Sunday, February 10, 2008

تاج و العياذ بالله

هذا التاج اهداء من بنت القمر

..............

-1-

هل توافق علي حذف خانة الديانه من البطاقه الشخصيه؟

اولا حكاية حذف خانة الديانة من البطاقة دى اكبر خدعة اخترعها العقل المصرى بحجة عدم التمييز ,

ليه ؟

لأن لو حد رايح يتقدم لوظيفة و دخل على المدير و هو داقق صليب فى ايده اليمين و عايز يحطه فى عين المدير علشان المدير يعرف , حفتكره ايه ؟ ملحد

او بنت داخلة بحجاب او نقاب مثلا حفتكرها ايه ؟ بوذية

او واحدة داخلة الشغل و لابسة سلسلة فيها صليب و مطلعاها من بره و عمال تلعب فى السلسلة علشان الاعمى ياخد باله , حفتكرها ايه ؟ بهائية

او واحد داخل عليك بجلابية بيضا و مطول دقنه و عنده زبيبة صلاة فى وشه , حفتكره ايه ؟ من كفار قريش

الهدف من حذف خانة الديانة هو الغاء التمييز المبنى على الدين

لما نقتنع انه مفيش فرق بين الاشخاص على اساس دينهم , نبقى نتنقل للشكل اننا نشيل خانة الديانة

ده البهائيين فى ازهى عصور الديموقراطية و قبول الاخر حطلوهم شرطة و كمان مش طويلة حتى علشان يفرحوا

..........

-2-

ما رايك في المثليين؟هل تري انها حرية شخصيه؟ هل توافق علي الاعتراف بالمثليين؟هل لك اصدقاء من المثليين؟

الموضوع ده معقد

ليه ؟

يعنى اصله مثلا لو الشواذ دول بنتين فى فيلم , يبقى تمام , ليه تشوف واحدة لما ممكن تشوف اتنين ؟!!

اما حكاية ليك صحاب ! فانا معرفش الواحد يعرف ازاى

يعنى اول ما اشوف واحد لأول مرة و انا بقوله اسمى

اقوله انا عادة , و اسئله : هو الاخ عادة و لا شاذ ؟

اما حكاية اوافق و لا موافقش فدى مشكلة لسبب

انه لا يمكن الحكم على انسان نتيجة ميوله الجنسية , يعنى لو عرفت واحد مثلا لازم كل خميس يسنتر المسائل , ما هو برضه مينفعش لانه زانى

المسئلة اعقد من كده

ايه الفرق بين حيوان بتاع بنات و زنا و واحد تانى بتاع رجالة و شاذ

الاتنين عايزين حل و علاج

............

-3-

هل تعتقد بوجود اضطهاد للمسيحيين في مصر؟

طبعا , و عندى الدليل

بص على عدد التعليقات فى اى مدونة زى بنت القمر و شهروزة و مختار , و عدد التعليقات فى اى مدونة زى هانى كراكيب و بلو و قداستى , حتلاقى فرق كبير

عندهم الخير كله و التعليقات متقلش عن قوة : 100 أو 120 تعليق فى التدوينة , اما الغلبانة بلو مع المصيبة الى حصلتلها مكملوش 30 تعليق , ظلم فادح و اضطهاد علنى

موضوع الاضطهاد ده بيفكرنى بنكتة سمعتها زمان

بيقولك

واحد مسيحى راح يتقدم لمهنة " قارىء نشرة فى الاذاعة " , فأبوه وصله و تحت مبنى الاذاعة وقفوا و ابوه قاله : قبل ما تبتدى صلى و قول ابانا الذى و متنساش فلنشكر صانع الخيرات و ربنا ان شاء الله لا يمكن انه ينسى ابنه و ان شاء الله الروح هى الى حتتكلم مكانك

طلع الولد و امتحن و خلص و طلعت النتيجة : مرفوض

فنزل الولد حزين

فأبوه سئله " ايه الى حصل

فرد الولد : ادتهدونى يا بابا و رفزونى علثان انا مثيحى

...

الفكرة فى الاضطهاد هو مدى تقبلك للفكرة و الموافقة عليها

الموروث الدينى المتمثل فى فكرة الاستشهاد نتيجة الاضطهاد فى العصور الاولى للتكوين سواء على المستوى الاسلامى او المسيحى يخليك تقبل الفكرة الى حد الاستمتاع و مترفضهاش او حتى تتصدى ليها و بالتالى الى قصادك يتمادى , لانه محدش يقبل ابدا انه تجيله فرصة انه يبقى مضطهد و بالتالى شهيد فى نظر الرب و يفوتها , دى بركة روحية جامدة جدا فى نظره طبعا

يعنى تفتكره لو واحد مسيحى او حتى المسيحيين فى مصر مضطهدين و مظلومين ممكن يقاوموا الظلم ؟ , لأ طبعا , ده بالنسبة لهم يا جماله . حتى المسلمين فى الغرب بيستمتعوا بالحكاية دى , بأنهم مضطهدين

انما من ناحية الاحتقان فأكيد و من الجانبين

لازم حيكون فى مسلمين بيكرهوا المسيحيين و مسيحيين بيكرهوا المسلمين , ملهاش حل . بس النسبة اد ايه و مدى تأثيرهم فى المجتمع و ايه النظام القانونى الى بيحكم الدولة و ازاى بنطبق نظام دفاع و حماية قانونى للمواطنين ضد المجانين من الجانبين ؟, هو ده السؤال

لأن الاضطهاد محوره الاساسى هو النظام . يعنى الدولة او القبيلة او نظام الحكم هو الى بيضطهد زى ما كنت بتعمل قريش فى حالة الاسلام او الدولة الرومانية فى حالة المسيحية

السؤال : هل الدولة المصرية تمارس الاضطهاد ضد " شعبها " و مواطنيها " ( المسيحيين ) ؟ , سؤال اجابته تحتاج الى تدوينة لوحدها

...............

-4-

من هو الشخص الذي تختاره لرئاسة الجمهوريه؟

و الهى الموضوع ده شائك , لأن الواحد مينفعش يمدح فى نفسه

لكن لو اتكلمنا عن واحد من تلاميذى النجباء

ممكن اذكر عمرو موسى .

و ان كنت افضل انى اجى للسلطة بالانتخاب المباشر فى انتخابات نزيهة و عادلة

................

-5-

اذا قمت بتأسيس حزب سياسي ،فمن هم الاشخاص الذين سوف تضمهم للحزب ليشاركوك الحكم؟

الشيخ يوسف البدرى ... وزارة الثقافة

بيسو ... وزارة التربية و التعليم

شعبان عبد الرحيم ... وزارة الخارجية

احمد عز ... وزارة الاقتصاد و التجارة

اسكندرانى ... وزارة الاوقاف و الشئون الدينية

نائل الطوخى ... وزارةالاعلام

نوارة نجم ... وزارة الداخلية

اما عن سفراء مصر فى الدول الهامة :

مهدى عاكف ... سفير مصر فى اسرائيل

عبد الله السناوى ... سفير مصر فى الولايات المتحدة الامريكية

د.زغلول النجار ... سفير مصر فى الصين الشيوعية

الانبا موسى ... سفير مصر فى السعودية

د. محمد عمارة ... سفير مصر فى الفاتيكان

.............

-6-

هل توافق علي مشاركة الاقباط و الاخوان في حكم مصر؟

و بعدين فى الزن ده

مش كنتم عايزين اقباط يشاركوا

اهم جابو بطرس غالى فى المالية , ايه رأيكم بقى مبسوطين من المسيحيين الى فى سلطة ؟

اهم وصلوا اهم , عايزين ايه اكتر من كده ؟

عايز النمساوى ... اهو جالك النمساوى يا حبيبى

اقعدتم تزنوا لغاية ما ربنا كرمكم ببطرس الى قرب يخرب بيتنا كلنا, الله الموفق

...

الصراحة انا لا عايز اقباط فى السلطة و لا اخوان فى السلطة

انا عايز مصريين فى السلطة , يكونوا مسلمين , يكونوا مسيحيين , يكونوا يهود , مش فارقة

المهم يكون عندهم انسانية , رحمة بالشعب , علشان خلاص كده ... كفاية ذل بقى

طبعا انا ضد الاخوان المسلمين علطول الخط بلا تفكير

و ضد الاخوان المسيحيين علطول الخط بلاتفكير

لا انا عايز اخوان من دول و لا من دول و لا حتى احزاب على اساس دينى

....................

-7-

ما هي افضل مدونه زرتها؟

الصراحة كل المدونات الى بزورها بحبها , بس ممكن نخص بالذكر

الدين و الديناميت ... لأنى بحس ان القضايا الدينية الى بيثيرها لو غيرنا الالفاظ الاسلامية بلاقيها نفس المشاكل فى المسيحية و كنت احب انه يناقشها – القضايا – بمفهوم عام لا مسيحى و لا اسلامى و خصوصا لأنه اسلوبه فى الشرح و الكتابة ممتاز و قوى جدا و سهل

اخر الحارة ... اسلوبه فى مناقشة القضايا العامة و المطروحة قوى جدا و كشخص ممتاز و خاصة انى قابلته فى المعرض و اكتشفت البعد الانسانى الجميل فيه

نائل الطوخى .... سخرية تجعلك تتأمل

بيسو .... لأنه بيسو

مختار العزيزى ... ثقافة واسعة و روح مرحة و عنيد , مش حنسى ابدا ردوده فى القضية الى اثارتها شهروزة , فضل يكتب فى تدوينات لغاية ما الناس كانت حتجنن , تدوينة واحدة من شهروزة اثارت فكرة واحدة و هوب ...... راح رازع فوق الخمشاشر خمسوميت تدوينة , محدش يقف قصاده , حيغرقوا تدوينات

حمود ستوديو ... مدون جزائرى متميز و خصوصا كتابه الى على جنب ده ... مفاجأة و خصوصا انه له اسلوب مماثل للدين و الدينامين و بن عبد العزيز

اسكندرانى ... روحى روحى روحى , طرح جرىء و صادم

..............

-8-

هل توافق علي الزواج من مطلقه؟

هو المطلقة عامة خبرة و حيبقى الجواز منها فى التمام

بس المشكلة انه مفيش عندنا مطلقات

.............

-9-

اذا انجبت ولدين و بنتين ، فاي الاسماء ستختارها لهم؟

يعنى للأمانة , انا مش متأكد من موضوع الانجاب ده اساسا لسببين

اولا انا مش متزوج

ثانيا , من زمان بناكل فراخ بيضا و بنشرب مية من الحنفية و كبده و سجق من سمير كوكو , يعنى ربنا يعوض على , مبقاش فاضل غير الاحترام .

بس , يخلق الداء و معه الدواء .

نشكر الله على التلقيح المجهرى و الفياجرا و العبوة الزرقا للرجال و الصفرا للسيدات .

و ربنا يعوض عليكم عوض الصابرين .

اما لو ربنا كرمنا بكام طفل انابيب فمنعا للتفرقة الدينية على اساس اسم الولد او البنت فحسميهم اسماء لا تدل على هوية معينة

الولدين ... عبد المسيح و مصطفى

البنتين .... تيريز و خديجة

و الاجر و الثواب عند الله

...........

-10-

هل تعتقد ان توريث الحكم في مصر سيحدث فعلا؟

طبعا , يعنى الفيلم ده كله و فى الاخر ميورثش , دى هى دى تبقى المسخرة بجد

و بعدين دى المعارضة تتشل فيها لو مصر قلبت ديموقراطية بجد و مفهاش توريث

دول هم عايشين على التوريث

امال مين الى يقبض من بره و مين يقبض من جوه و من ليبيا و من السعودية و من امريكا

ده كده ناس كتير تجوع و بيوت تتقفل و معارضة تتشرد

تف من بقك انت و هو

دى المعارضة هى الى حتجيب جمال محمولا على اعناقها

فى حاجات مفهاش تهريج , زى السؤال ده كده

جمال جى جى

..............

-11-

ما هو افضل انجاز لمبارك ؟ و ما هو اسوء سقطات حكمه؟

افضل انجاز طبعا , اننا عايشين لحد دلوقتى و كل المصايب دى فوق نافوخنا

تلوث و فساد و حوادث و سرقة و نصب و موت

اسوء سقطات حكمه , احنا طبعا , هو فى شعب زيينا فى اى حتة فى الدنيا !!!!

........

-12-

لمن تمرر هذا التاج؟

و الله و من هذا المزنق , و بفضل توجيهات السيد الرئيس

امرر هذا التاج ان شاء الله الى

اسكندرانى

محمد المصرى

احمد ساندريل

بلو-ستون

هانى كراكيب

الدين و الديناميت

مختار العزيزى

ابو باشا

17 comments:

أحمد منتصر said...

أغلب من يعارضون حرية المثليين هم معارضون للحرية الجنسية بصفة عامة :)

بنت القمر said...

واالله ما يطمرش فيك حاجه بقا انا رزعالك تلاتين تعليق علي البوست اللي فات وبوست والتاني اكون هنا. وبوست نقاش شلته علي كتفي وبعدين تقولي مضطهد
طب والله لاوريك الاضطهاد بعينه وبعدين انا تعليقاتي مش كتير في المتوسط 20 تعليق او تلاتين منهم ردودي علي الناس
اما عدد التعليقات فلا يدل الا علي العمل الطيب واللي يجبه ربه يحبب فيه خلقه

وبعدين اسمي مش مكتوب كده خالص!!
لا مين باعت لك التاج!! ولا افضل مدونه ولا حتي جائزة افضل معلق
كوبه تاخدك......
عموما الاجابات مش بطاله
عادي ناجح ومقبول تانيه ابتدائي تاني عن ابله ابتسام فاكرها
الله يحرقها ويحرق سيرتها
ماشي ماشي
مكنش العشم قال طرح بطيخ وطرح قلقاس
وانا عمالا اشكر واوقول نقاشات العبد وعمق بلو ستون
وكراكيب وابداعه الادبي صحيح خير تعمل بس يلا اللي عند الله ما يضعش
يلا يا ابو خديجه
امشي قال خديجه قال
اه وبعدين كان ليك راي في المثليين مش مماين كده كنت كاتبه هناك فاكر ولا اجبهولك
طبعا انت اقدر تروح تجيبه واهو تروح تجيب معاه شويه طرح طماطم علي حبه طرح قلقاس
كنت قال انهم لا يستحقوا اي حقوق الا حقوق الاسد في حديقه الحيوان
ولا لزوم اللزوم بقا عيب ان الواحد يعبر بصدق الا يفتكروة دقه قديمه

ماشي ماشي

بنت القمر said...

عزيزي المثقف البرجوازي الصغي رامز

انت عارف ان يوسف بطرس غالي في الماليه لاول مرة تضم تحت سلطتها فلوس قناة السويس والبنوك و معناه داخلها تحويلات المصريين للخارج
ايضا فلوس التأمينات والمعاشات
بعد الغاء وزارة التأمينات
تضم ايضاالضرايب بشرائحها المختلفه يعني الراجل ماسك خزنه البلد تحت باطه ولازم تحترمه اكتر من كده
بلاش الله يكرمك الديماجوجيه اللي انت فيها يا ديماجوجي ؟
انت لازم تتغيروحالك ينصلح بقا ولازم تغير ارائك وافكارك القديمه تنصهر ونهب معانافي ثورة علي النظام الرجعي الشمولي السلطوي
لازم يا رامز
لازم
لازم نحطم التابوهات الهشه المتهاويه ونتخلص من عبوديه رجال الدين الماكرين
ما انت عارف الدين لا يقدم اجابه واحنا لوحدنا في هذا العالم يا صديقي
ولا احد سوانا
تبا للاديان تنين بثلاثه رؤوس
لازم نثور كلنا علي نظام مبارك الفاشي القمعي ونعزل الديكتاتور ونعلقه فوق المشنقه في ميدان كارل ماركس العمومي اللي هو ورا ميدان التحرير طبعا عارفه
وبعدين المثليين ناس زوق زوق زوق

ايه رأيك بقا؟؟
تشيل شنطه المنشورات الصفرا ولا تقسموانفسكو مجموعات ونتلم عند الفجر ونحطم باب الباستيل قصدي ابوزعبل
عموما بما اني ثوريه شوفينيه قديمه فانت مسئول التنظيم في منطقه القاهرة الكبري

تاخدمعاك وانت مروح طرح قلقاس انهارده علي حبه سبانخ؟
سلام يا رفيق
المناضله الرفيقه
قمر فيتش

Alexandrian far away said...

عزيزي قداسة الملك النعمان
عباس العبد سابقا
رامز الشرقاوي سابقا أكتر
أولا أهنيك على أحتلال الأخ محمد المصري بتعليقاته لمدونتك
هاهاهاهاهاهاهاها
صحيح ربنا مصلط أبدان على ابدان
ده أنتي يا قمر تعتبر قصير النفس وبتتعب بسرعه مقارنة بالنهر الجاري الفائض ألي هو بيكتبه
هاهاهاهاهاها
أستقبل بقى يا وحش

ثانيا: فيه ايه يا حبيبي؟
بجد يا قداسة الملك النعمان أنت كنت من نوع الطلبه ألي بيخلصوا ورقة الأجابه في الأمتحان ويطلبوا واحده غيرها؟
يا عم الناس مجاوبه بجملتين تلاته وأنت كاتب مقاله على كل سؤال
ده طبعا بغض النظر عن أعجابي بمستوى الأجابات، وأنا أشكرك بقوة وحماس وعنف حتى تستغيث على وزارة الأوقاف والشئون الدينيه، ولو أنني دائما ما حلمت بأني أتولى وزاره مجمعه كده
وزارة الأعلام والثقافة والداخلية والتربيه والتعليم، يعني يبقوا وزاره واحده كبيره ومفتخره كده، وممكن أقوم جنب ده بأعمال وزير الأوقاف والشئون الدينيه بس بجد أختيارك ده أكد لي أنك سهن ومش سهل
أنت يا جدع أنت أحنا لازم نتقابل لما أنزل مصر على أول الصيف
لاااااااااااازم ولابد من كل بد

وأخيرا إنه لما اثلج قلبي بهذه التدوينة بقاء الذكرى العطرة لفقيدة الأمه الست الطاهره ابله ابتسام راسخة في القلوب والعقول

صباحه.

Alexandrian far away said...

رامز ..أسف قصدي قداسة الملك النعمان
أستحملني وحياة قديسينك يا شيخ
هو أنا من غير ما أخد بالي دخلت التدوينه دي وكتبت فيها حاجه أنا مش فاكرها غير التعليق السابق؟
ليه السؤال؟
لأني حاسس أنه فيه معلق معين زي ما يكون بيرد عليا شخصيا عندك
طيب ما تيجي ترد عندي في المدونه يا جميل
والله افرشها لك ورد وتمر حنه وأعلق الزينات والرايات وأجيب مزيكة حسب الله وأفرق برياني ومسالا على فقراء الهنود بدبي

ياه يا أخي
بلاش سواد القلب ده
بخاطرك قداسة مولانا النعمان

عباس العبد said...

احمد منتصر
اصله فكرة الحرية الجنسية فكرة ملتبسة
=======
بنت القمر
الله يسامحك
ماهو ده الاضطهاد انه ما يطمرش فينا
انا مقدرش على اضطهادك يا بنت القمر
حرام عليكى
و ادينى كتبت اسمك اهه علشان ميبقاش فى زعل
كوبه تاخدنى ؟ الله يسامحك
اما حكاية المثليين فأنا مغيرتش كلامى
" ايه الفرق بين حيوان بتاع بنات و زنا و واحد تانى بتاع رجالة و شاذ الاتنين عايزين حل و علاج "
بس مش لازم اقول نفس الكلمات يعنى
و لا انتى قصدك انى بغير اقوالى فى المحكمة
اما حكاية سجن الباستيل فدول ملقوش غير 3 او اربعة
بس احنا فى ابو زعبل حنلاقى ناس ياما
مع تحيات الرفيق راميزوفيتش
========
اسكندرانى
منور يا باشا فى قصر ضيافة الملك النعمان
محمد المصرى ده وحش التعليقات و دماغه اصيلة تعجبك
بجد مش بهرج
اراءه مختلفة و جميلة بس الى يسد قصاده
و انا منتظرك الصيف الجى يا برنس نتقابل بس فى القاهرة علشان ازدنجرية بتاعتك فى الصيف وحشة جدا
و بعدين انا ملك متخافش يعنى ايدى فرطة
اى وزارة انت عايزها انا تحت امرك
اما حكاية ان فى حد معين بيرد عليك فانا مش واخد بالى من الموضوع ده
فين ده ؟
انا سهن انا
الله يسامحك
فى حد يقول للملك النعمان انت سهن
مش خايف منى ولا ايه ؟

^ H@fSS@^ said...

الله الله
يعني انا من سنة الف تسعمية و خشبة موظفاك وزير هيئة الكتب و لا انت ردت عليا و لا قلت موافق ولا ممانع و جاي هنا و لا معنبرني بكلمة
بذمتك انا مش احسن مدونة انت ممكن تدخلها؟؟
حرام عليك يا راجل
كده برضو
و بعدين اضطهاد ايه طيب ما انا بكتيري بيجيلي عشرين تعليق من ضمنهم ردودي انا
يعني لو ده مقياسك ابقى انا كمان مضطهدة
لا لا اسمحلي انت تعبان اوي
و عندك شعور خنيق بالاضطهاد
ربنا يعينك

^ H@fSS@^ said...

و مش حقولك قداستك بعد كده غير لما تصلح غلطتك

Mukhtar Al Azizi said...

هاهاها ردود ذكية جدا يا عباس
أشكرك على تقديرك يا سيّدي، وبإذن الله بكرة أرد علي الأسئلة عشان انهاردة فى ضغط شغل شويتين

Alexandrian far away said...

أسمها أسكندريه يا كابتن
Alexandria
يا أخ
الإسكندريه يا ابن عمي
مش ازدنجرية
معلش حنقول ايه ما أنت قاهري من الأقاليم ومعذور معلش
وبعدين يا كابتن الي بيخلوها وحشه في الصيف هما أمثال قداستك من ابناء الأقاليم أللي بيقعدوا يحوشوا طول السنه عشان ييجوا يدمروا الحضاره فيما يسمونه التصييف
يربنا يتوب علينا منكم
عموما أنا كنت مخطط نتقابل في الأهره بتاعتكم، رغم أنها مقرفه صيف وشتا

تحياتي قداسة النعمان الأقليمي

Anonymous said...

انت مسخره
:-D
هتسميها خديجه؟؟؟
:-D وماله

^ H@fSS@^ said...

شكلك صلحت غلطتك في حقي
ههههههههههههههههههه
ازيك يا قداستك
ان شاء الله تكون بس راضي عليا؟

Anonymous said...

ايه ياعمى الردود الجامدة المنطقية دى؟
والله انا لو مكانك كنت هارد ردود مشابهة فعلا...مانا قلت لك انت بتكتب بالنيابة عنى ..
بس بالنسبة لحكاية الديانة اللى تتشال من البطاقة والنبى يابنى تفهمنى هما عايزين يشيلوها ليه؟يعنى عشان واخدة مكان ولا عشان يريحوا الاجهزةويوفروا كهربا ولا ايه بالظبط؟
وبعدين انا يهمنى بجد اعرف اللى قدامى ده مسلم ولا مسيحى عشان حاجة مهمة وهى انى اعيد عليه فى عيده المناسب..
وبعدين ايه حكاية الاضطهاد دى كمان ما احنا طول عمرنا مع بعض عمرنا ماحسينا بيها ولا هى جت بالليل وانا نايمة؟
يعنى انا مثلا مسلمة ومتدينة بجد وكنت فى مدرسة صحابها مسيحيين وعمرى ماحسيت بموضوع الاضطهاد ده وكان ليا صحاب مسيحيين كتير عمرنا ماحسينا بفرق.,ومامتى محفظتها مابتفارقهاش صورة العزراء مريم ابدا وصاحبة عمرها مسيحيةوباعتبرها زى مامتى بالظبط..
يبقى ليه الكلام الكتير ده بقى اللى طالعين لنا فيه؟
ولا فيه حاجة وانا مش واخدة بالى؟ماهو انت بقى بوزت لى دماغى خلاص.

الدرويش المرووش said...

ردود صاروخيه


يحميك لشبابك

بس حكاية الرياسه دى فيها كلام

Anonymous said...

تسلم يا شرقاوي
كلامك زي العسل وآراءك كمان.. أظن بأن جيلنا قد كبر وهو يضع في حسبانه وضع حد لموضوع التمييز العنصري بين المسيحية والإسلام
انا عن نفسي طهقت من الحكاية دي ومش عاوز وجع دماغ

المهم اشكرك على كل الكلام اللي قلتو
أخوك عصام

عباس العبد said...

حفصة
متزعليش منى يا حفصة
انتى فى القلب
و كله تمام و الأمن مستبب
و مش عايز اى تفجيرات فى المدونة و لا ده اضطهاد لأراء المسيحيين
======
مختار
منور يا باشا
انت خبرة , و احنا تعليمك يا باشا
====
اسكندرانى
ماشى يا ازدجرانى
ماشى
على العموم انا عمرى ما رحت ازدنجرية فى الصيف علشان مش حلوة و اهلى من القرويين السذج و اهل مطقتشى الى هم من الاقاليم برضه مبيروحوش
الله يسامحك
كشفت مدونتى و دعيت عليك يا ازدنجرانى
يا ختشى
========
شيماء
و ماله
هو مينفعش و لا ايه ؟
========
انونيموس
منورة بجد
و الاجابات كلها تحت امرك
بس صحيح انا لسه مبوز دماغك ؟
طيب كويس انى نجحت لغاية كده
==========
الدرويش المرووش
منور المدونة
ازاى فيها كلام ؟
احكى
========
حمود باشا
منور مصر و القاهرة و الحى الى انا ساكن فيه و جهاز الكمبيوتر و الشاشة الى قاعد اقرا منها كلامك
يعنى تسيب بلدكو مخصوص و تيجى علق عندنا هنا
الله يكرمك
صدقنى كان نفسى اهديك التاج ده
بس خايف يكون فيه خصوصية ثقافية من نوع ما
لكن عامة
خد التاج ده و شيل الى انت مش عايز تجاوبه
و كل زيارة و انتم بخير

ماما نونو said...

العزيز رامز
اولا ما كانش العشم انى ما الاقيش مكان لىً فى الوزارة بتاعتك ، يعنى انت رجعى و بتضطهد المرأة و مش ها اعديهالك
ثانيا
موضوع الغاء خانة الديانة ده حلم يوتوباوى بعض الشئ و انا عن نفسى باحلم بيه و بانزعج لو حد سالنى عن ديانتى
لكنى متفقة معاك ان ابناء شعبنا ما شاء الله عليه بتبان عليه الديانة اكثر من الطبقة الاجتماعية و الفكرية اللى بينتموا اليها و دى معجزة انثربولوجية و علمية تفوق اطفال الانابيب و البراميل معا
يعنى حتى لو شلنا خانة الدين ها نتعلرف ها نتعرف بس يمكن لو شلنا الخانة ها نقدر ندارى تعصبنا و نقول مثلا احنا عيننا فلانة المحجبة او المسيحية اللى لابسه صليب و احنا ما نعرفش ديانتها ، يعنى حاجة نضحك بيها على نفسنا كما هى العادة
بس بالمناسبة فيه حاجة اخطر من ده الف مرة
القضاء المصرى تخيل لو انا متخانقة مع حد و دخلت على قاضية مبهرجة زى الرقاصة و صابغة شعرها برتقالى او لو واحد مسيحى اتخانق مع حد و دخل على قاضى بذقن و لا قاضية محجبة
هنا الكارثة الحقيقية " اضف اليها غل و حقد النسوان فى البلاد المتقدمة اللى زينا و شوف بقى لو بقت قاضية"
و يجعله عامر يا رامز