Thursday, January 24, 2008

متأمر و اهبل

غزة

مسرحية تخاريف

,

فى مسرحية تخاريف فى الجزء الخامس الخاص بالديكتاتور

دخل متأمر الى الديكتاتور محمد صبحى و قدم له كوب من القهوة

و قاله اشرب يا فندم لكن خوفا على حياته طلبت زوجة الديكتاتور هناء الشوربجى

من المتامر ان يشرب هو اولا للأطمنان فرفض بكل ادب لأنه كما قال

متشكر يا فندم مبشربوش بالسم

فوقف محمد صبحى و قال جملته الشهيرة

متأمر و اهبل !

....

غزة

وسط البلد

,

عائد من وسط البلد وجدت مظاهرتين

الاولى فى ميدان التحرير اغلبها من الاخوان

و الاخرى امام نقابة المحامين اخوانية ايضا

طبعا المظاهرات للتنديد بالحصار على غزة

و للتنديد بالسياسات المصرية التى لم تحرك ساكنا ازاء هذا الفعل اللا-انسانى

......

غزة ...الجزيرة

نشرة السابعة بتوقيت مكة المكرمة

السادسة بتوقيت مصر

,

مراسلا الجزيرة من رفح المصرية و رفح الاسرائيلية

تقابلا للمرة الاولى بعد ان فتحت السلطات المصرية المعبر

او بالاصح بعد ان دخلت الجماهير من قطاع غزة

لم تتدخل السلطات المصرية و تركت اهالى غزة يشترون ما يحتاجونه

و عادوا الى القطاع بالاضافة الى المعونات الطبية المهداة من نقابة الاطياء

و المعونات الغذائية المقدمة من جمعيات مدنية و التضامن الشعبى المصرى

و قال مراسل الجزيرة ما نصه :

ان الرئيس مبارك امر بفتح المعبر لأنه لا يمكن السكوت على هذا الوضع المهين للشعب الفلسطينى

ان السلطات الاسرائيلية حذرت مثيلاتها المصرية من هذا الفعل و انه يجب على السلطات المصرية

اعادة الوضع الامنى الى ما كان عليه

و قد اعلنت بعض القيادات السياسية بأنه فتح المعبر سيؤدى الى ازمات بين الجانب الصرى و الاسرائيلى و لكن مصر مستعدة لأى ردة فعل لانه لا يمكن السكوت على هذه الكارثة الانسانية

....

غزة

انا

,

بعد مشاهدة المظاهرات و ما قاله الرئيس عن فتح المعبر

و انه لا يمكن السكوت على وضع الاشقاء فى غزة

فكرت قليلا

ازاى ؟

عمليات التوازن فى السياسة عمليات هامة جدا

اى نظام مها كانت شعبيته او قسوته او ديكتاتوريته محتاج الى توازن مع المواطنين

السؤال بطريقة اكثر مباشرة

هل فى علاقة بين الديكتاتورية و الغباء

او بين الفساد و الغباء ؟

لأ ... طبعا

لأن اى فساد يحتاج الى ذكاء من نوع خاص

ذكاء يفيده فى التغطية على فساده

طيب ليه الغباء ده ؟

من الاخر و علشان مطولش

ليه الحزب الوطنى ملعبش سياسة فى الموقف ده و كان حيكسب كتير جدا من وراه

ليه القائمين على سياسة الحزب الوطنى ملعبوهاش صح

و كان الرئيس و الحزب كسب شعبية ملهاش حل فى الشارع

حتى و لو بالتمثيل و المظاهرات مدبرة و مخططة مسبقا و هو ده المفروض

ليه مخرجتش مظاهرات حتى لو مدبرة من القاعدة الشعبية ! او جماهير الحزب !

فى مظاهرة غضب بأسم الحزب تندد بأنتهاكات اسرائيل و متضامنة مع اهالى غزة امبارح مثلا

و خرج الرئيس انهاردة بقراره بفتح المعبر " استجابة لضغط جماهير حزبه " !

كانت حتوصل للأمريكان و للأوروبيين ان الحزب بيتحرك و ان السياسة المصرية بتصنعها الجماهير

و كان ده حيبقى ابلغ رد على زيارة بوش و قرارات مجلس حموم الانسان الاوروبى

.......

غزة

الغباء

,

انا مبحبش الحزب الوطنى

بس مبحبش الغباء برضه

ليه معملوش كده ؟

حد يقولى ليه , حد يقولى

هم مش المفروض بيسعوا لشعبية مفتقدة

انا احب اللعبة الحلوة

كانوا حيحرجوا المعارضة احراج جامد فحت

و كانوا حيحطوا صباعهم فى عين الاخوان

انا مش فاهم ليه معملوش كده ؟

الفكرة فى انه اى نظام مهما كان نوعه

و مهما كان درجة فساده او صلاحه

مهما كانت ديموقراطيته او ديكتاتوريته

محتاج توازن بين تحركاته , بين اقطابه السالبة و الموجبة

انت فاسد يا سيدى ... اهى جاتلك فرصة توازن فسادك بيها

على الله بقى يتعلموا و يخرجوا بمظاهرات تاييد للرئيس بكرة

و يلحقوا يعملوا حاجة

علشان مرارتى اتفقعت

.....

غزة

انا تانى

,

انا بحب اللعبة الحلوة

ابوس ايديكم العبوا سياسة صح مرة واحدة

ده لا اخوان و لا معارضة و لا حركات و لا احزاب و لا وطنى

بيلعب سياسة صح

اتشل انا و لا ايه بالظبط ؟

....

غزة

محمد صبحى

مسرحية تخاريف تانى

,

صحيح

متأمر و اهبل !

20 comments:

Amr Ahmed said...

يا راجل احسن
الحمد لله

علشان نبقي كارهينهم علطول

mohandsmasry said...

يا سيدى الفاضل انا لا اعتقد ان مبارك هو اللى امر بفتح المعبر(المعبر تم تفجير اغلبه ليلا والفاعل مجهول ) وجهة نظرى مبارك وجد نفسه امام امر واقع كان قدامه حل من اتنين اما يركب الموجة ويعمل اللى هو عمله بالضيط ويقول انا اللى امرت بكده ويتجنب المواجهة مع الغضب الشعبى وبالمرة اهو بينسب لنفسه فضل لا يستحقه او انه كان يأمر بالتصدى لاى محاولة للعبور وده كان بكل تأكيد نتيجته ها تيقى مجزرة ما يقدرش ابدا يواجهها ولا يتحمل نتيجتها وممكن تقضى نهائيا عليه وعلى نظامه ولو تفتكر من يومين بالضبط مظاهرة السيدات اللى اقتحموا المعبر وفرقوهم بخراطيم المياه واتصاب بعض الجنود المصريين يعنى ماكانش فيه نية ابدا لفتح المعبر وفيه احتمال تانى ان فيه قيادات اخرى هى اللى ادت الاوامر دى بدون الرجوع ليه وممكن تدمير المعبر تم بمعرفتهم(زى موضوع الحجاج بردو) خلى بالك دى ممكن تكون بروفة لثورة الجياع المنتظرة فى مصر لان ده مش طبع مبارك اللى دايما بياخد الاتجاه المخالف لارادة الجميع ..الاخوان بردو كانوا عاوزين يركبوا الموجة ماهى كلها مصالح صحيح كلنا متعاطفين مع الشعب الفلسطينى لكن الاعتقاد الاكبر ان دى محاولة للظهور وكسب تأييد وتعاطف الناس ..اسف للاطالة خاصة انى دى اول مرة اعلق عندك ولو انى باتابع من زمان

HafSSa said...

عشان هو متامر و اهبل
فلا عجب يعني انهم ميستفيدوش من الحركة دي
لكن الحكاية لسه مخلصتش
ممكن بكل جبروت يطلع ممثلين الحزب الوطني و يقولوا انهم اللي اوحوا لسكان غزة بتفجير المعبر عشان متبقاش هناك مسؤولية رسمية على مصر لو هي اللي فتحت المعبر لوحدها
لكن لما الحزب يوز الناس على الاقتحام المفروض بالقوة ده يبقى شئ تاني و محدش يقدر يمسك عليهم غلطة
ولا انت ايه رايك

تحياتي و سلامتك من فقع المرارة

Alexandrian far away said...

عزيزي رامز
للاسف حأضطر اصدمك
النظام فعلا أغبى مما أنت متخيل
معلش هي دي الحقيقه
قوي قلبك

GEMYHOoOD said...

يا سيدى أحسن انا زهقت من القضية البضينة اللى واخدة طاقتنا و فلوسنا دى

adhm said...

متهيئالى انت لا تقصد عين الاخوان بالظبط

bluestone said...

رأيي ان المسألة مش مسألة ذكاء وغباء
النظام مكانش يقدر يعمل كده او يقول انه فتح المعبر بمزاجه ..
فيه اتفاقيات وقوانين دولية تمنع ده تماما .. وعشان كده النظام المصري كان قاصد قوي يعرض للعالم كله ان الحدود تم اقتحامها من قبل الفلسطينيين اللي عملوا تفجيرات في الحدود ودخلوا ..

وان الواجب المصري معاهم كان عدم طردهم والسماح ليهم بالتواجد على الاراضي المصري ..

يعني اللعب مقصود قوي .. ولعب بالقانون

لتر البنزين في العريش على فكرة بقى ب10 جنيه والبلد فاضية تماما وفاضل ياكلوا بعض ..

على العموم الاغنية بتاعة المدونة كانت احلى حاجة سمعتها النهاردة :)
والحاجة الوحيدة اللي ضحكتني في يوم بايخ قوي قوي ..

السيد الكبير said...

عزيزي السيد المحترم صاحب المدونة

رجاء حار
.
.
.
please make the download avilable
for your collection on e-snipes

وشكراً مقدماُ
من معجب بأرائك وبإختيار أغانيك
=================================

عطشان said...

ايه يا رامز !
يعنى رئيس و كمان مصرى و اسمه مبارك عايزوا يبقى ايه
اكيد طبعاً غبى و اهبل :s

Anonymous said...

انا شايف انه اتحط فى موقف
مايسمحش ليه غير انه يعمل كدة
وزى ما مهندس مصرى
حاجة من الاتينين
بالنسبة لانه اهبل فانا شايف العكس
هو ذكى بغباء
هو عارف لو انه شبك الشعب فى الموجة دى
الشعب عينه هتتفتح
ويمكن فى لحظة نشوى يطالبوه باكتر من كدة
وهو مش عايز يورط نفسه
مش عايز يخلى ان حتى قاعدة الحزب الوطنى متفقين مع امال و شطحات القوى المعارضة وخاصة الاسلامية والقومية بتحركات اكثر من ده
واللى طبيعى هتكون عدائية لأسباب ترجع لطبيعية التوجه المصرى ناحية اسرائيل
وهو مش ناوى يعملها


مصطفى اسماعيل

Ragi said...

لا ذكاء ولا غباء
هى بتيجى مع العمى طابات

DantY ElMasrY said...

واحد مبيعرفش يلعب بس بيكسب زور و
بقرار من لجان المسابقات ياريت حتى بجون اوفسايد
يلعب ليه؟

جبهة التهييس الشعبية said...

الحكومة لو عملت مظاهرة لصالح غزة الناس ح تكره غزة وح تروح تولع فيها
:)

Nsreen Bsunee said...

رامز انت مين اللى اقنعك ان الحكومه بيهمها انها ترضي الناس او بتدور على شعبيه مفقوده او بتحاول توازن فسادها
افتكر عدم استغلال الموقف ده اكبر دليل على ان الحكومه ميهمهاش كل ده
الحكومه بتغيظنا يا رامز بتفقعنا من الاخر يعنى

عباس العبد said...

عمر احمد
علشان تبقى كاريهم علطول
دى مش قضية
القضية فى تبرير كراهيتهم
يعنى يبقى فى منطق سياسى مقبول
لكن الى هم بيعملوه ده
بيخلى الواحد يكرهم لله فى لله
كراهية ربانى كده ولاد اللذين دول
و ده ما ينفعش فى السياسة
.....
مهندس مصرى
انا معاك ان فتح المعبر كان نتيجة تفجير و اقتحام من جانب غزة
بس هو الى امر بعدم الاشتباك ! طبعا علامة التعجب
لأنه اصلا مكنش ينفع يشتبك لأنها كانت
حتبقى مجزرة
الفكرة فى انه كان ممكن يستغل الوضع ده سياسيا يا اما بمظاهرات حزبية امام مقار الحزب يا اما بمظاهرات تاييد
انا قصدى بالوضع ده يعمل عملية تنفيس
و خد بالك
من اسعار الشراء احنا استغليناهم اسوأ استغلال
رفعنا الاسعار و بهدلنا الدنيا
انا قصدى زى ما حضرتك وضحت برضه
انه كل بيستغل الموقف و بيركب الموجة
فاشمعنى هم مستغلوش الموقف بدل ما مقضينها تصريحات
لا تبرر و لا تعمل اى حاجة
المقصود انه كان قلب عملية انه مجبر الى " نصر سياسى " فاهم قصدى
اى مصلحة بدل الفشل الى فيه الحزب ده
و بدل ما نكرهم علطول زى ما قال عمر
.......
حفصة
انا عارف انها لسه مخلصتش
اقرى الى مكتوب من ساعتها
و الى بيتقال على لسان الرئيس و الحزب
تصريحات بس
طيب ما تدونا مظاهرة اى مصلحة يعنى
و الله الموفق
.....
اسكندرانى
فعلا
دول اغبى مما تصورت
تصرفات تدل على حاجات الواحد ميقدرش يقولها
..........
جيمى
انت بتتكلم على انى قضية
قضية فساد النظام ولا القضية الفلسطسنية
لو قضية فساد النظام
فملهاش حل
احنا فى قلبه يا عزيزى
اما قضية فلسطين فهى اكبر عملية هجس و نصب بتم فى تاريخ البشرية
لكن معاناة الشعب الفلسطينى هى بس الى مخليانى مش قادر اتكلم
الشعب بيدفع تمن اخطاء قيادات فاسدة
شفت الى اسمه خالد مشعل فى مؤتمر الفصائل
كان قاعد بيضحك و لا كان فى حاجة
ايه الاستفزاز ده ؟
اما بالنسبة لأبو مازن فمش حقولك
انما عذاب الفلسطينية هو بس الى تاعبلى ضميرى

عباس العبد said...

ادهم
مشيها عينه
هههههه
.......
بلو ستون
انا مش بتكلم على المواثيق الدولية
ما هو المظاهرات مش بتحل و تربط
يعنى لما الحزب نظم مظتهرة بقيادة صفوت الشريف فى الاستاد فى 2003 تنديدا بالاحتلال الامريكى للعراق
كان خرج الاحتلال يعنى ؟
انا بتكلم عن التواجد فى الشارع
شوية مظاهرات امام كام مقر من بتوع الحزب فى 7 او 8 محافظات
كان يعملوا حس
مع تفجير المعبر و تصريح من الحزب بأنهم منعوا الاشتباك مع كام قافلة طبية على غذائية على شوية ادوية
اهداء من الحزب
كانوا حيعملوا شغل برضه
الفكرة فى انه فى مصر
فى حالة غريبة من التوازن
فساد حزب وطنى و الحكومة و ثورة المعارضة و شعارات الاخوان
الناس ساكتة و مطنشة على الحزب و بلعاه الشعارات و مبسوطة من المعارضة انها بتشتم الحكومة الى مكفاراها
فلما يخش الحزب يفسد التوازن ده
يعمل ارتباك
يخلى الكل يعيد حساباته
تعديل صغير
....
السيد الكبير
انت تأمر يا برنس

....
عطشان
الفكرة فى المستشارين
و اهو كله بياكل عيش
هههههه
......
مصطفى
جايز
بس انا شايف انه ممكن يلعبها افضل من كده
...

عباس العبد said...

راجى
بتيجى مع العمى طابات انا معاك
بس دول مجبوش عمى حتى
....
دانتى المصرى
كلامك صح
هو كده كده حيقضيها
يلعب ليه
بس اللعب حتى لو انت الى حتكسب يلغى حجة الى قدامك
حيخرس ناس كتير
.......
نوارة
ههههههههههههههههههههههههههههه
هههههههههههههههههههه
انت فشختينى ضحك
......
نسرين
الحكومة بتفقعنا صح
بس مرارتى اعمل ايه ؟

بنت القمر said...

عزيزي رامز
***************
النظام مش محتاج يحط صباعه في عين الاخوان ولا يحرجهم النظام مش شايف الاخوان هما مين الاخوان ولا فين؟؟
بتوع مجلس الشعب المعترضين علي الفيديوكليبات؟؟
لا بتوع النقابات المهندسين والاطباء اللي اخرهم يلموا فلوس تبرعات ويعملوا اعتصامات وتظاهرات محدوده قدام بيوتهم اقصد نقاباتهم
الاخوان يا عزيزي بعبع وهمي ملوش قوة حقيقيه بعبع الحكومه بتخوف بيه بقيه فصائل المعارضه وسابتهم او افراد منهم كل علاقتهم بالاخوان هو اطلاق اللحيه فقط يوصلوا لمجلس الشعب
عشان يقولوا للاخرين نار الحكومه ولا جنه الاخوان
الحكةمه يا رامز معاها الفلوس (وزارة الماليه( التي لاول مرة تاريخيا تضم وتتصرف في جميع موارد الدوله مرة واحده..قناة السويس والضرايب والتأمينات ودخل السياحه تحويلات المغتربين
ومعاها الداخليه والجيش
يعني الحكومه معاها الفلوس والسلاح
يبقي مايسمي الاخوان معاهم ايه؟؟
النقابات ومجلس الشعب
يروحوا يلعبوا بعيد..بيهم
يجعجعوا في جرايد المعارضه ماشي
في الفضائيات اوكيه..
طالما بعيد عم الفلوس والسلاح
بالعكس ده المطلوب عشان نبان ديموقراطيين ادام العالم
يبقا يا الحكومه يا الاسلاميين الوحشين اللي مش بيحبوا الفيدي كليبات
اخص عليهم وها يخنقوا العالم في عيشتها لو مسكوا البلد ويخلوا التلفزيون مارشات عسكريه وقرآن طول النهار
طيب
نقول بقا حكايه المعبر
الريس عنده فلفسه
اه فلفسه مش غلطه املائيه.. اللي هي يا سيدي ايه؟؟
خلي حكايه الحصار في حجر اليهود متحلهاش قال ايه بالأمله عشان نحرجهم عالميا ويبانوا وحشين والعالم يقولوهم يا وحشين يا قاسيين سايبين الفلسطينيه بيموتوا من الجوع وحكايه اقتحام المعبر جت اضطراري وغصب عنه لانه من 48 ساعه قبلها قال مش ممكن نفتح المعبر للحجاج الفلسطينين ومحدش يحاول يحرجنا ولا يضغط علينا
طب هما اقتحموا المعبر
عشان ميبقاش شكله قفا قدام الناس قال عشان الحاجات الانسانيه
طيب انت بتقول يستغل الموضوع هو مش محتاج مش غباء يا رامز ده غطرسه وكبر هو مفيش قدامه خصم حقيقي محتاج يحرجه
خصم قوي زي ما انت بتقول محتاج يلعب معاه لعبه حلوة ولا وحشه
مش محتاج لعب مع حد لانه عارف اساسا انه الحبه بتوع مجلس الشعب ام دقون مش تنظيم سياسي قوى منظم ليه كيان محدد يتحسب له حساب ومش كل من طلع له دقن بقا اخوانجي وبتاع سياسه طب ما هو خالد يوسف بدقن!!ولا كل من لبست ايشارب بقت زينب الغزالي ولا حتي بنت الشاطئ
دول بعبع يخوفوا بيهم القوي الاخري ويضمنوا بيهم ولاء المسيحين
عشان ها
انت معانا ولا مع التانيين
طبعا انت لازم تقول معانا لانك مش ممكن تقبل بالتانيين
تحياتي

human said...

اسمحلى يا عزيزى
فهذا امر طبيعى فالحزب الوطنى يقودة رجال الاعمال
وكثير منهم لهم اعمالهم ليس مع الامريكان فقط بل واسرائيل ايضا
فالمشروعات المشتركة بالكوم
حتى ان الاسرائيلين وصلوا هنا فى جمصة كمان
وعموما حزب رجال الاعمال واشراف الدولة لن يقود مظاهرات ابدا

Fantasia said...

عندك حق.. دا قمة الهبل
أنا كمان بكره الغباء
خصوصا الغباء السياسي لانه بيودي ف داهية. لكن النظام بتاعنا ملوش ف السياسة.. نعملهم ايه؟
والاحزاب بتاعة على ما تفرج دي المفروض يقلبوها اكشاك جرايد.. اهي تبقى ليها فايدة
والاخوان الالعبان طبعا السياسة الوحيدة اللي يعرفوها كانت بتاعة الراجل اللي بيسافر على ضهر الناقة وهو شايل رسالة من الوالي مكتوبة على جلد غزال
يا عيني علينا وعلى بختنا

طب نعمل ايه؟ نستورد سياسيين كمان زي مدربين الكورة؟ ولا نعمل للنظام فصول تقوية في فنون السياسة ومخاطبة الرأي العام؟

سعدت باطلاعي على مدونتك. اشكر العزيزة نسرين على تعريفي بالمكان وامدادي بالعنوان

خالص تحياتي