
مقدمة
" جم عندى المدونين , يا شعبى الحبيب , جم عندى القصر التدوينى و اتعشوا . و سئلتهم و هم بيتعشوا , ايوه سئلتهم يا شعبى الحبيب الصبور المهاود , سئلتهم : انتم كمدونين و عندكم مدونات , هل انتم مدونين ؟ . اجابونى , بعد ما اتعشوا , يا شعبى الحبيب , اجابونى و قالوا يا سيادة الرئيس , احنا كمدونين و عندنا مدونات , مش مدونين !! . "
مع الأعتذار لمحمد صبحى
-1-
انطولوجيا
من السخرية أن اتكلم عن انطولوجيا التدوين و خصوصاً ان فى ذكريات مهببة عن المصطلح . بس انا قلت بما أن فى ناس ادمنت التصنيف من نوع أدب المدونات او الفكر التدوينى أو ثقافة التدوين او الحركة التدوينية او النشاط السياسى التدوينى او صحافة المدونات .. فأنا قلت مفيش مانع أن التدوينة دى تتحط تحت بند نخترع له مصطلح جديد اسمه فلسفة التدوين . أى ان هذه التدوينة تعد من التدوينات المؤسسة لفسلفة التدوين ( وش بيغمز ) . نبدأ بتعريف المصطلح و هما كلمتين مختلفتين فى اللغة الأنجليزية , كل واحدة تعطى معنى غير الأخر لكن لها نفس المنطوق فى اللغة العربية .
الأولى : Anthology
تعنى: مختارات
كمثال: انطولوجيا الشعر العربى... معناها مختارات من الشعر العربى . او انطولوجيا الرواية العربية .. معناها مختارات من القصة العربية .
أما الثانية : Ontology
فهى كلمة فلسفية تعنى دراسة الوجود من حيث كونه وجود فى ذاته .
-2-
جريدة الشروق

فى معركة اليومين دول بين جريدة الشروق و المدونين و السبب كما يعلم أغلبنا , ان جريدة الشروق تنشر أجزاء من بعض المدونات دون إخطار صاحب المدونة !!! على الرغم من وجود الرابط للمدونة و احياناً اسم المدون .
-3-
ما هو التدوين ؟
تعريف التدوين صعب و لكن ممكن نعرف ما هو ليس تدوين , أى اننا نعرفه بالأستبعاد . التدوين ليس أدب على الرغم من وجود أدباء بيدونوا زى نائل الطوخى او طارق إمام . التدوين ليس نشاط سياسى على الرغم من وجود نشطاء سياسيين بيدونوا زى نوارة و مالك و مينا . التدوين ليس ثقافة على الرغم من وجود مثقفين بيدونوا زى مختار و د. ياسر و أسكندرانى . التدوين ليس رؤية دينية على الرغم من وجود مدونين ذوى مرجعية دينية فى الكتابة زى الصارم الحاسم و بن عبد العزيز . التدوين ليس نشاط صحفى على الرغم من وجود صحفيين بيدونوا زى عزة و عمرو عزت و قس على ذلك . الأنطولوجيا التدوينية \ بمعنى مختارات .. توضح التنوع و الثراء فى التدوين .
و الأنطولوجيا من حيث وجود التدوين .. مش معنى وجود أدباء , يبقى فى حاجة اسمها أدب المدونات , مش معنى وجود مثقفين يبقى فى ثقافة التدوين , مش معنى وجود صحفيين يبقى التدوين صحافة .مش لازم التصنيف , التدوين كيان ضخم يستوعب كل شىء و لا يقبل التصنيف . و الأنطولوجيا هنا بمعنى وجود التدوين من حيث كونه تدوين فى ذاته !!! و ليس له تصنيف .
-4-
النشر
انا مش ضد النشر بالعكس انا مع نشر اى حاجة و اى شىء بأى طريقة . انشر اى فكر , معنديش مشكلة لو بن كريشان جمع تدويناته المهمة و نشرها فى كتاب . انشر بأى لغة حتى لو باللغة العامية السوقية . انشر نكت , حكايات , قصص , طبيخ , حتى لو عايز تنشر عجين الفلاحة . ما يفرقش .. ليه ؟ . لأنك بالبلدى كده و من الأخر حتقع تحت أيد الناقد و القارىء و هم حيشوفوا شغلهم .
-5-
تصنيف
لماذا يدمن الناس التصنيف ؟ سؤال انا مش لاقى له اجابة . انا و عبد الرحمن كنا راجعين من وسط البلد و اتكلمنا عن ظاهرة النشر الورقى . قلنا انها فرصة فى وسط الهيصة دى أن أى حد عايز ينشر يلحق ينشر , لأن الموضوع زيطة و مولد . اتكلمنا عن الأباء المؤسسين او العظماء ال7 ( و دى تدوينة يبقى يكتبها عبد الرحمن بعدين بقى ) . و ان الأباء الروحيين للتدوين بيفرضوا وصاية ما حتى لو شكلية او عن بعد او فى طريقة الكتابة . أما اكثر ما فرضوه هؤلاء الأباء هو جنون الشهرة اللى بيزن فى عقلية المدونين . واحد يقول : انا حنزل التحرير علشان أعمل مجمع زى فلان . و تانى : انا لازم اشرب اللبن علشان ابقى ضخم زى علان , و تالت : انا حكتب بقلة ادب علشان ابقى مشهور زى شيطان . و رابع : انا حصور فيديوهات علشان ابقى مشهور زى ترتان .. و تقعد تسمع احلى كلام من ده فى حفلات التوقيع .
فى ناس عندها جنون التصنيف و اضفاء الألقاب . كان فى شخص بيعرف نفسه فى أحد حفلات التوقيع بأنه " المدون فلان الفلانى " , مش المهندس فلان او الدكتور علان أو صبى القهوجى ترتان او الحلاق زفتان , كأن التدوين بقى مهنة أهم من مهنته اللى بيشتغلها !! . لماذا يدمن الناس الشهرة ؟ سؤال مش لاقى له أجابة .
-6-
زن زن زن
يسئلنى بعض المدونين , اللى هم كمدونين و عندهم مدونات , مش مدونين , يسئلونى : طيب انت موافق على النشر بكل أشكاله , طيب زعلان ليه ؟ ما تسيب اللى يشتهر يشتهر . سؤال جميل , انا أحب اللى يسئلنى . أرد بكل شجاعة و أقول : اللى عايز يعمل حاجة يعملها , ينشر , يشتهر , ينتحر , هو حر .. بس بلاش وجع الدماغ .. لأن دماغ الأنسان مننا هى كل ما يملكه . شوف يا سيدى , منذ ظهور المدونات و الناس بتكتب , و الناس عرفت بعض , و فى ناس اشتهرت و طلعت فى التلفزيون كنشطاء حركيين معارضين لأنهم فى الأساس و قبل التدوين نشطاء حركيين فى حركات معارضة . و بعدين حصل اللى حصل . اشتهر التدوين بسبب الموضوع ده , و فى دور نشر استغلت الحكاية دى و بقت تنشر لناس . و خد عندك المدون الفلانى له حفل توقيع , و بروباجدنا و بانرات و زن زن زن . قلنا ماشى دى ناس بتنشر و انا كقارىء لى حق النقد . و بعدين بقى النشر فردى , كل مدون أكتشف انه كاتب و بقاله حفل توقيع مستقل . و زن زن زن . اللى بيطلع فى الجرايد و اللى بيطلع فى التلفزيون , الناقد المدون , الكاتب المدون , الحركى المدون , المعارض المدون . جت جريدة الشروق نشرت للناس , الناس اعترضت و قالت لأ , دول خالفوا و مخالفوش و حقى و مش حقى . و برضه زن زن زن . و يعملوا ندوات عن أدب المدونات و الكلينكس . و زن زن زن . يعنى انا مش فاهم . الناس تنشر يزنوا و يعملوا هوليلة . الناس ما تنشرش , يقولوا انا مش اقل من فلان , و لا علان , علشان مانشرش , مليش دعوة انا عاوز انشر , انتم وحشين . الشروق تنشرلهم , يزنوا . الشروق تنشر من غير ما تبعتلهم ميل , برضوا , زن زن زن . يعنى نشر يزنوا , مفيش نشر يزنوا , يتنشر من وراهم يزنوا , يتنشر بمعرفتهم يزنوا . ايه هو ده ؟ مش دماغ بنى ادمين دى ؟ و لا علبة خرسان ؟ .. فى ناس اتنشرلها تدوينة و ناس تدوينة الا ربع و ناس نص تدوينة و ناس ربع تدوينة و ناس تلت تدوينة و ناس تمن تدوينة .
-7-
ماما زمانها جية
دلوقتى .. لو مكنش فى حاجة اسمها تدوين .. و كان مواطن من اللى اتنشرلهم تمن تدوينة و تمن رومى و تمن بسطرمة . اخد التدوينة و راح بيها للشروق و قالهم ممكن تنشرولى ؟ تفتكروا كان حيكون ردهم ايه ؟ او واحد طقت فى دماغه ينشر مجموعة قصصية عظيمة !! , و راح بيها لدار نشر , تفتكروا كان حيقولوا ايه ؟ طبعاً عارفين الرد . كانوا حيقولوا للأتنين : ماما زمانها جية !! .
عمرو عزت .. اهو صحفى فى كذا جرنال , حد سمعه بيزن ؟
نائل الطوخى .. أهو اديب و متصيت و بيكتب فى أخبار الأدب , حد سمعه بيزن ؟
نوارة .. حركية و متصيتة و حيصدر لها كتاب قريب , حد سمعها بتزن ؟
د. ياسر .. مدونة لا غبار عليها , و من اقوى المدونات اللى بتكلم عن مصر فعلاً .. حد سمعه بيزن ؟
بن عبد العزيز .. حركى و ناشط فى مجالات كتيرة .. حد سمعه بيزن ؟
مختار .. صحفى و مترجم و صنايعى فى شغله , حد سمعه بيزن ؟
اللى يغيظك انك تسمع واحد يقولك : انا التعليقات عندى بتعدى ال60 , انت عندك بتعدى كام ؟ . طيب واحد زى د. ياسر , التعليقات عنده بردوده على التعليقات مش بتعدى ال5 تعليقات , يبقى ده مدون كده و كده و على ما قسم ؟؟ . و أدى كتاب " أنا أنثى " العدد الثالث من مدونات مصرية للجيب نازل قريب , و اتفرج على الزن اللى حيحصل بسببه , ربنا يستر من وجع الدماغ . ( ملحوظة : انا كنت بتكلم مع احمد البوهى و قلتله أن الكتاب ده شكله متميز و كويس لأنه ذو موضوع واحد و بيناقش قضية قوية و قلت نفس الكلام ده لبيلا .. علشان بس محدش يزن و يقول انى بهاجمه من أولها ) .
-8-
فلسفة
يبقى نقدر نقول , ان انطولوجيا التدوين \ بمعنى مختارات .. شىء رحب , واسع , يساع من الحبايب و الأتجاهات الف . و أنطولوجيا التدوين \ بمعنى وجود التدوين .. هو وسيط نشر , قائم فى ذاته , لا يدل على موهبة أدبية و لا صحفية و لا نشاط حركى معارض , بل هو وسيط ذاته و ليس وسيط للشهرة او للمعارك او للتصنيف .
-9-
غفران

الله يسامحك يا هانى .. انت السبب فى وجع الدماغ ده كله .. لازم تنشر التدوينتين بتوعك دول : " المدون القفا " و " حزق المدونين " . الا قولى يا هانى بصراحة و حياة مدونتك عندك : انت كمدون و عندك مدونة , هل انت مدون ؟
أنهى بالجملة الموجودة بالصورة الأخيرة
Now you can show the whole world why no one listens to you
الأن تستطيع ان تظهر للعالم لماذا لا يستمع اليك أحد