Monday, February 04, 2008

كل يصلى لعجواه

هذه التدوينة طويلة شوية

....

اهداء

الى الرجل الذى وضع يده على قدميها

....

مريض

اعانى من ارتفاع فى درجة الحرارة

و التهاب حاد فى الشعب الهوائية

اطالع المدونات و اخبار العالم

اشرب شاى بالخوخ

اقرأ كتابا بعنوان " التاريخ و كيف يفسرونه "

....

قبل الاسلام

كان صانعو الالهة , ناحتوها , قد اخترعوا طريقة باقية حتى الان

حيث توصلوا الى اهمية الاله ... و هى ان يؤكل

كانوا يصنعون اله من العجوة يحملونه معهم للعبادة

لو حدث و نفذ الطعام ... و جاعوا

يظهر لهم الاله بعجوته كمخلص من الجوع فيأكلوه

اله كله منافع , يفيد فى الروحانيات - الصلاة

و يفيد فى الماديات – الطعام

....

ماذا يعرف الشارع المصرى عن النظام ؟

هذه الجملة تحتمل اكثر من معنى

و ممكن تفنيدها و تفسيرها كالأتى

المعنى الاول

المقصود بالشارع المصرى هو الشعب , و النظام هو الحكومة

اى

ماذا يعرف الشعب المصرى عن الحكومة ؟

المعنى الثانى

المقصود بالشارع المصرى هو الشعب , و النظام هو النظام و التنظيم و الانضباط

اى

ماذا يعرف الشعب المصرى عن الانضباط و الانتظام ؟

المعنى الثالث

المقصود بالشارع المصرى هى الشوارع , و النظام هو النظام

اى

هل الشوارع فى مصر منظمة مروريا و حركيا ؟

جملة واحدة تحتمل اكثر من معنى !؟

....

فى دراسة حرة قمت بها و كانت تسمى نقد

فى اول درس فى تلك الحلقات الدراسية

شاهدنا فيلم بلا صوت لمجازر يقوم بها شعب لأبادة اخر و التخلص منهم

و كانت مشاهد الابادة بشعة و تثير الشفقة و التعاطف لدرجة

ان بعض الفتيات الموجودات فى الحلقات الدراسية قد بكين بشدة

و بعد ان انتهى الفيلم , وقف المدرس يعرف رأينا

اندفع الجميع و هاجم الفيلم و لعن الحروب و اعلن غضبه

و انه يجب محاكمة هؤلاء الهمج على فعلتهم

لدرجة ان البعض طالب بموتهم و اعدامهم و التخلص منهم

و بعد استطلاع الرأى

اعاد الشارح الفيلم مرة اخرى بالصوت

ليفاجأ الجميع بان الفيلم اسرائيلى يحكى معاناة الشعب الاسرائيلى

من محاولات الفلسطينين للتخلص منه !!!

و ان هذا الفيلم كان يعرض فى الفترة ما بين 67 و 73 لأستدرار عواطف الغرب

كان الفيلم مركب بطريقة سينمائية جعلت الجميع فعلا يتعاطف فى البداية مع الاسرائيليين

و بعد نهاية الفيلم للمرة الثانية

وقف المدرس و سأل سؤال واحد

هل يمكن تطبيق هذه الطريقة على الثابت المقدس ؟

و قمنا بتطبيق هذه الطريقة على نص مشترك بين الثلاث اديان

و كان النص هو نص الخروج – خروج شعب اسرائيل من مصر

الثلاث اديان اتفقوا على ان هناك شعب اسمه بنى اسرائيل خرج من مصر

و جميع كتب التاريخ تؤكد ذلك و لكن .... !؟؟؟؟؟

تؤكد كتب التاريخ انه كان هناك خروجان

او بالاصح طردان من مصر

الاول مع الهكسوس 1552 ق.م

و الثانى بالهرب مع شخص يدعى موسى و كان الهرب نتيجة كوارث حلت بمصر

لا يعرف التاريخ الخروج كما نعرفه و لا يعرف شق البحر و لا غرق جيش فرعون

و بعد ان انتهينا من الشرح

شاهدنا فيلم عن اهمية الجنس قبل الزواج !؟

و اخر عن اهمية الاجهاض و طرقه السريعة و المريحه !؟

....

و لكن هناك لا معنى ,

فتلك الفتاة التى فى سن العشرين ,و التى ازورها فى المستشفى ,

مطلعة على حقيقة حالها : انها مصابة بالسرطان و ستموت بعد عدة اشهر ,

مع انها جميلة جدا و موهوبة , و كانت تتوقع مستقبلأ رائعا

فى نظرها و فى نظر الاقرباء , ان يحصدها الموت فى سن العشرين هو امر غير معقول و لا معنى له .

قالت لى " اتمرد " . لم استنكر تمردها , بل اجبتها " اتمرد معك " فتعجبت , لظنها انى سأقول لها ان التمرد خطيئة .

امام اللا- معنى , امام الا- معقول , التمرد موقف صائب

من كتاب فرح الايمان بهجة الحياة

محاضرات فى اهم قضايا الايمان المسيحى

الاب فرنسوا فاريون اليسوعى

......

يقف الدين عاجز عن تفسير بعض الافعال الاخلاقية

او بالاحرى لنكون اكثر دقة الافعال الغير اخلاقية

فنجد ان ابسط تعريف لفعل منافى للأخلاقيات

اصل الراجل ده , عديم الدين , عديم الاخلاق .

و بالتالى لا تندرج تصرفاته تحت بند الاطروحة الدينية

لأن باخراجه من ال" دين " لا ينطبق عليه بالبديهة ثوابت الدين

و يهرب المتدينون خارج المنظومة ليستريحوا من الشرح

ليحافظوا دائما على براءتهم و نقاء ضميرهم و سمو دينهم عن تلك الافعال

فحرارة ايمانهم و قوة صلاتهم تمنعهم من الانخراط فى صغائر هذا العالم

....

الجحيم هو الاخر

سارتر

لذا فأنا جحيمكم !!!؟

....

يعلن الرجل الذى وضع يده على قدميها , بفعلته هذه , و من كلام المعلقين

انه يعيد كتابة التاريخ المقدس من جديد

يعيد كتابة الثوابت الاخلاقية

يعلن عن طبائع جديدة غير التى الفناها و بردود افعال محيرة

يعلن بموقفه بان على البنت ان تصعد الى الاوتوبيس بدبوس او سكين للدفاع عن نفسها

فهذه هى الطبائع الجديدة للأشياء

لا يهب احد فى الاوتوبيس للدفاع عن فتاة تصرخ , لأن احدهم تحرش بها , لأنها هى المخطئة !

فهذه هى الطبائع الجديدة للأشياء

يقلل البعض من حالة التحرش تلك لأنها مجرد لمس لقدم ! و ان عليها انا تشكر الله ! لأنها لم يفعل اكثر من ذلك !؟؟

فهذه هى الطبائع الجديدة للأشياء

...

افهم ان رجل ياتى بفتاة ليل ليمارس معها الجنس

فهذا فعل اخلاقى و دينى حتى لو كان منافى للاخلاق و للدين

فالتضاد و النفى يعنى وجود الاصل او المصدر

فلا يمكن نفى ما هو غير قائم

لكن ان نعيد صياغة الخير و الشر , فهذه محاولة لأثبات وجود ما هو غير موجود

....

سيجد الرجل الذى وضع يده على قدميها من يدافع عنه

فهذه هى الطبائع الجديدة للأشياء

من يبرر له فعلته , كبت , انحراف , شهوة , هى الى غلطانة , وذة شيطان !.

فهذا اسهل من الدفاع عن فتاة , عن القيمة لانه اصبح خارجها

سيصنع الجميع اله من العجوة و فى وقت الجوع سيأكلوه

سيعيدوا كتابة التاريخ و نفى المقدس لأنه - المقدس - عاجز

فالمقدس او الثابت لا يستمد قدسيته الا من مصدره

فيخرج عليك ذوى العقل المنفتح ليقولوا لك , ان ما هو ثابت او مقدس عندك , متغير و غير مقدس عند اخرين و ان المفاهيم تختلف من ثقافة الى اخرى , و من عادات و تقاليد معينة الى اخرى , و ان المواقف و الاحداث و تحليلها تختلف من مرجعية و منهجية الى اخرى ... توازنات فكرية .., صحيح ؟

...

تمر على المدونات الان فتجد

الجميع يدافع عن " غزة " , حتى ان البعض كتب عن رحلته الى قلب غزة

او كما كتب البعض رحلتى الى قلبى , فغزة هى قلبه ! .

فهؤلاء , الذين يصنعون المجد , ذوى العقل المنفتح , يكتبون تاريخنا بضمير الغائب

يصنعون نجاحا هناك بعيدا , و ينتصرون فى معارك انتهت ,

هم فرسان فى ساحات خالية , امجاد لماضى انتهى .

....

فالوصية " لا تقتل " تبقى وصية مهما كانت الظروف و الاحوال ,

و القتل يبقى شرا , حتى اذا شعر الانسان بواجب الوجوب الى القتل .

غير ان الانسان لا يستطيع دوما ان يبتعد عن العنف , فيستسلم لحيثيات القدر ( فى الطب )

او لتسلط الحكم القائم ( فى السياسة ) , بحجة ان القدر يمثل ارادة الله , و الحكم القائم يمثل سلطة الله , فأرادة الله ليس ان يستسلم الانسان للقدر بل يمارس المحبة , و الله لا يؤيد الحكم القائم الا متى كان هذا الحكم عادلا . فالله محبة , و الله عدل .

فالمهم فى رأيه ليس التحاشى عن العنف للمحافظة على البراءة و نقاوة الضمير , بل تحمل المسئولية و ممارسة المحبة , حتى اذا الجئتنا المحبة الى العنف .

تعليقا على هذا النص يرى مولتمن ان " ما هو مطابق للانجيل ليس مبدا اللاعنف ذاك المبدأ المثالى , بل عمل المحبة المسئولة " فالمحبة التى تشعر بمسؤليتها فى العمل السياسى تتجرد فى ذاتها الى حد انها تضحى ببراءتها و تقترف الذنب

و يخلص مولتمن الى نتائج ثلاث :

الاول :

اللاعنف , بمعنى اللا-مقاومة , مسئولية يستحيل القبول بها فى حالات الطغيان و الظلم , لأنها تحبذ العنف القائم , و لا تحفظ للانسان براءته الشخصية , بل تقود الى ذنب اسوأ

الثانى :

عمل عنف يتمم عن محبة و بهدف القضاء على الشر , لا نستطيع ان نبرره بمعنى اننا نعتبره عملا مقدسا , و لكن يستطيع الانسان ان يقبله بمسؤوليته . فالعنف لا يمكنه الابتهاج ازاء ضحاياه , هذا من شأن الثأر فحسب , لا من شأن المحبة . و الذنب يبقى ذنبا . غير ان الايمان يعطينا ان نحيا فى هذا الشعور بالذنب دون ان نلجأ الى الانتحار . و الالتزام بالعنف و المقاوة يبقى التزاما مرا . و لكن لابد من التذكير بان الذنب الناتج عن المحبة المسؤولة لا ينتج فقط فى حال العنف , بل فى كل عمل سياسى يقوم به الحكام او يسهم فيه المواطنون

ثالثا:

ليس سواء ان يعمل الانسان او لا يعمل , بحجة ان الذنب يلحق به فى كلتا الحالتين , فالذنب الاسوأ يكمن فى اهمال العمل و التخلى عن المسؤولية

من كتاب ... مدخل الى اللاهوت الادبى

الجزء الاول ... المطران كيرلس سليم بسترس

....

نخرج من الدائرة الصغيرة

تستطيع نفس الجملة بنفس ترتيب الكلمات ان تصنع معانى كثيرة ,

و فيلم مصنوع بحنكة ان يجرف مشاعر كثيرين الى مصب مختلف عن الحقيقى .

نستطيع ان نلوى الثوابت و نخفى الحقائق .

نصنع مجد من لا شىء و لا شىء من المجد .

نهب لنجدة من هو هناك و نكافىء المخطىء هنا .

نصلى بحرارة متى احتجنا , و نجوع فنأكل لمن صلينا

نعلن ان هذا قدرنا و لا يمكن تغيره بل المفضل للعقل , و الاسهل, التماهى معه , ان نعيد صياغة الخير و الشر بما يتناسب مع الموقف , لا ان نقرر اذا كان الموقف هو خير ام هو شر .

....

لذا , فكما قلت , هذا الرجل الذى وضع يده على قدميها

يصنع مجده الشخصى , يخلد ذكراه , يعيد صياغة التاريخ

يسطر قدر امة , و يحدد مستقبل جنس بأكمله

ففى المستقبل ستترحم البنات على ايام التحرش

اذ سيكون الفعل المباشر هو الاغتصاب

سيأتى يوم تقول فيه الفتاة و هى تلطم و تبكى

يا ليته تحرش بى فقط ... و لم يغتصبنى

يا ريته كان قضاها بوس و تحسيس بس

و سيخرج علينا صانعو المجد , ذوى العقول المنفتحة , المثقفون

فرسان الساحات الخالية , منقذو غزة التى هى فى القلب !

بتفسيرات للواقع الجديد و صياغات جديدة للخير و الشر

و سنعبد الاله بمزيد من الحرارة و ناكله عجوة بمزيد من النهم

و هكذا ستتطور الصياغة و تتقدم مع تقدم العصر

حتى ...

حتى يأتى اليوم

الذى ستكتشف فيه ان مؤخرتك قد اصبحت ملكية عامة بحكم الصياغة

و بحكم ان الخير للجميع !

و ان غزة لاتزال فى القلب !!!!

59 comments:

Unknown said...

عزيزي عباس
أنا فاهم - أو هكذا يُهيأ لي- للفكرة العامة .. لكن ما العيب فيمن يرى غزة في القلب .. بس بدون مغالاة أو مزايدة بلهاء.. أو سرقة تبرعات جُمعت بإثارة مشاعر الناس واستحلاب جيوبهم بدعوى النُصرة .. عارف ليه احنا حالنا منيل وها يفضل كده؟ .. عشان احنا ناس هايفة .. شوف الفانلة بتاعة ابوتريكة عملت ايه .. ميت بوست وتعليق والناس بقت معلقاها زي "وسقاهم ربهم شراباً طهوراً" اللي تلاقيها في محلات عصير القصب

بعيدين ليه مقولة سارتر - الكريهة على نفسي دي- بتطبقها على نفسك .. ممكن تفسير ؟.. بعد اذنك

وع العموم غزة في القلب .. أحسن من نانسي في القلب
وكلها قلوب يا عم عبااااس

المهم الأفعال

ويارب ميجيش اليوم اللي انت تخيلته ده

رب يوم بكيت فيه
فلما تذكرته بكيت عليه

ولعنة الله على الطبائع الجديدة للأشياء

karakib said...

و هل لم يأت بعد هذا اليوم الذي سنكتشف فيه أن مؤخراتنا اصبحت ملكية عامة ؟ تفتكر لسه ما جاش !؟ مش بحكم الصياغة فقط ده بحكم الصياغة و الواقع و بأحكام كثيرة اخري قد تجعلها الصياغة احيانا متضادة و لكن عليك أن تتقبلها لأن هذا اليوم أتي مرارا كثيرة حتي من قبل أن نولد
--------------------
لا يهب احد فى الاوتوبيس للدفاع عن فتاة تصرخ , لأن احدهم تحرش بها , لأنها هى المخطئة !
فهذه هى الطبائع الجديدة للأشياء
--------------------
يا عباس منذ فترة ليست بقريبة تم اغتصاب فتاة في ميدان التحرير علي يد اربع رجال ... علي ما اتذكر كانت من حوالي 12 سنه ... و كان في عز الضهريه
-------------------
الاخلاق و المباديء لا علاقة لها بالدين في الاساس ... لأنه الذين ليس لهم ناموس هم ناموس لأنفسهم
يعني الانسان بيتولد فاهم ما هو الصح و ما هو الخطأ ... صحيح في نسبية في الصح و الغلط من مجتمع لأخر
لكن النسبية لم تصل ابدا لحدود التحرش اللفظي او الجسدي او ايا كان نوعه
-------------------
تعليقا على هذا النص يرى مولتمن ان " ما هو مطابق للانجيل ليس مبدا اللاعنف ذاك المبدأ المثالى , بل عمل المحبة المسئولة " فالمحبة التى تشعر بمسؤليتها فى العمل السياسى تتجرد فى ذاتها الى حد انها تضحى ببراءتها و تقترف الذنب
------------------
تذكرت من هذا المقطع الذي اوردته في تدوينتك
نفس الفكرة التي انتشرت في السينما الامريكية لفترة من الزمن عن فتاة الليل ذات الملامح البريئة التي تفعل الفحشاء لكي تأكل أو تصرف علي صغارها الجائعين الي اخره
حلو جدا مبدأ التماس الاعذار للناس و عدم ادانتهم لكن التمادي في هذا بهذه الطريقة سيجعلنا نبرر كل ما هو خطأ و نظهره في صورة قد تجعل الخطأ صحيح
و الصحيح خطأ و نقع في الحيص بيص
و نسبية الصح و الخطأ ... متاهة من الافكار و الفلسفات التي لن تعالج الاوضاع القائمة ابدا
----------------------
اما عن الفيلم الذي عرض بدون صوت و اثار تعاطف الغرب ... ففي رأيي انه يعلم شيء اخر تماما بعيدا عن العواطف
يجعلنا لا نتسرع باصدار الاحكام ما دمنا لا نري الحقيقة الكاملة .. هو مجرد فيلم ... علي الاكثر ساعة او حتي ساعتين ... اما عن الباقي فلم يراه احد ... و هنا بنقع في مشكلة و متاهة تانيه .. هل تم تصوير مذابح اسرائيل للفلسطينيين ؟ و هل اذا وجدنا افلام اخري تصور هؤلاء الذين ذبحوا و هم يذبحون ايضا
سنتعاطف مع من ؟؟
----------------
اصل الراجل ده , عديم الدين , عديم الاخلاق .

و بالتالى لا تندرج تصرفاته تحت بند الاطروحة الدينية

لأن باخراجه من ال" دين " لا ينطبق عليه بالبديهة ثوابت الدين

و يهرب المتدينون خارج المنظومة ليستريحوا من الشرح

ليحافظوا دائما على براءتهم و نقاء ضميرهم و سمو دينهم عن تلك الافعال

فحرارة ايمانهم و قوة صلاتهم تمنعهم من الانخراط فى صغائر هذا العالم
------------------
ارد عليك بمقطع من رواية ل د.علاء الاسواني
يقاتل الجندي أعداءه بضراوة, يتمنى لو يفنيهم جميعا ... لكنه إذا قدر له مرة واحدة أن يعبر إلى الجانب الآخر و يتجول بين صفوفهم سيجدهم بشرا طبيعيين مثله, سيرى أحدهم يكتب خطابا لزوجته, و آخر يتأمل صور أطفاله, و ثالثا يحلق ذقنه و يدندن ... كيف يفكر الجندي حينئذ؟ ربما يعتقد أنه كان مخدوعا عندما حارب هؤلاء الناس الطيبين و عليه أن يغير موقفه منهم
و في رواية تانيه كان فيها دعاء الجنود
مش فاكر اسمها اعتقد انك هاتكون عارفها
الدعاء علي ما اتذكر كان بيقول
يا رب يتم اطفالهم و اقتل نسائهم و ثكل امهاتم ... هذه الرواية التي رفض فيها الجنود أن يدفنوا لأنهم لم يكونوا يريدوا أن يموتوا او يحاربوا من الاساس !
و هنا بقي نرجع تاني لنقطة أنه الحقيقة لم تكن كامله امام اي من الطرفين
يبقي المشكلة انه الحقيقة الكاملة ليست واضحة ؟
ام ان الناس كما قالت المدونة نيرفانا في احدي تدويناتها تعتبر الدين هو الحقيقة المطلقة و ليس السبيل الي الوصول الي الحقيقة؟
----------------------
عموما تدوينتك عامله زي المتاهه وانا باقراهاو كلها افكار فلسفيه متداخله و اضطريت اقرا مرتين لكن ما فهمتش انت عايز تقول حاجه او حاجات و لا بتطرح تساؤلات
------------
عارف قصة الفيل اللي كان في اوضة ضلمة و دخلوا عشر رجالة عليه كل واحد مسك منه جزء غير التاني
فلما خرجوا اللي مسك الودن قال مسكت قطعة جلد رقيقة و اللي مسك رجله قال مسكت جذع شجرة و اللي مسك راسه قال دي صخرة متوسطة الحجم و قعدوا يتخانقوا مين فيهم الصح .. و محدش رضي يسمع الباقيين علشان يتوصلوا الي حقيقة انه كان فيل ؟ انا حاسس انه التدوينه دي بتحكي كل واحد شاف ايه و علينا أن نجمع كل هذه الرؤي المختلفه لنكتشف انه حل الفزورة هو الفيل ... انت قصدك الفيل مش كده ؟ هو الفيل فعلا
----------------
نهارك زي العسل

Alexandrian far away said...

عزيزي رامز
أولا الف مليون سلامه وأنشالله يا رب الوحشين ألي يكرهوك

ثانياما يهمكش طول التدوينه أحنا متعودين على نفسك الطويل والحقيقه أنها تعتبر قصيره بالنسبه لما أعتدنا منك، يا راجل ده أنت ليك ردود على مدونات بالصفحتين والتلاته
المهم
كالعاده يا رامز تبحث عن الأجوبه في الدين، الصراحه أنا لا أؤمن بأن الأديان السامية الثلاثة قادرة على منح أي أجابه على أي تساؤل
والحق أقول أن أسطورة الإله العجوه- وهي أسلامية الأصل- غير حقيقه على الإطلاق وأستعملت للتشنيع على الوثنيين
حرب أعلاميه
موضوع التحرش بقى
الحقيقه كنت لا أفهم جريمة الأغتصاب حتى علمت أنها تعتبر جريمة عنف وليس جريمة جنسيه، فالهدف من الأغتصاب والتحرش هو ممارسة العنف، أو هو نوع من ممارسة القمع ضد الأخر
أعتقد أنه يجب تحليلها بشكل أكثر تعقيدا

غزه بقى يا سيدي
تسمح لي بسؤال غلس؟
لاحظت أنت وجود أشاعه مغرضه سخيفه قوي كده أنه المسيحيين المصريين غاضبين من موضوع غزه ده ومش راضيين عنه؟
على اعتبار أنهم يعني اصحاب البلد وأن المسلمين الرعاع أحفاد العرب الغزاه مش من حقهم يعملوا كده
ألا صحيح الكلام ده يا رامز؟

تحياتي يا صديقي والف سلامه

عباس العبد said...

انونيموس
شوف يا سيدى
المشكلة تكمن فى انه كل مرة بنبرر للمخطىء يعنى البنت لو ركبت الاوتوبيس
و حد حاول يتحرش بيها حيقولولها انتى غلطانة علشان انتى محجبة ,
و لو محجبة حيقولوها انتى غلطانة علشان مش منقبة ,
او ده مش حجاب يا بنتى لازم تغطى جسمك خالص ,
او انتى غلطانة ايه الى راكبك متأخر؟ كده و انتى مروحة ,
و لو ركبت الضهر حيقولوها ما انتى عارفة انه زحمة بتركبى وسط الرجالة ليه ؟,
و لو ركبت و قعدت حيقولوا قعدت جنب رجالة ليه,
انسى فى اى حال حيغلطوها
...
اما المشهد الى انا خايف منه
انك تطلع الاوتوبيس و انت لابس الكوفية الفلسطينى و تى-شيرت مكتوب عليه غزة فى القلب , تلاقى الناس واقفين صفوف بيهتفوا بسقوط اسرائيل و على الكنبة فى اخر الاوتوبيس واحد بيغتصب واحدة و هى عمالة تستنجد و الناس يبوصولها و يقولوا لبعض " ايه الى ركبها فى عز الزحمة , هى الغلطانة " و بعدين يدوروا و يكملوا هتاف بسقوط اسرائيل
و بعض ما تشوف المنظر ده الدم يغلى فى نافوخك فتسب للناس و تختلف معاهم ايديولوجيا و تهب لنجدة الفتاة بأنك تسيبها و تنزل الشارع و تدعو لمظاهرة مناهضة لزحمة الاوتوبيس الى اوصلنا الى هذه الدرجة و تهتف بسقوط الاوتوبيس
هو ده التجديد الثورى الى بيدور عليه المثقفين
....
انا مش شايف اى عيب فى ان غزة فى القلب بالعكس انا مؤيد للى عملته نقابة الاطباء بأرسال عربية مليانة ادوية و الى عملته وزارة التموين بأرسال عريات تموين
لكن كل الى حقولهولك
لف على المدونات الى بتتكلم عن غزة و شوف غضبهم و اتهامهم لناس كتير بالرجعية و شوف التقدمية الى هم بينادوا بيها و ازاى اتصرفوا
فى واحد منهم كل الى عمله انه صور غزة من جوه بس و قال انه هو ده الصح الى المفروض يتعمل
لولا انى مبحبش ذكر اسماء
كنت حطيت لينكات

عباس العبد said...

كراكيب
شوف يا سيدى الى انا اقصده بصراحة
هو البحث عن القيمة
انا ميفرقش معايا الدين يرد او لأ , او ان الاخلاق داخل او خارج الدين
دى مسائل ثانوية
المقصود القيمة
انت قريت الردود عند بلو
كلهم اعتبروا الحدث عادى لدرجة انه كان فى نصيحة بانها تاخد دبوس معاها
و لكن فى نفس الوقت هبوا لنجدة غزة
بنحبك يا ابو تريكة
فهمت قصدى
...
انت بترد على المطران سليم بسترس بفكر من الافلام الامريكانى
عايزنى اتشل
هههههههه
المهم
فكرة مولتمن كانت بتكلم عن وصية واحدة و هى لا تقتل لأنه كان بيتكلم عن الثورة ضد الظلم و ان الثورة ضد مبادىء المسيح من ضربك على خدك الايمن
فهو بيقول لأ الثورة مطلوبة حتى لو ليها ضحايا لأن الله لا يرضى بالظلم
رغم انه ممكن يكون فيه ضحايا مما يخالف وصية لا تقتل
ابقى اخليك تقرأ الكتاب حجيبهولك
لانه جامد جدا
...
الجملة الى انت اوردتها
" متاهة من الافكار و الفلسفات التي لن تعالج الاوضاع القائمة ابدا
"
هى دى النقطة الى انا بقولها
بنرد على فكرة بفكرة افشل
نقاش مثقفين عقيم
راجع الى انا كتبته لأنونيموس
الثورة و الثورة المضادة بدل ما يهبوا لنجدة البنت , حولوا الموضوع لخلاف ايديولوجى
فى حين ان القيمة واضحة و باينة
انت الوحيد فى الرد عند بلو عمل حاجة صح
مين الكلب ده ؟
هو ده الصح
اقرأ الردود تانى و انت حتفهم قصدى
الباقيين قعدوا يبرروا و يهتفوا و يفتكروا الى حصلهم
عملية تنظير فى حين ان الموقف عايز شتيمة و واحد يقوم يضرب الحيوان ده
بس
ساعتها حيبقى مبرر انه نهب لنجدة غزة
لأنه طبيعى انه عندنا نخوة
لكن
مفيش و كمان بنختلف ازاى نقف جنب غزة
...
اما حكاية الفيل
فأنا حقولك تطور للقصة قاله سليمان فرنجية من لبنان
و رمانى من الضحك
بيقولك ايه يا سيدى
خمسة وقفوا قدام فيل و شايفين الفيل و كل واحد مسك حتة من جسمه
و طلبو منهم يوصوفوه
فكل واحد قال رأيه
حيوان ضخم و له خرطوم طويل و انياب طوال من العاج و ودانه كبيرة و رجله ضخمة و جلده سميك جدا
بس
ما هو فيل !
يبقى ايه؟
الخمسة وصفوا الفيل و هم شايفينه
بس ايديولوجيا
ما هو فيل!!
هو ده الوضع العربى
احنا واقفين قدام الفيل
بس ما هو فيل

عباس العبد said...

اسكندرانى
الله يسلمك
انا اولا عايز اعتذرلك
ليه ؟
علشان انا مكنتش فاهم سؤالك لكن دلوقتى فهمته
انا فعلا كنت فاهم الامور بسطحية
كلامك صح
هههه
...
يعنى اسطورة الاله العجوة طلعها ناس بعد الاسلام علشان يشنعوا على ما قبل الاسلام
يعنى العقل المؤمن هو الى طلع نظرية العجوة على العقل الملحد
ده تاكيد لنظريتى
يعنى المؤمن هو من فكر فى العجوة
هههه
...
انا اول مرة اسمع منك ان االمسيحيين غضبانين من موضوع غزة
بالعكس زى ما انا قلت انا مؤيد لموقف نقابة الاطباء ووزارة التموين
لكن انا لى وجهة نظر تانية زى ما قلت لكراكيب
...
انا مش بدور على تفسير من منظور دينى
لأن التاريخ و الدين تعارضوا فى قصة خروج بنى اسرائيل
لأنى انا قلت انه ما يملكش تفسير لحاجات كتير
انا كان قصدى
انه حتى الدين اصبح بيسمح بثورة على الظلم
فيبقى العقل الطبيعى مش حيسمح
يا راجل انت لو قريت الردود عند بلو
حتتشل
بينى و بينك انا مبحبش اخبط مع حد
خد جولة كده عند المدونين و بس على ازاى وقفوا جنب غزة
انت شفت الصور بتاعة ابو تريكة
غزة لن تنساك يا ابو تريكة
غزة مش حتنسى ابو تريكة لكن حتنسى نقابة الاطباء الى بعتت قوافل طبية
يا راجل يدوا للبنت دبوس تتدافع بيه عن نفسها
و يروحوا يهتفوا بسقوط اسرائيل
قولى انت اقول ايه ؟
اقول كلمة قبيحة

مريم said...

الراجل اللى معندوش دين معندوش اخلاق

الناس اللى قالت الكلام ده قبلنا دول ناس فاهمة جدا لان ببساطة الدين هو الداعم الاول للاخلاق

...
احنا بناخد كل حاجة بشكل عاطفى
دى كانت مشكلة الشرق المتخلف وللاسف الغرب حصلنا فيها وبقت نظرته لينا عاطفية وتحمل مشاعر الكراهية حينا والخوف احيانا
يعنى مش غريب نتكلم عن غزة كده
ونظامنا يتعامل بالشكل الفضيحة ده ويبقى شكله وحششششششششش اوىىىىىىىى ويطلع يتكلم عن الانسانية وهو بليد ووقف عاجز عن مساعدة الناس بما فيهم طبعا ناسنا اللى فى سينا اللى اتسوحوا

...
شوف ..فى حقيقتين مسيطرين على مشاعر الناس فى اللحظة التاريخية اللى بنعيشها دى
انهم بيكرهو اليهود وانهم مفقوعين م الحريم
انا مش بحب الكلمة دى بس قلتها لان المفقوعين شايفينا حريم
يمكن عشان اللحم رطرط والناس مكبوتة فاى بنت بقت محل اتهام فظيع
التشنج انتشر بشكل يخوف
وحكاية ان الدين بقى حقيقة مطلقة مش شبيل للحقيقة دى لوحدها معضلة
انك ترجع الناس تفكر مع ان ربنا خلقنا عشان نفكر
واول حاجة عملها مع ادم انه علمه
بس احنا بقينا نحب الشيوخ اللى يخوفونا او يبكونا او حتى يحسسونا اننا هنخش الجنة حدف مادام مسلمين
مع ان احنا مش عارفين حاجة جينا هنا عشان نفكر
ما هو ربنا مرساناش ع التيتة اصلا ..ده مجرد توجيهات وتحذيرات واسعى يا عبد

...
هنغير ايه بقى ولا ايه

karakib said...

انت عارف كلمة نقاش مثقفين عقيم دي بتعجبني اوي
في احيان كتير باحس انه المثقفين و اللي انا مش فاهم سموهم مثقفين ليه بس ماشي بيقعدوا يتجادلوا و ينظروا و يادلجوا النظريات و يتهموا بعض بوجود اجندات
عميله ما اعرفش ايه
لسه قريب كنت باقرا علي جروب في الفيس بووك بتاع اتجاه سياسي معين ... كلهم بيقولوا التقدمية و تسقط الامبرياليه و رز بالملوخيه ... كلام كبير لا طائل منه
علم السفسطائية ! و تفسير كل ما يحدث بأنه عادي و تقبل الامر بتحويره ببعض الكلمات مع انهم في النهايه مش هيتحركوا
الغريب بقي يا رامز انه الحل في انها تشيل دبوس او تضربه ما بين رجليه
يا سلااااااام
يعني سياسة الصدمات امتدت لحياتنا اليوميه .. بعد ما تحصل المشكلة بدل ما ندور علي السبب بنعالج النتيجه
في فرق ما بين العرض و المرض
العرض انه في واحد مد ايده علي واحده ليتحرش بها و ده اللي وصفوا له علاج
اللي هو دبوس
و المرض بقي مين يعالجه !؟ مش مهم
المهم انها تشيل دبوس و تتجنب ركوب الميكروباص و لو ركبت تبقي هي الغلطانة
لي صديق من شبرا بيقول لي مراتي ما تشتغلش علشان لو ركبت اتوبيسات مش عارف هيحصل لها ايه !! منطق متخلف طبعا
البحث عن القيمة اصبح شيء صعب جدا
لأنه اكيد اكيد ما ينفعش تسمع واحد جعان تشايكوفسكي و يقول لك الله مزيكا جميلة اوي
انت طبعا عارف انه جوجل تريندز عامله فضيحه في اننا اكتر الناس في البحث عن كلمة سكس !! و اكيد تعرف انه في ناس بتجيب دي اس ال علشان تنزل ده بس
المشكلة انه الناس هنا بتحب تتظاهر و تبين انها كويسة و زي الفل
و هما جواهم صراع رهيب
طيب ده برضه يعتبر عرض مش مرض
المرض بقي انه مافيش حرية حقيقية
و السبب في ده مش الحكومه كفايه بقي رمي غلطاتنا علي الشماعة دي
اي واحد اي واحد مننا عنده مشكلة موروثه انه لازم يحترم الناس بكلمة حضرتك و سيادتك و جنابك و هو من جواه بيسب لهم و ده مش طبيعي
كل واحد بيمارس سلطة وسطنا بيمارسها بشكل سلطوي مجنون ... لما يبقي مدير بيزعق و يشخط يقوله عليه مدير شاطر
لما يبقي أب بيزعق و يشخط يقوله عليه ده شديد بيعرف يربي
المشكلة في الرباية .. الناس مش متعودة تقول لأ
و مع الوقت لأنها متعودة تقول أه و نعم بدات تفلسف ده و تخش في السلسلة الغريبة بتاعة
اللي فوقي ابوسه
و اللي تحتي ادوسه
ادوسه بقي ازاي ... مش مهم ! ما دام حاسس اني اقوي منه يبقي و لا يهمني و لازم ادوسه بتحرش لفظي جسدي ايا كان
-----------
بالنسبه لغزة بقي
ده نوع من الكبت و التفريغ يعني اللي زعلانين اوي علي غزة و اللي بيحصل في اسرائيل كانوا بالاولي يزعلوا من اللي بيحصل هنا من غلاء اسعار و نقص حرية
بس تقول ايه
حرام علي بلابله الدوح .. حلال للطير من كل جنس
--------------
أنت قولت هاتديني كتاب اقراه
انا ما بنساش :)

Samir Saad said...

انا اتغويت بجد. دي أول زيارة ليّ وشكلها كده مش هتكون الأخيرة.

انت اتكلمت في مواقف كثيرة قد يربطها رابط هو حيرتي إزاءها وهي تحيا بداخلي.

على فكرة الآخر هو الجحيم. بالفعل أن يضع المرء في حسبانه وجود هذا الأخر الكيان المساوي، فهذا معناه خلق صراع فكري اشد حموة من الجحيم. صراع يحسمه الأقوياء بعدم حسمه، ويحسمه الجبناء بإزاحة الآخر.

تحياتي

^ H@fSS@^ said...

اولا سلامة قداستك
الظاهر البركة نالتني انا كمان عندي نفس الاعرض
ثانيا
الله يخرب بيتك على اللي انت كاتبه و التحليل اللي انت رابطه ببعض
شكرا
:)

MerMaid said...

ازيك يا رامز
الحقيقة انا مؤيدة كلامك كله في موضوع بلو ستون والمبادئ اللي بتتغير و ده فعلا صحيح
لكن انا مختلفة معاك في غضبك من موضوع غزة في القلب ..دي مشاعر ناس منقدرش نحجر عليها
كل واحد ليه الحق انه يحب المكان اللي يختاره
انا مش هتكلم عن القضية الفلسطينية لكن بوجه عام كل واحد شايف ان له قضية معينة في حياته و منقدرش نحجر علي فكره
ده مع احترامي ليك طبعا و تقديري
ثانيا انا عندي سؤال لاسكندراني فار اواي
ممكن حضرتك تقوللي ازاي فكرة الاله العجوة اسلامية الاصل ؟؟؟
اصل اول مرة اسمع الجملة دي من حضرتك
ياريت بس توضحلي
انت او رامز لاني فهمت انه متفق معاك

تحياتي لكلاكما
:)

عباس العبد said...

مريم
شرفتى المدونة
انا مختلف معاكى لو فرضنا انه معندوش دين يعنى خرج من الاطار الدينى يبقى منقدرش نحكم عليه دينيا
او من الاطار الى هو مرجعيتنا
يعنى مينفعش واحد مسلم او مسيحى يجى يقول عن واحد ملحد انه بلا قيمة
لأن مرجعية المسيحى او المسلم غير مرجعية الملحد
لأ انا بقول
انه بيحكمنا اطار واحد و هو الاطار الانسانى
ففضيلة زى الانضباط او الصدق او الامانة هى مشتركة سواء كنت ملحد , مسلم , ثورى , رجعى اشتراكى
اى حاجة
لكن احنا وصلنا لدرجة اننا اصبحنا بلا قيمة
معندناش قيم
فمش فارق اذا كنا متدينين او حتى ملحدين
....
هانى
انا مقلتش حديهولك
انا قلت حجيبهولك
ابقى اخليك تقرأ الكتاب حجيبهولك
لانه جامد جدا
انا باخد بالى كويس من الكلام عن الكتب
علشان مش عايز اتورط
....
البرىء
انت تنورنى فى اى وقت
و تشرفنى
....
حفصة
الف سلامة
دور ابن كلب خدى بالك
و بعدين يخرب بيتى اكتر من كده؟ انا قاعد فى البيت و مفيش شغل و مفيش فلوس
طيب مش تقولى ليه يخرب بيتى ؟
الف سلامة يا فندم

عباس العبد said...

مارميد
كويس انك متفقة
انا معنديش مشكلة انه غزة تبقى فى القلب او حتى مدغشقر تبقى فى القلب
دى حاجة متفرقش معايا
بل بالعكس زى ما انا قلت
انا مؤيد للى حصل من قوافل طبية و من معونات غذائية
كل ده انا موافق عليه و معنديش فيه مشكلة
انا قصدى الصورة الى هى فيها فى القلب دلوقتى
حاجة مقززة
لفى على المدونات و انتى حتعرفى قصدى كويس
شفتى الصور
الى عمله ابو تريكة ظريف
لكن التوابع هى الى غير منطقية
انا شايف انه عمل الى يعرفه و شاطر فيه
لعب كويس و رفع شعاره الشخصى
انا بهدى مجهودى لغزة
جميل
لكن
كل الى طبلوله معملوش حاجة
انا خايف يحصل الاتى زى ما شرحته لأنونيموس
" انك تطلع الاوتوبيس و انت لابس الكوفية الفلسطينى و تى-شيرت مكتوب عليه غزة فى القلب , تلاقى الناس واقفين صفوف بيهتفوا بسقوط اسرائيل و على الكنبة فى اخر الاوتوبيس واحد بيغتصب واحدة و هى عمالة تستنجد و الناس يبوصولها و يقولوا لبعض " ايه الى ركبها فى عز الزحمة , هى الغلطانة " و بعدين يدوروا و يكملوا هتاف بسقوط اسرائيل
و بعض ما تشوف المنظر ده الدم يغلى فى نافوخك فتسب للناس و تختلف معاهم ايديولوجيا و تهب لنجدة الفتاة بأنك تسيبها و تنزل الشارع و تدعو لمظاهرة مناهضة لزحمة الاوتوبيس الى اوصلنا الى هذه الدرجة و تهتف بسقوط الاوتوبيس
هو ده التجديد الثورى الى بيدور عليه المثقفين "
=====
اما حكاية العجوة
فانا كنت اعرف انها من قبل الاسلام زى ما انا قلت
انما اصلها اسلامى
فده عرفته من اسكندرانى فى رده على التدوينة
ممكن يكون قصده زى ما انا قلت
انه بعد الاسلام طلعوها على الوثنيين للتشنيع
مش عارف
بس هو اكيد حيجاوب
فى انتظار الرد

أبو عمر - الصارم الحاسم said...

بعد السلامات والتحيات والاحترامات

قلت لك هاعدي كل فترةاغلس عليك

والله مش غلاسة بمعنى غلاسة

بس كلامك هو تطبيق وتجسيد عملي لخلط الأمور والحقائق..لا اقول انك تتعمده ابدا ولكنها حالة



وهارجع ان شاء الله فعلا اتخانق على رواقة فيما بعد لكن عالسريع كده


صحيح قد - قد - تتعدد الزاويا للرؤية ..وغالبا يكون التعدد للزيف والتضليل المتعمد

لكن في النهاية فيه حقيقة وفيه كذب...فيه حقيقة وفيه خيال...فيه حقيقة وفيه تزييف وخلط للامور


والله اعطانا العقل كي نبحث ونميز..والاهم نحلل الاحداث التي نمر بها ونراها

مثال اسرائيل الذي اوردته مثال ممتاز


ومن كانت نيته خالصة فعلا...فعلا..وعنده استعداد لقبول الحق بعدما تبين له.....يهديه الله ولو بعد حين



راجع تاني ان شاء الله

أبو عمر - الصارم الحاسم said...

مش باتخانق ولا هاهتخانق فعلا يعني


ان باتكلم هزار على جد

مريم said...

على فكرة انا مؤمنة اوى بالانسان
وبحترم كل الناس بما فيهم الملحدين ودى حاجة اتعلمتها من ايمانى
لان اذا كان ربنا خلق واحد والواحد ده كفر بيه ومع ذلك هو لسه بيرزقه ويمتعه بالصحة والنجاح والسعادة زيه زى المؤمن
فده معناه انى لازم احترمه ومحكمش عليه من منطلق عقيدتهواسيب الحكم لصاحب الحكم

لكن الججملة دى بالتحديد وربط الدين بالاخلاق انت بتسمعها فى مصر ومصر مفيش فيها مكان للالحاد
احنا شعب متدين بطبيعته سواء المسيحيين او المسلمين
فطبيعى ان الدين يبقى هو المعيار مع المخطئ والمصيب اما الملحد فده يتشنق اصلا فى نظر المجتمع

^ H@fSS@^ said...

مش قلت لك يا عبس مينفعش غير الحجر التدويني على معاتيه التدوين
مصدقتنيش ليه؟؟
و يا سيدي بلاش ،الله يخرب بيت شيطانك و متضايق ليه من قلة الفلوس؟
مش ضيعتها على الكتب ؟؟
روح اقراهم و انبسط

Hypatia said...

الف سلامه عليك يارامز

بمناسبه التحرش والطبائع الجديده للاشياء
ليه بتلوم يا رامز اللى بتدافع عن نفسها بالدبوس او حتى بسكينه انا مضطره وانا فى الشارع انى اكون مستنفره دائما للدفاع عن صدرى ومؤخرتى مضطره انى مبصش حواليا عشان ماشوفش_للمره العشرين_رجل يتعرى فى سيارته او فى الباركينج بجانب سيارتى او حتى فى حديقه عامه
تفتكر فعلا حييجي يوم اترحم على الرجل المحترم اللى تعرى بجانب سيارتى
اعتقد لو موقف"هم" ناحيه التحرش كان بنفس حراره موقف"هم" ناحيه غزه ممكن نرجع لهدوء السبعينات لما امى وجدتي كانو بيمشو بفساتين قصيره وكعوب عاليه ولا يتهمهم احد ولا يتحرش بهم احد
"باحلم مش كده"

موقف تريكه عجبني موقف انسانى انه يعلن عن تعاطفه مع ناس بتموت من الجوع لكن ردود الافعال اللى بعد كده هى اللى فقعت مرارتى"او اكتر من فقع المراره شويه"0
دايما بيبالغو فى ردود افعالهم تجاه"ما هو هناك"ويدفنو رؤوسهم فى الرمل تجاه "ما هو هنا"ويمارسو بطولات مزيفه تسقط معهم من حسابات التاريخ ويتركو الدور الفعال الحقيقي للرجل الذى وضع يده على قدميها

Hypatia said...

يا صفصف قلتلك ديتها كام شهر وكله حيدعو للحجر التدويني
صبرا صبرا

محمد المصري said...

البوست كان فاضله بس شوية تحرير وربط للمتناثرات المترابطة دي بشكل أوضح ، وكمان حذف كام جملة مش بيفيدوا الموضوع في شيء غير اثبات إنك مثقف جامد .. وكان هيبقى تحفة

بس في العموم بوست عبقري طبعاً

أنا مبسوط بيه - وبيك - جداً حتى لو مختلف معاك في أغلب اللي انتَ أوردته - مش المبدأ الأساسي اللي هو بقاء القيمة قد ما في الكتير من التفاصيل المكتوبة تحت العنوان ده -

خليك فاكر مبدئياً إني شفته بوست رائع .. عشان بعد كده لما أدخل شمال في اللي جاي متزعلش :)

---

خارج الحوار :

1- عايز كتاب المطران سليم بسترس ده ، مش تديهوني ، أنا عايز أشتريه أو تجيبهولي - وهحاسبك عليه متقلقش :) - ، الجزء اللي انتَ أوردته منه رائع جداً

2- كنت أتمنى إنك متشرحش اللي انتَ قاصده في الكومينتات ، أنا فهمت اللي انتَ تقصده من أول مرة قريت فيها البوست وإن كنت فهمت موضوع غزة ده بشكل تاني - شفته إنك بتوازي بين الوضعين .. الانتهاك على مستويين مختلفين دون رد فعل واضح - ، عموماً وصول فكرتك للناس حتى لو عن طريق شرحها شيء مهم .. بس ميبقاش بالوضوح ده على الأقل

3- فيه حاجة ابقى فكرني أقولهالك لما أشوفك أو أكلمك عشان مش هينفع أقولها هنا ، متفرحش يا رامز مش حاجة قبيحة :) ، هي حاجة خاصة بكومينت من الكومينتات اللي عند بلو

4- ألف سلامة عليك طبعاً ، بس وحياة أبوك يا أخي ابقى رد علينا .. كنت في المعرض أصلاً وكنت هسألك على مكان دار الهلال بس انتَ بتموت الظاهر ، ربنا يخلي يحيى هو اللي دلَّني
سلامتك مرة تانية

----

أبدأ بقى أدخل شمال :

1- أنا مش شايف أي حد من اللي ردوا عند بلوستون حاول إنه ينظر أو يتسفسط أو يحط الموضوع في ثوب من نقاش المثقفين
مع احترامي يا رامز حضرتك في البوست ده اللي اتفلسفت - مش بمعنى سلبي على فكرة .. أنا مش شايف الفلسفة عيب أبداً - وحطيت فرضيات وهمية لم تُذْكَر واتعاملت على أساسها

مين في الردود تنافى رده أو كلامه مع ( القيمة ) ودافع عن فعل الرجل أو هاجم بلو بأي شكل من الأشكال ؟؟

في الحقيقة الاتفاق مع القيمة واضح جداً جداً يا رامز ومفيهوش أي لعب بأي شكل

أغلب الردود تناولت ( كيفية التعامل مع تغير القيم عند آخرين ) .. وده مش بيخلي القيمة نفسها تتغير بالطبع

أبسط الجعلصة اللي أنا قلتها دي :

القيمة هنا : إن التحرش بأي شكل شيء خاطئ ومنافي دون أي تحوير

كسر القيمة : فعل الرجل بإنه يحط إيده على رجلها ، هو كده جه كسر الثابت أو المتفق عليه

اللعبة هنا واللي دارت حولها الردود كيفية التعامل مع كسر القيمة دي .. مش تبرير كسر القيمة بأي شكل من الأشكال ، يعني الناس قالت ممكن تعمل إيه لو ده حصل ، وتراوحت الردود ما بين إنها تشيل دبوس .. إنها تصوت عشان الناس تتدخل .. إنها تتصرف ولو امكانيتها المادية مساعداها - وجود عربية في حالة بلو - متركبش ميكروباص أو أتوبيس في حالة خوفها من التحرش بأي شكل

مش هحوَّر معاك في إن الأصل إنك تدور على الداء وتعالجه

بس طالما الداء ده موجود وعلاجه مش هيكون بشكل فردي يبقى على كل فرد إنه يلاقي الطريقة المناسبة لمواجهة هذا الداء حتى يتم علاجه

ده في نظري مواجهة لكسر القيمة من بعض الأفراد ، وده برضه معناه وجود القيمة الثابتة والواضحة .. عشان كده الناس بتواجه كسرها

2- تعالى بقى لفكرة إنك تدور على الداء وتعالجه

فيه تناقض بايخ أوي حضرتك وقعت فيه ووقع فيه كذلك كراكيب في رده التاني

شايفين إن الأصل هو البحث عن المرض ، ندور على السبب على حد تعبير كراكيب

جميل .. أنا كمان متفق مع ده - وإن كنت شايف الداء أساسي منذ زمن وده هقوله في نقطة تانية بس الأساس إني أوك متفق معاكم -

إزاي ممكن تدور على السبب والمرض وتعالجه من غير ما تفكر في دوافعه بصوت عالي مع الناس ؟؟

انتَ شايف فعلاً إن الحل إن الناس تدخل تشتم وتقول مين الكلب ده ؟؟ ، طبيعي إن التنفيس عن الغضب قصاد موقف زي ده وهيكون تنفيس الغضب بالشتيمة أو أي شكل سلوك إنساني طبيعي في نظري .. بس الأكيد برضه إن ده مش المنتهى

الناس اللي بتدور وبتقول كلام أوردته انتَ في تدوينتك زي الكبت والانحراف والضغط ، دي مش بتدور على مبررات للفاعل .. الناس دي بتتكلم - بالظبط - في نقطة البحث عن السبب .. عن المرض .. مش شرط ولا ضروري تعالجه بس مهم تكون فاهمه وفاهم أسبابه

اقرا يا أستاذ قصة سنوبزم ليوسف إدريس في مجموعة بيت من لحم ، هتلافي نفس فكرة التحرش دي ، إدريس كان بيسأل وبيحاول يفهم .. طبعاً وقتها ربط النكسة بالانحراف أو تغير القيمة وده أنا مختلف معاه فيه ، بس مش دي النقطة اللي بقصدها .. اللي بقصده إن التفكير في الأسباب - وباعترافك مطلوب - مش مجرد سفسطة أو نقاش مثقفين .. متفق معاك طبعاً إن فيه ناس بتسفسط وبتتفلسف ، بس الأغلبية إن الكلام اللي إحنا بنقوله على القهوة وبنحاول بيه نفهم اللي بيحصل واللي بيتغير جوا الناس أو من الناس وبنحاول نتعامل معاه .. هو ده اللي بيتقال في المدونات .. وموجود في ردود محترمة مكتوبة عند بلو

لسه هكمل كلامي بس في كومينت تاني

محمد المصري said...

3- انتَ عملت حاجة من أكتر الحاجات اللي أنا بكرها وهي الحديث عن الناس كإنهم كائن هلامي أسود سيء بيجرنا لورا ، مش على إنهم انتَ وأبوك وأهلك والناس اللي بتشوفها في الشارع وبتفرح لو ابتسمت لحد فيهم أو ابتسملك وانتوا ماشيين في طريقكم

على حد تعبير أحمد العبقري - العبقرية هنا تعود على التعبير وعلى أحمد بشكلٍ سواء - : الحديث عن الشعب من موقع حياد

مين يا رامز قال إن الناس هتبرر فعل التحرش ؟؟ ولو ده حصل هيكونوا كام في المية من الناس أصلاً ؟؟

مين قال إن الناس بتكبر دماغها ومش هتتاخنق وتدي للشخص ده بالجزمة لو بقت جزء من الموضوع ، بمعنى إن البنت صوطت والناس اشتركوا في الحدث ؟؟

مين قال إن تغير ( القيمة ) بيوصل لإن فعل التحرش يحصل مع غض النظر عنه ؟؟ أو الدفاع عنه بأي شكل ؟؟

ده كلام بعيد كل البعد عن أي حقيقة

مش هقول إننا كويسين وزي الفل ، لأ فيه حاجات كتير وحشة .. وفيه تغيرات بتحصل جوا مجتمعنا بفعل حاجات كتير .. وفيه فعلاً قيم بتتغير - مش لحد التحرش يا رامز .. بس زي الرشوة مثلاً -

بس اللي عايز أقوله إن اتخاذ ده على إن هو الأساس إما تشاؤم أو استعباط أو قصر نظر

زي ما فيه ناس متحرشة في أحداث العيد قبل اللي فات ، فيه ناس خرجت بالشوم ودافعت عن البنات ودخلتهم جوا المحلات ، زي ما فيه واحد بيتحرش ويحط إيده على رجل بنت في ألف إيد بتنزل على قفاه

مش عايز أتكلم عن تجارب شخصية بس ممكن أقول بسرعة إني من فترة كنت راكب ميكروباص وفيه واحد كان قاعد ورا ست وبيقفل الشباك فإيده جت في صدرها .. فهي اتكلمت وقالتله انتَ قليل الأدب وهو اتبل وحلف إنه كان بيقفل الشباك ، الناس اللي كانت في الميكروباص في الحالة دي وقفت بوضوح مع ( القيمة ) ومن غير تحوير أو كلام كتير طلبت من الراجل إنه ينزل من العربية مع نظرات استهجان وقرف ولولا إن شكله محترم وكان بيحلف إن ده تم من غير قصد أفتكر إنه كان هيتشتم ويتضرب بالفعل

الحقيقة يا رامز إن بلو مقلتش ولا صوتت ولا شتمت ولا دخلت الناس جوا اللي بيحصل عشان حضرتك تحكم جوا تدوينتك أو في استقراءك المستقبلي إن الناس هتسكت على فعل التحرش


4- فعلاً فعلاً مش عايز أهوَّن من مسألة التحرش أو وضعها في الإطار العادي ، بس التعامل اللي تعاملت بيه الردود مع موضوع بلو كان بيحط بدون قصد الموضوع في حجمه الحقيقي - الكبير بالفعل -

عشان أوضح ، فمن السذاجة دلوقتي إنك تتعامل مع حادثة تحرش أو لمس أو تحسيس بأي نوع من أنواع الإندهاش ، ممكن تقابلها بحزن أو بغضب لكن مش بإنها حاجة غريبة وغير اعتيادية

وقبل ما ترد ، ده مش معناه تغير القيمة .. ده معناه إن فيه ( قيمة ) واضحة بيتم كسرها وكسرها ده أصبح متكرر فانتَ بتتعامل معاه

أقرب الموضوع بعيداً عن موضوع التحرش : سرقة واحد لمحفظة واحد تاني في الأتوبيس هو فعل منافي للقيمة ، لكن تعاملنا معاه بيتم بشكل طبيعي دون اندهاش ، وده لا يعني إن القيمة نفسها بقت متغيرة .. ده معناه إن كسر القيمة تكرر لدرجة لا تدعو للإندهاش

نرجع لموضوعنا :
التحرش الجنسي موجود في مصر من السبعينات

اللجنة مكتوبة سنة كام يا رامز ؟؟ ، من 18 سنة ، علماً بإن صنع الله إبراهيم سارق الجزء اللي أنا أقصده - التحرش بامرأة في الأتوبيس - بنفس الأسلوب والطريقة والتتابعات من قصة ليوسف إدريس صدرت قبلها بعشر سنوات - سنة 71 في مجموعة بيت من لحم - ، والاتنين اتكلموا عنها كنتيجة لشيء : النكسة في حالة يوسف إدريس .. والانفتاح في حالة صنع الله إبراهيم

معنى كده حضرتك إن ده موجود بالفعل ولا معنى أبداً لمقابلته بالإندهاش ، طبيعي إن الفقر والكبت مع تواجد الرغبة بينتج عنه أفعال زي دي .. وده مش مبرر قد ما هو مشكلة
ولو حضرتك حطيت في دماغك شيء تاني انتَ أكيد عارفه وهو - وحط خط تحت كلامي الجاي - فيه ستات وبنات بيكون عندهم تفاعل مع حدث التحرش ده باعتباره منفعة متبادلة ، ولو رجعت برضه للجنة هتلاقيه متكلم عن النقطة دي بشكل أوضح
لو حطيت ده جنب ده هتعرف ليه التحرش بيحصل - وأتمنى متعملش نفسك متعرفنيش وتقول إني بتفلسف أو ببرر ، أنا بس بحاول أفهم -

وزي ما قلت في النقطة رقم 2 من كلامي .. الداء ده موجود بالفعل .. مش غريب حتى لو كان مستهجن ومش جديد حتى لو كان بيزداد ، يبقى التعامل معاه هو تعامل يحفظ كرامة الفرد وده اللي عملته الردود اللي عند بلوستون : محاولة إيجاد كيفية لمواجهة الفعل المرفوض

محمد المصري said...

5- مكنتش عايز أرد على موضوع غزة وأبو تريكة عشان أنا فاهم قصدك كويس .. وانتَ برضه عارف أنا هقول إيه ، بس مضطر لإن فيه أكتر من كومينت تناول النقطة دي بتركيز

أنا متفق معاك إن الناس اللي فرحت بأبو تريكة وبتقول غزة في القلب مش بتفيد بشيء حقيقي ومش بتعمل حاجة

بس نقطة الخلاف إني مش شايف ده غلط بأي حال من الأحوال

أنا كشاب سيس فرحت جداً باللي عمله أبو تريكة وحطيت صورته مؤقتاً على موبايلي كمان :)

قبل ما تشتم اسمعني الأول :

طبيعي إن الناس بيكون ليها موقف عاطفي أو عقلاني من شيء ما ، وطبيعي إن حدة هذا الموقف بتزداد مع ازدياد أهمية الشيء المتخذ الموقف اتجاهه ، موضوع فلسطين وإسرائيل بالنسبة لناس كتير - الناس العادية اللي ماشية في الشارع بعيداً عن أي أفكار أيديولوجية كبرى - أشبة بزرع حصدَ بالنسبة لطفل بيتعلم جديد ، حاجات واضحة جداً ومواقفهم اتجاهها واضحة كذلك

سواء ترجم ده ( لرد فعل ) أو لأ .. فالموقف ده بيحترم
يعني انتَ كرامز عندك موقف واضح ضد الظلم والفقر والقتل أو ضد النظام المصري مثلاً .. لو معملتش رد فعل يعبر عن القناعات دي أو لم تتح ليك الفرصة في إبداء رد فعل فده مش بيقلل من الموقف في حد ذاته

خلينا نقف عند النقطة دي : الناس عندها موقف واضح من اللي بيحصل في غزة

طبيعي إن الناس دي بتفرح لما تلاقي حد بيعبر عنهم .. حد صوته مسموع وواصل .. حد منهم وهما بيحبوه .. حد ( رمز ) في مجاله اتخذ موقف نابع من نفس منطلقاتهم بدون أي لعب أو غاية أخرى

ليه صيحة مايكل مور الشهيرة "يلعن أبوك يا بوش" اللي أطلقها في حفل الأوسكار سنة 2003 بقت أشهر هتاف وضعه مناهضي حرب العراق والنظام الأمريكي الحالي كشعار لهم ؟؟ وده بقى مكنش في مدونات ومش بنتاج فردي قد ما في مظاهرات كاملة ومقالات سياسية كبرى

ليه ؟؟

لو جاوبت على السؤال ده هتعرف ليه الناس كانت ورا أبو تريكة وفرحت باللي عمله

وأنا هنا مش بتكلم عن الناس اللي ادعوا البطولة ومظاهرات وقوافل ومش عارف إيه - مش معترض على ده بس لما يكون مفيد بشكل حقيقي - ، أنا هنا بتكلم على الناس العادية اللي كانت قعدة في بيوتها زي حالاتي وقالت ربنا يحميك يا أبو تريكة لما رفع الفانلة ، زي البوست بتاع شهروزة وزي البوست بتاع محمد مفيد .. الناس دي محورتش ولا ادعت البطولة .. دي ناس وقفت وحيَّت ( رمز ) في مجاله عبر عن قناعاتهم بشكل واضح وصل للعالم كله

6- انتَ عايز إيه بالظبط ؟؟

أنا عارف إن السؤال رخم وسخيف وابن كلب كمان ، بس الحقيقة إنك بتعترض بشكل واضح على حاجات كتير من غير توضيح اللي انتَ شايفه صح

قلت إن الصح اللي عمله كراكيب إنه دخل شتم .. وإن الشخص ده المفروض يتشتم ويتضرب وبس من غير كلام تاني

طب انتَ مش شايف إن ده برضه مش هيغير من الوضع شيء ، يعني الفكرة هتفضل في إطار إن القيمة منتهكة وانتَ بتدافع عنها بطريقتك
طب ما الناس اللي قالت دبوس كانت بتدافع عن القيمة - وعن نفسها - بطريقتها برضه ، يبقى انتَ معترض ليه ؟؟

يا رامز باشا .. البنت بالأساس مصوتتش ولا اتكلمت .. ولو كانت عملت ده الناس كانت هتدخل بالفعل دفاعاً عن ( القيمة ) الواضحة اللي حضرتك قاصدها ، والناس اللي ردت في البوست واقترحت وجود دبوس أو شيء شبيه بتدافع برضه عن ( القيمة ) الواضحة ضد كسرها من البعض مع الحفاظ للبنت على كرامتها ضد أي انتهاك قد يحدث

يبقى افتراضاتك الوهمية اللي انتَ حطيتها مغيرش حاجة في الحقيقة : إنك رافض ده .. وإنهم - المدونين - رافضين ده .. وإن الناس - في الأتوبيس أو الشارع - رافضين ده ، يبقى القيمة واحدة وواضحة يا رامز طالما لم يتم الاختلاف حول رفض الفعل واستهجانه ومواجهته حتى مع اختلاف السبل أو الطرق

---

أقول قولي هذا وأذكركم بما قد ذكرته ولكنكم نسيتمونه :

بوست رائع بالفعل وعاجبني جداً حتى مع اختلافي الواضح معاه في أغلب - أو حتى كل - محاوره والنتايج اللي وصلها أو حاول يوصلها

متنساش تجيب لي كتاب اللاهوت الأدبي .. وألف سلامة عليك مرة تانية .. ومن الأول متزعلش من أي دبش حدفته أو دخله شمال خبطت فيك :)

karakib said...

محمد المصري

اولا شكرا للمعلومة بتاعة سرقة صنع الله ابراهيم
معلومة جيدة تستحق البحث
---------
ثانيا
المشكلة بقي انه النتائج قتلت بحثا و ظهرت بعض المسكنات زي اننا نضربه فيخاف او البنت تشكه فيخاف يتشك برضه
لازلنا نعالج العرض ... زي ما يكون عندي برد و عمال اخد في نقط قطرة انف توقف الرشح .. لكن البرد لازال موجود
متفق معاك انه الناس لازم تناقش النتائج و تستنتج منها الحلول للسبب نفسه
لكن انها تناقش نتائج المصيبة و تجد حلول للنتائج و تتغافل عن الاسباب او الدوافع الحقيقيه ... هنا بقي فيه مشكله

انت بتقول ...
------------
بس طالما الداء ده موجود وعلاجه مش هيكون بشكل فردي يبقى على كل فرد إنه يلاقي الطريقة المناسبة لمواجهة هذا الداء حتى يتم علاجه
------------
ما هو ده بقي اللي اسمه سياسة الصدمات
نستني لما المصيبة تحصل ... و نبدأ نعالجها
عارف انه مافيش حلول سهله .. لكن ندور و نعرف سبب الموضوع ده ايه
بدل ما نعالج النتائج بتاعته بدبوس و ضرب و كل ده
--------------
انت بتقول ...
مين قال إن الناس بتكبر دماغها ومش هتتخانق وتدي للشخص ده بالجزمة لو بقت جزء من الموضوع ، بمعنى إن البنت صوطت والناس اشتركوا في الحدث ؟؟
--------------
تعرف انه معظم حالات الاغتصاب ... الاغتصاب الكامل مش مجرد التحرش لا يتم الابلاغ عنها ؟؟ طيب بلاش دي
تعرف انه معظم البنات بتخاف تزعق او تعلي صوتها لما واحد بيتحرش بيها ؟
يعني بتبقي في منتهي الخوف ... و الناس لو شافت واحدة بتزعق في الاتوبيس او علت صوتها ... بتاخد حقها يعني
و هما نازلين هيقولوا عليها انها مش محترمة ... مشيها مش محترمة :) و علشان كده بنات كتير اوي اخترعت فكرة الدبوس
مش مستغرب من انه كل البنات عارفين الموضوع ده دلوقتي ؟ تفتكر المتحرشين عددهم قد ايه ؟ و حط في حساباتك انه 90 بالمئة من الاناث ركاب المواصلات العامة معاهم دبوس او بيقلعوا اللي في رجلهم لو عندهم الجرأة

----------------
انت بتقول ...
ولو حضرتك حطيت في دماغك شيء تاني انتَ أكيد عارفه وهو - وحط خط تحت كلامي الجاي - فيه ستات وبنات بيكون عندهم تفاعل مع حدث التحرش ده باعتباره منفعة متبادلة ، ولو رجعت برضه للجنة هتلاقيه متكلم عن النقطة دي بشكل أوضح
---------------
المشكلة بقي انه الفكره دي اصبحت منتشرة اوي اوي اوي
تفتكر يا استاذي لو واحدة عايزة واحد يتحرش بيها ... هتغلب انها تلاقي 30 او 40 واحد من معارفها و هتنزل تركب الاتوبيس تدور علي واحد بالغلط !؟ مش بانكر انه ممكن يكون موجود
لأ في احتمالية ... بس قد ايه !؟ و لو قلنا 1 بالمئة ... يبقي نقول انهم غلطانين كلهم
بص احنا شباب زي بعض و عايشين في القاهرة و بنركب مواصلات و تاكسيات و بنقعد علي قهاوي
و عارفين انه في كتير جدا جدا بيرموا اللوم علي البنات
اصل بص .. هي اللي لابسة كده
اصل بص.. هي اللي بتمشي تترقص
اصل بص .. في منهم بيحبوا الزنقة
بص بص .. عالرصيف هناك الشنطة المعدية
بص بص .. اموت انا في الجينز
بص بص .. يا سلام عالعبايات
كان ابن عبد العزيز بيقول في مرة يا سيدي لو لقيتها عريانه مش تتحرش بيها ... غطيها او مالكش دعوة ما دام ما اشتكتش لك
لكن لو اشتكت تبقي هنا بقي المشكلة
ما هو ما ينفعش نقول ده عادي و ما نندهش بالذات لو ده حصل لحد انت تعرفه و بتعزه هتندهش و تضايق جدا كمان
------------------
الموقف الشخصي اللي انت حكيته ده
الراجل نزل لأنه كان فعلا محترم و اتكسف من اللي حصل
تعالي بقي اقول لك انا .. انا شبراوي و باركب المترو و التاكسي و الاتوبيس و الميكروباس و بيقولوا في توك توك في ميدان الخلفاوي هاروح اركبه :)
الطبيعي انها لما تزعق له
هو لأنه بجح و سافل و ما بيهموش حاجة
هايقول لها
في أيه يا مرة يا بنت المتضايقة انت هتلقحي بلاكي علينا يا بنت الشعب
و لو زودت و حس انه في حد هيقرب لهاو يضربه
و ده بقي موقف انا شفته شخصيا هيخرج لها ذكرة من البنطلون و وسط الناس
قول لي بقي ده ممكن تضربه ؟ طيب ما هو اصلا مهزق و عادي انه ينضرب
و لا تفرق معاه
المشكلة اننا مش بندور عالسبب
الناس متعودة علي التهزيق ؟؟ ده سؤال علي فكرة ... و لا ده كبت جنسي ؟ برضه سؤال ... و لا تفتكر ايه ممكن يخلي واحد يعري اجزاء لها كرامة من جسده وسط الناس !! او يتحرش بواحدة هو عارف انها ممكن تكون جارته ... طيب تفتكر لو سمع ان زوجته او اخته حصل لها كده ممكن يعمل ايه !؟ هيثور و دمه يفور و لا ما هو عارف ان ده بيحصل و عادي
---------------
انا قصدي انه خلاص كل الناس عارفه الدبوس
و كل الناس عارفه انها لو زعقت
احتمال تاخد حقها و احتمال تتهزق اكتر و يتقال عليها انها مش محترمة
السبب بقي في هذا الفعل ايه ؟
انا باميل لفكرة انه الناس حاسه انها مهزقه و ما عندهاش كرامة علشان تخسرها اساسا ... انت ايه رأيك ؟

محمد المصري said...

لما قريت الكومينت بتاعك يا هاني شفت إن فعلاً فيه نقط إحنا مش مختلفين في نظرتنا ليها قد ما مختلفين في تفسيرها أو النتايج القايمة عليها أو حتى سبل مواجهتها

انتَ بتدور على حل للمرض من جذوره ، وأنا معاك أوك

بس الحل ده أكبر كتير من فرد أو مجموعة من الأفراد - مهما زاد عددهم - ، الحل على مستوى دولة كاملة

بشكل أو بآخر أنا متفق معاك إن اللي بيعمل كده .. اللي بيتحرش .. أو حتى اللي بيسرق أو بينشل في الأتوبيس بيكون فاقد لكرامته من الأساس ، من الجائز كمان آدميته

عايز حل ؟؟

ادي للبني آدم حقوقه واللي يكفله يعيش ولو بقدر ضئيل من سبل المعيشة وهو عمره ما هيعيش حياته كحيوان ، محدش بيختار إنه ميكونش محترم .. ومحدش بيختار إنه يهزق نفسه

حسس البني آدم إنه بني آدم فعلاً مش مجرد صفر على هامش الدنيا وهو مش هيدخل أتوبيس عشان يسرق أو عشان يحسس

والحل ده فوق مستوى الأفراد بالفعل .. ده حل يخص نظام دولة كاملة ، صحيح من الممكن يتكلم دكاترة علم النفس والأنثربولوجي ويحللوا ويقولوا .. بس كل ده تشخيص بدون حل .. زي برضه اللي إحنا هنعمله لما نتكلم عن الكبت والفقر والقهر .. وزي ما أنا عملت فوق وأنا بتكلم عن لا آدمية البني آدم في مصر ، بس كل ده يا هاني مش بيحل المشكلة من جذورها زي ما انتَ بتطلب

ولخد ما الحل اللي عشان يحصل عايز سنين وسنين فكل فرد بيحاول يلاقي ( وسيلة ) يدافع بيها عن ذاته

ومش شايف أبداً إن ده عيب بأي حال ، ولا شايفه نتيجة لتغير القيم حسب ما رامز حاول إنه يوصل

في التسعينات زادت حوادث الاغتصاب بشكل كبير في أمريكا .. انتشار أسلحة الدفاع الذاتي مع البنات وقتها مش بيبرر الاغتصاب أو بيعيد تأويل التاريخ أو بينكر كون ده ( جريمة ) لكنه بيحاول يحفظ ( للفرد ) حقوقه لحين التوصل لحل المشكلة من جذورها عشان المجتمع

--

فاهم اللي انتَ تقصده عن خوف البنات من التعبير عن التحرش بيهم بسبب نظرة المجتمع وبسبب كمان نظرة البنت نفسها لمكامن عفتها اللي لا يجوز خدشها

بس ده برضه مش مرتبط بإن الناس مش هتتحرك .. أغلب المواقف اللي شفتها .. أغلب الناس اللي أعرفهم هيتحركوا وهيتحركوا أوي لو شافوا أي بنت في الموقف ده ، الدبوس مش حماية من تخاذل الناس قد ما حماية نفسية للبنت من إنها تتحط في موقف زي ده .. وأعتقد إنك بتتفق معايا إنه موقف بايخ حتى لو كان الحق معاها وحتى لو الناس هتبقى في صفها

--

بالمناسبة أنا معترضتش إنك انتَ أو رامز تندهشوا من الحدث سواء كنتوا تعرفوا الشخص المعني أو لأ

أنا اعترضت على إنك تقابل عدم اندهاش الناس وتعاملها مع الوضع بشكله الحقيقي والعملي وتعتبر إن ده معناه تغير في القيم

مرة تانية ابعد عن موضوع التحرش وشوف الموضوع من أي زاوية تانية كالسرقة أو النشل مثلاً ، هتلاقي إن صعب معاتبة الناس على عدم اندهاشهم حتى لو كانت الفعلة في حد ذاتها دنيئة ومخالفة لأي قواعد دينية أو أخلاقية أو خاصة بقيم ثابتة

ولم أعترض بالطبع نهائياً عن الضيق أو الغضب .. ده عندنا كلنا وإحنا بنقرا بوست بلوستون أو وإحنا بنسمع أي حاجة مشابهة وسواء كنا نعرف البنت أو لأ

--

اختصاراً

إحنا مش مختلفين أبداً في وجود مشكلة من المناسب حلها قبل التعامل معها كواقع لا مفر منه ، بس في حال استعصى الحل فكل فرد من حقه إنه يشوف كيفية مواجهتها بنفسه طالما بتمسه لهذه الدرجة

السبب : كبت وفقر وظلم وانتهاك آدمية وحياة لا ترقى حتى لمستوى الحيوانات ، مع جانب لا أنكره من تفكك القيم والأخلاقيات

الحل : ادي البني آدم حقوقه وحسسه إنه فعلاً بني آدم وهو هيتعامل مع المجتمع كله على هذا الأساس

أشكرك

karakib said...

ادي البني آدم حقوقه وحسسه إنه فعلاً بني آدم وهو هيتعامل مع المجتمع كله على هذا الأساس
يبقي احنا كده فعلا وصلنا لحل واحد حتي لو اختلفت طرقنا في التعبير عنه
بس ازاي يا محمد تدي للبني ادمين حقهم
و تخليهم يحترموا نفسهم و يحسوا بكرامة ازاي ؟
الحل مش سهل ابدا
للاسف في الظروف دي شبه مستحيل

بنت القمر said...

اوع تشيل البوست الا لما ارجع اقراه بالراحه وكمان الردود
معلش لبكرة بس
عشان جايه من السفر تعبانه
ومش عارفه اركز

Fantasia said...

المرأة.. ذلك الجسد المستباح في العلن وفي صمت
المرأة.. ذلك اللحم الطري الذي يلهث ورائه الجياع
المرأة.. ذلك المخلوق الضعيف الذي يغري بالافتراس
المرأة.. ذلك الكائن الدخيل على عالم الذكور

المرأة.. أصل الشرور وصانعة المفاسد ومصدر الغواية
المرأة.. جثة هامدة, تمثال من شمع, لا يمكن ان تكون له ارادة
المرأة.. مرآة مكبرة تعكس للرجل صورته كما يريد ان يراها
المرأة.. قربان يذبحه المتعبد ليرضي الآلهة ويتطهر من الخطيئة

المرأة.. جالبة العار
المرأة.. مفعول به
المرأة.. نصف انسان
المرأة.. عالة على الحياة

المرأة.. هي الآخر
المرأة.. هي الجحيم


الاستاذ رامز, هذه التدوينة هي من اجمل ما قرأت في عالم المدونات. ارجو التكرم بالسماح لي باعادة نشرها في مدونتي المختصة بقضايا المرأة

حينما ينصب الرجل نفسه الها ف الارض.. فمن الطبيعي ان يصبح تحرشه بالمرأة عملا مقدسا

خالص تحياتي واحترامي

عباس العبد said...

انا المفروض ارد على كل الناس دى و كمان استنى بنت القمر لغاية ما تقرا
و كمان لسه حترد , و لسه الصارم الحاسم كمان حيرد
و يعنى البنى ادم الى اسمه محمد المصرى بيتهمنى بحاجات معينة و هو كاتب تعليقات اطول من التدوينة نفسها , ربنا يسهل .
=======
الصارم الحاسم
انت تنور المدونة و تولع فيها براحتك
فى الانتظار
=======
مريم
كويس اننا متفقين فى نقطة قبول الاخر لان دى اهم حاجة
اما حكاية ان مصر مفهاش ملحدين
فاكيد غلط
مفيش دولة متخلاش
لكن المهم
احنا بنتعامل مع الانسان الى قدامنا ازاى ؟
هو ده المقصود
======
حفصة
موضوع الحجر التدوينى ده اختراع
ان شاء الله اول واحد و واحدة حيحجروا عليهم حيبقوا انا و انت
علشان تستريحى
حنتمسك فى كمين تدوينى و احنا بنحط كومنتات عند اى حد
انا اكتشفت مصيبة فى موضوع الكتب
الناس بتحقد على لله فى لله
طيب انا اعمل انا بحب الكتب , اعمل ايه ؟
====
نسرين بسيونى
منونرة المدونة
انا مش زعلان من البنت الى بتشيل دبوس تدافع بيه عن نفسها
انا زعلان للحال الى وصلناله ان البنت تطلع بدبوس
اما حكاية ابو تريكة
فأبو تريكة لاعب و الى عمله هو انه قام بدوره كلاعب
و ناضل كلاعب
يعنى
لعب كويس جاب جون و قدمه لغزة
انما توصل للتطبيل و التزمير
فمسخرة خالص يعنى
انا معنديش مشكلة
ابو تريكة عمل حاجة كويسة معملهاش البهايم الى بيطبلوله
يا ريت لو كل واحد فى مكان شغله يعمل الى عمله ابو تريكة فى مكان شغله الى هو الملعب
فهمتى قصدى

أبوفارس said...

معلهش أنا عارف أن دمى تقيل على قلبك بس مش قادر أمسك لسانى..
أولا أيه حكايه التهكم على ومهاجمه المثقفين دى..!!!
هو حضرتك ياباشمهندس مش مثقف برضك..
ولا مثقف دى أصبحت شتيمه فى بر المحروسه زى علمانى وأشتراكى كده..
ولو مش مثقف أمال أيه الكتب اللى بالكوم دى اللى قداستكم أشتريتوها..
وراح فيها مهر العروسه..تانى..
عموما كمثقف أنا لاأسعى ﻷختراع العجله كل كام سنه..ولا التفكير فى كيفيه رسم الدائره كل جيل كما نفعل فى شرقنا السعيد..
كمثقف أستطيع اﻷغتراف من المعرفه التى راكمتها أجيال قبلى وصقافات أخرى وبلا حرج ولاأحساس بالنقص..مايمر به مجتمعنا العزيز مرت به مجتمعات أخرى وبأكتر منه كمان..القرن العشرين كان مطحنه للمجتمعات..وتصدى لفهم مايحدث أفضل عقول هذا القرن..واحد منهم أسم الله على مقام الساده القراء أسمه "أريك فروم"..خواجه ألمانى حاول فهم المحتمع اﻷلمانى تحت حكم النازى فى كتاب من أهم ماكتب فى هذا القرن أسمه "الخوف من الحريه"..
ماطولش عليك قول ﻷ طول..
قالك أيه أنه فى مجتمع قمعى زى ألمانيا النازيه وزى بر المحروسه أيامنا "المباركه" دى الناس تركيبتها النفسيه بتتحول ألى خليط من الساديه والمازوكيه سويا..بمعنى أن الواحد من دول ياخد على قفاه من اللى فوقه ويحاول أن يذل من هو تحته..تحته دى ممكن يكون الستات ﻷنهم طبعا أصل البلاء أو من هم ليسوا من لونه أو دينه ﻷن هو من الجنس اﻷسمى أو من الموعودين بالجنه..
فتلاقى مثلا جربوع جاهل فاكر أنه أفضل من أستاذه جامعه لمجرد أن جهازه التناسلى من الخارج وضوته خشن..
وبالتالى من "حقه" أنه يمد أيده عليها ويحسس ولا يهموش..
أحد الساده المعلقين قالك أيه"انا باميل لفكرة انه الناس حاسه انها مهزقه و ما عندهاش كرامة علشان تخسرها اساسا ... "مش بس كده دى بتستمع بالتهزئ..جزء من التركيبه السادو-مازوكيه اللى حكى لنا عنها الخواجه "أريك"..الحل أيه..بسيطه..هدم المجتمع القمعى اللى كابس على نفسنا وتحدى كافه أنواع السلطات القمعيه بما فيها -خللى بالك- السلطه الدينيه اللى هارشه دماغ الخلق فى مصر..
بس خلاص..تحياتى وبلح أمهاتى..خالد

عباس العبد said...

محمد المصرى
ايه هى الجمل بقى الى لو اتشالت يبقى احسن
و ايه هى الجمل الى بتبين انى مثقف بزيادة
متفتكرش انى حسيبك
كتاب سليم بسترس لقيته على النت
حنزله و ابعتهولك اصبر على شوية لأنه مبيتبعش فى مصر
جايلى من بره بينى و بينك اللاهوت الادبى ( مش بيحبوه فى مصر , علشان حكاية الثورة و الحاجات دى )
ثم
انا مكنتش ناوى اشرح فى التعليقات بتاعتى بس لما اتسئلت كان لازم اجاوب , انا بتاع الشعب زى ما انت عارف
ثم
انا انبسطت انك اخدت بالك من ان التدوينة ليها مستويين
مرة مقارنة مع غزة سلبية و مرة مقارنة زى ما انت فهمتها الاول
الى فهمها زيك من اول مرة كده و فهم المستويين بلو ستون لما بعتهالها قبل ما انشرها
اخد رايها علشان متتخضش من انى بتكلم عنها
ثم
سعادتك فى ردودك عملت عملية تنظير و نقاش مثقفين و وصلنا فى الاخر لنفس النقطة
انه قعدنا نرغى رغى تحليلى متقعر له نوازع فلسفية ذات رؤية مبعدية الى هى يا نجيبلهم الكلة يا نعمل شندوشتات حلاوة بالقشطة لان التحرش فى كل حتة فى العالم زى ما احنا عارفين , الاوبرا ميدان الديزة و عابدين ,
فى نقطة انا عايز اقولهالك بدل ما ارد على حتة حتة فى الرد بتاعك الى اطول من التدوينة ده
شوف يا سيدى
القيمة لازم تردها لمصدرها لمنبعها للخام بتاعها
و هى ان القيمة ثابتة و مش معنى ان احنا بنتغير يبقى القيمة قابلة للتغيير
لأن القيمة موجودة حتى قبل مجيئى و لغاية بعد موتى
مثلا لو قلنا
الكذب و الشتيمة
مش معنى ان الناس كلها تكذب يبقى الكذب بقى طبيعى
و مش معنى ان كل الناس بتشتم يبقى الشتيمة ربنا مش حيحاسبنا عليه
او لو اتكلمنا فى اطار مادى احسن
مش معنى ان كل الناس بتكدب و تشتم يبقى الكدب و الشتيمة صح مش غلط
المقصود ان كل مرة تكدب فيها لازم تندم على كدبك لأنه مش صح
مش معنى انك بتشتم كتير انه خلاص متوبش عن الشتيمة
كل مرة تكدب او تشتم لازم تتوب\ تندم \ ترفض , عن الشتيمة او الكدب
فعل التوبة مستمر حتى لو 100 مرة فى اليوم
مش بكدب يبقى خلاص
يعنى انا لو شفت فعل تحرش كل يوم 100 مرة
لازم اغضب و اندهش من الفعل كل يوم 100 مرة
الناس رافضه صحيح بس اتعودت
اتعودت دى هى المصيبة
حييجى اليوم الى تفقد بيه الشعور بالرفض
و يبقى شىء طبيعى زى الى من كتر كدبه مبقاش يندم عليه
لأ و كمان بقى يصدق انه مش بيكدب
انك متندهش دى مصيبة فى حد ذاتها
فهمت قصدى
انا معاك حرر البنى ادم تاخد منه احلى شغل
استعبد البنى ادم يديك هو , بس مش حيديك شغل , يا ابيح
====
صنع الله ابراهيم مأخدش حاجة من ادريس و بلاش الاشاعات دى
ده اسمه توارد خواطر من جانب ادريس حتى لو كان ادريس كاتبها الاول
فده معناه ان صنع الله فكر فيها الاول و يمكن يكون قالها قدام ادريس و لا حاجة
فأدريس سبقه و كتبها الاول
صنع الله لا يقتبس

عباس العبد said...

بنت القمر
اقرى و ردى براحتك
و ربنا يسهل فى الردود
====
فانتازيا
شيلى الى انت عايزه تشيليه
خدى البوست زى ما انتى عايزه
====
ابو فارس
اولا حمد الله على السلامة
ايه الغيبة دى
ثانيا
انت مكنتش تقيل على قلبى انا
كنت تقيل على قلبه هو و انا مليش دعوة بيه
ثالثا
لما انت عندك كتب جامدة كده مقلتش عليها ليه فى التدوينات بتاعة الكتب
رابعا
علشان عرف اى مثقف انا بتكلم عنه الى بسخر منه
اقرأ كتاب الطريق الى زمش بتاع محمود السعدنى و انت حتعرف قصدى
خامسا
انا اؤيدك تماما فى وجهة نظر فروم
بدل واحد بيدوس على لازم ادور على حد ادوس عليه و اطلع عليه نقصى
فتلاقى مثلا جربوع جاهل فاكر أنه أفضل من أستاذه جامعه لمجرد أن جهازه التناسلى من الخارج وضوته خشن..
وبالتالى من "حقه" أنه يمد أيده عليها ويحسس ولا يهموش..
انا معاك تماما
و حياة فارس متقطع بينا

بنت القمر said...

رامز
تسمح لي وانا في غايه الغضب مش طايقاك
بجد
مش فاهمه انت عاوز ايه مش عاجبك الكومنت عند بلو وعاجبك اوي تعليق كراكيب ليه اشمعزة؟؟
معلش بقا انت مش ست ولا هو ولا تعرف شعورها ولو كنتوا صحابها ومن دينها ورحتوا المعرض سوا.. معلش التدوينه اللي انت كتبتها الراجل اللي اتحرش بيها مش ها يقراها ابدا
وكمان مين الكلب ده بتاعه هاني كمان موصلتوش دي مع كل تقديري وغضبي ومحبتي متفهمش ازاي التلاته سوا
بس مع كل دول
مش ها يعملوا لها حاجه مش هتقدم حل واقعي
زي فكرة الدبوس
بما اننا في عالم وسخه زي ما قلتم والست والبنت منتهكه ومتهمه ليل ونهار يبقا الدبوس هو الحل
الدبوس هو الحل زي الاسلام هو الحل
مش عاجب جناب سعادتك اني حكيت لها عن موقف انا اتعرضت له
امال عاوز ايه؟؟انت عملت لها ايه تقدر تحرسها؟؟
تمشي معاها
انا قدمت لها تعاطف ومشاركه انسانيه علي اعلي مستوي زي جلسات العلاج الجماعي بتاعه المدمنين انا احكي والاخر يسمع
وقدمت لها كمان حل
السكينه في الشماسه
زي الفيل في المنديل
ده اسمه حل واقعي مش فلسفسي خنيق
انا من يومها بخرج بسكينه صغننه زي اللي بنقشر بيها برتقان في شماسه العربيه
دا حل طالما الاوضاع لن تتغير في المستقبل القريب والبعيد
يبقا البت عاوزة حد يطبطب عليها يقولها انتي مش لوحدك
كلنا بيتحرش بينا انتي مش غلطانه هو اللي رمه ووسخ
بس
يتبع

بنت القمر said...

كمان انت معترض علي الناس اللي مش بتعمل للضحيه حاجه ولا علي فكرة ممكن اوي ما يكونش مسك رجلها بس ممكن يكون التحرش اقصي واوسخ بس البنت اتكسفت تتكلم عشان بريستيجها وكده وكتبت جمله موحيه وخلاص
بس اعتقد انه كان اكتر عشان اللهجه والصورة بتاعه البوست تحمل الم عميق_نرجع تاني
انت معترض علي الناس اللي عاجبهم ابو تريكه والناس اللي ما ساعدوش بلو والناس اللي عندها تقييم احادي سواء ديني او اخلاقي مش ملا حظ انك معترض كتير اوي طحن؟؟
انا كتبت بوست السابق اسمه انظر الحل بالمقلوب بلييييز اقراه
كنت بالاختصار شايفه ان الكل مش مش شايف انه غلط رغم ان في غلط وصح واضحين وافترحت نجيب مجرم ونحمله جميع خطايانا ونشنقه ونخلص
المهم انت عمال اعتراض
يا اخي هما بتوع الكورة مش بنحسبهم نجوم المجتمع زي الفنانين بالظبط ولما نقعد نقول التلفزيون والاعلام بيغسل لنا دماغنا ان نجوم الكورة والممثلين هما الصفوة نزعل ولما واحد منهم يعمل من موقعه حاجه صح اوي يعبر عن موقف نقول عادي
الله امال احنا عاوزين ايه؟؟ انت عاوز كمان تحكم الناس وتظبط ردود افعالهم عاي مقاس جمجمتك
انت غريب اوي
يتبع

بنت القمر said...

مش عارفه ليه يا اخي فكرتني بالبوست بتاع الصارم الحاسم اللي كان زعلان من سلبيه الناس وانت قلت ان الناس غلبانه ومطحونه
سبحان الله
العداله الالهيه.. ادي انت مكانه دلوقت وبتلعب نفس الدور دور المعترض!!ا
عاوز ايه يا رامز عاوز الناس تقف تستلم منك كشف اولويات الاعتراض الاول تحرش النساء ثم غلاء الاسعار ثم غزة اللي في القلب زي موبينيل في القلب.؟؟
هو انت يا اخي ها تحدد اولويات الناس في الغضب ؟؟ايه ام الديكتاتوريه دي؟
كل واحد حر اللي زعلان علي غزة بيتحرشوا بأمه واخته ومراته كل ساعه او في نفس الثانيه اللي بيكتب او ينزل بانر غزة بس للاسف الفعل من كتره بقا واقع وبقا جريمه تتعايش معاها للاسف كل يوم
طب نقول ايه للناس عشان في تحرش ومش ها نقدر نعالجه ولا نحلله ولا نقضي عليه ما تزعلوش علي غزة سيبوهم يموتوا متتعاطفوش انسانيا مع اي حاجه خليكم خشب طوب؟
يعني الناس تتبلد
تموت
غريبه اوي منطقك
وبعدين يا اخي كل واحد ليه احساسه ومنطقه واولوياته مش قداستك اللي ها تحددها ولا منطقك هو اللي ها يمشيها ولا ها تديهم ليسته اولويات
فقط ابدأ بنفسك واصلاح نفسك

بنت القمر said...

اه كمان حكايه بقا الهه هواه والعجوة والقس مش عارف مين وخروج اليهود
والكلام الجميل ده كله عاوز تقول ايه؟؟ عاوز تقول ان كل شيئ نسبي وان الصح والغلط مرهون بالنظرة الذاتيه اللي بيخش فيها التقييم الديني او الاخلاقي او اي حاجه طب ما مفهوم
امال اله الاعلام حضرتك بتلعب علي ايه
علي تغيير نظرة وقناعات الناس ان المتدين ارهابي وان الفقير حاقد وان الغني فاسد ..الخ
لان الاعلام مبرمج عشان الحكومه لها موقف من المتدينين او الاسلاميين الاتجاه
مش بحب استعمل كلمه اخوان ولا متأسلمين ولا اخواتها
تقوم تطلع ابراهيم ابن حماده عزة تدين وبقا يصلي في الجامع عشان هو رافض وضعه لان امه خدامه!!ولما يتدين لازم يرفض العمل في شاطيئ عراه ويقدم خمور
الله ما يمكن هو قناعته كده واختيارة كده لازم المتدين يكون ارهابي وعويل وما بيشتغلش؟
بس الاعلام عاوز كده عشان الحكومه وتلفزيونها القومي الشمولي الحنجوري عاوز كده
مفيش متدين معتدل مفيش بطل سينما بيصلي
لكن لازم يزني ويشرب خمور ويعاكس المزة طول الفيلم
انظر هاني سلامه واحمد عز واحمد السقا
بتبع

بنت القمر said...

طيب يا رامز مش ده لعب في العقول
انت بتقول نؤخرتنا ملكيه عامه وانا بقولك ودماغنا كمان بقت ملكيه عامه وعيك ونظرتك وتقييمك بيتلعب بيهم وبتتسقي مفروض تقول ايه وترفض ايه لازم تقبل ان بسرا مزة ولو انها عدت الخمسين وتتقبل انها بنت احمد خليل لو انها تصلح مراته انظر ملك روحي
تقبل ان خيريه احمد خدامه فيفي عبده
عشان المخرج عاوز كده
لازم
يتبع

بنت القمر said...

طيب نعمل ايه كل واحد يحاول انه يصلح نفسه بدل ما يقول كلام حنجوري وهي مش طالبه خالص_______________
نقطه تانيه بقا
البنت بتاعه السرطان اللي ها تتمرد اظن اننا اتكلمنا كتير في حكايه القدر والموت والتمرد علي الاب اللي بتحبه والكلام اللي انت عارفه كله طب بتعيده ليه؟؟
عندك هيستيريا بالتمرد ليه؟؟
قلنا ها تموت وتلحد قلت لا انا مؤمن جدا واطلعوا من البلد
طب با عم مؤمن كل ما تقول الكلام ده يخش احدهم ويقولك الدين مش بيقدم اجابه
والسيناريو بيتكرر كل مرة
عارف فكرتني بأيه بالافلام الدينيه لما يصوروا اللانسان جمبه ملاك او شخص مؤمن ولازم يكون لابس ابيض والكافر او الشيطان لابس اسود
اهو انت بقا عملت زي الافلام دي واقف بين المعلقين والزوار وناس حواليك لابسه ابيض وناس لابسه اسود
ناس بقول كلام بشدك ويقوي ايمانك وناس فرحانه وبتضحك جوة الجزمه وكانها كسبت عضو جديد في جمعيه..اللادينين
طبعا انت حر جدا مدونتك وتكتب اللي انت عاوزة انشا الله تكتب ريان يا فجل!!
بس عندي سؤال عشان نظريه المؤامره ناقحه عليه تكونش انت اللي بتضحك علينا وعاوز كل واحد فينا يطلع اللي في عبه وتعرف جوانا ايه وانت حاسم موقفك اصلا
وانت بشر عادي زينا بتنتابك الاهواء والهلاوس
وكده بس بتكرر كلامك وتمردك كل شويه
خلاص كده غالبا اختصرت كل افكاري تقريبا وان كان هناك المزيد
بس طولت اوي
اسفه خالص
وما تزعلش مني
مقصدش اي اهانه ولا غلط وكلامي وغضبي كله داخل اطار الاحترام والتقدير ليك
سموي
بنت القمر

أبوفارس said...

باشمهندس رامز..
أنا تانى..
معلهش آسف بس سعدنى مين ده اللى أقرا له..ده أراجوز..مع كامل اﻷحترام..دى قراءات حمام ياباسمهندز وأنت أو أنا أسم الله على مقامك نصارع اﻷمساك..
القراءات الحقيقيه هى التى تغير رؤيتك للعالم..كتاب "آريك فروم" مترجم فى السبعينيات للعربيه وأسمه "الخوف من الحريه" ترجمه أذا أسعفتنى الذاكره مجاهد عبد المنعم مجاهد.ولكن لو تستطيع اﻷفضل قرايته باﻷنجليزيه..وسيبك والنبى من كتب اللاهوت دى عامله زى كتب الفقه لاتضيف شئ..يالهوى هم المصريين كلهم أتدروشوا والا أيه..يافقه السنه..ياكتب لاهوت..وعايزينها تطلع خطوه للأمام بأماره أيه ياعنى..
أتفق مع أسكندرانى فار آوى فى نقطه أن اﻷديان الساميه ليس عندها القدره على أعطاء حلول لمشاكلنا اليوم..أنا أتكلم عى الوضع اﻷجتماعى - السياسى..مكانها الوحيد هو الروحانيات وفقط..فلا تضيع عمرك محاولا بناء جسور تصل شطى المحيط..
كان غيرك أشطر..
أقراء ياسيدى لجماعه فرانكفورت..وهم يناقشوا نظريه المعرفه ناس زى "جورينج هابيرماس" مثلا..أو تحليلات "فوكو" للجنس والسلطه..
وغيره كتير..
حاجه مكتوبه اليومين دول..ليها علاقه بما يحدث اليومين دول..
بدل دخان الفقه واللاهوت ياهندزه..
تحولات الرأسماليه على كافه المستويات فى كتابات "ناعومى كلين" مثلا..بص عندى عامل عرض متواضع ﻷخر كتاباتها..تحياتى خالد
*********
بنت القمر
تسلم أيديك عميق أحترامى..خالد

عباس العبد said...

هيه هيه هيه
بنت القمر غضبانه
هيه هيه
بنت القمر غضبانه
====
اولا
انتى نورتى المدونة و حمد الله على السلامة
انا مش حرد عليكى نقطة نقطة و لا حتى حرد عليكى من الاساس
علشان احنا متفقين
عايزة تشوفى ازاى
حثبتلك من كلامك ان احنا متفين
ولا سحر و لا شعوذة
ايدى فاضية اهيه و ادى الكومنتات
" يبقا البت عاوزة حد يطبطب عليها يقولها انتي مش لوحدك
كلنا بيتحرش بينا انتي مش غلطانه هو اللي رمه ووسخ "
ما انا قلت كده
و هو انا مشاركتهاش و لا كلمتها و لا وقفت جنبها
انتى كلمتيها و عرفى الى دار بينا
مين قال انى مشاركتهاش و قلتلها مواقف حصلت مع بنات تانية
و قلتلها على موقف حصل لولد مش بنت
واحد تحرش بولد
ليه حكمتى اننا كبنى ادمين مطبطبناش عليها
هى بلو ممكن ترد احسن منى
انا انفعلت بس كده فكتبت
زى ما انتى انفعلتى و حطيتى سكينة فى الشماسة
ثانيا
انا معترضتش على غزة
بالعكس انا مؤيد للى عمله ابو تريكة و الى عملته نقابة الاطباء
لأن كل واحد عمل كده فى الحتة الى بيعرف يعملها
اعمل ايه اكتر من كده
و انا قلت كده لكل واحد كتب انى معترض على ابو تريكة
انا معنديش مشكلة مع ابو تريكة
اقرى الى انا كتبه لمحمد المصرى
و بعدين انا محدتش اولويات الناس يعنى انتى لما تكتبى بوست تركزى فيه على سلبية معينة يبقى بتحددى اولويات الناس
ظلمتينى يا ظالمة
اما بخصوص حكاية ان الاعلام بيلعب فى العقول
فاحنا متفقين
و علشان كده جبت سيرة الفيلم الى كانت بتعرضه اسرائيل فى فترة معينة
و هو يا حرام الفلسطينيين بيحاولوا يبيدوهم
ما احنا عارفين ان الاعلام بيلعب فى العقول و دى حاجة معروفة و انا مش ضدها
و بعدين فى البنت بتاعة التمرد مش الالحاد
الى كاتب الكتاب راجل راهب و اسمه فى الاخر اليسوعى و هو بيتكلم عن التمرد على الواقع و على الى حطيته الناس فى مخنا
يبقى فين بقا الى انتى عايزه تقوليه
و اخيرا
انا مش شايف اى اختلاف بين الى انتى كتبتيه و الى انا عايز اقوله
و بعدين انا مش زعلان منك و لا من غضبك
شوفتى بقى اننا متفين فى كل حاجة
حتى فى انه انا مش زعلان منك و من غضبك
الهدف من الموضوع ده
الجريمة لا تفيد
انا كتبت حاجات فى المجمل اقصد بيها
ان ممكن تبقى فى قضية صغيرة صغنتتة خالص لو اتحلت تحل باقى الحاجات
انا عايزك تقرى رد ابو فارس
هو ده الى اقصده
بس
و يخرب بيت دى تدوينة
لو حتزعلك منى
امشى يا تدوينة امشى
=====
و بعدين زى ما انتى شفتى
ابو فارس بيؤيدك و معجب بردك
و هو الى بيقول انه اسيبنى من كتب اللاهوت و ان الاديان مبتجاوبش على الاسئلة الكبرى
و بعيدين شفتى قال ايه
" وسيبك والنبى من كتب اللاهوت دى عامله زى كتب الفقه لاتضيف شئ..يالهوى هم المصريين كلهم أتدروشوا والا أيه..يافقه السنه..ياكتب لاهوت..وعايزينها تطلع خطوه للأمام بأماره أيه ياعنى.. "
ردى عليه مش على انا
انا جى اهدى النفوس
=======
هيه
بنت القمر غضبانه
هييييييييييييييييييييه

عباس العبد said...

السيد ابو فارس
حبيب قلبى
محمود السعدنى مش اراجوز
ده كاتب ساخر
مش اراجوز
و دى نقطة مهمة و سخريته زى ما هو باين من الالفاظ ساخرة
و بالتالى نتيجة انه سخريته ساخرة
فالناس كأى كاتب ساخر و نتيجة لسخريته الساخرة
بتضحك و الضحك زى ما انت عارف بيبقى نتاج للسخرية الساخرة
و دى الى بيتميز بيها كاتب ساخر زى محمود السعدنى ذى السخرية
واخدلى بالك , فهمت قصدى
ثانيا
الاراجوز دى حاجة مش عيب علشان نوصف بيها كاتب ساخر زى محمود السعدنى
الى زى ما اتفقنا و قلنا عليه
قلنا ايه ؟
ايون تمام
سخريته ساخرة
و اذا كنت مختلف معاه فعادى جدا يعنى
لكن انت محددتش انى حتة من سخريته الساخرة انت مختلف فيها معاك
======
الجد بقى
موضوع كتب اللاهوت دى حب
انا بحبها و خصوصا اللاهوت الجديد الى بينادى بنفس الى انت قلته
" حاجه مكتوبه اليومين دول..ليها علاقه بما يحدث اليومين دول.. "
علشان كده بيسموه اللاهوت الجديد و خصوصا بتاع لاهوت التحرير
الى خرج اساسا فى امريكا اللاتينية ضد الفقر و المرض و الجهل و الفساد و الاستبداد و الطغيان
و مش بيناقشهم بطريقة دينية خالص
زى ما انت قريت فى الجزء الى انا مقتبسه
اما انها مش حتغير الواقع فده مشترك مع اى كتابات تانية
يعنى ايريك فروم غير ايه فى مصر و هو منشور من السبعينات زى ما انت قلت
للأسف يا استاذ خالد
كلمة دين او لاهوت او حتى فقه اسلامى , نتيجة تراكمات من عصور سابقة و انا متفق معاك
ادت لأن الواحد يبقى حساس من كلمة دين
مش لازم تبقى علمانى علشان تحس بالفقرا و بالفساد و بالظلم و الطغيان و الاستبداد
و مش لازم تبقى متدين بمفهوم شعبى علشان تحس بيهم برضه
الظلم مش محتاج اله يعرفنا بيه و لا محتاج ملحد يفكرنا بيه
الظلم موجود سواء كان فى اله او لا
و الدين حيحاربه حتى لو مفيش دين اصلا
لكن الدين الى يقف قصاد اريك فروم يبقى غلطان
و اريك فروم الى يقف قصاد اللاهوت يبقى غلطان
لأن الاتنين ليهم نفس الهدف
الانسان
لكن لو الدين اصبح هدفه ذاتى يعنى من اجل الدين فقط
يبقى سقوط عظيم
و زى ما انت قلتلى على كتب
انا ممكن ابعتلك كتاب على الميل صغير
اسمه لا اؤمن بهذا الاله
و انت حتفهم قصدى
الا لو كنت بتخاف من قراية الكتب الدينية او عندك حكم مسبق عليها
يبقى ساعتها انا احسن منك
علشان انا مش خايف انى اقرا اريك فروم و بالعكس متشوق انى اقراه
يمكن استفيد و اغير مفاهيم عندى كتيرة و يبقى انت كسبت ثواب
و لو مش عايز الثواب اخده انا و اهو كله مصالح
هههههههههههه
.....
بالنسبة لحكاية الامساك
و حياة فارس
بلاش موضوع الامساك ده
انا معدتى بايظة اساسا
ههههههههه
سلام يا باشا و ليك وحشة

أبوفارس said...

كده نتكلم..بص ياباشمهندس..أنا قلت أن الرجوع لكتب اللاهوت والفقه فى كل صغيره وكبيره وبديهيه فى حياتنا هو تعطيل ﻷهم ملكات اﻷنسان كأنسان وهى العقل..اﻷسئله الكبرى فى الحياه ممكن الدين -أى دين- يجيب عنها..أحنا هنا ليه ماهى غايه وجودنا!!؟؟وهى أجابات معقوله ومنطقيه..ولكنها غير قابله للتحقيق والتمحيص..يبقى مفروض ناخدها كده زى ماهى..وهذا هو اﻷيمان..ولكن أنسحاب اﻷيمان ده على كل مناحى الحياه كارثه..أظن لو نظرت حولك بتجرد لدقائق ستدرك ماأقوله..أنا لاأخاف الكتب الدينيه ولا التجربه الدينيه بل أظن أنى أمتلك الكثير منها بحكم الظروف..فأنا ياعزيزى أتعامل وأحتك وأتناقش مع هندوس ويهود ومسيحين وبهائيين بكافه طوائفهم وأحضر مجالس التعزيه مع أصدقائى الشيعه..ومارست التأمل مع صديق يوجى هندى..فتجربتى الدينيه بالمعنى الواسع للكلمه أكبر وأعمق من الكثيرين..وكل هذا أدى بى لقناعه محدده..أن كل اﻷديان صح..لو أخذت بجرعه مظبوطه..نزود الجرعه ندخل فى الهوس الدينى اللى بعض المفكرين بيقولوا أنه سيكون سبب أنتهاء هذه الحضاره..يعنى أنا كمسلم عندما يشتد بى اﻷمر أجلس وأقرء سوره الرحمن أحب سور القرآن الكريم لقلبى..لو كنت يهودى كنت سأضع الكابه على رأسى وأهيم فى التوراه..لو هندوسى حأخد دش وأدعو راما كريشنا لنجدتى..كل ده صح..تصدق وتأمن بالله..الله ده حاجه كبيره قوى الطريق أليه متعدد بتعدد مخلوقاته..ياباشمهندس التحرير بيوصلوا له من عشرين طريق..الله حأوصل له من طريق واحد..أى ضيق أفق وأى غرور..؟؟!!نرجع لموضوعنا عشان مانتوهش..هل تحتاج فتوى من شيخ أو عظه من قس لتعرف أن أقتحامك لجسد أمرأه حتى لو كانت زوجتك خطأ..هل تحتاج لمن يفتى لك أن وضع يدك على مؤخره زميلتك فى العمل أو على فخذ جارتك فى وسيله نقل عام خطأ..فاكر صور تعذيب العراقيين فى أبو غريب عملت فينا أيه..أى كلب يقتحم جسد أمرأه يفعل بها تماما كما فعل كلاب اﻷمريكان مع معتقليهم..تدمير للنفسيه..أحساس المرأه بجسدها أعمق وأحد من أحساس الرجل بجسده..ﻷنها تمنح الحياه من خلال هذا الجسد..وتتعامل معه برفق ورقه لانفهمها نحن الرجال..تعرف هنا فى كندا بلد البرد والتلج لاتستطيع لمس أمرأه بدون موافقتها..ولوحصل يالهوى..الويل والثبور وعظائم اﻷمور..أعرف زملاء مصريين مسلمين ومسيحين راحوا ف ستين داهيه ﻷنهم ظنوا أن زميلته فى الشغل لما تضحك معاه أو تخرج تتغدى معاه تبقى صيده يمد أيده ولا حتى يزود ف الكلام يترفد م الشغل ولو زى حالاتى صيدلى ولا دكتور ينزل مجلس نقايه وبعضهم فقد ترخيص مزاوله المهنه مت تحت راس اﻷستظراف ده...

أبوفارس said...

تانى أعتقد التفسير اللى قدمه مفكر زى "آريك فروم" لحاله مجتمع قمعى زى مجتمعنا هو تفسير صحيح..والحل هو التخلص من كافه أشكال القمع فيه..بما فيه القمع المؤسسى الدينى..ولكن حتى يحدث هذا أى أمرأه تتعرض ﻷنتهاك جسدى أو نفسى من حقها الدفاع عن نفسها بأى وسيله تراها صحيحه..بدبوس بالشبشب..بالصويت..وعلى "الرجاله" الدفاع عنها وردع الكلاب..
وياعم أبعت الكتاب وأن كنت أظى أنى قرأته
.....
بمناسبه لاهوت التحرير..
تعرفت شخصيا على واحد من مناضلى السلفادور وصديق شخصى للسنيور "أوسكار روميرو" القس العظيم الذى أغتالته فرق الموت فى ١٩٨٠ وكان أغتياله بدايه الحرب اﻷهليه الطويله هناك..كان فى زياره لكندا وقدمتنى له أبنته.. صديقه تعرفت عليها وعلى غيرها أثناء الحمله المناهضه لحرب العراق..وكان بيننا حوار طويل عن جدوى لاهوت التحرير وقدرته على تحريك الناس..ربما تأتى فرصه أخرى للحديث عنه..
سعيد بالحوار..
وماتزعلش لو قلت على السعدنى أراجوز..ولكنى قرأت له ولم أستفد ببصله ووجدت أنى أضيع وقتى عليه..ولكنه فعلا يصلح للقرأه ف الحمام..مثله مثل "انيس مذعور" أقصد منصور..تحياتى...خالد

محمد المصري said...

رامز

مش هطوَّل المرة دي متقلقش ، عشان من ناحية حضرتك لفيت لفيت ونزلت عند اللي أنا كنت بتكلم فيه بالظبط .. ومن ناحية تانية فيه مناقشات دايرة فبلاش أدخل على الخط

بالمناسبة أنا مكنتش عايز والله أعمله نقاش مثقفين .. ولا كان قصدي أنظَّر ، أنا بس اتفلسفت لإن حضرتك في تدوينتك طرحتها من منظور فلسفي تام .. بحث عن القيمة أو افتقادها ، وزي ما قلت أنا مش شايف الفلسفة غلط !

اللي عايز أقوله بس إن بلاش نحط أبو قرش على أبو قرشين ، فيه فرق كبير وواضح بين الغضب وبين الاندهاش وعلاقتهم بتقييمنا للشيء ، الاندهاش بيكون من فعل بيحصل لأول مرة .. من فعل غير معتاد والاندهاش مستحيل أبداً وبأي حال من الأحوال يحصل ميت مرة !! وقتها يا هنبقى بنهرج ونضحك على بعض يا إما عبط عاملين زي الصعيدي اللي اضرب 30 قفا على سهوة

لكن الغضب وضع مختلف
حضرتك ممكن فعلاً تقيس ( ثبات القيمة ) بمدى غضبنا اتجاها

وده - تحديداً - اللي أنا صوتي اتنبح في الكونينتات اللي أطول من التدوينة وأنا بتكلم عنه ، إذا كنت انتَ غضبت .. وأنا غضبت .. وكل من علقوا عند بلوستون غضبوا .. والناس نفسها لما ده بيحصل بتغضب وتشمئز وبتدخل لنصرة الفتاة

معنى كده إن القيمة ثابتة يا رامز .. والرجل لم يعيد كتابة التاريخ ولا أي شيء ، الرجل فقط خرج عما هو متفق عليه .. وتم رفض ده من الجميع

معاك طبعاً إنك في وقت ممكن تتعامل فيه مع الفعل باعتيادية زي فعل الرشوة مثلاً من كتر تكراره ، بس بمنظور غير فلسفي فشيء بيدخل في العرض - بالمفهوم الشعبي - من المستحيل ربما التعامل معاه باعتيادية مهما ساءت الأحوال ومهما تغيَّرت

أما عن الحل فانتَ اتفقت معايا - وهاني اتفق معايا - إن الأساس إنك تدي للبني آدم حقوقه وتحسسه إنه بني آدم ، وده في نظري هو الحل الوحيد ، ولو تحقيقه بيستلزم سنين وسنين ومش مرتبط بالفرد أو مجموعة من الأفراد قد ما مرتبط بالمجتمع - بمفهومه الواسع - ككل ، فمن الطبيعي إن الناس تدور على وسيلة تدافع بيها عن نفسها بعيداً عن أي فلسفة .. انتَ بس بتحمي كرامتك زي ما قالت بنت القمر ..

وصلنا لنقطة وسط يا أستاذ ؟؟

ارجع اقرا التدوينة بهدوء وانتَ هتعرف اختلافي معاك نبع منين .. واتفاقنا - إلى حدًّ ما - في ردي ده جه منين

بالمناسبة انتَ مردتش عليَّ في بعض الحاجات ممكن نتكلم فيها على القهوة بعدين ، معنديش مشكلة ممكن اتفقت معايا أو معندكش تعليق ، بس كان منها موضوع أبو تريكة وبعدين قلت للبنت اقري ردي على محمد المصري ، ردك إيه ؟!! ، يخرب بيت السُطَل يعني .. بطل اللي بتشربه ده يا رامز يا شرقاوي

--

بخصوص صنع الله ، فأنا مكتشف ده من زمان ، من وقت ما قريت اللجنة لإني كنت قاري القصة قبلها طبعاً
ومتحوَّرش المصطلحات .. مسمهاش اقتباس ولا توارد خواطر وبتنجان ، اسمها ( سرقة ) .. القصة متاخده كوبي وباست في الفصل الأخير من اللجنة من غير أي إشارة لأصلها

وديني يا رامز لافضل أذلك بيها طول عمري .. قال صنع الله قال

===

هستنى الكتاب بتاع اللاهوت الأدبي

ومش هعمل كومينتات تاني عشان خلصت كل اللي عايز أقوله بس هتابع الحوار بينك وبين عم أبو فارس وبنت القمر - لو هتقول حاجة تاني -

تحياتي لكل الناس اللي كتبوا في التدوينة

^ H@fSS@^ said...

ياااااااااااااااه
تصدقوا انا تعبت و انا بقرا النقاش اللي هنا
مش قصدي حاجة وحشة بس بجد كلام كتير
هل يا ترى مافيش طريقة تانية ننشر بيها الكلام ده كبوست تاني مثلا
؟
مش عارفة بس بجد تهت بين الكلام و التنظير و الشروحات و الكلام
ممكن تساعدوني و نلخص الحوار اللي حصل و نرجع نكتب نقاط تانية و نفنطها عشان نستفيد؟
انا بتكلم بجد لاني بجد فعلا حقيقي تهت و اتشتت

شكرا

بنت القمر said...

محمد المصري
___________________
ادي للبني آدم حقوقه واللي يكفله يعيش ولو بقدر ضئيل من سبل المعيشة وهو عمره ما هيعيش حياته كحيوان ، محدش بيختار إنه ميكونش محترم .. ومحدش بيختار إنه يهزق نفسه
_____________________________
اسمح لي عفوا
تسمح لي اختلف مع حضرتك مش كل واحد واخد حقوقه يبقا ها يكون محترم
مش كل واحد ما اخدش حقوقه حرامي وسافل
والا ها ندخل في متاهه التبرير وجعلوني مجرما انا ليا الفعل لو حد اتحرش بيا او سرقني مش سكتي اني اتابع حالته النفسيه والسلوكيه وما ضيه .وحاضرة وبيئته واحصر احباطاته وعقده
انا ليا النتيجه والغلطان ياخد بالجزمه
والا ها نبرر الجرايم كده
وفي المقابل في ناس ما اخدتش اي حاجه وعاشت في ظروف اجتماعيه واقتصاديه نيله ومحترمين
_________________
العلاج هو دايما الاجراء الرادع والقانون ومتبقاش الحكايه فوضي
لو حد لمس اختك او مراتك والعسكري قفشه لازم ياخد عقوبه من تلات الي ست شهور مثلا
فاكر يا عزيزي زمان كان اللي يسرق يجرسوه
عارف العقوبه دي ؟؟
والنعمه اختراع عبقري يقعدوا المدان علي حمار بالمقلوب ويزفوه الفضيحه.. فكرة الفضيحه والاهانه..
معلش اصل عندي ميول ساديه شويه
اسأل حتي بلو ستون لو اللي عمل معاها كده تختار يتحط في مصحه علاج نفسي وتأهيلي ولا ياخد تلات شهور
انا عن نفسي وعن تجارب كتير مرة اختار التلات شهور كحل رادع البلد دي عاوزة قانون مش تحليلات والتماس اعذار
لو كل واحد سرق بنك وعرب ولا اغتصب طفل لو بنت
او غش بناء عمارة خد بالجزمه واتعاقب صدقني الحياه ها تختلف كوبمليتلي

احنا بحاجه للقانون اظن مش عارفه مين قال في كندا محدش يقدر يمد ايده علي ست عشان.. القانون الا بموافقتها
ده مش عشان هما احسن ولا واخدين حقوق اكتر لكن عشان في خلفيه تفكيرة عواقب الامر
لكم اجنا بقا نجلد الضحيه يعني انا السنه اللي فاتت اتعرضت لموقف بايخ تحرش برضه
ولما حكيت لامي اول كلمه قالتها لي كنتي لابسه ايه؟؟
اما قلت لها كنت لابسه جاكيت قطيفه طويييل وبنطلون جينز زعقتلي
وقالت بلاش تنزلي ببنطلون جينز بالليل!!ا
رغم ان الجاكيت قرب الركب
المهم
احنا بنجلد الضجيه بس
ممكن التحرش يكون لفظي حد يقول كلمه خارجه ويكمل طريقه
والواحد يكون متكلفت طحن ها تدور بقا علي حرمانه العاطفي وكبته وعقده ولا تديله بالجزمه

بنت القمر said...

عباس العبد:
قلبك ابيض ..ده غضب محكوم.... ....
اندر كونترول
مش اكتر ..بدليل اني قلت في الاخر ان ما كتبته داخل اطار الاحترام ليك
______________________
المهم
انا خايف يحصل الاتى زى ما شرحته انك تطلع الاوتوبيس و انت لابس الكوفية الفلسطينى و تى-شيرت مكتوب عليه غزة فى القلب , تلاقى الناس واقفين صفوف بيهتفوا بسقوط اسرائيل و على الكنبة فى اخر الاوتوبيس واحد بيغتصب واحدة و هى عمالة تستنجد و الناس يبوصولها و يقولوا لبعض " ايه الى ركبها فى عز الزحمة , هى الغلطانة " و بعدين يدوروا و يكملوا هتاف بسقوط اسرائيل____________________
هو ده اللي اقصده
بتحديد اولويات الناس قد يكون من يسرق او يغتصب فعل يومي غلط لكن واقع معاش
ازاي تقول للناس وتحدد لهم اولويه انهم يعترضوا ويتظاهروا علي ايه وايه لأ
ايه الاول وايه بعديه وايه الاخر__________________
اخيرا..
رد ابو فارس
مالو ابو فارس مقالش حاجه غلط
عشان تهدي النفوس
قال المصريين غرقانين في كتب الفقه واللاهوت طب ما صح
انا كتبت بوست قبل كده بنفس الصيغه اسمه انسحاب ابقا دور عليه عندي
وشفت انه نوع من الانسحاب عن ومن الواقع
ونوع من الاكتئاب
انظر علاء الاسواني في روايه شيكاغوقال: ده مش تدين ده اكتئاب جماعي
هو حد قالك اني بتاعه حرام حرام بالعكس انا رصدت حاله الهوس ببرامج وتليفونات الفتاوي في كل صغيرة وكبيرة وكراكيب كان ليه مداخله لطيفه وقال حكايه ان بعض المسيحيين بتتعنت في استعمال العيش الفينو المعمول في صواني الكحك عشان مدهونه سمن
انت شايف ليه لازم ارد علي ابو فارس؟؟
هه
ولا انت متغاظ وها تموت انه شكر في؟؟
عموما شكرا ..عباس شكرا.. ابو فارس

karakib said...

بنت القمر
انت بتقولي ردا علي محمد المصري
________________________

ادي للبني آدم حقوقه واللي يكفله يعيش ولو بقدر ضئيل من سبل المعيشة وهو عمره ما هيعيش حياته كحيوان ، محدش بيختار إنه ميكونش محترم .. ومحدش بيختار إنه يهزق نفسه
_____________________________
اسمح لي عفوا
تسمح لي اختلف مع حضرتك مش كل واحد واخد حقوقه يبقا ها يكون محترم
مش كل واحد ما اخدش حقوقه حرامي وسافل
والا ها ندخل في متاهه التبرير
___________________________

اسمحي لي انت .. لأنك وقعتي في متاهة الامور المطلقة
طبعا مافيش قاعدة مالهاش شواذ .. يعني الطبيعي لما اهتم بطفل صغير يطلع ذكي
و لما ما اهتمش بيه يطلع غبي
بس ده ما يلغيش انه في احتمالية و لو واحد بالمئة انه ما يطلعش زي ما انا عايز
و ده اكيد مش مبرر لأني اقول لأ سيبك بقي ماهي مالهاش دعوة اساسا
الامور المطلقة مش موجودة في حياتنا اساسا
اكيد مش كل واحد واخد حقوقه هيبقي محترم
موافقك طبعا ! بس ده مش معناه اننا ما نفكرش ازاي نجيب للناس حقوقها
الناس دي اللي هي انت و انا و كل اللي نعرفهم
و تاني من الاول في فرق كبير ما بين العرض و المرض
اعراض المرض بتقول انه في تحرش
ممكن نعالج اعراض الانفلونزا بقطرة انف فيتوقف الرشح
لكن يظل الفيروس موجود و بيأثر علينا
ممكن نشك المتحرش بدبوس
لكن ده مش هيخليه يتضايق اوي زي ما انت فاكرة
لأنه بعد شوية هيبقي فاهم انه ممكن يتأذي و هياخد باله و مش هتلحقي تشكيه يبقي لازم الحلول تمشي مع بعضها متوازية و الا تصبح مسكنات مش علاج
_____________________
بتقولي
العلاج هو دايما الاجراء الرادع والقانون ومتبقاش الحكايه فوضي
لأ الحكاية مش فوضي بس اننا نعتبر الاجراء الرادع وحده هو العلاج
ده يخلق فوضي
الاجراء الرادع حاجة من حاجات كتير لازم تحصل
ده غير انه الاجراء الرادع او القانون لا يطبق علي كل الناس
و دي لوحدها كفيله بهدم اي نظريات او كلام و ده يخلينا نرجع تاني لنقطة الحقوق الضائعة
_____________________

بعدين عقوبة التجريس دي سيئة للغاية بصراحة شايفها لا انسانية زيها زي عقوبات تانيه كتير منها الاعدام
ده غير انه عمرها ما هاتطبق الا علي الغلابة اوي اوي اوي
________________________

طبعا ما ينفعش نحط الضحية مكان الجلاد و لا نقول لبس البنات
طيب ايه رأيك بقي بالمناسبة بتاعة لبس البنات
ساعات كتير بيوحشني منظر الستات و البنات لابسين جيبات !! كله بنطلون جينز جينز جينز
حاجة توجع القلب يعني ! هو البنت تبقي بنت الا لو كان شكلها حلوه كده و متوضبه !؟ لأ طبعا مالهاش علاقة
لأنه المتحرش مش هيسيب حد لأنه فقد احترامة لنفسة و مش مهم عنده يتهزق و كل ده أدي الي انه تحول لحظيا الي حيوان جائع مش مهم اللي قدامه لابس ايه
انما المهم انه جعان
عايز ياكل و بس
يعني انت كنت لابسة كويس و زي باقي الناس و يمكن اكتر شوية و برضه ده حصل
يبقي هو مش فارق معاه اللبس اكيد

و اخيرا
نهارك سعيد يا بنت القمر :)

karakib said...

بنت القمر
مالو ابو فارس مقالش حاجه غلط
عشان تهدي النفوس
قال المصريين غرقانين في كتب الفقه واللاهوت طب ما صح
__________________
صح بشكل مش طبيعي ده صح اوي
مافيش حد في مصر بيقرا حاجة
و لقينا ناس بتقرا بعد شوية مجهود هنلاقيهم بيقروا كتب دينيه
و كتيبات صغيرة غريبة نفسي أعرف اللي بيألفوها عايزين ايه من اللي بتتباع عالرصيف دي
_________________________

ده مش تدين ده اكتئاب جماعي
علاء الاسواني ده لازم ندي له جايزة الدولة التقديرية
و ياخد جايزة نوبل كمان

عباس العبد said...

ايه ده كله
ايه ده كله ؟
=====
محمد المصرى
شوف يا ولدى
انت سئلتنى سؤال انا عايز ايه ؟
سؤال ظريف
بس ملوش تبرير فى السياق
حلوة تبرير فى السياق دى
المهم
انا عايز ايه
ممكن اقولك عايز جنيه سلف او عايز سيجارة
لكن انا مش حقولك كده
انا كل الى حقولهولك
انا مش عايز حاجة !
لأن لو قلتلك انا عايز ايه حبقى بتاع انشا
انت زعلت انى شرحت فكرتى للناس فى التعليقات و انتى عايزنى اقول انا عايز ايه مباشرة كده
انا عايز سلامتك و سلامتى و سلامة الناس كلها
فاهم قصدى
بنت القمر كتبت تعليق على تعليقك و قالت فيه
" مش كل واحد ما اخدش حقوقه حرامي وسافل
والا ها ندخل في متاهه التبرير وجعلوني مجرما انا ليا الفعل لو حد اتحرش بيا او سرقني مش سكتي اني اتابع حالته النفسيه والسلوكيه وما ضيه .وحاضرة وبيئته واحصر احباطاته وعقده
انا ليا النتيجه والغلطان ياخد بالجزمه
والا ها نبرر الجرايم كده
وفي المقابل في ناس ما اخدتش اي حاجه وعاشت في ظروف اجتماعيه واقتصاديه نيله ومحترمين
_________________
العلاج هو دايما الاجراء الرادع والقانون ومتبقاش الحكايه فوضي "
.......
مش هى قالت كده ردا عليك
و ده الى انا قلته
الفرق انها قالت انه يتحبس و انا قلت يضرب
و المقصود الردع
و انا عايز كده
بس ردع مش بقوة القانون , ردع بقوة الانسان
تسميه اخلاق , ايمان , تدين , وحدة , هبل , عبط
سميه زى ما انت عايز تسميه
نقطة تانية فى كلامك مثيرة جدا و تستحق التأمل
" من فعل غير معتاد والاندهاش مستحيل أبداً وبأي حال من الأحوال يحصل ميت مرة !! وقتها يا هنبقى بنهرج ونضحك على بعض يا إما عبط عاملين زي الصعيدي اللي اضرب 30 قفا على سهوة "
الجملة دى مصيبة سودة
و بما ان انا و انت ممكن نتكلم من خلفية دينية
فحقولك سؤال و انت حتفهم اجابتى
ممكن تقولى ليه ربنا بعت انبياء كتير و كلهم بيقولوا نفس الكلام
و لا هو عايز يضربنا 30 نبى على نافوخنا
ما كان ممكن يكتفى بواحد و يعيد طباعة الكلام
و لا ليه فى اى كتاب من الكتب السماوية
ربنا بيكرر نفس الكلام فى اكتر من ايه و باكتر من طريقة و سعادتك ليه بتقراها كلها – كل الايات يعنى
ما كان ممكن يكتفى بأيتين تلاتة بدل ما يقولنا 30 اية ليهم نفس المعنى
و ليه سعادتك بتقراهم كلهم و كل مرة بتستفيد
و لا انت قريت خمس ايات و يجى واحد يقولك ايه ليها نفس المعنى
تقوله " قديمة " سمعتها قبل كده
الاندهاش يا بيه هو انك بتفاجىء بفكر جديد فى كل مرة بتشوف نفس الموقف
و ده الى على الرغم من تكرار النبوة و الانبياء من ايام ادم
و الانسان لم يتوقف عن الاندهاش
و دى شيمة المفكرين و الفلاسفة
و بما انى عارف ان معاك ثانوية عامة بس
و ان شاء الله مستقبل السينما المصرية حيتدمر على ايديك الكريمة
فحديك مثال اخر سينمائى
ممكن تقولى
كل الناس من ساعة بداية السينما و هى عملت كل الافلام و كل الافكار
و مع ذلك بتشوف فيلم معين تندهش بيه و متقولش ده اتعمل قبل كده
و حتى لو اتعمل قبل كده و الفيلم متاخد من فيلم قديم
بتقولو انتم يا معشر السينمائيين , معالجة جديدة
التدوينة دى بقى معالجة جديدة
عرفت انا عايز ايه ؟
كفاية عليك كده
انت اخدت من وقت تاملاتى الفلسفية زيادة عن اللزوم
تكلم , تكلم يا فتى حتى اراك
=====

عباس العبد said...

ابو فارس
احنا مش مختلفين
انا مقلتلكش لا الدين بس و لا الفكر بس
انا قصدى انه اكيد معالجة واحد اقتصادى لأمر اقتصادى حتبقى افضل مليون مرة
من معالجة صنايعى دين للمشكلة الاقتصادية
اعتقد انك لو قريت ردى الى فات حتلاقى ان احنا متفقين
و ده الجميل فى الموضوع
=====
حفصة
طيب نحل الى انتى طلبتيه ده ازاى ؟
عموما حنحاول
و ربنا يسهل
====
بنت القمر
انا معترضتش على ان فى مناخوليا اسمها الدين
و هى هوس مسيطر على نافوخ الكثيرين
بس اكيد مش علشان جبت اقتباس من لاهوت التحرير او الادبى
يبقى عندى هوس دينى
ما انا بنقل من كتير من الكتب
و محدش قال على حاجة
و لو اخدتى بالك من المعرض
انا مشترتش غير كتابين بس دينيين
و لا نقرا فى الدين مش عاجبكم
نهاجم الفكر الدينى القديم مش عاجبكم
اعمل ايه ؟
اقطع نفسى
تتفسحى انتى فى العين السخنة و انا اعيا فى اسكندرية الاسبوع الى فات
من كتر البرد و الريح و المطر و ارقد اربع ايام فى البيت و انتى مروقة فى السخنة
مش بقر عليكى
بس ربنا يسهل للجميع

Anonymous said...

لا خلاص انسى
الموضوع كبر اوي
متحملش هم
سلام

Unknown said...

لمؤاخذة يا جدعان

رغم أني كنت اول واحد علق
بس لسه شايف الحوار المهول ده دلوقتي وطبعاً مقدرتش أتابعه تهت ف النص
بس بنظرة سريعة كده الموضوع كبر وبهوأ وعاوزين تلخيص

والله فكرتوني بأحمد فؤاد نجم

يعيش المثقف على مقهى ريش
محفلط .. مزفلط كتير الكلام
عديم الممارسه عدو الزحام
بكام كلمة فاضيه وكام إصطلاح
يفبرك حلول للمشاكل أوام

:))

محدش يزعل دي مداعبة خفيفة كده

ولازم تعمل ملخص للأفكار دي يا رامز في بوست سريع عشان الغلابه اللي زينا يفهموا
ويجعلو عااااامر

بنت القمر said...

كراكيب ..هاني
يعني ياأبني نستني لما الناس تاخد حقوقها ويتوفر لها تعليم وصحه وسكن ورغيف وكتاب لكل مواطن
لا وايه الظروف الاجتماعيه تتحل زي فقد الام والاب والاخفاق العاطفي والفشل الدراسي وكل مسببات الحزن والتعاسه بعدين نبقا نحاب الناس؟؟؟
يا لهوي
وساعتها تقولي اصل القانون ممكن ما يطبقش علي الكل طب وما نطبقه لو احنا محترمين علي الكبير احسن
عارف طبعا قصه فاطمه المخزوميه اللي سرقت ايام الرسول اشفعوا لها قال لو كانت فاطمه بنت محمد سرقت لقطعت يدها
هو ده الكلام مش نسيب اللصوص والحراميه والمغتصبين كلاب طايحه في الشوارع ونقعد نحلل ونصلح
ممكن جميه الخطوط تمشي بالتوازي
يتبع

بنت القمر said...

هاني كراكيب
تسمع عن حد الحرابه في الاسلام ابقي دور واقرا في الحته دي
_____________
بص انت مش موافق علي التجريس وطبعا انا قلتها من باب التدليل لكن مش حل واقعي لانه مفيش اصلا حمير ها تلف الشوارع الا لو عملنا جرسه مودرن علي الفضائيلات والنت
المهم
تخيل بالنسبه لحكايه الاعدام
تخيل بعد الشر الف بعد الشر دخلت بيتك جعان وماما مستنياك وعاوز تنام قعدت تدور عليها ملقيتهاش
دخلت اوضتها لقيتها مخنوقه ومضروبه بسكين\ عشان واحد ابم لاذينه دخل سرق موبايل وقتلها ومشي
حدث انظر جريمه سان استيفانو الاسكندريه الغعام الماضي مقتل سيده اعمال وبنتها من لص صغير سرق موبايل هرب و رجع ابنها الدكتور لقاها مقتوله امه واخته
طيب تخيل بعد الف الشر بلو ستون.. اللي بتقول انها ام روحيه ليك اللي اتحرش بيها اغتصبها ودبحها ورماها في الطريق الصحراوي
ها توافق ساعتها علي الاعدام ولا للأ؟؟
ولا هتقول عقوبه غير انسانيه حياة الانسان بقت رخيصه ممكن تتقتل عشان عشرة جنيه او موبايل
نسيب الكلاب دي ولا نخلص منهم وكل كلب يمد ايده علي حاجه متخصوش يلاقي قوة القانون
عباس بيقولك قوة الردع بالانسان
معلش سلملي علي الانسان اللي ايده في الميه مش زي اللي ايده في النار
لما يكون حياة امي او شرف بنتي يبقا مفيش رحمه في قانون
علي فكرة دي مناقشه فلسفيه عقيمه وامريكا واوروبا مجسموهاش ولسه بيتكلموا في جدوي الاعدام وولايات بتطبقه وولايات لأ
الانسان اصلا فطرته انحرفت
يعني احنا عندنا في الاسلام يقولك ربنا خلق الانسان علي فطرة قويمه غير منحرفه
بمعني انه غير ميال للعنف ولا الجريمه موحد لله بطبعه متزن سلوكيا بدون انحراف سلوكي او جنسي او ...
المهم
تيجي ظروف الحياه وكلاكيعها تخليه يعبد بقرة وشجرة ويكون مثلي او سارق او لص
يبق ده فطرته انحرفت ليه وازاي مش موضوعنا
المهم ان الانسان ممكن ينحرف وتبقا طبيعه الاشياء اتغيرت عنده
المهم برضه الانسان لوحده غير قيم كفايه علي نفسه لازم قوة ردع لسلوكه وتقويم تنصحه بالدين ماشي
ترقي سلوكه الكتاب والموسيقي اوكيه توفرة حياه كريمه وتخفف ضغوطه ماشي بس لو انحرف لازم تحاسبه
وتعاقبه عشان يرتدع هو وغيرة اضرب الربوط يخاف السايب
يتبع

بنت القمر said...

هاني كراكيب
بالنسبه للدبوس حل انثوي مصري عبقري والنعمه احنا ستاتنا دول دماغ
لما واحد بيتحرش بواحده في امريكا تبخ مخدر او تكهربه بعصايه
المهمالدبوس انتقام صامت
بدون صوت ولا جرسه للضحيه
انتقام مؤلم وردع هادي
دايما الست تنتقم من الراجل بهدوء بدون صوت هو يجعجع ويزعق ويضرب ويتحرش
هي تحط له السم في الاكل كل يوم بجرعه صغيرة لما يهري مصارينه انظر الفلاحات المصريات دي طريقه القتل المعتمده لديهم
يتحرش بيها في مواصله تشكه دبوس بشله
عشان متتفضحش ولا يقولها يا بنت... ولا يا...
انتقام بهدوء وبلا صوت او ازعاج للاخرين
توصيل رساله :ارجع بعيد يا كلب انا مش مستباحه
والنبي ي اخويا لاجينزولا جيبه ولا حجاب ولا عبايهسودا بيرحموا

بنت القمر said...

رامز بيه
يا عم وانا قولت عندك هوس؟؟
يا لهوي
انت قولت فارس بيقول الناس ادروشت ردي عليه قلت لك انا موافقاه
وانا قولت لك انت مدروش ؟؟ولا منقوع في كتب اللاهوت
وبعدين انا مركزتش اوي اشتريت ايه من المعرض عشان انا مش ها اقدر اورح المعرض يبقا الكتب دي مش متاحه ليا
_________ قرايه الدين مش عيب انا بقرا في الاسلام وبقرا في المسيحيه حتي اسأل بلو وكمان بقرا ميكي ووصوت الامه وبقرا برجك اليوم ووصفات لبنانيه لاطباق شهيه وبقرا فهمي هويدي ونزار وبحب موووت الكلمات المتقاطعه
عادي
المهم
انت بقا اللي نظرت فسحه العين السخنه دي كانت نيله يعيد عنك وانا اقول مين عينه مدورة؟؟مين مين؟؟
عموما نورت اسكندريه يا رامز بس مش اوي عشان غيابي كان مضلمها
ههههه

بنت القمر said...

لو ليك في التاج عندي واحد لو تحب خده رد عليه
انا خلصت كلامي في الموضوع ده
بس عندي سؤال هي بلو فين
مش تشاركنا باعتبار البوست عشانها ولا موضوع التحرش ما يهمش ستات كتير؟
سلامي ليك ولها

karakib said...

بنت القمر
مع انه مش موضوعنا الاعدام ده
بس اكيد قبل ما اكون رأي فيه و ارفضه تماما طرحت كل هذه الاسئلة و الاسوء منها كمان علي نفسي
طبعا مش لازم نجيب سيرة نقاشات امريكا و غيرها من بلاد الغرب
ليه .. لأنه مش لازم كل من تشابه فكره في اشياء معهم .. مع العلم انه مختلف برضه في اشياءو اماكن (ولايات) معهم
يبقي واخد فكره من بره
هو احنا خايبين اوي كده في كل حاجه بنستورد حتي الفكر ؟ ما اعتقدش
انا ضد عقوبة الاعدام تماما
لاسباب كتيرة منها انها عقوبة لا يمكن تداركها ابدا
لو واحد اتحكم عليه ظلم بالسجن من الممكن ان تظهر برأته فيخرج من السجن
اما لو اتحكم عليه بالاعدام .. هنتداركها ازاي دي !؟
ده غير انه روب المحامي الاسود ده له سبب و قصة متعلقة بعقوبة الاعدام في القانون الفرنسي الذي تم الغائه
و هو يذكر القضاة بما فعله احدهم من حكم ظالم بالاعدام علي متهم و كان الروب الاسود بيتحط قدامه علي باب المحكمه علي انه روح المعدم ظلما ثم تطور الامر الي ان يلبس المحامي هذا الروب الاسود
---------
انا عارف ما هو حد الحرابة في الاسلام
بس المفروض انه القانون المصري قانون مدني مستمد من عدة مصادر
---------
بتقولي
المهم برضه الانسان لوحده غير قيم كفايه علي نفسه لازم قوة ردع لسلوكه وتقويم تنصحه بالدين ماشي
ترقي سلوكه الكتاب والموسيقي اوكيه توفرة حياه كريمه وتخفف ضغوطه ماشي بس لو انحرف لازم تحاسبه
وتعاقبه عشان يرتدع هو وغيرة اضرب المربوط يخاف السايب
-----------
مش موافق علي فكرة تعيين اوصياء علي المجتمع و ناس لهم سلطات لأ طبعا
كل المطلوب هو تفعيل القانون و بس
و بالتوازي مع ده تربية نشء حر
الحريه و بس من غير بقي اوصياء و فكرة انه الانسان غير قيم علي نفسه
------------
فكرة اضر المربوط يخاف السايب دي بتضايقني اوي
هو احنا بنتعامل مع غنم ؟؟ ازاي يعني اضرب المربوط و اسيب السايب
و ليه اضرب واحد ما عملش حاجة علشان اخوف اللي بيعمل ؟
---------------
فكرة النصيحة بالدين دي حاجة حلوة اوي
اخذا في الاعتبار انه الموضوع لا يتعدي النصيحه و لا يعتدي علي الحريات الشخصيه و العامه
لأنه الاخلاقيات مش لازم تكون مستمدة من الاديان
و في ناس غير مؤمنين بوجود اي الهه بيكونوا افضل كتير من مسيحيين و مسلمين
و اخلاقهم و عملهم كويسه جدا
و المشكلة اننا لو اتكلمنا عن انه البني ادم غير قيم علي نفسة و لذلك هنعين له اوصياء .. و لو الاوصياء رجال دين .. يبقي كده اللي بيخالفهم او يعارضهم يبقي بيعارض الدين و انت عارفه الباقي
------------------------
نهارك سعيد

بنت القمر said...

مقصدتش نمشي نقتل الناس ولا نقطع ايديهم بس شايفه انه لازم نفعل القانون اكتر ويطبق علي الكبير قبل الصغير
السلطه من القانون المدني ماشي مقلتش هات القرآن احكم بيه
لكن حكايه الحرابه تنطبق علي عقوبه التعزير لجرائم كتير زي التحرش وتزييف العمله والجاسوسيه
و حاجات من نوع اكياس الدم الملوثه والاتجار بقوت الشعب وسرقه البنوك والنصب كل ده للحاكم حق اختيار عقوبه تعزيريه مناسبه
وبرضه عند رأيي الناس مش ها تلبس حزام امان الا خايفه من المخالفه ولا ها تمشي علي سرعه مناسبه الا عشان الرادار ها يقفشهم
القانون
وقوة القانون وتفعيل القانون هو صمام الامان اخيرا
كلمه اضرب المربوط بمعني حاسب المجرم يخاف اللي بيشاور نفسه يرتكب الجريمه مش معناه ابدا تضرب واحد معملش حاجه
تحياتي واخر كلام