Monday, April 07, 2008

كيلو الإضراب عليه بساريتين

مشكلة شخصية

عندى مشكلة مع موضوع الأضراب و هى مشكلة شخصية , انا غير مقتنع بالأضراب لأسباب كتيرة . اولها أنهم سلموا القط مفتاح الكرار , الموظفين و الناس اساساً مبيشتغلوش , فحيضربوا عن أيه ؟ هم بيشغلوا أصلاً , كأنك بالضبط تتطلب من تلميذ فاشل عدم الذهاب الى المدرسة , تفتكر حيزعل ؟ .ثانياً , يوم الأضراب , لأن يوم الأضراب يوم الأحد و ده معناه ان كل الصنايعية و الورش و أغلب المحلات مغلقة لأنه بالطبيعة يوم اجازتها , شارع الجمهوربة و نجيب الريحانى و وسط البلد و أصحاب الورش و كثير من المحلات مغلقة . ثالثاً , ناس كتير خافت تنزل من بيوتها خوفاً من بيان الداخلية و لأن الموضوع طبعاً حيبقى فيه قلق , فخافوا على عيالهم . ده كان رأيى و قلتله لناس كتير و أعتقد انه ده الى حصل , ناس كتير منزلتش خوفاً من بيان الداخلية . غير بالصدفة و لأجل الحظ مش اكتر , الجو كان سيىء جداً أمس فساعد ذلك على بقاء الناس فى منازلهم .

----

أنتبه :

من قلة الأدب.. أو تحديدا قلة الذوق أن يتهكم المرء على مجهودات الآخرين، خاصة الحركيين والنشطاء، فليس معنى ألا تقتنع بأفعال الآخرين أن تتجه إلى تحطيم مجهوداتهم، لكن على الجانب الآخر، ليس من المفترض في الحركي الناشط أن ينظر إلى المعتزل المتجنب على أنه انبطاحي متخاذل ..... أخر الحارة

=========

تفكير

طبعاً الناس الى قالت أنها مش حتشارك فى الأضراب " لأنه غير محدد الأهداف و الأسباب و غير واضح المعالم " دى ناس عندها تخلف عقلى محكم . حط يا سيدى أى هدف انت عايزه : أرتفاع الأسعار , الفساد , ضعف المرتبات , العلاج , الأدوية , البطالة , الأعتقال , التعذيب , سوء الخدمات .... أى حاجة . يعنى هى بلدنا مفهاش اى حاجة تخليك تضرب . ياعالم يا ولاد ال... هبله .

الصراحة لما فكرت كويس و حطيت الموقف فى شكل معادلة لقيت أن المطلوب حاجة تعبر عن غضب الشعب و فى نفس الوقت لا تسبب له أى أذية و خاصة الاعتقال لأن كتير منهم رزقه يومى كسواق التاكس فمينفعش اطلب منه كما أطلب من ناشط سياسى مثلاً , لأن لو أعتقل بصراحة أهله حيصيعوا , و يتوازى معه عمل للاحزاب و قوى المعارضة فى الشارع , حالة من التكامل الوطنى , ممكن نقول أن الأضراب هو الشكل المقبول و حسيت انه له معنى رغم تحفظاتى . أمتناع عن التواجد لجمهور المواطنين و نشاط سياسى مقبول للحركيين . الصراحة , فكرة ظريفة و عايزة تكرار ..... حنكمل المشوار

=========

طبق بليلة

وأكد الطلاب في بيانٍ لهم صباح اليوم أنهم كانوا ولا زالوا هم الشرارة التي تُشعل فتيل التغيير والنهضة و الإصلاح ..... ,,, وأعرب الطلاب عن أسفهم أنهم لم يتم التنسيق معهم فيما يتعلق بإضراب اليوم (6 أبريل) وأنهم سمعوا عنه من خلال وسائل الإعلام وحملات الإنترنت ..... بيان طلبة الأخوان .

---

فى ناس كده , مخهم على قدهم , ربنا يشفى كل مريض . اصله طبق بليلة يا ولاد ال .... و نسينا نعزمهم عليه .

---

ليس دفاعاً عن الأخوان و لكنها وجهة نظر

لكن بلا شك موقف الاخوان المسلمين رمادى و هذا دافعه الاساسى الى ان الدعوة كانت من قوى غير اسلامية بالاساس , وبالتالى مشاركة الاخوان وان وفرت زخما شعبيا .... محمود المصرى .

=========

ظهورات

د.عبد المنعم السعيد مدير مركز الأهرام للدراسات السياسية و الاستراتيجية , و معه د.عبد المنعم أبو الفتوح عضو مكتب الأرشاد – الأخوان المسلمين فى قناة الحرة .

جورج اسحق المنسق السابق لحركة كفاية , طارق حسن الكاتب بروزاليوسف و نائب رئيس تحرير الأهرام فى قناة الجزيرة .

الكتاتنى رئيس كتلة الأخوان فى مجلس الشعب , جهاد عودة مفكر بلجنة السياسات بالحزب الوطنى , امين أسكندر عضو حركة كفاية و حزب الكرامة تحت التأسيس , مجدى الدقاق رئيس تحرير مجلة الهلال الشهرية و عضو بلجنة التثقيف بالحزب الوطنى فى ال- بى بى سى .

مناقشات و تغطيات و غضب من الطرفين , و يقولولك الأضراب منجحش . ممكن افهم الناس بتاعة الحزب الوطنى الى بالثقل ده , و شيل من تحت كلمة ثقل كل الخطوط الممكنة , يطلعوا يدافعوا عن الحزب و ينكروا وجود أضراب ليه ؟ أذا كان أصلاً مفيش أضراب زى ما بيقولوا . هو ينفع تطلع تنكر حاجة مش موجودة أصلاً ؟ .

طبعاً مفهوم الأضراب الكلى اكيد منجحش , لكن الحكومة خافت من الشعب و ده بس شىء ظريف فى حد ذاته .

=========

قراءات سريعة فى جرائد 7 / ابريل

روزاليوسف :

هزيمة دعاة الفوضى – أنتظام الدراسة فى المدارس و الجامعات و المصالح الحكومية يؤكد فشل الدعوة للأضراب .

الحكومة و المعارضة رفضتا إضراب الإيميلات و ال s.m.s

3 ملايين مصرى أستخدموا المترو و 2800 سيارة نقل عام جابت شوارع القاهرة و 34 رحلة طيران .

مصر رفضت شائعات الخراب .

اهم ما كتب فى الجريدة

مقال كرم جبر – أنتباه : أنتظروا الشائعة المقبلة !

هذه هى أسباب فشل إضراب 6 أبريل .

كلما نجحت الدولة فى حل أزمة , سحبت السجادة من تحت أقدام المحرضين ... لهذا يهمهم بالدرجة الأولى أن تظل الأزمات مشتعلة و لا تنطفىء , و كلما أنطفئت ساروا بأشعالها حتى يكون لهم دور .

المحرضون لا يهمهم غلاء و أرتفاع اسعار , و لو كان يعنيهم ذلك لبذلوا جهوداً إيجابية لحل مشاكل الناس بدلاً من الدعاوى السلبية التى تزيد المشاكل و الأزمات تعقيداً ... متى كانت المظاهرات توفر الطعام ؟ .

لم يظهر فى صورة الأضراب الوهمى امس سوى " كفاية " الهزيلة , بينما أحتمت المحظورة – و هى المحرض الحقيقى للأضراب – وراء الستار , تحرك المؤامرة و تبثها فى كل مكان .

---

البديل

الإضراب ينجح .. و الأمن يرد بحرق المحلة .

أنباء عن قتيلين .. و عشرات الجرحى بين العمال و حوالى 700 معتقل فى القاهرة و المحافظات .

اللواء اسماعيل الشاعر ل" البديل " :

الطلاب فى المدارس و العمال فى المصانع و الموظفون فى المصالح .. و العناصر الإيثارية عندنا .

و الإضراب ؟

محدش أضرب و كل الدنيا ماشية زى الفل .

محمد السيد سعيد – اول ضوء : و معنى ذلك أن ينتقل النضال الديموقراطى و الأجتماعى خطوة كبيرة نسبياً للأمام . فعلينا ان نعمل على تمكين فئات جديدة من شعبنا من المشاركة فى النضال الديموقراطى و الأجتماعى بمساعدتها على صياغة مطالبها و تأطير مصالحها الجوهرية و بناء منظامتها الشعبية و الجماهيرية .

---

نهضة مصر

6 أبريل مر بسلام

المحلة : المصانع لم تضرب و 2000 شخص خربوا محلات و هاجموا قطاراً .

الوفد و التجمع لم يشاركوا و الاخوان أختفوا .. و الناصرى و الجبهة و الكرامة تقدموا الأضراب .

فى نقابة المحامين أتردوا الخيش و الطربوش .. و هتفوا ضد لحم الحمير .

شائعات التخريب اجبرت المواطنين على البقاء فى منازلهم و زادت نسبة الغياب بالمدارس .

---

الدستور

نجح الأضراب رغن أنف الحكومة و الإخوان و الأحزاب !

---

المصرى اليوم

إضراب .. يرضى جميع الأطراف

المحلة تشتعل .. و الأمن أجهض مظاهرات القاهرة .. و المعارضة نجحت بدون الاخوان .

بعض المحافظات تجاهلت المشاركة فى الأضراب .. و أخرى لا تعلم عنه شيئاً .

مقال يستحق القراءة

مجدى الجلاد --- إضراب أسقط كل الأقنعة .

=========

البنت دى مجنونة

الى تابعها امبارح و تابع تدويناتها و كل الى كانت بتعمله أمبارح , حيعرف انها مجنونة . مجنونة تماماً . و هى مجنونة بحاجة من الأتنين , يا اما طبيعى , يا أما مصر جننتها و فى الحالتين , الطف و الذ جنان شفته فى حياتى . بس هى فعلا مجنونة . مجنونة خالص . أقروا أخر خمشاشر بوست كتبتهم .

=========

مسرحية

فى احدى مسرحيات فؤاد المهندس , راح السمّاك للناظر علشان مش عاجبه درجات أبنه . فراح الناظر منادى ياقوت افندى و عرفه على السمّاك و قاله ان اكيد فى حاجة غلط فى شهادة الولد . ياقوت افندى أقسم أنه أكيد مفيش لأنه هو الّي كاتب الدرجات بنفسه على شهادة الولد . فوقف ياقوت أفندى يقرا الدرجات من الشهادة للسمّاك و الراجل بيرد عليه :

تاريخ 2 من عشرة ... رضا

حساب 1 من عشرة .... أشية

عربى 3 من عشرة .... معدن

جغرافيا صفر .... صفر واحد يا م فترى , صفر واحد يا راجل يا ضلالى طيب خليهم أتنين , دا انا بحط على كيلو السمك بساريتين .

---

المدافعين

المدافعين عن الحكومة بأنها تبذل قصارى جهدها لأصلاح مشاكل المجتمع و أنها فقط تحتاج الوقت و أنها تتقدم بخطوات واسعة فى طريق الحل و يجب ان نشكرها عليه . الدفاع ده هو نوع من أنواع الجدل المُمِل , كأنه مجرد مناقشة فلسفية أو محاولة حل مشكلة لغوية , كأن هناك من يقول لك " ازمة الخبز فى مصر تدخل فى أسبوعها الثالث " , أعرب كلمة " خبز " و تحل المشكلة ؟؟!!!!!.

الحكومة تعانى من أزمة التلميذ الخائب أبن السمّاك . التلميذ الى عارف أنه فاشل و كده كده حيسقط فيقولك أغيب و مروحش الأمتحان أنضف , يجى أبوه يضغط عليه و يجبره يخش الأمتحان فيجيب 10 من 50 . هو ساقط برضه , بس فى نظر أبوه عمل تقدم فى سبيل النجاح و أهو أحسن من أنه يجيب صفر . الحكومة بتهرب بالأنكار و الخوف من كل المصايب و لما تضطر تمتحن و تواجه مصايبها بتسقط و يقولولها أهى جابت 5 من خمسين مش أحسن ما تجيب صفر . و كأنه النصر , مناخوليا يا عالم . يا ناس أفهموا دخولها الأمتحان لا هو شرف و لا تقدم , ده اثبات لنها فاشلة .

---

الحكومة عاملة زى التلميذ الخايب فى المسرحية و هم عاملين زى السمّاك الى فرحان بدرجات أبنه .

=========

13 comments:

^ H@fSS@^ said...

هما بيكتبوا صوت الكز على السنان ازاي؟؟

انا مفقوعة منك
ليه بالظبط مش عارفة
او يمكن عاوزة افش غلي في حد و انت كعادتك مستفز لابعد الحدود
جااااااااااااااااي

أبو عمر - الصارم الحاسم said...

امممممممممم


عندك حق في كل حاجة يا رامز


بالنسبة للبليلة

لأ ما تقولش كده

اوعى تقول بليلة




ده عيد ميلاد......مستنيين حد يعزمهم في العيد ميلاد


عموما اول سقطة لهم في رأيي....ولكل جواد كبوة.....لاني اكيد مازلت سلفي متطرف وهابي اقيل واعذر اخي في الله وومن منا ليس ذو خطأ


كانوا اعلنوا زي انتخابات الرئاسة....حرية التصرف للافراد


او ينشروا الوعي من بعيد لبعيد كده بماهية العصيان المدني...وبعدها يوق نساند بقولبنا

مش محدش عزمنا وخلاص


اللي حصل ده كان خطوة كويسة جدا ومفيدة جدا...بيعلم شعب سلبي ومعندوش اي فكرة عن الاعتراض....بتديله كي جي وان ايه معنى الاعتراض


في سياق ده يبقى العصيان المدني نجح ...ويوم امس حقق هدفه ولا داعي لتحبيط المحبطين


لعلها تكون سقطتهم الأخيرة..ولا ننسى لهم الاف المعتقلين وما قدموه لمصر وللامة بجد ولا ينكره الا جاحد من ساعة ما بدأت دعوتهم

أبو عمر - الصارم الحاسم said...

على فكرة

هنا وهناك دي بتاعة حكيم كنت باحبها طحن وانا صغير ايام ابتدائي

Unknown said...

ليه ما حدا بيذكر انتفاضة مصر في عهد السادات على غلاء الاسعار
اعتقد انها اخدت زخم اكثر من الي حصل ف 6 و7 ابريل
اعتقد ان هناك حاجة للمقارنة وتفكيك الصورة لاستخلاص العبر
اصل المصايب لسة جاية قدام مش راح تقف عند رغيف العيش وثمن زجاجة الزيت

جاي ع بالي اغنية الشيخ امام وانا عم بكتب
يا مصر قومي وشدي الحيل

معاذ said...

على فكرة انت رهييييييييب



بس خلاص

بنت القمر said...

كمان العزيز رامز
عشان انا بحب اجيب من الاخر واقيس الامور بنتايجها بدل هذا الطوفن الكلامي عن الاضراب
************************
الخلاصه
**********
اسعار السلع الاساسيه ها تنزل زي الرز والزيت والالبان وبعض الادويه
نتيجه لرفع الجمارك عنها =زياده العرض
تانيا
زياده العرض = انخفاض السعر=تقليل النتج لانتاجه طبيعي لانه مش ها يشتغل من غير ما يكسب
تالتا
بعض المنتجين ها يقللوا الانتاج او يغيروا النشاط تحديدا الحديد والسكر والرز
رابعا نتيجه لذلك يرجع الميزان زي الاول العرض يقل والطلب يزيد
رجعنا للمربع الاول
ركز
**********
نتيجه لذللك ينهار المنتج المصري الصغير لانه ها يخسر ويفلس ومش ها تحقق رخاء للمواطن يعني خراب بالجمله
التعليل
طريقه حل فاشله وروشته اقتصاديه غير موفقه
نتيجه اخيره
مفيييييييييييش فاااااايده
نزل لنا بقا اخر نكته او احسن فيلم في السوق لحد ما فيلم الاضراب يخلص
تحياتي

محمود المصرى said...

بسم الله الرحمن الرحيم

كل دا كلام جميل جدا لكن انت رأيك فين يا باشمهندس ؟

Anonymous said...

والله يارامز أنا مش من مصر
وقاعد متنيل هنا في الجزاير بعمل استطلاعات على اللي حصل واللي بيحصل
وطلعت برأى أخير إنو مهما كان اليوم ده كان نقطة تحول
أنا شايف إن اللي جاي أنقح وانقح على النظام الزفت ده

حكاية الإضراب نجح ولا ما نجحش مش مهم المهم إن الشعب المصري في الاخير شاف إنو ممكن يغير بإيدو اللي هوا عاوزو

وربنا معاكو
عصام

عباس العبد said...

حفصة
الصوت كده تقريباً . ايجيجيجييججيجيججيجيجيجي
أو اهاهااههاناهاااهاة هاة هاناهلاحؤب
تقريباً . مش عارف بصراحة , عايز تركيز اكبر .
انما ما قلتليش أنتى مفقوعة منى ليه و لا حتى شايفانى مستفز ليه ؟
انا عملت أيه ؟ مش تشرحيلى
=========
الصارم الحاسم
لأ , هى بليلة و انا عارف انها بليلة .
هو فعلاً على المستوى الشعبى خطوة قوية جداً و ممتازة .
بس دى مش كبوة للأخوان المسلمين , لأن هم اساسا مش جواد . و لا حيبقوا جواد . و لا حاطين ده فى دماغهم . ده اسمه أستهبال و علنى و واضح و عن سبق الأصرار و الترصد . هو الكلام ده فى تهريج و لا مخدناش بالنا و لا حد مقلناش و لا نسينا و لا مش مركزين قوى . امال هم موجودين أساساً ليه ؟ و لا أيه لازمة المعارضة . الناس دى حاست بالأهانة ( و معاها قوى المعارضة , لأن الوفد و الناصرى و التجمع عملوا عبط كمان ) لأن بقى فى تفكير تانى بيحرك الشعب " مش خاضع " ليهم . شباب حاسس بالمسئولية و عنده رغبة فى التحرر و التغيير . الناس دى بتستهبل . مش تقولى كبوة .
و انا كمان كنت بحب الأغنية دى و أنا صغير برضه .
=========
المنفى
ممكن تروح عند ميامسا , حتلاقى اللينك بتاعه على جنب عندى فى المدونة و كاتب تفاصيل عن أحداث أنتفاضة يناير فى عهد السادات .
انا معاك تماماً , المصايب لسه جاية قدام , عندى فى البيت طلبوا منى أنزل أجيب حاجات , فعملت سبع رجالة و قلتلهم على أنا الطلعة دى و حدفع من جيبى . مش حتصدقنى لو قلتلك أنى خلصت 100 جنيه فى حاجات كنت بجيبها بميكملش 50 جنيه . الحاجة زادت الضعف و أكتر . عارف بقينا نستغنى عن حاجات كنا بنجيبها و تخش فى بند الرفاهيات . أبتدينا نستغنى عنها لأنها أبتديت تمثل عبء على الميزانية . معنى كده اننا مرفهين . مش حكدب عليك و أقولك لأ . لكن معنى كده ان الناس الى مبتشتريش رفاهيات أبتدت تستغنى عن حاجات أساسية و دى مشكلة و مصيبة . لو الحاجة غليت تانى . حنروح فين ؟؟؟؟؟؟؟
=========
معاذ النجار
الله يخليك يا بيه
=========

عباس العبد said...

بنت القمر
أنتى ليه فرضتى أنهم حيحلوا المشكلة بالشكل السىء ده . الغباء ده مش وارد فى الفترة الجاية . و الدليل زيارة الباشا للمحلة . مش حينفع يحلوا بالسذاجة دى . لأن ساعتها مش حيبقى أضراب عاملينه شباب الفيس بووك . ساعتها الناس حتولع فى البلد و الحكومة . محدش حيلحق يعمل حاجة . انا معترض على التحليل ده و بشده .
=========
محمود المصرى
انا مواطن مصرى صالح و صميم و ملتزم بمصريتى . عارف يعنى أيه ؟
يعنى مليش رأى . عمرك سمعت عن واحد مصرى ليه رأى ؟ و خصوصاً فى السياسة و البلد . طبعاً لأ
خلاص . يبقى أنا كمان مليش رأى .
=========
حمود
هى فعلاً خطوة حلوة و تستحق الأشادة . و أنها نقطة تحول . كفاية أن الحكومة خافت و الحزب مات فى جلده . و الجنان الأعلامى أشتغل من الخضة .

بنت القمر said...

رامز انا مش ضد الاضراب لكن لو سمحت ارمي ودنك للتحليلات الاقتصاديه لموقف مصر المالي وحلها الازمه ازاي
زعلت انهم ها يحلوه كده
وانا كمان
لكن هو ده للاسف اللي ها يحصل ها يلغو الجمارك يعني ايه؟؟
هي مش الجمارك دي مصدر دخل
يبقا خد من دقنه وافتله
والعشره في الميه دول يعني قزازة الزيت اللي ب10 جنيه هاتبقي بتسعه
تبقا مسخرة ولا لا
يعني لما انت نزلت وصرفت 100جنيه ها تبقي تصرف 90والنتيجه ان صغار المصنعين ها يفلسوا
انا عارفه ان التحليلات الاقتصاديه ممله بس حاول عشا خاطري تسمعها
شوف بتوع الحديد بيصرخوا اللي تبعا مش تبع عز دول ها يغيروا نشاط لحساب المنتج الاكبر= مزيد من الاحتكار
وها يتجهوا الي نشاطات ربحيه اكتر وده ها يخلي السعر يضعف بعد فترة
تحياتي

أبو عمر - الصارم الحاسم said...

لأ الاخوان جواد ...وجواد قوي اصيل

لكنهم لا يفكرون اكانوا رابح ام لا في هذه الدنيا...هم يفكرون في الربح في الآخرة وفقط باصلاح الدنيا قدر ما يستطيعون وعليهم المحاولة وعلى الله التوفيق


وحاليا بقول كويس انهم عملوا كده لان الكل دلوقت عمال يوقل جهة مشبوه جهة مشبوهة ورا الاحداث ولا هي جهة مشبوهة ولا حاجة الناس طهقت

لكن ان لم يوفق الله الاخوان الى ما فعلوه مع استمرار عدم اعجابي باسلوب الكلام لكانت لابساهم لابساه ولبقوا كبش الفدا لكل الناس ....كل الشاتمين وكل المتحسرين او المستحسرين

أبو عمر - الصارم الحاسم said...

عارف مشكلة الاخوان ايه...مع الحكومة ومع الخارج - الغرب وما يتبعه


انهم معارضة ودينية

فلو كانوا معارضة فقط...ليبرالية بعيد عن الدين لكان ممكن التعامل معهم كما تتعامل الدولة والناس مع المعارضة الان....بطريقة "هش" على قدر حجمهم - وده مش تشفي لكن اقرار حقيقة


ولو كانوا دينيين فقط.....لتحول هم الحكومة لعد تحولوهم الى سلفيين جهاديين وفقط

المشكلة انهم معارضة ذات كوادر وافرادها ذوي شان...ودينية كمان