Tuesday, July 31, 2007

عند منصو

كنت جالس امام الشيخ فرحات

مؤذن جامع الكلية عندما فاجاته بالسؤال التالى

كيف نقضى على المسلمين ؟

............

كنت اجلس بجوارها فى السينما

كنا نشاهد فيلم عربى حتى جاء هذا المشهد

فوضعت يداى على رجلها و قبلتها

و لما انتهيت .... تراجعت الى الخلف

و بدأنا نتناقش فى بعض المسائل العقائدية

..............

نظر الى الشيخ فرحات و ضحك و قال لى

سؤالك خطأ ... و يحتاج الى تعديل و تحديد

سؤالك يحتاج الى منطقية اكثر فى ترتيب كلماته

............

عائد متأخر ليلا

ادرت التلفزيون .... فوجدت عادل امام يقول لجميل راتب

يا باشا .... احنا ناس لازم يكون الباطل بتاعهم قانونى

................

مع الخصخصة بشكل عام ام ترفضها ؟

لا نخصص الا الوحدات الخاسرة

على ان تظل المرافق العامة ملكية عامة للدولة

و ان تكون الاجهزة التى تقدم الخدمات للمواطنين

تحت سيطرة الحكومة

عند امه يا ادهم

............

سألت الشيخ فرحات .... ما هو التعديل المطلوب

لكى يكون سؤالى صحيح

اجاب الشيخ فرحات .... ينبغى ان يكون كالأتى

كيف نتخلص من الاسلام ؟

.....................

وقفت فى طابور العيش لكى اشترى خمسة ارغفة

120 دقيقة مجانا لحاملى العيش الساخن

مقدمه من شبكة المحمول الاولى فى مصر

بومبى-نيل ....

تزاحم الناس للحصول على العيش و دقائق المحمول

اتصل الناس بذويهم و اقربائهم

حصلت على خمسة ارغفة و 120 دقيقة محمول

فلتطلق عبدك بسلام فان عيناى قد رأتا خلاصك

.................

نظرت الى الشيخ فرحات و طلبت منه توضيح

فأجابنى .... التخلص من المسلمين صعب

عددهم مليار .... صعب القضاء عليهم

..............

ذاهب الى عملى بالميكروباص

استمع الى احدى شيوخ الكاسيت

صراخه ملء الفراغ المحيط

كان يتكلم عن موضوع لا اتذكره

كل ما اتذكره هو السائق الذى يتمتم بجوارى

الله ... الله ... الله

و لما طلبت منه الباقى

يلا يا ابنى معناش فكة .... انت جى تتكلم فى ربع جنيه

.................

لم تكن تلك هى المرة الاولى التى اذاكر فيها

فقد ذاكرت من قبل

فعلتها مرة فى الثانوية العامة و مرة فى البكالوريوس

ظهرت لى ناهد شريف و سعاد حسنى فى ورقة الامتحان

فتذكرت اشرف مروان و مجدى الجلاد

امتحانى فى الكورس يتوقف عليه تثبيتى فى الشركة

استعنت بالله و بصديقى الجالس بجوارى

و بدانا النقل من الورق المخبأ اسفل الكرسى

........

خرج امجد من امتحان الميكانيكا

يشكر ربنا و يقبل صورة القديس التى يحملها

كان الامتحان صعبا

و امجد ظل يقبل صورة القديس حتى ظننت انها فتاته

و ان الامتحان اثار مخيلته و اهاجه

فلما سألته .... اجابنى و هو يلعننى لكفرى و يسب الحادى

الحمد الله .... الامتحان صعب بس ربنا كان معايا

و كانت اللجنة سهلة فعرفت انا و زمايلى ننقل

و نساعد بعضينا

...............

طيب و العمل يا شيخ فرحات

اجاب .... العمل عمل ربنا

حتى تتخلص من المسلمين .... لابد ان تتخلص من الاسلام

كيف .... يا شيخنا ؟

اقولك ياد يا مسيحى انت ....

.............

تعرفت على الشيخ فرحات فى الكلية

انا قادم من الثانوية العامة من احدى مدارس اللغات

و هو قادم من احدى المعاهد الصناعية يكمل تعليمه

جالس فى محاضرة الانجليزى فى اخر صف

دخل متاخرا ... فهو يجىء على قدميه يوميا

جلس بجوارى و

السلام عليكم

و عليكم السلام و رحمة الله و بركاته

كانت لحيتى طويلة و اسمى لا يدل على هوية معينة

و اجابتى التحية باحسن منها .... عملت شغل معاه

فطلب منى

يا اخى ... ممكن تقرأ لى ما هو مكتوب

فامليته ما كتب فأرتبك

فاخذت منه الاجندة و كتبت له ملخص ما فاته

انتهت المحاضرة .... فطلب منى ان اشرح له

فلم اتردد

تلك كانت الفترة التى اصبحت فيها مختل عقليا

و امارس رذيلة الزمالة

و كنت اؤمن بان لا دين فى الكلية

و ان من يريد الشرح او الفهم او المساعدة

لانه فرق بين طالب و طالب الا بالدرجات

وجبت مساعدته

ذهبت معه .... و عند باب الجامع توقفت

طلب منى الدخول للشرح ثم الصلاة

اجبته ... انا صليت خلاص يا شيخنا

صليت امتى

صليت امبارح .... اصلى انا بصلى الحد

ضحك .... انت مسيحى ياد

ايوة يا شيخنا

طيب ابعد شوية كده ... و استنى لما اصلى

و نخرج تكملى شرح .... فانت غنيمة لنا

ضحكنا

و ابتعدت قليلا و انتظرته

انهينا الشرح و سرنا حتى المترو و افترقنا

.............

الواد اسعد ده ابن كلب قوى

ليه ؟

طلبت منه ورق ... قال انه مش معاه

و طلع هو الى مديه لامجد

انت عايز الورق يا شيخنا ؟

ما انت عارف البير و غطاه

خلاص انا حجيبهولك منه ... حروحله ركن الصليبيين

و اجيب منه الورق

...........

يتمتع هذان الاسعد و الامجد بحس امنى مخابراتى غريب

فبعد ان علما انى مسيحى ذى اصول اسلامية

دخلت فى دائرة المحظور

بعد ان علما انى اخذت نسخة من الورق و اعطيتها

للشيخ فرحات .... اصبحت عدوهم الاول

و حرمونى من كافة الورق فى كافة المواد

............

صحيح .... ان صديقى الانتيخ فى الكلية

كان يمدنى بالورق بدون معرفتهم

الا اننى كأى قبطى قلبه اسود

ظللت و سأظل اتذكرها الى الابد

.........

للعلم فقط

انا رديتلهم الخاوزق عشر اضعاف

طلعته من نافوخهم

بعد الحركة الى عملوها

عرفوا ان صاحبى بيدينى الورق

راحوا مديينوا ورق غلط و كنا حنروح فى داهية

انا و صاحبى ... كنا حنسقط فى المادة

فردتلهم الخازوق عشر اضعاف

قبطى ... قبطى يعنى

..............

انت ياد ممتاز ... مسيحى ممتاز

الله يخليك يا شيخنا

و اخلاقك .... اخلاق مسلمين صالحين

مش ناقصك غير الشهادتين

عندما اجبته انى حاصل على ثلاث

الابتدائية و الاعدادية و الثانوية

لم يضحك و قال

انت بتهرج فى كلام لا يجوز

خد بالك ممكن تتسخط قرد او نخدك

ضمن السباياو الجوارى و الغنائم

و تبقى عبد و ابيعك ب30 دينار

.............

كان الشيخ فرحات يتمتع بحس دعابة قوى جدا

فلم تكن مفاجأة ان اسأله السؤال السابق

بل كانت المفاجاة ما قاله لى

يا ابنى افهم

تخلص من مليار مسلم صعبة

لكن تخلص من الاسلام ممكن

ازاى بقى يا شيخنا

الاسلام فكرة و ايمان.... حاول تغيرها

او تلوثها او تكره الناس فيها او تشوها

ينفض الناس من حولها و يروحوا فى حتة تانية

يبقوا اى حاجة تانية

فتخلص من المسلمين كلهم

.......

كانت الفكرة الرئيسية من سهرتنا تلك

هى الاحتفال بحفلة توديع عزوبية صديق لنا

ذهبنا الى الملهى الليلى

و الكباريه فى الزمخشرى

هو مكان تراق فيه الخمور و ترتكب فيه الشرور

و تلبس به افضح الازياء بواسطة بنات حواء

كانت الراقصة فى قمة تالقها و زجاجة الويسكى

تنسال الى الكوؤس فى رقة و وداعة

تداعب عقولنا الصغيرة

اقبلت الراقصة نحونا .... و القت التحية على العازب

جلست على ... حجره

...............

ما طول عمره اسم النبى حارسه و صاينه

بيشرب حشيش و محصلوش كده

اشمعنى انتى لما جيتى نحستيه كده

..............

و انت بتسأل ليه .... انت عايز تخلص مننا

لأ .... انا مش قصدى .... انت قصدى ا...

انا فاهم قصدك .... فاهم قصدك

انا مبكرهش حد ... و مبحبش حد

كلنا زمايل و عمرى ما اتعلمت افرق بين حد و حد

انت حتقلبها دراما ... و العياذ بالله

اصل ...

بلاش تفاهة

و تفتكر يا شيخنا نعمل كده ازاى ؟؟؟؟؟؟؟

.................

سؤال صغير

بدأ حوار استمر طويلا

ليس لرغبة فى التخلص من احد

او الخلاص من فكرة

كانت الفترة مشحونة

و كانت القيم مازالت تسرى فى وجدانى

و كانت المحبة هى الطبع الغالب

لم اتحرج من صداقتى لشيخ ملتحى

قدر تحرجى من صليبيو الكلية

لم اخجل و انا اجلس بجوار الجامع انا و زملائى

كنت اخجل من وقوفى فى ركن الصليبيين

كما اطلقت عليه انا

و كان هذا المسمى هو سبب القطيعة بينى و بينهم

........

انتم عبط قوى على فكرة

ليه يا شيخ ؟؟؟

واقفين متجمعين فى حتة الناس كلها عارفة انها حتة المسيحيين

و ايه يعنى ؟؟

فاجاب بسخرية

يعنى لو واحد عايز يخلص منكم .... ممكن يروح عندكم و يفجر

قنبلة فى الركن بتاعكم و يخلص منكم كلكم

...........

لم يكن تفجير الذات او الاستشهاد عن طريق تفجير الذات

قد ظهر بعد .... كان العنف يتلخص فى قنبلة مسامير و مدفع رشاش

لم تكن السذاجة وصلت لمنتهاها

و لم تكن الحساسية بيننا قد وصلت لما نحن فيه الان

لذا

فما ان انتهى الشيخ من كلامه

حتى فاجئته بسؤالى المكتوب فى المقدمة

.............

كنت جالس امام الشيخ فرحات

مؤذن جامع الكلية عندما فاجاته بالسؤال التالى

كيف نقضى على المسلمين ؟

..........

لم نكن نسعى للبحث عن الخلاص من الاخر

كنا نتعجب من هروب الاخر من المجتمع

القى باللوم على المسيحيين بهروبهم من مجتمعهم

فمن يهرب من مسئوليته و كيانه

يستحق ان يأخذ على ... قفاه

لأن كما تعلمون ....

ان العيل الاهبل ... يجيب لاهله الشتيمة

.......

الشيخ فرحات المسلم الملتحى

كان يتعجب من عدم اندماجنا لأننا بهذا الغباء

.......

لا اعلم لما تذكرت تلك الايام الان

و لكنى اهدى هذه الكلمات

الى منصو

فكل ما نحتاج اليه ... نحتاج الى تحقيقه

اصبح السيد منصو هوالمسئول عنه

و منصو هو اخو ادهم

الذى نذهب عند امه لتحقيق مقاصدنا

عند امه يا ادهم

اما منصو فقد كبر الان و نضج و اصبح يتحمل المسئولية

لذا

هل ترى مستقبل لهذه العقول ؟؟؟ لهذه الافكار ؟؟؟

لهذه البلد ؟؟؟؟

اجابتى هى

عند منصو يا روح الروح

Blogged with Flock

Sunday, July 29, 2007

كله فى الكلتش ... كلشنكان

جاءت المشكلة الحالية من ذيل المشكلة التى سبقتها

فالمشاكل لا تأتى مرة واحدة

من رحم واحدة تولد اخرى

فمصر - كما تعلمون - ولادة

........

انتهيت من قراءة كتاب مهم

عن ازمة سوست البنطلونات

و كيفية التفريق بين البنطلون ذى السوستة

و اخيه ذى الازرار

فخلعت قميصى و نزلت لشراء خمس ارغفة

عدت حاملا الفطير و الجبنة البيضاء و العسل

و الدوار و المصطبة لزوم الافطار

حتى اتصلت بى احدى صديقاتى

لتخبرنى ان افتح التلفزيون كى اشاهد حلقة

العاشرة مساءا

مستعينا بالله و بقوات الضفادع البشرية

اغلقت نور الغرفة و اطلقت سبة

تتعلق بأم احداهم ....

ادرت التلفزيون و شاهدت حلقة من الف ليلة و ليلة

...........

طفلين اسمهما اندرو و ماريو

يعانوا من هلاوس سمعية و بصرية

تهييء لهم .... لا حول و لاقوة الا بالله

انهم مسيحيان و ان ابوهم اليهودى قد تنصر

و ان امهم بوذية الاصل قد صارت بهائية

لا اعلم هل هذا نتيجة ارتفاع سعر الذهب ام

ان الخلافات بين روزاليوسف و صلاح دياب

و وزارة المياه لها تأثير دولى مباشر

فبرميل النفط و حمادة هلال و ازمة سوستة البنطلون

قد جعلونى استلقى من كثرة الضحك

لا محيص يا بنى ... لا محيص

ادخل عند القهوة العالية

و انت حتتنيل تفهم كل حاجة

...........

لا اعلم

بصراحة

هل مصر ولادة

ام ان العقم قد اصاب نسائها

فأصبحت مسئولية البرادعى ان يجىء

لمصر لكى يفتش عن مفاعلاتنا و يبحث عن

تخصيب عقولنا و قلوبنا و قبولنا للأنسان ... الاخر

........

انا قمت بأكثر من مليون تعليق عند بلو

فلن اعيد ما كتبته هناك ... هنا

............

ملحوظة

اغنية هشام عباس الجديدة مش حلوة قوى

و يمكن ده السبب الرئيسى فى موضوع

الولدين ... و خاصة ان صدمتهم فى شريط

عمرو دياب كانت كبيرة ... جايز برضه

............

محدش فاهم حاجة

محدش حيتعلم هنا

فيلم الناظر

العراق


العراق يفوز ببطولة اسيا لكرة القدم
انا مش عارف انا سعيد ليه
بس كنت سعيد جدا و اللعيبة العراقية
بتجرى فى استاد جاكرتا رافعين علم العراق
مبروك للعراق
( ولاد ال... عاملين حظر تجول فى العراق بسبب الماتش )...عايزين
ياكلوا على العراقيين فرحتهم

Friday, July 27, 2007

zombie

zombie




للحاقدين من قراء هذه المدونة

بعد احتفالى الشخصى بصباغة البنطلون

الزيتى باللون الزيتى

و شرائى اجندة جديدة لكتابة ملحوظاتى

عن العمل و الفنيين

و استلام القمصان من المكوجى

تراقص جراهام بل فى يدى

ازيك يا كوكو .... ينفع نتقابل انهاردة

للحاقدين على علاقاتى النسائية الناجحة من قراء المدونة

كوكو هو اسم التدليل الخاص بى

كانت الفتاة التى تعرفت عليها فى مكتبة ديوان

تعارفنا بسبب الماغوط

كانت تبحث عن كتاب سأخون وطنى

و كنت انا من حصلت على نسخته الاخيرة

.................

الجو حار خانق

اهرب من الاشعة فوق البنفسجية

العرق لزج ينساب من جانب رأسى

يرسم خط من الملح بعد جفافه

اهرش بيدى و امسح جبينى بالمنديل

تصنع المنقبات معجزة على اى مقياس بتحملهم

الحر و هن مرتديات تلكم الملابس

المكان : امام مكتبة ديوان

انتظرها فى الداخل لكسر الرطوبة و الحرارة

يتصل بى صديقى

انت فين ؟

فى ديوان مستنى واحدة صديقة

كويس حعدى عليك .... ناخدها و نقابل خطيبتى

............

الثقافة .... كنز لا يفنى

الماغوط السبب فى لقائى مع تلك القطة

المصرية الاصيلة  المثقفة ذات ابعاد

ايديولوجية عميقة و توجهات و انتمائات

انسانية حميمة و رؤى و مواقف ثابتة و و اضحة

تعرف كيف تخلب لبك و تأسر خيالك

و تلح عليك فى احلامك

منتظرها فى سيارة صديقى المكيفة

للحاقدين من قراء هذه المدونة ... ليس عندى سيارة

اراها تاتى من بعيد .... تحمل حقيبتها

و فى يدها مجموعة جرائد

فقد عرفتها على عم عطية

.....................

نذهب الى احدى تلك المطاعم الشهيرة

ندخل من الباب الرئيسى

تلفحنا برودة التكييف

ينبغى لنا فى هذا الجو القاتل

ان نسجد شكرا لمستر كاريير و اخوانه

فى البرودة يونيون اير و ترين و كرافت

و كافة احهزة تعمل على تبريد هذا الجو المشئوم

خطيبة صديقى تنتظرنا فى الركن المفضل

اسفل التكييف

بعد طقوس مقدمات اللقاءات

تصبح الجلسة اكثر حميمية

اخرج اللاب توب من حقيبتى

للحاقدين من قراء المدونة .... اللاب توب

سلمتنى اياه الشركة التى اعمل بها

يعنى عهدة .... ماضي عليها

تجرنا الاحاديث الى موضوع الساعة

الحر و الاشعة البنفسجية

و تحذير الحكومة للشعب بعدم التعرض

للشمس فترة طويلة خوفا على صحة المواطن

تحذير غريب من حكومة لا تخشى على شعبها

ظل الحديث قائم حتى و نحن ناكل

كانت ليلة ظريفة

و انا فى السيارة بجوارها تميل على

انبسطت انهاردة جدا

جدا .... انا مكنتش فاكر انه حيحصل كيمياء بيننا

بالسرعة دى

و انا كمان صدقنى حاسة انى سعيدة قوى

.............

لم يكن هذا لقاءنا الاول

بل الثالث

انا و صديقى فى السيارة

اشعل سيجارتى و اتوجه اليه بالكلام

ايه رأيك

ظريفة جدا ... و بعدين مجنونة زى حالاتك

بتاعة قراية و كتب و جرايد و يسار و يمين

يعنى اخد الخطوة .... اياها .....

متترددش ... ربنا يوفقك .... و يسعدك

و يتمملك على خير

............

لم تكن سعادتى تكتمل

الا بعد ان سمعت صوتها قبل نومى

تكلمنا و انا اضع المحمول على اذنى

لساعات و ساعات و ساعات   

............

للحاقدين من قراء المدونة

هى التى اتصلت بى

حتى لا يظن البعض انى املك خط مفتوح

..........

الايام الجميلة تستحق ان

تتحول الى ذكريات فلا يبقى فى ذاكرتك

الا ما اسعدك

قد ابدو ساذجا او ملهوفا

و لكن دقات قلبى هى التى تتكلم

.............

اردت ان اشارككم بهذه اللحظات

و خاصة الحاقدين من قراء المدونة

فهم اشد احتياجا و اتعس حالا

و فى نهم الى تلك الجرعات من الحب

التى بدات فى الظهور على

انعم بسعادة لا مثيل لها

شكرا لك يا قلبى الصغير و لقدرى الكبير

يا من انعمت على بنعمتك  فى صورة فتاة

انثى ....... ليكتمل نصفى الاخر

..........

..

..

..

..

..

..

..

..

..

..

..

..

..

..

..

لم اقابلها من ذلك الوقت منذ اكثر من اسبوع

لظروف عملى و عملها

..........

لا اعلم ماذا حدث

........

و لكنها الحقيقة

..............

للحاقدين من قراء المدونة

..............

بنت الكلب خدت كتاب الماغوط منى

و ادى وش الضيف

...........

ضربت على كتاب بسبعين جنيه

........

للحاقدين من قراء هذه المدونة

ايوة انا الى دفعتهم من جيبى

و علشان تستريحوا

اهى ضربت على الكتاب

...............

كله بسبب الحاقدين من قراء هذه المدونة

عمالين تقروا على من اول التدوينة

الله يسامحكم

كانت اخر نسخة من الكتاب

و مش حيجيبوا تانى

راح الكتاب يا ولدى

راح الكتاب

 

 

 

Blogged with Flock

Sunday, July 22, 2007

تين شوكى

بعض المواقف تستمد قوتها

من شجاعة اصحاب الموقف نفسه

لكن فى بعض الاحيان يفرض الموقف

 نفسه شجاعة على القائمين به

............

صحيح 

فالغباء له ناسه

و الذكاء هو محاولة للهروب من

ذوى الغباء و اهله

و تبدو بعض المواقف و قد سيطر

عليها غابيدوس

اله الغباء

.............

اما فى المعارك و الخناقات التى

ليس لك بها ناقة و لا جمل و لا حتى

معزة بلدى من اكلة الورق

و لا تعرف شىء عن المعركة

الا انك من هؤلاء السخفاء

المقتنعين بان المعارك هى وسيلة

لجمع الشمل و الفرجة على من تسيل دمائهم

.................

المعركة صراحة كانت تستحق المشاهدة

ذهبت و وقفت اتفرج

فسيرة الام و الاب عندما تأتى مركبة هكذا

و بالفاظ جديدة تحثك على البحث عن ورقة

و قلم لتدوينها .... هو شىء يجبرك على الاقتراب

و التوقف للمشاهدة

.............

كان الهدف هو خمسة بالجنيه و لا ستة بالجنيه

التين الشوكى

هدفى الرئيسى

امرأة تمتلك ناصية اللغة و تجيد تركيب الالفاظ

بطريقة يحسدها عليها احمد شوقى

انا حاخد ستة بالجنيه

يا ست مينفعش انا اصلا ببيع اربعة بالجنيه

و علشان خاطرك حديكى خمسة بالجنيه

علشان خاطرى ايه يا روح امك ....

هو انت تعرفنى  

اللهم طولك يا روح

ما تقف عوج و تكلم عدل .... حتبيع ولا امشى

لا يا ست مش حبيع سته بالجنيه

اخر البيعة خمسة بالجنيه

كنت اتابع الموقف بصراحة و كنت اسعى

بامانة ان تنتصر المرأة فستة بالجنيه مصلحة برضه

فتوجهت بكلامى للرجل

ما تبيع يا حج ستة بالجنيه ... دى ساعة صبحية

استفتاح يعنى و ربنا يرزق

ما تخليك محضر خير يا استاذ

ما يرضيش حد ان الواحد يخسر فى البيعة

يلا يا ست مش حنبيع

................

ثم جاءت الموزة تمشى الهوينى

تتبختر فى هدوء الواثقين

ازيك يا حج عامل ايه

انا تمام يا قمر

بكام يا حج

الستة بالجنيه و علشان خاطرك السبعة بالجنيه

يا واطى يا ابن الواطى

يا ناقص يا ابن الناقص

فى حضرة الموزة كان الرجل

قد نسى تماما ان الولية مازالت تمارس

سخافتها معى و نحن فى حالة نقاش عقلانى

عن اهمية الستة بالجنيه فى الواقع المعاصر

فلما سمعت المراة  ان الموزة قد انتصرت

بدات فى وصلت الردح السابقة

و كرد فعل طبيعى قام الرجل بالرد عليها

الا ان المراة المتوجة على عرش السباب

قد انتصرت تماما

تدخلت فى هدوء الاغبياء بعد ان اصبحت الولية

صديقتى الانتيم و الذى ظهر و تاكد فى الحوار الذى

دار بيننا عن ارتفاع الاسعار و الاسهال الذى تسببه

فاكهة هذا العام و اهمية التين الشوكى كوسيلة

للامساك .... قلت لها

هدى نفسك حضرتك

ما انت راجل زيه عينك زايغه  يا ناقص

صمت الناقص تماما

بدات المرأة فى التواصل مع الشواشى العليا

للبرجوازية و هبطت عليها روح المجمع اللغوى

و كتاب فؤاد نعمة الشهير فى النحو و الصرف

فقالت له عن المنقى يا خيار منذ سيبويه حتى احمد شوقى

..............

لا اعلم ما هو الدافع الرئيسى للغباء

ما الذى دفع البائع للتخفيض للموزة

و هو يعلم تماما انه لن يطول منها شيئا

سوى ثمن التين الشوكى

لا اعلم السبب

و لكن ضحكة غابيدوس اله الغباء

التى رنت فى اذنى قد افهمتنى تماما

....................

عائد الى منزلى حاملا التين الشوكى

منتصرا فائزا

التمانية بالجنيه

فبعد ان غلب حمار الرجل

 بدأ فى قذف قشر التين الشوكى علينا

 مما ادى الى هروب الجميع

باستثنائى انا و الموزة

التى التصقت انا بها خوفا من القشر

الهابط علينا من سماء القاهرة

هروب الجميع

ادى الى استفراد الموزة بالرجل تماما

فلمسة الحنان التى اظهرتها بعد وغى المعركة

قد داعبت خلايا الاسعار فى رأس الرجل

فقام بالتخفيض

التمانية بالجنية

التصاقى بالموزة جعلنى افوز بالصفقة

معها

فلنشكر و ننحنى لزارع التين الشوكى و جامعه

و موزعه و كل موزة تسعى الى شراء التين الشوكى

............

اللهم اكثر من الموزز امام عربات

التين الشوكى

فلولا التصاقى بها " خوفا من قشر التين "

لما فزت بالصفقة

.......

ما احلى الالتصاق بالموزز

Blogged with Flock