلصة ... مكنش كفى الكوسة الى فيكى .

=========

الجمعة العظيمة

ترانيم الجمعة العظيمة بصوت فيروز

=========

للتجنيد

لتصير مصارعاً رومانياً ... أضغط هنا

=========

أسبوع الألام

يبدأ يوم الأحد و ينتهى الأحد التالى

أسبوع من التأمل و قراءة الكثير من النصوص . الكنيسة الشرقية تملأ الأسبوع بصلوات مستمرة , أطولها التى تبدأ من بصخة باكر الخميس و تنتهى الجمعة قبل الغروب مباشرة , يتخللها 7 ساعات فقط من الراحة من الخميس 12 بالليل الى الجمعة 7 صباحاً .

أسبوع من السعادة و الراحة النفسية , أسبوع من السباحة فى بحر من الروحانيات و التأملات . أسبوع من الصفاء و السكينة , أسبوع من الأمتلاء الروحى يعطى ثماره لبقية العام .

كل سنة و أنتم طيبين .

==========

كلمات

أخر كلمات للمسيح :

 

 قد أكمل .

 

..........................................

Monday, April 21, 2008

سلام

أبؤورو أنتى تى هيرينى ، موى نان أنتيك هيرينى ، سيم نى نان أنتيك هيرينى ، كانين نوفى نان أيفول.

=========

يا ملك السلام ، أعطنا سلامك ، قرر لنا سلامك ، وأغفر لنا خطايانا.

----------

 

Thursday, April 17, 2008

مسخرة

هههههههههههههههههههههههه

=========

الصراحة بعد ما قريت الكلام ده و كمان الكلام ده

موت من كتر الضحك

و أفتكرت الجملة الى قالها أحمد زكى فى فيلم السادات للنبوى أسماعيل :

الولاد الشيوعيين تأمروا مع الولاد الأخوان , شفت مسخرة أكتر من كده ؟

=========

هههههههههههههههههههههههه

 

Tuesday, April 15, 2008

أن تكون شرقياً

مساكين , هؤلاء من يسكنون هناك . فلنشفق عليهم قليلاً .

.

..

...

....

أن تكون شرقياً ... هو أن تكون مهموم بقضايا أمتك و منشغلاً بمنعطفاتك التاريخية و خطاباتك الثورية و ايديولوجياتك النهضوية و رؤاك الفكرية و حضاراتك الثقافية , تاركاً هؤلاء الساكنين هناك لتفاهتم التكنولوجية و تعفناتهم الأقتصادية و حقارتهم العسكرية .

أن تكون شرقياً ... هو أن تكون متديناً مؤمناً عاملاً بأيمانك داخلاً فسيح الجنات و شارباً من أنهار ملكوتك , تاركاً هؤلاء الساكنين هناك الى ماديتهم الأرضية و ترفهم الدنيوى و هلاكهم الأخروى .

أن تكون شرقياً .... هو أن تظل فى جهادك الأكبر لتحرير روحك من الشيطان الذى يسعى للسيطرة عليك و إعثارك و دفعك إلى إرتكاب المعاصى و الخطايا , أن تحافظ على شرف نساءك , أما الساكنين هناك , من أستباحوا نسائهم , فالشيطان قد استحوذ على أرواحهم , هل سمعت عن أحد الساكنين هناك يكذب , يحلف , يصل متأخراً الى عمله , يشتم ؟ طبعاً لا ... هل تعلم لماذا ؟ لأن الشيطان قد أستحوذ على روحه فلم يعد بحاجة لأن يدفعه الى الخطيئة . أما أنت أيها الأبن البار للديانات التوحيدية فجهادك عظيم لأنك رفضت أن تبيع روحك القدوس بأرخص الأسعار لشيطان التقدم و العلم و المعرفة و قد كافئتك السماء لذلك .

أن تكون شرقياً ... هو أن يكون مصحفك و أنجيلك صينيان , هى أن يكون صليبك و سجادة صلاتك تايوانيان لكى تتفرغ للعبادة و للصلاة . فالرب قد سخر الساكنين هناك لسعادتك . لا ترهق نفسك , سيصنعون كل شىء من اجلك . فهذه هى مكافأة السماء لك , أنت المُخَلَص و العبد الصالح , تعيش فى سكينة على الأرض , تصلى و تتأمل و تنتظرك نهاية سعيدة فى جنات الخلد و ملكوت السماوات , بينما الساكنون هناك -  المسخرين لخدمتك فى الدنيا -  هابطون الى جحيم فى الأخرة .

أن تكون شرقياً ... هو ان لا تترك شيئاً للصدفة . فأنت تدرس كل شىء , هل دخول الحمام بالرجل اليمنى أم اليسرى ؟ , هل صورة قديس واحدة تكفى لكى تنجح فى الأمتحان أم لابد من صورتين ؟ , اما المساكين الساكنين هناك , الذين يحلّون فوائد البنوك , مرتكبو المعاصى , يذاكرون جيداً قبل الدخول الى الأمتحانات تاركين عن جهل و قلة إيمان , بركة الرب الذى من عنده التوفيق.

أن تكون شرقياً ... هو أن تشرب ماءاً ملوثاً و تأكل طعاماً مسرطناً و تموت فى طابور العيش , شاكراً الله على نعمه التى أعطاك , محافظاً عليها , المحروم منها الكثير من شعوب العالم . أما المساكين الساكنين هناك جاحدو النعمة و رافسوها , الذين يزرعون طعامهم و  يلقون بفوائضهم فى البحر للسمك , فسيأتى اليوم الذى ستزول فيه تلك النعم من وجوههم لانهم لم يتعلموا منا , أن يقبلوا أيديهم " وش و ضهر " , تلك العادة التى تحفظ النعمة من الزوال .

أن تكون شرقياً ... هو أن تعلم أن حكامك و رؤسائك و قادتك , هم عطايا الهية و هبة من الرب لعباده الصالحين  .  و أنه لا يجوز الخروج عليهم  أو أن تعصى لهم امر , أو يرفض أحد نعم الله و عطاياه ؟ . فلا يجوز الخروج على الحاكم , بل تجب الطاعة و الخضوع لكل من له سلطان لأنه من الله . اما المساكين الساكنين هناك , الكفار و الخارجون عن الملة , المهرطقين و الخلقدونيين , فهم يؤمنون بالعلمانية و الديموقراطية , وقانا الله و أياكم من شرورها و فسوقها .

أن تكون شرقياً ... هو أن تقتنع بأن كل ما يحدث لك من مصائب و مشاكل و أمراض هو بلاء و أبتلاء و تجربة , أ ولا يُبتلى المؤمن ؟ . أما الهالكون فى الدنيا و فى الأخرة , الساكنون هناك , فهم يطلقون على المرض ... مرض , و المصيبة ... مصيبة , و الكارثة الطبيعية ... كارثة طبيعية , لا حول و لا قوة الا بالله . و لعنادهم  قد درسوا الطبيعة و عرفوا قوانينها و تعلموا من اخطائهم و أكتشفوا علاج للامراض و أطلقوا عليه " دواء " , أعوذ بالله , فالله هو الشافى . و لأن إيمانك قد شفاك فانت لا تحتاج الا الى رقية أو قنديل أو بخور مع قليل من بول الأبل و مسحة من زيت الميرون .

أن تكون شرقياً ... هو أن تمتلك ساعتين , ساعة لقلبك و ساعة لربك . هو أن تمتلك قناتين , واحدة دينية و اخرى كليباتية . هو أن تمتلك ذمتين , واحدة لصلاة الضهر و اخرى لفلوس الدرج . هو أن تمتلك صليبين واحد خشب للذهاب الى الكنيسة و أخر ذهب لتخرجه فوق القميص أثناء لعب الكرة . و هذه الثنائية و المضاعفة فى كل شىء هى موهبة روحية و نعمة سماوية فالله يضاعف لمن يشاء . أما هولاء المساكين السكانين هناك , فلا يملكون إلا ساعة العمل و قناة الفكر و ذمة الضمير و خشب صندوق الأنتخابات الذى سُخط نتيجة لعنة من السماء الى زجاج .

أن تكون شرقياً ... هى أن تجلس فى أستوديو ذى اضاءة سويدية , مبنى على الطراز الأيطالى , مكيفاً بتكييف يابانى ,  امام لاب توب امريكى بلغة برمجة هندية مصنوع فى الصين , متعطراً بعطور فرنسية الايحاء , جالساً على كرسى من الخشب الدانمركى أمام ميكروفون ألمانى مريحاً قدميك على سجادة مخملية أيرانية الصنع لتعلن ان الغرب كافر و ملعون فى كل كتاب . و يجلس فى الأستوديو المجاور لك و يبث على نفس القمر الصناعى التى أطلقته فرنسا , ذلك الكاهن الظريف ذى اللحية القصيرة يكفر اخوته فى الوطن ليعلى كلمة الرب و ليجعل سبله مستقيمة .

أن تكون شرقياً ... هو أن تعلن أن المسلم الماليزى أقرب اليك من المسيحى العربى و تدعوه الى التدخل فى الشؤون الداخلية بأسم الوحدة الدينية . فى نفس الوقت , تتعجب و تستنكر - بأسم الوحدة الوطنية – و تطلب من مسيحييى الشرق الا يتدخل مسيحييو الغرب فى شئوننا الداخلية .

أن تكون شرقياً ... هو أن تفرح للنقض الغريب و الحقير من قبل القنوات الدينية المسيحية لأيمان اخوتك فى الوطن . و فى نفس الوقت , تتعجب و تستنكر عليهم  أن يخرجوا عليك بقنوات مماثلة تنقض دينك بحجة أنها تطعن فى إيمانك , لأن المحبة المسيحية و السماحة الأسلامية هى فوق كل شىء .

أن تكون شرقياً ... هو ان تكون كل أنجازاتك تاريخية , لأنها حدثت " زماااان "  . هو أن تكتفى بشرف المحاولة , لأنك فشلت . هو أن تفرح بالتمثيل المشرف , لأنك لم تصل . هو أن تُفضل أن تكون صاحب تاريخ فقط , لأنه أفضل من أن تكون " صاحب عيا " . هو أن تتفاخر إن اجدادك صنعوا التاريخ , لأنك كالأبن الخائب قد بددت المستقبل .

أن تكون شرقياً ... هو ان تعلن من امام خيمتك الكبرى مرتدياً جلبابك و أنت جالس على جملك ماسكاً سيف البطولة فى يدك , تعلن لأطفالك الجوعى و العرايا أن الأصوات التى يسمعونها تحلق فوق رؤوسهم هى لشىء أسمه طائرات , و أن النيران التى تنهال علينا من السماء هى لشىء أسمه صواريخ تُطلق من تلك الطائرات . تطلق سبة و تنعتهم ب " أولاد الكلب " ثم تكمل - بعد أن تصيب الصواريخ أطفالك و ترديهم أمام عينيك-  أننا نحن الشرقيون لنا عظيم الفضل و الأثر , و أنه بدوننا ما وصل هؤلاء الكلاب الى ما هم عليه الأن .

أن تكون شرقياً ... هو أن تعلن و أنت رائق البال مستريح الضمير , ان الساكنين هناك مغفلين جهلاء  ذاهبين الى جهنم و بئس المصير . اما انت العارف بالله , الأبن المدلل للسماء التى لن تخذله أبداً , فتعرف كل شىء و تعلم كل شىء و لا داعى للاجتهاد و التعب فأنت ذاهب الى جنة الحياة و ملكوت النعمة .

أن تكون شرقياً ... هو أن تعى جيداً انك الوطنى الوحيد . أبوك خائن , اخوك عميل , امك التى ولدتك تقبض من أحدى السفارات , اختك التى تعلمت فى مدارس بلدك تتخابر مع الساكنين هناك , جارك جاسوس , قريبك شيوعى , زميلك أرهابى أصيل , صديقك ليبرالى دخيل . اما المختلفين معك فى الرأى فجهنم و بئس المصير .

=========

و بما أنى وطنى ملتزم , شرقى أصيل و مؤمن متدين , فأسمحوا لى أن أنتعش بشرقيتى كما ينتعش السمك فى الماء , ما اجمل و ألذ ان تكون شرقياً . دعونى أستمتع بخلاصى و نجاحى و كفاحى و ثوراتى و أنتصاراتى و صولاتى و جولاتى , و ... , و ... .

لو لم أكن شرقياً لوددت ان اكون شرقياً .

----------

نشرت بمجلة مصر الجديدة

مجلة ألكترونية ... مصرية , ليبرالية , شهرية .

Monday, April 07, 2008

كيلو الإضراب عليه بساريتين

مشكلة شخصية

عندى مشكلة مع موضوع الأضراب و هى مشكلة شخصية , انا غير مقتنع بالأضراب لأسباب كتيرة . اولها أنهم سلموا القط مفتاح الكرار , الموظفين و الناس اساساً مبيشتغلوش , فحيضربوا عن أيه ؟ هم بيشغلوا أصلاً , كأنك بالضبط تتطلب من تلميذ فاشل عدم الذهاب الى المدرسة , تفتكر حيزعل ؟ .ثانياً , يوم الأضراب , لأن يوم الأضراب يوم الأحد و ده معناه ان كل الصنايعية و الورش و أغلب المحلات مغلقة لأنه بالطبيعة يوم اجازتها , شارع الجمهوربة و نجيب الريحانى و وسط البلد و أصحاب الورش و كثير من المحلات مغلقة . ثالثاً , ناس كتير خافت تنزل من بيوتها خوفاً من بيان الداخلية و لأن الموضوع طبعاً حيبقى فيه قلق , فخافوا على عيالهم . ده كان رأيى و قلتله لناس كتير و أعتقد انه ده الى حصل , ناس كتير منزلتش خوفاً من بيان الداخلية . غير بالصدفة و لأجل الحظ مش اكتر , الجو كان سيىء جداً أمس فساعد ذلك على بقاء الناس فى منازلهم .

----

أنتبه :

من قلة الأدب.. أو تحديدا قلة الذوق أن يتهكم المرء على مجهودات الآخرين، خاصة الحركيين والنشطاء، فليس معنى ألا تقتنع بأفعال الآخرين أن تتجه إلى تحطيم مجهوداتهم، لكن على الجانب الآخر، ليس من المفترض في الحركي الناشط أن ينظر إلى المعتزل المتجنب على أنه انبطاحي متخاذل ..... أخر الحارة

=========

تفكير

طبعاً الناس الى قالت أنها مش حتشارك فى الأضراب " لأنه غير محدد الأهداف و الأسباب و غير واضح المعالم " دى ناس عندها تخلف عقلى محكم . حط يا سيدى أى هدف انت عايزه : أرتفاع الأسعار , الفساد , ضعف المرتبات , العلاج , الأدوية , البطالة , الأعتقال , التعذيب , سوء الخدمات .... أى حاجة . يعنى هى بلدنا مفهاش اى حاجة تخليك تضرب . ياعالم يا ولاد ال... هبله .

الصراحة لما فكرت كويس و حطيت الموقف فى شكل معادلة لقيت أن المطلوب حاجة تعبر عن غضب الشعب و فى نفس الوقت لا تسبب له أى أذية و خاصة الاعتقال لأن كتير منهم رزقه يومى كسواق التاكس فمينفعش اطلب منه كما أطلب من ناشط سياسى مثلاً , لأن لو أعتقل بصراحة أهله حيصيعوا , و يتوازى معه عمل للاحزاب و قوى المعارضة فى الشارع , حالة من التكامل الوطنى , ممكن نقول أن الأضراب هو الشكل المقبول و حسيت انه له معنى رغم تحفظاتى . أمتناع عن التواجد لجمهور المواطنين و نشاط سياسى مقبول للحركيين . الصراحة , فكرة ظريفة و عايزة تكرار ..... حنكمل المشوار

=========

طبق بليلة

وأكد الطلاب في بيانٍ لهم صباح اليوم أنهم كانوا ولا زالوا هم الشرارة التي تُشعل فتيل التغيير والنهضة و الإصلاح ..... ,,, وأعرب الطلاب عن أسفهم أنهم لم يتم التنسيق معهم فيما يتعلق بإضراب اليوم (6 أبريل) وأنهم سمعوا عنه من خلال وسائل الإعلام وحملات الإنترنت ..... بيان طلبة الأخوان .

---

فى ناس كده , مخهم على قدهم , ربنا يشفى كل مريض . اصله طبق بليلة يا ولاد ال .... و نسينا نعزمهم عليه .

---

ليس دفاعاً عن الأخوان و لكنها وجهة نظر

لكن بلا شك موقف الاخوان المسلمين رمادى و هذا دافعه الاساسى الى ان الدعوة كانت من قوى غير اسلامية بالاساس , وبالتالى مشاركة الاخوان وان وفرت زخما شعبيا .... محمود المصرى .

=========

ظهورات

د.عبد المنعم السعيد مدير مركز الأهرام للدراسات السياسية و الاستراتيجية , و معه د.عبد المنعم أبو الفتوح عضو مكتب الأرشاد – الأخوان المسلمين فى قناة الحرة .

جورج اسحق المنسق السابق لحركة كفاية , طارق حسن الكاتب بروزاليوسف و نائب رئيس تحرير الأهرام فى قناة الجزيرة .

الكتاتنى رئيس كتلة الأخوان فى مجلس الشعب , جهاد عودة مفكر بلجنة السياسات بالحزب الوطنى , امين أسكندر عضو حركة كفاية و حزب الكرامة تحت التأسيس , مجدى الدقاق رئيس تحرير مجلة الهلال الشهرية و عضو بلجنة التثقيف بالحزب الوطنى فى ال- بى بى سى .

مناقشات و تغطيات و غضب من الطرفين , و يقولولك الأضراب منجحش . ممكن افهم الناس بتاعة الحزب الوطنى الى بالثقل ده , و شيل من تحت كلمة ثقل كل الخطوط الممكنة , يطلعوا يدافعوا عن الحزب و ينكروا وجود أضراب ليه ؟ أذا كان أصلاً مفيش أضراب زى ما بيقولوا . هو ينفع تطلع تنكر حاجة مش موجودة أصلاً ؟ .

طبعاً مفهوم الأضراب الكلى اكيد منجحش , لكن الحكومة خافت من الشعب و ده بس شىء ظريف فى حد ذاته .

=========

قراءات سريعة فى جرائد 7 / ابريل

روزاليوسف :

هزيمة دعاة الفوضى – أنتظام الدراسة فى المدارس و الجامعات و المصالح الحكومية يؤكد فشل الدعوة للأضراب .

الحكومة و المعارضة رفضتا إضراب الإيميلات و ال s.m.s

3 ملايين مصرى أستخدموا المترو و 2800 سيارة نقل عام جابت شوارع القاهرة و 34 رحلة طيران .

مصر رفضت شائعات الخراب .

اهم ما كتب فى الجريدة

مقال كرم جبر – أنتباه : أنتظروا الشائعة المقبلة !

هذه هى أسباب فشل إضراب 6 أبريل .

كلما نجحت الدولة فى حل أزمة , سحبت السجادة من تحت أقدام المحرضين ... لهذا يهمهم بالدرجة الأولى أن تظل الأزمات مشتعلة و لا تنطفىء , و كلما أنطفئت ساروا بأشعالها حتى يكون لهم دور .

المحرضون لا يهمهم غلاء و أرتفاع اسعار , و لو كان يعنيهم ذلك لبذلوا جهوداً إيجابية لحل مشاكل الناس بدلاً من الدعاوى السلبية التى تزيد المشاكل و الأزمات تعقيداً ... متى كانت المظاهرات توفر الطعام ؟ .

لم يظهر فى صورة الأضراب الوهمى امس سوى " كفاية " الهزيلة , بينما أحتمت المحظورة – و هى المحرض الحقيقى للأضراب – وراء الستار , تحرك المؤامرة و تبثها فى كل مكان .

---

البديل

الإضراب ينجح .. و الأمن يرد بحرق المحلة .

أنباء عن قتيلين .. و عشرات الجرحى بين العمال و حوالى 700 معتقل فى القاهرة و المحافظات .

اللواء اسماعيل الشاعر ل" البديل " :

الطلاب فى المدارس و العمال فى المصانع و الموظفون فى المصالح .. و العناصر الإيثارية عندنا .

و الإضراب ؟

محدش أضرب و كل الدنيا ماشية زى الفل .

محمد السيد سعيد – اول ضوء : و معنى ذلك أن ينتقل النضال الديموقراطى و الأجتماعى خطوة كبيرة نسبياً للأمام . فعلينا ان نعمل على تمكين فئات جديدة من شعبنا من المشاركة فى النضال الديموقراطى و الأجتماعى بمساعدتها على صياغة مطالبها و تأطير مصالحها الجوهرية و بناء منظامتها الشعبية و الجماهيرية .

---

نهضة مصر

6 أبريل مر بسلام

المحلة : المصانع لم تضرب و 2000 شخص خربوا محلات و هاجموا قطاراً .

الوفد و التجمع لم يشاركوا و الاخوان أختفوا .. و الناصرى و الجبهة و الكرامة تقدموا الأضراب .

فى نقابة المحامين أتردوا الخيش و الطربوش .. و هتفوا ضد لحم الحمير .

شائعات التخريب اجبرت المواطنين على البقاء فى منازلهم و زادت نسبة الغياب بالمدارس .

---

الدستور

نجح الأضراب رغن أنف الحكومة و الإخوان و الأحزاب !

---

المصرى اليوم

إضراب .. يرضى جميع الأطراف

المحلة تشتعل .. و الأمن أجهض مظاهرات القاهرة .. و المعارضة نجحت بدون الاخوان .

بعض المحافظات تجاهلت المشاركة فى الأضراب .. و أخرى لا تعلم عنه شيئاً .

مقال يستحق القراءة

مجدى الجلاد --- إضراب أسقط كل الأقنعة .

=========

البنت دى مجنونة

الى تابعها امبارح و تابع تدويناتها و كل الى كانت بتعمله أمبارح , حيعرف انها مجنونة . مجنونة تماماً . و هى مجنونة بحاجة من الأتنين , يا اما طبيعى , يا أما مصر جننتها و فى الحالتين , الطف و الذ جنان شفته فى حياتى . بس هى فعلا مجنونة . مجنونة خالص . أقروا أخر خمشاشر بوست كتبتهم .

=========

مسرحية

فى احدى مسرحيات فؤاد المهندس , راح السمّاك للناظر علشان مش عاجبه درجات أبنه . فراح الناظر منادى ياقوت افندى و عرفه على السمّاك و قاله ان اكيد فى حاجة غلط فى شهادة الولد . ياقوت افندى أقسم أنه أكيد مفيش لأنه هو الّي كاتب الدرجات بنفسه على شهادة الولد . فوقف ياقوت أفندى يقرا الدرجات من الشهادة للسمّاك و الراجل بيرد عليه :

تاريخ 2 من عشرة ... رضا

حساب 1 من عشرة .... أشية

عربى 3 من عشرة .... معدن

جغرافيا صفر .... صفر واحد يا م فترى , صفر واحد يا راجل يا ضلالى طيب خليهم أتنين , دا انا بحط على كيلو السمك بساريتين .

---

المدافعين

المدافعين عن الحكومة بأنها تبذل قصارى جهدها لأصلاح مشاكل المجتمع و أنها فقط تحتاج الوقت و أنها تتقدم بخطوات واسعة فى طريق الحل و يجب ان نشكرها عليه . الدفاع ده هو نوع من أنواع الجدل المُمِل , كأنه مجرد مناقشة فلسفية أو محاولة حل مشكلة لغوية , كأن هناك من يقول لك " ازمة الخبز فى مصر تدخل فى أسبوعها الثالث " , أعرب كلمة " خبز " و تحل المشكلة ؟؟!!!!!.

الحكومة تعانى من أزمة التلميذ الخائب أبن السمّاك . التلميذ الى عارف أنه فاشل و كده كده حيسقط فيقولك أغيب و مروحش الأمتحان أنضف , يجى أبوه يضغط عليه و يجبره يخش الأمتحان فيجيب 10 من 50 . هو ساقط برضه , بس فى نظر أبوه عمل تقدم فى سبيل النجاح و أهو أحسن من أنه يجيب صفر . الحكومة بتهرب بالأنكار و الخوف من كل المصايب و لما تضطر تمتحن و تواجه مصايبها بتسقط و يقولولها أهى جابت 5 من خمسين مش أحسن ما تجيب صفر . و كأنه النصر , مناخوليا يا عالم . يا ناس أفهموا دخولها الأمتحان لا هو شرف و لا تقدم , ده اثبات لنها فاشلة .

---

الحكومة عاملة زى التلميذ الخايب فى المسرحية و هم عاملين زى السمّاك الى فرحان بدرجات أبنه .

=========

Wednesday, April 02, 2008

أنتى يا مضروبة

كدبة أبريل

اليوم , أول الشهر و منتصف الأسبوع . انزل من بيتى متوجهاً الى وسط البلد لأحضر الأصدارات الأسبوعية و الشهرية . أمى تؤكد على شراء خيار و جزر و " كابوتشى " أثناء عودتى . أمى , القادمة من صعيد مصر , تؤكد على شراء " كابوتشى " حتى تستقيم الحياة . حاضر يا أمى .

أركب تاكسى متوجهاً الى وسط البلد . انزل من التاكسى عند ناصية أهم بائع جرائد و كتب فى مصر و الشرق الاوسط , واحد من اهم خمس مثقفين ناطقين بلغة الضاد .

صباح الخير يا عم عطية .

صباح الخير يا بشمهندس .

يتركنى عم عطية ابحث عن ما أريده " فى الفرشة " . اتناول الجرائد الأسبوعية و معها المجلات الشهرية . اتصفح إصدار لمجلة جديدة لعلى أشتريه . يقترب منا صبى القهوجى الذى يحضر الشاى لعم عطية .

شاى يا بشمهندس ؟

شكراً , الله يخليك .

دى مش عزومة ؟!

عارف صدقنى يا عم عطية . بس مش قادر , شكراً .

يميل الصبى على عم عطية و يخبره ان يوم الاحد القادم سيكون هناك مظاهرات . يجيبه عم عطية أنها كدبة أبريل و انه لن يحدث شىء مما سمعه . أتدخل فى الحديث و أؤكد كلام الصبى . أشرح أنها ليست مظاهرات بل أضراب تضامناً مع عمال المحلة . يهز عم عطية رأسه متفقاً مؤكداً على كلامى و يكمل : دول عالم ولاد كلب محدش حيعمل حاجة . و فى جرايد أبتدت الغلوشة و كتبت و نشرت أنها كدبة ابريل للتمويه على الناس علشان ميعرفوش أذا كان فى فعلاً و لا لأ . و أشار الى أحداهم . ضحكت و سئلت عم عطية : و أنت يا عم عطية مش حتعمل أضراب ؟ . أجابنى و هو حزين بطريقة لم أراها من قبل : أضراب عن أيه ؟ هو احنا بنشتغل و لا بنبيع , هو فى حد بيقرا , دا أنت يا بشمهندس اكتر واحد بيشترى . نظر الى يدى فى إمعان شديد و أكمل : و بكرة لما تتجوز مش حتشترى حاجة , الى يعوزه البيت يحرم على الجامع , انا شغال فى شغلانة بنت كلب ملهاش لازمة كلها كلام فارغ و كله بيضحك على كله , و الى بيتكتب ميسواش تمن الورق المطبوع عليه . حضرب عن أيه ؟ عن الكلام الفارغ ؟

اصمت تماماً احتراماً لغضبه . دفعت ثمن ما أشتريته و مشيت لأول الشارع . يمر بجانبى صبى القوهجى حاملاً الاكواب الفارغة , هو يصرخ بصوت عال : شاى , شاى يا بشر . ثم يعيدها بصوت منخفض : شاى , شاى يا بقر . اسمعها فى وضوح . التفت اليه فيرانى . يضحك و يغمز بعينه اليسرى و يمضى فى هدوء .

=======

ربنا يستر طريقك

اتمشى قليلا فى وسط البلد حتى أشعر بالتعب . اركب تاكسى عائداً الى المنزل . ينظر السائق الى المجلات و الجرائد فى يدى فيسئلنى : ممكن سؤال يا بيه ؟ . أتفضل .

ألا هو فى حاجة يوم الحد فى البلد ؟

فى أضراب عام !!!.

يصمت مستجمعاً شجاعته , ثم يسئلنى : يعنى , يعنى أيه أضراب ؟ و عاملينه ليه ؟

أجيبه بهدوء : أضراب يعنى تبطل تشتغل و تعلن احتجاجك على الأوضاع الى مش عاجباك . و ده الى مبتديه عمال المحلة أحتجاجاً على ضعف مرتباتهم و الناس هنا فى القاهرة عمال و موظفين و معارضة حيشاركوا فى الموضوع .

تمتم الرجل : و الله فكرة حلوة , الناس تعبانة فعلاً ... بس بدل فيها المعارضة يبقى فيها قلق . انا مش بستريح للناس دى . و حضرتك يا بيه عرفت الكلام ده منين ؟

من الجرايد ! .

بس الجرايد مش كاتبه الكلام ده !!! .

لأ , كتباه طبعاً , جرايد المعارضة بس الى كتباه , اكيد جرايد الحكومة مش حتكتب عنه طبعاً .

نقترب من الاشارة فيصمت الرجل . تتحرك السيارة من جديد فيكمل : يعنى منشتغلش خالص و مننزلش الشارع , طيب ما كده ممكن يبقى فى جزاءات على الناس و يخصمولهم .

لأ , لأن انت ليك واحد و عشرين يوم اجازة فى السنة و كمان دول حيعتصموا فى المصنع , لكن بتوع القاهرة حيمتنعوا عن النزول لشغلهم خالص .

حيعملوه يوم اجازة يعنى ؟ و الله فكرة كويسة , ما هم لازم يعرفوا أن أحنا تعبانين برضه . طيب يا بيه , متعرفش أزاى سواقين التاكس يعملوا أضراب ؟

سئلته : هم مين دول الى لازم يعرفوا أن أحنا تعبانين ؟ .

يتجاهل سؤالى و يكرر سؤاله : متعرفش قايلين سواقيين التاكس يعملوا أضراب أزاى ؟

فكرت أن أنصحه بالطريقة اليابانية بأن يضع لافتة سوداء مكتوب عليها " حداداً على الأسعار " فوق التاكسى , سئلته : هو انت بتفكر تعمل أضراب ؟

لأ , طبعاً أنا مش حمل اخد اجازة , أنا على اقساط و مصاريف , عندى ولد فى الجامعة و بنت فى الثانوى . مش حمل أجازة أنا .

خفت أشاركه بفكرة اللافتة حتى لا يتعرض للمضايقة من الشرطة يوم الاحد , استفسرت منه : هو انت مبتاخدش اجازات ؟

لأ , طبعاً باخد , ان لبدنك عليك حق , يوم الجمعة , بصحى متأخر , انت عارف ليه طبعاً . ضحك غامزاً و اكمل : بصلى الجمعة و أتغدى مع العيال و أمهم , انام ساعة و انزل و انا و رزقى . عارف يا بيه , مش المفروض ان الغلابة هم الى يعملوا اضراب . احنا مش ناقصين خصومات . عارف مين المفروض يعمل اضراب ؟ الحرامية . يا سلام لو يعملوا اضراب , يوم و لا أتنين كل شهر يبقى تمام قوى .

حنزل على جنب وحياتك يا اسطى .

يقف السائق على ناصية الشارع . انزل من السيارة و ادفع الاجرة . أشكره فيجيبنى : الشكر لله يا بيه , ربنا يستر طريقك .

=======

أحنا بتوع المشروم

أتوجه الى عم عزت بائع الخضار و أطلب منه كيلو طماطم و خيار و جزر و أثنين " كابوتشى " . يخبرنى أن الطماطم أرتفع سعرها الى 4 جنيه فأرد : دى غليت أوى كده ليه ؟ يجيبنى : كل حاجة بتغلى يا بيه فى البلد , و بعدين هو فى حاجة تغلى عليك برضه يا هندسة ؟ . يضع ما طلبته فى كيس بلاستيك و يسئلنى : مش عايز " بروكلى " و لا طبق " مشروم " ؟ . أجيبه بأن لا . يسئلنى مجدداً : يعنى مش عايزين " مشروم " ؟ . لأ مش محتاجينه . أزاى يا بيه ؟ دا أنتم بتوع المشروم كله . يبتسم كاشفاً عن أسنانه السوداء من فعل السجائر .

ملعونة الطبقة المتوسطة التى أنتمى إليها . ملعونة فى كل مكان , الطبقة الأعلى تتهمنا بأننا ولاد كلب متسلقين و عايزيين نشاركهم فى الحياة و نزاحمهم فى الدنيا , و الطبقة الأدنى تتهمنا بأننا " بتوع المشروم كله " . ملعونة الطبقة المتوسطة , ملعونة .

=======

أنت الى مضروب يا مضروب ( خيال واقعى )

يضع أبى زجاجات البيرة المثلجة على المنضدة بين كرسيه و كرسى عمى . يفتح واحدة و يصب ما بها فى الكوب المجاور لعمى الذى يأخذها من يده ليستمتع بالرغو الأبيض فى أعلى الكوب . يرشفه باستمتاع و يضحك مكملاً حديثه : الأسعار بيقولوا ولعت نار . السواق و انا جى بيشتيكلى . يهز أبى رأسه مؤكداً : فعلاً موضوع ظريف , أنا لاحظت الموضوع ده . كنت بجيب 2 كيلو الجمبرى مَزة مع الكونياك ب300 جنيه , دلوقتى الكيلو غلى و ال300 مبيجيبوش اكتر من كيلو و نص جمبرى , يلا علشان يموتوا و يخفوا شوية بلا قرف . يدخل الكلب من خارج الفيلا و يجلس عند قدمى أبى فيداعبه و يلقى اليه بقطعة جمبرى و يصرخ : انت يا حيوان فين أكل الكلب ؟ . يجرى الخادم مسرعاً لأحضاره فارتطم به اثناء دخولى . مرتدياً المايوه , اسلم على عمى و أكمل طريقى لأحضار زجاجات من البيرة , اسمعه يتسائل : هو أبنك عنده حفلة ولا أيه ؟ . يجيبه والدى و هو يقضم طرف السيجار و يقدم أخر لعمى : عنده حفلة هو و العيال صحابه على البيسين , عيال بنت كلب معندهاش احساس بالمسئولية , بدل ما يساعدوا اهاليهم , بيبعزقوا فى فلوسنا . يجيبه عمى : سيبهم ينبسطوا دا أحنا فى أيام غلا و ظروف مهببة , ان مكانوش ينبسطوا دلوقتى حينبسطوا أمتى ؟ . يأتى الخادم حاملا طبق الريش البتلو و يضعها امام الكلب . يسئلنى عمى و هو يلقى قطعة للكلب : معاك مُزة و لا عايش وحيد ؟ . أضحك و اجيبه : عيب عليك يا وحش . يسئلنى و هو يغمز بعينه : و اخبار صدرها أيه , تمام ؟ . اهز يداى بقوة و أضحك فيرد على ضحكتى : طيب ألعب تمام و أنبسط . يلتفت الى والدى و يسئله : عملتلى أيه فى حكاية الأستيراد دى ؟. أتركهما فى الريسيبشن و اخرج الى أصدقائى .

يجلس عرفة أو المثقف كما نطلق عليه , فى منتصف المسافة بين الباب و البيسين , امامه طاوله عليها طبق و بجواره " صباع من الحشيش " . أضع الزجاجات امامه و اخبره : يعنى مقلتلناش يا مثقف أن فى مظاهرات يوم الحد الجى , أسمعها من الشغالين و منعرفهاش منك . يرفع المثقف قطعة الحشيش و يقطع جزء منها بأسنانه و يضعه فى ورقة فويل و يبدأ فى التسخين تحتها مستعملا ولاعتى الزيبو . تنتشر رائحة الحشيش فى المكان فتقترب توتى و تجلس على قدمى و هى تغنى no woman no cry . يفرك الحشيش و يخلطه بتبغ السجائر . يضع البفرة و الفلتر و الخليط فى ماكينة لف السجائر التى أحضرتها نانسى من السويد هدية عيد ميلاده . يرفع الحشيش و يمدحه : حبيب قلبى , حياة عمرى . موجود غير مزروع . الدماغ الكامنة فى ذات نفسها . اوجده الله لكى يزيل الفوارق الطبقية بين الناس , الحشيش ده بيشربه الباشا و الغفير , الراجل و الست , الشاب و العجوز , العربى و الغربى . الصينى , التاياونى و الكندى و البدوى فى الصحراء , الحشيش هو موحد القطرين , صانع الامم , واهب الخير و السعادة و المزاج لمن يبحث عنهم . يعطى السيجارة لمحسن الجالس على الشازلونج يداعب شعر كوكى و يكمل المثقف : مفيش مظاهرات يا حمار انت و هو . فى حاجة أسمها إضراب علشان الأسعار غليت و الشعب عنده مشاكل مع الموضوع ده . تسئله كوكى : يعنى أيه أضراب ؟ . يجيبها محسن : يعنى منعملش حاجة خالص , نقعد كده و منعملش أى حاجة . تجيبه كوكى و هى تقبل صدره : يعنى مفيش سكس اليوم ده ؟ . يضحك و هو يسحب نفس عميق من السيجارة : لأ مفيش يا روحى . يخرج المثقف السيجارة التالية من ماكينة اللف و يعطيها لنونو و هو يكرر : الأضراب ده يا بهايم يا ولاد الكلب , مش لينا احنا , ده للبهايم التانيين , للعمال و الفلاحين و الصنايعية و السواقين , مش حيشتغلوا علشان معترضين على الدخل , يمكن الحكومة تحن عليهم و ترفع لهم مرتباتهم , و لا حتعملهم حاجة , بهايم .

تقبلنى توتى غيرة من قبلة كوكى و تتناول زجاجة بيرة من على المنضدة و تسئله : يعنى مش حيشتغلوا و يأخدوه اجازة اليوم ده ؟ . يفرك قطعة اخرى على شكل أسطوانة أستعداداً لعمل " خابور لدماغ الرجالة " و يجيبها : حاجة زى كده يا روح أمك . تهلل كوكى فى سعادة و تقول : خلاص , اليوم ده بدل اجازة و محدش حيشتغل , يبقى نعمل بارتى عندى , و نعمل زيهم , نلبس عمال و فلاحين و نعمل مضروبين زييهم , حفلة مضروبين خالص , هيييييه . ينظر اليها المثقف و يمد يده و يداعب صدرها : انت الى مضروب يا مضروب . تسعد جداً للمداعبة و تقبل محسن صديقها فى فمه و تكمل : و يبقى مفيش سكس اليوم ده و لا حشيش و لا بيرة , علشان نشاركهم و نبقى مضروبين زيهم تمام .

أنظر انا و محسن الى المثقف فى غباء . يسبه محسن : يعنى بروح أمك لازم تقول أفكارك المهببة دى , اهم شبتوا أهه !!!! . يجيبنا : مش انتم الى سئلتوا يا ولاد الكلب و لا انا جبت حاجة من عندى ؟ .

تنهض كوكى و هى تحرك يديها فى سعادة : خلاص يا حلوين , الحد الجى الحفلة عندى , " حفلة المضروبين ", لا سكس و لا بيرة و لا حشيش و لا رقص , مضروبين زيهم طول اليوم , خلاص اوكى ؟ . أمسكت بتليفونها الجوال و بدأت فى الأتصال بالجميع لدعوتهم الى الحفلة .

...........

تحبوا تيجوا و تشاركوا ؟ متخافوش , مش حيعملوا أى حاجة , دول حتى يا عينى مضربين عن كل حاجة .

=======