Friday, July 06, 2007

حرام ولا حلال

............

العادى الى هو مش مشكلة و لا حاجة  

ظهر لما انفعل على سواق التاكس

و قالى انه ده حرام و اسمه اسراف

و ان فقراء المسلمين اولى بالفلوس دى

مش كده يا بيه ؟

........

طبعا انا فكرت بما انه حرام

و انا مش عارف ايه هو الى حرام

و انا بفكر فى فقراء المسيحيين

مش فقراء المسلمين

بحكم الانتماء

...................

فسألته ...

راح قال لى

انت كمان مش مركز معايا

دا انا بقالى ساعة بتكلم

قلتله هموم و مشاغل

راح بصلى قوى و انفعل على و على صوته

مشاغل ايه .... انت عندك كام سنة

علشان تقولى مشاغل

لا حول الله يا رب

استغفر الله العظيم

سامحنى يا استاذ

و لا يهمك كلنا شقيانين

انا بكلم حضرتك عن اعلانات مهرجان القراءة للجميع

مش حرام دى ....

قلتله لأ .... القراءة جميلة و بعدين فى كتب كويسة

انا مبتكلمش على القراءة و الكتب

انا بتكلم عن الاعلانات

انت مش شايفها كتير ولا ايه

دى مغرقة البلد

حرام ده و لا حلال

ثم انفعل على بشدة

حرام ده و لا حلال

و لوح بأيده فى وشى

حرام ده و لا حلال

قلتله

حرام فعلا الاعلانات كتير

و بدون داعى

و كمان بتقولى بدون داعى

يعنى انت مش عارف

عارف ولا مش عارف

رد على يا استاذ

بذمتك و ضميرك

عارف ولا مش عارف

لأ .... عارف

طيب لما انت عارف بتقول بدون داعى ليه

استغفر الله العظيم

انا اسف يا بيه سامحنى

مش فقراء المسلمين اولى ...هه ؟

مش فقراءنا اولى ....

اولى ولا مش اولى

رد على يا بيه

اولى و لا مش اولى

اولى طبعا .... اولى

..................

نازلين من على الكوبرى

و منزل الكوبرى من حظى النحس

مليان اعلانات مهرجان القراءة للجميع

شافها الراجل ركبه مية عفريت

 زيادة عن المية الى كانوا راكبينه اصلا

راح مطلع دماغه من العربية

و صرخ فى العربيات الى حولينا

حرام ده و لا حلال

و كلكم ساكتين .... اتقوا الله

عارفين انه حرام و ساكتين

حرام ده و لا حلال

طيب يا اسطى انا حنزل على حنب

بعد نهاية الكوبرى

هدى نفسك كده

و على العموم انت عملت الى عليك و اتكلمت

و عبرت عن رأيك

رأى فى ايه يا استاذ

و انا مالى .... انا مليش دعوة

الى عايزين يعملوه يعملوه

يحطوا اعلانات يشيلوا اعلانات

و انا مالى

دع الخلق للخالق

اديته الاجرة و نزلت

.......................

لكن الى مش عادى بقى

المشكلة الحقيقية ظهرت لما نزلت من التاكس

بص الراجل فى الاجرة و قال و هو طالع بالعربية

حسبى الله و نعم الوكيل

بياخد كام ده علشان يدفعلى 15 جنيه اجرة التاكس

حرام ده و لا حلال

مكملش 25 سنة و بيدفع 15 جنيه فى تاكس

حرام ده و لا حلال

.............

المشكلة ان السواق ده

ميعرفش انى كان بقالى 3 ايام فى الموقع

مروحتش و مش قادر اقف على رجلى

فكنت مضطر اركب تاكس

قولولى بقى

البلد دى رايحة على فين

حرام ده و لا حلال

هه

حرام ده و لا حلال

 

 

 

 

 

Blogged with Flock

4 comments:

Ramez said...

انا عايز اسئل سؤال
لية بحس ان فية مسلمين مش حاسن ان فية مسيحين حواليهم بمعني بتحصل كتتير ان الاقي سواق التاكسي بيشتم وبيسب لما يلاقي واحدة متبرجة علي رأية ونها اكيد مسيحية كافرة بننت دين كلب ولما يكلمك يوقلك علي طوول صلي علي النبي يا بية
حرام دة ولا حلال

عمرو عزت said...

طيب ما دام مستغرب ان معاك 15 جنيه و انت لسه صغير كده , يبقي كان متوقع أقل , كنت اديه خمسة و قل له علي قد سني .

bluestone said...

بما ان المسيحيين اغنيا وبيركبوا تاكسي ب15 جنيه .. يبقى أموال المسلمين أولى بها فقراء المسلمين ..
ولو ان فقراء المسلمين وفقراء المسيحيين وفقراء العشوائيات وقلة التعيين ..
كلهم كلهم مش هيسألوا ملة الفلوس دي ايه ..

وبعدين قراءة ايه ونيلة ايه
العيال أغلبها عندها تسمم من قلة الأكل
هاتلهم لبن مش مسرطن يشربوه .. وبعدين ابقوا احشوا دماغهم

بلا خيبة

Mirage said...

هههههههههههههههههههههههههههههه

انت جامد

جامد موت

انت عيشتنى فعلا وضحكتنى من قلب

اصل سواقين التاكس هما اكتر فئة معرضة للجنان لانها اكتر فئة بتلف البلد وبتشوف العجب كل يوم