Saturday, January 03, 2009

التيتا فى الننّنا


الأهداء الى أسكندرانى .. حتى يتعلم كيف تكون الكتابة .

--

فى الوقت الذى سافر فيه المفتش كرومبو الى واشنطن لحضور مؤتمر خاص بعنوان :

مؤتمر المفتش : تحديات و بلح امهات .

أنعقد مؤتمر أدباء مصر فى دورته ال23 بمحافظة مرسى مطروح و التى تناقش قضية السرد الجديد . و يدور المؤتمر فى محاور عديدة منها : السرد الجديد و إشكاليات المفهوم , السرد الجديد .. تواصل أم قطيعة , ذاكرة جديدة لسرد مغاير , السرد و تداخل الأنواع .

و فى المائدة المستديرة تحدث مجموعة من الأدباء : طارق امام ( أسئلة الرواية الجديدة ) , محمد عبد النبى ( التدوين و الحراك الثقافى ) , هويدا صالح ( الكتابة التدوينية ) , نائل الطوخى *  ( السرد و المدونات ) , سهى زكى ( سبوبة الأدب فى القرن العشرين ) , أحمد عزت ( اللاهوت الألكترونى أنطولوجيا السرد قبل السرد فى الهباء الداروينى ) !! .

 

أما عن الأبحاث التى ناقشها المؤتمر المنعقد بمحافظة مرسى مطروح فمنها : د. زهور كرام ( السرد الجديد و تحولات أشتغال المفهوم ) , أحمد أحمد عبد المقصود ( السارد و المؤلف : الحضور و التماهى فى الكتابة الروائية الجديدة فى مصر ) , د. سيد أسماعيل ضيف الله ( البحث عن خصوصية سردية فى سرد الشئون المحلية ) , د. سامى أسماعيل ( فينومينولوجيا السرد ) , د. عبد الرحيم الكردى ( السرد الروائى و تداخل الأنواع ) , د. محمود الضبع ( السردى فى الشعر – الشعرى فى السرد ) !! .

 

الخبر نقلاً عن مجلة الثقافة الجديدة

العدد 220 – يناير 2009

--

انا قلت أبلغكم علشان تعرفوا ما سيكون و ما سيترتب عليه من روايات ستكتب بطريقة تكنولوجيا السرد و النصوص اللى حتنزل على نافوخنا فى الهباء الداروينى , و كيف تستخرج السرد من باطن الأرض !! . انا بحذركم من نظريات التيتا فى الننّنا و الننّنا فى التيتا قصدى الشعرى فى السرد و السردى فى الشعر فى الكتابة , لأنها حتطلع على جتتكم بالبلاء و البلى و أبقوا قابلونى الرواية الجاية لو حد فهم منها حاجة !! لأن زى ما انتم عارفين أن السرد فى عين أمه غزال .

للأديب فى سرده شئون . و كفانا الله و اياكم شر السرد الجديد . و ربنا يرجعلنا المفتش كرومبو سالم غانم من المؤتمر بتاع واشنطن .

--

ملحوظة لا علاقة لها بالموضوع :

من المعروف أن مثل هذه المؤتمرات تقام بفلوس دافعى الضرائب . يعنى فلوسى و فلوسك يا مواطن بتروح على السرد الألكترونى و بتتصرف على الهباء الداروينى و على التيتا فى الننّنا . حسبى الله و نعم الوكيل .

---

* تحديث للتنويه : صديقى العزيز نائل الطوخى لم يذهب الى المؤتمر و لم يلقى بكلمته رغم ورود أسمه فى المجلة التى نقلت منها الخبر , و قد وضعت وصلة الى التدوينة التى كتبها و التى اعلن فيها اعتذاره عن عدم الذهاب الى المؤتمر . 

29 comments:

Nsreen Bsunee said...

رامز

انت بتتكلم جد

فعلا يعني و حقيقي ولا الكلام ده سخريه منك

اصل مش ممكن يكون فيه حاجات اسمها كده!!

TAFATEFO said...

الأستاذه عزه مغازي في الجايكو والإخوه قتلوا هذا الموضوع بحثاً ونقاشات مطوله .. وأنا سمعت كلمه كلمه .. اني أفهم حاجه

متفهمني الموضوع ده ينوبك ثواب

الازهرى said...

رائعة تلك القضايا الحساسة التى يناقشها هؤلاء المهمين فى هذا الوقت الهام
وهذا له اهميه فى التعرف على اهمية الوضع الهام الذى صرنا اليه سواء فى الادب او الواقع

هل انتهى عصر الادباء الذين يهتمون بقضايا اوطانهم بدلا من مناقشة التفاهات ؟
وما الذى يريدون الوصول بالادب اليه
ان يكون مفرغا؟
ام ان يكون صورة من اداب اخرى لا علاقة لها بنا ؟

تحياتى دوما

Bella said...

ازيك ياعم رامز

اولا كل سنة وانت طيب وسنة جديدة سعيدة

ثانيا حلو جدا قالب المدونة عجباني جدا الوانه

اما بخصوص السرد الجديد فكان لنا فيه حديث ذو شجون خاصة واانا قعدنا سرد يشيلنا وسرد يحطنا ورحنا سرد يركب الافيال علشان نفهم حاجة

برضه مافهمناش

انما عجبتني قوي حكاية الهباء الدارويني جدا

اما بقى السرد وتداخل الانواع فنفسي ربنا يفتح عليك كده وتعرف ايه هي الانواع وتفهمني ينوبك ثواب خاصة وانا باعمل قائمة لمعرض الكتاب

انت عارف يعني يارامز ياخويا الغريب اعمي ولو كان بصير

فياريت ماتنساش تساعد اخوانك الغلابة وتنزل بقائمة كتبك اللى نازي تشتريها قبل المعرض علشان نرتب امورنا قبل مايطب علينا المعرض

وسلم لي على اشتغال المفهوم

هههههههههههه

nael said...

بس انا ماتحدثتش يا رامز. انا مارحتش اساسا

محمد المصري said...

أيوة طبعاً
إله الرواية الذهنية خلع من الإيفيه قبل ما يتم يا أستاذ ، انشق عن دولة الرواية اللي قامت في مرسى مطروح واكتفى بجنسية ستة أكتوبر :)

بس أنا حقيقاً مهتم جداً أسمع أو أقرا الورقة الخاصة بأحمد عزت :

( اللاهوت الألكترونى أنطولوجيا السرد قبل السرد فى الهباء الداروينى )

يا للهول !!

sandrill said...

انت بقيت مغرض قي كلامك يا رامز

ازاي تمر بسرعة كده على حقيقية إن الساردين الجدد قد ناقشوا قضايا السرد في هذا البرد .. انت عارف الجو في مطروح بالليل دلوقتي عامل ازاي ؟ و الله الناس ليها حق تقول أكتر من كده

~*§¦§ Appy §¦§*~ said...

طيب وده ايه علاجه يا اخ لو سمحت يعنى ينوبك ثواب انا سمعت اسم البتاع الغريب ده ومفهمتش حاجه ونكشت شعرى وككنست عليهم السيده والحسين وصلاح سالم حتى مفهمتش منكن تفهمنى

^ H@fSS@^ said...

قداستك
يعني ايه سرد جديد؟؟
يعني حيكتبوا من الشمال لليمين مثلا
و لا حيبتدوا وقائع الرواية من اخرها لاولها
ولا مش حيكون فيه ابطال
ولا مافيش زمن
ولا حيحكوا بلغة الصم و البكم؟
ايه اللي ممكن يكون اسمه سرد جديد؟؟
وايه هو اللاهوت الالكتروني؟
و كمان فيه كمية كلمات غريبة في البوست
معرفش ده كلامك و لا كلامهم
بس غريبة يعني
انا مش فاهمة اصلا ليه هما عاوزين يحددوا انواع السرد و يوصفوه بالجديد و القديم؟؟
حنستفيد ايه يعني؟
عشان كل واحد يتنطط علينا بطريقة و يحطها تحت بند السرد الجديد و لما منعجبش بيها يبقى العيب في مخنا احنا ولا ايه؟
و ليه عندي احساس ان كتير من الادباء بقى فيه زي التار بينهم و بين القارئ و بيظهر على شكل استحداث اساليب قصصية متصنعة فقط عشان يبين انه متميز و ان القارئ حمار
طيب لو الموضوع كدا
بيكتب لنا ليه من اصله؟؟

اسفه
طولت

عباس العبد said...

نسرين بسيونى
حمد الله على السلامة
فينك من زمان ؟ ليكى وحشة بجد
المهم
انا مغيرتش و لا كلمة و لا حرف من اللى نقلته من المجلة و ممكن تتأكدى بنفسك لو رجعتى للمجلة . و اللى جننى أكتر أن عناوين المحاضرات او الكلمات زى ما هى كده . يعنى دول بيتكلموا جد . انا مش عارف ده اسمه ايه ؟
بس ده دليل على حال البلد بجد , حالة من التهجيص .
===
مصطفى
انا مش متابع اوى للجايكو لأنى بسافر كتير .
أما حكاية انى افهمك , فدى صعبة شفلنا حد يفهمنا احنا الأتنين !! .
هههههههههه
===

عباس العبد said...

الأزهرى
كل سنة و انت طيب .
الصراحة انا سئلت نفسى نفس الأسئلة دى , و قلت انا مش فاهم و يا ريت حد يفهمنى . علشان كده فعلاً قلة أدب . انا حسيت و انا قاعد اقرا المقال و التحقيق أنى فى وادى تانى و انى مش فاهم ايه هو المطلوب من القارىء ؟ . انا بعتبر نفسى قارىء و قارىء شبه متابع على قد ما أقدر , ممكن اعرف ايه المطلوب منى و لا الناس دى بتشتغلنا و لا كانوا عايزين يتفسحوا فى مرسى مطروح فقالوا يطلعوا مؤتمر .
انا مش عارف الصراحة .
===
بيلا
أزاى حضرتك ؟ كل سنة و انت طيبة . منورة المدونة .
و كويس ان الشكل الجديد عجبك , عرفت انقى تمام .
عندى ليكى خبر سىء جداً , الا و هو ان نسبة دور النشر اللى حتعرض فى المعرض السنة دى حتنخفض بنسبة 40% علشان فى تصليحات فى مبانى المعرض و فى سرايات عرض حتبقى مقفولة بالكامل . و دور النشر الكبيرة و بالأخص اللبنانية ممكن ما تعرضش لأنهم عرضوا على الناس مساحات ضيقة السنة دى علشان الكل يكفى .
ده غير انى لسه مش عارف حشترى ايه . ربنا يسهل و قبل المعرض اكون حددت . لحد دلوقتى مقرر حاجة بسيطة و هى مجموعة النصوص المتميزة اللى اصدرتها دار الشروق .

عباس العبد said...

نائل
انا عارف يا باشا انك مارحتش . علشان كده حطيت لينك عندك للبوست اللى بتقول فيه انك مش رايح . لو عايزنى احط تنويه فى البوست نفسه كملحوظة , انا ممكن أعمل كده . انت تأمر يا برنس . احنا عندنا كام نائل .
===
محمد المصرى
اهى ورقة احمد عزت دى هى اللى خلتنى اكتب البوست ده . لاهوت الكترونى حتة واحدة . و ربنا بتاع اللاهوت الألكترونى ده يبقى عامل أزاى ؟ اله ديجيتال ؟ و تصليله بطريقة الباينرى كود ؟ حسبى الله و نعم الوكيل
هههههههههه

Alexandrian far away said...

عزيزي رامز
شكرا على أهداء التدوينه
الصراحه لا يمكنني أن افهمك معنى تلك الجمل التي نقلتها عنهملكن يمكنني أثبات الملاحظات التاليه:

1- عبر خبرتي الحياتيه تأكدت ان المثقف البرجوازي لا يعبد الله كما أنه ليس ملحدا بل يعبد المصطلح ولأن المصطلح معبوده فهو لا يفهمه ولا يعيه ويحرص على غموضه وإبهامه, مثلا الأخ بتاع الأنطولوجيا ده ماذا يقصد؟
هل يقصد
Ontologia
أو
Anthology

2- كماأن الناقد هو مبدع فاشل فتأكد أن الدكتور المتخصص في النقد هو ناقد فاشل, لكن حرف الدال يشبه أكصدام السياره وهو مانع جيد للصدام ولكن هذا لا يعني لدي اي شىء اصلا فكثير ممن يحملون تلك الدال لا يعلمون اي شىء عما هو تخصصهم

3- السفسطائيين العباقره وضوعوا قاعده هامة جدا استرشد بها انا نفسي وهي أن كثير من القضايا الفلسفيه هي بالحقيقه ليست سوى قضايا لغويه, أي أنها مجرد كلام وخلاص

4- عن كون ذلك المؤتمر أهدار لفلوس الناس فحار ونار على جتتهم وزقوم في بطونهم بتوع الأنطولوجيا الداروينيه في الامان ياللي دول

أتمنى أن أكون قد كفيت ووفيت
تحياتي ومحبتي

Nsreen Bsunee said...

قول و النعمة يا رامز
بيتكلمو جد
ايووووه
يا نهار ابوهم اخبر

احيه بجد

طيب ليه كده ليه حد زعلهم فى حاجه
اكيد فيه حد زعلهم
ربنا يعينهم على نفسهم
دول بقي المثأفين

طيب عشان ابقي مثأفه بقي اغير اسم مدونتي اخليه
"انطولوجيا الغربه فى فينومينولوجيا الهباء السكندري و علمنى العوم و النبي يا داروين"

ايه يا محمد يا مصري عاجبك كده

عباس العبد said...

ساندريل
طيب و راحوا مطروح ليه من أصله ؟ و لا احنا لازم يطلع عنينا معاهم . انا ساعات بحس اننا اشتغالة و هم بيتسلوا بينا و الكلام ده محصلش من أساسه .
===
آبى
انا افهمك ؟
شوفيلنا حد يفهمنا احنا الأتنين .
ههههههه
===
حفصت
عارفة بجد انا حاسس كده فعلاً . حاسس انهم بيعملوا كده علشان متعرفيش تتكلمى و علشان يشتمونا احنا القراء براحتهم . لو واحد كتب رواية بديل و بترفص و تنهق و معجبتش القارىء اللى مخه على قده زى حالاتنا يقولوا ما اصلك انت اللى بديل و بتنهق و مش فاهم أى حاجة فى المدارس الأدبية النقدية . زى المواطن اللى اتكلم عن انه مش عايز قارىء عادى . بجد لازم حد يفهمنا . دول معاهم شهادات كمان و دوكتوراهات فى التيتا فى الننا . بجد حاجة تجيب المرض .

77Math. said...

ودا حيبقى شكلنا بعد انتهاء الرواية ولا بعد قراءة العنوان ؟

حسبنا الله ونعم الوكيل فعلا !

عباس العبد said...

اسكندرانى
لا تعليق طبعاً على رد سيادتكم فأنت أنت المفتش كرومبو و انا تلميذك " بومب .. سحس بومب " . ههههههه .
لكن توضيح لأخوتى المكافحين
كلمة
Anthology
تعنى : مختارات
كمثال : انطولوجيا الشعر العربى .. معناها مختارات من الشعر العربى . او انطولوجيا الرواية العربية .. معناها مختارات من القصة العربية .
أما كلمة
Ontology
فهى كلمة فلسفية تعنى دراسة الوجود من حيث كونه وجود فى ذاته .
---

عباس العبد said...

77
حسبى الله و نعم الوكيل فعلاً .
---

Alexandrian far away said...

عليك نور يا رامز يا حبيبي
أنا بقى بصراحه متأكد أن الأخ ألي كتب الجمله الهلوسيه دي مش عارف هو قصده أنهو فيهم
والحقيقه أني بعد العمر ده كله مش فاهم التعريب أنطولوجي معناه ايه بالظبط
خصوصا أنها بالعربي شكلها كلمه زي ما تكون ابيحه ولا مؤاخذه

تحياتي

حـنــّا السكران said...

سالم غانم مين ؟؟

تحياتي يا رامز باشا و كل سنة و انت طيب .

ـ أنا من المرات القليلة اللي بصدّق فيها اني ضايع فكرياً و مش عارف حاجة أبدا .. هي لما بقرأ مثل هذه العناوين .. ما بفهم أي حاجة . . الإحساس بالغباء فجأة .. احساس بشع جدا يا رامز ..و بعض الأخوة الأدباء بيخلوني أشعر بالإحساس ده ..و إني مجرد ( سرديّة ) سرمدية غير مفهومة أو لا معنى لها , و اني بطوف في فضاء غير واضح المعالم . أو أنا مش شايفه كويس .لأنه عندي قصر نظر أو عسر فهم .
ـ السردية في السرد السردي المنسرد .. أنا مش فاهم حاجة .
ـ بس فعلا هو الأستاذ نائل كان كتب انه مش رايح , أصلاً أنا مش ممكن أتخيل نائل الطوخي طالع بيتكلم عن السرد الهلامي المدوناتي المنسرد .و عابس و هو بيتكلم و متجهّم .. دي تبقى سردية لوحدها .

حـنــّا السكران said...

اّسف.. قرأت التعليقات بعد ما كتبت تعليقي.

GEMYHOoOD said...

واد يا رامز انى احبك فى الله :D

عباس العبد said...

أسكندرانى
انا تلميذك يا باشا و بعدين عيب تبقى فى المدونة عندى و تقول كلام كبير و مصطلحات ضخمة و مقلش معناها للقارىء و أردها لأصلها , ده أنا محسوبك فى الحكاية دى . مبقاش متعقد من الألفاظ المستخدمة و أعملها مع الناس يعنى .
حبيبى انت .
التدوينة اللى الجاية علشانك , صدقنى .
قنبلة يا معلم .
===
حنا السكران
منورنى و كل سنة و أنت طيب .
انا صدقنى بتخنق جداً من اللى انا مش فاهمه و خصوصاً انى انا القارىء فى النهاية .
يعنى بدون غرور و لا تطاول , احنا لازم كقراء يكون لينا أحترامنا , لازم يحترمونا , ما هو انا لو لقيت عملية تنطيط من بعض الكتاب , مش حشتريلهم . و تبقى فايدته أيه ككاتب لما القارىء اللى هو احنا ما يشتريش كتابه , و لا هم عايزين يكتبوا لبعض ؟!!! .
===
جيمى
و انت حبيبى انت كمان . ههههههه

فارس عبدالفتاح said...

سلام عليكم

لو ممكن تعرفينا معنى المصطلاحات الموجودة في هذا الموضوع لو ممكن


مثل

أنطولوجيا السرد

الهباء الداروينى

فينومينولوجيا السرد

مع الشكر

فارس عبدالفتاح said...

على فكرة موضوع المقال مثل لغز للدرجة دي

سلام عليكم

فارس عبدالفتاح said...

سلام عليكم على فكرة انا لم استطع ان اجلس امام الكمبيوتر وان اترك البحث عن معاني هذه الاصطلاحات وقد توصلت الى الاتي :

اولا ً :

كلمة " أنطولوجيا " لم استطع ان اتوصل الى تعريف واضح وصريح لهذه الكلمة ولكن قد توصلت الى معناها عن طريق الاشارات والايماءات فقمت بتحليلها وقد يكون هذا قابل للصواب والخطأ .

انطولوجيا : ترتيب المحتوى او الفهرسة بطريقة حدثية او زمنة او تراكمية .

هذا ما استطعت ان اتوصل اليه بالتقريب .

ثانياً :

كلمة " الهباء الداروينى " وهذا ايضاً بالتقريب انه مصطلح يدل على عدم صحة نظرية دارون في النمو والترقي للانسان فاصبح هذا المصطلح يدل على عدم الدقه او والعبثية .

ثالثاً :

كلمة " ينومينولوجيا " وهذا تعريف صحيح مأخوذ من موقع ويكيبيدياء يقول .

الظاهراتية أو الفينومينولوجيا (Phenomenology) هي مدرسة فلسفية تعتمد على الخبرة الحدسية للظواهر كنقطة بداية (أي ما تمثله هذه الظاهرة في خبرتنا الواعية) ثم تنطلق من هذه الخبرة لتحليل الظاهرة وأساس معرفتنا بها. غير أنها لا تدعي التوصل لحقيقة مطلقة مجردة سواء في الميتافيزيقا أو في العلم بل تراهن على فهم نمط حضور الإنسان في العالم. يمكن أن نرصد بداياتها مع هيغل كما يعتبر مؤسس هذه المدرسة إدموند هوسرل، تلاه في التأثير عليها عدد من الفلاسفة مثل : هايدغر و سارتر ومرلو-بونتي وريكور. و تقوم هذه المدرسة الفلسفية على العلاقة الديالكتية بين الفكرة و الواقع



تقبلوا كل المودة

فارس عبدالفتاح ... قومي عربي

السنونو said...

أدفع نص عمرى لو كانوا هم أصلا أصحاب المصطلحات دى فاهمين اللى بيقولوه أو حتى سامعين بعض متهيأتلى إن كل واحد منهم بيكلم نفسه ومبيسمعش غير نفسه

قلم جاف said...

ذات مرة كتب الدكتور "فهمي عبد السلام" عن كتاب عجيب أصدرته مؤسسة ثقافية حكومية بعنوان "محايثة مركزية اللوجوس"

ما أخبيش عليك.. أنا افتكرت دة رياضيات..

nael said...

لا خالص مش رياضيات
اللوجوس كلمة لاتيني معناها العقل، وبتيجي بمعنى الكلمة، وفيه فيلسوف فرنسي اسمه جاك دريدا كل شغله قايم على مركزية اللوجوس في الحضارة الغربية، بمعنى ان ازاي العقل عندهم بقى حاجة مهمة اوي ومركزية، وانهم بقوا يعبدوه بدل ربنا، مع ان فيه حاجات كتير ف الحضارة الغربية مش عقلانية، دا شغل دريدا
وبقى نبقى قدرنا نوصل لمشاهدينا معنى عبارة مركزية اللوجوس، محايثة بتيجي بمعنى ان حاجة بتحخصل في نفس الوقت والمكان اللي بتحصل فيه حاجة تانية، احنا بنقول في العربي، كنت تواجدت في المحطة حيث كان محمد واقفا، ومحايثة دي متاخدة من كلمة حيث ديكها، وبصراحة انا مش فاهم معناها في عنوان الكتاب
وفيه نقطة اخيرة: دا نقد ادبي او نقد ثقافي، والنقد المفروض انه علم، وبالتالي المفروض انه حاجة متخصصة، غير الادب، والحاجة المتخصصة والعلمية بيبقى صعب انك تفهمها من اول مرة وانما محتاجة التدرج والتدريب والدراسة، زي الرياضيات والفيزيا بالزبط، ليه مثلا بنطلب من كتاب نقدي انه يكون سهل بالنسبة للعامة ومابنطلبش دا من كتاب ف الفيزيا، مع ان فيها مصطلحات صعبة برضه؟