هى قلة الاصل السبب
كنا فى غنى عن كل ده
لكن تعمل ايه فى قلة الاصل
..............
اصل الحكاية ان الولد كان فى ورطة
و مكنش عارف يعمل ايه
و جه استنجد بى و قالى الحقنى
انا فى مشكلة .... فاكر الموضوع
الى كنا اتكلمنا فيه .... الموضوع القديم
الى حصلنا زمان .... اهو رجع تانى
و ابويا عرف و حالف ليطربق الدنيا على دماغى
لازم تقف معايا
اى موضوع قديم .... انا مش فاكر
موضوع الحشيش و الخمرة و النسوان
يا نهار اسود .... مين الى قاله هى ناقصه
اهو الى حصل .... ده حالف ليبلغ ابوك و يعملنا فضيحة
مين الى قاله
فاكر البنتين الى جبناهم
فاكر
شافونى نازل من الشركة .... راحوا مسلمين على
فى الطرقة و ابويا كان باصص علينا .... قعد
يتقطس لغاية ما هرش الليلة
يا اخى ابوك ده
.................
هى قلة الاصل السبب
كنا فى غنى عن كل ده
لكن تعمل ايه فى قلة الاصل
...................
تتصرف كيف يا عبد الرحيم
تتصرف كيف يا عبد الرحيم
.....................
حنعمل ايه دلوقتى
انا مش عارف
الله يخرب بيت ابوك يا شيخ
...............
المهم اتفقنا
على انه لو حصل حنردم على الكلام
و نقول ما حصلش و ان الولد عينه
زاغت بس و حب يعاكس البنتين فى الشركة
لكن محصلش حاجة و كمان علشان نبقى فى الامان
مرحلوش الشركة علشان ابوه لو شافنى ميفتكرش
الموضوع و ينخفس ورانا
كده و نبقى فى الامان
...............
هى قلة الاصل السبب
كنا فى غنى عن كل ده
لكن تعمل ايه فى قلة الاصل
....................
قابلت انا ابو الواد فى الشارع
سلام .... ازيك يا اونكل
ازيك يا صايع
ليه كده بس يا اونكل .... احنا عملنا حاجة
و الحريم و الحشيش .... فاكرهم
حريم و حشيش ايه
ملناش فيه
امال مين الى فى
يعنى محصلش حاجة .... بتكدبنى و البنتين الى قالوا عليكو
بنتين ايه حضرتك ؟
البنتين بتوع الليلة اياها .... حتقول و لا
جاوبته بغضب
لو سمحت يا اونكل .... احنا مش بتوع الحاجات دى
و متكلمنيش بالاسلوب ده انا معرفش حاجة
و سبته و مشيت
و عديت على خير
............
هى قلة الاصل السبب
كنا فى غنى عن كل ده
لكن تعمل ايه فى قلة الاصل
................
دخل ابويا الاوضة و زعق لى
انت بتقل ادبك على راجل كبير فى وسط الشارع
انت بتستهبل .... يا قليل الادب
انا معملتش حاجة
امال ايه هو الى بيقوله ده
سكت الصراحة
ما انا مش عارف ابويا يقصد ايه
قصده انى زعقت فى ابو الواد و لا قصده
ان ابو الواد قاله على الموضوع القديم
قلت اتوه فى الكلام
اصل هو حضرتك زعق
قال ايه هو علشان تعلى صوتك عليه
سكت تانى .... كده ابويا ميعرفش
يبقى اروق نفسى و اكت انا من الليلة
اصله يا بابا .... مسك ابنه مع بنات و خمرة
و بيتهمنى انى كنت معاه
و انت حضرتك عارف انى مليش فى الكلام ده
و كان الولد عايزنى اكتم معاه و اقول انه كان عندنا
يوميها .... ده انا تربيتك يا بابا
انا كنت عارف ان الولد ده صايع من الاول
طيب مقلتش لأبوه ليه من الاول فى الشارع
و تريح دماغك من الزعيق
عيب يا بابا .... ده مهما كان صاحبى
و جه يستنجد بى
هو انا قليل الاصل علشان ابيعه
كان فى زنقه ....
خلاص و انا كمان معاك
مش حنجيب سيرة و لا حتى لأبوه
يمكن الولد يعقل
ربنا يكملك بأصلك يا ابنى
.................
هى قلة الاصل السبب
الفاتحة لقلة الاصل
3 comments:
طيب
حلوه قوى يا عباس
هو لامؤاخذه ميراج ماله زعلان منك ليه؟
هو ألى كان بيعط معاك؟
المهم مسا الدماغ العالية والقناني المبخره والمزاج العالي العالي قوي
وميه مسا ع العيون الناعسه
عباس
وحياتك مين الأقرع الحقنه أبن السرنجه الى فى الفيديو ده؟
طبعا أنطباعاتي الحقيقية لا يجوز كتابتها في مدونتك المحترمه (أنت عضو في أفحت لا تنسى ذلك) لكن فعلا مين ده؟ الله يخرب بيته
Post a Comment