Tuesday, November 04, 2008

الحمل طلع كاذب 3

نظرية الدبوس : الأنثى ضد المرأة

--

On doit pieger notre propre culture avec notre propre culture.

Michel Foucault

علينا أن نفخخ ثقافة مجتمعنا بثقافتنا الخاصة

ميشيل فوكو

--

مدخل تاريخى : فلننعش الذاكرة

كتب البعض مؤخراً عن أن "  كلنا ليلى " أصبحوا " كلنا نُهى " .. ثم ظهر بوست يليه بعنوان " مش كلنا نهى " .. نعود بالذاكرة قليلاً و نتذكر موقف " الليلات " و " النُهات "  فى أحدى قضايا التحرش :

منذ فترة كتبت مُدَوِنة بوست عن حالة تحرش , تعرضت لها أثناء وجودها فى أحدى المواصلات العامة , و لم تدرى ما تفعله فأثرت الصمت و الحكى فى ألم . جاءت كل التعليقات النسائية تضامنية من نوع " قلبى عندك يا أختشى " . تحكى كل واحدة منهم قصة تحرش مرت بها لتخبر المتضررة بأنها ليست وحدها فى هذا العالم الذكورى المتوحش . و كانت اكبر و أهم نصيحة قدمت " هى نصائح و أرشادات ركوب المواصلات " . و هى على الفتاة أن تحمل معها " دبوس " و اذا زنقت جداً معاها ممكن " ترقع بالصوت العالى " . كان هذا اقصى ما تفتق عنه ذهنية المعلقات . أى و الله , دبوس و ترقع بالصوت العالى .

و لما كتب البعض يشجب و يرفض تلك السلبية و انه كان ينبغى ان يشتم و يضرب و يجرر هذا الحيوان الى القسم , تعرضوا لهجوم غريب . و يتذكر معى كراكيب هذا الموقف , لأنه اكثر واحد تعرض للهجوم .

" علشان انتم مبتقدّروش .. و ايش فهمكم انتم فى التحرش .. انتم مش بتمروا بظروفنا .. و لازم نتضامن معنوياً مع الفتاة " و كتب شخص عن ان الناس أتعودت و انه لا ينبغى أن نغضب و نندهش و اخرى كتبت عن انها هى -  المتحرش بها - اللى غلطانة .

محدش من الثائرات " الليلات و النُهات " فى وقتها أعلن عن ضرورة " القبض و محاكمة المتحرش " . كله تضامن معنوياً مع الضحية و لم يجاهر احد الا بنظرية الدبوس . أما دلوقتى فأصبحن كلهن ثائرات و الحمد لله .

للأسف محدش فكر فى اللى عملته نهى رشدى , و لا واحدة فكرت فى كده .. رغم ان مدونة مثلهم هى من تعرضت لحالة التحرش تلك , محدش قالها انتى غلطانة , كان لازم تبلغى البوليس .

 لا " كلنا نهى "  حملة ذات معنى و لا " مش كلنا نهى " أيضاً . لأن مش كلنا نهى معناها أن البعض نهى و البعض لأ . انا بقول مفيش و لا واحدة نهى . 

--

نهى هى الأستثناء الذى يثبت القاعدة . نهى لأن " ثقافتها مغايرة مختلفة * " تملك حرية " الخمس المتعلمات ( اصحاب الصورة فى البوست السابق ) , أستطاعت تفخيخ \ تفجير ثقافة مجتمعها بثقافتها الشخصية و حققت العدالة من وجهة نظرها ** . نهى خرجت من " الأحتباس الدينى " و ثقافة " التضامن المعنوى " و دافعت عن جسدها الذى هو منحة الهية .

صحيح انها فعلت شىء طبيعى " ايون طبيعى *** " مش بطولة و لا حاجة .  لكن هى فى نظرى " كسرت النمط " و خرجت عن " المألوف "  و هو ما لم و لن يفعله " ثوار الانترنت " .

--

صلاة

نشكرك يارب على كل حال و من أجل كل حال و فى كل حال .. و نشكرك على نعمك علينا و نشكرك على ان " نهى رشدى " مبتقراش مدونات , لأنها لو كانت بتقرا مدونات كانت مشيت بدبوس و بعد ما الواد تحرش بيها , كانت " شكته بالدبوس " , و قالتله " أبعد من هنا يا وحش " و بقت مدونة عظيمة .. الشكر و الحمد ليك يا رب .. آمين .

--

 

و لكن ما هو سر " الثورة " و الفوران الرهيب الذى حدث فى عالم التدوين و خاصة المدونات النسوية ؟

 

يتبع ..

 

--------

* الثقافة المغايرة استغلها البعض ليبرر ان ظروف نهى لن تتكرر !!! .

** العدالة تختلف من وجهة نظر البعض , و هو ما سنتطرق له

*** الحدث طبيعى فعلاً و هو ده الصح و المظبوط , أى حد بيتعرض لأنتهاك بيبلغ البوليس :

السرقة .. انتهاك حرمة المال .. بتبلغ البوليس

القتل .. انتهاك حرمة النفس .. بتبلغ البوليس

التحرش .. انتهاك لحرمة الجسد .. هتك عرض .. بتبلغ البوليس

أى ان ما فعلته نهى هو الطبيعى .. لكن احنا فى مجتمع ثوار و مناضلين زى ما انتم عارفين  .. فاكيد بنعمل اللى هو مش طبيعى !! . 

16 comments:

زمان الوصل said...

طيب المرّه دى هاكتفى بهذا التعليق و استنّى للآخر .. التعليق أهه

:-)

زمان الوصل said...

لأ أنا افتكرت حاجه لسّه قارياها النهارده بمناسبة موضوع ثقافة المجتمع

فى حادث البنت اللىّ راحت قسم "العمرانيه" عشان تبلغ عن تحرّش سائق الميكروباص بها قالت البنت فى حديثها اليوم لجريدة "البديل" أن المأمور سألها : بقى عشان "حركه بسيطه" زى دى عاوزاه يتسجن سبع سنين !!

هتك عرض امرأه بقى مجرّد حركه بسيطه و يبدو إن طالما الأمر لم يصل لاغتصاب يبقى كل شئ قبله يدخل فى تصنيف الحركات البسيطه .. بلد حركات بصحيح

بنت القمر said...

طيب
مش كلنا نهي رشدي مش معناها ان بعضنا نهي وبعضنا لا
معناها ان الظروف اللي اتوفرت لها لتفجير ثقافه المجتمع ... وكمان الصدفه القدريه انها تنجح
مش متوفر لغيرها مش معناه عدم بطولتها ولكن الاعتراض علي منحها لقب البطوله الوحيده
يعني لو طلع حرامي علي جيرانك وانت خدتك الشهامه واتصديت له ها تبقيبطل
لكن لو قتلك( وعادي) ها تبقي ضحيه
-------------------
عشان تكون منصف وانت بتحكم بين الناس يا استاذ حط اتنين ليهم نفس المقومات والظروف في نفس الموقف وبعدين احكم علي رد الفعل!!
متجبش بنت صغيره ومتعلمه وجايه من فرنسا وخريجه مش عارفه ايه وتقارنها بموظفه في سنترال منشيه البكري حامل ومعاها دبلوم تجارة
وواحده طلع عليها متحرش اهبل
والتانيه طلع عليها متحرش بسلاح!!

زمان الوصل said...

بس يا "بنت القمر" عمر ما "نهى" كانت هتعرف إن المتحرّش أهبل من غير ما تاخد هى مبادره تعرف منها إنّه أهبل أو غير كده .. كمان فكرة إن المتحرّش أهبل دى فيها قدر من تقليل أهميّة المبادره و كأنّنا بنقول إن فقط لأنّه أهبل انتهى الموقف لصالح "نهى" و ده بردو مش منصف فى رأيى ..

لأن زى ما قلت فى تعليقى عندك .. مين اللىّ لو تحرّش بيها حتى شاب صغيّر سفروت و من غير مطاوى ولا سكاكين هتفكّر حتى ترقع بالصوت و تقول غيتونى؟ مين اللىّ لو تعرّض لانتهاك كرامته فى قسم الشرطه هيخرج من القسم و بعد أن تعود موازين القوى متعادله هيفكّر يروح يعمل ولو بلاغ مش محتاج منّه قوّه جسمانيه أو عضليه و مش محتاج منّه غير إنّه يسعى بس و يترك النتيجه على الله؟

هل لو واحد راح عمل بلاغ ضد ظابط انتهك كرامته و الظابط اعترف و لم ينكر أو يلابط ممكن نقول إن الظابط ده أهبل و عشان كده انتهى الأمر لصالح الضحيّه بس على فكره الضحيّه مش بطل ده الظابط هو اللىّ أهبل !!

أنا افتكرت بعد قراءة التدوينه دى إنّى كتبت مرّه عن حادث تحرّش تعرّضت له بنت خالتى فى وسط البلد و رأيته بعينى ولم أجرء على أن أقول بم رغم إن الدنيا كانت زحمه و الولد اللىّ تحرّش بيها كان شكله ابن ناس خالص و ده اللىّ سبّب لى الصدمه ..

إحنا فى كل الأحوال بندوّر لنفسنا على عذر لسلبيتنا ..

ربيع said...

ده إحنا هانضحك ضوحك

بنت القمر said...

ربيع: ربنا يبسطك يا سيدي
مني: حسابنا بعدين:)
رامز: ها تبتدي تناقض كلامك!!
---------------------------------
إذن فنحن منذ عام 1913 وما بعدها الفترة التي كنت أطلع فيها على المجلدات ـ نلجأ للقانون، ولنا ان نتخيل عقلية المجتمع في هذه الفترة البعيدة، وان نتخيل أن الفتاة التي ذكرت اسمها في الوثائق كانت مصرية بسيطة، ولم تخش الفضيحة، ولجأت للقانون، لكن المثير أن أحدا لم يعتبرها بطلة في هذه الفترة السحيقة، منذ أكثر من 95سنه
------------------------------
, أستطاعت تفخيخ \ تفجير ثقافة مجتمعها بثقافتها الشخصية و حققت العدالة من وجهة نظرها ** . نهى خرجت من " الأحتباس الدينى " و ثقافة " التضامن المعنوى
-------------------------
* الثقافة المغايرة استغلها البعض ليبرر ان ظروف نهى لن تتكرر !!! . **
--------------------------
يعني الاول قلت ان الابلاغ عن التحرش ده طبيعي وعادي ومعروف من زمن
ورجعت تقول اصلها فخخت ثقافه المجتمع!
والحقيقه مش فاهمه؟
وبعدين انهي ثقافه مغايره بتاعة مودموزيل نهي اللي ارستها وسمحت لي استغل_ وابرر ان ظروفها مش ها تتغير!!!
----------------
او بجيكيشين حضرتك!!
نهي معملتليش ثقافه مغايره ولا هزيت اركان حياتي المستقره ولا انا حاسه انها بطله ولاحاسه بضآله انسانيه قدام شجاعتها!!
---------------------
كل الفكرة: لما حصل تحرش بسنيه عبمتجلي سنه 30 مكنش في جروبات فيس بوك ولا محامين زباله ولا مدونات لا وصم للمحجبه باعتبارها متخلفه ولا غير المحجبه باعتبارها صايعه ومنحله
كان كل شيئ عادي( يا ريت تكون شفت تعليقي الاخير
-------------------
دلوقت عشان الناس مهزومه ومحبطه بيتسلقوا في قشايه عشان يلاقوا بطل
مش كلنا نهي مش دعوة انهزاميه ولا لاستعمالالدبوس
الفكرة ان المواجهة الجسديه مش دايما ناجحه وكمان ضد اعفاء الدوله والمجتمع من سلبيتهم

^ H@fSS@^ said...

طيب انا معنديش مانع اعترف و اقول اني مكنتش اعرف ان لو حد اتحرش بيا ممكن ابلغ عنه و يطلع كمان ان القانون بيقلي انه حياخد من تلات لسبع سنين سجن
مين فينا عارف كل حقوقه و قوانين المجتمع اللي هوا فيها؟؟
انا لسه مش قادرة افهم انت ليه متضايق ان احنا فرحانين بنهى و باللي عملته؟؟ و شايفين ان ده شئ اكسبشنال ؟؟
طيب ما هي كدا عملت توعية لبنات تانيين
و كمان مش معنى ان احنا تعاطفنا مع زميلة لينا كتبت عن تجربة تحرش لها يبقى ده نفاق مننا مثلا او تباين في وجهات النظر
احنا كلنا بشر و بنتعلم و كل يوم بيضيف لينا معلومة و كل يوم عن يوم ممكن تتغير ليك وجهات نظر لكن لو حفضل متمسكة بموقف معين يبقى ده غباء و مينفعش وقتهااقول على نفسي اني انسانة و مثقفة لاني متحجرة العقل
كونك انت بقى ملم بكل شئ في الكون فده ميدكش الحق انك تتناولنا بالاسلوب ده
و افتكر صاحبنا اياه اللي الكل تعبوا منه لانه شايف نفسه الوحيد اللي دايما صح و احنا كلنا تلاميد ابتدائي من اصحاب الذكاء المتوسط
معلش انت حتزعل من كلامي ده بس انت كمان مزعلني اوي من اسلوبك و طريقة تناولك للموضوع و تبسيطك لكل اراءنا و تفاعلتنا مع الموضوع
و حاجة ارجو انها تكون اخيرة ليا هو اني حسب ما اتذكر مافيش مرة دخلت و اتكلمت عند حد حكى عن موضوع التحرش الا و كان رايي ان التحرش لازم يترد عليه بقوة
و اخرها كان بوست للصباغ من فترة تلات اسابيع
انت بتعيب علينا فرحتنا باللي حصل و انا بعيب عليك انك حاطط كل البنات في سلة واحدة
سلام

karakib said...

بص يا رامز .. لما قلت كده في الموضوع بتاع التحرش لما مدونة صديقة كتبت موضوع انه واحد اتحرش بيها في ميكروباص كنت باتكلم عادي
ماكنتش متوقع كمية الهجوم الغير طبيعية اللي حصلت لي
فكرتني بيوم جامعة الدول العربية لما قلت لهم اني حاسس اني في اتحاد الشباب الاوروبي من كتر اللغات اللي بيتكلموا بيها في جلسة رسمية ... كله حسسني اني فضائي لسه نازل من السما قدامهم
او حتي جاهل باللغات الاجنبية و لا استطيع التحدث بها ! قال يعني اني الزق عربي في انجليزي معناه اني حلو و جامد !! و لا لما واحدة قالت لي انا بافكر بالانجليزي و اتكلم بالعربي معظم الوقت و كانت فخورة اوي بنفسها
اللي هو ايه ده انت قديم اوي و عايش في يوتوبيا بتاعتك ... اخرج يابني من الكوكب الوردي بتاعك و اتكلم معانا
ساعتها لما قلت المفروض تبلغ عنه للشرطة و يتم اتخاذ اجراء قانوني معه
حسسوني اني عبيط تقريبا !! الغريب بقي لما نهي رشدي عملت كده
كله قال كلنا نهي !! طيب يعني ما هو من الاول اللي حصل طبيعي
و اللي عملته نهي طبيعي جدا و لا داعي لصنع اسطورة منها
هو لما حد بيعمل العادي جدا و الطبيعي اوي بيبقي اسطورة !! يعني تواضعت كل الاشياء لدرجة انه الطبيعي بقي اسطورة !! انا غير مدرك لهذا الوضع تماما
و لا كلنا نهي و لا بتاع .. نهي واحدة عادية خدت حقها ... عادي جدا
الباقي مابياخدوش حقهم دي مشكلتهم و لازم يفهموا انه دي مشكلتهم و انه المشكلة عامة ده ماهواش معناه انه هو ده بقي الوضع الطبيعي و انه لازم نسلم و انه الظروف و الجوابات و المراسيل بتقول كده و انه عيب واحدة صوتها يعلو في الشارع ... لاحظ انه مش عيب يتم التحرش بيها و هي ساكته لكن عيب تعلي صوتها و لاحظ انه اللي بيردد الكلام ده بنات و سيدات مش رجال و لا حاجة
و لاحظ اني مفقوع جدا و قلت لهم انتم بتحزقوا في كلام فاضي و بتعملوا اسطورة من شيء عادي جدا جدا جدا و طبيعي
فعلا الحكاية دي انا غير قادر علي ادراكها ! عايزين يقولوا ايه يعني
انه الوضع الغير طبيعي بقي طبيعي و انه لما واحدة تبقي طبيعية ده استثناء للقاعدة !! علي اساس انه اي قاعدة لازم تكون الطبيعي
غريب غريب جدا
طبعا بيوضع القانون كما يجب أن تكون الاشياء .. لا كما هي الأن
و لعلمك لحد دلوقتي في كمية ناس غير طبيعية لا تعرف الفرق بين التحرش و الاغتصاب و لا يفرق معاهم اساسا
و نفس الناس دي بتعمل هيصه في اي حاجة و كل حاجة و بتتكلم و خلاص
و اول ما واحد يقول هييييييييه كل يقول وراه
هييييييييييه

Founoon said...

انا شخصيا ماكانش عندي اي ثقة ان الواحدة لو بلغت هتعرف تاخد حقها

بجد

انا فاقدة الثقة في حاجات كتير جدا

يمكن عشان كدا انا من الناس السعيدة جدا بنهى لانها فتحت عنينا على حاجة زي دي وان الواحدة لو ما سكتتش هتعرف تاخد حقها والمتحرش هياخد جزائه

ومافيش مجال للمقارنة بين زمان ودلوقتي يا رامز الدنيا غير الدنيا والناس غير الناس

زمان كان طبيعي وعادي ان لو حد بلغ عن تحرش المتحرش باخد جزائه لان دا شيئ غير طبيعي اساسا

دلوقتي بقى التحرش زي الاكل والشرب والميه والهوا

شيئ اساسي في نسيج الشارع المصري

عشان كدا انا وغيري فرحانين بنهى لانها ما سكتتش زي كل البنات ولانها قررت تاخد الريسك وتبلغ ودي حاجة ماحدش قدر يعملها خالص بالرغم من حالات التحرش الكتير اللي بنسمع عنها

راجى said...

اولا نهى عملت شيء خارق للعادة عندما امسكت بالمتحرش بايديها العاريتين ( اوعى تفكر فى اى معنى جنسى من كلمة العاريتين دى ) وصارعته ولم تتركه الا فى قسم البوليس
عملت ده وكل الناس واقفين يتفرجوا
يبقى ده موش شيء رائع ؟ ولما نقول ان نهى عملت شيء طبيعى ونسكت يبقى لازم نقول لأ ، الطبيعى فى البلد دى ان البنات والستات بيسكتوا
وكمان انا وانت لما واحد حمار يخبط لك العربية يا ترى حضرتك بتقدر تاخده على القسم ولا بتقول له غور فى داهية وبتقولها فى سرك كمان علشان انت عارف ايه اخرتها
عطلة وبهدلة

karakib said...

انا مش فاهم يعني ايه الطبيعي في البلد دي !؟ هو الطبيعي في مكان غير التاني !؟ الغير طبيعي أن لا يأخذ القانون مجراه الطبيعي أن يأخذ مجراه
-------
مثال
و يمكن انت تفتكره يا رامز كويس لأنك رديت علي الدكتور يومها في مؤتمر الايدز
-------
لما يكون راجل مثلي الجنس و راجل غيري الجنس هم طرفا المقارنة
و ييجي واحد يقول لي انه الراجل الذي يمارس المثلي و الغيري هو المتوسط و الطبيعي
يبقي في هنا اختلال في التفكير
لأنه الطبيعي انه يكون الانسان غيري الجنس ... اما اذا وضعت طرفين و افترضت انهم نقيضين و قلت انه الطبيعي هو اللي في النص او الطبيعي هو اللي في وسط ما قلته انت يبقي ده مش طبيعي ده خطاب مراوغ ... مراوغ لأقصي الحدود
الطبيعي هو انه الانسان ياخد حقه
الطبيعي لا يقاس علي الوضع الحالي
الطبيعي هو كما يجب أن يكون الطبيعي
بيتهيألي كده انا وضحت وجهة نظري بكذا شكل

هدى said...

هو فعلا السؤال اللي سألته .. وانا بعلق على المدونة عندي على خبر نهى ان مين تاني ممكن تعمل دا .. ولما قريت خبر هبة وشيماء اكتشفت ان كان عندي حق

انا كل يوم وانا ماشية في الشارع بفضل ارسم في سيناريوهات الفعل البديل لاني اسكت واروح البيت واعيط ..

بس بما اني مش بعرف اروح اقول لجوزي اني اتعرضت النهاردة لتحرش .. تفتكر هقدر اتصل بيه من القسم اقوله تعال انا بحرر محضر لواحد اتحرش بي

..

مش عارفة .. اكيد دي سلبية واكيد مش حلها اللي عملته نهى ولا هبة ولا شيماء ولا ان وزارة الادخلية تنزل تعمل 300 محضر تحرش في يوم زي ما ذكر تامر بسيوني في البيت بيتك .. ولا ان البنات ما تلبسش محزق

ومستنية اشوفك هتوصل لحد فين لان كلامك عن تفجير ثقافة المجتمع عجبني

تحياتي

عباس العبد said...

زمان الوصل
ممكن تبعتيلى ميل حضرتك علشان أعرف أتخانق معاكى بحرية بعيد عن المدونة ؟ . اصل عيب نبقى مدونين زى بعض و نقطع على بعض ! .
الله يسامحك .. ( وش متغاظ ) .
===
ربيع
بلاش حكاية الضحك دى , حتودينا فى داهية .
===
بنت القمر
موضوع الثقافة المغايرة دى , قصته طويلة و حتفهمى قصدى مع مرور البوستات . هانت فاضل 3 و تخلص الليلة , بس اوعدك أن لو فى نيتك خناق معايا , فأقدر اقولك بكل صدق و بكل امانة , انك حتمسكى فى زمارة رقبتى . فأصبرى , علشان تبقى ماسكة واحدة و تخلصى منى مرة واحدة .
اولاً المحجبة مش متخلفة , لسبب بسيط هو ان العلمانية السافرة الليبرالية الجديدة , مش عبقرية و لا تزيد و لا تنقص عنها فى حاجة . ده فرق لبس مش فرق عقل , متستعجليش . خللى الخناقة كلها مرة واحدة .

عباس العبد said...

حفصت
مين قال انى متضايق من الفرح بنهى ؟ . انا نفسى فرحان بنهى . استنى رقم اربعة و شوفى انا قايل ايه على الرجالة .
===
هانى
عارف يا برنس و مقدر
===
فنون
صدقينى انا كمان فرحان باللى عملته نهى , و سعيد انها خلت الناس تفكر , بس تفكر أزاى هو ده اللى خلانى أكتب . اصبرى معايا معهلش لو طولت عليكم .
بس التدوينة طويلة و مكنش ينفع تتحط مرة واحدة .

عباس العبد said...

راجى
كلامك سليم , استنى معايا للأخر , مش حطول , اصبر معايا .
===
هدى
و يا رب بعد طول صبرك , تلاقينى بقول حاجة فى الأخر .

محمد الكومي said...

بص يا عم ان فايتني كتير و هبدا اتفاعل معاك من اول المقال 3

اولا موضوع التضامنات اللوذعية والاكترونية و بتاع

هو نوع من التهويل في اتجاه خاطئ و تيجي تنتقده زي مابتقول تلاقي زي مابتقول برضه اللي تقولك اصلك مش حاسس باللي بنحس بيه و ده بينتج عنه حملات مجانية غير مكلفة من نوعية كلنا نهى رشدي بتكون بطبيعتها متأثرة بالظرف فقط وتوقيته

مما ينتج عنه فقع مرارة بعض من يرون خطأ هذا التصرف فيتجهون بدورهم الى انشاء حملة مجانية فيسبوكية اخرى من نوعية مش كلنا نهى رشدي

و طبعا يتغرقون تسعين في المية من وقتهم في تنظير و شرح وجهات نظر لوذعية لولبية عن ان نهى عملت اللي المفروض اي حد يعمله و مش لازم نمجد في الموضوع و نديه اكبر من حجمه

و هكذا اللي داخل جديد عالدور يتووووووووووووووووووووووه

دول يقولوا كلنا نهى و كلنا لهى

و دول يقولوا لا ماتبالغوش و حبشتكانا تفقع بيض الديناصور حتى و هكذا دواليك دائرة و حلقة مفرغة فيما لايفيد و ماهو بالاصل من المفترض انه مفهوم سلفا كانك بتقعد تعيد و تزيد نهار و ليل في ان السرقة سلوك غير شريف و انت اصلا لا تضيف اي جديد لان اللي مش مقتنع ان السرقة سلوك غير شريف هو غير سوي و يلزم علاجه و تقويمه


هوبا كاتش عشان ابتديت اطلع برة الموضوع حبتين

العملية و ما فيها انا بلخصها في حاجة كدة سمعتها عن احداتث حداشر سبتمبر

استاذة جامعية طلبت من الطلبة وصف احداث هذا اليوم

و طبعا انت عارف بقى

اللي قال شعر و اللي رص زجل و اللي وصفه بكلمة واحدة قال يعني دي ابلغ من اي حاجة

الاستاذة قالت اييييييييه

قالت ما حدث يوم 11 سبتمبر ان طائرة اصطدمت بمبنى

و ده بالزبط اللي تحديدا عايز اقوله لاخواننا بتوع الحملات الكيبوردية

اللي حصل ان واحد ارتكب جريمة هتك عرض في حق مواطن و المواطن اشتكاه المتجني عليه و اخد حقه بالقانون

و الحياة لازم تمشي لان لو كل واحد قفش في واحدة وقفنا عالموضوع ده دقيقتين يبقى احما هنقفش في بعضنا لان الطابور هيطول و ماحدش هيمشي قبل ما يخلص الدقيقتين بتوعه

و ارجو اخر جملة دي ما تتفهمش غلط من اي حد هيتابع التعليق ده و انا على ثقة انك هتفهمها زي مانا عايز اقولها تماما يا رامز