Monday, May 12, 2008

دنيا سبحان الخلاق

-1- 

تاى ماى

السيد الأبراهيمى أشترى الميريديان من 15 سنة تقريباً  و بنا مكانه حالياً جراند حياة . السيد الأبراهيمى أكتشف بعد 15 سنة من شراء الفندق , من حوالى أسبوع كده , فجأة كده و على خوانه , أن الخمرة الحرام . مع أن النص الخاص بالتحريم معروف من 1400 سنة .

ما هو يا القارىء أهبل , يا السيد الأبراهيمى تيكلم تيكلم خالص , يا الموضوع فيه إنه . و بما ان المثل بيقول " اذا كان المتكلم مجنون يبقى المستمع عاقل " يبقى أكيد أن القارىء عاقل و مش أهبل . و بما ان السيد الأبراهيمى مستثمر و رجل أعمال يبقى اكيد مش تيكلم تيكلم خالص . و بما ان الموضوع معروف و كل شىء أنكشفن و بان ... يبقى مفيش إنه . طيب تبقى أيه القصة ؟ فى الغالب و كما عرفت من مصادر سكرانة غير موثوق بها بالمرة أن الخمرة الى كانت فى الفندق مغشوشة و الراجل خاف على سمعة المخل و صاخب المخل و مرات صاخب المخل .

ملحوظة

هذه المدونة ترحب بالكحوليات و المشروبات الكحولية و أخص بالذكر السيدة الفاضلة " ستلا و اخواتها " , و أختهم فى الرضاعة الى أنا شخصياً مرافقها " هنيكن " و المشروب الذى أصبح مفضلاً ال" تاى ماى " و ربنا يتوب على الجميع .

==========

-2-

ثورة البعدا

جريدة العربى الناصرى التى يرأس تحريرها " عبد الله السناوى " فى  العدد 1107 بتاريخ الأحد 11 مايو 2008 نشرت على الصفحة الأخيرة صورة كبيرة لقبضة مضمومة و العنوان فوق الصورة " فلسطين ... 60 عاماً من المقاومة " . و هى صحيفة ثورية تؤمن بالحل الثورى لجميع المشاكل العربية . انا عندى 30 سنة و لو ربنا مد فى عمرى و حيموتنى فى سن كبيرة مثلاً و انا عندى 70 سنة , يعنى كمان 40 سنة . معنى كده ان شاء الله و على أيدين الجريدة الثورية دى التى تتخذ من عبد الناصر , الكائن فى زمن النكسة , شعاراً لها . ان شاء الله و بدون مقاطعة كمان 40 سنة حلاقى نفس الجرنال و حفيد عبد الله السناوى كاتب فى اخر صفحة " فلسطين ... 100 عاماً من المقاومة " ........... الله يخرب بيوتكم يا بعدا .

=========

-3-

حقائق عائلية --- ميل

بنت راحت لأمها و سئلتها : الأنسان جه  ازاى ؟ . ردت امها : ربنا خلق أتنين أسمهم أدم و حوا و أتجوزوا و خلفوا و جينا أحنا . و بعديها بيومين راحت البنت الصغيرة و سئلت أبوها : الأنسان جه ازاى ؟ . فرد أبوها : كان زمان فى قرود فى حجم البنى أدم و تطوروا و جه منهم الأنسان . البنت أتلخبطت بين الردين فراحت لأمها و سئلتها عن الفرق فردت أمها : دى حاجة بسيطة , أنا حكيتلك عن فرع عيلتنا الى أنا جيت منه , و باباكى حكالك عن فرع عيلته الى جه منه .

=========

-4-

حكمة

أذا شعرت برغبة فى العمل ... أسترخى قليلاً حتى تزول تلك الرغبة .

=========

-5-

أرتفاع الأسعار شىء جميل كمهدئات الأعصاب , مفيد كالحقن الشرجية , صحى كأكل الشوارع , علاوة 30 % و خطاب حكومى و ازمة فى لبنان و حكايات الثورة و أضراب قادم فى 5 يوينو و عمتى جايبالى عروسة حشوفها الاحد الجى و حاجة تشرح القلب و فن و ادب و قلة ادب و شرع و فقه و عقيدة و لاهوت و تنظير و روزاليوسف و بيوت و قصور و حوارى و فرح و حزن و بكاء و ميلان كونديرا و احمد بهاء الدين و سبوتنيك الحبيبة و لاهوت التاريخ البشرى و اديان و ناس و بشر و عيال صغيرة و حجر و شجر و مطر و فراشات و طيور و حيوانات و كتب و ورق و أقلام و أنبياء و ملوك و رؤساء و سندوتشات و ميه ساقعه و قطارات و عربيات و شوارع و بيوت و عمرو دياب و محمد منير و خوف و رهبة و موت و دم و جنس و حياة فى يوم فى شهر فى سنة  و هيكل و معبد و جامع و كنيسة و وطن و غربة و أهو كله بيرزق و دنيا سبحان الخلاق  و ..... و .... و  .... و .... :

ملقيش معاك 15 جنيه سلف ادفع فلوس النت ؟

 

13 comments:

أبوفارس said...

كده أنا عرفت عزومه أغسطس حاتكون على أيه..ماشى..والمزه كمان

..(سبوتنيك الحبيبة )
دى أيه بالتحديد..ﻷنى قرأت روايه بنفس اﻷسم لكاتب يابانى أسمه "موراكامى"...تشيرز....خالد

Anonymous said...

we aih elmoshkela en elsayyed elebraheemy taab ya akhy!!! enta beteshrab, enta 7orr.. howwa mesh beyeshrab we mesh 3ayez yeshrab, khalas howwa 7orrr... mesh keda walla aihh? walla enta mesh betra77ab be7oreyyet elra2y?

abderrahman said...

رجاء يا اخي ازالة الصورة من مدونتكم فكل زائر يطلع عليها ستتحمل وزره
هداك الله وايانا
ومشكور على البوست
lol

التعليق ده ممكن نضيفه مع رقم خمسة
:)

^ H@fSS@^ said...

احب اعرف مين اللي بعتلك الايميل ده ؟؟
هاههااااااااااااااا

كان ناوية اقول تعليق
بس وانا مالي يا اخي
ترجعوا تقولوا اني بشعلل الحرائق و بيطر رؤوس و كلام مستفز على راي هاني
و خطابي يتحول لخطاب انتحاري تحريضي
لا يا عم يفتح الله

تحياتي يا قداستك و مبروك الجراند غواية الجديدة

زمان الوصل said...

يمكن السيد الابراهيمى حابب يختلف و يبقى لون جديد على رأى اللىّ قال

و بعدين ناس كتير بيعملوا حاجات حرام وهمّا عارفين إنّها حرام و بعدين يقرّروا يغيّروا .. لا أدّعى أن هذا ما حدث مع الابراهيمى لكن بشكل عام بتحصل :)

أبو عمر - الصارم الحاسم said...

بما انها مصادر "سكرانة"....يبقى مش موثوق فيها

الراجل غير رأيه وتاب بعد 15 سنة ...الحمد لله ان كان لهم عمر يفضل 15 سنة لغاية اما يتوب....عقبال الجميع

Fantasia said...

ههههههه
إلى السيد البراهيمي القاطن في الجراند حياة.. الشراب فيه سم قاتل

أوعى الفحت

بكرة يفصلوا الزباين الستات عن الرجالة في المطاعم وصالات الحفلات اللي في الاوتيل. وبعدين يمنعوا الرقص في الأفراح. لأ ويمنعوا الستات السافرات من دخول الاوتيل كمان.. يعني معقولة الراجل ياخد ذنوب عشان اشترى فندق خمس نجوم؟ أنا رأيي يقلبوا بيت طلبة ويريح دماغه.. باين عليه كان سكران ال 15 سنة اللي فاتوا

إلا صحيح يا عمنا هي صورة البلاك ليبل حرام؟ يا ترى ما حكم رؤيتها على مدونة واسمها غواية؟ ههههههه بكرة يشمعولك المدونة يا عم رامز ويصادروا التاي ماي بتاعتك

على باب الله said...

السيد البراهيمي مظلوم ظلم بين

أصلهم كانوا بيضحكوا عليه و بيقولوله ده عصير قصب

---

karakib said...

بالنسبة للهارد روك ابو سلم بيلف اللي في نفس الفندق تحت عاليمين ده
يا تري ايه وضعه ؟؟ لسه بيقدم خمور؟و لا لأ !؟

Reham Ragab said...

1-
ههههههههههه
دام إذن ذخرا لمرات صاخب المخل
أنا مش حابة أعلق على تعليقات حد، بس معلش مش قادرة هموت! يرضيك أموت؟
هو لو حد تقي يعرف أن الكحوليات حرام، ومنطقيا مدونتك ليست مكانه المفضل، ودخل عليها بالصدفة، وشاف الصورة، عليه وزر؟ فين بأة في كلام ربنا والرسول والخلفاء الراشدين والأئمة الأربعة -حسب فهمي الضئيل للإسلام- حاجة تدل على كدا؟ المشكلة مش بس كدا، دا هو عليه وزر وانت اللي هتتحمله، شوف ازاي! هذا وقد وصلنا من نفس المصادر السكرانة غير الموثوق فيها خالص، أن روي عن بن الفيشاوي -رضي الله عنهما- أن كان جالسا مع سيدنا عمرو خالد، عليه الصلاة والسلام، في فندق الميريديان أول أمس، وسمعه يقول: "وإن صور المدونات لزجاجات الكحوليات لعليها وزر عظيم، على واضعها وزائرينه، وصاحب المدونة يتحمل وزر الجميع"
2- إنشاءلله، يدينا ويديكم طولة العمر
3- شكرا فعلا على الحقائق دي، وأنا اللي طول عمري بتسائل عن الاختلاف الضخم بين شكل أمي وأبويا، أتاري الأصول العائلية كدا بأة، الجميل بأة اني نسخة كربون من أبويا :) ليا الفخر طبعا!
4- انما إيه الرغبة الغريبة دي؟ أنا مسمعتش عنها قبل كدا! ربنا يكفينا شر المرض
5- حلوة فعلا، تحفة بمعنى أدق، بس للأسف لسا دافعة النت أول امبارح، ماعيش ولا مليم!
:(

عباس العبد said...

أبو فارس
سبوتنيك الحبيبة , زى ما أنت قلت بالظبط
رواية للكاتب هاروكى موراكامى
المزة حتبقى سخنة مش عايزين بخل
توصل بالسلامة
----
يوسف
انا معنديش مشكلة أن السيد الأبراهيمى يبطل و يقول انه تاب
طيب الفلوس الى كان بيكسبها قبل كده من الخمور
و بدل تاب و فلوس الزنا ؟
انت عارف ان السكن فى الفنادق للاجانب بدون إظهار تصريح زواج , يعنى ممكن يقعد ولد و بنت فى أوضة واحدة بدون تصريح زواج و يمارسوا الجنس مع بعض , يبقى الأخ الأبراهيمى بيكسب من فلوس زنا و لا هو شايف ان الزنا فلوسه حلال لكن الخمور فلوسها حرام ؟
و لا زنا حرية شخصية و الشرب حرية مش شخصية
أنا معرفش التوبة الى على القد دى
يا كله يا مفيش
انا معندي مكلة مع التوبة , دى حاجة ربنا اللى حيغفرله عليها
انا مدخلتش فى ضمير الناس
لكن لى العقل و المنطق
---------
عبده باشا
مشكور يا اخى على التنبيه
مشكور
جزاك الله و ايانا
مشكور
ههههههه
----

عباس العبد said...

حفصة
انا مردتش أقول مين الى بعتلى النكتة أحتراما للخصوصية النتية
هههههه
-----
زمان الوصل
أنا معنديش مشكلة فى التوبة
انا عندى مشكلة فى نظرية الفرع و الأصل
ما هو يا السياحة حرام و نفضها سيرة
يا السياحة شغل و نبطل فتاوى و نشتغل فى صمت
انما أسيب الشجرة و أتنطط على الفرع
هى دى مشكلتى .
----
الصارم
حقه يتوب و ربنا يقبل توبته و حقنا نفكر و نقول الى احنا عايزينه
-------
فانتازيا
كله الا التاى ماى
خدوا كل حاجة الا التاى ماى
أنا عايز التاى ماى مليش دعوة
----

عباس العبد said...

على باب الله
عصير قصب ؟!!جايز برضه
انا كنت فكره بيريل
-----
كراكيب
أنت عايزهم يبقفلوا هارد رووك
و نسهر فين ان شاء الله
-------
ريهام ر
عبده باشا بيسخر منى و مش بيتكلم جد على موضوع الوزر
دى جت اووت منك
يالله مش مهم
نورتى المدونة