Saturday, April 26, 2008

قد أكمل

حالة

الدنيا حر جداً و الجو ملزق. شربت مية ساقعة من التلاجة مفيش فايدة و الحكاية دى زهقتنى . و أخدت دش مية ساقعة معملش حاجة . الحل التمام فى رأيى و كل الى أنا عايزه دلوقتى حالاً زجاجة سبيرو سباتس مشبرة من عند عم كامل بتاع الحاجة الساقعة .

=========

نكتة

مواطن مقهور خايف موت و عمال يتكعبل فى مشيته و مخنوق من الأسعار , رفع أيده للسما و دعى  قائلا : "الله يخرب بيتك يا سيد " . فلقى أيد واحد من الأمن طرقعت على قفاه  وصوت الظابط بيقوله :  "وكمان مش عارف اسم الريس" 

=========

خروج

اسراء خرجت من السجن و اكتشف الجميع انها ليست بطلة . هو مين افتكرها بطلة ؟ و اتصدم فيها – يا روح قلبى – جامد جداً . حركة الفيسبوكيين كما يطلقون على أنفسهم و نضال الأنترنتيين , بالنسبة لى أمر مثير للغثيان . الأن أصبح مثير للسخرية و الضحك و أتابعه من باب الفكاهة .

=========

إصرار ... مختلف

كافر . من لوازم الايمان فى الاسلام : الاعتقاد بكفر غير المسلم . مسيحيا , يهوديا , بوذيا أو  بهائياً . وهذا لا علاقة به لا بالتعصب ولا بالاضطهاد .  كما يعتقد المسيحى , اليهودى , البوذى و البهائى بالبديهة بكفر المسلم .

----

قرأت الجملة السابقة و ما يوازي معناها فى اكثر من مدونة و صحيفة و موقع

أن أصرار البعض على نشر كلمة " كافر " و " كفر " و تحويلها الى بديهية مجتمعية و مرادف لكلمة مختلف شىء يدعو للدهشة و التأمل .

الدهشة لأن مدلول الكلمة فى الموروث و الوجدان الشعبى هو ببساطة " ان الأخر كافر " بكل ما تحمله الكلمة من سيئات و اتهامات للأخر .

و التأمل لأن العالم -  لأعتقاد كل طرف بكفر الأخر -  سيتحول بكل بساطة الى عالم من الكفار  . لا هوادة و لا رحمة بينهم لما تحمله كلمة " كافر " من معانى .

=========

حكمة

لو كان نيلك يا مصر صلصة ... مكنش كفى الكوسة الى فيكى .

=========

الجمعة العظيمة

ترانيم الجمعة العظيمة بصوت فيروز

=========

للتجنيد

لتصير مصارعاً رومانياً ... أضغط هنا

=========

أسبوع الألام

يبدأ يوم الأحد و ينتهى الأحد التالى

أسبوع من التأمل و قراءة الكثير من النصوص . الكنيسة الشرقية تملأ الأسبوع بصلوات مستمرة , أطولها التى تبدأ من بصخة باكر الخميس و تنتهى الجمعة قبل الغروب مباشرة , يتخللها 7 ساعات فقط من الراحة من الخميس 12 بالليل الى الجمعة 7 صباحاً .

أسبوع من السعادة و الراحة النفسية , أسبوع من السباحة فى بحر من الروحانيات و التأملات . أسبوع من الصفاء و السكينة , أسبوع من الأمتلاء الروحى يعطى ثماره لبقية العام .

كل سنة و أنتم طيبين .

==========

كلمات

أخر كلمات للمسيح :

 

 قد أكمل .

 

..........................................

46 comments:

كلنا سندريلا said...

كل سنة وانت طيب يا رامز :)ا

بنت القمر said...

كنت بتناقش انا وهي الصبح وقلت لها علي التدوينه_اللي انت تقصدها
دي وقناعتي الخاصه
طبعا انا رأيي قلته هناك وانت قريته وشفته
وقلت لها علي التدوينه ورأيي اللي من 10 ايام
مش ممالئه لحد ولانفاق للاخر
:)
المهم
ليس هناك يقال بعد كل ما قيل علي رأي المحامي بتاع سرحان عبد البصير في المحكمه
:)
انت فاهم ولا ضعت مني
:)
لو مفهمتش هي ها تفهمك بعدين
كل سنه وانت طيب جداااااااا
فرحانه اوي انهارده تعليق في مكان ما عجبني اووووووووووووووي
يبدو ان البعض ليس عدوانيا هذه الايام احدهم سكب الماء في وجهه مشعلي الحرائق
:))))
يا بركه اسبوع الالام وهابي ايستر
تحياتي

محمود المصرى said...

بسم الله الرحمن الرحيم

يا عزيزى موضوع مختلف بدل كافر او كافر بدل مختلف دى مش دقيقة , لأن الاختلاف يحمل معانى كثيرة تبعا لمجال الاختلاف , يعنى الكافر مختلف لكن المختلف ليس بالضرورة كافر , وكون المختلف فى الدين كافر لا يعنى بالضرورة معاداته , والمسألة دى تم توضيحها كثيرا , وهذا اللفظ ليس مجرد بديهة اجتماعية انما بديهة عقائدية .

^ H@fSS@^ said...

اولا كل سنة و انت طيب يا قداستك
و مبروك عليك كل السكينة و الهدوء
اوعدنا يا رب و احمينا من زعابيب امشير و تراب ابريل

ثانيا
اسراء مكنتش البطلة ممكن
لكن هي برضو عرفت انها بقت بطلة
صح؟
و بناءا عليه مكنش يصح تطلع تقول اللي قالته و اللي مازالت لسه مصره على تكراره
حد يسكتها يا ناس
و ان امالزت مصرة اعرف مين اللي وزها و م شمعروفله اسم لغاية دلوقتي
و فكرك ايه الهدف او الفايجة اللي حتيجي من بناء رمز يتكل عليهالناس و من ثم تحطيم هذا الرمز؟ منن المستفيد؟ من الفاعل؟ و امتى حنفوق؟
كانت معكم مراسلتكم حفصة من على شلتتها قدام الكومبيوتر


ثالثا
اسمحلي اختلف معاك على حكاية ان فكر المسلم كلمة كافر فيه بتساوي كل من هو غير مسلم
اسمحلي اقولك ان من يعتقدون بذلك هم الفئة الضالة من بهايم بني امه الاسلام و ليس الكثير منهم يا رامز
لكن يراد ان تظهر الصورة انه الاغلبية شايفين غير المسلم ككافر


رابعا
بالذمة مين بس حيحب يبقى مصارع روماني؟؟
واصلا اللينك مفتحش معايا
:)

خامسا
كل سنةو انتي طيب تاني و تلات و رابع
و السماح اذا رزلت عليك بكتر كلامي

تحياتي

Unknown said...

:العزيز رامز

يااااااااه..ده انت قديم قوى...هى لسه سبيرو سباتسدى موجودة؟ فى نهى منطقة؟ أنا أخر مرة شفتها من كام سنة فى ضاحية من ضواحى الهرم الريفية....سبيرو سباتس أبو دبانة
طعمها لذيذ فعلا تحس انك بتشرب ميه بسكر لسه متعبية بالكوز فى قزازة سعادتك
.....................
عنده حق..هو مين سيد ده؟
.....................
موضوع اسراء ده بجد دليل على تخلفنا العقلى...مين قال انها بطلة؟ وايه هو مفهوم البطولة؟ دى بنت كانت بتروش عالنت ولما الدنيا دخلت فى الغميق قالت حقى برقبتى...حقها..بنت وعايزة تعيش سنها ومش عايزة تودى أهلها وسلسالها كله فى داهية...أى واحد أو واحدة يغلطها يبقى لا مؤاخذة يعنى...يعنى ايه حد يسكتها؟ هو احنا عايزينها تقول أى كلام بالكدب؟
اللى شاف البنت وهى خارجة فى تقرير القاهرة اليوم يفهم ان البنت عليها ضغوط رهيبة من أمن الدولة عشان تقول كده هى و أهلها...خلاص بقى سيبوهم فى حالهم
الموضوع ده فكرنى بمدونة شهيرة وابنة شاعر كبير تتولى ادارة العمليات النضالية على طريقة "اتصل بيا فلان وقاللى.."..."علانة بلغتنى..".."حد يتطوع ويروح...".."حد يعمل كذا..حديسوى كذا"..اضافة الى كم هائل من الألفاظ النابية البذيئةوالتى يستحى منهاالرجال قبل النساء
عايزين اسراء تبقى كده عشان تعجبكم؟
...........................

لكى تكون منصفا يا رامز لابد أن تعترف أن نسبة تكفير المسلمين فى وساط المسيحين ارتفعت بشدة فى السنوات الأخيرة...بل ان هناك طوائف كاملة لا تعترف بالمسلمين أساسالأنها لاتعترف بسيدنا محمد صلىالله عليه وسلم
وازدادت بشدة بعد نغمة الاستقواء بالغربالمنتشرة بين أوساط بعض المسيحيين هذه الفترة

طبعا تكفير الأخر سواء كان مسلما أو مسيحيا لن يكون فى صالح الوطن على أية حال...بس لزمتها ايه النقطة دى فى يومين الأعياد دى؟
انت جالك ايميل من بتوع حكمالاحتفال بشم النسيم؟

...............................
كل عام وانت بخير..لوكان أسبوع من الروحانيات يصلح الحال لتحولنا الى شعب من الملائكة يا صديقى

عيدكم مبارك



........................

Anonymous said...

أنا بس عاوز أقول هنوا أخيكم عيسى العوام بالعيد :):)

كل سنة وانت طيب يا أبو الرموز

محمود المصرى said...

بسم الله الرحمن الرحيم

هما مين الفئة الضالة دول يا استاذة حفصة ؟
اللى يقول ان غير المسلم كافر يبقى ضال ؟ طيب القران بيقول " لقد كفر الذين قالوا ان الله هو المسيح بن مريم " وقال ايضا " ان الدين عند الله الاسلام " هل اللى يتبع القران يبقى فئة ضالة ؟ وياريت حضرتك تجيبيلى كلام عالم واحد بيفهم قال ان غير المسلمين ليسوا كفار , الفئة الضالةوالبهايم فعلا هى التى لا تقول بكفر غير المسلم .

^ H@fSS@^ said...

استاذ محمود
ربنا ذكر ايات كتيرة في القران بتكفر ناس من هنا و ناس من هناك لاسباب كتيرة
لكن مافيش و لا ايه بتقولك يا مسلم انك من حقك تكفر غيرك
وصف الكفر شئ يختص به الله تعالى عز و جل فقط لا غير
و لا انت
و لا انا و لا مليون شيخ دين من حقه انه يكفر غيرنا من البشر
ده شئ
الشئ التاني اي نعم ان الدين عند الله الاسلام
و هناك مقولة تانية بتقول المسلم من سلم المسلمون من لسانه و يده
فدي تنطبق على ناس كتيرة مش مسلمة بنفس مفهومنا احنا للاسلام
لكنها مكتوبة عند ربنا مسلمه و تاني ده بيوريك انه وحده الله تعالى هو المختص بتصنيف البشر
م شمعنى ان ربنا قال في وصف شئ كلمة معينة يعني هو بيامرنا بتطبيق الكلمة دي على الناس المختلفة عننا
فيه فرق و كبييييييييييييييييير كمان
مين انت و مين انا علشان نحكم على غيرنا من البشر بالكفر؟؟
اطلعت على قلوبهم و شفت مكتوب فيها ايه؟؟
فصصت عقيدتهم و عرفت اساسها ايه؟؟
و على هامش النقاش خد بالك انه فيه فرق كبير بين كلمة الله
و كلمة الرب
و ان كلمة الرب تستعمل اصلا في سياق كلامنا اليومي
رب العمل
رب البيت
يعني الراعي و المسؤول
فهل علشان اختلافات لغوية و معنوي في طريقة استخدام كلمة حتكفر انت صحابهاو تحكم عليهم؟؟
احب كمان الفت نظرك لمثال بسيط ورد في القران الكريم و مش بنتعامل معاه غير على اساس انه قصة و السلام
سورة الكهف
و قصة اصحاب الجنتين
هل يا ترى حللت مرة في حياتك معنى كلام صاحب الجنة اللي اتحرقت ؟؟
اهو يا سيدي بلسانه قال ربي و قال الله و لكن مدلول كلامه كله كان كفر بنعمة ربنا و استعلاء عليه و شك منه في ورود يوم للقيامة اصلا
فاكر ايات السورة و لا تحب اجيبهالك؟؟
حاضر اهم
بسم الله الرحمن الرحيم
" و دخل جنته و هو ظالم لنفسه قال ما اظن ان تبيد هذه ابدا ، و ما اظن الساعة قائمة و لئن رددت الى ربي لاجدن خيرا منها منقلبا"
صدق الله العظيم
يعني كفره الباطن خلاه يعتقد انه جنته خالده
كفر ده و لا مش كفر؟؟
و شكه في عدم قيام الساعة كفر ده و لا مش كفر؟؟
و عدم تصديقه في موضوع ما اذا كان حيرجع لربنا و لا
كفر ده و لا مش كفر؟؟
في اصول الدين
قبل ما تكون مسلم و لا غيره
لازم تكون مؤمن بحاجات اساسيه
منها الاعتقاد بالموت
و القيامة و الحساب و الله و ملائكته
و بعدين يجيي التفصيص لكل ديانه بعد كده على حده

الان و بعد ما جبت لك مثال من القران على واحد كان بيقول بلسانه انه مؤمن بربنا
لكن كل افعاله تدل على كفره و شركه بالله
هل تقدر تقولي احنا مين بالظبط علشان نحكم على غيرنا بالكفر
و اصلا يا ريت لو تجيبلي الاية اللي ربنا بييقول فيها انكوا يا مسلمين من حقكوا تكفروا غيركوا، ممكن تجيبهالي؟؟
ايه صريحة وواضحة و لا تحتمل مليون تقويل او تفسير ملتوي
ممكن؟؟
و خد بالك انا مش بجيب كلام عوالم
انا بجيب من القران طوالي

Anonymous said...

IN CASE YOU DON'T KNOW, THE SHIP IS SINKING

Guys
There are good christians and bad christians, as there is good muslims and bad muslims...there are christians who hate each one anothers and muslims that hate each one another, there are christians who hate muslims and there are christians that love muslims, there are muslims that hate christians and muslims that love christians...


Let us move on...

Let us free ourselves from hatred and look on each other as a person that God has created ..to be loved and appreciated


let us forget about our differences and focus on our common things

Egypt was always strong when all its people came together as one..


Egypt is sinking..ya3ni bel 3arabi betghera2..and instead of putting our fingers in the holes to stop it from sinking, we point the finger on each one another....


wake up Egyptians...wake up...Egypt is sinking...put your fingers in the holes of the ship.., not in each other eye...

Abu A7mos Al Tibi

Hypatia said...

كل سنه وانت طيب يا رامز

ــــــــــــ

انا اتصدمت فى اسراء-يا روح قلبي-خالص
مش عشان هى بطله ولا اى حاجه انا رأيي فيها قلته من زمان بس عشان كلامها بعد الافراج صادم جدا وتكرارها لتصريحاتها المستفزه صادم جدا جدا

______________

اعتقد ان فيه فرق كبير بين الكفر بالاسلام او الكفر بالمسيحيه والكفر بالله
شخصيا انا شايفه ان اى حد مؤمن بوجود الله\الرب\الخالق مش من حقي انى اكفره او افتش فى نواياه وايمانه وعقيدته

وشخصيا شايفه ان الملحدين والكافرين بوجود الله هما اللى ينطبق عليهم كلمه"كافر"لكن برغم كده انا شايفاه حكم قاسي جدا اخاف احكم بيه حتى على اللى بيعلن كفره والحاده

لو من حقنا نحاكم بعض يبقي ايه لزمه القيامه والحساب وربنا ليه حيحاسبنا ما كان سابلنا المهمه ديه لو احنا نقدر فعلا نعملها-مهمه الحساب
لكن مادام كلنا مقتنعين ومؤمنين ان الاطلاع على النوايا والقلوب صفه مش بشريه يبقي نسكت بقي ومنقولش كلام محناش قده

_____________

مفتقده جدا ايام الاعياد فى مصر
انا هنا فى الكويت فيه كنيسه قبطيه وكنيسه انجيليه -شكلها حلو اوى اوى والمبني بتاعها غايه فى الجمال_لكن ولا حس ولا خبر ولا فيه اى مظاهر للاعياد
ولا الدنيا ربيع ولا البيض ملون ولا الناس نازله تتسوق ولا اى حاجه والجو حر موووووووووووووووووت موووووووووت

قولى بقي مين سبيرو سباتس ده ؟؟؟؟

Hypatia said...

محمد م5م

مساحه الود اللى بيننا تخليني اعلق على كلامك بعشم بعد اذنك

يا محمد اسراء محدش قالها قولى كلام كده ولا كلام صدق ومش مطلوب منها انها تبقي بطله او فدائيه وترمي نفسها فى وش المدفع حمدلله على سلامتها وربنا يخليها لاهلها يارب بس تصريحاتها مستفزه جدا خصوصا مع تعمد التكرار اسراء اتقبض عليها هى وكتير ظلم وهى موقفها فيه تنازل عن حقها وعن حقوق غيرها وكلمات من نوع"انا حرمت وانا توبت وانا كفرت عن ذنوبي وانا اتعاملت احسن معامله وعندي استعداد ارجع السجن تانى"فيها استفزاز كتير لناس اتبهدلو واتسحلو فى المعتقلات كل اللى كان مطلوب منها انها تسكت مش اكتر تحمد ربنا ونحمد ربنا معاها ولو كان فيه ضغط عليها عشان تقول تصريحات معينه تقولها مره واحده وتسكت خلاص من غير ما تبين انها هى واللى اعتقلو كلهم بيروحو بورتو سُخنه فى فندق خمس نجوم

تحياتي يا محمد

عباس العبد said...

كلنا سندريلا
و انت طيبة يا جميل
=========
بنت القمر
لأ فاهم طبعاً .
و كل سنة و أنت طيبة
=========
محمود المصرى
احنا حنرغى كتير أوى فى الموضوع ده لأنه شائك . فى نقطة مهمة جداً لازم اوضحها . و هى ان المعرفة هى سلاح ذو حدين . اما انها تصبح اداة تنوير فى يد صاحبها أو تستغل كأداة للخديعة و التضليل لأهداف معينة و هى دى نقطة خلافى فى موضوع كافر .
اولاً :
ثلاثية اللفظ و هى :
المتكلم و خلفيته , اللفظ و دلالته , المتلقى . صح ؟
لكل لفظ دلالة أو كود للفهم كما يقال . مثلاً كلمة صايع
لو قلت لناس شباب بتوع شوارع و نواصى و كنت بتكلمهم عن شخص معين و قلتلهم ده " صايع أصلى " عارف حتتفهم أيه ؟ انه جدع و راجل و يقف جنب اى حد و يخدمه . اما لو انا و أنت بنتكلم و شاورتلك على نفس العيال و قلتلك عليهم دول " صيع " حتفهم علطول انهم بتوع نواصى و بلطجية و قلة ادب .
ثانياً :
لو حضرتك و انا بنتكلم فى الموضوع " كافر " انا حفهم قصدك كويس لأنى عارف خلفية محمود و فاهم دلالة اللفظ و انت عارف ان " المتلقى " الى هو أنا فهمك كويس .
لكن ....
تعالى ننزل الشارع و نوقف واحد مسيحى و واحد مسلم . الأتنين متوسطى الثقافة ( مش حقولك لا جهلاء و لا طبقة دنيا و لا منغلقين – لأ حنختار بهوات و شيك و متوسطى الدخل و الثقافة من المطلعين على ما يحدث فى الحياة اليومية و من النوع الى بيقرأ خمس , ست كتب كل شهر .... خلاص ) .
حنكلم المسيحى الأول و نقوله : يعنى ايه كافر ؟
مفردة كافر غير موجودة فى الخصوصية المسيحية و انت عارف اكيد الموضوع ده , و بالتالى اللفظ لن يمثله المفهوم الى انت تقصده بالعكس حيفهم كويس انك " بتكفره " و " بتحل دمه " و " انه لا يؤمن بالله " و انها اهانة و شتيمة بلا تردد و ممكن يخاف منك و انت بتسئله اساساً .
حننتقل للمسلم و نسئله نفس السؤال : يعنى ايه كافر ؟
حيفهم أنه كافر يعنى " لا يؤمن بوجود الله " و انه الكافر " لابد من قتله " أو " استتابته " أو " توقيع عقوبة عليه "
صح ؟ طبعاً
و متقليش لو مسلم رد الرد الى فات يبقى ميعرفش صحيح الدين و " دلالة اللفظ " , لانها مش مسئوليتى انى أشرح للمسلمين " صحيح أيمانهم " .
ده مفهوم رجل الشارع العادى المطلع على الأحداث اليومية , تخيل بقى لو نزلنا للأقل معرفة و تدرجنا لغاية ما وصلنا للجهلاء و المتعصبين , ممكن تقولى " دلالة اللفظ " بالنسبة ليهم أيه ؟
دا أنت لو قلت كلمة " دلالة اللفظ " حيمسوك يضربوك و يفتكروك بتسخر منهم .
ثالثاً :
و بناء على ما سبق , مفهوم " كافر " فى الذهن العام " مفهوم تكفيرى أقصائى " و منقطع الصلة بالمفهوم القرآنى الى حضرتك اوردته و بالتالى انا أرى ان الأصرار على نشره فى قطاعات واسعة هو نوع من انواع الخداع لتحقيق هدف ما " استغلال دلالة لفظية معينة لها معنى اصيل فى الذهن التفسيرى للضغط على الذهن الشعبى لدفعه فى أتجاه معين " . الصراحة انا لا أعرف الهدف من وراء الخدعة دى و لا أسبابها و لا دوافعها . لكن مازلت مصر على ان الأصرار على نشر اللفظ كبديهة فى المجتمع " ينطوى على خدعة ما " .
يعنى بأختصار , انا معنديش أعتراض على اللفظ " فى مفهومه القرآنى " و منعنديش مشكلة مع " دلالته " كما وردت و لا أى أعتراضات دينية من أى نوع عشان متفهمنيش غلط . انا كل مشكلتى فى " عملية نقل اللفظ للمجتمع " .
و كل سنة و انا طيب , بدل انت ما قلتهاليش .
==========

عباس العبد said...

حفصة
و أنت طيبة يا جميل .
دى ضغط الخوف , مش الحكومة . الكلام الى بتقوله نتيجة " ضغط الخوف " . الحكومة حبستها بس , و البنت صغيرة فخافت موت و دمها نشف . فخرجت تقول حقى برقبتى . بس مش قضية كبيرة يعنى . و بعدين الاضراب بلا هوية و لا أبطال . ليه ما يكونش بطله الطفل الى مات فى المحلة الى محدش يعرف اسمه ؟ ما هو يا مفيش حد مات و يبقوا كدابين يا اما الموت عادى . بطلة فيسبووك . بيفكرونى بواحد كفاياوى من كفاية كنت اعرفه و كان الناس بتهلله و تصقفله و عاملينه من الثوار و هو عاطل و لا شغل و لا مشغلة و لا تعليم و لا بتنجان و لا حتى بيسرق أو بيقبض من تحت الترابيزة , مبيعملش أى نشاط انسانى حتى لو النشاط ده فاسد و بيقول على نفسه " الثائر " و بيقارن نفسه ب أحمد عبد الله رزة .
متخلنيش اقول كلمة أعتراضية يعنى .
=========
هانى
و انت طيب يا وحش .
========
أبو أحمس الطيبى
شكراً لزيارتك
ياريت فعلاً على كلامك المصريين كلهم يفوقوا .
=========
نسرين
و أنت طيب يا جميل .
العكس هو الصحيح , كلامها بعد الافراج هو الكلام المنطقى و قبل السجن و الأعتقال و النضال الفيس بووكى هو الى مش طبيعى . البنت لقت أن الموضوع حيقلب جد , راحت رجعت لأصلها , هى ملهاش فى البتنجان من أساسه لكن نشوة الفيسبووك و الناس بتخش فى الجروب و تخرج عملها لوثة , اخدتها و نسيتها انه مجرد جروب زى جروبات البحث عن اجمل سيقان , صحيح توعية و الفكرة حلوة , و ليها معنى ,,,,, بس لو بجد . البنت لما عرفت ان المسافة بينها و بين " النضال الحقيقى مسافات " عملت عيشة علطول , بلا وجع دماغ بلا بتنجان . متنسيش ان الفيس بووك مبهر و الأ مكنش انتشر بالسرعة دى و كله فى الامان يالالالى .
---
انا متكلمتش عن مفهوم الكفر فى الاديان , لانه موضوع شائك و كل الى استطيع عمله هو الكتابة عن المفهوم فى المسيحية و دى أكتر حاجة ممكن اعملها , غير كده انا لا املك المعرفة و كنت بتكلم عن نقطة تانية خالص . اعتقدت فهمتيها , راجعى ردى على محمود المصرى .
---
مش عارف الوضع ايه فى الكنيستين دول
بس يا اما بيعدوا بالتقويم الغربى يا اما مبنيين فى حتة مفهاش مسيحيين يا اما دول مش كنيستين .
ههههههههههه
=========

عباس العبد said...

م5م
ايون السبيرو سباتس لسه موجودة و أتحسنت مليون مرة عن زمان و هى اجمل حاجة ساقعة موجودة على الساحة حالياً .
---
رأى فى موضوع اسراء , انها بنت كويسة و فى حالها و طيبة و محترمة و كل الصفات الانسانية ممكن تحطها فيها و انها عملت خير لما نشرت الموضوع على الفيس بووك و كل شىء ظريف و طيوب و محندق و صغنن و كوكو كوكو و خلاص . لا اكتر و لا أقل . انا أعرف واحد عمل مليون حاجة أعظم منها و محدش عمله بطل .
احمد عبد الله رزة اهم سياسى فى مصر ( و دى مش مبالغة – دى اقل حاجة عرفت اوصفه بيها و أسئل اى حد عن " مين احمد عبد الله رزة ) مات و محدش سمع بيه مع انه فاتح مركز خدمة للأطفال فى عين الصيرة لتعليم الاحداث القراءة و الكتابة و مهنة يكسبوا منها بدل ما يبقوا أطفال شوارع . و محدش صقفله , حاجة مسخرة فعلاً .
اما المدونة الشهيرة بنت الشاعر الكبير فهى حرة تماماً فى ما تفعله و تكتبه أن شالله تكتب " ريان يا فجل " هى حرة و الى مش عايز يقرالها هو حر مش حيخسر حاجة و الى بيقرالها برضه مش حيكسب حاجة . لكن هى فعلاً على المستوى الانسانى و الخدمات الى بتقدمها " شخص محترم لأقصى درجة " يكفى الخدمات الى بتقدمها للمجتمع . لو كنت قريت الموضوع لاى أتنشر عن الى بتعمله فى البديل , حتفهم قصدى . انما المصيبة بقى لو خرجوا علينا و عملوها رمز وطنى " ثائر " بتعبر عن تحالف قوى الشعب العامل و كفاح الطلبة و العمال و رمز التقدمية .
---
" كى تكون منصفا يا رامز لابد أن تعترف أن نسبة تكفير المسلمين فى وساط المسيحين ارتفعت بشدة فى السنوات الأخيرة "
طيب و السنوات الى قبليها , مين الى كان بيكفر مين اكتر ؟ و بيستحل دمه و بيستقوى بماليزيا و السعودية و بيسرق محلات دهبه ؟ ؟؟؟؟؟؟؟؟؟؟؟؟؟؟؟؟؟؟؟؟؟؟؟!!!!!!!!!!!!!!!!!!
مش بالكيلو هى , الى يوزن اكتر يشيل , و بعدين انا متكلمتش عن التكفير , انا كنت بتكلم عن حاجة معينة . راجع ردى على محمود المصرى .
و بعدين مجليش ميل واحد بس بخصوص شم النسيم , ده جانى ميل بيكفر الى يهنىء المسيحيين بالعيد . يا راجل ده لو بوذى ساكن جنبى و بحتفل بعيد النملة حقوله " كل سنة و أنت طيب " . طيب ده فى عيد الأضحى الى فات جالى ميل بيكفر المسلم الى يقبل تهنئة بالعيد من غير المسلم . يعنى أنا لو قلتلك " كل سنة و أنت طيب " فى العيد بتاعك و أنت رديت على و قلتلى " و انت طيب " أو " و أنت بالصحة و السلامة " يبقى سعادتك كافر .
---
أسبوع الروحانيات لم يصلح حالى بالطبع و الا أبقى كداب , انا أتكلمت عن حالة صفاء ممكن أستغلها صح و ممكن يتم أهمالها , ربنا يسهل .

محمود المصرى said...

بسم الله الرحمن الرحيم

يا باشمهندس انا فهمت وجهة نظرك , واعتقد ان الحل لا يكون بالغاء اللفظ من الخطاب لكن بضرورة تصحيح المفاهيم ونشر التوعية المتكاملة بهذا الخصوص بالنسبة للمسلم والمسيحى وانا اقر ان هذا مسئوليتنا كمسلمين , سواء فى توعية عامة المسلمين او حتى فى شرح المقصود او ما سميته دلالة الالفاظ عند المسيحيين , وان خطأ فى الفهم عند المتلقى انا اعترف انه بسبب تقصيرنا نحن كمسلمين فى الشرح والتوضيح .

بالنسبة للاستاذة حفصة
بالنسبة لقول حضرتك ان الله يختلف عن الرب على اساس ان المسيحيين فى قانون الايمان النيقاوى قالوا عن المسيح رب وليس اله انا عاوز حضرتك تسألى الباشمهندس وهو كاثوليكى هل تؤمن ان المسيح اله كامل ام لا ؟ وشوفى هايجاوب يقول ايه ؟ اما الاورثوذكس فيكفى ان البابا شنودة له كتاب اسمه الوهية المسيح بيثبت فيه ان المسيح هو الله فلا حاجة للتفرقة بين الرب والاله والدخول فى نقاش حول هذه النقطة .
ولا حاجة ايضا لتدارس ومناقشة عقيدة اى طائفة او دين اخر لأن ببساطة واحد لا يؤمن بالرسول يبقى كافر بنص القران وبدلالته ايضا التى وافق عليها الباشمهندس نفسه على اعتبار ان سبب وصف القران لهم كمسلمين هو فى حد ذاته وسيلة خلاصه , والقران يقول ( وَمَن لَّمْ يُؤْمِن بِاللَّهِ وَرَسُولِهِ فَإِنَّا أَعْتَدْنَا لِلْكَافِرِينَ سَعِيرًا ) فأنا لا احكم من تلقاء نفسى لكن اخذ ما قاله الله .
وعموما يعنى هذا اللفظ لا يحمل بالضرورة معانى اقصائية او عدائية , وايضا اهل الكتاب لهم خصوصية عن المشركين و الملاحدة بالنسبة لنا كمسلمين ماداموا مسالمين لنا ويربطنا بينهم عهد وذمة , فلا حاجة لكل هذا الاختلاف .
واخيرا بس احب اصحح نقطة لحضرتك انا لم اطلب من حضرتك كلام عوالم لكن طلبت كلام علماء اللى ربنا قال عنهم ( يرفع الله الذين آمنوا منكم والذين اوتو العلم درجات ) وكمان الرسول قال ( من قال فى القران برأيه واصاب فقد أخطأ ) يعنى مش اى حد مؤهل انه يفسر القران لازم يكون لديه العلم الكافى لهذا .
وبالنسبة لحديث المسلم من سلم الناس من لسانه ويده فدا حضرتك ليس من شروط صحة الاسلام لأن الرسول لم يقل ان الاسلام ان تسلم الناس من لسانك ويدك , ولكن من لوازمه , والرسول لما سئل عن ما هو الاسلام قال ( شهادة ان لا اله الا الله وان محمدا رسول الله واقامة الصلاة وايتاء الزكاة وصوم رمضان وحج البيت ) فهذه هى شروط صحة الاسلام .
تحياتى للجميع

أبوفارس said...

كل سنه والناس كلها طيبه ياباشمهندس...طبعا اﻷحتفال بشم النسيم أقدم أعياد البشريه قاطبة حرام..وتهنئه أى حد بأى حاجه حرام..والموسيقى حرام..واﻷضراب حرام..فاضل أيه..؟؟مش فاكر بس برضك حرام...!!!
بيقولك سعر برميل البترول حيوصل ٢٠٠ دولار الشهور القليله القادمه..وأسعار الحبوب كالقمح والذره واﻷرز ستتضاعف تانى السنه المقبله ﻷسباب كتييير خالص..والحكومه حاتقبض على كل واحد مسجل ع الفاس بوك...ﻷنه حرام..
.دلاله اللفظ؟؟والله أنت بتدن ف مالطه ياصديقى العزيز..تانى كل سنه وأنت طيب...تحياتى وصادق مودتى..خالد

سمراء said...

الحالة : حالتنا كلنا وزيادة قوي من النار اللي طالعة من جوانا
اما عن النكته : عنده حق شعب فعلا معندوش ادني ثقافة
اسراء : فجأة بطلة بالصدفة ذي وزير بالصدفة في فيلم معالى الوزير الفرق الوحيد ان احمد ذكي متراجعش انما هي اتراجعت بعد نفيها الى السعودية بدون محرم او تاشيرة
اصرار : اللي تكسب به العب به
الاصرار هو على اللعب والمكسب
الحكمة هايلة جدا
للتجنيد : يكفي انك تركب اتوبيس او تقف في طابور عيش هتبقي مصارع روماني
اما عن الجمعة العظيمة واسبوع الالام والقيامة المجيدة فكل عام وانت بخير كلمة اخيرة
كتبت هكذا قد اكمل
تلك المشاعر التي لمستني في يوم الصلب
مرة اخري كل عام وانت بخير
احييك على كتاباتك
سمراء

^ H@fSS@^ said...

استاذ محمود كويس اوي ان حضرتك جبت الاية الكريمة دي
لو حضرتك تاخد بالك ان صيغة التحدث فيها هنا ب انا تعود على صيغة المتكلم و في الحالة دي المتكلم هو الله تعالى عز و جل و ربنا عمره ما حيشركنا معاه لو بدا كلامه ب انا
زي مثلا الاية اللي بتقول
انا نحن نزلنا الذكر و انا له لحافظون
فتاني دي مثال على صيغة التفخيم لان الله بيتكلم عن عزته و جلالاته
فلما ربنا يقول
انا اعتدنا للكافرين عذابا سعيرا فالموضوع ده من شانه بس و مش من شانك انت و لا اي حد تاني
مجالكش بيه يعني صيغة امر
ماشي؟؟
و الشء التاني و الله رامز او غيره يقولوا اللي يقولوه انا مالياش دعوة
يمكن هو في قلبه في حاجة تانية و ميقدرش يفصح عنها
انا مالي بيه؟؟
انا مثلا اللي ححاكمه يوم القيامة و اثبت عليه الغلط؟؟
هو يامن براحته زي ما هو عاوز و هو له شفيع يشفع له يوم القيامة
ادخل انا نفسي بينه و بين ربنا بامارة ايه
ده الواحد يومها حيكون بيقول يلا نفسي
انت بقى شاغل نفسك بايمان الغير مسلم و كفره على اساس ايه؟؟
قلبه بين كفي الرحمن
انا اتفعص ما بينهم و اكشف عنه ليه؟؟
و ازاي اصلا اكشف عن قلب شخص و انا مش مكشوفلي عن قلبي انا نفسي؟؟؟
حضرتك متعرفش الشيشان اللي كانوا مسلمين و وقت سيطرة الشيوعية اضطروا يخبوا ايمانهم و اسلامهم و خفوه ؟؟
طيب لو حضرتك وقتها كنت موجود و شاهد عليهم، هل يا ترى كنت حتكفرهم؟؟
ما هو اصل شكلهم وقتها كانوا شيوعيين
لكن قلبهم كان بيقول انهم مسلمين بالله تعالى و مؤمنين بسيدنا محمد، طيب يا هل ترى لو كانوا اتقتلوا كاعتقاد الفئة الضالة من اولاد الاسلام، مين حيتحمل ورزهم؟؟
مش بكده تكون قتلت مسلم عند الله لكنه مخفي عن نظرك المحدود؟؟؟؟
و اياك تقلي ان دي حاجات ربنا حيغفرها لجلهنا بيها
لانه اصلا مطلبش منك تحكم على غير المسلم و لا طلب منك تقتله
و انا بتكلم عن الزمان ده
مش ايام حروب الرسول اللهم صلي و سلم عليه

ارجو ان يكون كلامي واضح

Unknown said...

nsreen bsune :
نسرين...من حقك طبعا تناقشينى ويشرفنى يبقى فيه بيننا مساحة عشم
.........................
البنت مش متوازنة يا نسرين..البنت مش بتكرر كلامها عن اقتناع دى بتكرره زى الأسطوانةا لمشروخة..بتكرره بلاوعى عشان تتأكد انهم سمعوها...انتى لولاحظتى فى كلامها أول ماخرجت كلمة كررتها كذا مرة "أنا باسجد شكرا لله انى بنت و اتصنت وماتلمستش"..قبلها كان موقع مصراوى نزل خبر واترفع انهم اغتصبوها-ربنا يحفظ شرفها يارب-....متخيلة الضغوط على بنت فى أمن الدولة؟ متخيلة الضغوط على أهلها؟
ايه حكاية الانسانية بتاعة حبيب العادلى فجأة ى؟ قرار انسانى لحبيب العادلى؟ بأمارة ايه؟ ماهو قبلها بكام يوم كان قرار انسانى للنائب العام واتبل و شربت هى و أهلها ميته...عشان أمها مسافرة تعمل عمرة؟ ياسلااااااااااااااااااام
وبقية المعتقلين والمعتقلات اللى أهاليهم بيجيلها شلل و ذبحة صدرية وبيموتوا..ماتجوزش عليهم الانسانية؟
تقدرى تفهمى من كده ان الاسطوانة المشروخة اللى البنت عمالة تكررها دى جزء من صفقة مع أمن الدولة والبنت خايفة تبطل ولا تغلط ياخدوها تانى...البنت دى لو اتعرضت على اخصائى نفسى محايد ومحترم دلوقتى حاتطلع مصابة بانهيار عصبى بشع...ربنا يلطف بيها..فياريت نبطل نسقط عليهاأنانيتنا وعجزنا ونقول المفروض تعمل يه وماتعملش ايه
.
.
.
اللى ماحدش خد باله منه ان اسراء اتقبض عليها يوم 6أبريل من قهوة قصاد شغلها..يعنى ماكانتش مضربة ولاحاجة...مجرد لوجو جالها بالصدفة حطته على صفحة الفيس بوك بتاعتها
.
.
.
حارد على رامز و أروح أرد عليكى فى مدونتى..لينا خناقة هناك

Unknown said...

:رامز
أكرر خالص تهنئتى بالعيد السعيد
..................
ياريت تدلنى على عنوان كشك عم كامل ده نى كنت زمان من عشاق السبيرو سباتس دى..القزازة الخضرا مش البنى..وماتخافش حاعزمك معايا
..................
متفق معاك فى موضوع اسراء -راجع ردى على نسرين- والله يرحم أحمد عبدالله رزة..قريت عنه كتير
...................
موضوع نوارة نجم : بدون ماحد فينا يزايد على التانى أنا طبعا عارف انها حرة تماما فى مدونتها..وانها لابد أن تكون شخصية محترمة جدا لأنى بافترض الاحترام فى كل الناس حتى لو اعرفهمش شخصيا...ولو بصيت على مفضلات مدونتى الجربانة حاتلاقى نوارة على رأس القائمة..بس أنا عاتب عليها زيادة جرعة الألفاظ الغير لائقة فى الفترة الأخيرة و رفعها شعار المدونة ترحب بالبذاءات...و أشرت ليها فقط منعا لتنميط النضال النسائى على المدونات بهذه الصورة ولكى لا تتحول لرمز وطنى زى مانت متخوف بالظبط
ياريت تبعت لى لنك المقالة بتاعة البديل

.............................
نيجى بقى للزغلول لكبير :-

أه بالكيلو يارامز...مادمت انت عاوز توزنها كده بمثالك المغلوط

أولا المسلمون ليسوا لصوص ذهب..ومحلات اذهب التى كانت تسرق ونوادى الفيديو التى كانت تحرق لم تكن كلها لمسيحيين...ومن فعلوا ذلك انت فئة ضالة لا يصح نسبتها الى الدين...والا كان لابد أن نصدق مايحكى-وبعض الرواة أقباط- عن سراديب الكنائس المليئة بالأسلحة و التدريبات التى تجرى لألويات مسيحية تدعى أبناءالمسيح و شباب المسيح أو ماشابه
فان لم يكن المسيحيون كذلك فالمسلمون أيضا ليسوا كذلك يا عزيزى

ثانيا : أول مرة أسمع حدوتة الاستقواء بماليزيا دى..مش فاهم ازاى
أما السعودية-أو بالأدق أرض الحجاز- فهى تحوى رموزنا الدينية..الكعبة والمسجد النبوى..فمامعنى الاستقواء ...ان كنت تعنى نستقوى بهذه الرموز روحيا فنعم بالتأكيد

لكن على الطرف الأخر حين ترتفع نبرة الاستقواء بأمريكا وكندا وبريطانيا...ويظهر مثال عدلى أبادير ومايكل منير و زكريا بطرس....فهل المسيحيون يحجون الى أمريكا وكندا؟
حين يزداد نشاط الجماعات التبشيرية فى الأحياء الفقيرة و فى بعض المدارس...وحين يخرج الشباب المسيحى مهددا بقتل جاره المسلم من أجل وفاء قسطنطين......كل هذا ليس معناه أن المسيحى يكفر المسلم ؟
لماذا يكون المسلمون بحاجة لى الاستقواء بماليزيا و السعودية أو غيرهم فى بلد نسبة لمسلمين بها طبقا لأكثر تقديرات لمسيحيين تشاؤما هى 85%

رامز....هذه الجملة التى قلتها معناها انك أنت الذى يزن الأمور بالكيلو...و أن الأخوة الأقباط "تمسكنوا" كثيرا من قبل فمن حقهم أن "يتمكنوا " الأن...وهو منطق خطير لأننا أخوة وطن وشركاء مصير...فلا داعى ن يخفى أى طرف منا سكينا خلف ظهره ليضرب به الأخر
.
.
.
أخيرا ورغم أنف كل المجموعات البريدية أقول لك : عيد قيامة مجيد
ولنكن دائما أخوة فى الوطن

محمود المصرى said...

بسم الله الرحمن الرحيم

يا استاذة حفصة
ربنا اه هو اللى هايعذبهم وهو اللى اعد لهم عذابا سعيرا ماختلفناش , لكن لما ربنا يقول لنا ان اللى مايؤمنش بالرسول يبقى كافر وهايعد له عذابا سعيرا نصدقه ولا نقول مش عارفين ؟ اكيد طبعا نصدقه , ولما ربنا يقول ومن يبتغى غير الاسلام دينا فلن يقبل منه والرسول يعلمنا ان اول اركان الاسلام هى شهادة ان لا اله الا الله وان محمدا رسول الله يبقى اللى يكذب الرسول مؤمن ؟ اذا كان ربنا هو اللى بيقول لنا انهم كفار نصدق ربنا ولا نقول مالناش قدرة على الحكم ؟
اما موضوع ان دا مش شغلتنا فأنا عاوز اسأل حضرتك سؤال جدلى لو واحد بوذى تقدم للزواج بأبنة حضرتك مثلا هل هناك احتمال ان حضرتك توافقى عليه؟
لما واحد مسلم يتزوج بكتابية ويموت هل ترثه زوجته ولا لا؟ الرسول قال لا يرث كافر مسلم , هانطبق الحديث دا ازاى اذا كنا مش هانقدر نحكم بكفرها حسب منهج حضرتك ؟
نقطة اخرى كون ان حضرتك تقولى اننا مانقدرش نحكم بكفر شخص لا يؤمن بالرسول يعنى بالتبعية استحالة الحكم باسلام من يشهد ان لا اله الا الله وان محمدا رسول الله , لأن بنفس الحجة احنا مش عارفين اللى فى قلبه , فهل حضرتك بتؤمنى بتكفير الجميع وفى نفس الوقت عدم تكفيرهم ؟
واخيرا حضرتك تقصدى مين تحديدا بقولك الفئة الضالة ؟ وعلى اى اساس حكمتى عليهم بأنهم فئة ضالة ؟ هو حضرتك اطلعتى على قلوبهم ؟

^ H@fSS@^ said...

بص باين جدا ان الكلام معاك مافيش منه فايدة
اسلوب انك تشطح بالحوار لحاجات تانية و تتوه في النقطة الاصلية ده انا عارفاه كويس اوي
لاني انا بقولك تور انتي تقلي مش مشكلة احلبوه
و انا مش بقولك مش نصدق ربنا
انا بقولك مش انا اللي احكم عليهم و جبتلك مثال و انت مردتش و مش حترد و حتفضل تلف من نقطة و تخش في التانية و مش حوصل معاك لحاجة
انا عارفة ده من الاول لكن قلت يمكن لعل و عسى
و حتحور في كلامي و تحرف في معناه و مش حاخد منك لا حق و لا باطل
او بالعكس مش حاخد منك غير باطل
لاني انا بكلمك في ناحية و انت تقوم رادد عليا في ناحية تانية خالص
و سؤالي الاخير
انا مش فاهمة ليه كل واحد فاكر نفسه مسلم مش بيطيق غيره يقول كلمة مش على مزاجه
؟؟
يعني ايه كمية الديكتاتورية اللي انت ماشي بيها دي
كل ده علشان قلت فئة ضالة
ايوة فئة ضالة و متنيلة بستين نيلة و كل مجتمع معروف ان فيه الكويس و الوحش
خلاص يعني قتلتك الكلمة دي لما قلتها
ما تبطلوا بقى الاحتقان اللي انتوا عايشين بيه ده و تسيبوا الناس تقول براحتها
ما يا ما الواحد بيشوف منكوا كلام يشيب من هوله الولدان و بيسكت و يقول براحتهم كل واحد يتفلسف براحته
ايه ده
يخرب بيت كده يا شيخ
يخرب بيت كده فعلا
حتى الكلمة عاملي فيها رقيب عتيد
اعوذ بالله من الشيطان الرجيم

الرحمة
عيب عليك
و ايش دخل واحد بوذي و جوزاه من بنتي بموضوعنا
انت منطقك يتبع انهي مدرسة جدلية عديمةالفايدة؟؟
هو انا بقلك لازم تعترف انهم مؤمنيين و تجوزهم عيالك و لا بقولك خليك في حالك و خليهم في حالهم؟؟
بتحرف كلامي و معناه ليه؟؟
ولا هي الحكاية فن و لعب و هندسة، كيف تحر فاقولا غيرك و تنفطها بعيد عن بعضها؟؟؟
ايش دخل كلامي بجواز المسلمة من غير المسلم؟؟
عيب اوي الاسلوب ده
عيب بجد
نفسي مرة الاقي واحد متاسلم بيتناقش و بيرد عليا الكلمة بكلمتها
لكن كله شغل جلا جلا و لا الموالد

محمود المصرى said...

حقا رمتنى بدائها وانسلت

استاذة حفصة

سلاما سلاما

بنت القمر said...

حكمه اليوم
ليس فتح الجرح هو افضل طريق لعلاجه
قد يكون طمره مفيد احيانا!!!ا
كل سنه والجميع بخير

زمان الوصل said...

ولو إنّها متأخّره جدا بسبب خربان الحاسب المنزلى تبعنا .. كل سنه و انت طيب :)

عباس العبد said...

كل سنة و انتم طيبين و ربنا يدوم الأيام السعيدة علينا كلنا . و أسف على التأخير فى الرد , بس طبعاً عيد و شم نسيم و لحمة و فسيخ و رنجة و ورق عنب و جاتوه و كحك و تمام التمام .
---
المهم
الصراحة انا أبتديت اتشائم من المدونة و البوستات الى بكتبها و بفكر جدياً أحول للكتابة عن الفن الأصيل المتمثل فى صوت روبى و جسد هيفاء , او حتى أكتب عن اهمية تجارة المانيفاتورا و رؤية الأسد فى جنينة الحيوانات . كل ما أكتب بوست ملوش أى علاقة لا بالدين و لا بالمشاكل , الاقى البوست تم جره و توريطه و غمسه و تغريقه يا اما فى مسائل دينية , يا أما يعمل مشاكل ما بين الناس الى بتزور المدونة . كل تدوينة لازم أتنين تلاتة يتخانقوا علشان أنبسط . انا مش عارف الصراحة لازمته أيه الخناق , ما هو الى بيتخانقوا كل واحد بيعرض وجهة نظره . لا ده حيتحول فى أفكاره من مجرد " تدوينة " و لا التانى حيقتنع بكلام للأولانى علشان قراله رد فى مجرد " تدوينة " , عرض وجهات النظر بس يا خلق , ليه الخناق ؟ .
---
مثلاً أنا مش فاهم ايه الى دخل لاهوت المسيح فى الحوار الى داير بين حفصة و محمود المصرى , و خصوصاً أنه لما أتكلمت على كلمة " كفر " كنت بتكلم على " دلالة لفظ " مش مفهومه فى المعنى الدينى . أنا مقدرش أتكلم عن معناه الدينى حتى لو كنت عارفه و قريت عنه قبل كده , لا الناحية المعرفية و لا الدينية تسمحلى أتكلم عليه . لا من الناحية المعرفية ينفع لأن اللفظ غير وارد من أساسه فى الخصوصية المسيحية و لا من الناحية الدينية لأنى مش مسلم و محبش أحشر نفسى فى حاجة مليش صلة بها علشان محرجش نفسى " ممكن واحد يقولى أنت مالك " .
لكن علشان خاطرك بس يا أستاذ محمود و أعتقد حضرتك فهمت المعنى و المقصود من الفقرة الى أتكلمت فيها عن لفظ " كافر " حرد على سؤال الى المفروض يجى عن طريق حفصة :
نعم , نحن نؤمن طبعاً بلاهوت المسيح . دى لا فيها أرتودوكس و لا كاتوليك و لا بروتستانت .
بس كده
==========

عباس العبد said...

أبو فارس
و حضرتك بالصحة و السلامة .
ما هو الحاجة الى أقدر أتكلم عليها بس هى دلالة اللفظ بس . أعمل أيه ؟
شهر سبعة قرب و خد بالك انا مش ناسى العزومة , تيجى بالسلامة يا ريس .
========
سمراء
كل سنة و انت طيبة . و شكراً على مشاركتك الهادية و الجميلة .
و كل سنة و أنت بخير .
=========

عباس العبد said...

م5م
و انت طيب يا ريس
---
الكشك فى اول شارع الجمهورية , جنب المصنع علطول و جنبيهم عربية كبده و سجق جامدة موت . يعنى حتاكل و تشرب و تروق نفسك .
---
فى موضوع نوارة
ماينفعش تعتب عليها فى اى حاجة لأنها حرة , جرعة الألفاظ هى المسئولة عنها و على المتضرر " انه يبتعد " و ميدخلش عندها و يبقى حلها بسيط , اصل انا مش بايدى أعملها حاجة .
حدورلك على المقالة و أبعتهالك . على العموم انا كنت قلتلها و طلبت منها اذن انى أنشرها عنها فى المدونة عندى , و هى مرتضتش على ما أعتقد لانها يمكن رافضه .
---
نيجى بقى للزغلول الكبير
" أه بالكيلو يارامز "
لأ مش بالكيلو هى طبعاً , انت مصمم انها بالكيلو انت حر , رأيك و انت حر فيه . لكن انا مجبتش سيرة لا الأراضى الحجازية و لا الرموز الروحية و لا دخلت الموضوع فى الدين و لا أى حاجة من دى .
موضوع ماليزيا ده معروف , لانه من ادبيات الاخوان المسلمين و السيد مهدى عاكف المرشد العام للاخوان المسلمين هو الى قال : المسلم الماليزى اقرب لىّ من المسيحى العربى , و هو الى قال نجيب واحد ماليزى يحكم مصر مفهاش حاجة , و هو الى قال احنا بنتعاون مع بعض المراجع الماليزية , و هو الى قال بنسعى لتطبيق النموذج الماليزى . و مش السيد مهدى عاكف بس و كمان عصام العريان و الحديث بتاع عصام العريان أتنشر فى مدونة محمود " انا اخوان " , ده مش كلامى , ده كلام الاخوان المسلمين . و متقوليش انهم ما يعرفش صحيح الدين و روح السماحة و القبول فى الأسلام لأنها مش مسئوليتى انى اقولها لهم .
اما موضوع السعودية , فأنا بتكلم عن شيوخ البترول , انا لا جبت سيرة الكعبة و لا مساجد و لا أى كيان روحانى اسلامى و لا اتكلمت عن الدين من أساسه و لا عارف أيه الى جاب سيرة الدين فى الموضوع . انا بتكلم عن شيوخ البترول و ال" مكفراتية " الى سعادتك و سعادتى بتوصلنا فتاويهم من نوع " متقولش كل سنة و انت طيب لواحد غير مسلم " أو " مفيش حد غير مسلم تقبل منه تهانى بمناسبة العيد " و الى عايشين على تكفير و تجريح الأخر الى فى الحالة دى هيبقى المسيحى . و متقوليش انهم ميعرفوش صحيح الدين و روح السماحة و القبول فى الأسلام لأنها مش مسئوليتى انى اقولها لهم . و متقوليش عندكم زكريا كاوتش - على رأى واحد صاحبى - لأنهم موجودين من قبل الفضائيات .
ده مبدئياً مدخل كده توضيحى
مقدمة : قصة قصيرة جداً
ولد صغير عنده خمس سنين اخوه الكبير كل ما يشوفه يقوله انت انسان ألى , أنت أنسان ألى . فالولد الصغير يقوله : لأ انا مش انسان ألى . فراح اخوه الكبير قاله : لأ انت أنسان ألى و عايز تتأكد , روح اسئل ماما . عارف حتقولك أيه ماما ؟ ... ماما حتقولك امشى يلا و بلاش هبل .
فالولد الصغير راح لمامته و سئلها : يا ماما , هو انا انسان ألى ؟
ردت امه : امشى يلا و بلاش هبل . راح الولد مصدق اخوه لأن مامته قالت زى ما قال بالظبط , و الولد قعد يعيط لانه صدق انه انسان ألى .
عايز اقول ايه ؟
اقولك
بالنوسبة لموضوع السراديب المليانة اسلحة , الطبيعى ان لو سئلت واحد مسيحى : هو عندكم أسلحة مستخبية فى الكنايس و الأديرة و عندكم ألوية تدريب ؟ و انت مقتنع بالفكرة حتقول فى سرك أكيد حينكر . و اول ما يقولك المسيحى : لأ معندناش . تروح انت قايل فى سرك " شفت بقى اهو انكر , يبقى عندهم فعلاً اسلحة "
الموضوع بالنسبة لى ظريف و كنت بعمل حاجة يمكن انت تستغربلها
لما كان شخص مسلم يسئلنى السؤال ده و انا فى الكلية كنت بسكت و أقلب وشى و اعمل نفسى غضبان و أروح واخده على جنب و اقوله : انت جبت الكلام ده منين ؟ و عرفت السر ده ازاى ؟ متكلمش فى الموضوع ده تانى علشان متروحش فى الرجلين , انت حبيبى و مش عايزك تتأذى , الى بيعرف السر ده بيخلصه منه . الولد كان بيبلم و يسكت و يتخرس خالص . عارف ليه كنت بعمل كده ؟
لأن الذهنية الى تفكر فى وجود اسلحة فى الأديرة و الكنايس بتبقى حاجة من الأتنين :
يا أما عايز يخاف مننا و خلاص .... سواء خوف مننا من ناحية قوتنا او خوف من ناحية اننا ممكن نخون و نغدر فى أى لحظة .
يا أما ذهن بيبحث عن معادل موضوى و مكافىء للشر الداخلى جواه . يعنى احنا عندنا أرهابيين و أنتم عندكم اسلحة و نبقى خالصين .... أحنا أشرار و أنتم أشرار و نبقى خالصين .
علشان كده كنت برد عليهم الرد الى فات .
لو عايز تخاف , خاف براحتك و انا مش حطمنك بدل انت مخونى و بتتهمنى بالباطل .
و لو عايز تقتنع انى شرير و ارهابى زيك مش مشكلة أقتنع , بس ده اعتراف ضمنى انك " شرير و أرهابى " فعلاً .
معلش المقدمة طويلة جداً

عباس العبد said...

أرد بقى
-1-
شوف يا سيدى اول هام : بالنسبة لموضوع التبشير
احلال على بلابله الدوح ... حرام للطير من كل صنف ( تقريباً كده البيت صح ) .
الصراحة انا مش شايف أن التبشير ده مشكلة , ده لسه كل الجرايد المصرية و العريبة و كل المواقع الدينية مهللة ان عدد المسلمين تفوق على عدد الكاتوليك , و مقلناش ان ده تبشير و لا حد علق . و كل ما حد يتحول الى الأسلام يقولوا حرية شخصية و هداية , و لو حد تحول للمسيحية يبقى عميل و خائن . و بعدين التبشير حاجة مش حرام , ده البوذيين بيبشروا يا راجل . فانا مش فاهم قضية التبشير مشكلة فى ايه ؟
اما لو بتتكلم عن وسائل التبشير و الأساليب المستخدمة و اعتراضك عليها , فانا معنديش اى فكرة عنها و مش مهتم بيها و لا حهتم فى يوم من الأيام , لكن كل الى حقولهولك أن اى حاجة ضد الأخلاقية الانسانية و ضد كرامة الانسان بتمارس فى وسائل التبشير تبقى غلط و بدينها بشدة . بس
-2-
تانى هام : حكاية الأقباط تمسكنوا حتى تمكنوا , انا مش فاهم قصدك من وراها بالظبط . لكن انا معنديش مشكلة انهم يتمكنوا , بس من ايه ؟ انت تقول بقى أنت الى عارف . بس اوعى تقولى تمسكنوا لحد ما تمكنوا من " بناء الكنايس و شغل الوظايف العامة , و انهم ياخدوا حقوقهم و يبقى ليهم كلمة مسموعة " . علشان دى تبقى مصيبة حضرتك أنهم يتمسكنوا لحد ما يتمكنوا من انهم ياخدوا ابسط حقوقهم لان ده معناه " كم من الاضطهاد رهيب واقع على عاتق الأقباط " .
-3-
تالت هام أو اهم هام فيهم :
كل ما حد يتكلم على المسيحيين و يحب يخوفهم و يخضهم و يربكهم و يعمل قال يعنى فقسهم و عرف فولتهم و قرش ملحتهم , يروح جايب سيرة الثالوث ( يمكن علشان عقيدة مسيحية و لا حاجة ) . ثالوث وفاء قسطنطين و اقباط المهجر و الاستقواء بامريكا .
-أ-
مثال صغير حيفهمك قصدى
أقباط المهجر مطلعوش بيان يدين تفتيش البابا فى مطار هيثرو . معنى كده حاجة من تلاتة:
يا أما هم لا يتبعوا البابا ,
يا أما هم بيلعبوا سياسة بس و فى أيدين امريكا علشان كده متكلموش عن الحادثة ,
يا أما فعلاً هم علمانيين حقانيين ديموقراطيين و فعلاً عارفين اجراءات المطار علشان كده متكلموش , و بما انهم حقانيين يبقى الى بيقولوه عن مصر صح و اكيد و انه فعلاً بيحصلنا – نحن مسيحيو مصر - مصايب .
لو أخترت الأولى و التالتة يبقى مفيش مشكلة , لو اخترت التانية و موضوع امريكا , يبقى مشكلتك هناك مش فى مصر و محدش يصدعنا بيها تانى . لأن مصطلح اقباط المهجر مصطلح حكومى صرف . عمرك سمعت عن كاتوليك المهجر او بروتستانت المهجر او مارون المهجر او مسلمين مصريين المهجر او سويدى المهجر او دانماركى المهجر ؟
مايكل منير لما جه مصر اتمسخر و سافر يا مولاى كما خلقتنى و اكيد لو متابع انت عارف سعيه لمقابلة جمال مبارك . يعنى توجهاته واضحة
-ب-
وفاء قسطنطين
وفاء قسطنطين , بس ؟؟؟!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
مش كان شيخ فى الموضوع ؟ و لا هو أتبخر و فضلت هى , الجانب الاخر من الحكاية ؟ و لا علشان الأعلام ركز على الولية و ساب الراجل , يبقى خلاص , نتكلم على وفاء و بس . لو مشكلة اعلام , يبقى الاعلام الغربى صحيح برضه لانه بيركز على ان المسلمين فى مصر وحشين و بيضايقونا و مش بيجيب نص الحكاية التانى . يا مامى من المسلمين .
مفيش حد فى مصر عارف القصة كاملة و أتحداك لو تقولى تفاصيلها و الشيخ الى أتذكر فى الجرايد اول 3 ايام و بعد كده كله سكت و كله اتبخر و فضلت وفاء لوحدها .
انا قلت رأى فى وفاء
هى تأسلم , جوزها القسيس يأسلم , البابا شنودة نفسه يأسلم , هو حر
نحن لا نؤمن لا بوفاء و لا بالقسيس و لا بالبابا شنودة
نحن نؤمن بالله الحى الكامل الكائن قبل كل الدهور خالق السموات و الأرض . و روحه الساكنة فينا . بس .
-ج-
انا و اخويا على أبن عمى و انا و ابن عمى على الغريب .
الاستقواء بامريكا
كلمة يا امريكا فينك فينك ... امن الدولة بينا و بينك
دى الى نشرتها بس جريدة الأسبوع و مش حقولك على جريدة الأسبوع و مدى " المصداقية الصحفية " الى بتتمتع بيها . لكن انا حفترض انهم فعلاً قالوها و مش بس قالوها دول يقصدوها كمان , ماشى .
المفروض لو حصلت مصيبة لواحد فى اى حتة فى مصر يستنجد باخوه الى هو جاره , قريبه , زميله صاحبه أى حاجة , و لو حصلت ليهم مصيبة كلهم يبقوا أيد واحدة على الغريب .
يعنى المفروض لو حصلت مصيبة للمسيحى فى مصر يقف جنبه مسيحى اخوه مثلاً ( و لو ان فى مسلمين أقرب للمسيحيين من مسيحيين تانيين كتير – انا شخصياً الى كنا واقفين مع بعض علطول انا و شخص مسلم عزيز على و صديق وفى بمعنى كلمة الصديق ) , فالمفروض لما تحصل مصيبة للمسيحيين فى مصر الى طبيعى يقف جنبهم هم ولاد عمهم المسلمين ( مجازاً لاننا اخوات و مش بقولها مجاملة لانى مؤمن بيها مش مصدقها بس ) , لكن لما يستقووا بالغريب حسب كلامك ده معناه حاجة من الأتنين :
ياما فشل نظام الدولة و الحكومة فى انه يجيب لكل شخص حقه و يدافع عن الجميع بغض النظر عن دينه او طبقته او مستواه المادى او العلمى أو اى اعتبار اخر .
يا اما اخوتهم او ولاد عمهم ( الى هم فى حالتنا حسب كلامك المسلمين ) جماعة من الظلمة و الأشرار و المُضطَهِدِين الى بيمارسوا اقصى درجات العنف علي المسيحيين و يبقى الطبيعى فى الحالة دى انهم يستقووا بالاخر الغريب لأنه اكيد مش حستنجد بواحد بيكرهنى و بيظلمنى .
اختار و اختيارك حيشرح كل حاجة .

عباس العبد said...

طبعاً مش معنى كلامى ان المسيحيين فى مصر ملايكة و المسلمين اشرار . أو معنى كلامك مثلاً ان المسلمين ملايكة و المسيحيين أشرار . انا فاهم قصدك طبعاً .
لكن المشكلة عارف فى أيه ؟ ان المسلمين بيتعاملوا مع المسيحيين المصريين على انهم حالة خاصة و المفروض يتحطوا فى فاترينة , و بينزعوا عن المسيحيين المصريين حاجة مهمة جداً و هى دى الى عامله المشكلة من وجهة نظرى .
المسلمين فى مصر بينزعوا عن المسيحيين المصريين حاجتين مهمين جداً .
الأولى مصريتهم و بيحولوهم لحالة خاصة فى مصر ,
والحاجة التانية الى بينزعوها هى انسانيتهم الكاملة يعنى حقنا فى اننا نكون بنى ادمين ناكل و نشرب و نعمل الصح و نعمل الغلط .
المسلمين فى مصر " عقمونا " فرضوا مع نفسيهم كده ان المسيحيين يبوسهم و يحطوهم جنب الحيط و هم لا حيعملوا حاجة صح و لا يعملوا حاجة غلط ؟ ازاى يعنى ؟ احنا زيينا زيكم بنى ادمين بنعمل الصح و نعمل الغلط , و من حقنا نغلط و تسامحونا و انتم تغلطوا و نسامحكم و منقفش لبعض على الواحدة . احنا بنى ادمين و البنى ادم مش كامل و ميعرفش كل حاجة , يعنى ممكن نغلط و نكدب و نسرق و نخون و نستعدى و نبقى صيع ., و من حقنا برضه طيبين و كرمى و وطنيين و شرفاء و طاهرى اليد و محترمين , و لا احنا مش من حقنا نبقى بنى ادمين ؟ و لا انتم البنى ادمين بس و حقكم تعملوا الغلط و الصح ؟ لأ من الحق المسيحى زى من حق المسلم انه يغلط و يعمل الصح .
هو مفيش مسلم و لا مسلمين بيستقووا بامريكا ؟ و لا فى مسلمين خانوا مصر و قبضوا من أسرائيل ؟ و لا مفيش مسلمين سرقوا بنوك و هربوا ؟ و لا مفيش مسلمين كرهوا مسيحيين و اضطهدوهم و اعتبروا فلوسهم غنيمة ؟ فى طبعاً ., و فى كتير و اكتر مننا كمان . عارف ليه ؟ لان زى ما حضرتك قلت , نسبتكم اكبر , يبقى نسبة الشر فيكم حتبقى اكبر من نسبة الشر فى المسيحيين بحكم العدد .
عايز اقول زى ما المسلم بيخون المسيحى بيخون , زى ما المسلم بيسرق المسيحى بيسرق , زى ما المسلم بيقتل و يكدب و يشتم المسيحى نفس الحكاية , دى طباع بشرية و بيتساوى فيها الجميع .
دى المشكلة , فى ناس حاطة صورة معينة عن المسيحى و مش عايزة تغيرها , و لا ناوية تغيرها و لا عندها أستعداد تغيرها . هى حرة , رأيها و محدش يقدر يرفضه و لازم تحترم وجهة نظرهم و نسمعها و نقيمها و نستفيد منها . الصورة دى صورة معقمة , لازم المسيحى يبقى طيب و كويس و هادى و يسمع الكلام و يقول حاضر و نعم و ميرفضلناش طلب و لما نقوله حارب حارب , أسكت يسكت , تقول حاضر و امين : انت كافر حاضر , انت وحش حاضر , انت تتسرق و فلوسك تبقى غنيمة حاضر , أنت عميل حاضر , أنت خاين حاضر , عايزنا دمية فى ايديهم , و قوالب جاهزة لأفكارهم ...... لكن لما اكتشفوا اننا " بنى ادمين , بشر , انسان " بنعمل الصح و الغلط ونطالب بحقوقنا زينا زى أى مواطن عادى و زى اى بنى أدم تانى و بنقول لأ و مبنقولش حاضر و امين و كمان بندافع عن نفسنا و مبنسكتش .... يعنى بوظناها من كله . قالم لأ بقى , دول وحشين و خونة و عملاء , دول ناقص كمان يطلبوا يبنوا كنايس او يقولوا نتعين فى الوزارة , ده كله كوم و ناقص و دى المصيبة و الطامة الكبرى , و من دلائل علامات الساعة أنهم يقولوا عايزين نصحى الصبح و ننام بالليل زيينا زى المسلمين . دى القطة اكلت عيالها يا ولاد , دى الروس اتساوت . يا دى المصيبة .
أحنا طبيعيين جداً صدقنى و لا بنعض و لا عندنا أمراض و لا مجانين و لا حاجة , بناكل و نشرب و ننام و نناضل و نبكى و فينا وحشين و كويسين عاديين و فينا وطنيين و بيحبوا مصر و فينا خونة و عملاء و فى كمان مننا أبيض و أسود و فى كمان منقط بنى على أحمر .
---
جايز اكون صح و جايز تكون انت غلط
و جايز اكون انا غلط و انت صح ؟
مش انت بتقول كده
الجملة الى فاتت دى غلط
لا انا صح مية فى المية و لا انت غلط مية فى المية
الغلط و الصح نسبى , يعنى فى نسبة من كلامى صح و نسبة من كلامى غلط ... و فى نسبة من كلامك صح و نسبة من كلامك غلط ....... و لازم نبحث عن المشترك و نتلاقى فيه , هو ده الكلام .
و عزومة عربية الكبدة و السباتس على انا يا ريس .
و تقولى : كل سنة و أنا طيب
و اقولك : و انت بالصحة و السلامة
غصب عن عين التخين .

عباس العبد said...

بنت القمر
دى بقى مش فاهمها خالص ؟؟؟؟؟؟
و انت طيبة .
=========
زمان الوصل
و انت طيبة يا فندم و لا يهمك , الحاسوب يتأمر على المسيحيين لمنع التهنئة بالعيد . مؤامرة صهيونية واضحة جداً . ههههههههههههه
=========
بدون الدخول فى أى تفاصيل شخصية و محدش يفهم أنى بدخل فى مسائل دينية . رسالة الى محمود المصرى و حفصت
سؤال شخصى جداً و بدون زعل .
ليه كل واحد فرض أنه كلامه " مرجعية " و أنه كلامه غير قابل للنقاش لأن كلامه هو " الصح " ! . ليه كل واحد متوقعش أن التانى حيرد عليه و طبيعى انه يرد ! . الصراحة دى انا مش فاهمها و مش عارف أزاى عديت عليكم دى .

^ H@fSS@^ said...

والله يا رامز روح شوف مين اللي ابتدى بجر شكل التاني و مسك له على الكلمة و ماشي حسب منطق انا صح و غيري غلط و بالتالي لازم ينفد كلامي و يفنطه
شوف انت مين اللي بدى
و كلها شبة جملة اللي انا قلتها مش حتى جملة بحالها
و مقولتش حتى المسلمين كلهم لاني انا من المسلمين لكن قلت الفئة الضالة
يعني شريح معين فقط
و المثل بيقول
اللي على راسه بطحة يحسس عليها

Unknown said...

:رامز باشا

يااااااااااااااااااه
ده واضح انك ضارب 5 كيلو فسيخ ورنجة ومعاهم 10 كيلو ورق عنب ومعيد قبلهم بأوزى صغير وقفلت ده كله بصندوق سبيروسباتس

كل ده رد؟؟؟؟؟؟؟؟؟؟؟؟؟
ده أنا هنجت على ماجبت أخره
..............................

أول حاجة : رجاء اغلاق موضوع نوارة..ينفع أعاتبها أولا دى حاجة بينى وبينها وأنا غلطت انى عاتبتها هنا والموضوع اتقفل بينى وبينها خلاص فبلاش نجيب سيرة الموضوع ده تانى عشان أحد أو احدى ضعاف النفوس حاولوا يعملوا بيننا مشكلة بسبب البوست ده
أنا باحترم نوارة وهى من أفضل المدونات عندى و أى عتاب بينى وبينها حايكون عندى أو عندها

................................

موضوع المسلم الماليزى والمسيحى المصرى دى تخريفة من تخريفات مهدى عاكف..وانت أكيد متابع وعارف ان الراجل ده بيخرف فى أكتر من نصف كلامه..ومهدى عاكف والاخوان ليسوا حجة على الاسلام يا رامز..مش موضوع صحيح الدين ولا غيره...دول مجرد جماعة..زى جماعة أقباط المهجر اللى انت مش عايز تعترف بيها...وهما برضه مش لصوص دهب يا رامز..اللى كان بيسرق الدهب ويحرق نوادى الفيديو كان والله أعلم جماعة التكفير والهجرة اللى قتلوا الشيخ الذهبى..والله أعلم هل كلهم مسلمين ولا كان فيهم مسيحيين..أكيد تابعت مؤخرا قضية الكام عيل الأقباط اللى كانوا فى مطروح بيعملوا منشورات طائفية ورسائل تهديد باسم جماعات اسلامية..يعنى لا المسيحى مضمون انه مسيحى ولا المسلم مضمون انه مسلم..فاهم قصدى؟
الاخوان ليسوا حجة على الدين لاهما ولا مدوناتهم يارامز..ومحاولة ربط كل المواضيع بالاخوان فى رأيى محاولة ذات غرض شرير

انت اللى وزنت بالكيلو ياباشا...لما أنا باقول لك معدل تكفير المسيحيين للمسلمين والاستقواء بالغرب زادت مؤخرا ترد انت وتقوللى طب وقبل كده مين كان بيستقوى بماليزيا والسعودية وبيسرق دهب...يبقى انت اللى بتعمل كفتين وبتنصب ميزان يا رامز...واضح قصدى؟
ويبقى انت برضه بتحلل ده وبتقول صراحة انكم قادرين دلوقتى تعملوا كده لكن قبل كده ماكنتوش قادرين...يعنى اتمسكنتوا لحد ماتمكنتوا...ده برضه طبقا لكلامك...فهمت دى كمان؟
...........................
موضوع الأسلحة السرية اللى فى الكنايس ده ولا يفرق معايا ببصلة...ولا أنا خايف منكم ولا ممكن أخاف..وبرضه أنا كمسلم مش شرير وباسقط عليكم شرى...أنا قلت الجملة فى سياق استنكارى لو انت مصدق ان المسلمين لصوص دهب يبقى أنا اصدق ان المسيحيين مجرمين ورجال عصابات..بس اللى أنا متأكد منه شخصيا ان المسلمين مش كده ولا المسيحيين كده وان دى مجرد خرافة يتناقلها بعض الجهلة مثلها مثل خرافة الأحجبة وأعمال السحر الأسود التى يمارسها القساوسة ضد المسلمين ولبسهم الزى الأسود حدادا على دخول الاسلام مصر

.......... يتبع

Unknown said...

:- موضوع التبشير

الحقيقة أنا مصدوم فى رأيك...ليس من حقك ولا حق غيرك التبشير يارامز...لأن معنى التبشير انى بافترض الضلال والكفر فى اللى بابشره وده عكس كلامك...ولا المسلم من حقه يبشر بالاسلام داخل مصر ولا المسيحى من حقه يبشر بالمسيحية داخل مصر....صحيح ربنا سبحانه وتعالى بيقول : "ادع الى سبيل ربك بالحكمة والموعظة الحسنة" صدق الله العظيم..بس أنا أروح أبشر فى أسيا أو افريقيا أو أوروبا..لكن جوه مصر لا وألف لا لأنى كده باهد بنية اجتماعية وكيان مجتمع كامل...ولا من حقك ولا من حقى..كون واحدة تسلم عشان تتجوز واحد ولا تتنصر عشان تتجوز واحد تانى دى حالات فردية خايبة..لكن أستغل فقر الناس و أبشر بالمسيح زى ما اتعمل مع الواد الخايب بتاع كفاية وزى مابيتعمل فى كذا منطقة فقيرة فى مصر ولا أستغل براءة أطفال فى مدارس عشان أبشر بالمسيح...ده يبقى شر وكره وغباء

وبعدين لما انتم شايفين ان التبشير حلال..ليه بابا الأقباط شنودة رفع قضية على زغلول النجار لما قال ان الكنيسة بتبشر؟ ده المفروض يشكروه بقى

.................
يتبع......

Unknown said...

موضوع وفاء قسطنطين مايهمنيش اذا كان فيه شيخ ولا قسيس..مايهمنيش أسلمت ليه أساسا...لكن يهمنى انك تمسكت بواحدة رافضاك...لو هى مسلمة ولا زالت على اسلامها عن قناعة وانت ككنيسة خدتها بقوة أمن الدولة حبستها فى دير سواء وادى النطرون أو غيره...يبقى ده ارهاب وكره لللأخر

لو هى أسلمت لسبب دنيوى أو جنسى ورجعت للمسيحية يبقى مع ألف سلامة ولو الأزهر اتمسك بيها يبقى ارهاب من الأزهر

المشكلة : فين هى وفاء قسطنطين ؟ ماطلعتش ليه تقول اختيارها؟
ماتقولليش خايفة لأن الواد بتاع كفاية هو ومراته طلعوا فى كل الفضائيات شتموا فى الاسلام واتغزلوا فى المسيحية ماحدش عمل لهم حاجة

ياراجل ده أيام وفاء قسطنطين كان ليا زمايل مسيحيين مابيردوش عليا السلام و مايرضوش ياكلوا معانا نحن معشر المسلمين وبيعتبروا ده جهاد فى سبيل المسيح
...................
أقباط المهجر دول لعبة كبيرة نتكلم فيها بعدين...موقف تفتيش بابا الأقباط ليه تدوينة عندى ابقى بص عليها...أنا أميل لمزيج من اختياراتك الثانى والثالث...وخليك فاكر ماحدش حقانى طول الوقت
.....................
موضوع الاستقواء بأمريكا فيه اختيار ثالث لم تذكره أنت وهو أن يكون أولاد العم (اللى هما فى حالتنا الأقباط) بيكرهوا ولاد عمهم (المسلمين) ومش قابلين منهم أى مساعدة وكارهينهم وشايفين ان البلد بلد الأقباط والمسلمين مجرد غزاة محتلين لابد من محاربتهم حتى لو تحالفوا مع الشيطان مش أمريكا بس

ده احتمال ثالث عشان تبقى كل الاحتمالات متاحة...ومش ده اختيارى عشان ماتفهمش غلط

....................

أتفق معاك فى باقى كلامك

الا قول لى : انت أبيض و أسود ولا منقط بنى على أحمر؟

تحياتى

عباس العبد said...

بالنسبة لموضوع نوارة :
انت الى فتحت الموضوع , انا مجبتش سيرته فى التدوينة و لا جبت سيرتها و لا اتكلمت عليها , انت الى فتحت سيرتها و انا مليش دعوة و بعدين انا مغلطش فيها و لا اتكلمت عليها بالوحش و لا بالغلط . انت الى فتحت الموضوع و انت الى تقفله .
---
عن الوزن بالكيلو
انت مصمم انى انا الى وزنت !!!!
" لكى تكون منصفا يا رامز لابد أن تعترف أن نسبة تكفير المسلمين فى وساط المسيحين ارتفعت بشدة فى السنوات الأخيرة...بل ان هناك طوائف كاملة لا تعترف بالمسلمين أساسا لأنها لاتعترف بسيدنا محمد صلى الله عليه وسلم .
وازدادت بشدة بعد نغمة الاستقواء بالغرب المنتشرة بين أوساط بعض المسيحيين هذه الفترة .
طبعا تكفير الأخر سواء كان مسلما أو مسيحيا لن يكون فى صالح الوطن على أية حال...بس لزمتها ايه النقطة دى فى يومين الأعياد دى؟ "
مش ده كلامك و أول رد ليك على التدوينة ... صح ؟. مين الى جاب سيرة التكفير و نغمة الأستقواء !!! فى الرد ؟ أنت .
أيه علاقة كلامك ده بالتدوينة ؟ أنا مجبتش سيرة تكفير حد لحد . انا كنت بتكلم عن " دلالة لفظ " فى الفكر الشعبى . أنت الى أتكلمت عن نسبة تكفير و أستقواء , أنا برد على كلامك . أنت الى " غرفت و وزنت و طرحت قدامى الكلام " و انا رديت و قلتلك مش بالكيلو , أبقى أزاى أنا الى بديت بالكلام ده . انا رفضت الكلام ده و قلت فى أول رد لى :
" كى تكون منصفا يا رامز لابد أن تعترف أن نسبة تكفير المسلمين فى وساط المسيحين ارتفعت بشدة فى السنوات الأخيرة "
طيب و السنوات الى قبليها , مين الى كان بيكفر مين اكتر ؟ و بيستحل دمه و بيستقوى بماليزيا و السعودية و بيسرق محلات دهبه ؟ ؟؟؟؟؟؟؟؟؟؟؟؟؟؟؟؟؟؟؟؟؟؟؟!!!!!!!!!!!!!!!!!!
مش بالكيلو هى , الى يوزن اكتر يشيل , و بعدين انا متكلمتش عن التكفير , انا كنت بتكلم عن حاجة معينة . راجع ردى على محمود المصرى "
ده ردى بالظبط , رفضت كلامك و شرحت أن ملوش دعوة بالتدوينة و بقية النقطة علقت على الميل و العيد و شم النسيم
رحت أنت راجع قايل فى ردك التانى :
" أه بالكيلو يارامز...مادمت انت عاوز توزنها كده بمثالك المغلوط ..."
و رحت انت مصمم على انى وزنت ب" مثالى المغلوط " .... هو انا الى فتحت الموضوع !
و رحت متكلم أنت عن ماليزيا و أمريكا و وفاء و زكريا بطرس و فتح سيرة الدين و المقدسات الأسلامية و حولت الموضوع لحديث دينى انا مجبتش سيرته أساساً و انا مكنتش بتكلم عليهم و لما شرحتلك و وضحتلك بعد كده طلعت عارف موضوع مهدى عاكف و ماليزيا فانا مش عارف لما انت عارف الموضوع سئلتنى فيه ليه ؟, و برضه مصمم انى انا الى بوزن بالكيلو .
زى موضوع نوارة , انت الى فتحته و بتطلب منى حسب نص كلامك:
" أول حاجة : رجاء اغلاق موضوع نوارة..ينفع أعاتبها أولا دى حاجة بينى وبينها "
بتطلب منى أنى انا الى أقفله و أنا بجبش سيرتها اساسا فى المدونة .... هو انا الى فتحته !
خلاص أنت شايف أنى بوزن بالكيلو يبقى خلاص .... انا بوزن بالكيلو يا سيدى .
----
جماعة أقباط المهجر أنا مش عايز أعترف بيها
خلاص يا سيدى انا معترف بيها .... ممكن تقولى ايه الفرق بين أعترافى و عدم اعترافى ؟ يعنى لما أعترف بيهم مثلاً حيفرحوا و يقولوا الحمد لله رامز أخيراً اعترف بينا , ان شالله يولعوا بجاز انا مالى بيهم , الى قرفان منهم يروحلهم امريكا يشتمهم و يسبلهم كمان زى ما هو عايز . و انا مالى هو انا مسئول عنهم . يعنى أيه مش عايز تعترف بيهم ؟ أنا مش فاهمها .
----
انا لا ربط حاجة بالاخوان و لا قلت انهم حجة على الدين , انا اديت مثل و معممتش زى حضرتك , أنت الى عممت :
" كى تكون منصفا يا رامز لابد أن تعترف أن نسبة تكفير المسلمين فى وساط المسيحين ارتفعت بشدة فى السنوات الأخيرة " .... مش كلامك ده
انا اديت مثل فقط مش تعميم لأنى ما بوزنش كله مع بعضه .
---
سرقة محلات الدهب
بينى و بينك فتاوى الجماعات الى قامت بالسرقة , و دى مش حاجة تعيب الأسلام . دى جماعة خارجة , تعيبك فى أيه علشان تبقى محموق قوى و أنت بتدافع عنها ؟ أول مرة اسمع قضية مطروح دى منك . حشوفها .
----
" ما أنا باقول لك معدل تكفير المسيحيين للمسلمين والاستقواء بالغرب زادت مؤخرا ترد انت وتقوللى طب وقبل كده مين كان بيستقوى بماليزيا والسعودية وبيسرق دهب...يبقى انت اللى بتعمل كفتين وبتنصب ميزان يا رامز. " !!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
مش ده كلامك . شفت بادى بايه ؟ " لما انا بقولك " أنت الى أبتديت بأعترافك اهه و بعدين انا قلت " ترد انت وتقوللى " صح , مش كلامك برضه !!!!!!! علشان مبقاش بوزن المفروض انى مردش عليك مثلاً . و لما ارد ابقى بعمل ميزان !!!!!!!! ما هو انا لازم حرد علشان حضرتك سئلت . علشان كده انا اديت مثال الولد الصغير بالروبوت فى الأول . انت تتكلم , و لو انا رديت أبقى انا غلطان !!!!!!!!!!!! تيجى ازاى دى ؟
------
موضوع الأسلحة ده انا مقلتهوش على لسانك انا عملته مقدمة لكلامى , شوف فى اخر جملة انا قايلها فى المقدمة ايه . " معهلش المقدمة طويلة جداً " . انا واخد بالى انك بتدينى مثل بموضوع الأسلحة ده , أنا فاهم .
----
التبشير
مصدوم فى ايه ؟
انا لا جبت سيرة التبشير فى مصر و لا قلت انى بفضله و لا بدعو اليه , انا بتكلم عن التبشير فى المطلق و فى حق التبشير للجميع و لما اديت مثال اديته بالديانة البوذية علشان محدش يفهم انى بتكلم عن دين معين . هو فى تبشير بوذى فى مصر !!!!! .
و انا أتكلمت و كتبت قبل كده عن جملة محمد سليم العوا و نظريته فى التبشير و أنها أصح نظرية و مقنعة جداً اننا نبشر الاول الى ميعرفوش ربنا . طلعلى كلمة " التبشير فى مصر " قلتها فى التدوينة أو حتى فى الردود .
و بعدين انا قلت ما نصه بالظبط :
" أما لو بتتكلم عن وسائل التبشير و الأساليب المستخدمة و اعتراضك عليها , فانا معنديش اى فكرة عنها و مش مهتم بيها و لا حهتم فى يوم من الأيام , لكن كل الى حقولهولك أن اى حاجة ضد الأخلاقية الانسانية و ضد كرامة الانسان بتمارس فى وسائل التبشير تبقى غلط و بدينها بشدة . بس "
يعنى الى انت قلته عن :
" لكن أستغل فقر الناس و أبشر بالمسيح زى ما اتعمل مع الواد الخايب بتاع كفاية وزى مابيتعمل فى كذا منطقة فقيرة فى مصر ولا أستغل براءة أطفال فى مدارس عشان أبشر بالمسيح...ده يبقى شر وكره وغباء " .... مش كلامك ده ؟
و كلامى الى فوقيه بيدين أساليب و وسائل التبشير السيئة و الحقيرة و القذرة و " شر و كره و غباء " , يعنى متفقين . ممكن أفهم انت أتصدمت فى ايه ؟
------
وفاء
" لكن يهمنى انك تمسكت بواحدة رافضاك "
مين قالك انها رافضانا ؟ انت قابلتها ؟, و الراجل الى غير بطاقتها و كان يتجوزها حسب كلام الجرايد و حسب كلام امن الدولة انهم لقوها متخدرة فى شقة و فى حالة أغماء و جابوها و فوقوها فى الكاتدرائية و خرجت قالت أنها حتفضل للأبد مسيحية و انها محتاجة تقعد فى الدير فترة . مش ده الى كتبته كل الجرايد فى اخر القصة ؟و لا انا مألفه دلوقتى ؟ محدش يعرف القصة الحقيقية كاملة و محدش حيعرفها , فأى حد بيلقى كلام كده من غير وثائق , حقوله الوثائق الوحيدة الموجودة هى كلام الجرايد , تقبله , حيقولى لأ طبعاً .
عارف لما كنت بتسئل و حد يقولى كلامك ده كنت بقوله ايه ؟
لما حد يقولى اننا خاطفينها و حطينها فى دير , كنت بقوله يب تقول الكلام ده , انتم ناس تؤمن بالجهاد , انا لو مكانكم و فى مسيحى مخطوف , لو مكانكم أقتحم الدير و أحررها . عايزنى ارد اقوله أيه ؟ تفتكر . واحد مصمم على رأيه و مقتنع بيه بدون أى دليل , حقوله أيه ؟ كلامك صح احنا خاطفينها , روحوه حرروها . تفتكر أرد أقول أيه ؟
و بعدين أنا قلت رأى فى الأسلمة
" هى تأسلم , جوزها القسيس يأسلم , البابا شنودة نفسه يأسلم , هو حر
نحن لا نؤمن لا بوفاء و لا بالقسيس و لا بالبابا شنودة "
----
مفيش بنى منقط أحمر
الكلمة أتكتبت غلط
هى ازرق منقط احمر .
و فى أكيد ازرق منقط احمر طبعا بس ده انت متقدرش عليه . هههههههههههه
انت عارف يعنى أيه أزرق منقط احمر الأول ؟
--------
شوف يا م5م
حقولك حاجة انا قلتها فى المقدمة الطويلة بتاعتى
فى ناس مقتنعة بحاجات معينة فى المسيحيين و مش حيغيروها و انا معنديش مشكلة معاهم . مع نفسيهم و انا احب أريح الناس . الى مش عايز يقتنع هو حر . احب اريح الزبون .
انت شايف انى بوزن بالكيلو و ان نسبة تكفير المسلمين زادت وسط المسيحيين و اننا بنكرهم . كلامك صح
انا بوزن بالكيلو و أحنا بنكرهكم يا عم و امشى من هنا بقى علشان مش عايز مسلمين فى المدونة . هو محمود المصرى بس المسلم الوحيد الى من حقه يتكلم عندى ؟ حتقولى ليه . حقولك علشان هو خاين و عميل و احنا زى ما انت عارف خونة و عملاء و بنستقوى بالغرب . يلا من هنا بقى
هههههههههههههه

محمود المصرى said...

بسم الله الرحمن الرحيم

احرام على بلابله الدوح حلال للطير من كل جنس
كل دار احق بالاهل الا فى غريب من المذاهب رجس
بالنسبة لموضوع التنصير دا ان شاء الله هاكتب عنه موضوع لأنه فعلا ملف مهم
بس برضه ماعرفناش لغاية دلوقتى ايه اخبار المبادرة انا هاعمل اعتصام فى المدونة عندك لغاية ما نعرف الاخبار والنتيجة ولا هو شغل كوسة من اولها ؟ ( واحد مكشر عن انيابه )
بالنسبة لموضوع وفاء هو مين الشيخ اللى تقصده ؟ انا سمعت فقط ان اشاعة قالت انها كانت على علاقة بزميل لها فى العمل , ودا ضمن اشاعات كتير منها اشاعة لقمص شهير ادعى ان المسلمين الارهابيين الوحشين خطفوها وصوروها فى اوضاع فاضحة وبعد كده اجبروها انها تمضى على شيكات وبالتالى اضطرت تعلن اسلامها , فكل الكلام دا اتقال كتير ولم نعلم له دليل , والحل كان ابسط ما يمكن اى ان وفاء قسطنطين تطلع على التليفزيون او اى وسيلة اعلام عامة وتوضح موقفها بكل شفافية , لو كانت اكرهت المسلمين هايسكتوا ولو كانت عاوزة فعلا تدخل الاسلام المسيحيين هايسكتوا , لكن الشحن لكل الاطراف والتعمية والتعتيم خلى كل واحد مقتنع بمعلوماته هو بدون الاستناد الى دليل .
بالنسبة بقى لسؤالك الشخصى جدا
من الطبيعى ان اعتبر رأيى هو الصواب والا لما اعتبرته رايى , يعنى ازاى اتبنى وجهة نظر شايف انها غلط ؟ لكن طبيعى ان اتصور ان هناك من يخالفها , لكن برضه ليا كامل الحق ان ارد على حججه فى مخالفة وجهة نظرى , وبالتالى وجهة نظرى ليست مرجعية لى لكنها مبنية على مرجعية ارجع لها , ولا يمكن ان اقر بخطأ رأيى الا فى حالتين :
اما ان المرجعية بتاعتى تثبت انها اصلا مرجعية فاسدة
واما ان يثبت مخالفة هذا الراى للمرجعية التى استند اليها
ومادام احد الامرين لم يتحقق لى كامل الحق ان اتبنى هذا الرأى وان ادافع عنه وان افند كل اعتراض عليه , ايه بقى المشكلة ؟

عباس العبد said...

محمود المصرى
مرحباً بالمسلم الوحيد المسموح له بالرد فى المدونة لأنه خائن و عميل " راجع ردى على م5م أحسن تفهم غلط " هههههههه.
انت كمان حتفتح ملف للتنصير . انا مش فاهم أيه مشكلة التنصير . هو التنصير أو المسيحية دى ده دعوة للزنى ؟ و لا لشرب المخدرات ؟ انا مش عارف الصراحة . أفتح يا سيدى ربنا يفتح عليك و بعدين أحنا مكناش بنتكلم عن التنصير , كنا بنتكلم عن التبشير . مش مشكلة . يلا
---
أقولك عن المبادرة
المعلومات بيتم تفريغها بس بما أن واحد الى بيقوم بالعمل فالوقت حيبقى طويل شوية و حتتنشر فى الموقع . اوعى تكون فاكرنا زى البعض ما قال بنتعامل مع جهات اجنبية و جهات امنية , الأتنين مع بعض شوف حلاوة اكتر من كده .
بالنسبة لموضوع المؤتمر , انا مش عارف حد رد عندك عن استفسارك الى وضعته فى التدوينة الى عندك بخصوص أشتراكنا فى المؤتمر , لأنى مش متابع الردود اوى نسيت اخد من الردود " فييد " لكن ممكن أقولك ببساطة ان كل الكلمة الى ألقتها المبادرة كانت مدتها 10 دقايق و بدعوة من القائمين عليه . بس
---
" فكل الكلام دا اتقال كتير ولم نعلم له دليل "
شفت انت قلت أيه ؟ قل م5م علشان يقتنع ان محدش يعرف الحقيقة أبداً . و بعدين تطلع فى التلفزيون ايه ؟ انت فى مصر يا بيه , اهم بلد فيها " شفافية " . أذا كانت الجرايد متعرفش , زميلها فى الشغل كانوا بيكتبوا قبل اسمه الشيخ و يقولوا " الشيخ فلان " و مش فاكر أسمه الصراحة .
" لكن الشحن لكل الاطراف والتعمية والتعتيم خلى كل واحد مقتنع بمعلوماته هو بدون الاستناد الى دليل "
مش حقول على الجملة دى غير الله يفتح عليك .
----
السؤال الشخصى جداً
مفيش مشكلة , كل الى بقوله ليه كل واحد متوقعش ان التانى طبيعى و لازم يرد عليه ؟ بس .

بنت القمر said...

الصراحة انا أبتديت اتشائم من المدونة و البوستات الى بكتبها و بفكر جدياً أحول للكتابة عن الفن الأصيل المتمثل فى صوت روبى و جسد هيفاء , او حتى أكتب عن اهمية تجارة المانيفاتورا و رؤية الأسد فى جنينة الحيوانات
*********************
شوف يا رامز يا ابني انا ها اقولك الخلاصه لاصه
لاصه
وهي
احيانا الكتابه عن الشأن علاقه المسلم وامسيحي
بيتقلب احتداد وومناوشات وتلاسنات وحزازيات واستعراض قوة
وضرب فوق وتحت الحزام مع خليط من البراءه والخبث حسن النيه والسمن البلدي الصناعي عديم الطعم والرائحه !!!
مهما حاولت الدعايه اقناعنا بالعكس
:))
*************
شوف يا ابني العزيز
كل الفكرة لو ركيزناها ها تتلخص في كلمتين
انت عاوز تشوف ايه في البلد دي؟؟
عاوز تشوف ان في ناس بتحبك وجايه تعيد عليك وهما ما يعرفوكش ولا عمرهم ها يشفوك اصلا ودي علاقه انسانيه اليكترونيه وده منتهي الانسانيه والرقي
ها تشوف كده
ولو عاوز تشوف انك عايش في بلد محطوط فيها في فاترينه ومطالب انك تكون الخير في وسط ناس مليانه خير وشر ومطلوب انك تكون الطيب الوحيد وحقوقك مهدورة ها تشوف كده
مش عاوزة اناقش تفاصيل ردود م5م او محمود او حتي كلامك
المهم لو انت تبنيت اي من الاختيارين السابقين هتلاقي الف دليل يدعمه
انك محبوب من غير غرض
او انك مضطهد وملعوم ومأزوم ومتكفر
واخيرا وليس اخرا
لو المدونه شؤم واتنحست بخرها
:))
يا ريت بس تكون متبع عندي
اصل انا عاملا احلي دماغ هناك
فيروز اناناس
لبان شيكلتس
وطرقع طرقع يا عم الحاج
خلوة ثقافيه لا تحتمل اي مهاترات
كل سنه وانت بالصحه والسلامه
م5م راجل زوق وعيد عليا
ومحمود المصري راجل دماغ برضه وخلي بالك ده بيعرف عبري وحكايته حكايه
ومتتخنقوش مع بعض يا ولاد العبوا بالراحه
تحياتي واحترامي ومودتي للجميع

Unknown said...

:رامز

على قدر كل مناقشاتى معاك ماشفتكش قبل كده متعصب ومشوش بالطريقة دى...قبل ما أرد (اذا كان مسموح لى الرد) حاعتبر كلامك الأخير خالص (من أول أريح الزبون) مجرد دعابة ولو انى ماتعودتش منك الدعابة التقيلة بالشكل ده...لو انت بتتكلم جد ياريت توضح لى
..................................
أنا أولا ملاحظ ان مين وزن بالكيلو ده مضايقك قوى...بالرغم انه تعبيرك انت مش تعبيرى....وأنا شرحت وجهة نظرى ان لما أقول لك حاجة بتحصل دلوقتى ترد انت تقول لى طب مانتم عملتم قبل كده يبقى ده نوع من "حاجة قصاد حاجة"..وده ميزان
لو الوزن والكيلو والكلام الفاضى ده مضايقك ياسيدى اعتبره رأى شخصى مايخليكش تتنرفز وتتعصب كده

وبعدين يارامز موضوع ماليزيا انت اللى قلته مش أنا زى مانت كاتب...ولما مهدى عاكف يبخ أى كلمتين مش معناه ان ماليزيا هى سند المسلمين
ولما أطلع عارف تصريح خايب مالوش لزمة تقوللى لما انت عارف بتسأل ليه عن ماليزيا؟ هى كلمة ماليزيا يعنى تصريح المرشد؟

كلامى خارج التدوينة؟ مش فاهم ازاى؟ حانقل نص كلامك فى صلب التدوينة :

كافر . من لوازم الايمان فى الاسلام : الاعتقاد بكفر غير المسلم . مسيحيا , يهوديا , بوذيا أو بهائياً . وهذا لا علاقة به لا بالتعصب ولا بالاضطهاد . كما يعتقد المسيحى , اليهودى , البوذى و البهائى بالبديهة بكفر المسلم

ده كلامك يارامز..ولاحظ جملة كما يعتقد المسيحى بكفر المسلم...وهى دى الجملة اللى أنا بديت بيها كلامى اللى بتقول خارج التدوينة...يبقى أنا غلطان؟
وافترض انها خارج التدوينة...هل هى من هوامشها ولا لأ؟ يعنى انت بتتكلم عن حرب الفضاء جيت أنا كلمتك فى الكورة؟..أنا خدت كلمة من عندك وبنيت عليها رد..وقلت لكى تكون منصفا لأنك ابتديت كلامك ان المسلم مقتنع بتكفير الأخر لكى يتم ايمانه

موضوع مطروح ممكن تاخد فكرة عنه من اللنك ده :
http://newsarabia.blogspot.com/2008/01/blog-post_27.html
..........................

أنا ماقلتش ان اعترافك بأقباط المهجر له دلالة...أنا قلت مامعناه ان زى مانت مش معترف بأقباط المهجر ومش عايز تاخدهم حجة على الأقباط-وده صح- أنا كمان مش معترف بالاخوان المسلمين ومش باخدهم حجة ع الاسلام.....ايه اللى منرفزك قوى كده؟

.......................
عاتب عليك جدا يارامز الخوض فى موضوع طلبت منك اغلاقه و اعترفت انى أنا اللى فاتحه وغلطت انى فتحته و شرحت لك أسباب طلبى-و أكيد انت متابع- فاذا بى أفاجأ بك تفتحه مرتين مرددا أنا ماغلطتش فيها..أنا ماقلتش عليها....فيه ايه يارامز؟ عهدى بك اكثر لياقة من ذلك..لم أعتدك مشعلا للحرائق يا شرقاوى
............................
نرجع تانى لكلامنا...التبشير :

شوف يا سيدى اول هام : بالنسبة لموضوع التبشير
احلال على بلابله الدوح ... حرام للطير من كل صنف ( تقريباً كده البيت صح ) .
الصراحة انا مش شايف أن التبشير ده مشكلة , ده لسه كل الجرايد المصرية و العريبة و كل المواقع الدينية مهللة ان عدد المسلمين تفوق على عدد الكاتوليك , و مقلناش ان ده تبشير و لا حد علق . و كل ما حد يتحول الى الأسلام يقولوا حرية شخصية و هداية , و لو حد تحول للمسيحية يبقى عميل و خائن . و بعدين التبشير حاجة مش حرام , ده البوذيين بيبشروا يا راجل . فانا مش فاهم قضية التبشير مشكلة فى ايه ؟

ده كلامك...ومن نافلة القول والبديهى اننا بنتكلم عن مصر مش عن كمبوديا مثلا..بدليل استشهادك بالجرائد المصرية....وبعدين ماردتش على سؤالى : ليه الكنيسة رافعة قضية على زغلول النجار بسبب انه قال فيه تبشير فى مصر..ودى حقيقة على فكرة

..........................
وفاء قسطنطين : انت تجاهلت أهم نقطة فى كلامى عنها ورجعت رديت على محمود لما قال نفس النقطة
أنا قلت :

المشكلة : فين هى وفاء قسطنطين ؟ ماطلعتش ليه تقول اختيارها؟

وانت ماردتش...فين وفاء قسطنطين يارامز؟

أنا ماقلتش كلمة خاطفينها اللى انت بتقولها على لسانى..أنا قلت لو الكنيسة واخداها بقوة أمن الدولة وحبستها فى الدير....فين سيرة الخطف؟ وليه عمال تقول احنا..ورافضانا..وخاطفينها؟ ليه تخليت عن حيادك الموضوعى وارتفعت عند نبرة التعصب كده؟

...........................

مش علرف ايه الأزرق فى الأحمر...لو حبيت تشرح لى أكون متشكر

..............................

ت شايف انى بوزن بالكيلو و ان نسبة تكفير المسلمين زادت وسط المسيحيين و اننا بنكرهم . كلامك صح
انا بوزن بالكيلو و أحنا بنكرهكم يا عم و امشى من هنا بقى علشان مش عايز مسلمين فى المدونة . هو محمود المصرى بس المسلم الوحيد الى من حقه يتكلم عندى ؟ حتقولى ليه . حقولك علشان هو خاين و عميل و احنا زى ما انت عارف خونة و عملاء و بنستقوى بالغرب . يلا من هنا بقى
.
.
.
حاضر يارامز...أنا ماشى

عباس العبد said...

نقاش ممتع جدااااااااااااااااا
رامز ومحمود المصرى وبنت القمر م5م
بصراحة أنا ليا أيا متابع المناقشات والشد والجدذب
--
حسام
=========
يا أخ حسام هو ده الى ينفع يتنشر بس لحضرتك
و مسمحش أن حد يغلط فى أصدقائى

عباس العبد said...

م5م
يا لهوى يا لهوى
متعصب ليه ؟ علشان انت كل ده مش فاهم قصدى
كده اكيد فى حاجة غلط , بجد يا انا مش عارف افهمك , يا كلامى مش واضح , يا انت مش مركز خالص . فى حاجة غلط بجد .....
أنا مقلتش انك انت بتوزن و لا انا بوزن . لما أنت قلت كراهية المسلمين أرتفعت بين المسيحيين و كم الكاراهية ده وزن و لا يمكن يتقاس , الحب و الكراهية و الحقد و الحاجات دى مشاعر لا يمكن تتقاس و بالتالى الكلام فيها على عواهنه , رحت انا رادد بكلام على عواهنه كمثال من الجانب المسيحى زى ما انت جبت مثال من الجانب الأسلامى و رفضت الأتنين لما قلت انها مش بالكيلو . لا قصدى عليك و لا
على . زى موضوع الأخوان لا هم حجة على الأسلام و زى موضوع أقباط المهجر مش حجة على المسيحية دى قصاد دى يعنى دى تشيل دى , لأن المثالين مرفوضين .... ده قصدى .
---
نص كلامى الى فى صلب التدوينة ده الى أنت مقتبسه , ده مش كلامى , ده انا ناقله من كذا مدون و جريدة و مجموعة بريدية و لولا انى محبش اذكر اسماء كنت قلتلك قريته عند مين اخر واحد , و تروح تكلمه مش تكلمنى انا . كلامى هو تعليقى عليه
---
حرائق ايه الى انا مشعلها , انا مفتحتش الموضوع , لو سمحت متدخلنيش فى حاجة مليش دعوة بيها , انت عارف انى حريص على علاقاتى مع الناس .
---
محمود لما رديت عليه كان ذاكر موضوع الدير الى أتكتب فى الجرايد , انما عملياً محدش يعرف هى فين . مش جايز يكونوا سفروها , زى ما سفروا جوزها القسيس زى ما الجرايد كتبت . محدش يعرف و هو برضه قال محدش يعرف . أعمل ايه انا ؟ .
كلمة خاطفينها مش انت الى قلتها ده الولد الى سئلنى قبل كده و ردى مكتوب عندك فى الردود و قلتله روح حرروها
---
ازرق منقط احمر دى سر و حقولهولك فى تدوينة لوحديها .

بنت القمر said...

العزيز رامز
عرفت اقصد ايه ان فتح الجرح ليس افضل طرق علاجه؟؟
مالك بتقول ان متابعه المناقشات ممتع جدااااااااا كده من تحت الضرس
:))
!!انت الي فتحت علي نفسك فاتوحه
وعشان كده انا اول تعليق لي كان علي المتغطي وبعدين انا ما شاركتش في المناقشات
م5م ومجمود المصري قاموا بالواجب كل واحد عن لسان نفسه وقناعته الشخصيه وانت ما يتخفش عليك بسبع اوراح
وش بيهزر
:))))))
انا قلت لك راي مختصر في اخر تعليق بس
وبعدين مين حسام
وشتم مين؟؟
وليه
طب انا اتشتمت؟؟
:((
ربنا يسامحه لو شتمني
انا مش لاقيه اي تعليق باسم حسام
يلا حصل خير
سبيرو سباتس بقا للضيوف واتوصي
لازم النهايه تبقا سعيده
بس انا فيروز اناناس
وش برئ وطيب
تحياتي

عباس العبد said...

بنت القمر
توضيح
واحد أسمه حسام دخل كتب تعليق و كتب فيه
" نقاش ممتع جدااااااااااااااااا
رامز ومحمود المصرى وبنت القمر م5م
بصراحة أنا ليا أيا متابع المناقشات والشد والجدذب "
و بعدين راح مكمل شتيمة و الفاظ مش تمام فرحت ماسح التعليق و نشرت المقدمة بس الى فيها بيتكلم عن متعة النقاش و كتبت تحتيها أسمه علشان يبقى معروف من الى بيتكلم .
أكيد مش حقول يعنى نقاش ممتع و أمدح نفسى بأنى أحط نفسى
بس كده
---
أنا مفتحتش على نفسى حاجة لأنى متكلمتش على حاجة !!!مش عارف أزاى أتقلب الموضوع كده

بنت القمر said...

رامز
am sorry
افتكرت ان انت اللي بتقول النقاش ممتع وان انت اللي متابع
وبعدين برضه مين حسام؟؟
وتفتكر تبع مين؟
وايه غرضه؟
ومين اللي متابعك وبيحبك موت وعنده مرارة يقرا 44 تعليق
:))
ده اكيد شخص مش غريب!!ا وبعدين هو حشرني ليه وسط اللي بيتناقشوا
انا مناقشتش اصلا اي حاجه
انا كلامي قولته عند محمود من يجي10 ايام
انا بس بعلق بما معناه اني متابعه
وتقريبا بما انه حشرني يبقا عرفته
واحب اقوله
موتوا بغيظكم
ده مجرد نقاش اصدقاء ولا يفسد للود قضيه
:(
وش مكشر
ومعا الي الله برضه ولو مشينا علي الشوك!!
ومهما كانت الخلافات عميقه
عارف يا رامز احيانا يبان ان المسلم المنطلق من مرجعيه دينيه ابعد ما يكون عن المسيحي المنطلق من مرجعيه دينيه... ويبانوا في جبهات متضاده جدا
جدالكن عندي يقين ان دي فكرة مغلوطه
عارف ليه
لان الاخر اللي رافض بتوع قال الله وقال الرسول
عمره ما ها يقبل بتوع قال الرب وقال ابونا
فاهمني طبعا
الحكايه فقط ان اللعبه بتتلعب ان عدو عدوي صديقي
:))
لكن لما نيجي للجد تلاقيه عاوز يولع في دول علي دول.. مهما ادعي من ليبراليه!! صدقني.. يا ريت الكل يفهم كده وما يوقعش في الفخ
فين الفيروز ريقي نشف
مودتي واحترامي

Unknown said...

بعد القفلة اللذيذة بتاعة بنت القمر وبعد ردك الأخير..وبعد ما نزلت بوست جديد وانا ماحبش أعلق فى بوستات بايتة...لم يبق أمامى الا أن أخلع القفاز و أصافحك انتظارا لجولات أخرى قريبا.....مستنى تدوينة الأزرق منقط أحمر
.
.
.
تحياتى