Tuesday, April 15, 2008

أن تكون شرقياً

مساكين , هؤلاء من يسكنون هناك . فلنشفق عليهم قليلاً .

.

..

...

....

أن تكون شرقياً ... هو أن تكون مهموم بقضايا أمتك و منشغلاً بمنعطفاتك التاريخية و خطاباتك الثورية و ايديولوجياتك النهضوية و رؤاك الفكرية و حضاراتك الثقافية , تاركاً هؤلاء الساكنين هناك لتفاهتم التكنولوجية و تعفناتهم الأقتصادية و حقارتهم العسكرية .

أن تكون شرقياً ... هو أن تكون متديناً مؤمناً عاملاً بأيمانك داخلاً فسيح الجنات و شارباً من أنهار ملكوتك , تاركاً هؤلاء الساكنين هناك الى ماديتهم الأرضية و ترفهم الدنيوى و هلاكهم الأخروى .

أن تكون شرقياً .... هو أن تظل فى جهادك الأكبر لتحرير روحك من الشيطان الذى يسعى للسيطرة عليك و إعثارك و دفعك إلى إرتكاب المعاصى و الخطايا , أن تحافظ على شرف نساءك , أما الساكنين هناك , من أستباحوا نسائهم , فالشيطان قد استحوذ على أرواحهم , هل سمعت عن أحد الساكنين هناك يكذب , يحلف , يصل متأخراً الى عمله , يشتم ؟ طبعاً لا ... هل تعلم لماذا ؟ لأن الشيطان قد أستحوذ على روحه فلم يعد بحاجة لأن يدفعه الى الخطيئة . أما أنت أيها الأبن البار للديانات التوحيدية فجهادك عظيم لأنك رفضت أن تبيع روحك القدوس بأرخص الأسعار لشيطان التقدم و العلم و المعرفة و قد كافئتك السماء لذلك .

أن تكون شرقياً ... هو أن يكون مصحفك و أنجيلك صينيان , هى أن يكون صليبك و سجادة صلاتك تايوانيان لكى تتفرغ للعبادة و للصلاة . فالرب قد سخر الساكنين هناك لسعادتك . لا ترهق نفسك , سيصنعون كل شىء من اجلك . فهذه هى مكافأة السماء لك , أنت المُخَلَص و العبد الصالح , تعيش فى سكينة على الأرض , تصلى و تتأمل و تنتظرك نهاية سعيدة فى جنات الخلد و ملكوت السماوات , بينما الساكنون هناك -  المسخرين لخدمتك فى الدنيا -  هابطون الى جحيم فى الأخرة .

أن تكون شرقياً ... هو ان لا تترك شيئاً للصدفة . فأنت تدرس كل شىء , هل دخول الحمام بالرجل اليمنى أم اليسرى ؟ , هل صورة قديس واحدة تكفى لكى تنجح فى الأمتحان أم لابد من صورتين ؟ , اما المساكين الساكنين هناك , الذين يحلّون فوائد البنوك , مرتكبو المعاصى , يذاكرون جيداً قبل الدخول الى الأمتحانات تاركين عن جهل و قلة إيمان , بركة الرب الذى من عنده التوفيق.

أن تكون شرقياً ... هو أن تشرب ماءاً ملوثاً و تأكل طعاماً مسرطناً و تموت فى طابور العيش , شاكراً الله على نعمه التى أعطاك , محافظاً عليها , المحروم منها الكثير من شعوب العالم . أما المساكين الساكنين هناك جاحدو النعمة و رافسوها , الذين يزرعون طعامهم و  يلقون بفوائضهم فى البحر للسمك , فسيأتى اليوم الذى ستزول فيه تلك النعم من وجوههم لانهم لم يتعلموا منا , أن يقبلوا أيديهم " وش و ضهر " , تلك العادة التى تحفظ النعمة من الزوال .

أن تكون شرقياً ... هو أن تعلم أن حكامك و رؤسائك و قادتك , هم عطايا الهية و هبة من الرب لعباده الصالحين  .  و أنه لا يجوز الخروج عليهم  أو أن تعصى لهم امر , أو يرفض أحد نعم الله و عطاياه ؟ . فلا يجوز الخروج على الحاكم , بل تجب الطاعة و الخضوع لكل من له سلطان لأنه من الله . اما المساكين الساكنين هناك , الكفار و الخارجون عن الملة , المهرطقين و الخلقدونيين , فهم يؤمنون بالعلمانية و الديموقراطية , وقانا الله و أياكم من شرورها و فسوقها .

أن تكون شرقياً ... هو أن تقتنع بأن كل ما يحدث لك من مصائب و مشاكل و أمراض هو بلاء و أبتلاء و تجربة , أ ولا يُبتلى المؤمن ؟ . أما الهالكون فى الدنيا و فى الأخرة , الساكنون هناك , فهم يطلقون على المرض ... مرض , و المصيبة ... مصيبة , و الكارثة الطبيعية ... كارثة طبيعية , لا حول و لا قوة الا بالله . و لعنادهم  قد درسوا الطبيعة و عرفوا قوانينها و تعلموا من اخطائهم و أكتشفوا علاج للامراض و أطلقوا عليه " دواء " , أعوذ بالله , فالله هو الشافى . و لأن إيمانك قد شفاك فانت لا تحتاج الا الى رقية أو قنديل أو بخور مع قليل من بول الأبل و مسحة من زيت الميرون .

أن تكون شرقياً ... هو أن تمتلك ساعتين , ساعة لقلبك و ساعة لربك . هو أن تمتلك قناتين , واحدة دينية و اخرى كليباتية . هو أن تمتلك ذمتين , واحدة لصلاة الضهر و اخرى لفلوس الدرج . هو أن تمتلك صليبين واحد خشب للذهاب الى الكنيسة و أخر ذهب لتخرجه فوق القميص أثناء لعب الكرة . و هذه الثنائية و المضاعفة فى كل شىء هى موهبة روحية و نعمة سماوية فالله يضاعف لمن يشاء . أما هولاء المساكين السكانين هناك , فلا يملكون إلا ساعة العمل و قناة الفكر و ذمة الضمير و خشب صندوق الأنتخابات الذى سُخط نتيجة لعنة من السماء الى زجاج .

أن تكون شرقياً ... هى أن تجلس فى أستوديو ذى اضاءة سويدية , مبنى على الطراز الأيطالى , مكيفاً بتكييف يابانى ,  امام لاب توب امريكى بلغة برمجة هندية مصنوع فى الصين , متعطراً بعطور فرنسية الايحاء , جالساً على كرسى من الخشب الدانمركى أمام ميكروفون ألمانى مريحاً قدميك على سجادة مخملية أيرانية الصنع لتعلن ان الغرب كافر و ملعون فى كل كتاب . و يجلس فى الأستوديو المجاور لك و يبث على نفس القمر الصناعى التى أطلقته فرنسا , ذلك الكاهن الظريف ذى اللحية القصيرة يكفر اخوته فى الوطن ليعلى كلمة الرب و ليجعل سبله مستقيمة .

أن تكون شرقياً ... هو أن تعلن أن المسلم الماليزى أقرب اليك من المسيحى العربى و تدعوه الى التدخل فى الشؤون الداخلية بأسم الوحدة الدينية . فى نفس الوقت , تتعجب و تستنكر - بأسم الوحدة الوطنية – و تطلب من مسيحييى الشرق الا يتدخل مسيحييو الغرب فى شئوننا الداخلية .

أن تكون شرقياً ... هو أن تفرح للنقض الغريب و الحقير من قبل القنوات الدينية المسيحية لأيمان اخوتك فى الوطن . و فى نفس الوقت , تتعجب و تستنكر عليهم  أن يخرجوا عليك بقنوات مماثلة تنقض دينك بحجة أنها تطعن فى إيمانك , لأن المحبة المسيحية و السماحة الأسلامية هى فوق كل شىء .

أن تكون شرقياً ... هو ان تكون كل أنجازاتك تاريخية , لأنها حدثت " زماااان "  . هو أن تكتفى بشرف المحاولة , لأنك فشلت . هو أن تفرح بالتمثيل المشرف , لأنك لم تصل . هو أن تُفضل أن تكون صاحب تاريخ فقط , لأنه أفضل من أن تكون " صاحب عيا " . هو أن تتفاخر إن اجدادك صنعوا التاريخ , لأنك كالأبن الخائب قد بددت المستقبل .

أن تكون شرقياً ... هو ان تعلن من امام خيمتك الكبرى مرتدياً جلبابك و أنت جالس على جملك ماسكاً سيف البطولة فى يدك , تعلن لأطفالك الجوعى و العرايا أن الأصوات التى يسمعونها تحلق فوق رؤوسهم هى لشىء أسمه طائرات , و أن النيران التى تنهال علينا من السماء هى لشىء أسمه صواريخ تُطلق من تلك الطائرات . تطلق سبة و تنعتهم ب " أولاد الكلب " ثم تكمل - بعد أن تصيب الصواريخ أطفالك و ترديهم أمام عينيك-  أننا نحن الشرقيون لنا عظيم الفضل و الأثر , و أنه بدوننا ما وصل هؤلاء الكلاب الى ما هم عليه الأن .

أن تكون شرقياً ... هو أن تعلن و أنت رائق البال مستريح الضمير , ان الساكنين هناك مغفلين جهلاء  ذاهبين الى جهنم و بئس المصير . اما انت العارف بالله , الأبن المدلل للسماء التى لن تخذله أبداً , فتعرف كل شىء و تعلم كل شىء و لا داعى للاجتهاد و التعب فأنت ذاهب الى جنة الحياة و ملكوت النعمة .

أن تكون شرقياً ... هو أن تعى جيداً انك الوطنى الوحيد . أبوك خائن , اخوك عميل , امك التى ولدتك تقبض من أحدى السفارات , اختك التى تعلمت فى مدارس بلدك تتخابر مع الساكنين هناك , جارك جاسوس , قريبك شيوعى , زميلك أرهابى أصيل , صديقك ليبرالى دخيل . اما المختلفين معك فى الرأى فجهنم و بئس المصير .

=========

و بما أنى وطنى ملتزم , شرقى أصيل و مؤمن متدين , فأسمحوا لى أن أنتعش بشرقيتى كما ينتعش السمك فى الماء , ما اجمل و ألذ ان تكون شرقياً . دعونى أستمتع بخلاصى و نجاحى و كفاحى و ثوراتى و أنتصاراتى و صولاتى و جولاتى , و ... , و ... .

لو لم أكن شرقياً لوددت ان اكون شرقياً .

----------

نشرت بمجلة مصر الجديدة

مجلة ألكترونية ... مصرية , ليبرالية , شهرية .

26 comments:

بنت القمر said...

عزيزي رامز
كويس ان مش انت اللي كاتب المقال ده
عشان كنت ها ازعل منك
ده مبدئيا
تانيا ومقلناش الخطيب المفوه
لو كان غربيا كان بقا ايه النظام
طب حقق سعادته
بالترف الدنيوي والجحافل العسكريه وال....

ارتاح بال...
ميتهيأليش
لو من باب النقد الذاتي ممكن اتفق معاه جزئيا لكن التصنيف بالمواجهه والمقابله ورص الاضداد
يبقا لا احنا صحيح عندنا مشاكل
نفسيه واجتماعيه وعندنا تأخر اقتصادي وفلس عسكري وانهيار تكنولوجي
بس هما كمان عندهم بلاويهم برضه
احنا بنتخانق ديني ولا دينك وهما من غير دين اصلا
اللي بيروح الشغل متأخر وحش وكمان اللي بيروح في معاده عشان ميضطردش ده مربوط بقوانين مش اكتر يعني التزام اجباري مش اختياري
معلش بقا وبما انك عم الجرئ وفتحت سيرة المسيحيين والمسلمين والطائفيه طب هما المسيحيين ليه بنقول احنا عنهم انهم ناجحين عمليا..اما في مدرس مسيحي بس ايه ممتاز او تاجر انما ايه اسعارة تحفه
او دكتور انما ايه شاطر
يعني بنقول مسيحي ولكن فيه كيت وكيت
هو ذكي وبيتغلب علي انه ينجح مع المسيحيين بس بحسن تعامله او شطارته او تفانيه في عمله
مش عشان هو جيناته انه مدرس شاطر او تاجر ناجح او او
فاهمني
مش اختياري ده اجباري
الا لو عاوز تفهمني ان المسلمين غالبا
ولا بلاش انت اكيد فاهم
ودي تبقا نظرة عنصريه صح يا مان
طيب الاجانب نفس الحكايه بيلتزموا بالمرور عشان خايفين من الغرامه لكن لو يقدروا يظرفوا الصول 5 جنيه كانوا عملوها مش احنا اللي الفساد في عروقنا لا الحكايه كلها ان عندنا منظومه تشجع الفساد مش اكتر وتشجع الانتهازيه والرشوة
ها تقولي اشمعني هما معندهمش اقولك تطبيق القانون عندنا غايب تقولي ليه
اقولك نظرا للمنعطفات التاريخيه والخطابات الثوريه وتكالب الظروف الكحلي والبني علي دماغنا احنا في مرحله تشقق حضاري وانهيار فكري وكبوة ثقافيه
لالالا
معلش اسفه جدا
لا اتفق مع النظرة والتقييم الدوني للذات بتاعه صاحب المقال
انت كان بقالك كام يوم فين مختفي؟؟
اه كل ده بتكتب في البتاع ده يا شيخ
خضتنا
:))
دا انا قولت خطفوك ودبحوك ولا حاجه
تحياتي

بنت القمر said...

ايه ده هو انت!!!! يا صدمتي!!ماشي يا استاذنا ما زلت عند رأيي وانا اقول الراجل ده بيجيب سيره الخلاص ليه وشكله بيتريق هو انا من ساعه ما جبت سيرتها وهما ماسكينه في كل حته لحد ما احد افوكاهيين قال عنه الخلاص بمعني مشيمه العيال الصغيرة
اتاري انت كمان ها تمسك في الخط
وتتريق علي الخلاص
اخص عليك اخص
لا اخص اخص اخص
واديك شفت اللي يجي عليا لا يربح ولا يكسب واخرتها يندب يخته

ايه ده ايه ده انا بقرا تاني من شو اوريجينال بوست وانا بكتب

أنت المُخَلَص و العبد الصالح , تعيش فى سكينة على الأرض , تصلى و تتأمل و تنتظرك نهاية سعيدة فى جنات الخلد و ملكوت السماوات ,
ايه ده
مين اللي بيصلي ويتأمل ومستني الخلاص
ده انتي جمعتني مع بؤر الارهاب والعنصريه واطائفيه والجهل
لا يا با شالا
مش عشان انا بدور علي شويه روحانيه لبقا من دولم
اسفه جدا ارفض هذا التصنيف بشده
وبعدين هما كمان ما عندهم ايدلو جيات دينينه وكل ساعه يخترعوا حاجه ودين جديد يديهم شويه طمانينه وتعزيه في العالم الوحشي ده
ولا ايه؟؟
طب يا عم الكادح العالم العامل
التكنولوجي الثوري الليبرالي
برضه مش عاجبني المقال ورص الاضداد كده
هما عسل واحنا بصل واصل التخلف
:(((
فيه احساس شنيع بالدونيه تجاه الاخر
مضايقه طحن

أحمد منتصر said...

ههههههه تحفة بصراحة :)

m5m said...

:عزيزى رامز

والله مابقيتش ألاقى تعليق يديك حقك

رائع فوق العادة
.....................

ليا بس تعليق صغير أرجو أن تتقبله الأخت بنت القمر: مش عارف ليه عندى احساس ان حضرتك ساعات بتخترعى نقط خلافية فى بعض التدوينات هنا فقط من أجل الاختلاف....وليه كل مالراجل يقول كلمة مسلم نلاقيكى نطيتى فى كرشه؟
ماحنا مسلمين برضه و مش شايفين ان الراجل يقصد حاجة وحشة

بنت القمر said...

m5m
بخترع نقط خلافيه
!!!!! وبضايقه
واحنا مسلمين برضه
******************
واضح يا اخي الفاضل انك قريت علي عجاله جدا
اولا ولنفرض اني بخترع خلاف وده مش حقيقي
هو انا من المفروض يا اخش اسقف لا معلقش؟؟
غريبه اوي- بما ان حضرتك اديت نفسك حق انك تنتقدني
وده مش مضايقني خالص
وبما اني ما بحبش اقعد ابرر كتير
لكن
انا عمري ما قصدت اضايق صاحب البيت
لانه مش بكتب ولا بعلق الا عند اصدقاء وفي اماكن بحبها لكن مش معني كده اني ابصم اني موافقه علي كل كلمه
ولو حضرتك لاحظت اني معجبنيش المقال لكذا سبب اصلا قبل ما اعرف مين اللي كاتبه
ماشي
ده في تعليقي الاول
يعني مش جايه اغلس وخلاص
اما التعليق التاني لما عرفت مش ها اسحب كلامي بعد ما رحت لينك المجله عشام طلع بتاع رامز
وبعدين ايه مسلمين ويهود دي
هو ذكر في مقاله حكايه المسلم اللي بيحب الماليزي اكتر من المسيحي المصري
ويا اخ م خمسه م
انا اصلا معلقتش علي النقطه دي اصلا ولا ناقشتها في اي تعليق
انا اللي معجبنيش يا اخي الفاضل حكايه ان احنا كشرقيين موصومين بكل اسباب التخلف والكسل والبلاده والاخر الغربي هو المنتج المتحضر المتنور الصانع...
وحسيت انها مقارنه غير عادله_علي فكرة الكلام ليك يا رامز كمان
وعشان كده قلت رص الاضداد وشعور بالدونيه
ايه بقا جاب سيرة اني عيبت ولا انتقدت المسيحيين؟؟
مش فاهمه
عشان قلت انهم ناجحين في التجارة والطب عشان يضمنوا توسع اعمالهم ونجاحها مش عشان جيناتهم كده وربطتها بالغربي اللي ما بيقطعش اشارة المرور عشان الغرامه مش عشان هو كده
طب ما ده مدح مش ذم لو لاحظت في الاخر
ولا احط لك علي بقي بلاستر الا يزعل رامز اصله معمول من قزاز ولو حد علق بكلمه وحشه ها يزعل؟؟
غريبه اوي
طب لما يزعل يا سيدي ابقا افهمه انا
لو زعل تاني ابطل اعلق خالص نو بروربليم
ولا انت شايف انه كاتب كلام نسقف له بس عليه
عموما لما يعجبني الكلام اكيد ها اسقف ولو معجبنيش ها اقول رأيي
واعتقد انه رامز نفسه اختلف معايا في مدونتي اكتر من مرة وعمري ما زعلت
لو حضرتك شايف اني مدعيه وبجر شكل بعد كده يبقا خلاص ده رايك
****************
يا عم رامز_ الكاريزما بتاعه حضرتك عاملا عمايلاها في الجماهير
:)))
كل ما افتح بقي هنا بكلمه يطلع لك محامي يحسن تزعل
ة وقبل ما تزعل كمان
تقريبا هما عاوزينك تزعل بالعافيه عشان يحاموا ويظهروا ولائهم ليك
:))
ومش اول مرة
طب انا مش ها اعلق تاني بقا لحد ما اعرف موقعي من الاعراب
:))
واجيب كمان المحامي بتاعي

m5m said...

:الأخت بنت القمر

أولا انتى بتقولى انك مش متضايقة من تعليقى رغم ان كل ردك عكس كده

معلش حابتدى ردى على حضرتك من أخر نقطة لأنك تجاوزتى فيها وأعتبر كلامك فيها خارج عن حدود اللياقة وهو قولك :
كل ما افتح بقي هنا بكلمه يطلع لك محامي يحسن تزعل
ة وقبل ما تزعل كمان
تقريبا هما عاوزينك تزعل بالعافيه عشان يحاموا ويظهروا ولائهم ليك

أظن عيب عليكى جدا يافندم كلمة زى دى..احنا مش ديول لحد ومالناش ولاء لحد ومش بناخد من حد حاجة...وحتة الكاريزما دى ممكن انتى تقبليها على نفسك باعتبارك بنت لكن احنا رجالة ومافيش راجل زينا حايبقاله كاريزما علينا
...........
تانى نقطة احنا مابنسقفش يا فندم...ومش حضرتك لوحدك اللى بتفهمى وتنتقدى..فكون عاجبنى مقالة رامز وباحييه عليها مش معناها انى باسقف وانى تابع ليه يا انسانة يا مثقفة
.................
تالت نقطة انتى اللى واضح انك ماقريتيش كلامك لأنى ماقلتش خالص لفظ " تضايقيه" ولا "تزعليه" اللى انتى بتعيدى وتزيدى فيهم...ودى مشكلة تضاف الى خطأك الفادح اللى انتى بتحاولى تاخديه دليل على الشجاعة انك ماكنتيش تعرفى انه صاحب المقال و ده عيب منك انك ماكلفتيش خاطرك تدوسى ع اللنك وتقرى مقاله ( وفيه كمان مقال لحفصة) وخدتى الموضوع استسهال واديها فى اكلاشيهات باعتبارها مؤامرة عنصرية امبريالية خزعبلية من الغرب الموتور على الشرق الجميل أو احساس ذاتى بالدونية واديها اكلاشيهات من عينة ان هما ماعندهمش دين أصلا وملتزمين اجبارى وخايفين من غرامات المرور ولو لقوا فرصة لدفع الرشوة حايدفعوها ( وده كلام غريب قوى الحقيقة)...يبقى مين اللى قرا على عجالة يافندم ؟

.............................

رابع نقطة انتى بتدعى انى قلت انك بتعيبى وتنتقدى المسيحيين..وأتحداكى تطلعى من ردى أى كلمة بالمعنى ده...لكن واضح انك بتردى على عقلك الباطن

وبتنكرى انك تطرقتى لنقطة المسلم والمسيحى...طيب ايه رأيك فى الكلام ده

:-

معلش بقا وبما انك عم الجرئ وفتحت سيرة المسيحيين والمسلمين والطائفيه طب هما المسيحيين ليه بنقول احنا عنهم انهم ناجحين عمليا..اما في مدرس مسيحي بس ايه ممتاز او تاجر انما ايه اسعارة تحفه
او دكتور انما ايه شاطر
يعني بنقول مسيحي ولكن فيه كيت وكيت
هو ذكي وبيتغلب علي انه ينجح مع المسيحيين بس بحسن تعامله او شطارته او تفانيه في عمله
مش عشان هو جيناته انه مدرس شاطر او تاجر ناجح او او
فاهمني
مش اختياري ده اجباري
الا لو عاوز تفهمني ان المسلمين غالبا
ولا بلاش انت اكيد فاهم
ودي تبقا نظرة عنصريه صح يا مان

وده كلامك انتى على فكرة
............................
قبل النهاية : أنا ماكنتش قاصد خالص مهاجمة حد أو الرد نيابة عن حد وماكنتش باعلق ع البوست ده بالذات ولكن من متابعتى لردودك فى كل البوستات...لكن واضح ان ايمان حضرتك الراسخ بحرية الرأى بيخلليكى تخانقى دبان وشك الجميل يابنت القمر

...............................

أخر نقطة بقى وهى قولك :-

طب انا مش ها اعلق تاني بقا لحد ما اعرف موقعي من الاعراب

وطبعا موقعك من الاعراب اللى مستنية تعرفيه ان رامز يخش يساندك ضد أتباعه وجماهيره أصحاب الولاء له على حد قولك
وبصراحة لو رامز عمل كده مش حازعل لسببين : أول سبب انك ليدى..ورامز لازم يبقى جنتلمان مع الليديز...وتانى سبب لأنك بنت القمر....وكلنا نحب القمر

...................

تحياتى

محمد

Nsreen Bsunee said...

رامز

بوست مميز كالعاده

بنت القمر

احنا مش بصل والله احنا اقل من كده بكتير
ولو محسناش بالدونيه عشان بناكل لحم حمير ومش لاقيين رغيف الخبز وملناش اى صوت جوا بلادنا واللى بيطلعلو صوت بيحطو جزمه فى بقه او فى اى حته تانيه ولما نبقي غرقانيين فى النفاق والازدواجيه والكدب والكره للاخر وعدم تقبله يبقي حنحس بالدونيه امتى؟؟؟

وصدقيني الغرب\الآخر ممكن اوى يكون لاقي الرضا بالترف الدنيوي ليه لأ
وليه بنهون على نفسنا دايما القرف اللى احنا فيه باننا نقول ان الغرب مفتقد الايمانيات والروحانيات اللى احنا -بنعتقد-اننا متمتعين بيها

الغرب فى بحث دؤوب عن الايمان زي ما انتى بتعمللى بالظبط بيلاقيه فى اليوجا فى البوذيه فى الاستولوجي فى عمل الخير فى ديانه ابراهيميه
بيلاقيه مطرح ما يلاقيه بس هو مش محرم عليه واحنا بس اللى منعمين بنعمه الايمان

:)

تحياتى للجميع

الصارم الحاسم said...

الكلام مختلط اوي...نصفه صحيح ونصفه خاطئ


هو فعلا ان تكون مؤمنا شرقيا او غربيا تبدا في ان تكون هدفا للشيطان ..لأن الغربي المنحل لا يحتاج الشيطان معه مجهود كبير...حقيقية وجودية وسنة من سنن الكون


اما بالنسبة لـ : أستوديو ذى اضاءة سويدية , مبنى على الطراز الأيطالى , مكيفاً بتكييف يابانى , امام لاب توب امريكى بلغة برمجة هندية مصنوع فى الصين , متعطراً بعطور فرنسية الايحاء , جالساً على كرسى من الخشب الدانمركى أمام ميكروفون ألمانى مريحاً قدميك على سجادة مخملية أيرانية الصنع

فهذه الاشياء اشترك فيها شرقيون ايضا الفرق انهم وجودوا في الغرب المنحل البيئة والنظام الذي يتيح لهم الابداع والابتكار فيما يفيد

عقبالنا

وما نؤمن به كشرقيين ان الأيام دول....ولا داعي لهذا اليأس


وَلاَ تَهِنُوا وَلاَ تَحْزَنُوا وَأَنتُمُ الأَعْلَوْنَ إِن كُنتُم مُّؤْمِنِينَ
إِن يَمْسَسْكُمْ قَرْحٌ فَقَدْ مَسَّ الْقَوْمَ قَرْحٌ مِّثْلُهُ
وَتِلْكَ الأيَّامُ نُدَاوِلُهَا بَيْنَ النَّاسِ وَلِيَعْلَمَ اللّهُ الَّذِينَ آمَنُواْ وَيَتَّخِذَ مِنكُمْ شُهَدَاء وَاللّهُ لاَ يُحِبُّ الظَّالِمِينَ

تلك الأيام دول بين الناس
وهتلف الأيام باذن الله وهيجيئونا كي يشاركونا في تصنيع الانتقال الآين المصري....والسيارة الطائرة السعودية ومركبة المجرات الجزائرية
:)


وَلِيُمَحِّصَ اللّهُ الَّذِينَ آمَنُواْ وَيَمْحَقَ الْكَافِرِينَ
أَمْ حَسِبْتُمْ أَن تَدْخُلُواْ الْجَنَّةَ وَلَمَّا يَعْلَمِ اللّهُ الَّذِينَ جَاهَدُواْ مِنكُمْ وَيَعْلَمَ الصَّابِرِينَ

karakib said...

لا لا لا
مش موافق علي كلام كتير اوي من المكتوب

HafSSa said...

اولا
اختلف مع بنت القمر و بشدة على حكاية ان الغربي لو جات له فرصة يرشي موظف كان رشاه
معلش
مقولة غلط جدا لان النظام عندهم هناك نابع من النفس مش مفروض عليهم من برا و لو عاوزة ادلة على كده عندي من هنا للصبح

ثانيا
احب اعرف من ام خمسة ام
ايش دخلني انا لما تقول انت و حفصة كمان ليها مقالة؟؟
يعني هل المجلة اللي بننكتب فيها انا و رامز وحشة ؟. و لا اعتبر دي مجاملة و لا اعتبرها ايه بالظبط يعني انا كل مشكلتي
هو التالي
انا ايش دخلني في كلامك؟؟
او بمعنى تاني ايه دلالة انك تذكر اني بكتب في المجلة دي؟؟


ثالثا:
اتفق مع ام خمسة ام يا بنت القمر انك فتحتي سيرة مالهاش علاقة بالموضوع
هل فقط لان رامز مسيحي فمجرد ذكره لكلمة مسلم تبقى فتحنا و جيبنا سيرة الطائفية؟؟
مش شايفة سيرة للطائفية هنا بتاتا
لانه بكل بساطة مش بيتكلم عن الدين الاسلامي في مواجهة الدين المسيحي امام الدين اليهودي مثلا
هو بكل بساطة بيتكلم عن ثقافتنا و ،حطي تحت نا المتكلمين دي مليون خط، الشرقية
سواء كنت مسيحي
مسلم
يهودي

الفكرة انك شرقي
لكن ديناتك ايه
مش هي دي القضية

اقول قولي هذا و الله اعلم
تحياتي


ملحوظة
انا لا بدافع عن رامز و لا يحزنون
انا بس بعبر عن وجهة نظري
رامز مش حيستنى حد يدافع عنه و لا ياخدله حقه
لانه مش صغير و لا مثلا قليل الحيلة
ده معلم
يعني قداسته
يعني المخ كله
يعني الكلام اللي يمخولنا و احنا مقمناش من على الكرسي
:)

m5m said...

:توضيح لحفصة

ماقصدتش خالص من ذكر مقالك أى معنى سىء ولكن كان قصدى حيث انك انتى ورامز وبنت القمر غالبا أضلاع مثلث لسجالات متعددة على هذه المدونة يعنى هى عارفاكى كويس وحيث ان مقالك كان قبل مقال رامز فحبيت أقول انها لو ماكانتش خدت بالها من مقال رامز كانت تاخد بالها من مقالك لكن هى كسلت و ماداستش على الرابط أصلا قبل ماتعلق أول مرة
.
.
.
ده كان كل قصدى وأعتذر عن أى سوء فهم غير مقصود

HafSSa said...

ههههههههههههههههههههه
عجبتني اوي جملة انت و رامز و بنت القمر غالبا اضلاع مثلث
لسجالات متعددة في هذة المدونة
بجد عجبتني
حسستني ان احنا رؤوس الجريمة الكبار زي افلام زمان لما كانوا بيجيبوهم قاعدين في قبو البيت المهجور و بيشربوا سجاير و قاعجين يخططوا للسرقة الجاية
بجد عجبني
و مفعلا مش قصدي تريقة و لا حاجة
لسحن تفهم كلامي غلط بنااء على اختلافات بيني و بينك سابقا
لكن انا بتعامل مع كل موقف لوحده


تحياتي و شكرا للتوضيح

mado said...

كتاب علشان متنضربش علي قفاك موجود في المدونة دي
http://documovies.blogspot.com/
احفظوه كويس واعرفو حقكم ومتخليش ظابط شرطة او امين شرطة يعتدي عليك
اعرف حقك وطالب بيه

The Innocent said...

بوست ممتاز وفوق ممتاز. من الحاجات القليلة اللي اسعدت يومي.

تحياتي

بنت القمر said...
This comment has been removed by the author.
بنت القمر said...

م خمسه م
بما انك نصّبت نفسك ناقد ليا رغم ان البوست مش بتاعك ولا المدونه مدونتك ويعني انت اللي بديت تجر شكلي
وبما انك انت اللي بديت الاول وقلت ما احنا مسلمين برضه
كأني قلت اني لوحدي اللي بدافع عن المسلمين وده مش حقيقي
واضح ان في التباس جامد جدا
وبما انك عليم بعقلي الباطن واتهمتني بطرف خفي اني انا اللي طائفيه
وختمتها بليدي وقمر وهو جنتلمان ولازم يضحك عليكي بكلمتين
فكان بودي يا جنتل انت كمان اتناقش معاك
كان ممكن
لساعات
بس بما انك مش شايف غير انه مسيحي لازم نحسس عليه لا يتقمص_ اصله مسيحي
ومش شايف غير اني مسلمه
وما ينفعش اقول بم عشان انا مسلمه تسمح لي يبقا انت اللي عنصري وطائفي ومش قادر تنسي انه يا جنتل في الفضاء السيبري وكناس متحضرة المفروض ننسي احنا مين ونتعامل كبشر ونناقش الافكار مجرده ومش كل ما اختلف مع مسيحي يبقا عنصريه
وزي ما انت مش قادر تنسي{وده اللي يقفل اي نقاش بينا} اني ست وهو راجل جنتل وليدي
ولازم الجنتل يطيب خاطر الليدي بكلمتين
وكأنك بتسبّق عليه وعلياوتقولي حتي لو طيّب خاطرك يبقا عشان انتي ست و ضعيفة وغلبانه وجبر الخواطر علي الله
اسفه جدا
جدا ارفض الاسلوب ده
وحكايه اني بنت القمر .. وكلنا بنحب القمر.. وكلام ملوش لازمه!! ...ده اسم ليه معني فلسفي يا محترم
ومش ها اشرحهولك
مش معناه اني بقول اني حلوة ولابدور علي كاريزما ترضيني زي انت ما قلت
ولا هو ولا غيرة اصلا شاف وشي ولا حتي قفايا
ولأ سيدي انا شبه عبد الفتاح القصري كمان
انا مش ست بتحامي فيه ولا في غيره ومستنياه يدافع عني
لآ يا سيدي مازال الكيبورد في جيبي واقدر ادافع عن وجهه نظري
يا جنتل واضح انك جنتل اوي وبتفهم في معامله الناس
كل الفكرة والكلام ليك ولغيرك
الكلام للكل
لو تعليقاتي مصدر ازعاج هنا
اقسم بالله وبكل موده واحترام مش ها اتواجد هنا تاني ومن غير زعل
فا يا ريت مش كل شويه حد يقولي مفروض اقول ايه
واعيد ايه
وايه اللي ليه لازمه يتقال وايه اللي ملوش
رغم ان اي شكرت جدا في كتابات سابقه ليه بس ده اتنسي
ورغم ان الصارم وكراكيب اعترضوا علي المقال ومحدش قالهم فين ولا ليه
وتقريبا الكل مركز عليا او تقريبا وجودي هنا بيضايقهم فأخدوا الميكروفون من صاحب المكان!!ا
لو يا رامز مردتش رد صريح وواضح
ها اعتبر ان مصدر ازعاج ليك وساعتها اقسم مش ها ادخل هنا تاني وها امسح اللينك من الريدر كمان عشان نفسي حتي ما تسوليش اني اقرالك في يوم
ويبقا كفايه عليك بوست فوق الممتاز ومبدع دائما ومش لاقي تعليق يوصف جمال خطك وحلاوة مشيتك انت شمس نهارنا ونور ليالينا!!
عشان بجد اتخنقت وزهقت
بنت القمر في قمه الغضب

m5m said...

:بنت القمر

لاحول ولا قوة الا بالله
.
.
.
لاتعليق
.
.
.
بجد لايجدى مع رد مثل هذا ومع صاحبة ردود بذلك الشكل أى تعليق
.
.
.
الحقها يارامز

Nsreen Bsunee said...

بنت القمر

بجد انا متضايقه انك وسعتى نطاق الجدال اللى بينك وبين محمد ووجهتى كلامك للكل

ولانى بافترض معاكي حسن النيه فا انا حارد عليكي وياريت تفترضي معايا حسن النيه ارجوكي

اولا انتى من حقك تتضايقي لانى محمد اتهمك بانك بتفتعلى الخلاف مع رامز وهو بكده دخل فى نيتك وده غلط لان الله اعلم بالنوايا فقط

وجميل جدا انكم وجهتو كلامكم لبعض بوضوح لكن ليه فى الاخر قلتي الجمله ديه

"

****************
الكلام للكل
لو تعليقاتي مصدر ازعاج هنا
اقسم بالله وبكل موده واحترام مش ها اتواجد هنا تاني ومن غير زعل
فا يا ريت مش كل شويه حد يقولي مفروض اقول ايه
واعيد ايه
وايه اللي ليه لازمه يتقال وايه اللي ملوش
رغم ان اي شكرت جدا في كتابات سابقه ليه بس ده اتنسي
ورغم ان الصارم وكراكيب اعترضوا علي المقال ومحدش قالهم فين ولا ليه
وتقريبا الكل مركز عليا او تقريبا وجودي هنا بيضايقهم فأخدوا الميكروفون من صاحب المكان!!ا
لو يا رامز مردتش رد صريح وواضح
ها اعتبر ان مصدر ازعاج ليك وساعتها اقسم مش ها ادخل هنا تاني وها امسح اللينك من الريدر كمان عشان نفسي حتي ما تسوليش اني اقرالك في يوم
ويبقا كفايه عليك بوست فوق الممتاز ومبدع دائما ومش لاقي تعليق يوصف جمال خطك وحلاوة مشيتك انت شمس نهارنا ونور ليالينا

*******************

ياريت كنتى فضلتى بتوجهي كلامك لمحمد او تحددي انتى بتكلمى مين وبتقصدي مين

مش عيب ابدا ان تعليقي يكون كلمتين بالاعجاب زى ما انا عملت او بالعكس زى ما هانى عمل مثلا

ومش عيب انى اسقف لرامز لو كلامه عاجبني
كلامك للاسف معناه الواضح انك شايفه ان مفيش حد من المعلقين عند رامز ليه لازمه غيرك ومحدش بيفهم وبيعارض وبيناقش غيرك ولو انتى بطلتى تعلقي عنده حيضطر اسفا لانه يكتفي بتعليقات هايفه من نوعيه برافو عليك

يا قمر انا مقدره ان من حقك تكونى متضايقه من ملاحظه محمد اللى فى اول تعليق ومن حقك تردي عليه لكن مفيش اى داعي لانك تهددي رامز بعدم التعليق تانى عنده او القرايه ليه لان رامز لغايه دلوقتى مالوش دعوه بالموضوع ومينفعش تستخفي بكل اللى بيعلقو هنا وتقولى ان تعليقاتهم هايفه ولا ترقي لمستوى تعليقاتك"والله ده معنى كلامك بالظبط"وانا عن نفسي مهاجمتكيش وانا اسفه انى علقت على تعليقك واخدت الميكروفون من رامز بس انا فعلا ولا بادافع عن رامز اصلا ولا غيره انا علقت على كلمه واحده فى تعليقك بس هى اللى لفتت نظري اكتر حاجه
"
طب حقق سعادته
بالترف الدنيوي والجحافل العسكريه وال....

ارتاح بال...
ميتهيأليش"
وجمله انهم معندهومش دين اصلا

عامة انا عاوزه الفت نظرك ان تعليقك الاخير فيه استفزاز بجد وياريت تراجعي نفسك فيه

Nsreen Bsunee said...

m5m

بعد اذنك يا محمد حاتدخل

افتكر يا محمد انت المفروض تعتذر من الاول ومكانش ليه اى لازمه تعليقك الاولانى بجد مستفز وعدوانى جدا جدا وانا لو مكان بنت القمر كنت حارد عليك بعدوانيه اكتر و لو انت تقدر تتحمل ان حد يتهمك انك بتصنع الخلافات او بتثير الفتن الطائفيه
لو انت تقبل ان حد يثير خلاف بينك وبين رامز زى ما انت حاولت تثير خلاف بينهم لو انت تقبل على نفسك كده فا مش مطلوب منها هى كمان انها تقبل على نفسها كده

انا شايفه ان البوست خرج عن موضوعه كان ممكن بكل بساطه تسيب المجال والفرصه ان رامز يرد على بنت القمر براحته

وللاسف التدوينه اتحولت لصد ورد مالوش لزوم وبسببك كله زعل من كله

فا ياريت تنهى الموضوع يا محمد وتعتذر لانك فعلا غلطان فا راجع نفسك انت كمان ومفيهاش حاجه لما تعترف بغلطك

عباس العبد said...

بنت القمر
ازيك الأول و شكراً على سؤالك على المستوى الشخصى , انا مش متغيب و لا مسكونى و لا حاجة , كل الفكرة ان معنديش حاجة أقولها . لكن انا متابع كويس و احنا أتقابلنا عند زمان الوصل .
لأ , انا مكنتش غطسان علشان اكتب دى . انا كاتبها من شهر لكن مكنتش قادر انشرها ألا لما تتنشر فى المجلة الأول . انا فعلاً معنديش حاجة أكتبها و ده مش عيب . غير انا عندى مشكلة جامدة فى الشغل و حاجات أخر لعبكة , فصليلى ربنا يسهل و أعرف اخد قراراتى صح بس .
أولا انا مقارنتش بالغرب . انا قارنت بالساكنين هناك , يبقوا غرب , امريكان , صينيين , يابانيين , هندوس , سيخ , مسيحيين , مسلمين ماليزيين , فده انا مقلتوش . انا معنديش احساس بالدونية ناحية الاخر , انا عملت رصد للحاجات الى انا شايفها " مش سليمة " من وجهة نظرى . و ده مش معناه بالضرورة انك تتفقى معايا , لكن معناه الأساسى انك لازم تختلفى معايا , و ده الى انتى عملتيه .
فى نقطة مهمة كمان , العيوب الى انا كاتبها عن المسيحيين مش حيفهمها غير المسيحيين لأنها تفاصيل دقيقة و بالتالى أحب اوضح , انا مقارنتش بين " عيوب أو مشاكل أسلامية " و الى متوافق معاها فى الفكر المسيحى , انا بتكلم عن " ما هو غير منطقى فى الفكر " الخاص بالشرقيين و ليس بالمتدينيين . اما ان المسيحيين متفوقين فى حاجات معينة فده امر طبيعى , المسيحيين فى مصر أختصروا حياتهم فى المهن العملية , لا مشاركة سياسية و لا مدنية و لا حزبية و لا حتى فى الوظائف العامة , فلازم " يبانوا " فى حاجات تانية , شىء طبيعى و مش راجع "لأيمان شخص " أو " لدينه " .
و بعدين انا متكلمتش عن عيوب ذات خلفية دينية فقط , انا قلت كمان عيوب فى الفكر العلمى و السياسى و حتى الثقافى .
انا منقضتش الخلاص , و لا كنت بكتب عن شخص معين , بقولك انا كاتبها من شهر , يعنى قبل ما " حد معين – واخده بالك - يتكلم عن الخلاص " بكتير , و لا كان قصدى أنتى و لا حاجة . " المُخَلَص " مقصود بيها المسيحى الشرقى و " العبد الصالح " مقصود بيها المسلم الشرقى , لان دى المصطلحات الى بيفضلها " الشرقيين " على انفسهم .
و بعدين مش عاجبك المقال ده حقك , و مش ممكن يزعلنى منك طبعاً . براحتك . ما هو لازم حد يختلف , زى هانى كراكيب ما دخل قال أنه مش مقتنع بحاجات و حاجات .
و اوعى تخشى تصقفيلى أبداً . و لا يهمك يا قمر , و على مهلك و براحتك .
و بلاش زعل من حد
لا حد يزعل منك و لا أنتى تزعلى من حد . و الله الموفق .

عباس العبد said...

أحمد منتصر
منور يا باشا
=========
م5م
الله يخليك على المجاملة دى
بس لى تعليق انا بقى : اى حد من حقه يختلف و دى حاجة طبيعية و متزعلنيش من حد . بالعكس دى ممكن تورينا نقط من زاوية أخرى مختلفة تماماً و ربنا يسهل .
=========
نسرين
لازم أعترف انك منورانى و كده و بتاع و شاى بالنعناع .
=========
الصارم
منور يا باشا .
جايز تكون الأحكام قاسية شوية , بس اكيد انت متفق معايا انها " منطقية " اما حكاية :
" وهتلف الأيام باذن الله وهيجيئونا كي يشاركونا في تصنيع الانتقال الآين المصري....والسيارة الطائرة السعودية ومركبة المجرات الجزائرية "
فاحب أقولك حاجة مهمة جداً و دى تصلح تدوينة لوحدها
لن يسمح احد لك و لا لأى " شرقى " بالتقدم و انتى فاهمانى . هم بيتعلموا من التاريخ و لن تتكرر " مأساة البترول " كما يقولون . معرفة الغرب بأن " لنا فضل " حتظل فى حيز " الشكر و التهنئة " و محدش حيسمح بتكرارها . مش علشان الشرق أسلامى و الغرب مسيحى , و فى صراع حضارات و الكلام الفارغ ده , الى بيبسطوا بيه الشرقيين و يفرحوهم انهم " مضطهدين يا عينى " و مغلوبين على أمرهم . لأ , لأن الغرب أتلدع من البترول قبل كده فى 73 . و الحكاية دى لن يسمحوا بتكرارها . قلعة صناعة و تقدم لن تسمح " بدخول أمثالنا الى عالم ال- بشر " . لن يتكرر التاريخ و لن يسمحوا بتكراره . هم بيتعلموا و احنا لا .
حقولك حاجة و انا نشرتها قبل كده :
لما سئلوا موشى ديان وزير الدفاع الأسرائيلى أزاى نشر خطة 67 و مخطط هزيمة العرب و أنه أستخدم نفس الأسلوب بتاع 56 فى الهجوم على الجبهات العربية و قالوله أزاى تنشرها و تبقى متاحة . اجاب بكلمة واحدة : ان العرب لا يقرأون .
=========
كراكيب
متوافقش يا عم
براحتك يا سيدى .
=========
حفصة
أيه يا جامد ده . انت براحتك
=========
البرىء
شكراً للمديح ده يا فندم
=========

عباس العبد said...

الى من يهمه الأمر :
انا مش زعلان من بنت القمر , هى حرة فى رأيها , لأن رأيها على راسى من فوق .
و لا زعلان من م5م و لا نسرين و لا حفصة و لا كراكيب و لا الصارم و لا احب ازعل من أى حد .
بس مبحبش الخناقات الجانبية , ملهاش لازمة الصراحة و بتزعل الناس من بعض على الفاضى و مش حنوصل لأتفاقات و لا لأى حاجة لان كل واحد له ارائه و قناعاته الشخصية , و أحنا بنتعرف من خلال التدوين و كتابات المدونين على أفكار و مواقف و قناعات جديدة . مش لازم كلها نقبلها و اكيد مش حنختلف معاها كلها برضه . التواصل ثم التواصل ثم التواصل , يعنى الدنيا مليانة صراعات مش حنزودها كمان فى اللحظات الى بنتعامل فيها مع بعض . حنتخانق و احنا مش شايفين بعض و نحرق دمنا ليه ؟ ركزوا فى الهجوم على البوست و على صاحب المدونة , مش المعلقين . انقضوا زى ما انتم عايزين و أعملوا ما بدالكم فىّ انا . و الله الموفق .

m5m said...

nsreen bsunee:-
نسرين..احترامى لعقليتك وتشريفك عندى مرات عديدة يجعلنى أتعامل بحسن نية مع تعليقك الموجه لى رغم حدته واحتوائه على كلمات اعتبرها جارحة..لكنى سأتعامل معه على أنه نصيحة أخت لأخيها ولو انها فى غير مكانها كان ممكن تقوليهالى فى بيتى أو على ايميلى بس مش مشكلة..رصيدك عندى يسمح يانسرين بس ماتسحبيش منه كل شوية...ومش ناوى أناقشه عشان مايخرجش الكلام منى عن الاطار ده

لكن فيه نقطتين مهمين عايز أوضحهم :

أول نقطة أنا ماقلتش انها بتفتعل خلاف مع رامز..ولكن قلت بتخترع نقاط خلافية..وكلمة نقاط خلافية معناها فتح باب نقاش..زى مانتى اختلفتى معاها..وعلى فكرة انتوا ملا حظتوش ان حفصة اتفقت معايا فى النقطة اللى اتكلمت فيها..يعنى مش أنا لوحدى اللى خدت بالى

ثانى نقطة أنا ماعنديش مشكلة أعتذر لأى حد أكون غلطان فى حقه وبرضه لاحظوا انى اعتذرت لحفصة لما حسيت ان كلامى اتفهم غلط..لكن مش ممكن أعتذر لواحدة بتهيننى وتقول عليا تابع لحد وانى با ظهر ولائى وانى من جموع الجماهير الغفيرة...ماعنديش استعداد أعنذر لواحدة بتحتكر لنفسها الحكمة و الفهم والباقى مسقفاتية زى مانتى قلتيلها...مش ممكن أعتذر لواحدة بتخانق دبان وشها

أرفض الاعتذار يا نسرين...ولكنى أؤكد زى ماقلت فى أول رد ان مش ده كان قصدى ولا كنت عايز أهاجم حد..لاهى ولاغيرها
وكان ممكن أعتذر لو هى ما ردتش ردودها المغرورة المتعجرفة

لن أعتذر لأحد

m5m said...

: توضيح

بيتى اللى قصدت ان نسرين ترد فيه طبعا مقصود بها مدونتى..وأعتذر عن اللفظ لأنى كتبت بسرعة وعفوية

بنت القمر said...

ليك شكري

.

وعميق امتناني

.

وتقديري

.
ودعائي وصلاتي بالتوفيق وكل السعاده والنجاح


.
تحياتي واحترامي يا رامز
وعلش ها رجع اعلق علي الموضوع براحتي في الرواقه بقا

:))))

HafSSa said...

بنت القمر
لو سمحتي ارجو انك متعلقيش
و لا تردي و لا ترجعي تفتحي الموضوع تاني لانه مش حيفيدنا باي شئ غير اعادة الصراع
اعتقد ان رامز كفى و وفى و طيب خاطرك بما فيه الكفاية و مافيش اي داعي للمخمخة و التفكير بروقان علشان ترجعي تردي
مش لازمالتصعيد اللي مالهوش اي لازمة
مكنتش مقالة يعني
خلاص
هدي النفوس و صلي عالنبي
an eye for an eye, makes the whole world go blind. mahtma ghandi.