سيجار كوبى

وضع كأسه جانبا و ضحك فى وجه محدثه
- متقولش الكلام ده يا راجل ... اكتر من كده و ربنا بيزيح
صب من الزجاجة التى امامه فى كاس زميله حتى وصلت الى الارتفاع المطلوب فأشار بيديه ان كفى
- شربنا كتير انهاردة
لم يتردد لحظة فى هز رأسه مؤيدا
ذهب الى الطاولة المجاورة و اخذ علبة مغطاة بالصدف و مزينة بأطار مذهب
اخرج منها سيجار كوبى فاحت رائحة ورقه المندى فى المكان
اشاح بيديه ملوحا بالسيجار
- مش عارف اقولك ايه فى الموضوع
ضحكا بأستياء من فكرة انهم فقدوا القدرة على تتبع الحديث
نهض الاخر متجها الى الطاولة القريبة متناولا من احدى الاطباق الموضوعة ورك فرخة متبل و بيده الاخرى كأسه المصبوبة
- اقدر اقولك و انا ضميرى مستريح
- بس متقولش " مستريح"
- خلينا فى المهم ... كل الى البلد ده فيه سببه حاجة واحدة
نهض من مكانه متثاقلا ... جرع كأسه دفعة واحدة
شعر بسخونة شديدة تسرى فى اوصاله اصابته بقشعريرة باردة محببة لنفسه و قد زاد توهج عينيه مع اشعال الاخر لسيجاره
- صدقنى فى الى بقولهولك .... الفقرا و الغلابة هما الى موديين البلد فى داهية
هز الاخر رأسه فى اقتناع و قال مؤيدا فى كلمات واثقة
- فعلا ... هما السبب ... مصر مفهاش عدالة اجتماعية ... لو فى عدالة كان زمان الحكومة خلصت عليهم و خلصتنا منهم .... فعلا مفيش عدالة اجتماعية