Monday, June 11, 2007

فى مستوى الطالب المتوسط



التدوينة دى ... حتثير على الاباء و الامهات

و الاخوة الناصريين و مدرسى الدروس الخصوصية

و عم احمد بتاع ماكينة تصوير المستندات للطلبة

الى جنب البيت

بس ما باليد حيلة ... و ما بالورقة اجابة

انا ندل

لازم اعترف بكده

و تتلخص ندالتى فى انى كنت طالب شاطر

و اتعملت كويس و ما اخدتش دروس فى حياتى خالص

الا فى بكالوريوس هندسة و فى 3 مواد بس

و الحمد لله ربنا وفقنى

لكن انا برضه ندل

ليه ؟

لأن من صغرى و انا بكره كلمة

فى مستوى الطالب المتوسط

لأن معنى كده ان الطالب المتوسط وهو اغلبية الفصل

هو و الطالب المتفوق حيقفلوا الامتحان

يعنى معنى كده

انى بدل ما انا و خمسة ستة بس نجيب الدرجة النهائية

لأ .... الاقى 30 واحد جايبن معانا نفس الدرجة

حاجة مقرفة قوى

........

ما هو لازم ليها حل

لما يكون فى علمى علوم الامتحان يجى

فى مستوى الطالب المتوسط و يجيبوا مجاميع عالية

و احنا مش عايزين يبقى كلهم دكاترة

يروح مجموع طب مرفوع

فتلاقى طب واخد 101 % .... يدوبك

لكن لما يجى الامتحان محترم متقسم مستويات

حتلاقى الشاطر بس الى ينفع دكتور هو الى حيقفله

و فى الحالة دى ... طب مجموعه مش حيعلى

و الى انت عايزه بس هو الى حيخش طب

......

اصل بعيد عنك فى طلبة رخمة

و اهاليها ارخم

بعد الامتحان .... يا عينى

البنات بيعطوا ... اصل الامتحان جه صعب

و مقفلهوش و الارخم الى يقولك انه جه

فى مستوى الطالب المتفوق

و يروحوا يشتكوا من الامتحان

و المشكلة انك كطالب شاطر مش شايف

اى مشكلة او صعوبة فى الامتحان

بصراحة كده

يا ستى بنتك هى الى غبية

او ابنك هو الى حمار

او عيالك مش بيذاكروا

و بعدين ابنك مغفل و بياخد دروس

و معتمد على الغش .... و انت عرفه و هو عارف

انه داخل يغش

و كمان طمعانه يبقى مهندس

ده ايه القرف ده

و كمان مش عاجبهم

.....

ليها حل

اما اننا نلغى مجانية التعليم

و ساعتها الطالب الى معاه بس

هو الى حيتعلم

و الى قادر ده حيتعلم كويس لأنه دافع

و ساعتها التعليم حيبقى محترم ... لأنه بفلوس

انا عارف ان الكلام ده ممكن يجنن الناصريين

و يهدروا دمى ... غير انه مليان ثغرات

يسهل الرد عليها

بس ده حل

......

اما الحل التانى

هو الامتحان المتدرج

كان عندنا مدرس فى المدرسة

اسمه جون ميشيل

كان بيحط امتحانات الرياضيات بالمدرسة

كان بيحط خمس اسئلة

الاول و التانى ... الى مذاكر فى العادى يحلهم

التالت .... عايز و احد مجتهد شوية و يقفله

الرابع .... عايز واحد ذكى و بيذاكر يحله

الخامس ... نصه يحله الطالب الذكى المجتهد المذاكر كويس

النص التانى من السؤال الخامس ... الطالب البرنس هو الى يحله

يعنى الطالب المتوسط يحل من 3 الى 4 اسئلة

و المتفوق من 4 الى 5 اسئلة

ده الحل التانى

ان العيال بتاعة ثانوية ... تترزع امتحان من الصنف ده

و ساعتها مش حيقفل الامتحان الا الطالب الى فعلا يستحق

و ساعتها مش حتفرق بياخد درس ولا لأ

لأن الى حيحل هو الطالب الشاطر اصلا

غير ان الغش حيتلغى ... لأن الى حيحل الاسئلة كلها

و تعب فيها مش حيغششها لعيال رخمة هى و اهاليها

يعنى عمرى ما احس انى حالل سؤال فى الجون

انا لوحدى حليته ... و اروح مديه على الجاهز لحد

.............

قال مستوى الطالب المتوسط قال

عيال مغفلة غشاشين فشلة

عايزين يبقوا مهندسين و دكاترة و محاسبين

و سياسين و بتوع سياحة

ما هو لما فشلة يخشوا كليات القمة

لازم يخرج علينا حرامية ولاد ستين فى سبعين

لازم طبعا

و لا انا غلطان

5 comments:

Bella said...

لا طبعا انت مش غلطان

مشكلة الطالب المتوسط اللى بيعملوا له حساب دي طول عمرها كانت خانقاني

هي صراحة الامتحانات في مصر مش معمولة للطالب المتوسط ولكن للطالب الحمار الصمام اللى لو نسي كلمة مايعرفش يتصرف

وكل الامتحانات تقريبا حتى في الكليات النظرية يتم عملها بنفس طريقة الطالب المتوسط المقرفة دي

ولو فكر دكتور ينضف الكلية من الطلبة المتوسطين او الفشلة عديمي المواهب الذين هبطوا على الجامعات ببراشوت الدروس الخصوصية والتنشين في الامتحانات او التوقعات المرئية والتعبيرات الامتحاناتية المصرية البحتة دي.

لو فكر دكتور يعلم الطلبة اصول البحث عن المعلومة مثلا لاسمح الله يجد عاصفة من الاعتراضات والجديد ايضا ان الطلبة بعد اللائحة الجديدة اصبحوا يشتركوا في تقييم أداء الدكتور

فتلاقي طالب فاشل لايحضر ولا يعرف عن المنهج شيئ منتظر انه يلم المنهج في الاسبوعين الاخيرين من السنة وكلمة من هنا على برشامة من هناك عايز مش بس ينجح لا ويجيب تقدير كمان

واذا رسب يتم رفعه بطريقة اغبى من امتحان الطالب المتوسط اسمها درجات الرأفة كمكافئة للطالب الفاشل على فشلة واعطاءه درجات ليست من حقة فيفتكر جنابه انه نجح وتصور له هلاوسه انه كان يستحق درجات اكثر فيقدم التماس لإعادة تصحيح المادة.

وكل هذا لان القائمين على التعليم في مصر كالنعامة التي تدفن رأسها في الطين وليس في الرمل فقط ولاتريد فعليا حل مشاكل التعليم وتنظيفه من الاغبياء والفاشلين الذين سيقومون لاحقاً ببروزة الشهادة والتفاخر بكل ألاطة انهم نجحوا ولم يكونوا يحضروا او يذاكروا

التعليم في مصر محتاج لثورة للنهوض به من كبوته

ثورة حقيقية من أناس على قدر من الضمير والمسؤولية لينقذوه فعلا من وهدته وليس مجموعةت من الهتيفة والمنتفعين ليعقدوا مؤتمرات ويشكلوا لجان تنبثق عنها لجان وليس لهم هدف في النهاية سوى قبض المعلوم والابتسام في وسائل الاعلام ولكه تمام وليذهب العلم للجحيم

طبعا ماهو العلم لايكيل بالبتنجان

حاجة تقرف

Anonymous said...

موضوع حلو أوي
ماكدبش عليك أنا طالب فاشل من اللي بيقولوا عليهم متوسط في هندسة بس بحب اللي أنا بدرسه ماتسئلنيش إزاي

بس عمري في حياتي كلها ما غشيت و مستعد أتحمل أي نتايج بس ماغشش لأني ساعتها هافقد إحترامي لتفسي وده أهم من أي إمتحان

صورة راسبوتين اللي فوق حلوة جدا

Mirage said...

تقول لمين بقى

بس اصلا الموضوع فعلا جامد جدا

وبحييك على تناولك ليه

بس هو اصلا مفيش تعليم فى مصر
يكفى انى متخرج من كلية التجارة معرفش اعمل قيد واحد بس بسيط

Unknown said...

كلامك غلط طبعا
فواحد زي وزير التعليم مثلا قدامه حل من حلين يا يعمل زي ما بتقول و التعليم ينضف بس الطلاب الفشلة - و هم الأغلبية - يسلخوا وشة و رسامين الكاريكاتور يبهدلوه و في الأخر يتشال. أو الحل التاني إنه يظبط الناس و يحافظ على كرسيه و هوه ده المطلوب

تــسنيـم said...

بص يا عباس انا معاك في كل كلمة من دي بس استنى القنبلة اللي هفجرها في بوست هي دي مصر يا عبلة وانت تعرف بقى انا أقصد اييه