Friday, June 20, 2008

تعليق على ما سبق كتابته

راجع الكلام :

 الأول و الثانى

--

-1-

ربنا عرفوه بالعقل

رغم أعتراضى المباشر على الجملة السابقة لأن الله عَرِفه البشر عن طريق أنبيائه , الا أن الجملة تريد ان تقول ان الواحد مننا لازم يفكر , و بالتالى الواحد المفروض يفكر , على أساس ان التفكير واجب إنسانى , لكن لأن ربنا أبتلانا بعقليات لا يمكن إدراك او فهم ما تقوله لأنه يفوق قدراتنا العقلية لذا ,  

الخبر التالى لم أصدق الحروف الألكترونية المرصوصة أمامى و انا اقرأه :

أتهمت "الجماعة الإسلامية" في مصر الكنيسة القبطية بتشكيل "دولة موازية" تمارس "لعبة خطيرة اعتماداً على الظروف الدولية والإقليمية". 
وحذرتها من استغلال حوادث عارضة يتعرض لها أقباط، بهدف الاستقواء بأطراف خارجية، في إطار مشروع "لتغيير وجه مصر العربي والإسلامي". 

وقالت الجماعة في بيان شديد اللهجة أمس، إن الكنيسة القبطية في مصر تصر على لعب دور مواز لدور الدولة، وهو أمر عمل البابا شنودة الثالث على تغذيته وتكريسه منذ صعوده إلى كرسي البابوية قبل أكثر من ثلاثين عاماً وحتى الآن". .... اقرأ البيان

--

الجماعة الأسلامية ... التى ظهرت و عرفت فى بداية السبعينات و خططت و شاركت فى أغتيال رئيس الدولة , أعلنت فى مراجعتها بأن ما قامت به من عنف فى تاريخها ضد الدولة و ضد المصريين و محاولة أقامة دولة بالقوة , هو خطأ يمكن تداركه ... !!! ,

أما ما تقوم به الكنيسة من الدفاع عن رهبان الدير الذى يتبعها أدارياً و رسمياً بدون عنف هو خطأ و كمان لا يمكن تداركه !!!!!!!!!!!!! .

أحيه يا نافوخى أحيه .

" قبل أن تخرج القذى التى فى عين أخيك , انزع الخشبة التى فى عينيك "

--

ملحوظة " مش عارف إيه لزمتها " :

هى الجماعة الأسلامية بتدافع ليه عن الدولة و الحكومة ؟!

==========

-2-

المفكّر الرقّاصة

" إذ إنه مع الوقت أدرك الوعى الشعبى العميق تلك الألية للدرجة التى أصبح فيها الناس يتعرفون على مشكلات واقعهم السياسية و الأقتصادية و غيرها عبر نفى المسئولين للمشكلة , بمعنى أن الناس صاروا يتعرفون بصورة يقينية أن سعر سلعة معينة – مثلاً – سيرتفع بالتأكيد أذا ما صدر تصريح عن المسئول يقول بصورة قاطعة " لا زيادة فى أسعار السلعة الفلانية " .

--

من كتاب " المفكر الرقاصة ... من تفاصيل ثقافة منهارة "

د. أيمن بكر

ص143 – الباب الثالث – الفصل الأول بعنوان : سياسات نفى المشكلة

كتاب صادر عن دار " الدار "

==========

-3-

رسالة

رسالة جديدة تصلنى من ايجى-نيوز :

وزير التربية و التعليم يقرر إعادة توزيع درجات امتحان التفاضل و التكامل

--

قناة الحياة المصرية الجديدة فى برنامجها اليومى المسمى  " الحياة اليوم " عملت استبيان عن امتحان مادة الفيزياء بالثانوية العامة بتصنيف ثلاثى : سهل , متوسط , صعب

و كانت النتيجة كالتالى :

2 % سهل

3 % متوسط

95 % صعب

--

ان شاء الله و نظام التعليم كده و التفكير كده و نظرية فى مستوى الطالب المتوسط و أن الطلبة نجحت فى الضغط على وزير التربية و التعليم لتغيير توزيع درجات أمتحان الرياضيات ,

حيخرج علينا ان شاء الله أطباء , تروحلهم و انت عيان يقولولك : لأ , لو سمحت غّير المرض الى عندك علشان انا مش حعرف أشخصه ,

و لما تسئله : أزاى يعنى يا دكتور ؟ ,

حتلاقيه يرد يقولك بكل بساطة و غباء منقطع النظير : اصل المرض الى عندك ده فوق مستوى الدكتور المتوسط . !!!!!

ماشى يا بنى ادمين , اللمبى فِشِل يا بنى ادمين .

=======

-4-

عذر

أنت بلا عذر أيها الأنسان , كُل مَن يدين . لأنك فى ما تدين غيرك تَحَكم على نفسك . لأنك أنت الذى تُدين تفعل تلك الأمور بعينها ! .

رو 2 : 1

=========

-5-

الإفراط فى التأويل

أُم طلبت من ابنها أن ينزل لشراء عيش , أعطته جنيه و نصف و قالت له : خد الجنيه و نص دول , و انزل اشترى عيش و اشرب حاجة ساقعة و تعال بسرعة  . أسرع الولد فى النزول و عاد بعد 6 ساعات . فلما عاد , صرخت الأم فى وجهه : انا مش قلتلك تعال بسرعة , ايه الى أخرك ؟ . صمت الولد قليلاً ثم اجابها : ايوة انتى قلتيلى تعال بسرعة , بس مقلتيش رُوح بسرعة .

--

الولد ذكى جداً , مغيرش كلام أمه و لا بدل فى الكلام و لا خالف النص , بس كل الى عمله انه " قرأ النص " بالطريقة الى تريحه . الولد عايز يلعب مع صحابه , بدل ما يلعب بعد ما يشترى الحاجة و يبقى اتأخر فى الرجوع .... لأ , كل الى عمله انه " لعب " مع صحابه قبل ما يشترى الحاجة و بكده " لم يخالف النص " لأنه حيرجع بسرعة بعد ما يخلص لعب .

--

بس ده الى عايز اقوله .

=========

3 comments:

karakib said...

الإفراط فى التأويل
المثل المذكور حقيقي جدا و بيحصل باشكال مختلفة في تفسير كل النصوص
لكن ده اسمه مش افراط في التأويل ده يبقي اسمه فساد في الاستدلال
----------
بما انك ذكرت مثال للخطأ الذي يمكن تداركه في نظر الجماعة و هو اغتيال رئيس الدولة و الخطأ الأخر و كلام من النوعية دي و بما اني لسه مخلص قراءة كتاب خريف الغضب لحبيبك محمد حسنين هيكل فاقدر اقول لك انه سيب اللي عايز يقول يقول ... اصل كم المعلومات المغلوطة الموجودة في الكتب (مش باتكلم عن كتاب واحد ) مش طبيعية
مثلا لما هيكل بيذكر حادثة اختطاف البابا يوساب الثاني و بيقول عن خاطفينه هذا الكلام يبقي التاريخ بيحكي بشكل خاطيء خصوصا و انه لم يذكر سبب الاختطاف الحقيقي اللي هو خادمه ملك
صحيح هو ذكر عدة معلومات و تحليلات في منتهي الجمال ... لكن بعض المعلومات خاطئة للغاية
---------
فين اللي انت قلت عليه في التدوينة السابقة عن عدم وجود مسئولية مطلقة علي احد الافراد ؟
------------
بالنسبة للثانوية العامة فرأيي انه الموضوع بياخد اكبر من حجمه كل سنة و بيبقي موسم للجرايد و الهيصه
و السنة دي حادثة تسريب الامتحانات خلتها فيها ملح و فلفل و كمون و بهارات ... بس تفتكر هي اول و لا تاني و لا تالت سنة تتسرب الامتحانات ؟ يعني ما كانش بيحصل قبل كده ؟
------------
ارجع و اقول لك الولد فعلا لم يخالف النص ... و هو ليس ذكي .. هو خبيث
و في المرة اللي بعدها عندما يصبح النص اكثر الزاما و يتم تفسيره بأنه عليه الذهاب و الرجوع بسرعة
سيخبر والدته بأنه الطابور كان طويل اوي قدام المحل او انه في واحد صاحبه حصلت له حادثه .. و هيبقي مش بس خبيث .. خبيث و كداب
----------
اخيرا
انت متألق اليومين دول

Unknown said...

تحيتي
وإن كانت هذه أول زيارة لي لهذه المدونة التي أعجبتني ولكنني أجد مفسي أقدم دعوة مزدانة بالفل والياسمين لزيارة مدونتي أتمنى تلبية الدعوة ووضع اللمسات في سجل التعليقات
تحيتي
منظرك على مدونتي هنا
http://kanyatklam.blogspot.com/

^ H@fSS@^ said...

اسجل اعتراضي ان ربنا عفوه بالعقل
مينفعش
لان ربنا مش محسوس ماديا و لا انا غلطانة؟؟

المهم
اتهامات الجماعة اياها طبيعية جدا و مبينة من منطلق حلال علينا حرام عليكوا
انتوا ازاي تتجرأوا و تسمحوا لكنيسة انها تعمل نفس الدور اللي بتقوم بيه مؤسسة اسلامية
انت يا قداستك ناسي ان دي دولة اسلامية؟؟
مينفعش
ديني على ديني ميلفش
شفت المصيبة بقى ؟؟


تحياتي