Wednesday, November 12, 2008

الحمل طلع كاذب - الأخيرة

لأن تحقيق العدالة

لا يجب أن ينتظر الظروف

--

هل كان من الممكن ان يرفض ادم الأكل من الشجرة ؟

لا يوجد خاطىء بدون خطيئة . و لا توجد خطيئة بدون سقوط فى فعل شر .

لو لم يكن ادم " يشتهى " الأكل من الشجرة , لما نجحت حواء فى اغوائه . هو فقط كان يبحث عن مبرر لما يريده \ المرأة التى أعطيتنى هى أغوتنى فأكلت .

 لو لم تكن حواء " تشتهى " الأكل من الشجرة , لما نجحت الحية فى اغرائها . هى فقط كانت تبحث و تنتظر مبرر ما لفعلتها \ الحية هى غرتنى .

 أن عملية السقوط و التبرير هذه , البادئة منذ أدم و حواء و الواصلة حتى شريف و نهى هى ما تحكم تصرفاتنا . فنحن مجتمع قد تغلغلت فيه ثقافة التبرير , كل ما نفعله هو نتيجة لحدث ما . لا نملك شجاعة الأعتراف بالخطأ . مجتمعنا – برجاله و نسائه – قد أستكان لفكرة ان المرأة هى أصل كل الشرور و هى التبرير لكل شىء * .

الا أن المجتمع قد فوجىء بأن هناك حواء \ نهى , قد قالت لا للحية , رفضت الغواية . مما أسقط كل وسائط التبرير لشريف و أجبر المجتمع للمرة الأولى على ان يرى " خطيئته " واضحة كالشمس , لا وسيلة واحدة لتبريرها .

--

نهى لم تفعل ذلك لأن الظروف ساعدتها كما يدعى محبو الكهوف . نهى لم تفعل ذلك لأنها علمانية غير محجبة , أو متدينة محجبة . نهى لم تفعل ذلك لأنها بنت الجامعة الأمريكية * . نهى لم تفعل ذلك لأن مفهومها للعدالة مغاير . نهى لم تفعل ذلك لأن ثقافتها مغايرة . نهى لم تفعل ذلك لأن لديها نية التغيير . نهى فعلت ذلك لأن لديها  أرادة و فعل التغيير و كانت تنتظر فقط الفضاء المناسب . نهى لو قرأت البوست عن المُدَوِنة التى تعرضت للتحرش , لم تكن لتنصحها بأستعمال دبوس أو ترقع بالصوت بل كانت لتنصحها بالفعل ذاته . نهى لم تنتظر نموذج تحتذيه و تهتف خلفه بل فخخت ثقافة مجتمعها بثقافتها الخاصة , لانها كانت تريد ان تفعل ذلك .

--

كل ما أتمناه الا نلعق جراحانا على عتبات نهى المقدسة , نهتف لأننا تعودنا الهتاف . او نعلق فشلنا على نجاحات نهى , نختبىء خلف انتصارتها ,  او نبكى خطايانا و اثامنا عند قدمى نهى مسيحة الرب , الا ننتظر من نهى ان تقول لنا : اذهبوا , مغفورة لكم خطاياكم .

--

دعاء .. يارب

أدعو أن تنجب مصر, كل شهر , شخص قادر بثقافته على تغيير ثقافة المجتمع . 12 شخص فى السنة يصنعون التغيير , بدلاً من سماعنا  كل شهر عن حريق او غرق او قتل او موت او انهيار عمارات او سرقة .,

نريد كل شهر نهى جديدة , لا نهتف ورائها و لا نقدسها . لا نصنع منها ايقونة او مسبحة . لا نصنع منها زجاجة برفان نتعطر بها و تدر علينا الملايين , بل تكون رغيف خبز يصل مدعوم الى كل الجوعانين .

يا رب

كل ما أرجوه ان اكون نهى صغيرة أستطيع ان اصنع تغيير ما فى محيط أسرتى الصغيرة .

و لكن .. لأن ليس كل ما يتمناه المرء يدركه .

لذا

يا اخواتى الليلات , لا تفرحن كثيراً بالمولود .. فهو ليس مولودكم , و حتى الحمل طلع كاذب .

 

لا يتبع ..

نهاية .

 

--------

* راجع كلام المحامى " ماشية تتقصع " !! . أو من برر بأن ظروف نهى لن تتكرر حتى يبرر مقدماً أى فعل تخاذل قد يصدر منه !!!! .

** راجع ما كتبه عبد الرحمن  1913 " وان نتخيل أن الفتاة التي ذكرت اسمها في الوثائق كانت مصرية بسيطة، ولم تخش الفضيحة، ولجأت للقانون، لكن المثير أن أحدا لم يعتبرها بطلة في هذه الفترة السحيقة، منذ أكثر من 95سنة "

 البوست 2

22 comments:

Alkomi said...

احلى حاجة عجبتني الا تكون نهى عتبة يلعق عندها المجتمع اثامه و جراحه

فكرتني باللي كان طالع في فيلم شفرة دافينشي اللي كان واخدمن جلد ذاته وسيلة للتكفير عن خطاياه

استمتعت جدا بمعظم و ليس كل لالامان الشديدة هذه السلسلة

و يا عم لو مش هتكتب غير عشان نهى رشدي و حالتها

احب ابشرك انك لو شفت اتوبيس 244 في اسكندرية هتكتب كل دقيقة بوست

هههههههههههههههههههههههه

وفقك الله يا رامز و يجعل كتاباتك كلها تنوير

Hend.feps said...

أدعو أن تنجب مصر, كل شهر , شخص قادر بثقافته على تغيير ثقافة المجتمع . 12 شخص فى السنة يصنعون التغيير , بدلاً من سماعنا كل شهر عن حريق او غرق او قتل او موت او انهيار عمارات او سرقة .,

نريد كل شهر نهى جديدة , لا نهتف ورائها و لا نقدسها . لا نصنع منها ايقونة او مسبحة . لا نصنع منها زجاجة برفان نتعطر بها و تدر علينا الملايين , بل تكون رغيف خبز يصل مدعوم الى كل الجوعانين .

-----------------------

امين

شكرا على موضوع الحمل طلع كاذب

شكرا على مدونتك

شكرا انك انت

Fantasia said...

عزيزي رامز

أنا معاك 100% في اللي انت قولته في الجزء ده.. احنا مش محتاجين نعمل مقام لحد عشان عمل الصح واللي من الطبيعي انه يتعمل في حالة وقوع جريمة.. لكن في الوضع اللي احنا فيه أنا مش شايفة ان استخدام نهى كرمز وقدوة للبنات خرج عن حدود المعقول.. لازم نحذر من الوقوع في فخ تحويلها لتميمة، أنا معاك، لكن أنا شايفة ان الاحتفاء بيها في حدود الواجب شيء مهم وملهم.. والدليل تقدم بنات تانية ببلاغات بعد تعرضهم للتحرش.. وكل ما بنات اكتر اتشجعت كل ما الهالة اللي اتعملت حول نهى تلاشت، المسألة مسألة وقت

محدش يختلف معاك ف اللي انت بتنادي بيه.. أنا واثقة من نبل هدفك واتزان موقفك ورؤيتك.. إنما تعليقي على بعض ما ورد من تفاصيل في سياق تحليلك السابق، اللي انت افتكرته هجوم مع اني مش غرضي اهاجمك ابدا، كان لتلافي اختلاط الأمر في ذهن بعض القراء اللي يمكن ياخدوا كلامك بشكل سطحي

افتراض وجود مساواة كاملة بين الرجل والمرأة ومطالبة المرأة بانها تتعامل على هذا الاساس، برضه كان نقطة تانية لازم الفت نظرك ليها.. الحكاية مش ملاك وشيطان ولا ابيض واسود.. الحكاية ان فيه خلل.. وانا عارفة ان هدفك علاج هذا الخلل.. انما عشان اطالب المرأة بتوجيه بوصلة رد فعلها بما يتناسب مع مفهوم الندية والمساواة، فده يستوجب وجود هذه المساواة في الواقع. ما تنساش ان المرأة في مجتمعنا لا تجيد سوى البحث عن الطرق الملتوية والخلفية للدفاع عن نفسها، ودا بسبب وضعها اللي فرضه عليها المجتمع اللي سلبها كل حقوقها المشروعة، حتى البوح بما تعانيه من ألم

انت بتقول مفيش سيطرة ذكورية، وبتتكلم عن المجتمع ككيان مفرغ وبتلقي المسؤولية على هذا الكيان.. طيب هنوصل لحل ازاي طالما رافضين نواجه الواقع ونحدد المسؤول عن هذا الخلل؟.. هو أنا ليه لما أنت بتنتقد المرأة مش باخد الكلام على نفسي، إنما لما أنا انتقد الرجل بتاخد الكلام على نفسك؟.. مش انت تحديدا كرامز.. أنا بتكلم عن الرجل عموما.. يعني تلاقيكم كلكم مستنكرين توجيه اصبع الاتهام للسيطرة الذكورية، مع ان انا مش شايفة أي ضرر من انتقاد الاستسلام الانثوي!! دي حاجة أنا مش قادرة افهمها. وتفسيرها الوحيد من وجهة نظري، ان تحت جلد كل رجل، حتى لو مثقف ومتفتح الذهن، فيه نوع من التعصب لجنسه.. فيه ترسيبات للثقافة الذكورية خاملة في عقله الباطن، يتم استنفارها بمجرد توجيه أي انتقاد لبني جنسه من افراد هذا المجتمع.. حتى لو بيعتبر نفسه خارج المنظومة الثقافية اللي بيتم انتقادها

انت اتكلمت مشكورا عن تفخيخ ثقافة المجتمع.. أية ثقافة تقصد؟ لو مش الثقافة الذكورية، تبقى إيه ماهيتها بالظبط؟ ممكن لو كلمة "الذكورية" بتزعل وبتعمل حالة استنفار اوتوماتيكي، نغير الكلمة ونسميها ثقافة السيكو سيكو مثلا.. لكن تعريفها هيفضل هو هو.. هنفخخ ثقافة السيكو سكيو اللي بتمجد وتؤله الذكر بينما تجعل من الانثى كائن دوني مسلوب الارادة.. لأن ثقافة السيكو سيكو هدفها ترسيخ قواعد المجتمع الأبوي.. اوبسسس.. "أبوي" دي كمان ممكن تعمل مشكلة.. نخليها إيه طيب؟ نخليها المجتمع البيكو بيكو.. والسيكو سيكو والبيكو بيكو لازم تكون نتيجتهم الطبيعية هي غياب العدل والمساواة.. لأن السيكو سيكو عايز يكون هو المهيمن، ولا يقبل ان يشاركه أحد في هذه الهيمنة المطلقة، أو يقلل من امتيازاته المكتسبة عن طريق نظام البيكو بيكو

ينفع كدا؟
ههههههههه

خالص تحياتي.. وارجوك ما تعتبرش دا هجوم.. أنا بفضفض معاك

عباس العبد said...

محمد الكومى
ما احنا عندنا اوتوبيسات زيه , ربنا يستر بجد .
===
هند
الله يخليكى يا فندم
و متشكر جداُ على الكلام الجميل ده
و نورتينى

عباس العبد said...

فانتازيا التى تدافع عن المرأة حتى الموت
قبل ما أرد عليكى و علشان تعرفى انا كتبت الكلام ده ليه , فى مقدمة لو تسمحيلى اقولها .
اول ما سمعت عن نهى و الحادثة و ما فعلته مع الولد و الحكم اللى صدر ضد المتحرش , فرحت جداً و قلت أخيراً حد اخد حقه و فى عدالة مشيت على رقبة شخص المجتمع بيديله الحق فى انه يكون قليل الأدب .
و كانت نظرتى لنهى متجردة من أى نظرة " نوعية " مكنتش شايفها " بنت اخدت حقها " كنت شايفها عادى جداً , فرد فى المجتمع و حقق عدالته بطريقة ما زى ما البنت البلدى بتقلع اللى فى رجلها و تقطعه على دماغ " المتحرش و قليل الأدب " , و سكت .
و لو تفتكرى حتى مكتبتش أى بوست تعليق على الحدث بل كنت بنزل اغانى و شوية كلمات لناس غيرى و لما ملقتش حاجة اكتبها , توقفت تماماً . يعنى مكتبتش حاجة عن نهى و لا فرق معايا الموضوع بتاعها , لانى اعتبرته عادى جداً , رغم انى كنت مبسوط , زى ما عماد الكبير كنت مبسوط و مكتبتش حاجة برضه , لأن الموضوع مش محتاج تعليق , و سكت خالص و توقفت عن التدوين كمان , لو تفتكرى .
لكن .. و اه من كلمة لكن ......
انا بتخنق من الهيصة و الطبل و الزمر ..
طبعاً كنت بعدى على المدونات و بتابع المقالات و الجرائد و التلفزيون و شفت العاشرة مساءا و اللقاء مع نهى , و كل الحاجات دى , لغاية ما فى مقال حسسنى , انى " ساذج و مش فاهم حاجة " .. و احدة كتبت عن " المجتمع الذكورى و خطاب السلطة و خطاب المقاومة " .. هنا بس الدم ضرب فى دماغى , و قلت بس كده " الناس اتجننت " , و ظهرت بقى التدوينات من نوع كلنا نهى و كلنا مش نهى و الرد بالأسوأ و المناخوليا دى , او زى ما سماها كراكيب " الحزق التدوينى " . و كل بتوع التضامن المعنوى و نظرية الدبوس, لقيتهم فجأة بقوا ثوار و مقاتلين , اتخنقت زيادة . دا انا اعرف البنت شخصياً و عارف كانت مخنوقة من اللى حصل ده قد ايه , و هانى كان حاضر القصة من الأول و قالهم " الواد لازم يتمسك و يتشد من قفاه و يروح القسم " كلهم بلا أستثناء سخروا منه و قالوله " ايه الهبل ده " دلوقتى خلاص بقيتوا مقاتلين ؟!!! .
طبعاً انتى قريتى التصنيف اللى انا عملته , ليه عملته ؟ لأنى فى نفس الهيصة دى لقيت " الكهفاوية " طلعوا , الناس اللى هم أى حد بيعمل حاجة صح , يفطسوه و يقولوا الظروف و الحاجات دى مش حتكرر , علشان يهبطوا الناس و يثبطوا العزيمة و يحسسوا الناس أن اللى حصل دى معجزة و مش حتتكرر تانى , دول اللى بيحدفوا طوب على أى حد بيعمل حاجة صح .
ممكن تقوليلى , رد فعلك انت حيبقى ايه ؟
انت تابعتى طبعاً , و عارفة انا بتكلم عن ايه . فى بنات من حقها تفرح , البنات اللى عايزين حد يجيبلهم حقهم , و دول مش بتوع هيصة و ظيطة , البنات الطيبين , زى كتير اعرفهم , اللى نفسهم يمشوا راسهم مرفوعة , دول اللى نقف جنبهم , لأن صوتهم مش طالع , مش زى بتوع الهيصة .
حفصة فى تانى بوست سئلتنى انت مش فرحان ؟ , قلتلها فرحان طبعاً باللى عملته نهى . بس انا مش غاوى هيصة , علشان كده مكتبتش . فهمتى انا قصدى ايه ؟
لو انتى عايزة تحليليها من ناحية تانية , مجتمع ذكورى , بس بعقلانية انا معنديش مانع , و اعترفلك كمان اننا مجتمع ذكورى , يعنى سيكو سيكو على الأخر و بيكو بيكو على الأخر . بس بلاش هيصة , انا اتخنقت من الموضوع ده
طيب لما عماد الكبير جاله حقه , يا بنات , معملتوش هيصة ليه ؟ و لا عماد مش مواطن ؟
عايز اقولك ان من ضمن ثقافة المجتمع السيئة , حكاية الهيصة .
فهمتى قصدى ؟
لو فهمتى قصدى
نكمل مناقشة فى النقط اللى انتى عايزاها .

هدى said...

طيب

اولا تسلم ايدك

تحليل .. رغم انك طلعت عنيا لحد ما جبت اخره

بس فيه قدر عالي من وضوح الرؤية

ثانيا :

تقريبا امبارح كنت بقول نفس اللي بتقوله يعني ان كل واحد يعمل بطريقة مستقلة اللي هو شايفه صح في طريق التغيير .. واحدة واحدة اللي بيغيروا هيشكلوا صف طويل .. يقدر هواة الإنقياد انهم يشفوه ويمشوا وراه

..

تحياتي

م/ الحسيني لزومي said...

من اجل مصر
شارك في الحملة الشعبية للقيد بالجداول الانتخابية وادعو غيرك
ضع بنر الحملة علي مدونتك
البنر موجود علي مدونتي
ارسل ميلك اذا كنت ترغب في وضع البنر نرسل لك كود البنر

عالم صوفي said...

{امز
بشكرك باسم كل بنت في مجتمع مريض على كل الكلام الجميل اللي قلته في التدوينات دي
كلها
تسلم ايدك
انت حد جميل اوي

^ H@fSS@^ said...

قداستك
قد يكون ده ردي الوحيد و قد يتبعه اخرون
فاستحملني لو سمحتك
انت كتبت 8 بوستات عن الموضوع و دخلت فيهم كذا عامل
ححاول اني مخرفش قدر الامكان لكن يعني افكار كتيرة بتيجي في بالي و مش ملاحقة اوضبها مع اني بقالي فترة متابعة و بقرا فقط و مش بعلق خالص املا مني في تصنيف كلامي و لكن فشلت

حعترفلك اني زعلانة من اسلوب كلامك لكن مش من معناه
لانك جامع الكل في سلة واحدة ايا كان تيارهم ايه
يعني انت اتكلمت كتير اوي عن اللي هيصوا و فرحوا لما نهى كسبت قضيتها ضد شريف و ان ده عادي و مكنش حقهم يهللوا و يهيصوا و يعملوا فيها الفلة
او زي ما انت قلت زمان حناكة المحتاجة
كلامك ده مش حعتبره موجه ليا كشخص
لكن من حقي برضو ارجع اكررلك و اشرحلك انا كتبت عن نهى و قلت كلنا نهى ليه
لانه بكل بساطة ،و دي المرة المليون اللي كررت فيها الكلام و مش بس مدونات لكن كلام بيني و بين اصدقاء او من اللي بشوفه في مجمل تعليقات الناس، ان البنت اللي بيتم التحرش بيها من حقها ترد على التحرش ده ايا كان ايه نوع الرد، فكانت النتيجة ان ناس كتيرة اول قطاع منهم كان البنات نفسهم انهم مش عاوزين يردوا على التحرش ده و دي بحد ذاتها مصيبة و فضل الواحد يتكلم و يقول لكن لا حياة لمن تنادي
فلما حصل موضوع نهى كان افضل دليل مادي واقعي على قدرة البنت على الرد مهما كلفها ده من سمعة و محاربة من اطراف حقيرة اخرى
هل فهمت غرضي من التمسك بنهى و باشاعة شبة جملة كلنا نهى؟؟
انت شايف ان اللي نهى عملته عادي و ميستحقش
لكن ما هو العادي يا عباس؟؟
مش المفروض ان العادي يعني حاجة نكون معتادين عليها و بتتم بشكل يومي او ان شاء الله اسبوعي و متالف عليها في مجتمعنا، صح؟ لو غلطانة صححني
لكن اعتقد مثال نهى مش عادي
ولا مالوف
حسب النظريات هو ما يجب فعله، صح
لكن حسب المالوف و المعتاد عليه هو ليس عادي
و شتان بين الاتنين
النظريات حاجة و العادات و التطبيق اليومي حاجة تانية خالص
مثال عليها
المفروض ان اي واحد طالع من شارع جانبي يستنى الحمارة اللي سايقة في الشارع الرئيسي و ميكسرش عليها
لكن الحاصل بشكل واقعي ان المتخلف اللي جا ي من الشارع الجانبي بيكسر على اللي جاية من الشاعر الرئيسي و كمان بيسبها لو هي زمرتله و مرضيتش تمشي من قدامه و تمسكت بحقها
فهمتني؟؟

اما عن الاخرون سواء اللي اتبلوا عن نهى كونها اسرائيلية عميلة و خاينة او اللي تملصوا من كونهن نهى فقط من اجل السباحة ضد اي تيار والسلام فدى له اسباب كتيرة
مش ناوية اخش في ذكرها هنا
كونك في مجمل كلامك معترض على البنات اللي بيطالبوا بالمساواة و مع ذلك لسه عاوزين عربيات مترو منفصلة او ميتاخروش في شغل
فاعتقد انت تعرف وجهة نظري ايه من الموضوع
و مع ذلك كتير من البنات طالعين بحملة كلنا ليلى اللي هي في رايي و بكل صراحة حفلة ندب و بكاء و شكوى مافيش منها اي استفادة ولا شفت لها اي نتيجة او سمعت عنها حاجة غير ذكرى سنوية ذات حرارة مرتفعة سرعان ما بتروح لحال سبيلها
خد بالك ان اغلب النبات اللي رفضوا يكونوا نهى و فضلوا يكونوا ليلى هما نفسهم اللي بيختاروا عدم المواجهة و اخذ الحق بغض النظر عن نتيجة اخدان الحق ايه(اللي هو التعرض لتشوية السمعة و تركيب الانثى الغلط لانها هي الي سمحت لنفسها بالتحرش بيها سواء ان لبسها كان ماله او ممالوش)
يعني ببساطة الايجابية و المواجهة ضد السلبية و الخوف و تفضيل الانزواء

نقطة كمان اعلقك عليها
انت قارنت بين التحرش الحادث لنهى باللي حصل لعماد الكبير
بس فيه اختلاف بينهم
و في النهاية برضو عماد اخد حقه من الاعلام و من فرحة الناس بيه من المدونين بنات كانوا او رجالة
دي اعذرني فيها مختلفة معاك كلية انه مافيش حد اهتم بموضوعه
لانه اصلا محدش اخدها من وجهة نظر انه راجل فمش مشكلة و طظ فيه، الواحد تعامل مع مشكلة عماد بشكل انساني بحت، ولانه يندرج تحت بند تعذيب الشرطة مش تحت بند ان حد تحرش بيه و كان ند له، فيه فرق كبير يا رامز.

نقطة كمان ان الدفاع عن نهى لا يعني اني شايفة المجتمع ذكوري متخلف
لكن نفس الوقت ده مينكرش ان هناك مشكلة في رجالة المجتمع و خليني اكون منصفة واقول في اغلبهم و ليس كلهم يا سيدي عشان متزعلش و لاني مش بحب التعميم
لكن حسالك سؤال
هو مين اللي خلى امي و امك و ام الناس دي كلها تعتقد تاخر البنت عيب و ان ختان البنت واجب و ان البنت كلها عورة و ان اللي تجيله بنت بينام مهموم و ان البنت متخرجش من بيت ابوها غير لبيت جوزها او قبرها؟؟
مين يا عباس اللي فكر في كل الموروث الثقافي ده و نشره و ارهب بيه غيره؟؟؟
مهما دورت و من وجهة نظرك لقيته ست فصدقني حيكون فيه راجل وراها
راجل وراها هو اللي كممها و هو اللي خوفها و فرض عليها سيطرة
لو احنا عندنا رجالة عادي عندهم بنت تخرج مع صحابها الرجالة
عادي انها تتاخر بحكم شغلها من غير ما حد يطلع عليها سمعة مشبوهة
عادي انها تلبس و تقلع و تحط مكياج و تعمل شعرها من غير ما يتم وصمها انها منحلة و قليلة ادب فصدقني مش حتلاقي ام حتروح تقول لبنتها عيب تعملي كدا و متعمليش كدا لان سبب الخوف انتفى خلاص
و لان مرجعية كل ام من ارهاب بنتها و تحديد دورها جاية من خوفها من كلام الناس عليها و من نظرة الرجالة بتوع مجتمعها لبنتها
و لان كل القيود دي انا متاكدة مش حتكون موجودة لو الراجل مارهبش بيها ستاته
احنا وصلنا لمرحلة ان البنات نفسهم بيرددوا فكرة انه اتحرش بيها مع انها مكنتش لابسه حاجة خارجة و لا حاطة مكياج
يعني نفس البنت خارجة و هي حاطة لنفسها حدود و قيود مخلوقة من الراجل كسبب و حق مشروع للتحرش و مع ذلك بيتحرش بيها
لو حتتكلم عن ثقافة قهر بقى فدي مشكلة تانية اللي هي بتتمثل بكل بساطة في عدم ايمان مجتمعاتنا في قيمة الفرد نفسه سواء كانت بنت او ولد
لكن مش السبب فيها البنت يا عباس
السبب فيها هو تركيبة مجتمعنا
الولد اللي بيتقهر عشان هو اعزب و مالهوش قيمة غير لو كان ملحق بعيلته فهو معاك حق مقهور منهم لكن البنت مقهورة اكتر منه كمان
لسه الولد عنده حرية اكتر من البنت مهما كان مقهور
لانه معليهوش قيود زي ما هي على البنت

بص انا طولت بما فيه الكفاية
و مش عارفة اذا حكمل ولا لا
زي ما قلت لك
بقالي اسبوع و اكتر بتابع
حاولت انمقلك رد يعبر عن رايي من غير اي خبط في حد لكن ده اقصى قدرتي الحالية و لاني مش عاوزة الكلام يضيع مني
اسفه
وارجوك تتقبل اعتذاري اولا لطول التعليق
ثانيا لتداخل ردود افعال مع بعضها
و ارجو انك متعتبرش اي من كلامي هجوم شخصي لا عليك و لا على غيرك
و اعتقد اني حاخد التعليق ده و ازود عليه اذا قدرت و يمكن انشره كبوست منفصل
بوستي عن كلهن ليلى طول و مط مني اوي و كل مادا الموضوع بيطول

اخيرا تحياتي
واسفه تالت لو كلامي حسيته متكرر و ممجوج
سلام

عباس العبد said...

هدى
الله يخليكى يا فندم . و اعتذر لو كنت طولت عليكى و زهقتك من كتر الرغى بتاعى . بس كويس أن فى نقاط مشتركة و دى حاجة مهمة .
تحياتى و أعتذراتى مرة تانى
===
عالم صوفى
متشكر جداً يا فندم على الأطراء الجميل ده
و متشكر لزيارة حضرتك . و صدقينى مش عارف أرد أقول ايه على الكلام الجميل ده .

عباس العبد said...

حفصت
اولاً هم 7 بوستات مش 8 , و بالتالى الخطأ ده حمال أوجه , بمعنى بما انك مش عارفة عدد البوستات فده معناه انك " مش مركزة " زى ما بتقولى فى أول تعليقك و ده يشكك فى مصداقيتك على كتابة نقد واضح و سليم , لأنه حيبقى مكتوب " بدون تركيز " .

شفتى الوش الجامد ده , هههههههههههه .
--
حرد عليكى بالتفاصيل : شوفى يا ستى
-1-
انا محطش الكل فى سلة واحدة و لا قلت انى مش فرحان باللى عملته نهى , انت سئلتينى السؤال ده فى البوست التانى و قلتلك انى مبسوط من اللى عملته . حسئلك سؤال حيوضحلك قصدى
لو ابنك نجح فى امتحان اخر السنة , حتبقى مبسوطة و لا لأ ؟ حتبقى مبسوطة طبعاً , لكن ده مش معناه انه عمل معجزة . هو ده قصدى من أنى مبسوط بس مش لازم اهيص , لأنه من الطبيعى انه لازم ينجح , و من الطبيعى انى انبسطت . لكن لا نجاحه معجزة و لا أنبساطى يبقى هيصة . فهمتى قصدى ؟
-2-
فى نقطة لازم نفهمها كويس علشان النقطة دى متاخدة على محمل شخصى بطريقة غريبة . انا مدون و اللى بيقرالى مدونين , فلازم لما أجى اشرح حاجة حستخدم مفردات " معروفة و منتشرة " فى أوساط المدونين .
لما أتكلمت على حادثة التحرش اللى تعرضت ليها المدونة , ليه مذكرتش الأسم و لا حطيت اللينك ؟ لأنى مقصدهاش هى بعينها , بشخصها بتدوينتها , انا كنت أقصد أن فى حالة تحرش تمت قدام عنين " الثوار العظام بتوع الأنترنت " و محدش فتح بقه و أتكلموا عن الدبوس , سواء كان حصل مع فلانة او حصل مع علانة .
لما اتكلمت عن بتوع الهيصة , الأسلاميين و العلمانيين , محطتش لينك برضه , لأنه مش أسلامى واحد و لا علمانى واحد اللى هيصوا , كتير جداً , و لو حطيت لينك يبقى خصصت مش عممت .
و لما أتكلمت على مش كلنا نهى , دى كانت حملة وسط المدونين و المدونين عارفينها . بس انا كان قصدى كل الناس اللى فكروا بنفس الطريقة بألقاء الأسباب على الظروف علشان ما يعملوش حاجة , لأن فى مقالات كتير و لقاءات تلفزيونية كتير و مدونات كتير كتبت بنفس المعنى , لكن انا مش حاحط لينك لكل مقال و لقاء و تدوينة كتبت كده , فرحت مختار الأسم الشائع " مش كلنا نهى "
نيجى بقى لحملتك , او اللى اعتبرتى انى بتكلم عليكى , انا كنت بتكلم عن الناس اللى خدوا نهى قدوة ( انا ضد القدوة ) لأن فكرة القدوة و الرمز دى , أكبر خدعة اخترعوها الناس علشان محدش يعمل حاجة و يجيبوا للناس احباط . خلينا نتكلم بصراحة , قبل نهى لو كان الموقف ده حصل لأى واحدة بتكسف , كان رد فعلها حيبقى أيه ؟ .. طيب و بعد نهى و اللى عملته , و مع نفس البنت اللى بتكسف و حصل تانى الموقف , تفتكرى حتعمل أيه ؟ ... حتفضل مكسوفة برضه , لكن لو نهى بقت قدوتها و البنت المكسوفة معرفتش تعمل حاجة , حتتكسر من جواها أكتر , و تحبط اكتر . علشان كده قلت فى التصنيف ( راجعى كلامى مع فانتازيا و تعليقاتى معاها ) ان دول اللى لازم المجتمع يجيب ليهم حقهم , لأنهم مش حيعملوا حاجة .

عباس العبد said...

-3-
انا بتخنق من قتال " الكوينز و الليدز " queens and ladies . بمعنى , البنت المالتى –ناشيونال اللى راكبة العربية المكيفة و ماسكة مج النسكافيه فى أيدها و عاملة كيرلى و طالعة بعد الشغل على ال" سبا " spa او ال" جيم " gym , دى بتخنقنى جداً . لأنها عايزة " حقوق " مش عارفها . هى ايه اللى يرضيها , محدش عارف .
تلاقى البنت دى يا " حغام " بتتألم و بتضايق من العيال " الزبالة " اللى بتعاكسها و هى فى عربيتها , و من السايس اللى بيعاكسها و هى بتركن , و فى نفس الوقت " بتقغف " موت " يا حغام " من البنت البلدى اللى بتقلع اللى فى رجلها و تنسله على دماغ العيل اللى بيعاكسها . يعنى لا عايزة ترد على اللى بيضايقها فى الشارع ,و لا عاجبها البنت اللى بترد , و لا عاجبها المجتمع الذكورى و لا عاجبها مجتمع رجولى و لا حد عارف الحقوق اللى ترضيها , بس طول النهار زن زن زن عن حقوق المرأة , ايه الأستهبال ده ؟ .. متخلنيش اقول كلمة قبيحة يعنى . محدش فاهملهم هم عايزين ايه , و لا هم عارفين , و كمان بيتنططوا أرحمونا بقى . اوقافولنا فى الأتوبيسات , قعدونا فى الميكروباصات , ارقصولنا فى المتروهات , طبلولنا فى التاكسيات . حوش أيدك .. متلمسنيش . عايزين نبقى وزيرات و جمهوريات و بلح أمهات , و فى الأخر الراجل هو اللى يصرف على البيت علشان مرتب " القطة " ليها لوحديها .

-4-
المجتمع كله يا حفصت فشل فى انه يربى . المجتمع تعفن لدرجة القذارة . المجتمع بيتآكل .
الأم مش عارفة تربى عيالها : حتى لو أفترضنا ان المرأة فى العقل المصرى درجة تانية فأكيد برضه و من المفروض مفيش ام حتقول لأبنها أمسك صدر البنات و انت ماشى و لو عجبك واحد اقطفه و هاته نعمل عليه ملوخية !!! .
أب معرفش يربى : حتى لو فرضنا أن المرأة فى الذهن " الذكورى " هى عورة و فتنة و انها لازم تتلم , فاكيد برضه و من المفروض ان مفيش أب حيقول لأبنه " اول ما تشوف العورة , أفتن على نفسك علطول "
مدرسة مش عارفة تعلم أصلاً علشان تربى
عايزه أيه من رجال دين مشغولين بحاجات غريبة , مرة الشيخ اللى جانبينا من فترة قريبة فى الجامع الاقيه بيتكلم عن " حسن معاملة العبيد فى الأسلام !!! " , طيب ما تتكلم عن التحرش أحسن يا عم , و وعظة أبونا من 10 أيام كده , الجمعة اللى فاتت عن الصدقة و العشور !!! , عشور ايه و صدقة ايه ؟ احنا لاقيين ناكل ؟ .. بدل ما يتكلموا عن الأخلاق , بيقولوا كلام يشل .
مفيش تربية و لا أخلاق , مجتمع متخلف . الناس مش عايزة تنضف . ما انا حاطط اللينك بتاع العاشرة مساءاً , شفتى اللى أتصل و قال انه بيحملها 30 % من اللى حصل , يعنى تاخدلها سنة سجن . ده عايزة تفهمينى انه عقل ذكورى .. ده عقل هبلولى متخلف , و لا المحامى .
عمرك شفتى محامى محترم فى قضية رأى عام , الناس مستنية نتيجتها , يقف قدام هيئة المحكمة الموقرة و يقولها بكل شجاعة " البنت كانت ماشية تتقصع " .. تتقصع يا ابن أم ترتر !!! . ده اهبل ده و لا معاه حاجة ياخد فيها ده و لا أيه بالظبط ؟ .
طيب افرضى طلبوا منه يمثل الواقعة .. يمشى يتقصع لهم فى المحكمة و يهز فى طي.... و تقولولى عقل ذكورى . المجتمع تعفن لدرجة انه كان عايز يدارى على الواد . تخيلى انت لما تانى يوم فى الشغل تسمعى بالصدفة شلة بنات شافوا العاشرة مساءا و واحدة منهم بتقول للتانية " البنت صدرها صغير ما يستحقش الزيطة دى كلها , امال لو شاف ده حيعمل ايه ؟ هىء هىء هىء " .
--
فهمتى قصدى يا حفصت و لا نقول كمان ؟

^ H@fSS@^ said...

لا مش سبعة عشان انت ضميت ستة و سبعة مع بعض كان ممكن تسميه سته بس و الاخير يبقى السابع لكن لما انت تكتب ستة و سبعة و بعديهم تكتب الاخيرة فمؤكد حتتحسب تمانية، ولا ايه قولك؟؟
انا كان بعرف انشف وشي، ايه رايك يا قداستك و مش خايفة من اي لعنات تصبها عليا، بس هات رغيف عيش، ماشي؟؟ هههههههههههه

حبتدي و اقولك
لما ابني ده يكون جايب مجموع من بعد طول عذاب و سهر و غباء دراسي و دروس خصوصية يبقى من حقي افرح و اضرب له عيارين كمان
صح؟؟
يا امتن لو مهتمش بنجاحه بعد ما ينجح من بعد طول سقوط تبقى كسرت همته، معملتلهوش تعزيز يعني و بناءا عليه حينتكس و يرتد لسابق عهده و يسقط و كانك يا زيد ما غزيت
نقطة رقم اتنين في التعليق الاول انا لسه مختلفة معاها لانها بتناقض اللي انا بطمح اليه
اللي هو اديت مثال واقعي
انا مش عاوزة اعمل قدوة
نهى دي مش حجيبها تعلم البنات دروس في فن النط على العربيات
انا بقلك جبتها مثال للبنات اللي قالو امينفعش
عشان اقولهم لا ينفع
واللي قالوا لا منقدرش عشان اقولهم لا تقدري
والبنت المكسوفة حتتكسف مرة على مرة لكن لما بعد فترة تبقى عارفة انها عادي تشتكي حقها اللي ضاع منها او انها اصلا خارجة محمية بالقانون مش حتتكسف يا عباس
بالعكس انا شايفة ان فكرة ان هي حتنكسر بزيادة فاحنا نجيبلها حقها دي متنفعش
لان مش معقولة كل واحدة حتخرج نخرج معاها ناس تانيين يحموها او يشدوا من عزيمتها
و مش لازم نعرف البنت ان حقها حيجيبهولها غيرها
لازم هي تبقى عارفة انها هي لوحدها بس اللي تقدر تجيب حقها لو عازته
بقى احنا عاوزين نصحصح البنات يا عبس و انت عاوز تتاويهم في البيت و نروح احنا نجيبلهم حقهم؟؟
مافيش حق بيجي لو صاحبه مطالبش بيه

و يا سيدي حقك عليا ف يموضوع كلنا نهى و ارجو انك تكون فهمتني من غرضي في اطلاق لفظ زي ده

بالنسبة بقى لموضوع الكوينز و اللايدز ده فانا مش عارفة ايه اللي دخله هنا بالشكل ده؟؟
و كمان لو دي ننوسة و بتركب عربية مكيفة مؤكد رجلها مبتلدش على ميكروباصات ولا تكاسي و لا اي مواصلات عامة ، صح؟؟
و كمان انت عارف رايي من الستات اللي بيطالبوا بحقوق المراة لكن عاوزين عربيات مترو منفصلة و حد يقوملهم لما يخشوا التكتك و الحركات دي
لكن ححاول اكون منصفة و اقولك انه حتى برا اي نعم سواء ستات او رجالة متساويين لكن لما ست بتدخل المترو او الاوتوبيس فيه رجالة عندها زوق بيقوم و يقعدها
تفسيرها ايه بقى معرفش
هي حصلت معايا كذا مرة و انا مش في مصر، هل افتكروني الست الحاجة معرفش بقى
و شفتها حصلت لستات تانيين برا
هل هي لسه من بواقي عصر الجنتلة
يمكن؟؟
و كنت اعتقد انك عارف اني مش مع حكاية اني اشتغل لكن وقت الصرف هو اللي يشيل لوحده لكن زي ما انت لمت على زمان الوصل انها حرقتلك بوستك
فانا حلوم عليك انك كدا حرقت لي بوستي
ماشي
خلاص اتكنسل بوست كلهن ليلى يا سيدي منك لله

نقطة رقم اربعة في الرد التاني
مش فاهمة ؟ظ يعني هل انت شفتني بقولك الكلام اللي انت قلته ده ولا ايه؟
طيب ما هو مش طبيعي انت ست تقول لابنها موضوع صدر الملوخية اياه ده؟
انا بقولك ايه اللي مخلي الست تخاف و تترعب على شرفها و عفتها و سمعتها و كلتها؟؟
ببساطة الراجل
و الدليل انه لما فيه مجتمعات بطل الراجل فيها يقيم اي وزن لشرف الست و عفتها و مشيتها و لبستها الست تحررت و ارتاحت
صحيح جزء من تحرر الست دي كان بثورة منها
لكن نفس الوقت مننكرش ان الثورات كانت دايما بتصيب قطاع صغير من اي مجتمع و تستمر لفترة وجيزة ثم تضمحل
لكن اهو بتكون زي الحجرة اللي حركت الماء الساكن
و بعدها بيتم التغيير حبة حبة
طبعا ده في اي مجتمع عادي
لكن بما ان مجتمعاتنا مش عادية فاحنا بعد ما تقدمنا تقهقرنا للوراء و بشدة كمان
و لعلمك مش بس مصر
انا فوجئت من كلامي مع زميل قطري ان قطر من خمسة وتلاتين سنة مكنش فيها حاجة اسمها نقاب و تغطية وش و حجاب
كانت اي ست قطرية بكتيره اوي تغطي مناخيرها بس بحاجة اسمها بطولة و طلع عشان اتقاءا للشمس و عشان متنزفش دم و البنت الصغيرة يدوبها تلبس قماشة خفيفة لزوم انه يعني محتشمة
المجمل عشان مخرجش برا الموضوع انها كلها حسب سيطرة الرجل على المجتمع اللي هو فيه

حضيف بس حاجة للبنات الملتشناشيونال،
اولا تقصد ايه بملتي ناشوينال؟؟ ما انا ملتيناشيونال اهو؟؟
عندك اعتراض لا سمح الله؟؟ وش بيكز على سنانة و بيرفع كمام قميصه
لكن لو تقصد البنات اللي مجملا متدلعين فحقولك لك حق
هما بس بيقولوا المسميات دي لزوم الفشخرة
بس دي مش في البنات بس
دي في طبقة معينة بحالها
يعني ولاد الطبقة بتاعت الفشخرة الكدابة دي برضو لهم حركات و قرعة جدا
ابسطها واحد بيحب يشتري كتبه بالانجليزي مع انه مبيعرفش يفك الخط ولا حتى كلمتين منه
بس عشان لما يروح الكلية و يتمرقع قدام الشلة يبقى منظره كول
وويا حبذا لو القصة مئة عام من العزلة لماركيز بما انها فرقعت كام موسم و بقت علامة المثقف الكوول و يتفشخر بيها كويس وهو لا عارف ماركيز ولا ان ماركيز ده يمثل كل ما هو على عكسه
شفت المصايب؟؟
دي ناس كلها مناظر
انت شفت في مجمل المدونين او الفيسبوكيين او اغلبنا حد بالطريقة دي؟؟
ولو شفت ابقى سلم لي عليه
لكن خلينا نتكلم في المجموع العام مش الخاص

ارجو اني اكون فهمت
لو انت حسيت اني مفهتمش فمعلش
قدرك و نصيبك
يا تحب ترجع تفهمني يا تقول عليه العوض و منه العوض و تنسى الموضوع
على العموم انا حاسة احنا قريبين من بعض في الافكار الاساسية بس مش عارفة احنا مختلفين على ايه بالظبط؟؟
خير ان شاء الله

Fantasia said...

إيه يا جماعة، بقى أنا اغيب شوية الاقيكم مسكتوا ف بعض؟ هههههههه

منورة يا حفصة.. أهه يا رامز فيه حد غيري بيدافع عن المرأة حتى الموت.. يعني أنا مش لوحدي

حرام عليك نرفزتلنا البنية. هي كفرت يعني عشان قالت كلنا نهى؟؟ يا سيدي أنا بتخنق م الطبل والزمر فوق ما حد يتخيل، لكن مش معنى كدا اننا نتجاهل الموضوع ونعتبره عادي.. لأنه بالفعل مش عادي.. وأوعدك لما يبقى عادي محدش هيفتح بقه.. حتى لو حكموا على متحرش بالاعدام.. خلاص كدا انبسطت؟

معلش بقى يا حفصة الحناقة الجاية دي تبعي.. ما أنتي خلتيه يفتح ف الكلام.. ورامز أول ما بيفتح ف الكلام بيخبط ف الحلل على طول.. المرادي الحلة وقعت على أم رأسي

نعم يا عم رامز.. البنات المالتي ناشونال مزعلينك في إيه؟.. هو الترقي الاجتماعي بقى حرام ولا عار؟ يا أخي من حقي يكون عندي عربية مكيفة.. هو أنا كنت سرقت تمنها؟ دا نتاج عملي وتعبي وسهري الليالي والسنين.. هو فيه إيه؟ المفروض افضل طول عمري اركب اتوبيسات عشان اعجب؟ يعني اي حد لو يقدر يجيب عربية مكيفة هيتردد؟ انت شايف المواصلات عندنا آدمية يعني وان وجود عربية دا نوع من الرفاهية؟ وهو حلال على الرجالة وحرام على البنات يعني ولا إيه؟ احنا بقينا في السعودية وانا مش عارفة؟

يا سيدي أنا لو كنت عايشة في انجلترا ولا سويسرا ولا عمري كنت أفكر اشتري عربية.. لكن في الوضع المهبب اللي احنا فيه ده مقدرش وأنا في وضعي الحالي اروح شغلي باتوبيس أو مترو، بكل صراحة.

وبعدين لو أنا متكلمتش عن حقوق المرأة مين اللي هيتكلم؟ هي البنت اللي في الريف اللي مااتعلمتش ولا تعرف حاجة عن الدنيا وبختنوها غصب عنها ويجوزوها غصب عنها هي اللي هتعمل مدونة ع الانترنت وتحكي مأساتها؟ ولو أنا دافعت عنها ابقى عملت جريمة؟ هو أنا مش فرد في المجتمع دا ولا إيه؟ ولا العمل العام ده شغلة الراجل بس، والست يا إما تتكلم عن نفسها يا اما تخرس!! حاجة غريبة جدا

وهو انت مش بتتألم لما تشوف أطفال الشوارع؟ مش بتتألم لما تشوف الشحاتين اللي شايلين رضع بيلفوا بيهم ف الاشارات؟ ولا دا منظر جميل والمفروض نفرح بيه؟؟ أنا مش فاهمة انت بتنتقد إيه!.. والمفروض لما اتعاكس ما اقرفش م اللي بيعاكسني كمان!! دا ايه المصيبة السودة دي؟

ف الأول قلت دا بينتقد البنات المترفة المتدلعة اللي عايشين عشان نفسهم والموضة والهيافة.. شوية لقيتك زعلان عشان البنات دول عندهم اهتمامات بقضايا المجتمع وحقوق المرأة!!!! إيه ده؟ هي عشان مستواها المادي كويس المفروض انها تكون تافهة وانانية عشان ترحمك؟ ترحمك من إيه؟ مصدعالك دماغك عشان عارفة ان عليها مسؤولية تجاه غيرها اللي ميقدروش يدافعوا عن حقوقهم وقررت تتحمل المسؤولية دي؟

يا رامز اسمحلي دي قمة التناقض.. هو ايه النموذج اللي ممكن يعجبك بالظبط؟ هو انت لو كتبت عن الفقرا والمعدمين نقولك إيه الصداع ده؟ انت مش معدم يبقى ما تتكلمش عن المعدمين!! هل دا منطق يعني؟ ولو اتكلمت عن حقوق المرأة نقولك انت راجل، مالك انت ومال المرأة خليك في حالك بلاش صداع!! أنا بجد مش فاهماك

وموضوع المرتب اللي مزعلك قوي ده.. كل البنات اللي عندهم استقلال مادي بينادوا بالمساواة والمشاركة في تحمل اعباء الاسرة. مين بقى القطة اللي عايزة مرتبها لنفسها دي؟ طب احنا فيه ضغط علينا بموضوع خلوا فلوسكم لنفسكم عشان الدين الاسلامي فيه اشكالية حوالين موضوع القوامة والانفاق، وفيه تفسيرات ملتوية وغير صحيحة لكنها شائعة ومرحب بيها جدا بتقول ان الذمة المالية المنفصلة للمرأة معناها ان فلوسها دي بتاعتها لوحدها، وان حتى لو عندها مال قارون لازم جوزها هو اللي يصرف عليها. طبعا الكلام ده مالوش مكان في الواقع، لكن بعض النساء بياخدوا دا كتبرير للنطاعة، وكل الرجال بياخدوه كتبرير للسيطرة. يا ترى الوضع في المسيحية كدا برضه؟

ومش عاجبك اني العب رياضة في الجيم.. طب ألعب رياضة فين؟؟ في مركز شباب مثلا؟ ولا لازم أبقى زي كل الستات المصريات، اسيب نفسي كدا وتركبني أمراض الدنيا ويجيلي سكر وضغط وتصلب شرايين عشان أكون مصرية أصيلة وأنول الرضا!! عايزة أفهم إيه مشكلتك مع البنات دول لو هما عندهم وعي بقضايا مجتمعهم ومستعدين يكون لهم دور ايجابي.. ليه بتصب لعناتك عليهم بالشكل ده؟

أبوفارس said...

حفصه..فانتازيا..عليا النعمه أنا فرحان ببكم جدا جدا..ولو الهوجه دى كلها طلعت منها بالكلام بتاعكوا ده..أنا كده كفايه عليا
بس خلاص..
تحياتى..خالد

^ H@fSS@^ said...

فانتا رفيقة الكفاح
انا مش بتخانق والله
طيب ده انا حتى اتخانق مع الناس كلها بس مش مع قداسته لحسن زي ما قلت لك
اللعنات تنصب
هههههههههههههههههههههه
بس هي الفكرة اني عاوزة اوضح نقاط معينة مقتنعة بيها و بقوة كمان
عارفة
انا حاسة احنا التلاتة متفقين بس كل واحد واقف في زاوية
او بمعنى اصح
انا و انتي في ناحية و عبس في ناحية بعيدة عننا شوية لكن برضو هو قصده كويس بس هو شايفة من منظور رجولي شوية
ويا عباس مش قصدي كلمة وحشة برجولي
يعني بصراحة انت كمان دلوقتي حيرتني لو قلت ذكر تبقى مش كويسة
و لو قلت رجولي يبقى ابصر مش عارف ايه
طيب اقول ايه؟؟
كل اللي ارجوه ان صوت العقل يوصل
و ان البنات يفوقوا و يوعوا شوية لكن اساليب العياط و الخوف من مواجهة مجتمع خوفا مما سوف يلحقه بيا المجتمع من مسميات و ارجع اشتكي من المجتمع ده
ميعقلش، ميعقلش ان واحدة تشتكي من شئ و هي ساكتاله، ينفع ان احنا نفضل نشاور على العفريت و نقول يا ماماااا بخاف منه اهو واقف هناك و بس خلاص؟؟
ولا لازم اروح اخضه هو كمان و اواجهو امشيه
الحال الوسط ده مينفعش
و اذا مكنتش البنات نفسهم ياخدوا حقوقوهم بايديهم و هما مقتنعين انها حقوق دائمة
يعني مش تابعة لحالة معينة و تروح لحال سبيلها فمحدش حيجيبلهم حقوقهم و حتى لو حد جاب لهم حقوقهم مش حيحسوا بقيمتها
لانهم متعبوش فيها

ابو الفوارس
متشكرين يا فندم على كلامك في حقي انا وفانتا
كلامك وسام نحطه على راسنا من فوق

عباس العبد said...

حفصت
انا مضطر أرد عليكى
اولاً انا مضمتش ستة على سبعة , 6\7 .. الرقمين دول و العلامة اللى بينهم معناها أن 6 من 7 , ده البوست رقم 6 من عدد 7 بوستات . تمام كده ؟ شفتى بقى انك مش مركزة و ده يشكك فى مصداقية النص اللى انت كاتباه , ده لو كان نص أصيل مش نص مراوغ و انتى ما أفرطتيش فى التأويل .. هههههههههه , فاكرة انتى الكلام ده !! .
--
المهم
انا متفق معاكم او مش متفق معاكم , هذا هو السؤال
خلونا نشوف النقطة البعيدة اوى اللى هناك دى .. نقطة النهاية . ايه هى ؟
ان لازم كل واحد ياخد حقه , البنت الولد غلط معاها , لازم كان يتسجن . دى مفهاش مناقشة و لا مراوغة و لا مدارية . خلاص متفقين ؟
لكن الأصل فى الحكايات , انه اساساً مش المفروض انه يعتدى عليها و لا يفكر يئذيها , ليه ؟ لأنه من المفروض اننا فى مجتمع " متدين محترم " بيراعى أصول الدين , و لأن المفروض يكون فى امن رادع فى الشوارع ,و قانون محكم و لأن مفيش فرق بين ذكر و أنثى . فهمتى حاجة ؟
نوصل بقى أزاى للقصة دى , هنا احنا مختلفين , انا حروح عن طريق الأوتوستراد , انتى حتاخدى صلاح سالم , كل واحد حر يوصل ازاى .. و دى برضه ماشى متفقين أن لكل واحد وسائله فى الوصول .
لكن انا ضد الهيصة و التهريج و الشعوذة , صحيح انا بحب السخرية و الضحك , لكن ما بحبش المسخرة .
اصل ما ينفعش انها تبقى ثورة و انتم قابليها متكلمين على الدبوس . ما ينفعش نستعمل كلمات من نوع خطاب سلطة و خطاب مقاومة . او حتى عن العقل الذكورى و احنا عندنا عقليات " ذكورية " من نوع ماشية تتقصع و الكلام عن العشور و حسن معاملة العبيد و تاخد لها سنة سجن . هو ده اللى انا بتكلم فيه , . احنا مجتمع " .... " , فهمتى قصدى . يحب الهيصة
انا قلتلك انى انبسطت باللى عملته نهى , و شايف انها فخخت ثقافة مجتمعها و مع ذلك قلت ان اللى عملته عادى , لأن لازم ده يحصل .
حنعيد تانى ؟

عباس العبد said...

فانتا
اولاً انا بعتذر و بشدة , لأنى مكنتش أقصد حضرتك لما اتكلمت عن بنات المالتى ناشيونال . انا أقصد الفئة اللى حضرتك ذكرتيها . البنات التافهة اللى واخدين " الدفاع عن حقوق المرأة " نوع من انواع البرستيج و الشياكة الأجتماعية . مش حاجة بجد . نوع من " الشعوذة " يعنى .
الترقى الأجتماعى مش عيب , انا لسه شارى عربية . و غيرت شغل من شركة لوكال لواحد مالتى ناشيونال . و كنت بروح " جيم " , بس الصراحة معنديش مج للنسكافيه , فلو تعرفى محل كويس قوليلى عليه .. ههههههه ( انا جبت العربية علشان بأمانة زهقت من بهدلة المواصلات ) .
انا مكنتش أعرف أن موضوع الفلوس " عادة اسلامية " , بس فى مسيحيات كتير و أهاليهم بيعتبروا ان الولد هو لازم اللى يصرف و عيب أن يمد أيده على فلوس مراته , دى حاجة كنت فاكرها عرف أجتماعى لأنها موجودة عندنا برضه . ( لكن مش كل البنات بتعمل كده طبعاً ) .
انا مصبتش لعاناتى على حد , هن اللى ملعونين لوحدهن .

عباس العبد said...

أبو فارس
الله يكرمك يا عم
و يا فرحتهم بيك .

Fantasia said...

أبو فارس

أضم صوتي لحفصة.. واشكرك من قلبي على تشجيعك وكلامك الجميل
......

رفيقة السلاح حفصة اللي عايزة تخض العفريت

جدعة والله. وموضوع المصطلحات ده انا زيك كنت مش فاهماه.. بس حليناه بمعجم السيكو سيكو الوجيز
.......


صديقي عبس

أيوة كدا اظهر وبان.. عربية جديدة ووظيفة جديدة ومالتي ناشونال وجيم وحركات... هههههههه
أمال كل ده كان على إيه؟ يا عم خدنا جنبك .. هو احنا مالناش نفس؟ ولا احنا يعني اللي مكتوب علينا الغلب وانتم بس اللي تقبوا على وش الدنيا؟.. ولا مستكترها علينا؟

هي المرأة لازم تكون منسحقة اقتصاديا كمان؟؟ مش كفاية كل القهر والانسحاق اللي هي فيه؟ هتبقى انت والزمن يا رامز؟ واذا كان ع المج نسلفك واحد يا سيدي حلاوة العربية الجديدة. ولا انت ناوي تقضيها "ماتبصليش بعين راضية" وتعلق شبشب في الاكصدام الوراني؟

أنا عارفة انك ماكنتش تقصدني.. وواثقة من دا كمان.. لأني أول مرة اتكلم عن نفسي كدا.. ومحدش يعرف اني من بنات المالتي ناشونال.. تصدق كبرت في دماغي وهروح احط بوستر ع العربية
Multinational Girl
ههههههه

بس أنا مش بأخبي ولا بأستعر من كوني مالتي ناشونال زي ما بنات كتيرة بتعمل.. بالعكس.. لازم الفكرة الكلاسيكية دي تتنسف بقى ونعرف اننا مش عايشين في ايام الاشتراكية، وان طبيعي ان الموهوب والمتعلم كويس هيلاقي فرص افضل وهيقدر يترقى اجتماعيا بسرعة أكبر من غيره. ومش معنى ده انه هيكون تافه أو معزول عن قضايا مجتمعه. بالعكس.. احنا ولاد الطبقة الوسطى اللي كافحت عشان تعلم ولادها وكان عندها بعد رؤية، عكس غيرهم اللي كان قصير النظر وعايش ع الدعم أو اللي افتكر ان الرأسمالية عبارة عن تهليب وفهلوة وان اللي معاه قرش يسوى قرش بصرف النظر عن قيمته كانسان

لازم نفتخر بانجازاتنا دي.. ولازم نكون قدوة لشباب تانية عايزين يحبطوهم ويفهموهم ان مفيش فايدة وان المستقبل اسود وان المجهود عمره ما هيوصل لحاجة

مج النسكافيه مش هو السمة اللي بتميز النموذج اللي انت بتتكلم عنه، لأن الهيافة مالهاش علاقة بالطبقة الاجتماعية.. وحتى اللي بتمثل اهتمامها بحقوق المرأة فهي في نظري أحسن مليون مرة من اللي بتحاول تهدم فكرة حقوق المرأة، واللي مالهاش دعوة بالدنيا من حواليها. خليهم يكونوا قاعدة لمجتمع مدني مشغول بقضايا المرأة.. بعد كدا النشطاء الحقيقيين قادرين يغربلوهم.. لكن الثقافة دي لسة جديدة عندنا.. مش ممكن نقصي منها اللبنة الأولى عشان متتشككين في نواياهم ونقول دول بيعملولنا صداع.. يا سيدي يا محلا دا صداع! خدنا إيه من النوم وعيشة أهل الكهف في هدووووووووء؟

أما بخصوص موضوع الانفاق، فواضح ان الثقافة الذكورية فيه.. آسفة ثقافة السيكو سيكو.. طاغية وقادرة على ازالة الفوارق بين الاديان كمان. يعني الراجل عجبته الفكرة بصرف النظر عن أصلها لأنها بتحققله مزايا رهيبة، على طريقة "بفنوسي يا كناب".. شفت بقى قد إيه السيكو سيكو جامد وفتاك؟

أبوفارس said...

معلهش يارامز..
أنا تعليقى كان على منطق حفصه وفانتازيا واللى بصراحه شديده وجدته أكثر تماسكا من التدوينه الطووويله وتعليقاتك..
أنت لفيت لفه طويله جدا عشان تقرر بديهيات..
ده مش صلاح سالم ولاالدائرى ده طريق رأس الرجاء الصالح ياهندزه..
الموضوع أبسط من كده بكتير..
المجتمع المصرى تفكك تماما..وأنتشر فيه العنف بشكل واضح جدا..
رغم أنه أقل من عنف مجتمعات أحرى لكنه بالنسبه للمصريين مثير للدهشه..
ومن يدفع تمن هذا العنف بشكل مركب هى الفئات اﻷضعف..
التحرش الجنسى هو شكل من أشكال العنف الموجه ضد النساء..
تدوينه الخليع اللى كتبتها تؤكد ماأقوله..
أنتهاك جسد فتاه بشكل فج يدخل فى باب إحداث ألم مادى وأنتهاك معنوى لاأستطيع أنا أو أنت -كرجال- قياسه..صح..
وعدم قدرتنا على قياسه لاتنفى وقوعه ولا ضرره..تمام..
الوحيده القادره على ذلك هى الضحيه متلقيه هذا اﻷنتهاك..
وبالتداعى المنطقى الضجه اللى تقيمها تلك الفتاه تتناسب مع همجيه الفعل..حتى لو بدا لك أو لى -كرجال- المغالاه فى هذه الضجه..
نهى فعلت ذلك..
ووضعت المجتمع كله أمام قبح العنف الموجه لنسائه..
آخريات مثل حفصه وفانتازيا عملوا تكبير لهذا الضجيج -وده حقهم- لكونهم متضررين من العنف الواقع عليهم..
وتانى اللى أنا وأنت كرجال مش مستوعبين أبعاده...
يبقى مش من خقى أو خقك ياسيدى الفاضل نقول بطلوا دوشه الموضوع مايستاهلش..
هم شايفين أنه يستاهل يبقى يستاهل...صح...
شفت بقى..
وفى النهايه أقولك سلم نفسك يارامز المكان محاصر من تلات جهات..
تحياتى وصادق مودتى..خالد

عباس العبد said...

أبو فارس
انصر اخاك يا أبو فارس , انصر اخاك .
هههههههه
شوف
انا كان لازم الف من رأس الرجاء الصالح لأن زى ما أنت عارف البحر الأحمر دلوقتى مليان قراصنة .
ههههههه
--
" نهى فعلت ذلك..
ووضعت المجتمع كله أمام قبح العنف الموجه لنسائه.. "
و هو انا قلت غير كده ؟ فى كلام غير كده انا قلته .
احنا مختلفين فى " الضجة " , لكن انا متكلمتش عن " ضجة " الصح , انا اتكلمت عن " ضجة " اللى حاططها فى تصنيف فى ردى على زمان الوصل .
يعنى ينفع يا باشا , تصحى الصبح تقرا كلمات من نوع " التهديد بالرد بالأسوأ " , او " خطاب مقاومة و خطاب سلطة " , و متكلمش .
رد العنف بالعنف و تسكت و تقولى لأ حقهم يقولوا كده .
انا مختلف معاك تماماً , لأ مش من حقهم يهيصوا و يظيطوا .
انا كنت ساكت و فرحان باللى عملته نهى , و مكتبتش حاجة , و السعادة تمام جوايا , لكن فى مقالات و كتابات و مناقشات و ندوات و لقاءات تلفزيونية , حسستنى أنى مش فاهم حاجة , و انهم بيتكلموا على بنى أدمين تانيين . بس كده
و بعدين كان عندهم حادثة تحرش لزميلة ليهم و محدش فتح بقه . البنت كتبت و قالت و اشتكت . و الثوار مخرجش من بقهم غير " الدبوس " , طيب تقول عليها ايه دى ؟ .. مش هيصة على الفاضى ؟
--
بس بدل حضرتك شايف انهم صح , يبقوا صح .
خلاص حتنزل المرة دى علشان خاطرك , بس أعمل حسابك المرة الجاية مش ممكن تنزل ابداً .
--
بينى و بينك كده ( انتى بتاخدهم على قد عقلهم , علشان هم بنات , صح ؟ )
هههههههه
====