Thursday, September 13, 2007

امينة

انا عملت حادثة يا اخوانا

......

الصراحة انا سعيد جدا بالموضوع ده

اول مرة تحصلى حادثة

دائما الحاجات الجديدة بيكون ليها فرحة

و متتصوروش انا فرحان قد ايه

............

راجعين على الصحراوى

و انا قاعد قدام جنب السواق و حاطط السماعات فى ودانى

و لقينا مقطورة بيسوقها شخص ظريف

هو نتاج القومية العربية و وحدة الصف و الحزب الوطنى

عمال رايح جى بالمقطورة شمال و يمين

و راح مطلع دماغه و بدون اى مناسبة

عمل حركة بأيده و صوابعه للسواق و قاله

انا حلبسك فى شجرة

..............

و راح سبقنا و طوح المقطورة

فراح سواق العربية مهدى و سابه

سواق المقطورة صعبت عليه نفسه و راح

مفرمل و هو بيجيب شمال و يمين

فاضطر سواقنا يفاديه

من الخضة ... فلتت العرية من ايده

حاجة ظريفة جدا الموضوع ده

و اتزحلقت على الاسفلت

نص لفة ... و هوب

خرجنا من الرصيف ... و دب ... فى شجرة يا معلمين

بس الرملة شالت بلاوى

فيدوبك الاكصدام لزق خفيف فى الشجرة

........

طبعا انا قاعد قدام

رجلى اتدغدغت و دماغى فى الازاز

..........

صاحب المقطورة مش يقف و يلحقنا

لأ

وقف و قال

مش قلتلكم حلبسكم فى شجرة

شكرا ... للفكر الجديد و العبور للمستقبل

......

انا سعيد جدا

اول مرة تحصلى حادثة

لحظات ما قبل الارتطام و العريبة بتلف و تدور

و السواق بيصرخ

و الفنيين بيقولوا الشهادتين

و انا كالعادة بضحك

كانت جديدة على

اول مرة تحصلى

ظريف جدا

لحظات بنت لذينه

استمتعت بيها جدا

.......

شكرا للسيد المهندس سائق الشاحنة

و شكر خاص لقطعة الافيون الى كانت تحت لسانه

............

بعد كده و احنا راجعين

لقيت يافتة مكتوب عليها

مع منصور

انت فى ايد أمينة

.....

شكرا ل..أمينة

4 comments:

يَحيى المِصري said...

ألف سلامة ليك يا معلم

مينا زكري said...

عليا الحرام من ديني إنت مسخرااااا
إنت متأكد إن قطعة الأفيون كانت تحت لسان سواق المقطورة بس؟

يا عم بيقول لك حادثااااا
يعني العربية اتخرشمت
يعني حضرتك كنت هتفيص
واللي معاك كانوا هيفيصوا
وتقولي لي شكر خاص لأمينة

دا انت الموضوع معدي معاك ع الآخر
عموما يا خويا ألف مبروك ربنا نولها لك وعملت حادثة من نفسك واستمتعت بلحظات ما قبل الارتطام وما أثناؤه ما بعده

وحمد الله على سلامتك
ويا ريت ما تتكررش تاني

Alexandrian far away said...

ألف سلامه يا وحش
هي اول حادثه كده بيبقى لها شمخه وبعدين تتعود
ألف الف سلامه
وسلامي لأمينه

Anonymous said...

شكرا للنص الرائع
انت كاتب مميز
شكرا مرة اخرى