Sunday, February 24, 2008

الله يخرب بيتك يا هيكل

تصدقوا انا مكنتش واخد بالى خالص

ان محمود صاحب دار سوسن للنشر عمل واجب معايا و انا كنت نسيت رغم انه قالى قبل كده و طلب منى رأى فى صورة الغلاف

محمود مشكورا نشر مجموتى القصصية ( الى تجاوزا نسميها مجموعة و قصصية كمان ) . متشكر جدا يا محمود و كمان شكرا لدار سوسن على الواجب الجامد ده

sawsan logo

انا لسه واخد بالى من انها اتنشرت انهاردة على الرغم من انها منشورة من فترة

..........

اليكم رائعة رامز شرقاوى الى هو انا

تحفتى الخالدة

الله يخرب بيتك يا هيكل

2249766635_319da40bd0

للتحميل

..........

الصراحة انا سعيد جدا

سعيد جدا جدا جدا

....

متنسوش تقروا اصدارات دار سوسن التانية

فى حاجات احلى بكتير من الى انا كاتبه

اقروا كل حاجة

31 comments:

karakib said...

ولا يا رامز !! ايه الحلاوه دي
انت موهوب يا ابني
الله يخرب بيتك يا هيكل
القصة نفسها مسخرة
دمها خفيف اوي
المجموعة القصصية كلها حلوة جدا
ايه يا بني ده
انت ليه مابتفكرش في النشر الورقي !!
لازم تفكر في الموضوع ده طبعا !

^ H@fSS@^ said...

الف مبروك يا قداستك
لسه مقريتش بس حبيت اهنيك الاول قبل ما امخمخ

تحياتشي

زمان الوصل said...

ألف مبروك يا عبس
:)

لسه مقريتش بس حبيت اهنيك الاول قبل ما امخمخ

وانا كمان

ماما نونو said...

الف مبروووووووووووك
من زمان قلنا انك موهوب و ما صدقتش
الف مبروك و ان شاء الله مناقشة المجموعة دى الواجب بتاعى
و لو اى ندوة انا يشرفنى اديرهالك
الف مبروك

The Z. said...

صباح النور،
الف مبروك و عقبال ما تفرحنا بخراب بيوت ناس اكتر :)
لا تتخيل كمية الضحك التي اثارتها كتاباتك هذه و انا داخل محاضرة جد مملة...الف شكر

تحياتي و متمنياتي بالمزيد من النجاح
المتتبع الجديد
زكرياء

ماما نونو said...

العزيز رامز
حبيت اكلم قداستك اهنيك على المجموعة و ارتب معاك لحفل توقيعها و مناقشتها بس الغريب ان رقمك مش عندى و ده له سبب منطقى ان موبايلى جاله فيروس و شال كل النمر
ارجو الاتصال بر لترتيب ذلك
نهى حماد

أبو عمر - الصارم الحاسم said...

الاغاني اللي بتحطها ...فضيــــــــــــحة
:))


لاز اقفل الصوت كل مرة قبل ما اخش عندك
:)))



طبعا براحتك تماما

هو سؤال...قصة هيكل دي حقيقة

وبتعبر عن تجربة شخصية
؟؟؟؟

انا ..مع تصنيفي كمتطرف متعصب ارهابي وهابي سلفي....اجد ده جنون حتى وان كنت على مثال بطل الصة...اخش اجيب كتاب فقهي او تاريخ اسلامي واسيب البنية اللي نازلة معايا-بس هتكون نازلة بمحرم ساعتها - واصرف فلوس هديتها
؟؟؟؟؟؟؟؟؟؟؟؟


الف مبروك...وربنا يهديك يا رامز
:))

أبو عمر - الصارم الحاسم said...

ىه القصة الوحيدة اللي قرأتها حتى الان هي قصة هيكل


يعني.....الله اعلم القصص التانية فيها ايه
:(

sonrisa said...

J'ai adoré le style.Félécitations.

عباس العبد said...

اولا
فى اربعة لازم اشكرهم
اتنين شجعونى و قالولى لازم تنشر الى انت كاتبه ده رغم انى مش مقتنع بأنه صالح
و الاتنين هم
نهى حماد ( ماما نونو ) و محمد المصرى صديقى العزيز
واما التالت فمدام اكرام الى ساعدتنى فى قصة منهم
و اخيرا محمود فوزى الى بعتلى رسالة و قالى لو احب انشر ده فى دار سوسن للنشر البلوجى
شكرا ليهم كلهم
==========
كراكيب
انت عارف يا هانى
محمد الشرقاوى صاحب دار ملامح لما قابلته فى معرض الكتاب , كلمنى و ادانى الكارت و قالى لازم اتصل علشان نشوف مع بعض ممكن نعمل ايه ؟ الراجل مشكور كان مهتم جدا
بس انا الى متردد جداجدا
=======
حفصة
عايز رأى واضح و صريح و بلاش مجاملات
و لو زفت
قولى زفت
======
زمان الوصل
لو زفت برضه
قولى زفت
==========
ماما نونو
مشكر جدا على دعمك
انا معايا نمرة التليفون و حكلمك
الفكرة ان دار سوسن دار للنشر على النت بس مش دار لأصدار كتب
يعنى مفيش حفل توقيع و لا اى حاجة من دى
يعنى تعملى داونلود و بس
لو كويسة ممكن انشر ورقى بس انا لسه متردد كتير
بس اكيد لو حصل و نشرت ,انتى الى حتديرى الندوة و تعملى الشغل كله
=========
زكرياء
انا سعيد انها عجبتك
و سعيد اكتر انك بقيت قارىء للمدونة
========
الصارم الحاسم
متشكر على دعوتك لى بالهداية
ربنا يهدى الجميع
مش عارف اقولك ايه ؟
هى اكيد حصلت و اكيد محصلتش
يعنى هى مواقف حصلت بس ملهاش علاقة ببعض
انا لا كنت خاطب و لا عندى عربية
بس
بالنسبة لموضوع الاغانى
فده فولكلور
==========
sonrisa
merci beaucoup
انا سعيد انها عجبتك
و عجبك اسلوب الكتابة
انتى من المغرب و لا الجزائر و لا تونس
مش نتعرف؟

أبوفارس said...

بجد وبحق وبدون أى مجامله جميله جدا يارامز..ولازم تنشر ورقيا..بعضها قرأته فى مدونتك ومنتدى أخر كنا فيه سويا..ولكن وبجد أنا سعيد بك..
وبناء عليه لك عندى عزومه محترمه..
سأكون فى القاهره النصف اﻷول من أغسطس..
ياااااه اللى يعيش..
لكن فعلا أحب أتعرف بك شخصيا أنت ومحمد المصرى وهانى كراكيب..
والعزومه عليا
..أياك تكسف عمك أبو فارس أنا شرقاوى وأزعل قوى..تحياتى ياولدى وخالص مودتى...خالد

ما أنا عايف طبعا !! said...

ألف مبروك يا رامز
ومن أيام المندرة وانت تستحق كل حب وتقدير وإحترام

وبخصوص ذكرك لموضوع تشجيع إكرام يوسف لك فده يدل على شيء واحد وهو انك - بجد - أصيل أصيل أصيل

ربنا يكرمك ويوفقك

ونشوف حاجاتك منشورة فى مجموعة قصصية كبيرة زى حمار من الشرق

ربنا يقدرك على النجاح أكثر وأكثر

^ H@fSS@^ said...

هو مش زفت ابدا بس ينفع اقولك الله يخرب بيتك انت مش هيكل؟
ايه ده يا عباس
ايه الجمال ده
كلهم حلوين
يمكن واحدة بس اللي مدخلتش الطاسة
بس الباقي ايه
ده و قال ايه كنت متردد؟؟؟
ليه يعني؟
ترفعا علينا و حرمانا من القراءة الشيقة دي
يا رامز المفروض انك عرفت او حسيت اني بقرا كتب كتير و صدقني صدقني صدقني
الفترة اللي فاتت دي شفت بلاوي
و صدقني انه من فترة طويلة جدا جدا ملقيتش حد يقدر يشدني بالشكل ده من زماااااااااااااان
طبعا بتاعت هيكل مسخرة و اسلوبك في الرومانسية فكرني بأخويا و ناس شباب قرايبي
و لسه مخطبوش و لا لاقيين لغاية دلوقتي
هما نفس سنك كده
الظاهر دي صفة عولمية

و قصة العبيط كانت ملعوبة
و اخر كام قصة كانت الشكل التقليدي المحبب الي نفسي لانه فيه بساطة السرد بكل تلقائية و عودة للقصص اللي هي بكل بساطة قصص، يعني حواديت اخر الليل يعني
مش لازم تكون تكعيبية الشكل او مفحمة المستوى او متغربلة المفاقيع

رامز
قداستك
شكرا
جدا
بسطتني و الحمدلله
يلا اكتب كتير اوي و طبعا مش محتاجة اقولك ابعتلي القصص اقراهم مجانا
هههههههههههههههه

بنت القمر said...

الاستاذ رامز
حفظه الله ومع تصنيفي من الاديبات الشابات وعملت لكم سوبر بوست يا شعب ابوي
وها اطلع النجيله علي عنيكم.. احب واتشرف بشده اقرا انتاجك الادبي
بس حكايه التحميل دي صعبه شويه ريجسترايشين وبعدين ايه ؟؟يا ريت تكتب لي الخطوات عشان وقتي ضيق اشغل نفسي بالحاجات البسيطه دي يا دوب عليا اتابع انتاجكم واقيمه
واتحفكم.. ببقيه ابداعاتي
اللينك بتاع ديزني حطيته في البوست عندي

بنت القمر said...

عملت اكاونت علي فور شاريد
وبعدين داون لود
نزل فايل يخرب بيتك يا هيكل عندي بس مش بيفتح
قالي نزلي بنامج adobe reader
كمان نزلته برضه الفايل مش بيفتح
اووووف
help me

Anonymous said...

انت رهيب جدا

و جميل جدا

و انا بعد ما حمّلت هيكل و بيته و اندمجت بالقراءة جدا جدا ..شفت انه من الواجب أتوقف شوية عن القراءة و اجي اشكرك و أشدّ على ايدك ..
أنا مبسوط جدا اني وصلت هنا و إنك اعطيتنا الفرصة نقرأ قصصك الجميلة .

ـ اّه ..نسيت أقلّك ..ما لكش دعوى بجمانة نمور ..ابعد عنها ..أحسن يصير بيننا مشاكل ..ههههه
ـ لك خالص أمنياتي بنجاح دائم و اتمنى أن تصل قصصك إلى أكبر نسبة من القرّاء لأنك موهوب جدا و تستاهل

جـو غانـم
لبنان

joe75.jeeran.com

Anonymous said...

مساء الخير
بصراحة لم أقرأباللغة العربية من مدة أتمنى أن تواصل فأسلوبك رائع

Sonrisa from Morocco

عباس العبد said...

ابو فارس
انت تنور مصر الاول و بعدين نشوف موضوع العزومة دى بعد كده
=======
ما انت عايف
انا لسه فى الاول يا سيدى
لازم اشكر الناس و الحركات دى
لكن بعد ما اتشهر
انسى , حنفض لكله و حعمل انى مش واخد بالى من حد و انت عارف الحركات دى
و كده و بتاع
شهرة بقى
=======
حفصة
انا شاكر لرأيك جدا
و مش عارف اقول ايه
ربنا يستر متبقاش مجاملة اصحاب
=======
بنت القمر
ابعتيلى الميل و انا ابعتهملك عليه
انتى عارفة الميل بتاعى
ابعتيلى الميل بتاعك و فوريرة
========
جو غانم
جميل جدا
انى وصلت للعالمية انت من لبنان و سونريزا من المغرب و ابو فارس من كندا
ناقص اترشح للبليتزر و كده يبقى خلاص
نورت المدونة و انا سعيد بمعرفتك
==========
سونريزا
انا تحت الامر
اكتب تانى
انتى تعرفى نوريتا و لا ايه ؟

Hypatia said...

لولوللللللليي ي ي ي
دى زغروطه لمعاليك
الف مبروك يا فندم وبعد القرايه نبقي نكتبو التعليق النوهائي بس حبينا نباركولك بس

^ H@fSS@^ said...

الله
ليه كده يا عبس؟
واجاملك ليه بقى؟؟
لك عندي حاجة
انا اللي بيعجبني بقوله و اللي مش بيعجبني برضو
بقله
وعلى العموم انا فعلا استمتعت

تحياتي

Alexandrian far away said...

يا رامز يا حبيبي
يا قداسة الملك النعمان
يا اقليمي
بطل خباثه يا ابني
فيه حد في الدنيا كلها بيبقى ناسي أن كتاب له بينطبع؟
يعني أيه؟
جلالتك مثلا كتبك مبوظه المطابع عشان شغاله ليل نهار تطبع في عشرات أو مئات العناوين الي قداستك أبدعتها؟
:-)

ألف مبروك يا جدع أنت
ألف مليون مبروك
صدقني عمرك ما حتنسى روعة أول مره تمسك فيها أول كتاب مطبوع ليك
أظنها شىء كده زي أحتضان أول طفل تخلفه
ليا عندك نسخه موقعه يا باشا لما اشوف في الأهره بتاعتكم
ويمكن أتفضل عليك بنسخه من ديواني الشعري

مبروك يا رامز ويتربى في عزك وتكتب عدد حروفه
أما عن المجموعه فحاقراها النهارده وأقول لك رأيي
تحياتي ومبروك كمان مره

عباس العبد said...

اسكندرانى
انت داخل تانى تسخر منى و لا انت مقرتش ايه هى دار سوسن ظ
دار سوسن دى يا برنس
دار نشر على الانترنت
بتبعتلها اعمالك لو كويسة بتنشرها لى الدار على النت و بترشحك لكذا دار نشر لتحويل العمل الى ورقى
يعنى مجرد وسيط بينها و بين دور النشر
بس يا عم
و بما انى عارف انك اكيد قريت يبقى انت اكيد بتسخر منى ماشى يا عم
============
نسرين
ربنا يستر من نقدك
========
حفصة
لأ انا فهمت
من الميل
==========

Alexandrian far away said...

أوووووووبس
معلش يا رامز يا أبني
العتب على النظر
أنا كنت ناسي الدار دي
دي طلعت دار بلوجيه برضك
والنشر فيها افتراضي
معلش سامحني يا ابني
والمسامح كريم
عقبال ما اشوف مجموعتك منوره الورق يا رامز يا أبن حوا وأدم

تحياتي

ماما نونو said...

لتل باتلكك عشان افرح و دى اجمل فرحة بالنسبة لى ان زميل ينشر كتاب
ممكن نتقابل كلنا اعضاء البلوج بتاعك و نتعرف و نناقش المجموعة فى وقت لطيف نهرب بيه من التفاهات اللى حوالينا و العزومة على و ما تزعلش انا على كتب لكل اللى ها يجى تتوقع
و الف مبروك ثانى
نهى

Esmeralda said...

وصلت فى القرايه لحد غضب
بجد حلوه اويييييييييييييييي
عقبال النشر الورقي

عباس العبد said...

اسكندرانى
اظبط
ايون كده
بلاش حكاية حوا و ادم دى
علشان مثيرة للقلاقل
==========
ماما نونو
انتى مكبرة الموضوع جدا
و محسسانى انى بطل قومى
على العموم
انتى الى حتكلفى انا معنديش مشكلة
و بدل ما نوقع الكترونى
نوقع كتابك انتى
=======
ازميرالدا
انا مبسوط جدا من زيارتك
انا متابع جيد لمدونتك
و سعيد بتشريفك لى
و يا ريت تقوليلى رايك فى المجموعة
========

Anonymous said...

الله يا شرقاوي
انا إزاي ما خدتش بالي من الحكاية دي
ألف مبروك على المجموعة وعقبال النشر الورقي والكتب المحطمة لأرقام المبيعات
أنا لسه ما كملت قراية
بس حابعتلك ميل وأقلك رأيي في المجموعة بكل تواضع وبدون أدنى مجزرة وتشريح
:)

حمود عصام

ماما نونو said...

انا باتكلم بجد و ياريت نتقابل كلنا
و انا مصرة

ماما نونو said...

بالمناسبةيا رامز
كانوا كاتبين عنك فى الدستور
انا شلت لك المقالة

عباس العبد said...

عصام حمود
انا فى انتظار نقدك
و متبقاش مجامل
========
ماما نونو
انا معنديش مشكلة نتقابل فى اى وقت
فرصة عظيمة نتعرف على بعض
و الدستور كان ناشر تدوينة عبدالرحمن الى اتكلم فيها عن مقابلته معانا فى معرض الكتاب
بس يا ستى
========

Anonymous said...

مبروك المجموعة يا رجل