Thursday, November 09, 2006

عن المذابح و المجازر النموذجية

فى البداية يجب ان يعرف القارىء انى ضد كل اشكال العنف المخالف للأعراف الدولية
مهما كانت حتى لو كان هذا العنف موجه ضد الاعداء و ايضا
انا ضد كل اشكال الاستهبال و الاستعباط بأسم رفض العنف المخالف للقوانين الشرعية
يعنى مش علشان انا برفض العنف يعنى هذا انى ارفض المقاومة
و انى ادعو الى الغاندية
بل العكس تماما ....انا مؤيد للمقاومة الفلسطينية
و عاشق للمقاومة اللبنانية بقيادة حسن نصرالله
ما سبق ضرورى لصد اى محاولة لأستهبال و استعباط
بعض القراء المدمنين للذة المناكفة و متعة المعارضة و الرفض عموما
حتى لو كان بدون سبب اى انه شكل من اشكال قلة الادب
المهم
نشر اليوم فى احدى الجرائد اليومية الخبر التالى
مجزرة " بيت الموتى " حانون سابقا
اسرائيل تستخدم الدبابات فى قتل المدنيين
مصر : المجزرة مخالفة للقوانين و الاعراف الدولية
طبعا السطر الاول مفهوم
اطلق على مكان المجزرة بيت الموتى لكثرة عدد الموتى ...بسيطة مفهومة يا بشمهندسين
اما حكاية استخدام الدبابات ضد المدنيين ....فشىء غير مستغرب ...يعنى هى عادة الاسرائيليين و لا حيشتروها
اما السطر الثالث من المانشيت هو من نوع الذى يستعصى فهمه حتى على اعتى اذكياء مصر
مصر صرحت ان المجزرة - لا حول و لا قوة الا بالله - مخالفة للأعراف و القوانين الدولية
ربنا يرحم موتانا و موتاكم ...و يعوض عليكم و علينا عوض الصابرين
و يخرب بيت ابو الى يزعلنا وابو بيت الى يفرحنا
يا اخوانا
هو فى مجزرة لامؤاخذه متفقة مع الاعراف و القوانين علشان تبقى مجزرة حانون مخالفة لتلك الاعراف
و لو فى
ما هى تلك الاعراف الموضوعة للمجازر؟
يعنى مثلا لازم يكون فى مواصفات للقتل و الذبح ... و ما هى القوانين المنظمة لعملية الذبح تلك ؟
هو فى حاجة اشمها مجزرة نموذجية يا ولاد ال
حرام ...مين ال....الى حط المانشيت ده ؟
فى اعلان ميلودى تتحدى الملل
الراجل الى بيلعب الكروكيت شتم الى ضربه و قاله
انا حعرف اجيبك يا ابن ال ... و بعد كده قطعوا الشتيمة بالصفارة
طيب اقول ايه للراجل الى كتب المانشيت او العنوان ده
المجزرة مخالفة للاعراف و القوانين الدولية
يا اخى
انى حعرف اجيبك يا ابن ال ....صفارة
اه نسيت
الخبر نشر فى جريدة روزاليوسف اليومية العدد 338 بتاريخ 9 نوفمبر 2006
و بعد كده
يطلع علينا انسان مصر الجديدة و يقولك
طيب بالذمة مين الى بيعادى الدولة ؟
ربنا خلق للأنسان عقل علشان يستوعب به ما يحدث حوله
و العقل هو من نعم الله علينا ...يعنى الى ما يستعملش عقله فى الحدود التى وهب الله اياها كل انسان
يبقى كفر بنعم الله ...يعنى فى ناس اذكيا جدا بيستعملوا عقلهم فى الخير و فى ناس مخهم على قدهم برضه بيستعمله عقلهم فى الخير الى يقدروا عليه
يعنى كل واحد بيستعمل المواهب الى منحها الخالق لنا على قد امكانيات تلك المواهب
صح
زى بالظبط كده
لما اسرائيل بتستعمل دباباتها فى ضرب المدنيين زى النموذج الى قالت الاعراف و القوانين الدولية عليه
ما عدا تلك المجزرة البسيطة حانون خالفت بعض الشىء تلك الاعراف و القوانين
كشفت راسى و دعيت عليكى يا روزاليوسف
ربى ...انى لا اسألك رد القضاء ...بل اسألك اللطف فيه
حسبى الله و نعم الوكيل
فيكى يا روزاليوسف
حسبى الله و نعم الوكيل

2 comments:

هبه الاسكندرانيه said...

مجزره الحقو حصل مجزره يا جدعاااااااان ...
طيب ايه الجديد ماكل يوم بتحصل مجزره
هو ده اسؤ ما فى الموضوع الكلمه اصبحت معتاده على ودننا و ضميرنا كل ما فينا تبلد
مش بيقولك كتر البكا بيعلم القاسيه
قست قلوبنا على غيرنا و بكره تقسا على اللى مننا
ازاى و امتى حنفوق من السطله اللى اصبحنا فيها
سطلة التلفزيون و المسلسلات العربى اللى بتجيب تخلف عقلى
سطلة الاخبار المعتاده اللى من كتر ما سمعناه فقدت معناها
انا مش عارفه ازاى
حد عارف؟؟؟لو حد عارف ارجوكم يقولى

bluestone said...

أولا هو انت تستاهل
ودي جزاة اللي بيقرا روزاليوسف

ثانيا: اصبر شوية بكره الخارجية المصرية هتوضح لنا ما هي المجزرة المطابقة للمواصفات
وهيتم عقد اجتماع قمة عربية طارق مع الاشقاء الفلسطينيين والجان قوي نجم السينما السيد عمرو موسى وهيقول اننا قعدنا مع الاخوة الفلسطينيين واتفقنا على وضع قواعد محددة للمجازر حتى مطابقة للمواصفات وان مصر كشقيقة عربية صميمة هتضمن للاخوة الفلسطينيين مجازر مطابقة للمواصفات والايزو كمان