Tuesday, November 04, 2008

الحمل طلع كاذب 2


صناعة النموذج

--

هلّا تدلنى على الطريق ؟

هذا يعتمد على أى طريق تبغى المضىّ فيه !!

اليس فى بلاد العجائب

--

إعلام

تحديدا في عام 1913 حين لفت نظري طعن مقدم في قضية هتك عرض ومذكور فيه اسم الفتاة والمتهم، كما قرأت أيضا في أعوام تالية حكم في قضية طفل لم يتجاوز السابعة تعرض لهتك عرض، والأسماء مدونة في المجلدات بأسماء القضاة والمحاكم
إذن فنحن منذ عام  1913 وما بعدها الفترة التي كنت أطلع فيها على المجلدات ـ نلجأ للقانون، ولنا ان نتخيل عقلية المجتمع في هذه الفترة البعيدة، وان نتخيل أن الفتاة التي ذكرت اسمها في الوثائق كانت مصرية بسيطة، ولم تخش الفضيحة، ولجأت للقانون، لكن المثير أن أحدا لم يعتبرها بطلة في هذه الفترة السحيقة، منذ أكثر من 95سنة
إذن لماذا اعتبرها الإعلام أول قضية من نوعها في تاريخ مصر القضائي، رغم ان الحكم صدر كجريمة هتك عرض تقليدية ؟ علما بأن هناك مسودة مقدمة لقانون ضد التحرش، وان مصر شهدت تماديا في هذه الحوادث مؤخرا.

عبد الرحمن مصطفى

--

" أيتها النساء أخضعن لازواجكن "

تعلن صديقتى انه يجب علينا تغيير العقلية المصرية و اننا يجب علينا ان نعيد فهم النصوص الدينية . فالزمن الدينى الذى كُتب فيه نص بولس الرسول كان يتوافق وقتها مع الزمن التاريخى , غير أن الزمن التاريخى الحالى قد أصبح بعيداً عن زمن كتابة النص . و بالتالى يجب اعادة فهم النص فى زمنه الدينى و أعادة تفسيره بما يتناسب مع زماننا الحاضر , فلا يمكن للمرأة فى عصر الحرية ان تكون خاضعة لرجل ! لأن المفاهيم تغيرت .

تتزوج صديقتى , و نحضر فرحها جميعاً و أثناء الصلاة يقرأ الشماس من رسالة بولس " أيتها الزوجات أخضعن لأزواجكن " .

و بعد عودتهم من السفر , نذهب لتهنئتهم , امازحها ضاحكاً مذكراً ايها بأنه اياها و الخضوع لأنه لابد من أعادة التفسير . تضحك و تحتضن زوجها فى دلال و تقول : ده كوكو حبيبى , اخضع له زى ما هو عايز .

--

السبب الرئيسى للتحرش بنهى , هو أنها ليست محجبة .

كتب الجملة السابقة اكثر من مدون و مدونة . ما لفت انتباهى ليست الجملة فكاتبها حر فى رأيه , و لكن ما لفت انتباهى نقطتين :

الأولى .. ان اغلب التعليقات النسائية على تلك المدونات جاءت مؤيدة للمقولة , متناسية ان حوادث التحرش فى العيد لم تستثنى محجبة او منقبة .

الثانية .. أن من كتب عن الوازع الدينى لم يكلف نفسه و يكتب سطراً واحداً عن غض البصر , او عن اهمية الصلاة او حتى تسأل عن " تدين شريف رجب جبريل " !!! . و هل "يصلى و يتقى الله " , أم ان على المرأة فقط أن تتقى الله !!! .

--

علمانية

و لأن المسخرة دائماً لها أبعاد أسطورية و على كل لون يا ثورة , فقد دخل اخوتنا العلمانيين المعركة , رافعين الأعلام و داقين الطبول , معلنين أنتصار الفتاة الحرة المتحررة " الغير محجبة " :

" علي مستوي الدين ايضا سوف يصبح لك دينك الخاص وعندما تكوني امراة مثل نهي فلن تكترثي بهذة البذاءات مطلقا , حجاب , نقاب , شادور , او انك خلقت من ضلع اعوج , لن تكوني ناقصة عقل و دين مثلما قالها لك عمر بن الخطاب يوما .. بأختصار ستكونى فتاة طبيعية و لست مثل هؤلاء بل ستكونى ملكة نفسك "

و سلملى على عبد الوهاب المسيرى ..

--

حتى لا تطير عقولنا فى وسط المسخرة

 

الصورة نقلاً عن مدونة زنوبيا

ناس بتفكر ؟ .. غريبة !!

( فيهم محجبات و غير محجبات ؟ صح .. حاجة أغرب !!! )

 

 

يتبع .. 


14 comments:

karakib said...

:) انت بتنقط ليه ؟؟

بنت القمر said...

لحد دلوقت جميل... ربنا يستر علي الباقي
اختصر ولم الباقي بقي مرة واحده عشان التنقيط ده ها يتوه الفكرة
او ها يتوهني انا
---------------------
التعليق
========
زي ما قلت عندي لو كان المتهم ضربها بعربيته كسر لها رجليها
ولا موتها كانت تبقي ضحيه لكن لما تجرة هلي القسم تبقي بطله يعني البطله اللي الناس عاوزينها بطله تنتصر مش واحدة تدافع عن شرفها وممكن تموت ورا كده
النتصر بس اللي الناس بتحترمه
كان البنات بتوع تحرش العيد او جامعه الدول مع الكثرة العدديه للذكور مكنوش احرار وسابوا نفسهم كده للتحرش؟
اللي تقدر ترد الصاع صاعين بطله اللي متقدرش تواجه متحرش راكب عربيه تبقي ضحيه مجهوله
نورت جوجل تاني

Alkomi said...

رامز بصراحة مش فاهم

او كدة حاسس اني بتوه

ولول ان مضمون الكلام يعني مافيش اعتراض عليه بس الفكرة اني تحديدا مش واصل للهدف

و ده اعتبره قصور مني في الفهم للموضوع اكتر منه نقد

ست المرتفعات said...

صباحك سكر
كالعادة اعجبتنى الغواية
مستنية الباقى

:)

^ H@fSS@^ said...

ممكن لو سمحت تصرح برايك و تفهمنا عشان يعني انت كدا برجلتني
انت معترض على ايه؟
انها بقت بطلة؟
ولا ان شريف اخد حكم؟
ولا ان الناس هللت للموضوع اكتر ما يستاهل؟
ولا ان طلعت عليها اشاعات؟؟
رسيني ينوبك ثواب و كفايةعشان عنيا زغللت من كتر الغواية

هدى said...

اممم

لحد هنا وانا معاك

مستنية البقية

عباس العبد said...

كراكيب
انا مش بنقط , النص طويل جداً و بعدين هو ملىء بالمفاجأت فلازم واحدة واحدة , علشان الخضة , دا انت سيرتك حتيجى الحلقة الجاية حتى . جهز نفسك يا بطل .
===
بنت القمر
ربنا يستر فعلاً , بس مش حقدر اختصر علشان بامانة النص طويل جداً .
و بعدين الفكرة مش حتوه , بالعكس الفكرة حتثبت اكتر .
ربنا يستر و ميبقاش فى زعل من حد !!
حد يزعل منى .........
===
محمد
انا كل اللى بعمله انى بعمل سرد لأحداث مرت بجد .
دول أربع مواقف , حصلوا فعلاً و تزامنوا مع ما فعلته نهى , بعمل خلفية بس للى حقوله بعد كده . بجهز السكة للى جى . و حكاية الهدف دى حتعرفها قريب اوى .

عباس العبد said...

ست المرتفعات
و انا مش حتأخر بالباقى ان شاء الله .
===
حفصة
متستعجليش , انت نفسك اطول من كده
فاكرة الحديث اللى دار بينا , انا بعمله مقدمة , و بشرحه بطريقة سهلة و بسيطة , علشان النقط اللى اتكلمنا فيها توصل للباقيين . انتى مستعجلة علشان انتى عارفة المقدمة دى علشان اتكلمنا فيها , لكن غيرك ما يعرفهاش , اما النهاية فدى مفاجأة , لأنك متعرفيهاش و متكلمناش فيها , اصبرى بس للاخر و ربنا يستر .
===
هدى
ربنا يستر من الباقى .

زمان الوصل said...

كما قلت سابقا تعليقا على تدوينة "بنت القمر" -مش كلنا نهى رشدى

اعتبرت "نهى" بطله من اللحظه التى قرّرت فيها أنّها لن تدارى على "الفضيحه" و تسكت خجلا من ذكر ما وقع لها .. النتيجه لم تكن لتعنينى على الإطلاق .. تكسب القضيه أو تخسرها .. يهرب "شريف" أو يدوسها بسيّارته لم يكن ليغيّر من موقفى منها أى شئ ..

يكفى أى إنسان أن يفعل ما بوسعه أن يفعله و لا يمكن أن نطالبه بنتائج ليس هو وحده المسئول عنها و المتحكّم فيها

و بالتالى التفرّد فى قضية "نهى" هو فى موقفها هى .. كثيرات يتعرّضن للتحرّش يوميا و محدّش فيهنّ بيفتح بقّه مهما كان الجانى تافه و قابل للقبض عليه و إنزال العقاب به .. هؤلاء فعلا عليهن أن يقولوا "لسنا كلّنا نهى رشدى" لكن ليس من موقف الضحيه لكن من موقف المشارك بالصمت فى الجريمه ..

نفس الموقف من "نهى" سأشعر به إزاء من يقدّم بلاغا بانتهاك حقوقه أو آدميته داخل قسم الشرطه أو على يد ضابط بصرف النظر عمّا سينتهى إليه التحقيق .. فالاحترام و التقدير مستحق بسبب إيجابية أبطال هذه الحكايات و ليس بسبب ما انتهت إليه الحكايه ..

عباس العبد said...

زمان الوصل
الله يسامحك
ينفع تأجلى التعليق ده شوية .. و نحطه فى الاخر !!!
=====

مَلَكة said...

حسناً

كويس انك عدت للتدوين ومستنية منك الباقي
في الغالب بتصدمني بس ببقى عاجبني الكلام اللي انت كاتبه

تحية

بنت القمر said...

انا عن نفسي مفيش حاجه ها تزعلني ابدا غير ان اللي بقراه يكون مش مفهوم او مناقض نفسه:))
كنت افضل استعمال كلمه الليبراليين الجدد بدلا عن العلمانيين
- اكتر موضوع بكره اتكلم فيه موضوع الحجاب لكن الموضوع بيجر نفسه لكده
- بما انك مش عاوز تزعل حد وانا مش فارق معايا حد اصلا(علي الاقل اللحظه دي)
- كل اللي قالوا ان نهي مش محجبه
قالوا سمعنا الاصوليين بيقولوا عشان نهي مش محجبه
- قالوا الاصوليين ها يقولوا عشان نهي سافره
- نظام خدوهم بالصوت!!
- كل اللي قالوا كده ما جابوش نص
= بصراحه كل البنات اللي قالوا كده عندهم موقف حاد جدا ومضاد للحجاب وده واضح من تدويناتهم او من الجروبات الفيس بوكية
كل البنات اللي تقصدهم عندهم موقف حاد من المد الديني تسميه الفكر الصحراوي الوهابي اي مسمي( ومع ان بعضهم محجبات( لكن ملتزمات بيه خوفا من الوصم الاجتماعي انهم غير ملتزمات لظروف مجتمعيه او ضغوط عائليه!
وليس عن قناعه تامه واكيدة بالطقس الديني بغض النظر عن وجوبه شرعا او عدم وجوبه وبدون الدخول في الجدليه اللانهائيه في النقطه دي
-صديقه تسرعت جدا وقالت ان محاميه نهي مدفوع لها من السلفيين للانقلابعلي نهي ولتشويه بطولتها ونسيت من غمرة الانفعال ان كمان نجلاء الامام مش محجبه
كخخخخخ
يعني ما ينفعش الاصوليين يضربوا بيها حد
كل الفكرة وساخه محاميين مش اكتر
= معجبه جدا بالصورة اللي انت حاطتها في الزمن ده مكنش في وصم اجتماعي ضد المحجبه بوصفها متخلفه ولا ضد الغير محجبه باعتبارها صايعه
واخد بالك من المفارقه الجميع موصومات
!!!
- في هذا الزمن لم يكن تغطيه الراس رمز ديني زي ما حبايبنا الليبراليين بيقولوا
= فكرتني بمقال قريته عن اهل البابا شنوده ومن تبقي من اقاربه في الصعيد(بنت عمه)وكانت تغطي راسها سالتها الصحفيه انتي محجبه ليه ودينك ما فيهوش حجاب
ردت وقالت ده مش حجاب بس اخرج ازاي في الشارع راسي مكشوفه!!
اذن تغطيه الراس في الظرف المكاني والاجتماعي هي نوع من الحشمه او الوقار بغض النظر عن الديانه!!
ده قبل قرف الوصم اللي احنا فية
- فكرتني كمان ببوست الحجاب عند نائل كان بيقول انه مجرد قطعه قماش تافهة
كانت النساء بترتديه الا فترة الشخلعه التلاتين سنه قبل التسعينات!!
يعني الفترة دي كانت نوع من الاستثناء
شفت بقي انا مش بزعل حد ازاي
يا ريت انت بقي تقول فكرتك بوضوح وقوة لانه كده كده لازم حد ها يزعل
تحياتي

hartaka said...

بص يا رامز
انا هاعلق علي نقطتين :
واحدة الي ذكرت فيها اخوانا العلمانيين في التدوينة 2 الي شايف فيها ان الي قالوة دة يعتبر مسخرة بعد ما اقتطعت جزء من البوست عندي بصفتي واحد اسطوري منهم حسب كلامك

انا اهم حاجة ركزت عليها لما كتبت , الثقافة والدين والعادات ودول اكثر ثلاثة بيوجهوا الانسان في حياتة , مش الحجاب وبس
البنت كانت مثقفة وعارفة حقوقها كويس وتصرفها كان نتيجة لدة علشان كدا قولت هي انسانة طبيعية
مش متدروشة ولا مغيبة دينيا واجتماعيا باقحام نصوص من زمن فات في عقلها من نوعية انتي بنت مترديش لتتبهدلي او عورة , عيب تعلي صوتك في الشارع او ناقصة عقل ودين , او علشان مشمحجبة وخلافة كتير , فانت اقتطعت جزء من التدوينة وعممتها علي انها مش محجبة فاصبحت جدعة وناصحة مش متخلفة زي ما ناس تانية بتقول , وكأن القضية قضية حجاب مش ثقافة عامة

اما استشهادك بصورة الدفعة الاولي لخريجات جامعة فؤاد كونهم انهم بيفكروا واهم لابسين حجاب

الصورة دي متاخدة سنة كام عندك ؟؟؟ وقتها كان مصر بتخرج من مرحلة لمرحلة وكان وضع الست مختلف تماما , وكان فية تغير اجتماعي كبير بيحصل علي مستوي الافكار والعقائد والدين ,
وبعدها باقل من ثلاثين سنة الحجاب كانت نسبتة قد اية بين الطبقة الوسطي ؟؟ تقريبا منعدمة
دول علشان يخشوا الجامعة اصلا كان بطلوع الروح , وبالمناسبة , سهير القلماوي الي وسط الناس في الصورة قلعت الحجاب بعد كدا
الموضوع مش دول مبيفكروش ودول بيفكروا , الفكرة ان الحجاب تخلف ومش مظهر حضاري ولا جمالي ولية ابعاد اجتماعية قديمة ودينية مش صح

مع احترامي للمحجبات ومش شايف اني قولت حاجة غريبة ولا غلط , الحجاب ضد الحياة المدنية تماما لانة بيفرق في المظهر بين مسلم ومسيحي واحنا مش في دار عبادة , ضد الفنون , زي السينما والمسرح وحاجات كتير احنا في غني عن ذكرها دلوقت , مش عايز اخش في جدل ديني لانة مش موضوعنا اصلا , ووصم المحجبة بانها متخلفة فدة مش شتيمة لو ركزنا في المعني اللغوي للكلمة
انها تخلفت او ارتدت للوراء
لسة كلامي غريب ؟


رقم 2 تعليق علي كلام كراكيب لما قال انة قال قبل كدا للبنات ان الي يتحرش بيها تبلغ عنة القسم ووقتها البنات اتريقوا علية وبعدها هتفوا وهللوا للبنت بعد الي عملتة

فية نقطة برضوا البنات معذورة جدا لان مش كل مرة هتبلغ الموضوع هيمشي في صالحها وممكن ينقلب لضدها وافتكر موضوع هند وشيماء واهو حصل بعدها علي طول شوف دي وانت هاتفهمني اكثر
http://www.almasry-alyoum.com/article2.aspx?ArticleID=184760&IssueID=1211

الذهاب للقسم مش حل وحيد للمشكلة لان الدولة عندها اوامر غير رسمية , مش اي حد يروح يبلغ عن حد في القسم الموضوع يمشي كدا بسهولة , لان الموضوع لو هيمشي كدا قضايا كتير هتتفتح ودة مش من مصلحة ناس كتير فوق , علشان كدا بتلاقي حالة من اللامبالاة والتطنيش المقصود لما تيجي تخش اي قسم علشان تعمل اي حاجة , وعندك اخر حاجة البنت الغلبانة الي اتحرش بيها سواق الميكروباص , اية الي حصلها في الاخر , لبست قضية ,

انا شايف ان اثارة قضايا زي دي اعلاميا شىء كويس جدا ودي اهم نقطة لان دة بيشكل راي عام ممكن يمثل ضغط عند اصحاب القرار , بس المهم يفكروا صح كيفية طرحة

شيخ الجبل said...

بالنسبة للقرآن الكريم فإن آدم هو المسؤول الأول عن المعصية و حواء تأتي في المرتبة الثانية {فَأَكَلَا مِنْهَا فَبَدَتْ لَهُمَا سَوْآتُهُمَا وَطَفِقَا يَخْصِفَانِ عَلَيْهِمَا مِن وَرَقِ الْجَنَّةِ وَعَصَى آدَمُ رَبَّهُ فَغَوَى }طه121،(يعني الإثنين أكلوا، و آدم هو من يتحمل المسؤولية الكبرى:
{فَقُلْنَا يَا آدَمُ إِنَّ هَذَا عَدُوٌّ لَّكَ وَلِزَوْجِكَ فَلَا يُخْرِجَنَّكُمَا مِنَ الْجَنَّةِ فَتَشْقَى }طه117
يعني يشقى آدم بس (أو يشقى أكثر) أما الحية فلا علاقة لها بالموضوع
و يكفينا شماعات نلقي عليها أخطائنا و فشلنا و .... غوايتنا