Thursday, February 21, 2008

طرد ناسف طاهر و شريف

الدستور , العدد الاسبوعى رقم 153

الاربعاء 20 فبراير 2008

صفحة 8 و 9

نشرت الجريدة تحقيق بعنوان اسطورة الرجل صفر

تحقيق عن اهم عمليات الاغتيال التى قامت بها الموساد لتصفية بعض العناصر المخابراتية العربية التى ازعجت الموساد ! و منها اغتيال مغنية و العقيد مصطفى حافظ و خليل الوزير و على حسن سلامة

المهم , اقرأ التالى

من المقال المنشور بخصوص على حسن سلامة المعروف بأسم الامير الاحمر :

" استقر ابو حسن بالعاصمة اللبنانية بيروت 1970 و تولى قيادة العمليات الخاصة ضد الموساد فى العالم , و من العمليات التى تسند اليه و لرجاله قتل ضابط الموساد زودماك اوفير فى بروكسل , و ارسال الطرود الناسفة من امستردام الى العديد من عملاء الموساد فى العواصم الاوروبية , ردا على حملة قامت بها الموساد ضد قيادين فلسطينيين , و من الذين قتلوا بهذه الطرود ضابط الموساد فى لندن امير شيشورى "

طريقة اغتيال على حسن سلامة :

" الى ان حانت لحظته عندما نجحت احدى عميلات الموساد و هى رسامة انجليزية اسمها ايركا روفائى , فى مراقبة الامير الاحمر و رصد تحركاته و نقلها الى رؤسائها .

و بأسلوب قذر اعتاد عليه الموساد تم تفخيخ سيارة من نوع فولكس فاجن و ضعت بالقرب من الطريق الذى يمر منه موكب ابو حسن المكون من سيارة شيفروليه و سيارتى رانج روفر , و عندما وصل الامير الى هذه النقطة فى الساعة الثالثة من عصر يوم 22-1-79 ضغطت عميلة الموساد على الزر لتتطاير اشلاء ابو حسن "

...............................

ادينى عقلك بقى

يعنى ارسال طرود ناسفة دى عمليات نظيفة طاهرة و تفخيخ سيارة من الموساد لنسف احدهم دى عمليات قذرة , يا سلام

طبعا انا عارف انه حيخرج على اخوة لا تصالح و حيقولولى :

لا تصالح على الدم.. حتى بدم!
لا تصالح! ولو قيل رأس برأسٍ
أكلُّ الرؤوس سواءٌ؟
أقلب الغريب كقلب أخيك؟!
أعيناه عينا أخيك؟!
وهل تتساوى يدٌ.. سيفها كان لك
بيدٍ سيفها أثْكَلك؟

و حيقولولى انت بتتكلم عن عربى زى اسرائيلى ؟ ازاى تساوى بينهم ؟ انت معندكش احساس بالعروبة ؟ انت مبتكرهش الاسرائيليين ؟ انت مش ضد الصهيونية ؟ انت باين عليك عميل لأحفاد القردة و الخنازير !! يا اما انت تطبيعى معفن يا اما انت من الاعناق الملتوية غربا , و بعدين يطلعلى واحد تكفيرى , و يبتسم ابتسامة ساخرة خفيفة كده غير ظاهرة و يقول فى سره " ههه , ما انت اصلك مسيحى , متفهمش "

......

لو انت عصبى قوى حتقول عليهم صهاينة

لو انت عادى حتقول اسرائيليين

لو انتى يمينى حتقول يهود

لو انتى بقى يمينى متشدد و سلفى حتقول يهود احفاد القردة و الخنازير

....

اخوية لا تصالح حيقولولى

ازاى دم الاسرائيلى زى دم العربى

احب اوضح نقطة مهمة انى مبتكلمش عن حد معين , انا بتكلم عن فكرة القتل , و الموت نفسها

ايه الفرق بين عمليات نسف بالقنبلة الذرية و عملية نسف بسيارة مفخخة و عمليات ارسال طرود مفخخة , سواء الميت عربى او اسرائيلى او امريكى او افغانى او جيبوتى , او حتى مسيحى او مسلم او بوذى

و لما عمليات النسف الموسادى قذرة , ممكن ناخد فكرة عن العمليات الطاهرة النظيفة ؟

......

احنا دايما بنعتبر ان تصرفاتنا هى الصح

شهدائنا فى الجنة و قتلاهم فى النار

فى حين ان اى قارىء عادى قرأ التوراة و دارس لتاريخ اليهود , حيعرف انهم بيقولوا " ان شهدائهم فى الجنة و قتلانا احنا فى النار "

.....

احنا عملياتنا طاهرة و نظيفة و هم عملياتهم قذرة و شهدائنا فى الجنة و قتلاهم فى النار

الجملة الى فاتت دى لو قراها اى حد سواء اسرائيلى او امريكانى او هندى او تنزانى او اسبانى او واق واق , حيقول عليها صح , لانها متوافقة مع رأيه

كل الناس شايفة انه

احنا عملياتنا طاهرة و نظيفة و هم عملياتهم قذرة و شهدائنا فى الجنة و قتلاهم فى النار

...........

عملية التصنيف دى ملهاش حل

نفس الرؤية و الافكار و المبادىء و الاهداف , ممكن يتبناها خصمين او عدوين , و الاتنين يسعوا لتنفيذها و محاولة تطبيقها على الاخر , هم شايفين و احنا شايفين , و اللى احنا و هم شايفينه واحد

ملهاش حل

لمجرد ان عمليات النسف بالطرود بيقوم بيها عربى تبقى " نظيفة " لكن لما يقوم بالنسف اسرائيلى تبقى " قذرة " و كل يغنى على نسفاه

.............

لو عندك جريدة الدستور العدد الاسبوعى عايزك تقرأ لو فاضى يعنى

المقالة المكتوبة عن العقيد مصطفى حافظ و الى على يمنيها علطول عن صبرى البنا ابو نضال

و انت حتعرف انا قصدى ايه و ممكن تعرف ايه الفرق الى انا اقصده بين النظافة و القذارة فى العمليات

....

واحد لئيم طبعا حيقولى :

الله الله الله , ما انت عملت زي الناس الى انت بتهاجمها و بتصنف العمليات و بتقول انه شهدائنا فى الجنة و منحاز للعقيد مصطفى حافظ و معحب بالى عمله هو و رجالته

حتكسف شوية و اضحك و ارد و اقوله :

طيب ما انا اعمل ايه ؟ ما انا مصرى برضه و بحبها و لازم انحاز لسيادة العقيد و لفدائييين , و للعمليات الى عملوها ضد العدو , امال انحاز لمين يعنى ؟

و لا انتم شايفين غير كده ؟

.......

29 comments:

وجهة نظري said...

لأ بص، هيا الحكاية مش حكاية عمليات واستشهاد لأن زي ما قلت هما كمان بيعتبروا ان قتلاهم شهداء أو علي الأقل ملتوا في سبيل الواجب، وكمان مفيش أي عملية فدائيو او مخابراتية ممكن تتسمي نضيفة، كلها لازم يبقي فيها وصمة قذرة زي القتل او استخدام أساليب تسمي في الحياة العامة اساليب قذرة، ةالا العملية ماتنجحش

بس الفكرة زي ما قلت "الأنحياز" للجانب اللي انت بتنتميلة، فلو انت عربي حتفرح بعمليات التحرير العربية مهما كانت (مع كرهي الشديد لأغتيال المدنيين)، ولو انت اسرائبلي حتفرح للعمليات المضادة

احنا كعرب ومصريين نفسنا داهية تيجي وتاخد كل الأسرائليين ونحرر فلسطين، بس دا مش حايحصل لو بطلنا العمليات اللي هيا من وجهة نظرنا فدائية، ومن وجهة نظري هيا فدائية بس لو بعدت عن قتل المدنيين غير المحاربين

محمود المصرى said...

بسم الله الرحمن الرحيم

هاقول لحضرتك شىء , فى العادة هذا الوصف بيكون معبر عن موقف الانسان الفكرى من توابع العملية ودوافعها , يعنى لما واحد مقاوم يقتل صهيونى ( على اساس انى متشدد فهاقول صهيونى ) بيكون الدافع للعملية فى ذهن الانسان تحرير ارضه وطرد المغتصب , اما لو الصهاينة هما اللى بيقتلوا مقاوم الانسان بيحكم عليها بأعتبار انها عملية اغتيال تكرس لأستمرار الاحتلال , وبالتالى هى عملية تخدم هدف قذر وهو استمرار الاحتلال , ودا طبيعى على فكرة ان اى انسان يحكم على كل الاحداث من منطلق قناعاته وايديولوجيته , زى بالظبط ما كل انسان شايف ان معتقده هو الصح , هل معنى كده ان كل المعتقدات غلط او ان كل المعتقدات صح ؟ لا طبعا هناك موقف ايديولوجى واحد سليم وباقى المواقف خطأ , انا مش شايف انها مسألة تؤخذ على ادبيات التأريخ للصراعات مع الصهاينة او غيرهم .
بالمناسبة السلفيين مابيقولوش احفاد القردة والخنازير لأنه مخالف للعقيدة لان الله ما كان ليمسخ امه ويجعل منها نسلا فدايما بنقول اخوة القردة والخنازير , واى خدمة يا عم .

محمود المصرى said...

تعقيب على كلام الاستاذ وجهة نظرى بعد اذنك
هى اسرائيل فيها مدنيين غير محاربين ؟ انا اعرف ان دولة قوامها خمسة ملايين نسمة تقدر على تعبئة جيش قوامة ستمائة الف جندى يبقى كل من يقدر على حمل السلاح بيخدم فى هذا الجيش .
نقطة تانية على اى اساس بترفض استهداف المدنيين ؟ وهل بترفض استهداف المدنيين حتى لو الطرف الاخر بيستهدف المدنيين ؟
وشكرا

محمد المصري said...

صدق اللي قال إن الأرض كروية وإن الإنسان كائن قابل للتطور المستمر في آرائه

نفس الكلام اللي انتَ كاتبه ده يا رامز باشا هو اللي قلتهولك من سنتين بالظبط - على قهوة زهرة البستان يوم ما أحمد كان بيقولك عايز تظبط مزز شجَّع إيطالياً :) - لما كنا بنتكلم عن فيلم "ميونيخ" .. انتَ كنت شايف إن عبر عن وجهه نظر إسرائيل وإن مينفعش في قضية زي دي تدَّعي الحياد أو إن الاتنين بني آدمين وخلاص ، وأنا كنت شايف إن سبيلبيرج جرَّد بشرية المتنازعين واتكلم عنهم كبشر بس .. الاتنين يهمهم الحياة والاتنين عايزين يعيشوا .. حتى لو كان إيمان الفلسطيني بقضيته أكبر ففي الطرف الآخر إنسان أيضاً

ده ملهوش علاقة بفكرة السلام اللي بيدخل فيها عوامل سياسية كتير

أنا بتكلم من ناحية إنسانية تماماً .. ناحية بتقول إن الطرفين من لحم ودم حتى لو اختلفا في كل شيء بعد ذلك

بتفق مع حضرتك في كل اللي انتَ قلته في التدوينة طبعاً ! وبفارق زمني سنتين كمان :)

بنت القمر said...

السيد العزيز رامز
بوست استفزازي خنيق
ومطلوب فيه فتح معمعه كلام
صح؟؟
ماشي وتلعب انت دور التعبان المموه كالعاده اللي تجيله كده يروح كده وعاملي فيها صريح وجبتها علي بلاطه ما انا مسيحي وماتفهمش
ليه هو لا سمح الله حد قال المسيحيين ما بيفهموش ؟؟
بالعكس دول ابو المفهوميه وحتي احنا بنقول علي السياسي الحكيم الذي يمتلك اعصابه ويدير الموقف بذكاء لصالحه ده كهنوت
الراجل ده كهنوت او دي بت كهنوت حتي لو مسلم
أو شغال شغل قبط يعني تجيله من هنا يروحلك هناك
ها ارتحت
شفت ان في اصرح منك ازاي؟؟
!
طيب طرد شريف وطرد ناسف
اه في الاتنين
وفي واحد بيموت في قضيه شريفه واخر بيموت في قضيه وسخه او في سرقه بنك
والاتنين ما يتساووش
ابداولا يصح الا الصحيح في الاخر
ايه هو بقا الصحيح ؟؟
ها ابقا اقولك التعليق الجاي
يتبع

بنت القمر said...

ها اكمل بكرة بس انت
عارف ان بنت محمود حافظ هاجرت أمريكا وتحولت للمسيحيه وتزوجت امريكي وتبرأت من أبوها ومن اصولها العربيه واسمها واشتغلت في جمعيه لخدمه الصهيونيه
واسرائيل عشان شافت نفسها مش مقتنعه بقضيه ولاكفاح والدها؟؟
عجبت لك يا زمن

وجهة نظري said...

أستاذ محمود أنا برفض استهداف المدنيين علي أساس وصية الرسول علية الصلاة والسلام للجيوش بأن: لا تقتلوا امراءة ولا طفل ولا كهل ولا تقطعوا شجرة، ودا كان في حروب ضد كفار.

الطرف الأخر حقير هو طرف صهيوني عنصري حقير ومش لازم ننزل لمستواة حتي لو بندافع عن قضيتنا.

عموما كلامي مش هيوقف حاجة، اهو كلام ورأي وخلاص

عباس العبد said...

وجهة نظرى
انا بؤيدك فى وجهة نظرك
الفكرة كلها فى نظرية الانحياز لان كل فعل قتل هو شر
و هى دى المشكلة
لكن ساعات بيبقى شر لابد منه
و بتفرق حسب عدالة القضية
ممكن
=======
محمود المصرى
انت شايف انها حرب لتحرير الارض من الغاصب الصهيونى المحتل و هو شايف انها حرب لتحرير الارض من العرب لانها فى نظره ارض الله الموعودة و حقه انه ياخدها و كفاية علينا قوى لحد كده و كمان المفروض نشكره انه سايبنا فيها لنها امانة و المفروض نرجعهاله
و دى زى ما هى قناعاتك هو كمان له برضه قناعات و لو حتتحول لثوابت دينية هو كمان شاطر و ممكن يحولها لثوابت دينية و مش حتخلص
انما انا كنت بتكلم عن فكرة القتل نفسها و محصرتش القضية بينا و بينهم انا الى لفت انتباهى هو لفظ عملية قذرة قام بها الاسرائيليون و هم كمان بيقولوا على عملياتنا قذرة
راجع كلام المستشار الاعلامى للجيش الاسرائيلى الى بيجى فى الجزيرة لما تتم عملية تفجير و لا حاجة
اقربها عملية ديمونة قال بالنص
عملية قذرة
=======

عباس العبد said...

محمد المصرى
اهلا يا حبيبى
انا عايز الميل علشان ابعتلك الكتاب بتاع اللاهوت الادبى و لا احطه داونلود على جنب عندى و تنزله بس كده هيبقى مشاع لأى حد و انت عارف بقى
ده كلام بفلوس و موزون و مش اى حد يقراه
كلام متكلف
....
ايه هو قهوة و ميونخ و قلتلى و الكلام ده
اليوم الى انت و انا كنا بنتكلم فيه كان بداية موضوعنا اهم جملة اتكتبت فى تاريخ الصحافة الناطقة باللغة العربية , الجملة الى انتى قريتها فى مقال عبد الله كمال , فاكرها؟
عايز موضوع و نقاش ابتدا بالجملة دى
عايزنى افتكره, انا كنت واقع تحت تأثير كتبة روزاليوسف فأكيد مكنتش موزون و انا بتكلم, كان الاخوة مسيطرين على
شفت مش طلع له مدونة و صفحة على الفيس بووك
يعنى ابطل قراية روزاليوسف خالص و ابعد عن الشر , يجيلى الشر لحد عندى
هههههههههه
.....
انا الصراحة مش فاكر اوى يعنى
انا كنت تحت تأثير المقالة الجبارة الى قريتها
لكن لو فكرى تتطور و اصبح متوافق مع رأى حضرتك يبقى فكرى اتنيل بنيلة
و بعدين السيد سبيلبرج و انا كمستشاره الفكرى كنا بنقول نفس الكلام و مازلت
موضوع الحياد ده انت عارف و انا عارف انه مفيش حاجة اسمها حياد و رأى محايد
و انا مغيرتش كلامى
سبيلبرج مكنش محايد
سبيلبرج كان عايز يقول انهم برضه بنى ادمين فى توقيت العالم كله كان ضد اسرائيل لأنه توقيت بداية الانتفاضة و كان متعاطف معاها جدا
كان عايز انهم يصعبوا علينا برضه
مش هو بتاع قائمة شندلر برضه و لا مشفتش الفيلم ده كمان
سبيلبرج كان منحاز للجانب الاسرائيلى
فاكر النقاش بين الولدين فى بير السلم و لا ازاى طلع على حسن سلامة
الناس كلها فى الوقت ده كانت مقتنعة بالقضية , جه هو بالفيلم شقلب الموضوع خالص
زى ما تيجى انت او زى ما حصل كده
بعد ما الناس تضامنوا على ما فعله الغزاوية و فتح المعبر يروح الاعلام مشقلب الوضع و يطلع الغزاوية حرامية ولاد ستين متفجر
سبيلبرج كان منحاز و دى كانت ادوات انحيازه انه يحول الموضوع الى امر حيادى فيتبرجل صغار المثقفين الى زى حضرتك
........
قال زهرة البستان قال
انا لو كتبت الجملة العظيمة الى قريناها سوا ممكن ابوظ نافوخ القراء و يطلعوا يقولوا
اسرائيل هى الحل

عباس العبد said...

بنت القمر
ههههههههههه
فقسانى انت فقسانى
مشكلة الحكاية دى
و بعدين لما انت عارفة مصطلح " لئم الاقباط " بتقوليه ليه ؟ خليه فى سرك , بينى و بينك
كده انت فضحتينى
فقسانى فقساااااااااانى
.......
بنت محمود حافظ الى هى "نونة" تقريبا
انا حضرتلها ندوة او لقاء على الجزيرة فى برنامج اسمه من واشنطن واضح انها كانت مزة و هى صغيرة لأنها امورة
بس بتهته و مش عارفة تتكلم و لا كلمة, دى فضيحة
اعتقد ان الصهاينة نفسهم قرفانين منها
لأنها جيبالهم العار بكلمها و تهتهتها دى
.....
واحد بيموت فى قضية شريفة و واحد بيموت فى قضية وسخة
مممم
الله يغفر لكن اسرائيل لا تغفر
العربى الجيد هو العربى الميت
مممم
فاهمة قصدى طبعا
........
فسانى انت فقسانى
يختشى

^ H@fSS@^ said...

بص يا عباس
اولا يا ريت تكتب لنا الجملة السيم اللي انت قاعد بتتكلم عليها
لان كده عندي فضول شنيع جدا اني اعرف ايه هي
يعني احتمال اموت في خلال 48 لو مردتش عليا

ثانيا
انت قلت ان احنا لو حنحول المساءلة لصراع ديني مش حنخلص
بمعنى ان الفلسطينيين بيقولوا دي ارضنا و ممكن جدا الاسرائيليين يجيبوا كل الدلائل اللي تقول ان دي ارضهم
بس
و خد بالك من بس دي
الى الان هما ماجبوش اي دليل و لا حيلاقوا اي دليل يقول ان هنا هيكل سليمان
او اي اثار لموسى
ده شئ و الشئ التاني انه مافيش ارض خالصة لديانة واحدة بس بحيث يجيي اهل الديانة دول و يقولوا احنا حنتجمع هنا و مش متعتعين من المكان ده و مش عاوزين حد يجيلنا
الدين ما هو الا فكرة ، عقيدة، ، اسلوب حياة
و دي حاجة بتنتقل من مكان للتاني
وخليني اقولك على حاجة
لو كل اليهود قالوا احنا عاوزين نتجمع في مكان واحد و يبقى دي ارض الميعاد، معنديش مشكلة بس ايه اللي يضمني انهم مش حينتشروا في مكان تاني؟؟
و طبعا لان ده مش حيحصل فمش طبيعي انهم يحصلوا على ارض مخصصة لدينتهم كمان ينتشروا ف يارض الله و غيرهم لا و غيرهم ميخصصش
هو ممكن يتخصص مكان للعبادة زي ما الفاتيكان عامل
و زي ما المفروض يحصل في السعودية مثلا لكن لا ده بيحصل و للاسف لا ده بيحصل
تسييس دولة دينية مينفعش
تبقى مصيبة
المهم ارجع للنقطة الاصلية اللي هي عبوة ناسفة شريفة و عبوة ناسفة بنت حرام
انا عن نفسي بقول انه اه الاتين غلط و العبوتين غرضهم سافل و قذر
لكن لو حتكلمني على مين له حق مغتصب حقولك الفلسطيني و صحيح هو مش من حقه انه يرد بنفس الاسلوب السافل مهما كان هو متضرر لكن يا ريت منخليش كترة المحايدة تنسينا من له حق ضايع و من مغتصب لحق مش من حقه


الحاجة التانية او يمكن الخاسمة
مبقتش اعد
هي موضوع غزة و اللي حصل فيها
بس مستغربة شوية انك شايف الموضوع على انه شقلبة وضع من الاعلام
يعني انا اللي اسمي نص فلسطينية فقدت تعاطفي مع اغلب سكان غزة او خلينا نقول الغالبية اللي اقتحمت مصر بالطريقة دي و مازالت مستمرة في مسلسل سفالتها
و كله بتحريض من حماس
و المشكلة ان كل يوم حماس بتديني مثال واضح على سفالتهم الاخلاقية منقطعة النظير و ابص الاقي ناس مصريين متعاطفين جدا معاهم
طيب ازاي؟؟
يعني كل الهيلمان اللي حماس عملته ده عشان يكسروا معابرنا معاهم مكنوش عارفين يعملوه و لو مره واحدة بجد مع اسرائيل؟؟
انا مش بقوم الدنيا
انا جاية اهدي النفوس يعني
و خد بالك ان حماس دول من نفس ماركة عبوةناسفة بنت حلال و عبوةناسفة بنت حرام
لذلك و اخيرا
حقولك حاجة واحدة
الله يخرب بيتك انت عاوز ايه بالظبط؟؟
الحضور يا عم الحضور
حدد وجهة نظرك ابوس ايدك يا فخامتك
:)

محمد المصري said...

يا عم مش قصدي فكرة الحياد عشان ده أصلاً كان كلامك مش كلامي

ومش قصدي كمان التقييم الأخلاقي للفعل حسب وجهات النظر المختلفة عشان ده شيء هنتفق فيه تماماً .. سواء أنا أو انتَ أو بنت القمر أو حفصة أو أي حد من اللي كتبوا
طبيعي جداً إننا نكون شايفين القضية الفلسطينية هي الصواب ونشوف الفلسطيني شهيد

أنا كنت بتكلم عن بشرية الطرف الآخر بالأساس وإن هو كمان شايف إن اللي بيعمله ، عشان كده افتكرت الحوار بتاعنا اللي كان جزء منه بيدور في نفس النقطة

وبعدين يا عم الحوار ده كان من سنتين !!

حوار عبد الله كمال وجملته الخالدة العظيمة كان من تمن تسع شهور بس !

رامز السن ابتدى يأثر عليك جامد وذاكرتك بقت في البالوظة


لكن لو فكرى تتطور و اصبح متوافق مع رأى حضرتك يبقى فكرى اتنيل بنيلة


:D

:)

الإيميل هتلاقيه في البروفايل يا فقر ولو عندك أغاني سمسمية تانية اعطنا مما أعطاك الله

أحمد منتصر said...

والله المسألة دية عملتلي مخولة جامدة أوي ف دماغي

إزاي أنا بدافع عن حرية الإنسان وأنا بنصر الفسطينيين ف عملياتهم ضد الصهاينة؟

وفعلا كتبت مقالة أربع صفحات عن مميزات التطبيع مع إسرائيل

!!!

لكن بعد أيام من كتابتها لقيت الإسرائيليين قاعدين بيضربوا ف غزة ويقتلوا الأطفال

!!!

فكرت شوية اكتشفت إن الإسرائيليين أو الصهاينة أو اليهود إللي ف إسرائيل دول ناس أشرار أصراف

زي النازيين كده

يعني حلال فيهم كل حاجة :)

mahmoud said...

فعلا حاجة لازم الواحد يقف عندها كتير و يفكر..مش عارف ليه الموضوع ده خلانى افكر فيها من البداية، العصابات الصهيونية اللى كانت شغالة إبادة فى فلسطين طول السنين لحد اما خدوها بالحرب سنة 1948 و المجازر اللى تبعتها الى يومنا هذا..لما اشوف كل ده قى صورة واحدة يبقى مش هقف اتفرج لأن البادى أظلم فمش الفكرة ان شهدائنا فى الجنة و قتلاهم فى النار، الفكرة ان اللى بدأ اللعب هو اللى حط القواعد و الخطوات..يبقى كييف الدح مايقولش إيه؟

دى مجرد وجهة نظر لا أكثر و تحياتى لك و لمدونتك المميزة

عباس العبد said...

حفصت
ايه الاخبار
واحدة تقولى لئم الاقباط و التانية تقولى الحضور يا عمنا الحضور
الله الله الله
بالنوسبة للجملة انا مش فاكرها دلوقتى فعلا لأنى محفظتهاش بس ممكن محمد يكون فاكرها , هى جملة يا اما غلطة مطبعية يا اما من علامات الحماقة, حاجة كده ميكتبهاش غير ثقال المثقفين
........
المهم
هم فعلا مش حيلاقوا اى دليل على وجود اى حاجة لأن الهيكل تم تدميره بالكامل و محوه سنة 70 زى تنبأ المسيح
بس فى من العهد القديم
ساجعل ذريتك مثل رمل البحر و اى ارض تطئها قدميك هى ملكا لك
و ممكن اجبلك اكتر لو عايزة
هات من الى جوه يا شالوم
.....
اما الفكرة الرئيسية هى زى ما انت قلتيها , الاتنين العبوتين يعنى ولاد كلب ملهمش لازمة و شر
بس لما يكون شر لابد منه بننحاز للاكثر اقناعا , لصاحب مصيبة و بيدافع بيها عن نفسه
.......
بالنوسبتن للقضية الفلسطينية
عايزة الحق و لا ابن عمه
حقولك بنت خالته
شوفى يا ستى , المشكلة الفلسطينية زى ما انا قلت قبل كده لامؤاخذه يعنى من غير ما تفهمني غلط
القضية الفلسطينية متخشش ذمتى ببصلة و لا بعشرات قروش خس و لا تفرق معايا و لو كانوا بيحاربوا وش لوش و ليهم دولة و لا كان فرق معايا ان شالله يفرتكوا بعض و اى حد قرا كتاب سنوات الامل حيكرهم زيادة
لكن ازمتى و انا قلتها مية مرة
الحصار و التعذيب و القتل و الموت و التخريب و التشرد الى بيمارسه الاسرائيلى للفلسطينى عامل زى الابرة او الشوكة فى ضهرى
ضميرى بياكلنى و معذبنى مش قادر ابقى محايد
ساعات الواحد كان بيتمنى انه يطلع دماغه فاضية
ما هو يا اما يموتوا و يخلصوا و نترحم عليهم و نريح ضميرنا
يا اما مصيبة تحل على نافوخ الاسرائيليين و يحلوا عن نافوخنا و بما ان عملية الاغتصاب هى اسرائيلية فى المقام الاول فاكيد عايز الاسرائيليين يغوروا
......
بالنوسبت لموضوع حماس
فده موضوع يطول شرحه
حلو كده ؟
الحضور يا عمنا الحضور

عباس العبد said...

محمد المصرى
غيرنا كلامنا و عملنا مش و بس
اما موضوع الجملة دى فكان من سنتين لأنى مغير شغل من 9 اشهر و اكيد متقبلناش لأنى مبطل روزا من ساعتها , فاكر حفل التوقيع بتاع ياسمين مش كنت مبطل و كان فى شهر 11
انت الى بتنسى يا استاذ
مش انا
حبعتهولك على طول الكتاب
======
احمد منتصر
ممكن يكون حلال فيهم
بس هم كان شايفين انه حلال فينا
===========
ونيس
عدالة القضية !انا موافقك لأن الاغتصاب الاسرائيلى للأرض مستفز فعلا

^ H@fSS@^ said...

انا مش عارفة ان جبت حفصت دي منين وليه اتركت امسي بس ماشي كله منك مقبول يا فخامتك
و كمان انا مش فاهمة ايش دخل الحضور بلئم الاقباط اللي قالت عليه قمر
خصيمك النبي انا مش قد اثارة فتنة طائفية
الا انا يا عظمتك

بالنسبة لنظرية الهليكل فالمصيبة مش في حكاية انه انهار فمش حيلاقولوه اي دلائل
المصيبة انه الهيكل اصلا مكنش موجود فيما تسمى فلسطين الان
و فيه نظريات كتيرة بتقول ان الهيكل هو ......
معلش خليني ساكته لحسن تتطلب رقبتي في منطكة ما و اورح في ابو نكلة و انت طبعا مش حترضالي بكده
بس حقولك اقرا كتاب التوراة جاءت من جزيرة العرب لكمال الصليبي و كتاب هيكل سليمان لاحمد حجازي السقا
و لو كنت قريتهم فانا اسفه

نيجي لموضوع فلسطين
طبعا انا متعاطفة مع القضية بحكمين
حكم اني عربية و لازم ولا بد اللي بيحصل هناط بياثر فيا نفسيا هنا
و بحكم اني نصي فلسطيني و طبيعي اني اكون مهمتة برجوع ارض جدي عشان ابرطع فيها و اكل زتون و برتقال و اطلع اتشمس في سفوح جبال الصفصاف بارعة الجمال
لكن لما يستحوذ على القضية طابع ديني و اهل القضية يرضوا بكده اذن عليهم اللعنة
لان فلسطين مش مسلمين و بس و مش سنة و بس
الموضوع في قومية البلد مش في ديانتها
و للاسف الى ان تغور حماس في داهية قول امين انت و كل السامعين
فانا سوف اتوقف عن تعاطفي و انضملك في رايك اللي بيقول خليهم يموتوا و نترحم عليهم بدل الهبل اللي بيحصل
و حجرجع اقولك انا ممكن انحاز للفلسطينيين ماشي لكن مش باسلوب انهم يبعتوا عبوات متفجرة او شغل العمليات الانتحارية الاهبل بتاع حماس
او صواريخ بمب العيد بتاعت القسام
لا بقى
في حاجة اسمها مفاوضات و المفاضوات دي اذا مكانتش بتجيب نتيجة مكنتش بقت متعبة و مسيحة للاعصاب و محتاجة نفس طوييييييييييل
تشد؟؟

تحياتشي

^ H@fSS@^ said...

اتركت جاية من تركيا يعني و امسي كان قصدي بيها اسمي
معلش شوية حول عالصبح

عباس العبد said...

حفصت
فعلا
انا عارف انه اسم تركى , برده لأصله التركى
شوفى يا ستى
الهيكل موجود تاريخيا و يبقى موجود فى حتة مش حنتكلم فى المكان التاريخى دلوقتى لكنه اكيد كان فى الشرق الاوسط و ده اسخم
يعنى لو مكانه مش فى المنطقة اياها يبقى حيدوروا عليه عند خالتى فى الصعيد
هههههههههه
=======
انا اسف انى تحاملت عليكى فى موضوع فلسطين
بس سامحينى
موضوع المفاوضان ده اع اوى
و اختراع فاشل
ميجبش همه
صباحو فل و اخر جمال
=========

أبو عمر - الصارم الحاسم said...

واحد بيقتل مجرم..والتاني بيقتل برئ

لكن العمليتان من وجهة نظر كل منهما ...شريفة

وكل واحد بيعمل لاجل ما يراه مصلحته...لا خلاف

لكن هناك من هو على حق ومن هو على باطل

وربنا مدينا العقل والضمير لنميز الحق من الباطل

محمد المصري said...

يا ابني انتَ بتشاكلني وخلاص :)

مين دول اللي غيروا كلامهم يا عم ؟

وبعدين أنا مش بنسى

يوم الحوار بتاع ميونيخ كان من سنتين عشان وقتها كانت إيطاليا بتلاعب أوكرانيا وأحمد قال جملته الخالدة ، يا ابني افتكر كويس .. يوم الخلافات الأيديولوجية الحاسمة والتوجة السياسي في سينما محمد سعد والعلاقة بين إيطاليا وتظبيط المُزَز ورؤية المثقفين للأخلاقيات اللي تدهورت بدليل رمي قشر الموز على الأرض

ده يوم تاريخي يا رامز ميتنسيش ، زي يوم الجبنة البيضا كده ، ده تاريخ شعوب يا ابني

يوم عبد الله كمال وجملته كان في شهر خمسة عشان كنا داخلين على امتحاناتي ، وشهر 11 ده من تلات شهور مش من تمانية تسعة ! وحفلة ياسمين كانت في 12 وانتَ مبطل روزا من شهر 8 أثناء اعتصام عمال غزل المحلة ومقالة عبد الله كمال الملحمية ، السنة بايظة في دماغك متبوظهاش عندي أنا كمان

وبعدين حد ينسى جملة عبده ؟؟

عيب عليك ، أمال لو مكنش أستاذك

عموماً أنا عايز أطلع بالكتاب وبعدين أشوف شغلي معاك
فين الكتاب يا نصاب لسه موصلش !

محمد المصري said...

للمهتمين باقتفاء آثار العارف بالله وحبر الأمة عبد الله كمال

الجملة كانت :

بصرف النظر عن الانتماءات الأيديولوجية والفكرية والديمانيكية والمصلحية بين نواب الوطني ونواب الإخوان

ومحدش نبيه يطلع يسألني يعني إيه !!

ممكن تسألوا رامز بما إنه متربي على إديه وعارف دهاليزه

محمود المصرى said...

بسم الله الرحمن الرحيم

الاستاذ عباس العبد

انا سعيد جدا بالجو الحوارى الجميل فى مدونتك ودا هايشجعنى انى ارد عليك واختلف تماما معاك .
القتل فى ذاته لا يمكن ان استنكره لازم اشوف ظروفه ودوافعه , ومش كل عملية ازهاق للروح بتكون مستنكرة ومشجوبة لأن عندنا كمسلمين انه لا يجوز قتل النفس التى حرم الله الا بالحق , يعنى هناك حالات يكون فيها القتل حق وواجب , وهاضربلك مثل بعملية الجماع , هل نقدر نقول انها عملية مرفوضه فى جوهرها ؟ لا طبعا لأنها لو كانت فى الحلال يثاب الانسان عليها ولو كانت فى حرام يأثم عليها , ربما انت كمسيحى ترى ان الشهوة اساسا لازمة للخطية والسقوط البشرى لكن فى النهاية لا تنكرها بأطلاق .
اما موضوع الدوافع الدينية فدولة اسرائيل قامت على اساس دينى مش لسة هاتقوم , وهما بيبرروا ليها بأسس توراتية , والرد لا يكون برفع كل الدوافع الدينية للصراع لأن هما بيعتمدوا على تفسير فاسد لوعد الله , يعنى ربنا لما وعد بنى اسرائيل بالارض لم يكن الوعد علشان سواد عيونهم لكن لأنهم كانوا شعب الله المختار وكانوا شعب الله المختار بأيه ؟ بالايمان والطاعات ,زى ما فى سفر الخروج ( ان سمعتم لصوتى وحفظتم عهدى تكونون لى خاصة من بين جميع الشعوب )وكمان فى التثنية (جميع الوصايا التى انا اوصيكم بها اليوم تحفظون لتعملوها لكى تحيوا وتكثروا وتدخلوا وتمتلكوا الارض التى اقسم الرب لآبائكم )علشان كده لما عبدوا العجل ربنا قال لهم زى ما فى القران ( فتيهوا فى الارض اربعين سنة ) وزى ما عندكم وعندهم حرم عليهم الارض المقدسة ولم يدخلوا الارض حتى هلك كل الشعب الذى خرج من مصر علشان كده يشوع ختن الشعب كله عند دخوله ارض كنعان , وزى ما عندنا فى القران برضه لما سيدنا ابراهيم قال لله ( ومن ذريتى قال لا ينال عهدى الظالمين ) , يعنى بالمختصر المفيد كما نحن متفقين ( ولقد كتبنا فى الزبور من بعد الذكر ان الارض يرثها عبادى الصالحون ) او زى ما فى المزامير ( اما الودعاء فيرثون الارض ويتلذذون في كثرة السلامة ) والانبا شنودة ليه كتاب حلو بها الخصوص اسمه ( رأى المسيحية فى اسرائيل ) .
اما موضوع مباركة نسل ابراهيم فأظن انه كان يشمل اسحاق واسماعيل والارجح انه فى حق بنى اسماعيل زى ما قال فى التكوين لهاجر ( قومى احملى الغلام وشدى يدك به لأنى سأجعله امة عظيمة )
وانت برضه اللى تقدر تفيدنى فى الموضوع دا لانك اكيد عارف اكتر منى .
بالنسبة لما تفضلت به الاستاذة حفصة احب اعلق لو ممكن .
بالنسبة لكلام كمال الصليبى فهو محاولة لتغيير جغرافية الحدث التوراتى بعد الاشكاليات التاريخية التى افرزتها الكشوف الاثرية , ولا ارى اى فرق فى ان يدعى اليهود ملكا لهم فى فلسطين او اليمن , الوضعين هايكونوا اسوأ من بعض , ولكن للى عاوز يقرأ كتاب كمال الصليبى ياريت يقرأ بعده كتاب ( الحدث التوراتى ) بتاع فراس السواح .
اما الكلام عن حماس وعزة وفلسطين اظن انه خارج الموضوع ومافيش داعى نخلق خلافا حوله فالحق واضح .
مرة اخرى احب اؤكد سعادتى بالحوار معك والمشاركة فى مدونتك يا استاذ عباس العبد .

عباس العبد said...

محمد المصرى
تصدق ممكن فعلا
جايز , هى فعلا مظاهرات العمال دى الى موتتنى , مقالة 150 صفحة خلصت على
و بعدين هو ايه الكتاب موصلش
حبعته تانى و امرى لله
و لو ان الميل بفلوس
........
محمود المصرى
انا فى عرض السيد البدوى
هههههه
المهم
انت فقستنى انت كمان
انا كنت اتكلمت فى الموضو ده قبل كده بنفس الشواهد عن دخول بنى اسرائيل و ان العهد اتحول مش اتلغى من ارض مادية الى اوراشليم السمائية و هلاك الجيل القديم علشان يخش الجيل الجديد , كنت اتكلمت عن الموضوع ده مع الاستاذ راجى
و برضه وصية لا تقتل كنت اتكلمت فيها قبل كده
يعنى سعادتك جبت من الاخر و قفلت البوست ضبه و مفتاح
ماشى يا عم
انا سعيد بمعرفتك
و انا كتبت عندك كمان
ماشى يا بيه

ماما نونو said...

العزيز رامز
اولا انتا معجبة بمدى ثقافتك و غن فيه فى مصر شباب مثقف و متحرر فكريا مثلك و فرحتى بيك اكبر من فرحتى بالمنتخب
ثانيا اننى كثيرا ما فكرت فى هذا الموضوع من نفس زاويتك و هو ان هناك نصوص "مقدسة" تشير بان قتل الاخر سيؤدى بالقاتل إلى الجنة و بالمقتول إلى النار و هى نفس الفكرة بين اليهود و المسلمين
اننى ارفض اراقة الدماء عموما
لكن الست ترى معى ان الجانب الصهيونى تجاوز حدوده و بغى و ظلم ة اغتال بكل الوسائل و الا ترى معى ان ما يلقاه الجانب الصهيونى الآن يصنف من باب "رد الفعل"
اتمنى انى اكون رديت من غير كلام حنجورى و لا تصالح
لأنى زيك
مؤمنة بإنى مش من حقى اقول لا تصالح الا و انا ممتلكة كل عناصر القوة مش زى حماس عمالة تشتم اسرائيل و الناس و هى ما فيش فى ايدها حاجة

Alexandrian far away said...

عزيزي الأستاذ رامز - بتاع الأقاليم-
مساء الخير
أصدقك القول أني قديما كنت أعتقد أن الكتابة الغامضه غير الواضحة المعالم غالبا ما تخفي معنى عميق ورؤيه عويصه وهي نوع من المكر والذكاء من الكاتب
لكن حين كبرت أدركت أنه حين تكون الكتابة ملتبسة فهو ما يعود عادة لغيمان الفكرة في ذهن الكاتب وعدم أمتلاكه لزمامها
وطبعا هذا من حسن الظن بالناس لئلا أضطر لأتهام الكاتب بالخباثه مثلا أو عدم الشجاعه في طرح فكرته بمباشرة ووضوح
بص يا سيدي
فيما يسمى العمليات السوداء أو العمليات المخابراتيه
هي شكل من أشكال الصراع السياسي أو العسكري
والجميع بلا أستثناء يمارسها بنفس الطريقه، المخاتله والدهاء والتربص، هذه هي قواعد اللعبه، وفي الحقيقه أن العالم الواقعي يختلف كثيرا عن أفلام الكارتون، ولذلك فحتى أكثر القضايا خيرية وعدالة لا يمكن الأستغناء عن قدر من الشر - المبرر- لخدمتها
مثال تاريخي: لا تنسى أن الكنيسة الكاثوليكيه أبادت شعوب أمريكا اللاتينيه حرصا منها على أعترافهم بالمسيح كمخلص ودخولهم للملكوت

المهم
أساساسعادتك بتبص للعالم ببراءه عجيبه الصراحه لدرجه مشكوك فيها
- لكني طبعا أحسن الظن بك- أيه موضوع من وجهة نظر كل واحد هو صح دي؟
ما معنى التساوي بين من يقاتل أو يقتل من أجل تحرير وطنه وشعبه ومن يقاتل ويقتل من أجل نهب شعب أخر وسرقة أرضه وحرمانه الحرية والحياه؟
طبعا العبوه الناسفه التي تفجر رأس عميل موساد أو جنرال أسرائيلي شريفة وخيره لأنها تسعى للحرية والحق في الوجود وتدمر مغتصب ومعتدي
وأكيد العبوه الناسفه التي تقتل مناضلا من أجل حرية شعبه وحياته هي شريره وملعونه
الصراحه فكرتني بكائن عجيب كان صرح من فترهعلى الأنترنت أن جيفارا يساوي الزرقاوي
أحولال عقلي طبعا
لكن بجد أنا زعلان أنك فكرتني بالكائن ده
لأنه فعلا أحترامي ومودتي لك أكبر بكتير من كده
وسلام

عباس العبد said...

نهى حماد
لأ طبعا كلامك مش حنجورى
كلامك موزون جدا جدا و انا متفق معاكى و بشدة حتى لوراجتى تعليقى مع حفصة حتتأكدى من كده
الاسرائيليين فعلا تجاوزا حد العقل و لو ان مفيش حاجة اسمها عقل فى القرف ده
اما نظرية ما تقدرش الى متبعاها حماس فدى مصيبة لوحدها
======
ازدنجرانى بتاع الميه المالحة
انا كنت مستغرب برضه
قاعد ساكت ساكت و انا اقول بتوع ازدنجرية معلقوش متكلموش ؟ اتاريك مستنى تشوف الهلب حيترمى لى فين ؟
حلوة المقدمة بتاعتك
قصدك انى ضارب بلاستكات و متوه و معلى الدماغ فرحت كاتب البوست فكرته مشبرة فى الكتابة و مش واضحة يا اما انا برىء شاذج غرر بى التنين ذو الثلاث الروؤس حيث البراءة هى مفتاح الفرج و خصوصا الرأس الى ابادت شعوب امريكا اللاتينية
ماشى ماشى
وش تنفيض جامد ده و كمان عايز توقعنى مع مدونين قالوا ان جيفارا زى الزرقاوى
انت باين عليك مصاحب مسيحيين كتير لأنك شارب لئم الاقباط تمام
ههههههههههه
هى مش حكاية براءة و لا جهل
الفكرة الى استفزتنى فى المقال المكتوب ان اى حاجة احنا بنعملها هى من دلائل الشرف و الرجولة العربية و الفروسية و اخلاق النبلاء و اى حاجة يعملها اى حد غيرنا سواء اسرائيلى او امريكى او اوروبى او حتى لاتينى هى قذرة
نظرية شرف الست الى زى عود الكبريت دى و طريقة خضرة الشريفة فى الكلام
خنقتنى
احنا زيينا زيهم برضه بنلجأ للأساليب القذرة زى ما انت قلت
فهمت
و احنا بنتساوى فى الاساليب القذرة
فبلاش نعرة كدابة على الصبح كده
و بعدين تعالى
" ما معنى التساوي بين من يقاتل أو يقتل من أجل تحرير وطنه وشعبه ومن يقاتل ويقتل من أجل نهب شعب أخر وسرقة أرضه وحرمانه الحرية والحياه؟ "
هو اى حد يخش دولة يبقى غاصب و عايز يحرم اهلها من الحرية ؟ مينفش يعنى يبقى فاتح مثلا او محرر ؟
انا برضه لئيم يا لئيم
و بعدين الكنيسة الكاتوليكية تعمل الى هى عايزاه , براحتها , هى و الوحش الكاسر بنديكتوس
و انا مش عارف ليه ما ابادوش الاسكندرانية كلهم , حاجة غريبة فعلا

عباس العبد said...

الصارم الحاسم
فينك يا عم
بقالك مدة مجتش هنا
عملية التمييز دى مهمة
و هو ده الى خلانى اتفق مع سيادة العقيد
طبعا
=====
محمد
انا بعتلك الطرد فى الميل و كله بحسابه
هى الجملة فعلا كانت قريبة لكده زى ما انت قلت
بغض النظر عن الاختلافات المصلحية بين نواب الوطنى و الاخوان
المصلحية دى موتتنى

أبو عمر - الصارم الحاسم said...

اعلق على ايه بالضبط يا فندم
؟؟؟؟

:)))


على تعاطفا مع غزة والرياضة للجميع..واللا على سيجمون فرويد
؟؟؟؟؟


طب بما انك متفق مع سيادة العقيد...لازمته ايه البوست
:))))

واللا..........واللا بلاش
:)