Wednesday, February 22, 2012

الطريق الى مصر عتيقة


عندما تعرف بوفاة والدتك فى المستشفى، ينبغى عليك تجهيز الأتى:
متعيطش. جهز عدد 5 اظرف بيضاء. بقية حساب المستشفى. عدد 2 صورة البطاقة لوالدتك المتوفية وعدد 2 صورة لبطاقة المبلغ وده لمكتب الصحة لأستخراج تصريح الدفن. تنزل بنفسك تحجز الصندوق الخشبى (ويكون شيك وعليه صليب كبير علشان فى ناس بنت كلب بتبص للحاجات دى وبتقول ده مستخسر فى امه صندوق حلو!!!). كلم ابونا علشان يفتح الكنيسة تانى يوم للخارجة (ده اول ظرف حتحط فيه فلوس)، واتفق معاه انك حتحجز القاعة بالليل علشان العزاء (تانى ظرف)، وتحجز الكنيسة تالت يوم علشان صلاة التالت صلاة صرف روح الحزن (تالت ظرف). روح يا اما لجورج عزيز او طواف تحجز العربية (متنساش تاخد نمرة السواق علشان بيتأخروا).
تانى يوم انزل روح المستشفى من بدرى (على اساس انك نمت يعنى !!!!)، خلص حساب المستشفى علشان يدوك الورقة اللى حتعمل بيها تصريح الدفن (ومفيش حاجة اسمها معلش بعد الدفن اكملكم بعد كده !!!)، خد ورقة الوفاة واطلع على مكتب الصحة اعمل تصريح الدفن (ب20 جنيه). صور تصريح الدقن 4 نسخ. ارجع المستشفى تانى واديهم صورة. متنساش تاخد معاك سبحة وكتاب الصلوات اللى بتحبه امك واحسن فستان عندها كانت بتحبه علشان بعد الغسل تلبسهلها. اوعى تعيط علشان انت راجل ولازم تستحمل. بعد ما تخلص ده كله اتصل بالسواق اللى اتاخر عليك علشان تستعجله فيقولك الطريق واقف. متقفش معاه لأنه ملوش ذنب. اول ما ييجى اتأكد انه معاه الكفن والبرنس. بعد ما تحط والدتك فى الصندوق الشيك ومعاها كتاب الصلوات فى العربية، اجرى هات عربيتك علشان تمشى وراهم لغاية الكنيسة. اول ما توصل الكنيسة (متنساش تسلم ال3 اظرف للسكرتير زى ما اتفقنا) وتحط الصندوق قدام الهيكل على الترابيزة علشان الصلاة، اقعد صف اول. استمع للصلاة بتركيز شديد (علشان ماحدش يقول انك مش بتحب امك وسرحان عيب !!!!). ابونا حيفكرك فى كلمته بأن امك ست صالحة (على اساس انك نسيت !!!) وانها مع القديسين وفى حضن الأباء ابراهيم ويعقوب فى ملكوت الرب وانها تركت ذرية وخلف صالح يرفعوا اسمها (اوعى تفكر بأن لماذا لا يموت ولاد الوسخة علشان عيب تشتم فى الكنيسة). اوعى تعيط علشان انت راجل ولازم تستحمل. اول ما يخلص الصلاة،  اجرى على باب الكنيسة علشان تاخد العزا من اللى بيحبك واللى بيكرهك، من اللى بيحترمك ومن اللى بينافقك، من اللى جاملته قبل كده ومن الناس اللى متعرفهمش. خلص العزا واجرى على عربيتك واطلع ورا العربية اللى فيها الصندوق علشان تتطلعوا على المدافن قبل الغروب. اوصل للمدافن، افتح المدفن ودخلها بأيدك للتربى يستلم منك الصندوق وانت بتسمع صويت الناس اللى حواليك. اوعى تعيط علشان انت راجل ولازم تستحمل. بعد ما تخلص الدفنة، اجرى على باب المقابر علشان تاخد العزا تانى فى والدتك. استحمل الناس اللى حتتخانق معاك علشان انت مستنتش الاوتوبيس اللى جايب بقية الناس اللى كانت عايزة تشوف الصندوق وهو بيخش التربة. متستغربش علشان فى ناس حتتخانق معاك. خد عربيتك واطلع جرى على البيت علشان تاكل لقمة تصلب طولك زى ما كل الناس بتقولك (على اساس انك عندك نفس تاكل وتشرب وخصوصا انك ما اكلتش من امبارح !!!!). اقعد الساعة دى وانزل على الكنيسة وانت رايح متنساش تجيب بن وسكر وشاى وكراتين مياه علشان المعزيين بالليل. اقف مركز وفايق واحفظ مين الناس اللى جاتلك كويس (علشان تبعتلهم الكارت بتاع الاربعين) علشان لو نسيت حد ممكن يزعل منك. متستغربش علشان فى ناس بنت كلب بتزعل. استحمل كل واحد داخل ويفكرك بأنه ابن عم مرات خال والدتك او زوج ام بنت عم والدتك، او جار جدك فى العمارة اللى كان جدك ساكن فيها من 30 سنة. واستحمل كل بارد منهم بيقولك انه زعلان انك نسيته (المفروض تبقى مركز كويس لأن ده عزاء والدتك !!!!). اول ما ابونا يبتدى كلمته فى القاعة، اقعد واسمعه وهو بيفكرك تانى بأن والدتك احسن ام فى الدنيا وان فقدها شىء صعب !!! وان الرب يعزيكم !!!. اوعى تعيط علشان انت راجل ولازم تستحمل. بعد ما تخلص الليلة دى حتكون حكيت اسباب الوفاة 300 مرة كل مرة لشخص يقعد جنبك يقولك إيه اللى حصل دى كانت زى الفل زى ما شفها اخر مرة من 5 سنين!!!. وبعد ما كل واحد يقولك استريحت ويقوم ويمشى اوعى تقول لماذا لا يموت ولاد الوسخة وانت باصصله (عيب طبعا انت فى إيه ولا فى إيه). حتكون سلمت على ناس متعرفهمش، جيران واصحاب واصدقاء وناس جاية تجامل خالك وخالتك وياخدوك من ايدك تسلم على ده وعلى ده وعلى ده (ركز ركز اوعى تتعب او تتخنق او تعيط ده مش حقك). لو حد جه وحضنك وعيط على والدتك لأنها كانت انسانة عظيمة وعزيزة على الكل، انت اوعى تعيط معاه علشان انت راجل ولازم تستحمل ( لأن العياط من حق الجميع الا انت)... خلص وادى الظرف الرابع للواد اللى عمل الشاى والقهوة والميه اللى وزعها على الناس طول العزاء.
فى التالت ، اصحى بدرى (ده لو نمت اصلا علشان بتوع الصعيد وصلوا وحيفضلوا طول الليل يعيدوا ويزيدوا فى سفالة الطب والأطباء) وروح هات الفطار (كرواسون وباتيه وساليزونات وباتون ساليه) واطلع على الكنيسة وبعد ما يخلص ابونا الصلاة وبفكرك بأمك تالت مرة (طبعا انت عارف اوعى تعيط علشان انت راجل ولازم تستحمل). والناس بتاكل فى الاكل اللى انت جايبه بعد الصلاة، حتسئلك نفس الاسئلة فمتنساش تعيد نفس الحكايات اللى حكيتها امبارح لنفس الاشخاص عن وفاة والدتك من غير ما قلبك يوجعك او حتى تعيط (الناس مابتزهقش من حكاية وفاة والدتك ، حظك كده بقى حتعمل إيه)... بعد ما تخلص، متنساش تدى الظرف الخامس للواد اللى حينضف القاعة. روح البيت استنى بقية المعزيين اللى حيقعدوا بكل برود لغاية 10 بالليل يسمعوا منك نفس القصة (اوعى قلبك يوجعك)..

خش نام علشان تستريح ... اه اسف قبل ما تنام نسيت اقولك:
عيط
عيك متتكسفش
عيط علشان دى امك
عيط علشان مش عيب انك تعيط على امك
عيط لأنها ام واحدة فقط هى امك
عيط لأنها ماتت وولاد الوسخة لسه مماتوش
عيط علشان هى اللى ربيتك
عيط لأنها امك اللى ماتت
عيط علشان كنت بتحبها ومش حتشوفها تانى
عيط علشان قلبك وجعك عليها
عيط علشان انت فقدت اعز عزيز عندك
عيط علشان ربنا يعزيك
عيط علشان تفوق وتستريح
عيط لأنك لازم تعيط
عيط وانت بتصلي لها وادعيلها انها تصلي لكم
عيط ... مامتك ماتت وقلبك وجعك عليها ومش حتشوفها تانى وهى عزيزة عليك
عيط علشان بتحبها ومش حتشوفها تانى
عيط...  عيط...  عيط... مش عيب تعيط على امك مش عيب صدقنى


عيط وبعد ما تفوق ، قووم اعمل اى حاجة ... او اكتب اى حاجة (زى ما انا كتبت كده) علشان تقدر تتماسك شوية ...

ربنا يعزي الجميع

الله يرحمك يا امى ... الله يرحمك



10 comments:

Sotouhi said...

ربنا يعزيك...كل يوم بنعرف و نتأكد أكتر إن الموت أعظم رحمة يديها ربنا للى يستاهلها...ربنا يرحمنا

بنت القمر said...

تعازي تاني.. ربنا يصبر قلبك..

بـت خـيـخـة وأي كـلام said...

ربنا يرحمها
مش عارفة اقولك ايه
فكرتنى بيوم وفاة والدي

ربنا يرحم موتانا جميعا

وعيط متتكسفش
عيط اوى
عيط علشان دى امك

واسال نفسك بصوت عالى زى ما انا بسأل نفسي دايما
لماذا لا يموت ولاد الوسخة

ربنا يرحمها ويصبرك

عمرو عزت said...

قلبي معك
عيّط

noren said...

ربنا يسكنها فسيح جناته ويلهمك الصبر ، لا أعرفك بشكل شخصى ولكن تقبل منى حضن انسانى وطبطبة

الازهرى said...

أدعوا الله تعالى
أن يرزقك الصبر والسلوان

راجى said...

تقبل تعازيى واسف على التأخير

محمد said...

أسف جدا على التأخير...خالص العزاء و جعلها الله مع القديسين

Hend said...

انا كنت بحب مدونتك زمان من اربع سنين، كانت بتسليني في بلد غربة باردة، كنت بعشق تدوينة جدك

اتخضيت دلوقتي اما اكتفت ان مامتك ماتت... حسيت ان امي ماتت تاني ونفس الاحساس رجع تاني يعصرني

ربنا يعزيك، هما بيقولوا كدا، ساعات هيعزيك، وساعات مش هتطيق الدنيا باللى فيها وهتكون عايزها هي بس

ربنا يعزيك اكتر وقت ممكن، ويجبر بخاطرك اكبر وقت ممكن ، ويساعدك وقت اما تكون مش محتاج اى شئ غيرها

Hend said...
This comment has been removed by the author.