Friday, October 19, 2007

A little romance

هى لازم تفهم انى مش مدب

كنت جالس بجوار صديقى على المقهى

امسك لى الشيشة بيد و اشيح بألاخرى فى وجهه

انا مش مدب .... انا مش عارف هى جابت الكلام ده منين

اهدى بس

كل ما اقولها حاجة .... تقولى انا مدب ... حمارة مبتفهمش فى المشاعر

احكيلى ايه الى حصل

اسمع يا سى زفت انت كمان

.........

قاعدين فى الكافيه

قاعدين على ترابيزة مدورة و هى قدامى

قولتلها ادينى جايبك حتت نضيفة اهه مرحتيهاش قبل كده

طلبنا برتقان و موكا هازلنت

و بكلمها يا عم و عمال اقولها الكلام الكبير بتاع المشاعر

و هى غاية فى الغباء

عمال المح لها و اقولها

انا بتصل بيكى كتير و بكلمك كتير

و بسئل عليكى .... لكن مش معنا كده انى مهتم بيكى

انا بعمل كده مع الناس كلها

علشان انا مهتم بالانسان مش بيكى انتى بس

علشان تفهم انى اجتماعى

و هى اخر غباء

اقولها انها تخنت و المفروض تقلل من البيبسى و

تبطل اكل شوية بالطفاسة الى هى فيها دى علشان تفهم

انى مهتم بيها و برشاقتها و خايف عليها من كتر الاكل

و هى اخر حمورية

اقولها حاولى تلبسى لنسيز علشان النضارة دى مبيناكى

عجوزة و مش حلوة على وشك و خصوصا انه مش حلو قوى

علشان تفهم انى باخد بالى من التفاصيل

و دى الى طالع عليها بتخلف

اقولها ان بعض تصرفاتها مش عجبانى و انها بترغى كتير

فى الموبايل

تقولى ... ما انا بكلمك برضه

اقولها ما هو ده قصدى انتى بترغى و بتكلفينى كتير فى الفاتورة

علشان تفهم انى مدبر و اقتصادى

و هى اخر جهل

لما جه الشيك علشان ندفع

كانت حتدفع فاخدت منها الشيك و قولتلها انا الى حدفع

و ضحكت و قلتلها مفهاش حاجة لما ادفع ده كمان

ما احنا المرتين الى خرجنا فيهم انا الى صرفت عليكى

علشان تفهم انى جدع معاها

و هى نازل عليها بغباء

قعدت تحكى فى القراءة و الثقافة

و انت عارف محسوبك تقيل فى الحاجات دى

لغاية ما قلتلى على الكاتب الى بتقراله دلوقتى

و مدى حبها ليه و بكتاباته

قلتلها انه حمار و الى بيقروله بهايم

علشان تفهم انى مثقف و دارى بما يدور فى الساحة الثقافية

و مطلع على جميع الكتاب و الاصدارات

و لا حياة لمن تنادى

دفعنا الشيك و خرجنا

سيبتها عند الباب و لما قالتلى مش حتوصلنى

قلتلها لأ طبعا

سيبتها فى الشارع و ركبت العربية و مشيت

علشان تفهم انى مش مدلوق عليها

حلو لحد كده يا عم ؟

.............

شوف بقى غباوتها الى جيه

محدش بيعمل كده مع بنت علشان يبينلها حبه

مفيش رومانسية اكتر من كده بروح امها

عاطفة و اشواق و حب على ابوه من الاصلى

قلت اكلمها بالليل و انهى الموضوع و اقولها

انى معجب بيها و الكلام الاهبل ده بتاع الارتباط و الحب و الجواز

و انها هى الكسبانة و الموضوع حيقع على بخسارة

كلمتها و قلتلها الكلمتين

قالتلى انى ظريف و طيب بس هى عايزة واحد رومانسى

ضحكت و قلتلها

انتى حمارة بقى .... هههه .... كل ده و مش رومانسى

انتى لازم تعملى اختبار ذكاء .... ههههه ..... غباء غريب

دا انا وديتك اماكن مرحتيهاش و صرفت عليكى

و كلمتلك عن وشك و جسمك يا تخينة ... هههههه

دا احنا مثقفين زى بعض و بلاش كده

و لا لازم تحملى منى علشان نتجوز .....هههههه

عجبتنى قوى اخر جملة دى .... رحت عديتها تانى

سكتت كتير

و قعدت اقول

الو الو الو

و محدش رد

قفلت و اتصلت بيها و محدش رد

و فى الاخر البنى ادمة

تبعتلى مسج تقولى

" انت مدب ... مدب ... و مبتحسش .... انت مدب ... مبتفهمش" .... شفت

اخرتها

انا مدب

بنت غبية.... مبتفهمش .... مبتفكرش

........

فى حمورية و غباء كده .... قولى

فى حد كده ؟

...........

18 comments:

Bella said...

هههههههههه

فعلا هي اللى غبية ومش بتقدر براميل الرومانسية اللى بيدلقها عليها الاخ

ههههههههههههههههههه

يخرب مخك

موتني م الضحك

هههههههههههههههههههههههه

تــسنيـم said...

هيا برضه اللي غبية ومبتفهمش الله يحرق الرومانسية اللي بالشكل ده يا أخي

Anonymous said...

ديه بيئة إلى درجة الوقاحة !

أتمنا أن تكون بتهزر

يوسف

Anonymous said...

لأ ده غباء يا جدع بقى الواد قاعد يدلدق رومانسية و هية مش واخد بالها

nourita said...

;-)

no comments! u always succeed into cheering me up

ur the most romantic guy on this earth ;-)

sandrill said...

يعني في ناس في الدنيا كده غير اللي أنا أعرفهم ,, طب الحمد لله

طمِّنتني على اصحابي يا رامز

جبهة التهييس الشعبية said...

هاهاهاهاهاههاهاهاهاااااااااااااااااااااااااايييييييييييييييييييييييييييييي

ده انت مسخرة

اوعى يا واد تكون عملت كده بجد

:))

انا واخدة الموضوع على انه تهريج ها؟

بس تصدق بالله

قول لا اله الا الله

والله فيه رجالة كتير بيتكلموا كده

Anonymous said...

لأ، انت كده عداك العيب و أزح
انت كنت مهتم بكل التفاصيل: تخنها و نضارتها و طفحتها اكل في اماكن... هي اللي بتتبطر
هي مش شايفة غيرها بيحصله ايه؟ ايه الانزحة دي؟ قال و تقولك رومانسية قال، هو فيه اكتر من كده؟ مافيش، و الله العظيم مافيش

يالهويييييييييييي

Alexandrian far away said...

ههههههههههه
جبار يا رامز
لأ مالهاش حق
يعني جنبها زير رومانسيه مدلدق ومطرطش مشاعر
وبيكب العواطف بالصفيحه والبلاص
لا والله دي بنت ما تستحقش أبدا
هههههههههه
معلهش
خيرها في غيرها
بس أيه خفة الدم دي يا أخي
أنا حأبدأ أشك أنك قاهري

سلامي ومحبتي

عباس العبد said...

بيلا
شفتى بقى صنف البنات دى
هو ده الى مكرهنى فى حياتى
ابهدلها عواطف و حب
و هى مش هنا
ربنا يكون فى عونا
احنا تعبانين معاكم

تسنيم
شفتى بقى
مش عارف
الله يحرقها بنت فعلا على كلامك
غبية غباء غريب

انونيموس
فعلا البنت دى بيئة لدرجة الوقاحة
معاك حق

يحيى المصرى
انتى مؤيدنى
كويس ان حد حاسس بى

نوريتا
انتى الوحيدة الى فهمانى
و حاسة بى
مش تفهميها
انى قد ايه رومانسى
انتى بس الى حسه بى

ساندريل
هم صحابك كمان كان حظهم وحش مع بنات
ربنا يكون فى عونهم
بيبقى فى بنات اغبيا فعلا

جبهة التهييس
منورة يا نوارة
و ميرسى انك واقفة فى صفى
ربنا يبعد عنك انك تصاحبى بنت من الصنف ده

نهاد
منوةر المدونة و ميرسى على المجاملة السابقة
اديكى انتى كمان
قولتيها
بنت زيها و حسيتى بحبى
ربنا يخليكى

اسكندرانى
منور بعد الخطوبة يا باشا
و ربنا يتمم بخير
بس لو متعزمناش على الفرح حتبقى خناقة
ربنا يسعدك انت و هى
و يوفقكم
انا عايزك بقى تتعلم منى
زى ما انت قريت كده
خد بلاص رومانسية من الى عندى ده و ادلقه عليها
و حتشوف مفعوله يا برنس
اما بالنوسبة لموضوع انى مش قاهرى
فأنا للأسف قاهرى يتمنى ان سكندرى
اتعلم منى كويس

mary victor said...

لاء و النعمة غبية
البت دى شكلها مالهاش فى الرومانسية و العواتشيف
سيبك منها و شوف لك واحدة تفهمك
تقول لها انتى تخنتى تقول لك بص لنفسك الأول :))))

Anonymous said...

loooooooool

hilarious!

HOW romantic!!!!! :D

Mirage said...

هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه


البوست ده فشييييييييييييييييخ

لأ بجد مالوش حل

إيه يامعلم العبقرية دى بس

انت روعة فى الكوميديا

وموضوع تجربة ماليزيا للإخوان المسلمين دى جامدة جدا جدا جدا جدا
بس انت شلت التدوينة دى ليه ؟

انت موهوب فعلا

karakib said...

ضحكتني
انت مسخره يا رامز

Unknown said...

هاهاهاهاهاهاهاهاها
والله العظيم موتنى من الضحك....انت مفترى...تعرف كان فيه فى الشرق الأوسط برنامج فى رمضان قبل الفطار (طبعا كنت صايم) اسمه معاطى شو بتاع يوسف معاطى كان بيحكى بنفس أسلوبك ده ...والله يابنى باقراك وخاسس انى سامع صوته

الا بجد..انت ماقلتش ليه زى مانوارة طلبت منك؟

شغف said...

:)


مع إن نظام " علشان يفهم " ، و ب " ألمح " -- إلخ ده نظام حواء - للأسف - اللي غالبا مش بيوصل للطرف التاني

( ده بعيدا طبعا عن التناول الفكاهي اللي انت ماشي بيه و شغال عليه حتى في تأكيدك هنا في التعليقات )

Layla said...

ههههه

يا راجل دي هي اللي خسرتك...بنات اخر زمن دول قمة في البرود العاطفي

:DDD

Leila Arman said...

لأ جامد