Sunday, January 27, 2008

فى معرض الكتاب

صباحو فل

ايه الاخبار ؟

انا رحت المعرض و جبت كتب و روقت نفسى

اقولكم جبت ايه بس بعد ما اطلع عنصريتى و طبقيتى

و نفسنتى و غضبى على خلق الله

....

1-

انا رحت المعرض يوم الجمعة اول يوم

و الى شفته خلانى اقول

لازم تبقى تذكرة المعرض بعشرين تلاتين خمسين جنيه كده و لا حاجة

ليه بقى لأن الى رايح المعرض علشان يشترى

حيبقى عارف انه لازم يحوش التذكرة و التذكرة الغالية دى

تبقى دائمة طول المعرض اى عدد من المرات

ليه بقى ؟

لأن المعرض زحمة بناس بحلل محشى و ناس رايحة تاكل و تشرب

و ما يشتروش و لا حتى بيتفرجوا على الكتب و دى حاجة سخيفة

المعرض مش فسحة ... عيب

المعرض ده ... المعرض ده .... فاهمين ؟

المعرض ده .... كده هو يعنى

يعنى يبقى من الى بنوقفله كده .... تمام

فحرام

.....

2-

رحت السبت .... تانى يوم

كان جميل ... المطر كان شديد و الى كان فى المعرض

كان جى بجد يشترى لأن محدش نازل المعرض فى البرد و المطر يتفسح

فكان المعرض جميل ... رايق و فاضى و سهل تقلب


و بالتالى ده برضه اقتراح ظريف

ممكن طول ايام المعرض يخلوها تمطر

ازاى مش عارف ؟

.....

3-

امى بتشجعنى اروح المعرض و تحددلى كمان اشترى منين

لازم تجيب من الشروق و مدبولى و الناشر الفرنسى و بلاش الهلال و اخبار اليوم

حاضر

هى بتتطلب الحاجات دى لأن ليها وجهة نظر

و بتحتاج حاجات معينة من دور العرض دى

و بتحدد دور العرض لأن الى بتحتاجه لازم يكون على مستوى معين

هى بقى بتحب اوى الشنط الى بتيجى فيها الكتب و بتشدد على علشان مرميهومش

كل شنطة و ليها لازمة .... فاهم ؟

بتبعت البواب يجيب الحاجات من السوبر ماركت فى شنطة الشروق علشان ماسكة نفسها و تستحمل تحط فيها حاجات كتيرة و تقيلة

و شنطة الحج مدبولى علشان غامقة و ناشفة فبتجيب فيها اللحوم و الفراخ علشان محدش يعرف بنجيب فيها ايه !!

اما شنط اخبار اليوم و الهلال فالشنط البيضا الشفافة بتبقى وحشة و بتبوز بسرعة حتى العيش السخن بيسيحها

و الناشر الفرنسى الشنطة شكلها حلو و شيك فبتديها لأختى تجيب فيها الماكياج و الحاجات دى

كل حاجة ليها لازمة ... و بتعبر عن وجهة نظرها الشخصية

حصلت بقى مشكلة السنة دى

لما اشتريت من مكتبة ال A.U.c

ايه الشنطة دى ؟

دى شنطة من مكتبة الجامعة الامريكية

شنطة امريكانى ! ممم ... هى نضيفة و شيك الصراحة و ماسكة نفسها و تنفع فى اى حاجة

طيب كويس ... شوفتى انا بجيبلك حاجات كويسة ازاى

بس امريكانى ! .... نبقى نحط فيها الزبالة !!!؟

....

4-

للمسيحيين فقط

ارجو من الاخوة المسيحيين انهم يمتنعوا عن الذهاب الى المعرض

يوم الجمعة طلعت سراى 3 علوى للمكتبات المسيحية

كنت بدور على كتاب مهم صدر السنة الى فاتت

لقيت الدور العلوى زحمة على الاخر

قلت بس ... صحوة مسيحية

المسيحيين بيشتروا الكتب و حيرجعوا الى الايمان القويم

كتابات الاباء بقى و التفاسير و لاهوت تحرير و الدراسات الجديدة

و حتبقى ليلة يا حضرة العمدة

زحمة زحمة يعنى

دورت فى كذا مكتبة لغاية ما لقيته فطلبته من البنت الى واقفه

قالتلى : هو حضرتك حتشترى كتاب ؟

ايوه

بجد و الهى حتشترى كتاب ؟

ايوة بأمانة حشترى كتاب ( بينى و بينكم ... انا قلت البنت مستغلياه ... هو مرجع مش كتاب

و هو فوق ال 1000 صفحة من القطع الكبير كمان .. فقلت طبيعى تستغرب )

غريبة موضوع انك تشترى كتاب ... غريب الموضوع ده ... و انا علشان حضرتك كده حعملك خصم 30 %

انا مفهمتش السبب بس قلت مصلحة برضه

اتارى بقى ... و انا بلف و خارج من السراى عرفت السر

المسيحيين بيشتروا اقلام و صور و ميداليات و سبح و نوت و شرايط كاسيت و فيديو عليها صور قديسين

و محدش بيشترى كتب ... الطم على وشى ... الطم ؟

جبتولنا العار ... الله يسامحكم

فيا ريت محدش منكم تانى يروح و كفاية فضايح لحد كده

حلو قوى و خلونا مداريين

و ربنا امر بالستر برضه

....

ملحوظة اخيرة و مهمة

الكتب غالية جدا بطريقة مستفزة لدرجة انهم بيغلوا علشان بعد الخصم تبقى بسعرها العادى

الاصدارات الخاصة بميريت لسه منزلتش كلها ... يعنى مش كل الى كاتبه باسم على الفيس بووك نزل

ارز باللبن لشخصين ... بتاع رحاب بسام ليه منزلش

لو عايز تتعاقد على نشر كتبك ... ممكن تطلع دار اكتب ليحيى هاشم و تتفق معاه وش كده

.....

5-

اقولكم بقى جبت ايه

دار ميريت ... سراى 4

حتلاقو هناك محمد هاشم قاعد بنفسه و متنسوش تاخدو منه ديوان شعر هدية

لشاعر عراقى اسمه خالد خشان و اسم الديوان طفولة ادم

سرير الرجل الايطالى ... محمد صلاح العزب

هدوء القتلة ...طارق امام

مصر ليست امى ... اسامة غريب

قبل الطوفان ... ياسر ثابت

الحياة السرية للمواطن م ... محمد علاء الدين

ما بعد اسرائيل ... احمد المسلمانى

مصر المحروسة ... على السلمى

قلمين ... بلال فضل

دماء ابوللو ... زين عبد لهادى

العمامة و القبعة ... صنع الله ابراهيم

....

دار الخيال ... سراى 3

فى خدمة السلطة ... مذكرات الصحفيين

..........

مكتبة لوجوس ... سراى 3

سارتر عاصفة على العصر ... مجاهد عبد المنعم مجاهد

........

دار العين ... سراى 4 ب

زحف النمل ... امير تاج السر

الاب و الابن و الروح التائهة ... علاء حليحل

.....

دار رياض الريس ... سراى 4 ب

ذاكرة الاستخبارات ... غسان شربل

تاريخ لبنان الحديث ... من الامارة الى اتفاق الطائف ... فواز طرابلسى

....

A.U.C press

Memories of my melancholy whores … Gabriel Garcia marquis

Notes from under grounds … fyodor Dostoevsky

دار الشروق

عايزة اتجوز ... غادة عبد العال

اما هذه فرقصتى انا ... غادة محمود

شخصيات لها تاريخ ... جلال امين

ماذا علمتنى الحياة ... جلال امين

ستون عاما من الصراع فى الشرق الاوسط ... بطرس غالى و شيمون بيريز ... حوارات مع اندريه فرساى

وقائع تحقيق سياسى ... محمد حسنين هيكل

كتاب عن كتب ... انيس منصور

السائرون نياما ... سعد مكاوى

كتاب الودعاء ... جمال مقار

...

دار سطور ... سراى 3

تجارة الجنس ... لورا ماريا

لعبة الملايين ... فليكس دينيس

....

دار المنار ... سراى 3 علوى

التعليم المسيحى للكنيسة الكاثوليكية ... معرب عن النسخة اللاتينية

....

دار المعارف

الفتنة الكبرى ج1 و ج2 ... طه حسين

....

مدبولى للنشر

اغتيالات سياسية ... سانشيتا سينها

موجز تاريخ العالم ... ج1 و ج2 ... ترجمة فارس قطان

تغطية الاسلام ... ادوارد سعيد

....

دار المدى ... سراى 4 ب

حصيلة الايام ... ايزابل الليندى

....

دار اكتب ... سراى 3 علوى

الليالى الاربع ... احمد بخيت

قفص اسمه انا ... رباب كساب

اين هى و اين انا .... محمد طلعت

موت اداة الاستثناء ... طارق رمضان

ذات وطن ... شعر ... محمد سيد حسين

باب الخزانة ... ريما الخانى

....

6-

صور لقداستى مع بعض الكتاب الناشئين

صورتى مع الكاتب الناشىء جمال الغيطانى و هو يأخذ راى فى كتاباته

انا ماشى كده صح ؟

تمام يا جمال تمام

....

صورتى مع يوسف ابو رية و جلال امين

فى الصورة يظهر جلال امين و هو يستشيرنى فى بعض المسائل الاقتصادية

الى انت بتقوله ده يا جلال غلط

اسمع الى انا حقولهولك و افهمه كويس

28 comments:

Amr Ahmed said...

ادينا بنستعد للمعرض اهه

حلوة اوي حكاية الشنطة دي

ههههههههههه

جامدة

عمرو عزت said...

أنا أولا هابلغ عنك " مصريون ضد التمييز الديني " علشان الإشاعات اللي بتطلعها على المسيحيين دي .
:)
ثانيا : أنا معاك في حكاية المطر دي , علشان أنا برضه باتخنق من الزحمة في المعرض, و باقترح لو المطر ما نفعش نستأجر قناصة نحطهم في مكان عالي , فوق دار المعارف مثلا .

على فكرة شنط دار الآداب - بيروت هايلة جربها !

Ahmed Shokeir said...

كل معرض وانت بخير

Post of the day

Ragi said...

برافو نيافتك على التقرير
برافو انك عرفتنى ان صنع الله ابراهيم نزل الرواية الجديدة
عندى سؤال عن ما كتب عن فرسان مالطة فى المصرى اليوم النهاردة، ايه الحكاية بالضبط؟

Ragi said...

معلش مرة كمان
على فكرة اثناء فترة المعرض كل دور النشر فى القاهرة الشروق ومدبولى وغيرهم بتعمل نفس نسبة الخصم على الكتب ولا زحمة ولا محشى ولا كشرى ولا مطرة
كل معرض وانت طيب

nourita said...

basse keda ?!

I was expecting more books :))

karakib said...

علي فكرة رامز ده كداب اصلا
انا اللي مصور الصور دي و هو كان هيموت و يتصور مع جمال الغيطاني و من بعدها جلال امين و يوسف ابو رية
يا رامز
انت كداااااب
بس ماكنتش فاكرك مثقف تقيل كده
غير انك كداب انت فعلا كويس ابقي تعالي معانا معرض الكتاب دايما :)
فين صوري يا استاذ ؟ ها فين الصور ؟
سلام يا اقلية :)

Alexandrian far away said...

رامز يا ابني أنت برجوازي صغير
ما تخلي الناس تروح المعرض تهرتل زي ما هي عاوزه، ألي رايح للكتب من حقه وألي رايح يتفسح في الجونينه برضه من حقه
قبل ما أنسى تحياتي للست الوالده على رأيها في الشنطه الأمريكاني
وعلى فكره أنا مبسوط جدا أن المسيحيين لا يشترون كتب دينيه، عقبال المسلمين كمان ونبطل الكتب الدينيه والناشرين المعفنين بتوع بير السلم في المنصوره وحوالين محطة مصر بالأسكندريه يرجعوا يتاجروا في الورق الدشت تاني.

على فكره أنت سمنت في الصور قوي يا رامز
خلي بالك من وزنك يا ابني
:-)

بس بجد
مش شايف أنه أغلب ما اشتريت من كتب هي روايات؟
هي العلوم الطبيعيه منعوها ولا حاجه

تحياتي وكل مولد سيدنا الكتاب وأنت طيب

HafSSa said...

اتفق مع شخصك العالي المقام على عدم السماح لكل من هب و دب انه يجيي المعرض
بيزحموا الدنيا خلقة و تبص تلاقيهم بكل رزالة بيسالوا على كتب ماركة اجي في الهايفة و اتصدر

لكن عظمتك المفروض كنت تتواجد في المعرض اكتر عشان الغلابة امثال الغيطاني و امين ينهلوا من علمك الغزير يا فخامتك

عباس العبد said...

عمر احمد
استعد كويس و خد بالك الكتب غالية جدا
....
عمرو عزت
بلغ براحتك يا عم
بس و انت بتبلغ قلهم يصوروهم و هم بيشتروا علشان متظلمنيش
هههههه
يا ريت تمطر بجد
اما حكاية القناصة دى فمجتش فى بالى
و حجرب شنط دار الاداب و ربنا يستر اصل امى متعاطفة مع اللبنانيين
......
احمد شقير
و انت طيب يا باشا
....
راجى
بس انا مش عارف تفاصيل دقيقة
لكن دى الحاجات الى حصلت عليها
ويكيبيديا1
الشرق الاوسط 1
ويكيبيديا 2

href="http://ar.wikipedia.org/wiki/%D9%81%D8%B1%D8%B3%D8%A7%D9%86_%D8%A7%D9%84%D9%82%D8%AF%D9%8A%D8%B3_%D9%8A%D9%88%D8%AD%D9%86%D8%A7">ويكيبيديا 3

الشرق الاوسط 2
...
ملحوظة تانية
مش كلهم بيعملوا نفس نسبة الخصم

عباس العبد said...

نوريتا
لأ لسه ده اول يومين
انا جبت انهاردة تانى
بس لسه مكتبتهمش
كتب عن تاريخ الفلسفة من اولها لاخرها
و موسوعة اسمها
كتب غيرت الفكر الانسانى
بس مستنى لما اجمع كتير و اكتبهم فى تدوينة
....
كراكيب
يعنى انت بتفضحنى
و بعدين لما انت مصورنى زى ما بتقول
الصور مش معاك ليه ؟
انت عايز تيجى على
انا المعلم حلاوة العنتبلى
حجيبلك عصمت
انت عارف انا بفكر اكتب عنه تدوينة
البرنس
....
اسكندرانى
هى حصلت برجوازى صغير
انا تخنت شوية
بس انا عمرى ما كنت رفيع
الفكرة بقى من ساعة ما اتنقلت و قعدت على مكتب
ربنا يكفيك شر المكاتب
السواق ييجى ياخدك من تحت البيت و يرجعك
اما الكتب فدى الحاجات الجديدة
انما انا جبت مجموعة تانية فلسفة و تاريخ ظريفة
جبقى اكتبها لما اخلص كل الكتب الى انا عايزها
انما المسيحيين و المسلمين يبطلوا شرا كتب دينية دى مش مشكلة
المهم يشتروها
حتى لو حيقروا اى حاجة فدى مش مشكلة
المهم يقروا و خلاص
....
حفصة
المعرض مغرى و مستفز
و مقولكيش
مدبولى فى مرة منع الدخول و قعد يطرد فى الناس
ييجى بتاع 100 واحد بيتفرجوا و لدرجة انه واحد من المساعدين اتخانق مع واحد بقاله ساعة بيقرا و يقلب فى كتب و مشتراش حتى ورقة مقطوعة
شفتى الغيطانى و امين و هم بيستفيدوا منى
اعمل ايه ؟
اقطع نفسى على الناس

karakib said...

علشان الكاميرا بتاعتك يا هندسه
فين الصور بقي ؟ ابعتها يا رامز

Moon-baby said...

انت جبت عايزة اتجوز؟ مش كنت تقول..انا شدني اوي و هجيبه الاسبوع ده

مطلتمش على وشك ولا حاجة..انا هاروح اشتري و اصلح الموقف..جويس ماير و جويل اوستين كتبهم حلوة:P

حرام عليك!!! مطرة تاني ايه بس..دي كانت بهدلة و كمان التذكرة ب 50 جنيه؟ مس كفاية الي بندفعه جوا!!!

و يا ريت يا ريت تكتب عن عصمت علشان من ساعة ما حكيت عنه و هو يطاردني في الاحلام :P

nice to meet you :)

Mary

يَحيى المِصري said...

يا إبن المحظوظة قابلت جمال الغيطاني
ماشي
أنا بحقد عليك على فكرة

ذو النون المصري said...

كان نفسي اروح المعرض لكن مفيش فرصه السنه دي
ممكن السنه الجايه ان شاء الله
اشاراتك للناس الناشئين دي واضح انها في محلها و الا ما كانوش عملوا بيها

عباس العبد said...

انا الان فى الاسكندرية
تخيلوا الجو كالأتى بالظبط
الشمس طالعة و الدنيا مطر و بتمطر تلج و حاجة زى الفل
و مفيش برد و بشتغل من 12 بالليل الى 8 الصبح
و كله فى الامان يا لالالى
.....
هانى
انا فى اسكندرية
اول ما ارجع حبعتهملك علطول
متتخضش كده
....
مون بيبى
سميعة ميتال انتى
تمام
انا كلمت عصمت و ربنا يوفقكم
و حيغير البنطلون الاحمر و حيجيب واحد مستردى علشان دى موضة شتاء 2056
و بلاش كتب جويس ماير زى ما انا قلت
تمام
و انا بصيت على المدونتين بتوعكو كتبت
الكلام مفهوم عادى
هو الفكرة فى دماغ الميتال بس
محدش بيفهمها
بذمتك المطر كان وحش ؟
.....
يحيى
اسمها جمال الغيطانى هو الى قابلنى
انت تحسده هو مش انا
.....
ذو النون
حاول تيجى ممتع جدا حتى لو مش حتشترى
انك تمشى وسط الكتب بس متعة ما بعدها متعة

Yasser_best said...

أولاً، ابتسمت للنص الذي كتبته بكل سلاسة مع الحرص على التقاط تفاصيل بسيطة وجميلة

بالفعل، حقائب أو أكياس دور النشر، حكاية يطول شرحها

أشكرك على شراء كتابي "قبل الطوفان" ويسعدني أن تكتب عن رأيك سواء لي شخصياً أو في مدونتك

مودتي

مـــهــا said...

فعلا يا رامز الزحمة فى المعرض غير طبيعية .. طول ما أنا ماشية أقول للعيال أصحابى ..
طب الواد الصغير ده بيعمل إية هنا ؟ و هابقى خلاص هاروح أمسكه من قفاه و اقوله بتعمل إية ياض أنت ؟
بعدين أنا مش فاهمة ..هما بيفتحوا المعرض و يقفلوا جنينة الفسطاط مثلا ؟
ربنا يرحمنا
..
بخصوص الشنط ..أنا دايما كده بحلاوتى آخد الكتاب و هوب أمشى من غير شنطة ..بس المرة دى وقفت لهم ع الشنطة بقى
مامتك دى شكلها عسل :)
......
أنا جبت أرز بلبن لشخصين من دار الشروق
الحرامية دول ..
بالمناسبة
أنا حاسة كده يا رامز ان جلال و جمال نظرتهم مش مطمنانى ..شكلهم كده أسود من جوه من ناحيتك ؟ هى الدنيا جرى فيها إية بس ؟
الشباب بقوا ناكرين جميل الكبار أمثالك جدا ..
جيل اخر حاجة
:D

زين said...

طبعا يعني
انت من المعجزات يابني والله..
خفة دم وسياسة وثقافة وعيال ومسيحيين ولب وهندسة وروايات..حاجة كده مالهاش حل..
حبيت أصبح عليك.. وتهانئي المتأخرة لأني من زمن قديم حبتين..
مالوش لازمة أقول إنك هايل في الكتابة والبساطة..بس برضه ليه لازمة..
فيه رواية بتاعة هرمان هيسه بترجمة حلوة في المعرض الإماراتي وأعتقد في المدى برضه عنوانها لعبة الكريات الزجاجية..تستاهل رغم انها غالية الله يخرب بيوتهم فاكرين إنهم بيبيعوا في الخليج
خالص تحياتي وتمنياتي القلبية..

HafSSa said...

فخامتك يا ريت لو تتكرم عليا و تقلي لقيت فين العتبة جزاز و السلم نايلو في نايلو حضرتك

مستشكرة جدا بالأوي

زمان الوصل said...

غريبه أوى ..
أنا رحت بردو الجمعه اللىّ فاتت بس مالقيتش كتب المدوّنات :( إيه الكوسه دى
بافكّر جديّا أروح تانى يوم السبت بقى ..
ممكن تقول الكتاب "كتب غيرت الفكر الانسانى" من فين؟
بجد "مدبولى" طرد ناس من المكتبه !! طيب الحمد لله إنّى لحقت أخرج بكرامتى قبل ما انطرد .. بس بجد العالم اللىّ عنده رذله و يسدّوا النفس ع الشرا ..

drsamoor said...

Hey Ramez...
i knw are on the common list on facebook...but 1st time for me to pass thru ur BLOG...
tell u wat...i liked it alooot! :D
ur so funny/sarcastic..
think am gonna follow..
btw, i agree on the ticket suggestion!

DantY ElMasrY said...

اسمحلى قداستك
واحد ماشى فى المعرض على غير هدى دخل سراى 2
لقى فى وشه دار سلفيه اسلامجية طحن
طلع منها ودخل اللى جنبها لقاها بردك سلفية
قال طيب اشوف العناوين بتاع السلف
:
الرد على الصوفية
الرد على البهائية
الرد على زكريا بطرس
الرد على الرسوم الدنمناركية
راح للبياع ابو دقن سأله ببراءة :معندكش كتاب عن فضل آل البيت ؟؟؟؟
قاله إيه؟؟؟؟؟؟؟؟
ووشه انقلب اسود غطيس

DantY ElMasrY said...

على فكرة نزل طبعة جديدة من الكتاب المقدس كبيرة شوية وفيها فهارس اكتر بس لسه ملاحتش فروق لو عندك فكرة عنها قوللى
حول

محمد said...

الجماهير تطالب بلا والنبي يا عبده يا رامز :)

عباس العبد said...

ياسر ثابت
شكرا بجد لتشريفك المدونة بالزيارة
انا الصراحة قريت اجزاء من الكتاب فرحت جبت جمهورية الفوضى
ان شالله دايما كده
كتب علطول
مقدرش اقولك رأى بالتفاصيل لأنى مقريتش من اوله الى اخره
تصفح بس
لكن اوعدك بالتعليق
....
مها
عايزة تفطسى على روحك من الضحك
اطلعى سراى 3 علوى
امى دى هى الى حببتنى فى القراية
كانت بتجيبلى القصص و تحكيهالى و انا صغير خالص و كانت هى بتقرأ كتابى و عالم المعرفة و العربى و الهلال و كتاب الهلال و روايات الهلال و الحاجات دى فلقيت لما كبرت كنز الصراحة
بعيد عنك بقى
جمال و جلال كانوا متغاظين لأنهم طلعوا غلطانين فى كذا موضوع و انا صلحتلهم كلامهم فانكسفوا
حاجة كانت احراج يعنى
....
زين
شكرا للزيارة
و متشكر اكتر على المديح
اخجلتم عظمتنا
...
حفصة و محمد
كل الاغانى دى ححطها للداونلود
عونايا
...
حفصة
برضه عملتى الى فى بالك و كتبتى انك عايزه تعملى حجر عقلى على المدونين
على الله منال و علاء يسمعوكى
...
زمان الوصل
فى الهيئة المصرية العامة للكتاب
مدبولى اتخنق
فى واحد من البياعين اتخانق مع واحد بقاله فوق الساعة بيلف و بس و لا بيتفرج و لا اى حاجة
طلع بيدفا من البرد
...
دانتى المصرى
انى طبعة للكتاب ؟
احسن طبعة حتى الان على مستوى العالم مش مصر بس
بتاعة اليسوعيين لأنها مليانة شرح
غير كده لازم تقولى نوع الطبعة و انااقولك مشاكلها فى الطباعة
....

عباس العبد said...

دكتور سمور
منور يا باشا و ان شالله دايما تعجبك التدوينات

Fears said...

ممكن اعرف انت حضرتك جبت كتاب مصر ليست امى بكام ؟