Thursday, December 17, 2009

العذراء و الشعر الأنكش



من لم يستعمل دماغه لن يمضى وقت طويل حتى يجد دماغاً تستعلمه .
---
قد أكون مضطر للكتابة بعد ان أنقطعت عنها لفترة واختفيت , لكن ظهور العذراء – للمفارقة – قد جعلنى أظهر من جديد فى نهاية سنة ثقيلة مرت ببطء و ملل .
مقدمة :
قد لا أصدق بظهور العذراء فى الوراق و لكنى مؤمن بالظهورات !! قد يتهمنى البعض بانى أؤمن بالغيبيات لأنى مغيب , ظريف برضه .
قد افهم أن يتناقش المؤمنين فى مسئلة الظهور هذه لكنى غير " متفهم " لنقاش الملحدين لهذه الظاهرة !! .. فانا اكره أن يفرض علىّ احدهم " غبائه " .. قد اتفهم إلحاده و أقبل إختياره و محاولته لمناقشة أمور بالعقل و لكنى اكره الغباء المطلق ( او كما يحلو له أن يسميه اليقين المطلق ) ...
لذا فقد حاولت أن افهم ...
ينقسم الملحدين عامة الى 3 أقسام او تصنيفات
الملحد السكروتة – الملحد ابو كيكة - الملحد الفلسفى
الملحد السكروتة هو اظرفهم , فهو لايفهم الألحاد و لكنه ملحد لأنها موضة ! .. لانه يريد ان يظهر مختلفاً .. الجميع – حسبما اُملى عليه – يسير فى قطيع التدين , و عليه كسكروتة محترف ان يظهر مختلفاً لأنه سكروتة . يقرأ كتابات الحادية عميقة , بدئها بروايات عبير و ملف المستقبل و وصل الى أرسين لوبين و الفرسان الثلاثة .. لا تتحمل ان تجلس معه فهو " يخنقك " .. و يحسسك بالعوء و تمل من انك تفهمه لانه بيردد أصلاً كلام لا يفهمه فى الأساس . لا يوجد فرق بينه و بين المتدين المتعصب المنغلق , حافظ بس مش فاهم .
الملحد ابو كيكة يحاول أن يظهر بصورة المتعمق فى مسائل الفكر و المعرفة . فهو يبدأ كلامه دائماً بلازمة ثابتة : انا كملحد ,انا كتنويرى , انا كمثقف , انا كصاحب رؤية علمية , انا كأبو كيكة , أنا باخد فيها . و هكذا لا تنتهى التوصيفات التى يطلقها على نفسه . منتشرين جداً على النت و المدونات و الفيس-بووك , لا تنتهى الجروبات التى يبدءها و التى ينتصر فيها على المتدينين ! . يحفظ بعض الكتابات و الأقوال و الأفكار التى تؤيد كلامه من ناحية علمية .. يحب القصيمى و يقرأ لفراس السواح و معه نسخة " PDF " لكتاب صادق جلال العظم . يتكلم عن حقوق الانسان و الحيوان و الجماد و يدافع عن قضية نكاح المرأة على رصيف المحطة و يتظاهر من أجل انقاذ ام ترتر من بطش أبنها ترتر و لكنه يختفى و يغيير أسمه و لا يظهر فى المظاهرات التى يدعو لها و القضايا التى يدافع عنها لأن المتدينين أخوان الشياطين ممكن يقتلوهم ! و بالتالى حرص و لا تخون . يدافع عن حقوق المواطن و يعلن بكل وضوح و صراحة و شجاعة و إقدام تحت " النيك-نيمه " انه مستعد أن يدافع عن المتدين و حقوق المتدين و أن يساهم فى بناء معبد ليتعبد هذا المتدين لألهه لكنه غير مستعد و لا يقبل ان تقول له ان الهك الذى تتعبد له " يصنع معجزات او يتكلم عبر التاريخ او يرسل أنبياء " !!!! .. هو في يا ابو كيكة , اله فى الكون كله من أول اقدم صنم الى اله التوحيد السماوى لا يصنع معجزات و لا يرسل أنبياء , ده فينوس الهة الجمال كانت بتعمل شغل برضه يا مثقف يا تنويرى يا بتاع التاريخ يا أبن ابو كيكة ؟ , جايبين دماغهم من أى مراحيض مش عارف ؟!!! .
الملحد الفلسفى .. نتوقف قليلاً عند هذا الملحد .. لأنه فعلاً شخص محترم .
الملحد ذى المرجعية الفلسفية ملحد لا يهتم .. لا يدخل فى نقاشات عقيمة . قابلت منهم أعداد قليلة و تحاورت معهم و تقبلت كثير من وجهات نظرهم , فهو يكلمك عن اليقين و اليقين الذاتى .
تحاورت مع أحدهم .. سئلته : ايه المشكلة مع الدين ؟ .. مفيش مشكلة مع الدين
طيب إيه مشكلتك مع المتدينين ؟ .. مفيش مشكلة مع المتدينين من ناحية التدين لكن طبيعى يكون عندك خلافات مع أى أشخاص طبيعى .
طيب مشكلتك مع الله ؟ .. قال و كانت اجابته قاطعته : معنديش مشكلة مع الله
سئلته : طيب لما مفيش مشكلة مع الله يبقى فين المشكلة ؟ .. ضحك و اجاب : مش ممكن يكون عندك مشكلة مع كيان مش موجود !! .. لا يمكن انك تنقد او تنفى وجود الله , لأن نفى أو نقد ما هو غير موجود او كائن قد يكون دليل وجود ناتج عن جهالة او إختلاف توجهات . انا معنديش مشكلة مع كيان مش موجود أصلاً .
حسب كلامه : لا يمكن أن تقف ضد الدين . فالدين جزء من تراث البشرية , تراث ضخم , مكون و رافد أساسى من روافد التاريخ الذى نرثه , و لا يمكن ان تطلب من البشرية ان تفقد نصف ذاكرتها او اكثر لمجرد أن " شوية عيال " مش عاجبها تصرفات المتدينين . ما ينفعش تطلب من شخص ان يقطع إيديه الأتنين علشان شكلها وحش أو ضوافره طويلة شوية .
كثير من الحضارات عبر التاريخ كانت حضارات قائمة على الدين كالحضارة الفرعونية او البابلية , و ان اختلفت مفاهيمها مع الأديان السماوية او التوحيدية , و كثير من الملحدين دول بيدافعوا عن " فرعونية مصر " و حضارتها و هى حضارة دينية !!! و فى نفس الوقت بيهاجموا الدين !!! . تاريخ البشرية كله عبارة عن تراكمات و تكوينات متشابكة و متداخلة و مركبة , اصغر جندى فى أصغر جيش من الف سنة قبل الميلاد له تأثير على نوع الطعام اللى حيتاكل كمان ساعة فى مطعم صينى .. تراكمات علمية و دينية و اجتماعية , صراعات و حروب , موت و دمار و اوبئة و معابد و رقص و غناء , اقتصاد و تجارة و رقيق أبيض و الهة و شياطين .. كل عنصر من تلك العناصر بيستغل بقية العناصر . الدين بيستغل الحرب و الحرب بتستغل الدين و الأقتصاد بيستغل الأكل و الطعام .. شركات الأدوية نموذج ثرى جداً تفهم منه ده .. لا يمكن انك تيجى فى وسط السريان الهائل و التدفق المهول للتاريخ و تقول : قف و الغى الدين !! .. تبقى أهبل ! .. او قف و حارب الدين . يبقى انت عملت نموذج جديد للأستغلال .. العنف ضد الدين .. بديل العنف الدينى . تلغى ذاكرة التاريخ او تبتره لأنك صليت مرة فمعجبتكش الصلاة او طلبت حاجة من ربنا و معملهلكش او عايز تشرب كحوليات و تنام مع نسوان او قريت كتاب ثورى شوية .. فمعجبكش الدين فقررت تلغيه .. تبقى حمار نموذجى ..
الأنسان فلك بيدور له مليون رافد فكرى و مليون منتج انسانى .. و الجماعات البشرية مجموعة من الأفلاك متداخلة و متشعبة و مركبة .. و كل فلك له منتج .. و بتتلاقى المنتجات و بتتداخل و بتنتج ثقافات .. افضل شىء عندك بتقدمه .. الدين قدم افكار عظيمة و العلم قدم افكار عظيمة و الأنسان عايش , و بيموت و عليك أن تختار .. اليقين ذاتى .. الدين او الأيمان له يقين فى ذاته .. العلم له يقين فى ذاته .. انت على يقين من وجود الله و انا على يقين انه غير موجود .. تمام .. انت بتقدم منتجك و انا بقدم منتجى و الأفيد هو اللى حيستمر .. كمان مليون سنة يا اما الدين حيبقى ذكريات و تراث او العلم و الدين حيلاقوا صيغة او حتستمر القصة الى الأبد .. انا لا اشفق عليك و انت لا تشفق على .. انت مؤمن .. احييك على إيمانك و ادعوك انك تصلى ان الهك يرحمنا , المعابد و الكنايس و الجوامع تراث معمارى هائل , لكن متتطلبش منى انى اصلى لأنى لا اهتم بصلاتك او تتهمنى بالكفر لأنى مكفرتش بكيان غير موجود أصلاً ...
( الحوار ده تم فى معرض الكتاب و أستمر ليوم بطوله و أول ما روحت كتبته علطول علشان منساهوش ) ..
أنتهى
---
ملحوظة : طبعاً حيخرج علينا الملحد السكروتة يقولك الكلام ده اونطة و ما يساويش بصلة لأن نبيل فاروق مقلهوش فى رويات عبير و حيخرج علينا الملحد ابو كيكة و يقولك أنا كمثقف تنويرى و صاحب رؤية بقول نفس الكلام و ده كلامى و حيلغى خالص انه ضد الدين او انه بيحاربه و يخبرك أن السقط فى الحساس و المشط فى الترمسة و إن ده نظام ضرب و الضرب عالى أوى .......
---
لا أعلم لماذا تذكرت كل هذا بعد الهيصة التى نشئت فى موضوع ظهور العذراء .. لا غالب و لا مغلوب .. رغى فقط الى الأبد
على العموم .. كل سنة و المسلمين طيبين بعيد الأضحى و كل سنة و المسيحيين طيبين بأعياد الكريسماس .. و السنة الجديدة يارب تكون سعيدة علي الجميع . و كل سنة و كلنا طيبين .



8 comments:

Alkomi said...

انا كملحد ,انا كتنويرى , انا كمثقف , انا كصاحب رؤية علمية , انا كأبو كيكة , أنا باخد فيها

احيه يابو سوسو

ده يا رامز مش ملحد

ده كافر بدين

===========================

في حاجة غريبة

هناك تاثير ما لسورة الاسراء في القرآن موجود هنا

اصل السورة اسمها الاسراء و بتتكلم آيتين بس عن واقعة الاسراء والباقي عن بني اسرائيل

انت برضه سطرين تلاتة و في الكروتة اتكلمت عن الظهورات

و الباقي عن الملحدين

Alexandrian far away said...

أنا متفق معاك يا كومي في الجزء الأولن لأنه فعلا الأغلبيه الساحقه ممن يسمون الملحدين هم مجرد كفره

وأتفق معاك في الجزء التاني أيضا، دي طريقة رامز كلاهوتي وهي طريقه معتمده بين رجال الدين ، وضع القليل من الماده الفعاله وسط طن من الماده المالئه

عين فى الجنة said...

بغض النظر عن حجة الاخ المتفلسف التى ساقها عن الله حيث وردت فى كلامك بدون برهان يعزز عقيدته
لكن تحليله لدور الدين فى التاريخ ودخوله كمؤثر رئيسى فى مجريات الاحداث مقبول جدا، والاعتراض الوحيد هو افتراضه للصراع بين الدين والعلم واحتسابه للعلم كأنه مبرر للكفر بالله مع ان العلم ما هو الا نظريات تفسر الكون و قابلة للنقض والتغيير
وكل عام وانت طيب

على باب الله said...

" قليل من الإلحاد يُصلح الدين "

أبوفارس said...

أولا..حمدالله بالسلامه
ثانيا..ظريف قوى الأخ الملحد النوع التالت ده لقيته فين ده..معرض الكتاب ..؟؟فيه منه على بنى عشان يمشى ع الطقم الجديد..؟؟
اول مره اسمع أو أقرء عن ملحد بيمارس ألحاده فى السر كده وعايش فى سلام مع كل البشر والديانات والأفكار ولا كأنه أستاذ يوجا وصل النيرفانا..أفهم أن ملحد مالوش مشكله مع الآله لأنه لايعتقد فى وجود آله..أما أنه سعيد بكل أشكال وألوان المؤمنين فدى جديده عليا..وقابل لكل أفكارهم ومعتقداتهم دى شيك جدا..يعنى ملحد موافق على أقتناعك بظهور العذراء..وسعيدبآخر مؤمن بأن أرمسترونج سمع الأذان وهوبيتمشى على القمر..ولاأعتراض له على تالت مؤمن بشرب تمثال راما كريشنا الرخامى لللبن الحليب
جميل..التدوينه كلها ياباشمهندس مصادره على النقاش فأى "ملحد" يحاول مناقشه غيبيات الدين -أى دين- حضرتك حتصنفه على النوع الأول اللى بياخد فيها..سواء كان دوكينز أو ديرك أو حتى مدون مثل بن كريشنان يبقى لاداعى للنقاش ولاللحوار وقل لى بارك الله فيك أيه الزمالك عامل إيه..؟؟
تحياتى ومودتى..خالد

عباس العبد said...

الكومى
سورة الأسراء إيه يا عم ؟
طبعاً مش مقصود و لا جه فى بالى و لا أعرف من اساسه
متخلناش فى حاجات مفهمش فيها
===
اسكندرانى
ما هو انا مقدرش اديك المادة الفعالة " سيك " من غير وسيط
حتبقى تقيلة عليك .. ههههههههههه
===

عباس العبد said...

راجى
هو قال حجج و كلام و شرح و أسباب كتير بس الفكرة انى مذكرتش الحديث كله و لا النقاشات كلها لأنى مش بعرض وجهة نظر الألحاد قد ما عايز اقول أن فى ملحد " فاهم " و بيقول كلام " مفهوم و محترم و عيال بنت كلب عمال توش و تجيب صداع و هى أصل معندهاش حتى كلام مفهوم .. شتيمة و قلة ادب و على الفاضى فى الأخر
انا مكنتش بعرض وجهة نظر الملحدين فى موضوع الظهور
قد ما بعرض وجهة نظرى انا فى الملحدين
فهمت قصدى ؟
===

على باب الله
قليل من الالحاد يصلح الإيمان
my favourite quote

عباس العبد said...

ابو فارس
الله يسلمك
مين قالك انه مش غاضب او بيمارس الحاده فى السر او متقبل كل شىء كما عرضت ؟
هو غاضب و ثورى و معروف .. بس حضرتك عارف انى لا أكتب اسماء و لا أعلن عن شخصيات .. مجرد فكرة عامة
انا لطفت الحوار و الحديث و نشرت الكلام و هذبته و وضبته لأنى كنت عايز اقول حاجة معينة
هو مثقف و صديق و اعرف 2 و 3 تلاتة كده و معندهمش مشكلة انهم يكونوا أصدقاء ل" متدين مثلى " .. طبعاً له أعتراضات .. بس زى ما قلت لأستاذ راجى .. انا مش بعرض وجهات نظرهم قد ما بعمل تصنيف ليهم .. زى ما بيعملوا هم تصنيف لل" متدينين " اللى زىّ .. غير أن كلمة بصلى و بصوم ما تكسفنيش و انا مش بستعر انى مسيحى كاتوليكى
فهمت قصدى
بما انك ذكرت شخص زى بن كريشان فبواحد زى بن كريشان بحس انه كان عايز يبقى خمورجى و بتاع نسوان ( اعتقد انه كتاباته واضحة ) و الدين مقيده .. فقرر يلحد و فى ناس بتقبل الأخر
فهمت قصدى ؟
الزمالك كسب بترول اسيوط 3 صفر تقريباً
و كل عام و انتم بخير