Sunday, August 13, 2006

اخماس فى اسداس

اخماس فى اسداس
كنت اشاهد قناة الجزيرة
و فى احد البرامج وجدت ضيف البرنامج يانكى امريكى كتب تحت اسمه " خبير سابق بشئون الشرق الاوسط بالمخابرات الامريكية"
يعنى ايه خبير بشئون الشرق الاوسط ؟؟؟؟؟يعنى يعرف ايه منعرفوش احنا يعنى خابوره فى ايه بالضبط ؟؟؟؟؟
و بعدين المخابرات الامريكية مخابرات على ما تفرج اخترعه خبراء امتى دول
و ايه هى شئون الشرق الاوسط الى محتاجة خبراء ده الشرق الاوسط كلهم صيع و محدش فيهم فاهم حاجة و مش محتاج خبراء اساسا علشان تفهم
هو بعدين الخبير ده يبقى عامل ازاى ؟؟؟؟؟طويل شوية يعنى و لا قصير شوية عنده ايد زيادة ....رجل زيادة
مش فاهم انا الناس دى بتشتغلنا و لا بتشتغل نفسيهاالمهم ربك حليم ستارعدت على خير الحلقة
و شاهدت حلقة تانيةبها ضيف اخر كتب تحت اسمه " دارس للحركات الارهابية "ايه بقى دارس دى كمان
يعنى معاه ابتدائية و لا ثانوية عامة قديمة و لا عامل تحسين مجموع يعنى ايه دارس ؟؟؟امال المفروض يجيبه صيع مثلايتكلموا فى البرامج دى ما لازم يجيبوا حد دارس امال يجيبوا حمار يعنى و لا دارس دى حاجة جامدة و انا مش عارف و ايه حكاية الحركات الارهابية دى كمان و دارسها ازاى بقى الاستاذ ؟؟؟يعنى كان مع بن لادن فى مدرسة بمبة كشر الثانوية بنينانا مش عارف الصراحة بيخترعوا الالقاب دى امتى و مين المغفل الى بيطلقها عليهم قال دارس قال
اما المصيبة الكبيرة حكاية " المحلل السياسى "طب حد يفهمنى حكاية المحلل ده و حياة ابوكم ده راجل بيطلع يتكلم لمدة ساعة على الاقل لابس بدلة و كرافتة و يقول كل حاجة غلط فى الموضوع ممكن تتقال المهم كلامه ميتحققش و خلاص طب قعد اسمعه ليه سى محلل ده لما كل كلامه فاشوش و بيجيبوه ليه من الاساس لما هو حمار اصلا و لا علشان فى لقبه سياسى يبقى لازم بيتكلم صح بدل قال دراع مرسى يبقى بيتكلم صح محلل سياسى قال مغفل سياسى المهم
خلصنا من الموضوع ده طلعلى واحد اسخم منه
حكاية" مصدر مطلع" دى كمانايه حكاية المصدر المطلع هو فى مصدر غير مطلع من غير مؤاخذة
ما لازم يكون مطلع امال يبقى مصدر ازاى و بعدين يبقى عامل ازاى سى " مصدر " ده
يعنى رقبته طويلة شوية و لا بيعرف يشب عن بقية المصادر و لا انفه طويلة شوية فبيحشرها فى اى حاجة الصراحة الواحد مرارته انفقعت من الالقاب الى محدش عارف بتتحدف على الناس دى منين
كله كوم و حكاية " البواطن الى فى ناس عليمة بيها "كوم تانى خالص قال يقولك " عليم ببواطن الامور "و سى بواطن ده بقى عنده كرش و لا ازاى يعنى
ومين عليم ده كمان الى الامور بتيجى لحد عنده و يطلعلها بواطن هو بس الى يعرفها الصراحة
يا جماعة انا بقيت قاعد قدام شاشة التلفزيون اضرب اخماس فى اسداس ( انا مش عارف برضه ايه الى يلغبط فى انك تضرب خمس فى اسداس )
ما علينا المهم الواحد مستغرب من كم الالقاب الى الناس بتاخدها
لدرجة ان بقى فى رتب و درجات يعنى ممكن تلاقى " دارس للحركات الارهابية " و تلاقى " متخصص فى الخلايا الارهابية "
و خد بالك من الى جى ده " خبير فى تنظيم القاعدة "
طب بالذمة ده مش شغل استهبال و عبط ناس مش لاقية حاجة تعملها و معهمش شهادات توحد الله و عاملين فيها الى متخصص والى خبير و الى دارس
دارس ايه و خبير ايه يا صايع منك ليه
و لا الحاجات دى بتجيب فلوس و احنا مش عارفين و اهو برضه احسن من قاعدة القهوة و لعب الطاولة و الدومينو و اهو يتقال عليه " خبير " احسن ما يتقال عاطل
و المشاهد قاعد فى البيت قدام التلفزيون يا عينى بيتفرج عليهم و مش فاهم حاجة و مش فارق معاه
يلا سبحان العاطى الوهاب ...من بعد الشبشب و القبقاب
شرقاوى
خبير فى العبط الدولى
و عليم بكبد و كلاوى الامور

No comments: