فى إنتظار جودو البلبوص

-1-

الأربعاء -  صيف 2008

اتصلت بصديقى و اخبرته انى واقف منتظر اسفل العمارة , فى الناحية المقابلة , أمام اكشاك بيع السجائر , حتى ينتهى من ارتداء ملابسه . الأكشاك فى تلك المنطقة متراصة , اربع اكشاك متجاورة .

فتحت احد الثلاجات و اخرجت زجاجة مياه غازية  , الفتاحة مربوطة بحبل من اعلى الثلاجة و مدلاة حتى مقبض الثلاجة . فتحت الزجاجة و اخرجت علبة سجائرى و اشعلت واحدة , كنت امسك بيدى غطاء زجاجة البيبس , بحثت عن صندوق القمامة , فوجدته يتوسط كشكين , صندوق من البلاستيك احمر اللون , ممتلىء حتى منتصفه , بلا غطاء . رميت غطاء الزجاجة بداخله , اخذت نفس عميق من السيجارة , زفرته ببطء .

خرج من الكشك المجاور بسرعة و فجأة , رجل عجوز على وجهه امارات الغضب , صرخ فى وجهى :

انت بتعمل ايه يا أستاذ ؟ بتعمل إيه ؟ رد على .... بقولك رد على .... سامعنى !!! , رد على بقولك .

شعرت من صوته أنى ارتكبت جريمة , فخفت و تراجعت للوراء , و لم أستطع الرد أو حتى أعرف ما أقول , فزاد فى الصراخ :

بتعمل أيه بقولك , انت واقف بتعمل أيه . و ماسك فى أيدك هيه ؟

اجبت بصوت خفيض و انا مرتعش :

حاجة ساقعة , فتحت التلاجة و اخدت حاجة ساقعة و رميتها الغطا فى الزبالة

و كمان بتعيدها تانى , رميت الغطا فى الزبالة , يعنى أيه رميت الغطا فى الزبالة ؟ مفيش أحترام , مفيش كرامة فى البلد دى , محدش بيحترم حد هنا ؟

امال ارمى الغطا فين ؟

هو أنت شارب الحاجة الساقعة دى من هنا و لا من التلاجة بتاعة الكشك الى جنبى ؟ شاربها من الكشك الى جنبى , صح ؟ ... ترميها هنا ليه ؟

مش دى زبالة و خلاص !!!!

انت مجنون و لا أيه ؟ هى زبالتك ؟ , و لا حتعملى مجنون , اقلع مالط هنا علشان تستريحوا , اقلع مالط عشان تنبسط , هى زبالتك علشان ترمى فيها ؟ .

ضحكت محاولاً تلطيف الموقف :

هو كل واحد لازم يمشى بزبالته فى الشارع و لا أيه ؟ اهى زبالة و السلام .

زبالة و السلام !!!! .... ادى يا عم الزبالة اهه .

امسك الرجل صندوق القمامة و اطاح به فتناثرت محتواياته بعرض الشارع . اطلق سائقو السيارات سبابهم , و صرخ الرجل فى وجهى للمرة الثانية : اقلع مالط علشان تنبسط ؟

خلع الرجل قميصه فجأة فظهرت فانلته الداخلية المليئة بالثقوب , ثم اخرج الفانلة من البنطلون فظهر سرواله الأبيض أسفل البنطلون , و جرى الى الشارع يبحث عن غطاء الزجاجة وسط وابل من سباب المارة و السائقين حتى وجده , رفعه لأعلى كأنه ممسك بكأس بطولة ما , رجع الىّ مسرعاً و وضعه فى يدى بقوة : ابقى ارميه فى أى حته تانى .

شعرت بخجل شديد من الموقف و من نظرات الواقفين , و تراجعت للخلف . بحثت عن صندوق أخر فوجدته بجوار الكشك الذى اشتريت منه المياه الغازية من الناحية الأخرى , فذهبت لأرميه بداخله .

خرج شاب ثلاثينى من الكشك و سئلنى : أنت حتعمل أيه يا أستاذ ؟

حرمى الغطا فى الزبالة عندك , انا شارى الازازة من عندك , حرمى الغطا عندك .

مترميش حاجة , هى ناقصه هبل أصلها .

تركنى و توجه بكلامه للرجل العجوز : و حياة امك يا ابن المره , ما هو رامى عندى حاجة , انت حتعمل علينا مجنون و لا أيه ؟ ثم التفت الىّ : روح يا عم ارمى حاجتك هناك و لا يهمك , و إياك ترمى حاجة هنا , فاهم و لا لأ ؟ .

قلت للشاب : خلاص مش مشكلة معلش بقى , بلاش خناق , حرميه هنا و خلاص !

صرخ الشاب فى وجهى : بقولك ايه , مطّلعش ميتين امى , مش حترمى حاجة هنا .

صرخ العجوز بشدة و حسم  بعد سماعه جملة الشاب : أقلع لكم مالط !! , محدش حيرمى حاجة هنا يا ولاد الكلب , محدش حيرمى حاجة هنا .

تركت المعركة مشتعلة و غادرت المكان فى صمت و خزى . و ضعت غطاء زجاجة المياه الغازية فى جيبى و ابتعدت عن الأكشاك و ذهبت الى العمارة التى يسكن بها صديقى أنتظره أسفلها .

--

-2-

الجمعة – صيف 2008

دخلت أمى الغرفة و انا نائم , ايقظتنى برفق تسئلنى : عندك حاجة عايزه تتغسل ؟. اجبتها و انا شبه نائم : البنطلون الجينز الأزرق عندِك هناك اهه .

أخذت أمى البنطلون من الشماعة , و كعادتها تفرغ جيوبه قبل إدخاله الغسالة . و ضعت الفلوس و المحفظة على المكتب , وضعتت يدها فى الجيب الأمامى , و اخرجتها فوجدت نفسها ممسكة بغطاء زجاجة المياه الغازية . ايقظتنى للمرة الثانية تسئلنى : إيه ده ؟ . نظرت الى ما تمسكه فى يدها بعين نصف مفتوحة , نصف مغلقة و أجبت : غطا ازازة حاجة ساقعة .

ما انا عارفه انه غطا بيبسى , بيعمل ايه فى جيبك ؟ ما رميتهوش ليه فى أى " بانييه " فى الشاع ؟؟!!.

أمى القادمة من الصعيد , المتعلمة فى إحدى المدارس الأجنبية , التى تسهر على راحة اولادها و بيتها , و راحة زوجها , لا تقول " زبالة " بل " بانييه " و تكتب " panier " , لفظة فرنسية تعنى صندوق قمامة , عقبال عندكم كده .

أعادت أمى السؤال مرة اخرى و هى تهزنى كى أستيقظ , فهببت فى وجهها :

بقولك أييييييييه , انا أرميه فى الحتة الى أنا عايزها , محدش يقولى انا أعمل أيه و ما تعملش أيه , انا حر , ارميه فى البانييه و لا ارميه فى العفريت الأزرق . اقلع لكم مالط هنا علشان تستريحوا ؟ , اقلع لكم مالط علشان تنبسطم ؟, انا أرميه فى المكان الى يعجبنى , فى الحتة الى براحتى , محدش يقولى ارميه هنا و لا أرميه هناك , انا حر ... محدش يمشى كلامه علىّ .

خلاص , خلاص ... متزعقش طيب .

خرجت امى من الغرفة فى هدوء و الحزن بادى على ملامحها , شَعَرت بالضيق مما فعلته , هرب النوم و جلست على السرير و انا غضبان . و لأن صوتى كان عالى و هو ما يعنى " انى ولد قليل الأدب , و عايز اتظبط من اول و جديد " كما يقول والدى , فقد هب من غرفته و اقتحم غرفتى

بتزعق ليه يا بنى ادم انت ؟

ابداً يا بابا مفيش حاجة

و كمان بتقول انى مبسمعش , امال صوتك كان عالى ليه ؟ و لا حتزعق فىّ كمان و تقولى صوتى مكنش عالى ؟

مفيش حاجة يا بابا .

امال بتجرب حبالك الصوتية و لا حتعملى مجنون فى الشقة ؟

دخلت امى الغرفة و قطعت الحوار بسؤالها والدى : عندك حاجة تتغسل ؟

التفت اليها ابى : البنطلون الرمادى و القميص الأبيض . ثم التفت الىّ مرة اخرى :

عارف اسمعك و لا أشوفك بتزعق و لا بتعلى صوتك فى البيت , و لا بتزعق لأمك تانى , حيكون نهارك اسود , انت أصلك بقيت بايظ و عايز تتظبط من اول و جديد و انا بقى الى حظبطك , فاهم و لا لأ ؟

فاهم , حاضر يا بابا .

شعر أبى بالنصر على الشاب الصايع الذى هو انا , خاصة و انا مطرق الرأس قائلاً كلمة حاضر . وقف مزهواً و هم بالخروج من الغرفة حتى وجد امى فى وجهه و هى ممسكة بشىء فى يدها و تسئله امامى :

إيه ده ؟

ده 3 غطيان حاجة ساقعة .

ما انا عارفه انهم غطيان بيبسى , ما رميتهومش ليه فى اى " بانييه " فى الشارع ؟

صرخ فى وجهها : بقولك ايه , انا أرميهم فى الحتة الى انا عايز أرميهم فيها , محدش يقولى أرميهم هنا , و لا ارميهم هناك , فاهمة و لا لأ , انا أعمل الى انا عايزه ,  انا حر ... محدش يمشى كلامه علىّ .

==