Saturday, June 27, 2009

نضافة ولاد الناس


-1-

تم تعيين 3 مهندسين الشهر الماضى . قدموا استقالتهم هذا الشهر , أى بعد شهرين من العمل !! . و انتقلوا للعمل فى شركة اخرى فى وظيفة لا افهم كنهها بالضبط . فلما سئلت عن سبب الأستقالة . اجابنى مديرى بكل بساطة " أصلهم عيال نضيفة و ولاد ناس .. و مش حمل بهدلة الشغل بتاعنا و قرفه و مرمطته !! " . غضبت كثيراً و انفعلت على مديرى عند سماعى اخر جملة . فمعنى عملى فى هذه الشركة منذ سنتين و تحملى بهدلة الشغل و مرمطته هو " انى لست أبن ناس " , لأن لو كنت أبن ناس كنت تركت العمل بعد شهرين كما فعل ال3 مهندسون . صرخت فى وجه مديرى الذى انفجر ضاحكاً من غضبى " يعنى هم ولاد ناس و احنا اللى طالع ميتين ابونا و من محافظة لمحافظة و من قرية لقرية , نبقى ولاد البطة السودا يعنى و لا إيه ؟ " .....

-2-

عن النضافة

من هم ولاد الناس ؟

ابن الناس هو ابن الشريحة العليا للطبقة المتوسطة . متعلم ذو شهادة جامعية . يسعى جاهداً للخروج من كونه ابن الطبقة المتوسطة ليلحق بفئة الطبقة العليا او كما يقال بفئة " العيال المستريحة " . فلا هو يريد أن يكون الشاب المكافح الذى صنع نفسه بنفسه و فى نفس الوقت لم يستطع أن يكون أبن الطبقة العليا من العيال المستريحة .. قد يكون تعلم فى مدارس أجنبية و لكنه لم يتعلم فى مدارس انترناشيونال .. هو بين بين .. هو فقط ابن ناس !! .

يستقيظ أبن الناس مبكراً لياخذ حمامه البارد و يضع البادى سبراى و يرتدى بذلته ال" guy laroche  " و يضع عطره ذى الماركة العالمية . يقوم بتجهيز النسكافيه و يضعه فى المج الذى يحفظ سخونته و ينزل ليأخذ سيارته الميتسوبيشى او الالنترا التى مازال يدفع اقساطها حتى الأن . يمر سريعاً على احدى المحلات ليأخذ قطعتين من البراونى كأفطار سريع , فهو لا يفطر كما أبناء الطبقة المتوسطة فول بالبيض او بيض بالبسطرمة و كوب من الشاى . ينهى افطاره الخفيف و يدخن سيجارته الأولى فى تكييف السيارة . هو ليس مدخن شره و لكن علبة الماربورو جزء هام من قبضة يديه مع الموبايل و الولاعة الزيبو و الميدالية الذهب , فهو بالطبع لا يدخن ال" ال أم " الزرقا او  "الروثمان " و أكيد لن يستخدم ولاعة سخان !! من ام جنيه و نص .

شبكة علاقاته والده كبيرة كأب حقيقى خدم فى طبقة متوسطة , لذا فهو يعمل لدى احدهم عن طريق أحدهم أخر . لم يتقدم لوظائف و لم يجرى اختبارات , يعمل فى احدى تلك الوظائف الكبيرة التى لا تفهم بالضبط كنهها كال " اتش أر " , او " الكونسالتانت " .. و لا تعرف كيف وصل اليها شاب فى سنه , هو فقط تجده هناك . شبكة علاقاته ممتدة , فدائماً هناك صديق لديه شاليه او فيلا بالعين سخنة و مارينا لزوم قضاء الويك اند , و أخر وكيل نيابة و ثالث ظابط شرطة لزوم تخليص الاوراق , و رابع يعمل فى السياحة لزوم التخفيضات على الكروزات السياحية بين الأقصر و أسوان و الحجز فى فنادق شرم و الجونة . فهو لا يستطيع السفر الى الخارج .. لا يذهب الى مايوركا بأسبانيا او نيس بفرنسا او فلوريدا بأمريكا او احدى جزر الكاريبى كما يفعل العيال المستريحة كل عام , و لكنه يستطيع تدبير المال اللازم كل 3 او 4 سنوات للسفر الى لبنان او المغرب او اليونان او حتى جنوب إيطاليا . و فى نفس الوقت لا يريد ان يكافح فى سبيل 5 ليال بالغردقة او 10 أيام بمرسى مطروح كما الطبقة المتوسطة .. فهو كما قلنا بين بين .. هو فقط ابن ناس .

أبن الناس مثقف بالطبع و لكن ثقافة ولاد الناس , فهو لا يعرف المدونات و لا يهتم بتهييسات نوارة و لا كراكيب هانى و لا أسرائيليات الطوخى و بالطبع لا يسكن فى حارة . لا يشاهد قناة الجزيرة المستفزة و يفضل عليها قناة العربية بنظافتها و مذيعاتها الجميلات . هو قارىء و متابع جيد , و لكنه لا يقرأ تفاهات تورجينيف و لا سخافات فوكو  بل تجده هناك فى ديوان فى قسم الكتب الأجنبية , يقرأ لباولو كويلهو بالأنجليزية او الفرنسية , قرأ اولاد حارتنا لمحفوظ و يعقوبيان للأسوانى و تاكسى الخميسى و هو اول من قرأ secrets  قبل ترجمته الى العربية . لا يعرف بأصدارات الكتاب الجدد فهم خارج حساباته , يقرأ المصرى اليوم و احياناً مجلة روزاليوسف !! . لا يشترك بأحزاب و لا حركات معارضة و بالطبع لا ينزل الى مظاهرات فهو - ابن الناس - لا يركب مترو الانفاق او الأوتوبيسات حيث الأزدحام , فمابالك بمظاهرة عن عرق الشعوب !! . لا يستمع الى محمد منير لأنه سخيف و يكره هانى شاكر و أنغام , يفضل فرانك سيناترا و إينجما و إيرا و عمرو دياب و روبى و إليسا . طبعاً لا يذهب الى ساقية الصاوى , يفضل الأوبرا نهاراً و بورا بورا ليلاً . لا يهتم بالسياسة و لا تشغله القضية الفلسطينية و إن كان يعرف تاريخ النكبة جيداً من الأفلام الوثائقية الأنجليزية التى يشاهدها ك" سى ديز " من أنتاج قناة البى بى سى , قناة بريطانيا العظمى صاحبة وعد بلفور !! .  تجد فى سيارته كتابين او ثلاث بلغات مختلفة انتهى من قراءة احدهم و بدأ فى اخر .

هو متدين , لديه سجادة الصلاة الخاصة به و يرتدى صليب ذهبى . لا يذهب الى الجوامع المزدحمة و لا يستمع الى الخطب الطويلة , لا يذهب الى كنيسة منطقته بل لديه كنائس مفضلة  كالمرعشلى بالزمالك او البازليك بمصر الجديدة . يضع سبحة ك" عليقة " حول مراية السيارة سواء من السعودية برائحة المسك او بصليب خشب برائحة جبال الزيتون من القدس . يستمع الى عمرو خالد و ال" better life  " , يصوم و يصلى و لكنه كأبن ناس له خطاياه أيضاً و لكنها مغفورة بأذن الله . فهو يدفع الزكاة و العشور بأنتظام . من وجهة نظره لا يعيش فى الرذيلة كالعيال المستريحة و لا يعانى من تزمت الطبقة المتوسطة , فهو كما قلنا بين بين .. هو فقط ابن ناس .

يحتاج ابن الناس دائماً الى خصوصية . يخرج كل أسبوع مع صديقاته و أصدقائه . بالطبع لا يجلس على قهوة بلدى او قهاوى وسط البلد او حتى كافيهات مصر الجديدة او مدينة نصر . يخرج فى اماكن ليدخن الشيشة مع صديقاته , المدخنات أيضاً و بالطبع يحتاج الى مكان " نضيف " , علشان محدش يعلق عليهم تعليق سخيف , مكان يكون كله " عيال مستريحة " " فرى " فى تصرفاتها  او على الأقل كله " ولاد ناس " . بالطبع لا يدخن معسل النخلة او قص البرج او سلوم مزاج عالى , هو يدخن نكهات الفواكه و خاصة العنب الفاخر من ام الحجر ب35 جنيه . لا يستخدم " لَىّ " عام , بل " يستخدم " لَيّه "  البلاستيكى الخاص الذى ياخذه معه بعد الأنتهاء . هو لا يذهب الى " بينوس " او " كوستا " , او " سيلنترو " او " ستار باكس " فتلك الاماكن مرتع لأبناء الشريحة العليا من الطبقة المتوسطة و هو لا يريد الأختلاط بها و لكن يذهب الى أماكنه الخاصة المغلقة ك" سيكويا ", " سنجرية ", " هارد روك "  او " جراند كافيه " . بالطبع لا يأكل فى " ماك " , " كنتاكى " , او " بيتزا هت " , فهو يذهب الى " لاكازيتا " , " كورتيجيانو " , “alain le notre “ , " Johnny carino’s " , " ابو السيد " , او " ستوديو مصر " و " ابل بيز " كأضعف الأيمان " !! . هوس الخصوصية جزء من تفكيره حتى فى مسكنه . فوالده قد دفع مقدمة تلك الشقة فى القاهرة الجديدة او الرحاب او مدينتى و عليه أن يكمل اقساطها ( بجوار اقساط السيارة ) لأنه كأبن ناس لا يسكن فى مناطق عالية الكثافة , يحتاج الى الراحة و الهدوء و الرحابة . لذا فانه من كثرة الأقساط يتزوج متأخراً فى اواخر عشرينياته . فهو لا يتزوج صغيراً ك" العيال المستريحة " و لا متأخراً بعد كفاح كأبناء الطبقة المتوسطة . فهو كما قلنا بين بين .. هو فقط ابن ناس .

ابن الناس , لا تستطيع ان تكون صديقه , فهو مختلف عن أبناء الطبقة المتوسطة . فهو يصرف كل مرتبه بينما ابن الطبقة المتوسطة مصاب بهوس " التحويش " ( ليه تصرف 500 جنيه فى خروجة لما ممكن تخرج نضيف برضه ب100 جنيه و تحوش 400 ؟ ), ( ليه تاكل بره أصلاً لما ممكن تاكل احلى اكل فى البيت ؟ ) . لا تستطيع ان تتكلم معه , فابناء الطبقة المتوسطة لهم لزمات فى كلامهم ك" جامدة اخر حاجة " , او " عيل سيس " او " خد فيها لأخفيها " و " اديك تقول مخدتش " , مع بعض الشتائم المحببة للنفس و الجسد , لكن ابن الناس لا يستعمل تلك اللزمات فكلامه فى اغلبيته انجليزى – عربى او فرانكو – اراب , كلام بستايل , بنضافة و ليس كلام بيئة تتردد به الفاظ طبقات اخرى  !!! . لديهم عاداتهم و تقاليدهم التى لا تستطيع مجارتها و اماكنهم الخاصة التى قد تذهب اليها مرة فى العام اذا تيسر لك ما تيسر . لا تستطيع ان تعمل معه فى مكان واحد , فهو لا يتحمل الشقا , لا يعمل فى مواقع , لا يمد يده على العمال و لا يشخر لصنايعى و لا يسب لفنى تركيبات حتى ينهى عمله . لا تستطيع ان تأمن له و تكون معه على راحتك أو تتعامل معه برجولة و جدعنة , فهم - كما يراهم أبناء الطبقة المتوسطة - " عيال سيس بتاخد فيها " . فأبن الناس لا يتورع أن يبيعك فى أى لحظة لمديره . المكانة و المرتب الذى وصل اليهما فى سنه الصغيرة لا يسمحان بأى نوع من الرجولة والجدعنة مع " ابناء الطبقة المتوسطة المستهترين الذين يطلقون على أنفسهم مكافحين " !!! فهو حاد جداً فى عمله , لا يعرف الليونة التى نعرفها . ايذاءك و رفدك او طردك من العمل لا يمثل له أى إشكالية من النوع الذى يؤرقك كإشكالية " قطع العيش حرام "  , فرأسه المهووس بالخصوصية و الملىء بالأقساط لا يلقى اليك بالاً .  ليس شبعان كالعيال المستريحة و لا مكافح كالطبقة المتوسطة .. هو دائماً فى منطقة الخوف حيث الأقساط و الخروجات و البكاء و صرير الأسنان .

ابن الناس يظل دائماً ابن ناس بشبكة علاقاته الواسعة و الممتدة . فى مسيرة لا تنتهى من البحث عن " النضافة " و الرحابة و الأستقرار و الخصوصية . ينظر الى " العيال المستريحة " على انهم ارباب الأرض الجدد و يتحاشى النظر الى الطبقة المتوسطة كأنهم خطيئة العالم الشرير .

-3-

اذا كنت تقرأ هذه الكلمات على مدونتى فأنت أما من " العيال المستريحة " أو من " طبقة المكافحين " سواء المتوسطة او الفقيرة و لكنك بالتأكيد و سامحنى فى قولى هذا " انت لست أبن ناس " . فكما قلنا , ابن الناس لا يهتم بتلك التفاهات و بالقطع لا يتابع مدونات و لكنه هناك منشغل بالبحث عن النضافة و فى أنتظار سداد اقساطه التى لا تنتهى حتى ينعم بالراحة و السعادة و مزيد من الخصوصية .

-4-

كلنا نحتاج الى الخصوصية , فلم اسمع حتى الأن عن أى شخص سعيد بالعيش فى زنزانة او حتى شقة بها 15 نفر . فالجميع يحتاج الى الخصوصية حتى لو كانت من اجل ممارسة بعض التقاليد و العادات السرية . و جميعنا يحب النضافة فلم اسمع عن أحد سعيد و هو يعوم فى اكوام من الوساخة و الطين والقمامة . و لكن حالة ولاد الناس - او بالأدق -  حالة طبقة ما فى البحث عن الخصوصية حالة هوس حقيقى و رغبة غريبة فى البعد عن الطبقات الأخرى و خاصة طبقة العمال . فكل ولاد الناس الأن يعملون أعمال مكتبية و دبلومة ال" H.r. " اصابت البعض بالعته من أجل الحصول عليها و من قبلها كانت ال" M.b.a " . أصبح النظر الى الخصوصية و النضافة و البعد عن الطبقات الأخرى .. ظاهرة حقيقية تستحق التأمل و المراجعة و التفكير و البحث عن أسباب هذا الجنون الرسمى . 


55 comments:

Alexandrian far away said...

مبدئيا ارفع قبعتي أحتراما لهذه التدوينه
قدرتك على الرصد الإجتماعي مثيرة للإعجاب, بل الحسد
فيك بذور سيسيولوجي متمكن
رصد ووصف شديد الدقه وخفة الدم للطبقه العليا من البرجوازيه الصغيره

تحياتي ولي عوده لهذه الكتابه الجميله

Ahmed Shokeir said...

يخرب بيتك ... بأه جملة إتقالتلك تطلع منك كل ده ، والله تحليل كثيراً مالاحظناه ولكن يصعب لنا رصده بتلك الشياكة والحرفنة ، بل ويصعب على علماء الإجتماع تجسيده بهذا الشكل بجد والله هايعرفوا سانجريا منين !! ؟

تدوينة يارامز سوف تظل لفترة طويلة تطاردك في واحدة من أجمل ماكتبت

Bella said...

انت مدهش يارامز

نقلت بحرفنة شديدة ورصدت بطريقة ممتعة جدا

تدوينة ممتازة جدا تستحق القراءة اكثر من مرة

لديك قدرة ممتازة على التقاط التفاصيل الدقيقة

ساعود بعد قراءة متأنية

تحياتي

Unknown said...

وحش

Hypatia said...

مرحباً بعودة تدويناتك اللي بحبها يا رامز
:)
أشتقنالك يا راجل

hartaka said...

:)
انا بتعرض للناس دي كتير في شغلي
وطبعاً علشان الوسايط بيشتغلوا بسهولة
واحدة ابوها صديق لإحدي المديرين في الشركة والتانية مشعارف ايه

الاسوأ كمان ان كتير منهم إمكانياته ضعيفة في العمل
بغض النظر عن ان المدير بتاعك مشعايز يبهدلة
يعني حتي لو قرص عليه واتبهدل ورضي بالحال وومشيش زي مدول عملوا مشهيعرف يطلع الشغل
بالمستوي المطلوب ودايما
دا بييجي علينا احنا
في الاخر

بجد انت جيت علي الجرح اوي
لاني مفقوع من الالناس دي جدا وياما
اتبهدلنا بسببهم

الكلمة نور said...

هما دول ولاد الناس؟
اومال اللى بقابلهم فى الشارع وبيسهروا معايا فى القهوة مين؟

أفندينا said...

تدوينة لا أستطيع أن أقول عنها إلا انها اكثر من رائعه ، قدرتك مذهلة في تشريح تلك الطبقة التي أعتقد أن كلنا واجهها في عمله ، تحتاج تلك التدوينة لأكثر من قراءة واحدة ، بالنسبة لي تدوينة أحمد شقير "أنا من هذا الجيل" وتدوينتك هذه من أجمل ما قرأت ..... لك خالص التحية

Mist said...

أكتر حاجة عجبتني في المدونة غير الدقة في وصف نظام من يُطلق عليهم (ولاد الناس) السبب اللي حطيته إنها رغبة في التميز والبعد عن التشبه بأي طبقة..وإن كان الأمر أقرب إنه محاولة للتشبه بالطبقة الأعلى -بس الامكانيات بتتكلم طبعًا-

ما اعرفش ده خاصية مصرية مثلاً زي مالجبرتي كان بيوصف الأفراح المصرية (الاحتفالات بالزفاف) وكان الظاهر فيها إن كل طبقى أقل بتقلد الطبقة الأعلى..

ولا دي حاجة عامة-إنسانية يعني..على أساس إن البني آدم طبيعي عنده طموح وطبيعي بيعوز يتميز..وبعدين أما يبقى في مجموعة من الناس ليها لغتها وطريقة معيشتها وأماكن تجمعها وبتاع طبعًا بيبقى ليها نوع من الهيبة أو الانتماء عند كل واحد بيعمل الحاجات اللي شبههم،واحدة واحدة بيبقى في قواعد عامة للمجموعة دي -زي مايسمى بأخلاقيات الطبقة لو نفع نقول كده-..إنت بقى رصدت ده بامتياز

ولو إن شكلك كنت مبقوق..وهو عندك حق..أنا عن نفسي اتبقيت من المدير بس بضحك يعني :)

Anonymous said...

أحمد شقير + 1
:)))))

Mo'men said...

انا حاولت اصنف نفسي طبقا لتحليلك الاجتماعي طلعت ابن ناس ماديا و لكن ابن شوارع سلوكيا .. لاني عمري ما ادفع اكتر من 5 جنيه في حجر شيشه و الي يدفع اكتر من كده يبقي لاموأخذه "عيل سيس"

تحياتي :)

Shaker said...

جت فى وقتها .. انا كنت لسه امبارح مفتوح فى الكلام و عمال اتكلم على طبقة البين بين الى بيحاولوا يخلقوا بينهم و بين المحيطين بيهم عازل وهمى ملوش اساس .. بيحاولوا يكوّنوا هوية ملهاش وجود .. الى بيحاولوا يبقوا ولاد بشوات و ذوات .. الى درسوا فى مدارس اجنبيه بس مش انترناشيونال .. الى بيقروا كويلو و كتب التنمية البشرية بالانجليزية .. الى لو جبتله سيرة صنع الله ابراهيم او خيرى شلبى حيبصلك باستغراب .. عشان ملاقيش نفسى بكرر كلامك كله .. أحب أقلك بجد تدوينتك رائعة .. و اهتمامك بالتفاصيل مدهش .. و أحب أقلك فى الآخر ان انا بحس بشفقة فى اوقات كتير تجاه الناس دى .. فعلا دماغهم تاعباهم .. حيفضلوا طول عمرهم يجروا ورا حاجة مش حتتحقق

مـحـمـد مـفـيـد said...

تحيه بجد لرصك الرائع للحاله
وبوستك المميز

Lasto adri *Blue* said...

يعيش كفاح الطبقة الوسطى.. يا يعيش.. يا يعيش

الناس مدحت فى تدونتك باللى كان نفسى أقوله
ملحظات رائعة يا رامز

^ H@fSS@^ said...

قداستك
معلش اعذرني و سامحني
يمكن امبارح كنت متحسسة شوية و قلت لك كلامك كان مؤلم اوي
و انا شايفة انك وقعت في فخ التعميم
بس انا عارفة انك متقصدش
دلوقتي انا مش عارفة اصنفلك نفسي فين؟؟
المسميات و ما ادراك ما المسميات
انا طبقة متوسطة
زي ما انت طبقة متوسطة زيي بالظبط
يعني احنا مش مختلفين عن بعض كتير
نيجي بقى للناس اللي بتقولي انت بنت ناس او مش بنت ناس
طيب انا اعمل معاهم ايه اذا هما عاوزين يصنفوني كدا؟
ماشي
براحتهم
بس براحتي انا كمان
حعمل اللي انا احبه
اللي هو مفطرش كرواسان و مافن من كوستا و اون زا رن
ولا لازم اروح كافيه شيك عشان انا ياي طبكة وسطى
طبعا انت ممكن تقلي انتي مش مقصودة
بس مادام انت وصفت طبقة كاملة بالمنظر ده
فمن حقي اني اقولك مش كلهم كدا
بالنسبة للشغل
فالحمدلله لا عمري اشتغلت بواسطة
ولا عرفت
ولا كان ليا اصلا
انا افخر اني بديت حياتي المهنية من تحت الصفر
و افخر اني اشتغلت في بنك و بديته من اوطى حاجة فيه اللي هي فايلات و تغليف و كلام اهبل عشان افهم و اشتغل
و مش انا لوحدي
انا
اخويا
اغلب قرايبي اللي شكلنا بيتقال عليه ولاد ناس
لكن الحمدلله عمر ما حد فينا اشتغل واسطة
و يا اما اتمرمطنا
و فخورين بكدا
و انا محبتش احكيلك عن نفسي عشان محدش يقول ما هو طبعا فين ما هي عايشة العيشة سهلة
لكن انا بحكيلك عن حال عيلتي في مصر
و حتى هنا
مافيش حاجة بتمشي من غير واسطة
اصلا مافيش غيرها شغالة
لك واسطة امورك ماشية
ملكش
تقعد ساكت
نفس اللي بيحصل معاك من مهندسين متعيين من غير كفاءة
بيحصل معايا
اكون متعينة انا وزميل في نفس اليوم
مرتبه ضعفي
منصبه ضعفي
كل ده ليه
عشان له واسطة
مع العلم انه خريج ثانوية عامة
وا نا خريجة جامعة
مع العلم انه ذكاءا يفتقر لحاجات كتيرة
غير انه متدلع و مش بتاع شغل
و مقضيها خروجات و فسح على حس مقابلات عمل و الفاتورة تروح للادارة
غير السفريات كل حين و مين بابهظ التكاليف على كورسات مسخرة

انا اسفه يا قداستك بس انت ظلمت شريح كبير اوي من الطبقة الوسطة المسماة بولاد الناس

تقنيا
كلنا ولاد ناس
امال ولاد مكاتب او غابات سحرية مثلا؟؟



كل ده كوم
و لا يختلف مع اني معجبة بتفصيصك للموضوع و اسلوب تناولك ليه و جملك الشيقة
هذه نقرة و هذه نقرة
:D
تحياتي

3rby said...

فيه حتة كده
هو لا يذهب الى " بينوس " او " كوستا " , او " سيلنترو " او " ستار باكس " فتلك الاماكن مرتع لأبناء الشريحة العليا من الطبقة المتوسطة و هو لا يريد الأختلاط بها و لكن يذهب الى أماكنه الخاصة المغلقة ك" سيكويا ", " سنجرية ", " هارد روك " او " جراند كافيه " .

مش احنا اتفقنا انه من الشريحة العيا في الطبقة المتوسطة اصلا

Unknown said...

يانهار أزرق؟

كل ده عشان "عيلين سيس" استقالوا؟

وكمان طلعتنا مش ولاد ناس؟

الله يسامحك
.
.
.

بجد تدوينة تحفة

تحياتى

Mizom said...

7elwaaaa :)

AG said...

ماشي حالها التدوينة.

ال بيفرق بين سلوك الثلاث فئات دول مش الطبقات بس، لكن كمان الثقافات ال بتقطع الطبقات بالطول. ناس من الطبقة العليا و المتوسطة العليا مش بيروحوا سانجريا علشان فيه خمور و هم أخلاقهم ما تسمحش، و مش بيروحوا هاردروك كافيه مع إنهم بيشربوا في البيت و برا البيت علشان المكان أخلاقه مش ولا بد.

و طبعا فيه ناس ما ينفعش عليهم أي وصف من دول. تلاقيهم مدارس عربي و بيكتبوا في مدونات و بيروحوا سانجريا و قهوة حريص.

بس أنا مش جاي علشان أقول كدا. حكاية "ولاد الناس" دي لها أصل: المصريين، و هم ناس عارفين أصلهم و بلدهم و مستقرين فيها من زمان كانوا بيقولوا على الواحد انه "ابن الشرقاوي" أو "المغربي" دلالة على أصله، لكنهم ما كانوش عارفين للمماليك أصل لأنهم بيتخطفوا و هم أطفال و بيتباعوا من تاجر لتاجر، فبقوا يقولوا عليهم "ولاد ناس"، لأن أكيد برضه لهم أصل زينا، بس احنا ما نعرفهوش.

ال حصل إن المماليك بقوا الطبقة الحاكمة، و تدريجيا بقت العبارة لها معنى إن ابن الناس هو ابن الناس الأغنيا، في حين إن التمييز دا ما كانش موجود الأول.

أولاد الناس بتوع زمان لسة غالبا أغنيا دا الوقت، و زاد عليهم أولاد الذوات من الترك و الشركس، و بعدين زاد عليهم الأعيان من أغنياء المصريين.

شــــمـس الديـن said...

حلوة التدوينة و التعليقات

و شوفت انا عينة ولاد الناس دول في الكلية " كانوا واخدين قلم في نفسهم و مش بيكلموا اي حد " رغم انهم في رأيي كانوا اقل من العادي لكن هي نفسيات غريبة وولع ناس اخرين بالاستايل دا بيلمعهم و يديهم ثقة و مكانة مش مكانتهم

و في كورس تصميم الازياء اللي باخده دلوقتي فعلا لفيت نفس النوعية دي من اللي بيصبغوا شعرهم بالوان زي الاخضر و الفوشيا و النبيتي و بيحبوا لفت و عمل جو غريب كدا بس انا مبتفرقش معايا

بس عامة اعتقد ان تشريح المجتمع اتغير يعني الاقليه القليله من العالم المستريحة و ولاد الناس اهم علي شفا حفرة من الوقوع في الفقر و اللحاق باولاد الناس المستريحة في المظاهر بس لان الرأسماليين الغيلان الدائرة قفلت عليهم خلاص و الطبقة الوسطي العليا بقوا قليلين و هما دول المفكافحين و قربوا ينقرضوا اما بقي السواد الاعظم في رأيي بقت طبقة الحرفيين و سائقي اليكروباس و انصاف المتعلمين و المهاجرين من الريف و بيشتغلوا اي حاجة و دول اللي بيتجوزوا بدري ( لما اشتغلت في فيصل جواها شوية لاقيت ان اللي تعدي 22 سنة بدون زواج تبقي عانس !و الاغلب متجوزين عواطلية ) و ميفرقش معهم اي شئ و بيخدوا اليومية بيومها و علشان عارفين ان فرصتهم انه يطوروا من نفسهم معدومة فبيعيشوا اليوم بيومة و خلاص بدون حتي توفير

abderrahman said...

أهديك من الشعر أبيات لشعبولا

بنقطة الصفر بدينا
عملنا نفسنا بإيدينا
تعبنا في الدنيا شوية
والحمدلله عدينا
بإدينا يا مسكنا ألوف
واللي يعيش في الدنيا يشوف
الدنيا فانية مش دايمة
ولابيدومش غير المعروف
سلاحنا في الدنيا أدبنا
ماهوش حسبنا ونسبنا
لو مالت الدنيا علينا
دايما بنرضى بنصيبنا

abderrahman said...

تعبير ولاد الناس ليه أصل مماليكي، يوضح ازاي انه التوريث وشبكة علاقات الوالد والعيلة ديما بتفيد

Wild at Heart said...

يا نهار أسود هو كل ده من الشريحة العليا من الطبقة الوسطى؟ أمال لو كان طبقة عليا كان حياته تبقى إزاي؟
تحياتي

None said...

استاذ فى الوصف
والله بجد فعلا فى ناس كتير عن تجربه برضه
بس بجد انت جبتهم صح

Sonbol said...

انا متابع للمدونة من زمان بس التدوينة ديه جابت من الاخر

لم يخلق بعض الناس للمرمطة

AbdElRaHmaN Ayyash said...

مكنتش عاوزها تخلص التدوينة دي :)
جميلة اوي اوي اوي

^ H@fSS@^ said...

احيه
و كمان طلعنا مماليك؟؟
ابسط يا عم الشرقاوي
مين قدك يا باشا
LOOOOL

littilemo said...

انت شغال فين فى التليكوم

مهندس مصري بيحب مصر said...

ياه
تدوينة جميلة و دقيقة لحد بعيد

بس دا انت طلعتنا مش ولاد ناس بالمرة

:)

علاء السادس عشر said...

تدوينة ظريفة لكن رأي أن فيها تعميم،
في لفظ اسمه subculture
بيقصد به الانتماء إلى جماعة صغيرة إو أكثر داخل الجماعة الكبيرة.يعني هناك شخص ينتمي إلى الطبقة المتوسطة وفي نفس الوقت هو ينتمي إلى سكان مدينة الرحاب وفي نفس الوقت ينتمي إلى نادي معين حتى ماركة السيارة تلعب دور فاصحاب السيارات الجاجور مثلا يقوموا في بعض المدن الاوربية بتحية بعضهم بدون معرفة لانهم ينتموا إلى (سوب كالتشر) واحد.الموضوع موضوع هوية والهوية تكتسب عندما يكون هناك فروق واختلافات، يعني بدون اختلافات لا توجد هوية وكل شخص يحتاج إلى وضع حدود وفوارق حتى يجد هويته ولا يكفي أن تكون هويته من افراد الطبقة العليا للطبقة المتوسطة، دي طبقة كبيرة وهنا التعميم لان بافتراض وجود هذه الطبقة بالشكل الموصوف منك فهم مازالوا بحاجة لفروق مع بعضهم البعض وإلا ستكون لهم هوية محدودة وناقصة وهذا ينطبق على كل الطبقات.
النقطة الثانية هي أن من الممكن أن اقوم بوصف كل شرائح المجتمع حسب انتمائها من وجهة نظر سلبية أو ايجابية يعني لو أنا وصفت لك شاب ينتمي للطبقة الفقيرة ممكن أوصفه من الجانب السلبي مثلاً ده بيئة ابن كلب بيتفرج على محمد سعد أو اوصفه وصف ايجابي من عينة ملح الأرض والكلام ده.
التدوينة لها اسلوب ممتاز في السرد وبها خفة دم شديدة .
تحياتي واسف على التعليق الطويل.

Shimaa Gamal said...

مش هاضيف جديد لو قلت إنها من أحلى ما قرأت لوصف الأشخاص اللى بنقابلهم و نقاوم إننا نقولهم
" الله يرحمه و يرحمه ليه ما هو لسه موجود "
هو شئ متوقع إن الناس تحاول تحسين مراكزهم الإجتماعية ، سنة الحياة و لكن اللى بيضايق محاولة الفصل أو التنصل من الأخرين على أساس إن بعضهم خلق من طينة أخرى
كلنا ولاد ناس ، لأنه حتى الآن لم يظهر إبن القرد اللى بيقولوا إنه كان حلقة التطور

و فعلاً إصطلاح ولاد الناس ظهر فى أيام المماليك . و كان يطلق على أبناء المماليك المتزوجين من مصريين . كانت طبقة المماليك الحاكمة بتنظر لهم على إنهم طبقة أدنى و طبعًأ لإنهم فيهم عرق من الحكام كانوا بيتنططوا على الرعاع من الشعب المصرى . إحتفظوا بالأراضى و لكنهم منعوا الحكم .

عباس العبد said...

أسكندرانى
متشكر على رفع القبعة و الأعجاب بالتدوينة . بس وحياتك بلاش حكاية الحسد دى علشان انا استويت على الأخر من الموضوع ده .
و فى أنتظار عودتك
===
أحمد شقير
متشكر يا فندم على المدح الجميل ده ..
اللى ضايقنى فى الجملة دى هى انها انطباع عام لدى كثير من الناس . يعنى ليه مديرى حاسس انه اقل منهم و اننا " مش ولاد ناس " ؟ .. ليه هو حاسس بكده و بقت عنده بديهة و شىء طبيعى ان يستخدم الكلمة كأننا من طينة تانية ؟ .. هو ده اللى ضايقنى
===
بيلا
الله يخليكى يا فندم و متشكر جداً
فى انتظار عودتك

عباس العبد said...

شمعون
هى وحش دى بالفتحة و لا بالكسرة ؟
يعنى : وَحش و لا وِ حِش ؟
===
نسرين بسيونى
حمد الله على سلامتك انتى .. بقالك غيبة
كنتى فين ؟ و يا ستى لو التدوينات اللى من النوع ده حتخليكى تيجى تعلقى عندى .. حكتر منها علشان خاطرك .
===
هرطقة
انا مش مفقوع منهم .. قد ما مفقوع من الناس اللى مستسلمة لأنها " مش ولاد ناس " .. و دى حاجة غريبة .. المصطلح فى مفهومة الواسع " انه شخص نضيف , شيك , ريحته حلوة , عنده عربية و له صحباته البنات و بيروح حتت غالية و شقته فى القاهرة الجديدة " .. هو ده المقصود من المصطلح فى ذهن الناس .. مع انها فكرة غلط لأننا بكل نضاف و شيك و محدش بيمشى معفن فى الشوارع . دى حتى بيوت الناس الفقيرة بتبقى من جوا نضيفة .. انا اتخنقت لأنى استغربت انه مش بيستحمل الشغل و هوب تلاقيه مديرك .. طب أزاى ؟
غير انه فعلاً مخهم بايظ و بيبوظوا حاجات كتيرة و بلاوى سودا

عباس العبد said...

الكلمة نور
منورنى 
اللى بيسهروا معاك على القهوة حد من الأتنين
يا ناس مستريحيين يا ناس شقيانيين
هههههههه
===
أفندينا
شكراً يا فندم و سعيد جداً انك ساويت تدوينة من عندى بتدوينة لأستاذنا كلنا " احمد شقير " . ده فخر لىّ .
===
ميست
عليكى نور
الأمكانيات بتتكلم طبعاً .. الفروق الطبقية مش عيب , لكن العيب هو القيمة الأخلاقية لكل طبقة .
يعنى مش معنى انك غنى تبقى حرامى و مش معنى انك فقير تبقى شريف . لكن المترسب فى الذهن العام ان كل الأغنياء حرامية و فاسدين و كل الفقرا شرفاء و مكافحين . نفس فكرة اولاد الناس
الطموح مش عيب , لازم يبقى عندك طموح . معاكى تماماً

عباس العبد said...

فيصل
مش فاهم ؟
===
مؤمن
خمسة جنيه فى حجر الشيشة !!!! . ليه يا عم ؟ انت بتقعد فين ؟
خمسة جنيه دول يا محترم يعملوا خمس حجارة عدالى من بتوع عم سيد قص ملك المعسل على قهوة الطلبة و يرصهم لك شاكوش بنفسه , شاكوش ده اهم واحد بيرص حجرة فى تاريخ الشيشة منذ أيام محمد على . خمسة جنيه يا مفترى ؟ .. انت باين عليك من العيال المستريحة
ربنا يزيدك يا سيدى .. خدونا جنبكو شوية
هههههههههههههه
===
Lonely
هم فعلاً عايشية مأساة خاصة بيهم .. بس المشكلة فى " الناس " اللى رضيت انهم يبقوا ادنى بمجرد ان اللى قدامهم نازل من عربية . ربنا يعوض علينا
على فكرة انا نسيت اكتب عن كتب التنمية البشرية و جهلهم بصنع الله . كنت ناوى فعلاً بس طارت الجملة من راسى
متشكر على تذكرتى

عباس العبد said...

محمد مفيد
متشكر يا فندم و سعيد لمرورك
===
لست أدرى
الله يخليكى يا فندم
و يعيش كفاح الطبقة المتوسطة .. يا يعيش
===
حفصت
اولاً يعنى إيه انك طبقة متوسطة زى ما انا طبقة متوسطة بالظبط ؟ هى الناس تتساوى كده بسهولة فى سطر . خلاص بقينا زى بعض , اتساويتى بقداستى كده فى تكتكة كيبورد ؟ .. ههههههه .
المهم :
شوفى انا معممتش , انا اتكلمت عن جماعة معينة من الشريحة العليا للطبقة المتوسطة و الجماعة دى عايزة تنفصل عن الطبقة بأكملها و عن شريحتها و عايزة تنضم للناس المستريحة ( حسب المصطلح المتداول ) .. متكلمتش عن الطبقة كلها . و ده نص كلامى :

ابن الناس هو ابن الشريحة العليا للطبقة المتوسطة . متعلم ذو شهادة جامعية . يسعى جاهداً للخروج من كونه ابن الطبقة المتوسطة ليلحق بفئة الطبقة العليا او كما يقال بفئة " العيال المستريحة "

فانا معممتش , انا قلت انه عايز ينفصل .. لكن مش الشريحة العليا كلها عايزة تنفصل , الجماعة اللى متسميين ولاد ناس هم بس اللى عايزين ينفصلوا .
انا مشتغلتش بواسطة و رحت انترفيوهات و اترفضت كتير من كذا شغلانة , عادى . اول شركة اشتغلت فيها , قعدت 3 شهور تحت التدريب ك" فنى " , كنت باخد 200 جنيه فى الشهر و مفتحتش بقى و لا أعترضت لأنى كنت عايز اتعلم و اشتغل ( مع ان ابويا جابلى شغل كتير – لكن انا مردتش كنت عايز ادور بنفسى ) .
القصة فى أيه ؟ .. انا اشتغلت مع واحد من " ولاد الناس " دول لمدة شهر . سافرنا اسكندرية ( 250 كيلو شمال القاهرة ) و خلصنا الشغل و نزلنا القاهرة و تانى يوم طلعنا شرق العوينات ( 1250 كيلو جنوب القاهرة ) و خلصنا الشغل و طلعنا الصعيد الى اسوان ( 900 كيلو جنوب القاهرة ) . الواد مستحملش و قال سلامو عليكو . شوفى انا بصيتلها أزاى و هو شاف الموقف ازاى ؟
انا شفته انه تقدير من المدير و انه بيعتمد على و انه محتاجنى فبروح من حتة لحتة مابقعدش فى البيت . ابن الناس شافها أزاى ؟ شافها على ان ده استعباد و ذل و قعد يقول " هو مفيش غيرنا اللى يسافر , دى اهانة دى قلة أدب , يعنى ايه مناخدش ولا يوم اجازة لمدة شهر " و لما رجعنا من الصعيد و كان لازم نلف نفس اللفة تانى الشهر ده , قدم استقالته و مشى علشان ده مش شغل ده استعباد !!! . مع انه متعين على مرتب اعلى منى انا اللى بقالى سنتين و بياخد بدل اعلى برضه ( واسطة بقى ) .
اللى مزعلنى شخصياً فى هذا الموضوع , ان فى ناس عندها احساس بالدونية لدرجة انها بتصنف نفسها أقل و معتبرة انها بدل بتشتغل و تشقى و تتعب تبقى " مش بنت ناس " .. انا معترض على كده , معترض على التصنيف لأن كلنا ولاد الناس من اول ابن البواب الى ابن اكبر واحد فى مصر , كلنا ولاد ناس .. فهمتى قصدى

عباس العبد said...

عربى
مين "احنا تفقنا " ؟ مين اتفق مع مين ؟ انا متفقتش مع حد و مقلتش حاجة .
هو من الشريحة العليا من الطبقة المتوسطة لكنه مش عايز يختلط بتلك الشريحة و لا بالطبقة نفسها هو عايز يروح الأماكن بتاعة الناس المستريحة .. فهمت قصدى .
===
م5م
الله يخليك يا بشا و منورنى
===
مو
شكراً

Khaled said...

saidi el 3aziz :D:D

mabda2yan e3tzar kal3ada 3ala el franko-arab 3ashan el keyboard mafehosh 3arabi :D

awel 7aga a7eb a2olak enk 3amemt awii , ana wa7ed ba3taber nafsy ebn nas w ba7awel awsal le kol ele enta bt2ool 3aleh w ab2a merta7 .. 3andy so7ab f kol 7etta w nas 3andha villal f marina w el 3een el sokhna .. bs ba7eb mohamed mounir w mab7besh amr diab .. basma3 om klthoum kteer w baroo7 el sa2ia aktar .. baroo7 sa3at sangria w abo el seed w baroo7 el tak3eba w cilantro w costa , mabdfa3sh f 7agar el shesha 35 gneh w lama bal2eh b 35 mabshrabsh w bakol bel floos 3ashan ab2a 3ala el a2al estafdt beha , mab2rash pualo cohlio wala 2areet secrets l3'ayet delwa2ty , w ba2ra lel 3aidi w mourad w el 3'azali w 7amdy abo goliel w mekawy sa3eed
w f nafs el wa2t ba2ra le naguib mahfouz w baha2 taher w gamal el 3'etany
ba2ra le salh gaheen w fo2ad hadad w beram bs mab7besh 7ad 2ad el fagomi ..
bastagda3 ma3a so7abi w ragel m3ahom w regala m3aya w mesh 3yal sees zai ma bt2ool wala yomken astandel ma3a 7ad w atla3 (5****) ma3ah .

mesh 3aref leh la2et nafsi f wasfak lel 7ayah bs fel ta7lel w el kalam la2 .. ana mesh keda w so7abi mesh keda w nas kteer mn ele a3rafhom mesh keda .. w mesh shayef bardo enhom law kano kda f da sabb enhom yb2o tarya2a .. el 3yal el fadi el sees ele enta kateb 3alehom dool etrabo kda 3shan abohom w omhom kano keda .. kano bardo sees f zamnhom .. 3shan kda matl3oosh regala .. w 3yalhom hayb2a kda bardo .. el moshkela el kbera enk enta nafsak matb2ash sees lama tekbar w t5alef 3yal w t3'lat m3ahom f ytla3o 3yal sees bardo !!!

Unknown said...

تدوينة مش بطالة ، بس أنا عندي قصيدة جديدة بطالة خالص. ابقى قوللي رأيك فيها

قصيدتي الجديدة

عباس العبد said...

عمرو غربية
انا معاك أن الثقافة بتتحكم كمان فى توجهات الفرد فمش شرك ان يكون م نالشريحة العليا برضه و عايز ينفصل و ممكن تكون اخلاقياته – كما ذكرت حضرتك – ما تسمحش بممارسات ما , مفيش حاجة يتقال عليها " استمبة " تتطبق على الناس كلها , لكن فى سمات عامة .
و شكراً للمعلومة القيمة عن " مصطلح اولاد الناس " .
===
شمس الدين
هم فعلاً موجودين كتير و فى كل مكان و يسعون او يحبون الظهور لكن فى حدود . و معاك فعلاً ان الطبقات الشبه معدمة بتعيش حياتها كأن معنهاش أى مشاكل عكس الطبقة المتوسطة اللى زى ما بيقولوا " بتشيل الهم " ..
===
عبده باشا
منورنى يا ريس

عباس العبد said...

وايلد
مش عارف بامانة . ههههههه
و متشكر على التحية .
===
الجيولوجى
الله يخليك يا فندم
متشكر على المديح
===
سنبل
انا مختلف معاك , لم يخلق أى أنسان للمرمطة , لكن لو الشغل عايز كده !!! .. فاهم قصدى ؟
يعنى النقاش و السباك مهن كلها مرمطة .. بس مش معنى كده انها اهانة ان أى حد يكون نقاش او سباك ..

عباس العبد said...

عياش
الله يخليك يا فندم
ده من ذوقك بس
===
حفصة
مش احنا اللى مماليك , دول هم اللى هم مش أحنا اللى احنا
===
ايمو
السؤال ده ليه ؟
انت فى الضرايب و لا إيه ؟

عباس العبد said...

مهندس مصرى
منورنى و ليك غيبة طويلة مشرفتش المدونة
مش انا اللى مطلعتكمش ولاد ناس .. لأننا كلنا عيال مستريحة
ههههههه
===
علاء السادس عشر
انا معممتش , انا قلت انه من الشريحة العليا للطبقة المتوسطة و مقلتش انه الشريحة كلها عايزة تنفصل , جزء من تلك الشريحة و اللى بيطلق على نفسه او بيطلق عليه ولاد الناس . هم ليهم هوية و الا مكنش اطلق على العيال اللى من النوع ده " لقب ولاد ناس " , اما بالنسبة لوصف الطبقة بالكيفية اللى عايزها " الواصف " فده انا معاك انى ممكن اوصف طبقة ما " بأجمل الألفاظ " او ممكن " اطلع فيها القطط الفاطسة " .. لكن اعتقد ان تعليقات الناس و ردود الأفعال عامة بتقول انى كنت حيادى على قد ما أقدر غير انى مطرقتش لسلبيات و لا أيجابيات . انا وصفت اطار عام مش تفاصيل .
و بالتالى اعتقد اننا متفقين فى نقط كتيرة
===
شيماء جمال
فعلاً هو حق مشروع لأى حد انه يعيش كويس و مستريح لكن المشكلة فعلاً زى ما حضرتك قلتى محاولة التنصل و الفصل .

عباس العبد said...

خالد
انا موصفتش حد انه عيل سيس , انا قلت ان الطبقة المتوسطة بتقول عليهم انهم عيال سيس .
اما النقطة الأهم هو ان كلامك أكد فكرة التدوينة , لأن بكل بساطة انك تكون مستريح ده مطلب الجميع من أصغر موظف تم تعيينه فى مبنى محليات اصغر قرية فى مصر الى أغنى رجل أعمال , كلهم عايزين يبقوا مستريحيين و مبسوطين , ده حاجة كويسة لكن أنك تنفى ده عن الجميع .
اما حكاية ان العيال الفاضية السيس طلعوا كده لأن ابوهم و امهم كانوا كده فانا قلت ( بدون إساءة فهم ) :

ابن الناس يظل دائماً ابن ناس بشبكة علاقاته الواسعة و الممتدة

يعنى هم حيظلوا كده .
اما كلام حضرتك فبيؤكد كلامى .. انت الأستثناء اللى بيؤكد القاعدة

أبو عمر - الصارم الحاسم said...
This comment has been removed by the author.
أبو عمر - الصارم الحاسم said...

انت عارف....المشكلة الاكبر مش في ولاد الناس

المشكلة الاكبر من كده هم ابناء الطبقة المتوسطة والكادحة اللي عندهم هوس الرغبة والعمل ووضع هدف لحياتهم ان ينتقلوا بانفسهم وباولادهم الى طبقة ولاد الناس


وبيصل لحد التمسح بشكل فج في طبقة ولاد الناس

الحلم هو الموبايل مش عارف ايه....والولاعة مش عارف ايه...والعربية مش عارف ايه ....ومدنيتي والرحاب ...ويصيف مش عارف فين.....وشهر العسل فين.....عشان يبقوا في مصاف ولاد الناس

وارهاق باقساط واقساط وسعي في الدنيا كالنحلة...يمين وشمال زي الفرخة الدايخة.....لا لاصلاحها وعمل الخير فيها....ولا لاكتساب وسائل التمكين للتغيير الى الافضل على مستوى المجتمع.....لكن فقط عشان يكونوا في مصاف ولاد الناس

وولاده لازم يخشوا مدارس مش عارف ايه ....ونوادي ايه.....مش عشان التعليم او عشان الرياضة او اكتساب مهرارات - وده مطلوب جد ا- لكن عشان يقوا في مستوى ولاد الناس

انت عارف لو حتى بيفكروا عشان البعد عن المشاكل والاخلاقيات الزبالة اللي بقت منتشرة دلوقت وبتاكل الحقوق كان يبقى فيه شئ من المنطقية....واكيد اغلبنا دلوقت ومنهم انا بيحاول يبعد على اضعف الايمان عن المشاكل السخيفة اللي مالهاش محل من الاعراب التي قد تعطلك في الحياة

لكن الحكاية اكبر من كده....الحكاية دخلت في كبر


ولاد الناس في تعريفي من زمان وعلى هذا الاساس اتعامل مع البشر...هي الناس المحترمة المتربية المهذبة المتواضعة بدون ذلة حسنة المظهر


عنده استعداد للبهدلة لو بالحق...لكن لا يتكبر على شئ او على شغل عشان ياي مش من مستواه

او من مستواه واعلى من مستواه لكنه يتمسح باسم ولاد الناس


اما اشوف حد كدا...بقول اهله مربيينه كويس – ممكن اهله يكونوا اصلا مش متعلمين. لكن بيجيدوا التربية

محترم ومهذب

مش ضروري يكون غني او حتى متعلم طالما هي دي ظروفه وده رزقه اللي ربنا قاسمهوله

بيؤدي شغله باخلاص

حسن المظهر يهتم بمظهره دون افراط لو امكانياته حتى عالية...او على قد امكانياته...على اي امكانيات يستطيع الاهتمام بمظهره ودون تكاليف كثيرة...لكن المشكلة مش في الماركات اللي بتلبسها


ده ابن الناس الحقيقي


وعلى ذكر طبيعة عملك وشكلك طلعت ابن كار ....اعرف ناس بيتقال عليهم ولاد ناس رفضوا الشغلانة اللي انت بتشتغلها - او شغلانة شبهها شوية - عشان "بهدلة" رغم ان عائدها كان مجزي وعلمها بالنسبة لخريج كان لا غبار عليه

واللي قبلوها وتواضعوا لله ولم يدر في ذهنهم شئ من هذا القبيل بل كان الكسب والعلم كواجبات دينية واجتماعية اهم عندهم من اي شئ ...كان هذا فتح لهم لم يبلغه هؤلاء حتى الآن

مهندس مصري بيحب مصر said...

يا باشا أنا متابع البوستات كلها و باقرأها بكل تعليقاتها
بس قليل لما ألاقي حاجة أعلق بيها
و أنا تعليقاتي قلت عموماً في كل حتة
لكن إنت دايماً في بالي
:)

بالنسبة لعيال مستريحة
لو مستريح ما كنتش إتغربت عن بلدي و إشتغلت في صحاري ما كنتش أعرف إسمها و لا كان يخطر ببالي أبص على مكانها على الخريطة

أنا من الشريحة المتوسطة في الطبقة المتوسطة
:)
و ياريت نستريح في يوم من الإيام بس بدون تنكر للأصل و الذات
سيبك إنت
خليها على الله
سلام يا هندسة :)

Ahmed Salem said...

انت اسكرتني بالتدوينة دي
انا رسميا من الطبقة المكافحة لكن بلاقي نفسي كتير قوي ب أحاول اكون لا مؤخذة " ابن ناس"

شكرا

احساس لسه حى said...

عزيزى

ما معظم المصريين بقوا مش ولاد ناس

وولاد الناس دلوقتى بقوا عملة نادرة

حتى ولاد الناس المستريحة بقوا بقوا مش ولاد ناس

شرحك حلو وتحليلك

ويمكن الدنيا تحلو معاك وتبقا فى يوم

ابن ناس

سلام

Unknown said...

اسعدت اوقات الجميع

الكلام حلو ومرير

ياترى لو استنينا 5 او 6 سنين بس حاتكون الدنيا ازاي

هايل وجامد جدا تحليلك للوضع الحالي للشباب المصري

بالتوفيق دائما

اشرف ادريس
www.ashrafedris.com

عم مينا said...

رامز
مش ممكن ده أقوي رصد اجتماعي أريته في حياتي.. مش عارف أقولك ايه غير بجد ان بستمتع بكل كلمة انت بتكتبها.. رغم طبعاً اختلافي مع التعميم لأن فيه ولاد ناس مختلفين شوية لكن مقدرش أنكر انك وصفت بدقة الغالبية العظمي منهم

أعتذر اني ما كنتش متابع المدونة الفترة الأخيرة و لا وني مش لازم أعتذر لأن بصراحة كنت أنا الخسران

تحياتي

مَلَكة said...

رامز
وانا بقرالك تدوينتك كنت حاسة اني شايفاهم قدامي ولاد الناس بجد
بل كمان افتكرت نماذج من اللي شفتها في الحقيقة فعلا
عالم اجتماع محترم بصحيح :)

Anonymous said...

روعه

Unique said...

جميلة أويييييييييييييييييي بجد
كان نفسي أقرا التعليقات كلهاااااا بس صعب :)

أكتر حاجة عجبتني الوصف التفصيلي أوي أوي للأماكن و "اللايف ستايل" لأ و كمان النفساوياات

بس بجد حيرتني ازاي ما شاء الله مطلع كده على كل الطبقات و اللي بتعمله
أنا في الاول قلت انت طبقة مكافحة
شوية و قلت انت من الناس المستريحين
في النص بدأت أشك فيك و أقوول ده عمييل و شكله من ولاد الناس :D

تسلم ايديك على البوست الجميل ده :)) فناااااااااااااان !!

Ahmed said...

انا عملت شير للتدوينه دي فى ٢٠٠٩ .. و رجعت افتكرتها فى ٢٠٢٠ و السبب انها كانت من احسن و اصدق ما قريت فى وصف طبقه كنت دايما بحس انها "متدلعه" و عندها امكانيات انا ملقتهاش بعد ما اتخرجت و "اتبهدلت" علشان اقدر انجح و بالكاد اوصل لنقطة البدايه بتاعة طبقة ولاد الناس .. أما السبب اللي خلاني اكتب الكومنت دا ان الطبقه دي و احنا فى ٢٠٢٠ تقريبا علي وشك الانقراض.. و لم يبقي فى مصر غير طبقة ولاد العالم المستريحه أوى اللي اساسا مبنشوفش منهم حد و طبقة الناس المتوسطه اللي هما بقوا لازقين فى الطبقات الدنيا فى المجتمع و متعرفش تفرق بينهم .. و بعد ما كنا بنتريق علي طبقة ولاد الناس بقينا بنتحسر انهم بقوا مش موجودين اساسا .. و ده الفرق بين مصر ٢٠٠٩ و مصر دلوقت