Wednesday, April 02, 2008

أنتى يا مضروبة

كدبة أبريل

اليوم , أول الشهر و منتصف الأسبوع . انزل من بيتى متوجهاً الى وسط البلد لأحضر الأصدارات الأسبوعية و الشهرية . أمى تؤكد على شراء خيار و جزر و " كابوتشى " أثناء عودتى . أمى , القادمة من صعيد مصر , تؤكد على شراء " كابوتشى " حتى تستقيم الحياة . حاضر يا أمى .

أركب تاكسى متوجهاً الى وسط البلد . انزل من التاكسى عند ناصية أهم بائع جرائد و كتب فى مصر و الشرق الاوسط , واحد من اهم خمس مثقفين ناطقين بلغة الضاد .

صباح الخير يا عم عطية .

صباح الخير يا بشمهندس .

يتركنى عم عطية ابحث عن ما أريده " فى الفرشة " . اتناول الجرائد الأسبوعية و معها المجلات الشهرية . اتصفح إصدار لمجلة جديدة لعلى أشتريه . يقترب منا صبى القهوجى الذى يحضر الشاى لعم عطية .

شاى يا بشمهندس ؟

شكراً , الله يخليك .

دى مش عزومة ؟!

عارف صدقنى يا عم عطية . بس مش قادر , شكراً .

يميل الصبى على عم عطية و يخبره ان يوم الاحد القادم سيكون هناك مظاهرات . يجيبه عم عطية أنها كدبة أبريل و انه لن يحدث شىء مما سمعه . أتدخل فى الحديث و أؤكد كلام الصبى . أشرح أنها ليست مظاهرات بل أضراب تضامناً مع عمال المحلة . يهز عم عطية رأسه متفقاً مؤكداً على كلامى و يكمل : دول عالم ولاد كلب محدش حيعمل حاجة . و فى جرايد أبتدت الغلوشة و كتبت و نشرت أنها كدبة ابريل للتمويه على الناس علشان ميعرفوش أذا كان فى فعلاً و لا لأ . و أشار الى أحداهم . ضحكت و سئلت عم عطية : و أنت يا عم عطية مش حتعمل أضراب ؟ . أجابنى و هو حزين بطريقة لم أراها من قبل : أضراب عن أيه ؟ هو احنا بنشتغل و لا بنبيع , هو فى حد بيقرا , دا أنت يا بشمهندس اكتر واحد بيشترى . نظر الى يدى فى إمعان شديد و أكمل : و بكرة لما تتجوز مش حتشترى حاجة , الى يعوزه البيت يحرم على الجامع , انا شغال فى شغلانة بنت كلب ملهاش لازمة كلها كلام فارغ و كله بيضحك على كله , و الى بيتكتب ميسواش تمن الورق المطبوع عليه . حضرب عن أيه ؟ عن الكلام الفارغ ؟

اصمت تماماً احتراماً لغضبه . دفعت ثمن ما أشتريته و مشيت لأول الشارع . يمر بجانبى صبى القوهجى حاملاً الاكواب الفارغة , هو يصرخ بصوت عال : شاى , شاى يا بشر . ثم يعيدها بصوت منخفض : شاى , شاى يا بقر . اسمعها فى وضوح . التفت اليه فيرانى . يضحك و يغمز بعينه اليسرى و يمضى فى هدوء .

=======

ربنا يستر طريقك

اتمشى قليلا فى وسط البلد حتى أشعر بالتعب . اركب تاكسى عائداً الى المنزل . ينظر السائق الى المجلات و الجرائد فى يدى فيسئلنى : ممكن سؤال يا بيه ؟ . أتفضل .

ألا هو فى حاجة يوم الحد فى البلد ؟

فى أضراب عام !!!.

يصمت مستجمعاً شجاعته , ثم يسئلنى : يعنى , يعنى أيه أضراب ؟ و عاملينه ليه ؟

أجيبه بهدوء : أضراب يعنى تبطل تشتغل و تعلن احتجاجك على الأوضاع الى مش عاجباك . و ده الى مبتديه عمال المحلة أحتجاجاً على ضعف مرتباتهم و الناس هنا فى القاهرة عمال و موظفين و معارضة حيشاركوا فى الموضوع .

تمتم الرجل : و الله فكرة حلوة , الناس تعبانة فعلاً ... بس بدل فيها المعارضة يبقى فيها قلق . انا مش بستريح للناس دى . و حضرتك يا بيه عرفت الكلام ده منين ؟

من الجرايد ! .

بس الجرايد مش كاتبه الكلام ده !!! .

لأ , كتباه طبعاً , جرايد المعارضة بس الى كتباه , اكيد جرايد الحكومة مش حتكتب عنه طبعاً .

نقترب من الاشارة فيصمت الرجل . تتحرك السيارة من جديد فيكمل : يعنى منشتغلش خالص و مننزلش الشارع , طيب ما كده ممكن يبقى فى جزاءات على الناس و يخصمولهم .

لأ , لأن انت ليك واحد و عشرين يوم اجازة فى السنة و كمان دول حيعتصموا فى المصنع , لكن بتوع القاهرة حيمتنعوا عن النزول لشغلهم خالص .

حيعملوه يوم اجازة يعنى ؟ و الله فكرة كويسة , ما هم لازم يعرفوا أن أحنا تعبانين برضه . طيب يا بيه , متعرفش أزاى سواقين التاكس يعملوا أضراب ؟

سئلته : هم مين دول الى لازم يعرفوا أن أحنا تعبانين ؟ .

يتجاهل سؤالى و يكرر سؤاله : متعرفش قايلين سواقيين التاكس يعملوا أضراب أزاى ؟

فكرت أن أنصحه بالطريقة اليابانية بأن يضع لافتة سوداء مكتوب عليها " حداداً على الأسعار " فوق التاكسى , سئلته : هو انت بتفكر تعمل أضراب ؟

لأ , طبعاً أنا مش حمل اخد اجازة , أنا على اقساط و مصاريف , عندى ولد فى الجامعة و بنت فى الثانوى . مش حمل أجازة أنا .

خفت أشاركه بفكرة اللافتة حتى لا يتعرض للمضايقة من الشرطة يوم الاحد , استفسرت منه : هو انت مبتاخدش اجازات ؟

لأ , طبعاً باخد , ان لبدنك عليك حق , يوم الجمعة , بصحى متأخر , انت عارف ليه طبعاً . ضحك غامزاً و اكمل : بصلى الجمعة و أتغدى مع العيال و أمهم , انام ساعة و انزل و انا و رزقى . عارف يا بيه , مش المفروض ان الغلابة هم الى يعملوا اضراب . احنا مش ناقصين خصومات . عارف مين المفروض يعمل اضراب ؟ الحرامية . يا سلام لو يعملوا اضراب , يوم و لا أتنين كل شهر يبقى تمام قوى .

حنزل على جنب وحياتك يا اسطى .

يقف السائق على ناصية الشارع . انزل من السيارة و ادفع الاجرة . أشكره فيجيبنى : الشكر لله يا بيه , ربنا يستر طريقك .

=======

أحنا بتوع المشروم

أتوجه الى عم عزت بائع الخضار و أطلب منه كيلو طماطم و خيار و جزر و أثنين " كابوتشى " . يخبرنى أن الطماطم أرتفع سعرها الى 4 جنيه فأرد : دى غليت أوى كده ليه ؟ يجيبنى : كل حاجة بتغلى يا بيه فى البلد , و بعدين هو فى حاجة تغلى عليك برضه يا هندسة ؟ . يضع ما طلبته فى كيس بلاستيك و يسئلنى : مش عايز " بروكلى " و لا طبق " مشروم " ؟ . أجيبه بأن لا . يسئلنى مجدداً : يعنى مش عايزين " مشروم " ؟ . لأ مش محتاجينه . أزاى يا بيه ؟ دا أنتم بتوع المشروم كله . يبتسم كاشفاً عن أسنانه السوداء من فعل السجائر .

ملعونة الطبقة المتوسطة التى أنتمى إليها . ملعونة فى كل مكان , الطبقة الأعلى تتهمنا بأننا ولاد كلب متسلقين و عايزيين نشاركهم فى الحياة و نزاحمهم فى الدنيا , و الطبقة الأدنى تتهمنا بأننا " بتوع المشروم كله " . ملعونة الطبقة المتوسطة , ملعونة .

=======

أنت الى مضروب يا مضروب ( خيال واقعى )

يضع أبى زجاجات البيرة المثلجة على المنضدة بين كرسيه و كرسى عمى . يفتح واحدة و يصب ما بها فى الكوب المجاور لعمى الذى يأخذها من يده ليستمتع بالرغو الأبيض فى أعلى الكوب . يرشفه باستمتاع و يضحك مكملاً حديثه : الأسعار بيقولوا ولعت نار . السواق و انا جى بيشتيكلى . يهز أبى رأسه مؤكداً : فعلاً موضوع ظريف , أنا لاحظت الموضوع ده . كنت بجيب 2 كيلو الجمبرى مَزة مع الكونياك ب300 جنيه , دلوقتى الكيلو غلى و ال300 مبيجيبوش اكتر من كيلو و نص جمبرى , يلا علشان يموتوا و يخفوا شوية بلا قرف . يدخل الكلب من خارج الفيلا و يجلس عند قدمى أبى فيداعبه و يلقى اليه بقطعة جمبرى و يصرخ : انت يا حيوان فين أكل الكلب ؟ . يجرى الخادم مسرعاً لأحضاره فارتطم به اثناء دخولى . مرتدياً المايوه , اسلم على عمى و أكمل طريقى لأحضار زجاجات من البيرة , اسمعه يتسائل : هو أبنك عنده حفلة ولا أيه ؟ . يجيبه والدى و هو يقضم طرف السيجار و يقدم أخر لعمى : عنده حفلة هو و العيال صحابه على البيسين , عيال بنت كلب معندهاش احساس بالمسئولية , بدل ما يساعدوا اهاليهم , بيبعزقوا فى فلوسنا . يجيبه عمى : سيبهم ينبسطوا دا أحنا فى أيام غلا و ظروف مهببة , ان مكانوش ينبسطوا دلوقتى حينبسطوا أمتى ؟ . يأتى الخادم حاملا طبق الريش البتلو و يضعها امام الكلب . يسئلنى عمى و هو يلقى قطعة للكلب : معاك مُزة و لا عايش وحيد ؟ . أضحك و اجيبه : عيب عليك يا وحش . يسئلنى و هو يغمز بعينه : و اخبار صدرها أيه , تمام ؟ . اهز يداى بقوة و أضحك فيرد على ضحكتى : طيب ألعب تمام و أنبسط . يلتفت الى والدى و يسئله : عملتلى أيه فى حكاية الأستيراد دى ؟. أتركهما فى الريسيبشن و اخرج الى أصدقائى .

يجلس عرفة أو المثقف كما نطلق عليه , فى منتصف المسافة بين الباب و البيسين , امامه طاوله عليها طبق و بجواره " صباع من الحشيش " . أضع الزجاجات امامه و اخبره : يعنى مقلتلناش يا مثقف أن فى مظاهرات يوم الحد الجى , أسمعها من الشغالين و منعرفهاش منك . يرفع المثقف قطعة الحشيش و يقطع جزء منها بأسنانه و يضعه فى ورقة فويل و يبدأ فى التسخين تحتها مستعملا ولاعتى الزيبو . تنتشر رائحة الحشيش فى المكان فتقترب توتى و تجلس على قدمى و هى تغنى no woman no cry . يفرك الحشيش و يخلطه بتبغ السجائر . يضع البفرة و الفلتر و الخليط فى ماكينة لف السجائر التى أحضرتها نانسى من السويد هدية عيد ميلاده . يرفع الحشيش و يمدحه : حبيب قلبى , حياة عمرى . موجود غير مزروع . الدماغ الكامنة فى ذات نفسها . اوجده الله لكى يزيل الفوارق الطبقية بين الناس , الحشيش ده بيشربه الباشا و الغفير , الراجل و الست , الشاب و العجوز , العربى و الغربى . الصينى , التاياونى و الكندى و البدوى فى الصحراء , الحشيش هو موحد القطرين , صانع الامم , واهب الخير و السعادة و المزاج لمن يبحث عنهم . يعطى السيجارة لمحسن الجالس على الشازلونج يداعب شعر كوكى و يكمل المثقف : مفيش مظاهرات يا حمار انت و هو . فى حاجة أسمها إضراب علشان الأسعار غليت و الشعب عنده مشاكل مع الموضوع ده . تسئله كوكى : يعنى أيه أضراب ؟ . يجيبها محسن : يعنى منعملش حاجة خالص , نقعد كده و منعملش أى حاجة . تجيبه كوكى و هى تقبل صدره : يعنى مفيش سكس اليوم ده ؟ . يضحك و هو يسحب نفس عميق من السيجارة : لأ مفيش يا روحى . يخرج المثقف السيجارة التالية من ماكينة اللف و يعطيها لنونو و هو يكرر : الأضراب ده يا بهايم يا ولاد الكلب , مش لينا احنا , ده للبهايم التانيين , للعمال و الفلاحين و الصنايعية و السواقين , مش حيشتغلوا علشان معترضين على الدخل , يمكن الحكومة تحن عليهم و ترفع لهم مرتباتهم , و لا حتعملهم حاجة , بهايم .

تقبلنى توتى غيرة من قبلة كوكى و تتناول زجاجة بيرة من على المنضدة و تسئله : يعنى مش حيشتغلوا و يأخدوه اجازة اليوم ده ؟ . يفرك قطعة اخرى على شكل أسطوانة أستعداداً لعمل " خابور لدماغ الرجالة " و يجيبها : حاجة زى كده يا روح أمك . تهلل كوكى فى سعادة و تقول : خلاص , اليوم ده بدل اجازة و محدش حيشتغل , يبقى نعمل بارتى عندى , و نعمل زيهم , نلبس عمال و فلاحين و نعمل مضروبين زييهم , حفلة مضروبين خالص , هيييييه . ينظر اليها المثقف و يمد يده و يداعب صدرها : انت الى مضروب يا مضروب . تسعد جداً للمداعبة و تقبل محسن صديقها فى فمه و تكمل : و يبقى مفيش سكس اليوم ده و لا حشيش و لا بيرة , علشان نشاركهم و نبقى مضروبين زيهم تمام .

أنظر انا و محسن الى المثقف فى غباء . يسبه محسن : يعنى بروح أمك لازم تقول أفكارك المهببة دى , اهم شبتوا أهه !!!! . يجيبنا : مش انتم الى سئلتوا يا ولاد الكلب و لا انا جبت حاجة من عندى ؟ .

تنهض كوكى و هى تحرك يديها فى سعادة : خلاص يا حلوين , الحد الجى الحفلة عندى , " حفلة المضروبين ", لا سكس و لا بيرة و لا حشيش و لا رقص , مضروبين زيهم طول اليوم , خلاص اوكى ؟ . أمسكت بتليفونها الجوال و بدأت فى الأتصال بالجميع لدعوتهم الى الحفلة .

...........

تحبوا تيجوا و تشاركوا ؟ متخافوش , مش حيعملوا أى حاجة , دول حتى يا عينى مضربين عن كل حاجة .

=======

17 comments:

بنت القمر said...

القديس الصغير
************
لا حول الله يا رب

:)))))))))))))
ده انت لسعت خالص يا رامز يا ابني
ده الاول صدقت وقولت ليك عم غني
وبعدين لقيتها اعلي تهييسه!!
يلا كله فدا ابريل
:D
ديه احلام اليقظه عملا عماايلاها!!
بالنسبه للكابوتشي ومامتك الصعيديه عادي الكابوتشي الواحده بجنيه يسد الجوع {نظريه اقتصاديه ويملا البطن برضه
ست نميسه والله
بالنسبه للطبقه المتوسطه وحكايه المشروم يمكن هو عارف انك مسيحي فعزم عليك _المشروم هنا العلبه ب7 جنيه
مش كارثه اذا قارنتها بكيلو الجبنه الشيدر مثلا ومعروف انكم بتستعملوه كتير في الصيام
مرة اتعزمت عند صديقه وكانت عاملا اكل صيامي وفطاري وكام في طبق جلاش بالمشروم والزيتون
من غير لحمه
:(
طبعا ما اقولكش بشع!!ملوش معني
:(
اما بقي حكايه الناس اللي بقت بتكلم نفسها والناس اللي عايشه في اليقظه ولسه قاريه بوست انتيخ لدانتي المصري ابقا بص عليه
فاعتقد ان العم بلوجر بالتعاون مع المستر جوجل بينفث غازات اعصاب عبر كيبوردات المدونين
وطبعا تحت من حكومتنا العميله
عاوزة تجننا وتسيبنا علي شعره
وواضح كده ان الشعرة اتقطعت
اقولك ايه يا قديس ؟؟
يمكن احلامك يوم تكون حقيقه في يوم
علي فكرة الحته بتاعة الحشيش انا قريتها قبل كده:)))
طبعا انت عارف فين؟؟
وبالنص بس يلا ان الله حليم ستار
تحياتي وكل ابريل وانت طيب وبالصحه والسلامه

Hypatia said...

ايه ده يعني مفيش سكس اليوم ده؟؟؟؟؟

هو فيه سكس فى مصر بقيت السنه ولا ايه

"وش مندهش"

MM said...

أنا مش عارفة أعلق على إيه ولا إيه؟؟؟
على الناس الغلابة ولا على الطبقة المتوسطة ولا على حلنا إللي يضحك ويبكي
أقولك ... ناكل بروكلي وخلاص

^ H@fSS@^ said...

هي جملة واحدة








الله يخرب بيتك



:)

تحياتي لقداستك

karakib said...

الجزء الاخير ده
قنبلة ضحك يا رامز
جامد طينة
ههههههههههههههههههههههههههههههههههههههههههههههههههههههههههههههههههههه

مـ~ـاجدولين said...

انا بحقد على ابريل

لانه كذاب بس مشهور ولما بيدخل له طنه ورنه

حملت قصصك

لي عوده عشان اقولك رأيي

Anonymous said...

يعني انت عندك
فيلا
وكلب وبابا وتوتي
ومدونة وراي
يا ابن المحظوظة
بس بجد
تحفة وباين عليك متاثر بالعربي القديم
بتاع رئيس العصابة والبنت اللي بتلعب في شعره
او هو يلعب في شعرها
اتجوز يا ابني
عشان تعمل سلاطة احسن
او تلعب في قفاك
بالمناسبة هو معني ... ولا بلاش
تحياتي

بنت القمر said...

صباح الخير
سؤال من فضلك طياري كده
هو ليه محمد مات؟
ومنير مماتش؟؟
وليه محمد مات بعد ما طلب التوظيف بتاعة اترفض مش كفايه عليه مصيبه واحده؟
هل المخرج يقصد يريحه من عذاباته الدنيويه؟
ان يتخلص منه نهائيا فلا يبقي الا منير ومنير فقط؟
ليه معرفناش نتيجه عمليه منير؟
يمكن ها يخف ويقدر يعيش؟
ولو عاش يا تري ها يقدر ينسي محمد؟
اشمعني لما الشمعتين انطفوا واحد مات والتاني لا؟
مش ده رمز مباشر من المبدع لنهايه حياه الشخصين؟
!!ليه واحد فات والتاني مات؟
ليه اخترت موت محمد علي يد لوزة؟ وتقصد ايه؟ !!ورمزلوزة ايه في القصه؟
هل هي اسقاط مباشر علي نهايه كل محمد علي يد كل لوزة؟
كانك كمان استخسرت فيه موته نضيفه؟
ليه النهايه ال{فطين عبد الوهاب}ية دي؟؟!! التي تشبه نهايه فيلم بدايه ونهايه او فيلم الخطايا
ليه حضرتك؟ محددتش نهايه واضحه ومحدده للبطل التاني منير
المخرج هنا كان ماشي تمام تمام
وبيوصف المأساه علي الجانبين بالتوازي الاب اللي عاوز الفين جنيه والتاني بيدور لابنه علي وظيفه
ليه نهيت بنهايه مش متوازيه؟؟؟
!!تقصد ايه؟
هل ده اسقاط نفسي للتخلص من كل محمد!!طب ولوزة تعيش ازاي فين العدل الالهي؟؟
مجبتوش اتحقق ليه؟؟
وابونا اللي استلوح ومدفعش الالفين جنيه مش عاوز عقاب برضه؟؟

:)ولا كل المجرمين فلتوا الا محمد؟؟
يمكن انت تقصد تعمل شهيد في الفينال؟؟
طب هو في شهيد بيموت علي ايد لوزة؟؟!!
حيث ان البعد البلوري للروايه مبتسر ومقطوع والاسقاط السياسي فيها سقط خالص
امنحها جايزة فطين عبد الوهاب للروايات العربيه.........
وكمان جايزةجرج ابيض ..وتوجو مزراحي للادباء الشبان
جود وورك يا اديب اكيد القادم ممكن يكون احسن بس تابع الاجتهاد وتثقيف نفسك
من اجتهادات كبار وقدامي الادباء
:))
تحياتي

^ H@fSS@^ said...

بنت القمر
انا دلوقتي متقلقلة الفكر و انتي اللي بايدك خلاصي

انتي بتتكلمي عن ايه بالظبط لوقتي؟؟
قصدك ايه بمنير و محمد و مين هما دول وجم في سياق البوست ده ازاي؟؟
انتي شككتيني في قوايا العقلية
انا رجعت قريت البوست لاني حصلت لي مخولة جامزة ددا ددا ددا

Unknown said...

حرام عليك والله اللى بتعملوا فيا ده
.
.
.
انت عبقرى يا رامز

Hypatia said...

صفصف يا حبيبتي خلاصك عندي ويبقاللى عندك بيتزا وكانز بيبسي من بتوع البرجوازيه المتعفنه
:)

منير يبقي ابن عم كامل
ومحمد يبقي ابن عم على
ولوزه تبقي منى سابقا
ودول شخصيات اخر قصه قصيره فى المجموعه القصصيه بتاعه رامز

**************

المشكله دلوقتى انى اتبرجلت فعلا يا قمره
محمد مماتش اساسا محمد اتمسك بالحياه ورفض انه يموت كلب

ولا هو مات وانا مش اخده بالى
تحليلك للقصه لخبطهاللى خالص

هو محمد مات ولا لأ يا رامز
؟؟؟؟؟؟؟؟

بنت القمر said...

محمد مات يا نسرين
رامز قتله
ايوة رامز قتله
اقبضوا علي رامز دم محمد في ايدك يا رامز
انا مش عاوزة اتكلم عشان حفصه متتصدمش
محمد مات يا حفصه
رامز قتله!! علي ايد لوزة موته سودا استخسر فيه حتي شرف الاستشهاد
خلاة يموت مجرد كلب تحت رجل لوزة
يا عيني عليك يا كامل يا عيني يا محمد!!
دمهم في رقبتك يا رامز ليوم الدين ولا دموع العالم هاتغسل خطيتك
!! وكمان نهايه ابيض واسود
ايده روح صلاح ابوسيف دي ولا ايه
دم الغلابه في رقبتك
نسرين
كوبايه ميه بسرعه
حفصه اغمي عليها من الصدمه علي محمد
منك لله قوليلها الخبر واحده واحده مش كده
حد يلحق حفصه يا ناس!!!!!!!!!!!!!!!!!!!!!

Anonymous said...

رامز
انا أمبارح بليل كنت بتفرج على حلقة بلا حدود على الجزيرة
مع د.جلال أمين واحمد منصور
بيتكلمو عن الوضع اللي بقى المجتمع المصري خصوصًا والعربي عامة فيه من كتر الضغوط اللي الأنظمة بقت عاملها عليه

بصراحة الكلام اللي قالو د.جلال أمين في الحكاية دي واللي بيتوقعوا بيخلي الواحد يمسك قلبو لحسن الحكاية مش لعب بجد

واللي كتبتو هنا -ببراعة كالعادة- بيخليني بالفعل أقول ربنا يستر على مصر من اللي هيا فيه

أشكرك

The Alien said...

حيث أنهم عالم ولاد كلب ومحدش هيعمل حاجة
وحيث أن كيلو المشروم ب 7 جنيه كما أكدت بنت القمر
وحيث أن سواقين التاكسي ميعرفوش إزاي يعملوا إضراب
وحيث أنه مفيش سكس كما قالت كوكي
وحيث أني مش عارف إيه هو الكابوتشي
أقدم خالص تحياتي لقداستك "المضروبة"

عباس العبد said...

بنت القمر
أنا مقلتش ان منير أتعمى و لا قلت أن محمد مات . انا سبت النهاية مفتوحة لخيال القارىء , أنتى بقى رغبتك أن محمد يمود دى حاجة ترجعلك لأن ده بيعبر عن مكنوناتك الداخلية و الرغبة فى الخلاص من أى محمد . دى حاجة ترجعلك فعلاً لكن أنا ماموتش حد يا جماعة . رغبة القتل هى المسيطرة عليكى أنتى . عايزة تخلصى من كل الفقراء .
بالنوسبة لموضوع المشروم , فطعمه فعلاً سيء لما يكون وجبة رئيسية , لكنه ظريف كأضافة فقط و بالنوسبة للكابوتشى فظريف فى الريجيم فعلاً بس الواحدة عندنا بجنيه و نص و معرفش أمى سمعت عنه أزاى . و موضوع الحشيش الكامن فى ذات نفسه فانا مش عارف سمعتيها فين الصراحة ( واحد بيغمز ) .
==========
نسرين
كل يوم فى سكس , نحن الشعب السكسى .
=====
ماريان
أتفضلى بروكلى
======
حفصة
شكراً لخراب بيتى . أى خدمة
=====
هانى
تمام يا وحش .
======
ماجدولين
مستنى رأيك بصراحة
====
م5م
حمد الله على السلامة , انت فين يا رجل ؟
======
حمود عصام
مصر فعلاً فى حالة مخاض رهيبة و الام ولادة متعثرة و جلال أمين مش من عادته المبالغة .
فعلاً ربنا يستر على مصر .
=========
اليان
و حيث أن سعادتك شرفتنى , فيبقى أهلا و سهلاً يا مضروب

Anonymous said...

هههههههه
أخبار البارتي الناشفة إيه؟

Anonymous said...

على الرغم من انشغالى و عزوفى عن كثير من انشطتى المعتادة لظروف امر بها حاليا إلا اننى بعد ان ينام ابنى المشاغب يحي اجرى سريعا لأعرف حال الدنيا من مدونتك
للمرة المليون كثير من افكارك جديدة و لازم تستغلها ادبيا اكثر من كده فى فترة شبابك يعنى اهتم بالكتابة و اصدر كتب لان اكيد ها تكون جديدة فى موضوعهاو كل سنة و انت طيب
نهى حماد