Sunday, February 22, 2009

انطولوجيا التدوين



مقدمة

" جم عندى المدونين , يا شعبى الحبيب , جم عندى القصر التدوينى و اتعشوا . و سئلتهم و هم بيتعشوا , ايوه سئلتهم يا شعبى الحبيب الصبور المهاود , سئلتهم : انتم كمدونين و عندكم مدونات , هل انتم مدونين ؟ . اجابونى , بعد ما اتعشوا ,  يا شعبى الحبيب , اجابونى و قالوا يا سيادة الرئيس , احنا كمدونين و عندنا مدونات , مش مدونين !! . "

مع الأعتذار لمحمد صبحى

-1-

انطولوجيا

من السخرية أن اتكلم عن انطولوجيا التدوين و خصوصاً ان فى ذكريات مهببة عن المصطلح . بس انا قلت بما أن فى ناس ادمنت التصنيف من نوع  أدب المدونات او الفكر التدوينى أو ثقافة التدوين او الحركة التدوينية او النشاط السياسى التدوينى او صحافة المدونات .. فأنا قلت مفيش مانع أن التدوينة دى تتحط تحت بند  نخترع له مصطلح جديد اسمه فلسفة التدوين . أى ان هذه التدوينة تعد من التدوينات المؤسسة لفسلفة التدوين ( وش بيغمز ) . نبدأ بتعريف المصطلح و هما كلمتين مختلفتين فى اللغة الأنجليزية , كل واحدة تعطى معنى غير الأخر لكن لها نفس المنطوق فى اللغة العربية .

الأولى :  Anthology 
تعنى: مختارات 
كمثال: انطولوجيا الشعر العربى... معناها مختارات من الشعر العربى . او انطولوجيا الرواية العربية .. معناها مختارات من القصة العربية . 
أما الثانية : Ontology
فهى كلمة فلسفية تعنى دراسة الوجود من حيث كونه وجود فى ذاته .

-2-

جريدة الشروق

فى معركة اليومين دول بين جريدة الشروق و المدونين و السبب كما يعلم أغلبنا , ان جريدة الشروق تنشر أجزاء من بعض المدونات دون إخطار صاحب المدونة !!! على الرغم من وجود الرابط للمدونة و احياناً اسم المدون .

-3-

ما هو التدوين ؟

تعريف التدوين صعب و لكن ممكن نعرف ما هو ليس تدوين , أى اننا نعرفه بالأستبعاد . التدوين ليس أدب على الرغم من وجود أدباء بيدونوا زى نائل الطوخى او طارق إمام . التدوين ليس نشاط سياسى على الرغم من وجود نشطاء سياسيين بيدونوا زى نوارة و مالك و مينا . التدوين ليس ثقافة على الرغم من وجود مثقفين بيدونوا زى مختار و د. ياسر و أسكندرانى . التدوين ليس رؤية دينية على الرغم من وجود مدونين ذوى مرجعية دينية فى الكتابة زى الصارم الحاسم و بن عبد العزيز . التدوين ليس نشاط صحفى على الرغم من وجود صحفيين بيدونوا زى عزة و عمرو عزت  و قس على ذلك . الأنطولوجيا التدوينية \ بمعنى مختارات .. توضح التنوع و الثراء فى التدوين .

و الأنطولوجيا من حيث وجود التدوين .. مش معنى وجود أدباء , يبقى فى حاجة اسمها أدب المدونات , مش معنى وجود مثقفين يبقى فى ثقافة التدوين , مش معنى وجود صحفيين يبقى التدوين صحافة .مش لازم التصنيف , التدوين كيان ضخم يستوعب كل شىء و لا يقبل التصنيف . و الأنطولوجيا هنا بمعنى وجود التدوين من حيث كونه تدوين فى ذاته !!! و ليس له تصنيف  .

-4-

النشر

انا مش ضد النشر بالعكس انا مع نشر اى حاجة و اى شىء بأى طريقة . انشر اى فكر , معنديش مشكلة لو بن كريشان جمع تدويناته المهمة و نشرها فى كتاب . انشر بأى لغة حتى لو باللغة العامية السوقية . انشر نكت , حكايات , قصص , طبيخ , حتى لو عايز تنشر عجين الفلاحة . ما يفرقش .. ليه ؟ . لأنك بالبلدى كده و من الأخر حتقع تحت أيد الناقد و القارىء و هم حيشوفوا شغلهم .

-5-

تصنيف

لماذا يدمن الناس التصنيف ؟ سؤال انا مش لاقى له اجابة . انا و عبد الرحمن كنا راجعين من وسط البلد و اتكلمنا عن ظاهرة النشر الورقى . قلنا انها فرصة فى وسط الهيصة دى أن أى حد عايز ينشر يلحق ينشر , لأن الموضوع زيطة و مولد . اتكلمنا عن الأباء المؤسسين او العظماء ال7 ( و دى تدوينة يبقى يكتبها عبد الرحمن بعدين بقى ) . و ان الأباء الروحيين للتدوين بيفرضوا وصاية ما حتى لو شكلية او عن بعد او فى طريقة الكتابة . أما اكثر ما فرضوه هؤلاء الأباء هو جنون الشهرة اللى بيزن فى عقلية المدونين . واحد يقول : انا حنزل التحرير علشان أعمل مجمع زى فلان . و تانى : انا لازم اشرب اللبن علشان ابقى ضخم زى علان , و تالت : انا حكتب بقلة ادب علشان ابقى مشهور زى شيطان . و رابع : انا حصور فيديوهات علشان ابقى مشهور زى ترتان .. و تقعد تسمع احلى كلام من ده فى حفلات التوقيع .

فى ناس عندها جنون التصنيف و اضفاء الألقاب . كان فى شخص بيعرف نفسه فى أحد حفلات التوقيع بأنه " المدون فلان الفلانى " , مش  المهندس فلان  او الدكتور علان أو صبى القهوجى ترتان او الحلاق زفتان , كأن التدوين بقى مهنة أهم من مهنته اللى بيشتغلها !! . لماذا يدمن الناس الشهرة ؟ سؤال مش لاقى له أجابة .

-6-

زن زن زن

يسئلنى بعض المدونين , اللى هم كمدونين و عندهم مدونات , مش مدونين , يسئلونى : طيب انت موافق على النشر بكل أشكاله , طيب زعلان ليه ؟ ما تسيب اللى يشتهر يشتهر . سؤال جميل , انا أحب اللى يسئلنى . أرد بكل شجاعة و أقول : اللى عايز يعمل حاجة يعملها , ينشر , يشتهر , ينتحر , هو حر .. بس بلاش وجع الدماغ .. لأن دماغ الأنسان مننا هى كل ما يملكه . شوف يا سيدى , منذ ظهور المدونات و الناس بتكتب , و الناس عرفت بعض , و فى ناس اشتهرت و طلعت فى التلفزيون كنشطاء حركيين معارضين لأنهم فى الأساس و قبل التدوين نشطاء حركيين فى حركات معارضة . و بعدين حصل اللى حصل . اشتهر التدوين بسبب الموضوع ده , و فى دور نشر استغلت الحكاية دى و بقت تنشر لناس . و خد عندك المدون الفلانى له حفل توقيع , و بروباجدنا و بانرات و زن زن زن . قلنا ماشى دى ناس بتنشر و انا كقارىء لى حق النقد . و بعدين بقى النشر فردى , كل مدون أكتشف انه كاتب و بقاله حفل توقيع مستقل . و زن زن زن . اللى بيطلع فى الجرايد و اللى بيطلع فى التلفزيون , الناقد المدون , الكاتب المدون , الحركى المدون , المعارض المدون . جت جريدة الشروق نشرت للناس , الناس اعترضت و قالت لأ , دول خالفوا و مخالفوش و حقى و مش حقى . و برضه زن زن زن . و يعملوا ندوات عن أدب المدونات و الكلينكس . و زن زن زن . يعنى انا مش فاهم . الناس تنشر يزنوا و يعملوا هوليلة . الناس ما تنشرش , يقولوا انا مش اقل من فلان , و لا علان , علشان مانشرش , مليش دعوة انا عاوز انشر , انتم وحشين . الشروق تنشرلهم , يزنوا . الشروق تنشر من غير ما تبعتلهم ميل , برضوا , زن زن زن . يعنى نشر يزنوا , مفيش نشر يزنوا , يتنشر من وراهم يزنوا , يتنشر بمعرفتهم يزنوا . ايه هو ده ؟ مش دماغ بنى ادمين دى ؟ و لا علبة خرسان ؟ .. فى ناس اتنشرلها تدوينة  و ناس تدوينة الا ربع و ناس نص تدوينة و ناس  ربع تدوينة و ناس تلت تدوينة و ناس تمن تدوينة .الناس مبقتش فاهمة المدونين عايزين ايه .

-7-

ماما زمانها جية 

دلوقتى .. لو مكنش فى حاجة اسمها تدوين .. و كان مواطن من اللى اتنشرلهم تمن تدوينة و تمن رومى و تمن بسطرمة . اخد التدوينة و راح بيها للشروق و قالهم ممكن تنشرولى ؟ تفتكروا كان حيكون ردهم ايه ؟ او واحد طقت فى دماغه ينشر مجموعة قصصية عظيمة !! , و راح بيها لدار نشر , تفتكروا كان حيقولوا ايه ؟ طبعاً عارفين الرد . كانوا حيقولوا للأتنين : ماما زمانها جية !! . 

عمرو عزت .. اهو صحفى فى كذا جرنال , حد سمعه بيزن ؟

نائل الطوخى .. أهو اديب و متصيت و بيكتب فى أخبار الأدب , حد سمعه بيزن ؟

نوارة .. حركية و متصيتة و حيصدر لها كتاب قريب , حد سمعها بتزن ؟

د. ياسر .. مدونة لا غبار عليها , و من اقوى المدونات اللى بتكلم عن مصر فعلاً .. حد سمعه بيزن ؟

بن عبد العزيز .. حركى و ناشط فى مجالات كتيرة .. حد سمعه بيزن ؟

مختار .. صحفى و مترجم و صنايعى فى شغله , حد سمعه بيزن ؟

اللى يغيظك انك تسمع واحد يقولك : انا التعليقات عندى بتعدى ال60 , انت عندك بتعدى كام ؟ . طيب واحد زى د. ياسر , التعليقات عنده بردوده على التعليقات مش بتعدى ال5 تعليقات , يبقى ده مدون كده و كده و على ما قسم ؟؟ . و أدى كتاب " أنا أنثى " العدد الثالث من مدونات مصرية للجيب نازل قريب , و اتفرج على الزن اللى حيحصل بسببه , ربنا يستر من وجع الدماغ . ( ملحوظة : انا كنت بتكلم مع احمد البوهى و قلتله أن الكتاب ده شكله متميز و كويس لأنه ذو موضوع واحد و بيناقش قضية قوية و قلت نفس الكلام ده لبيلا .. علشان بس محدش يزن و يقول انى بهاجمه من أولها ) .

-8-

فلسفة

يبقى نقدر نقول , ان انطولوجيا التدوين \ بمعنى مختارات .. شىء رحب , واسع , يساع من الحبايب و الأتجاهات الف . و أنطولوجيا التدوين \ بمعنى وجود التدوين .. هو وسيط نشر , قائم فى ذاته , لا يدل على موهبة أدبية و لا صحفية و لا نشاط حركى معارض , بل هو وسيط ذاته و ليس وسيط للشهرة او للمعارك او للتصنيف .

-9-

غفران

الله يسامحك يا هانى .. انت السبب فى وجع الدماغ ده كله .. لازم تنشر التدوينتين بتوعك دول : " المدون القفا " و  " حزق المدونين " . الا قولى يا هانى بصراحة و حياة مدونتك عندك : انت كمدون و عندك مدونة , هل انت مدون ؟

 ---


أنهى بالجملة الموجودة بالصورة الأخيرة

Now you can show the whole world why no one listens to you

الأن تستطيع ان تظهر للعالم لماذا لا يستمع اليك أحد !! .


 

38 comments:

Abdou Basha said...

جميل جداااا
انا كمان عندي مشكلة مع البروباجندا والزن لأي حاجة
دي نقطة ضعفي
الجماعية شيء لا يطاق وبتخلي الواحد يقلق، ويفكر في الجانب المسكوت عنه من القصة
البوست ده محترم

Appy said...

رامز اسمح لى
انا من موقعى هذا بناديك انك برضه تبطل زن زن زن
وتنقد فى المدونين سيب اللى يعمل حاجه يعملها محدش وصى على حد
يعنى فلان بيعمل او بيزن او عاوز يمشى على الحيطه انت مالك فوق فى الجنب كده علامه اكس ممكن تدوس عليها وتقفل الصفحه قدامك وتريح دماغك
اللى عاوز يكتب يافطه على ضهره ويقول انا ابو سحلول المدون برضه اعمل نفسك مش شايفه
باى باى وبطل زن انا بحب اقرا ليك الموضوع التانيه اكتر

^ H@fSS@^ said...

بص يا قداستك
سحر اسم الكاتب المطبوع على الكتاب لا يضاهيه اي شئ
ده بالنسبة للبعض
او يمكن للاغلبية
و خلينا نعترف انه حتى فترة قريبة و يمكن للان فكرة صدور كتاب من دار نشر يعتبر انجاز ما بعده انجاز
حتى لو كان مكتوب فيه حظك اليوم قص و لزق من الاهرام
يعني احنا لسه مكسرناش حاجز رهبة الكتاب و فكرته
ده غير انه خد بالك احنا كشرقيين اصلا بنميل اننا نقدس اي شئ متلمع اعلاميا
رموز سياسية
شخصيات فنية
ادباء
مفنكرين
هلم جرا و انت سيد مين يفهم يعني
فلما انت تيجي لشاب او شابة تقله كلامك جميل عاوز انشره و اطبعه في كتاب
مؤكد حصل هنا ماس كهربائي في مخ السخص اياه
عن نفسي لو جات ليا دار محترمة و قالت والله حابينك تكتبي و نطبع
مؤكد حنشكح
لكن مش حعيش الدور و يمكن انت من خلال معرفتك بيا تقدر تقيم ده صح ولا غلط
الفكرة ان الزيطة مش بحبها
كله براحةو في الهدوء يعني
فانا معاك ان الهليلة اللي بتحصل مالهاش لازمة
و المثل بيقول
كلما ازدادت الفكرة هشاشة كلما ازداد اصحابها شراسة في الدفاع عنها
و قيس على كدا حاجات كتيرة
انا اتذكر او لما بدات تدوين قريت عند عبده باشا موضوع و خلاني افكر ده كان في البلوج القديم قبل ما يتكل على الله الله يرحمه
انا كنت مع جمع و نشر ما نكتبه من مدونين
بس كانت ليا اسبابي
اولها اني لاحظت اعمال ادبية كتيرة تستحق الانتشار و ثانيها اني كنت بفكر في توثيق للحركة دي للتاريخ فقط مش اكتر
بس مخدتهاش من ناحية حفلات توكيع
و بوكيهات ورد
و الخ الخ الخ
طبعا حكاية ان اي مدون بيقولك انا بالصلاتو عالنبي بيجيلي 60 تعليق فدي مصيبة بحد ذاتها
غير اني لاحظت قاعدة بتحصل بنسبة كبيرة اوي
مفاداها انه كل ما زاد عدد التعليقات كل ما كان محتوى البوست اي كلام
الا في بعض الحالات اللي فعلا بيتم فيها نقاش
او بتكون ظاهرة معينة زي مثلا بوست اسور عن التحرش
او او او

لو تصفحت مدونات غير عربية حتلاقي اغلبها مش بتجيله تعليقات اصلا الا فيما ندر لانها فعلا عبارة عن اشياء شخصية تم نشرها اليكترونيا
لكن طبيعي
زي اي شئ بيخش وطنا العربي
لازم يتنيل بنيلة و تطاله يد التخريب
زي الفيسبوك
الله و يا محلاه لما كنت بس ضايفة امريكان و غربيين
اديك شايف الحال دلوقتي عامل ايه
مسخرة
انا عارفة اني طولت بس يعني موضوعك فتح لي كذا سكة
لكن نتفق في النهاية مع بعض ان الفشخرة الاعلامية مالهاش لازمة و لكن حب الظهور عند البعض هو المشكلة
التدوين خرم لنا دماغنا و بعد ما كنت بشكر وائل عباس انه كان السبب في دخولي التدوين لكن بتجيلي
ساعات ببقى عاوزة اطبق في زمارة رقبته
:D
غير كدا
كعادتك ضحكتني لما قلت يا بس
و منك لله

77Math. said...

نسيت تقول - مش بس عدد التعليقات - لكن كمان :

هييييييييه أول تعليق !

نسيتها دي، الناس اللي كتبت أسماءها دي مع احترامي، عندها كام أول تعليق بتقول فيه الناس هييييييييه ؟

وبتبقى ظريفة جدا لما ما يكون في تعليق تاني أصلا، مدمنين طوابير احنا في دمّنا حتى في التدوين


نسيت تكتبها دي: -الطابور التدويني والطابور التعليقي وحق النشر يلزم بإلغاء أي مودريشن على الكومنتات !- في العصر الحديث

أما بخصوص التصنيف بقى .. لأن تلات ارباع البلد دكاترة وبيولوجيين وما يقدروش ما يصنفوش ..مش عايزين يكتفوا بالثدييات !


ما ينفعش تبقى كدا انت وخلاص، لأ انت تصنيفك ايه، من دين لجزء من الدين لأية جهة من الجهات الأربع من الجزء من الدين،

وكذلك في السياسة والاجتماع وقس على ذلك !


يلا أهو حجزت رابع تعليق إيّاك حد ياخده !

تحياتي

^ H@fSS@^ said...

هههههههههههههه
ضحكتيني يا
ماث 77
بصي يا ستي
انا ساعات بحط الموديريشن من اجل حاجتين
واحدة منهم انه ساعات بتيجي هجمة فيروسات و سبام تعليقات فبكون عاوزة اوقفها
ثانيا ساعات بكون متوقعة قلة ادب من بعض الاشخاص
مش بقول تعليقات معارضة
لا
اهلا وسهلا بيها
لكن قلة ادب مش ظريفة
بس
حبيت اوضحلك فكرتي من المودريشن
لكن انتي نسيتي حاجة كمان هي اللي يجيي يقول هييييه اول تعليق و هو اصلا فيه موديريشين و لما صاحب البلوج ينش رو يبان ان الاخ تاني او خماس تعليق بيبقى منظره وحش اوي
لووووووووووووووووووول

77Math. said...

:D

ما أنا حاطة مودريشن كمان !

ودا يؤدي إلى أن ممكن نصنف بعض الناس من المدونين كمعارضة من ناحية التعليق،

كدا يعني

الموضوع- التصنيف والتفريع- بيفكرني بمصاصين الدماء، اللي لما ترمي خرز على الأرض أو ما يمكن تجميعه يتلهوا عن مصّ دمك بتجميع الخرزات المتناثرة !

Founoon said...

مش عارفه انا حاسة انكم مكبرين الموضوع اوي
مش اكتر من ناس فرحانة ان اللي بيكتبوه عجب ناس وشافوا انه يستحق
النشر حتى لو واقعيا هو لا يستحق النشر
ومن حق المدون دا انه يكون مبسوط
والشهرة بالنسبة لناس كتير ليها بريق لا يقاوم اي نعم انا شخصيا مش شايفة للشهرة اي بريق بدليل اني بكتب اساسا باسم مش حقيقي بس بس دا ما يمنعش ان الشهرة ليها سحر
وطباعة كتاب ليه فرحة
دا غير ان دي الموضة حاليا واحنا اجدع ناس ننفذ سياسة القطيع :)

karakib said...

طيب بما انك جبت سيرة التدوينتين بتوع القفا و الحزق بعد كلامك الناري ده فاللي يحبني ما يضربش نار .. ده اولا
----
ثانيا بقي اسمح لي اختلف معاك في شوية حاجات يا بشمهندس
انت بتقول
-----
التدوين ليس نشاط سياسى على الرغم من وجود نشطاء سياسيين بيدونوا زى نوارة و مالك و مينا . التدوين ليس ثقافة على الرغم من وجود مثقفين بيدونوا زى مختار و د. ياسر و أسكندرانى . التدوين ليس رؤية دينية على الرغم من وجود مدونين ذوى مرجعية دينية فى الكتابة زى الصارم الحاسم و بن عبد العزيز . التدوين ليس نشاط صحفى على الرغم من وجود صحفيين بيدونوا زى عزة و عمرو عزت و قس على ذلك . الأنطولوجيا التدوينية \ بمعنى مختارات .. توضح التنوع و الثراء فى التدوين
--------
انا في رأيي التدوين كل ده و أكتر
و لما سألوني ايه التدوين زمان في تاج
قلت لهم تأريخ شعبي لفترة زمنية ما هيكون كتابات المدونين باختلاف ثقافاتهم و مرجعياتهم و نشاطاتهم و مهنهم مادة خصبة و ثرية للغاية لأي شخص يريد أن يري واقع حال هذه الفترة الزمنية و ده ما حصلش في أي حقبة زمنية سابقة انه يكون في كتابات بالكم ده منشورة و مادة جيدة لكل من يريد البحث في اراء و توجهات الناس المختلفة
شكرا لمن اخترع الانترنت و المدونات يعني
--------
أما عن وجود أدب مدونات فأه في ادب مدونات ... يعني ما تقدرش تقول انه اللي بيكتبه محمود عزت في مدونة إحك مش ادب ... و لا المكتوب في مدونة العشب بتاعة دلال مش أدب ... رغم انه لم يطبع ورقيا ... و أنا بالمناسبة مش ضد الطبع الورقي بالعكس و شيء جميل اذا كان بيتم بمراعاة لصاحب الكتابات
و ناس تانية كتير بتكتب حلو زي غادة عبد العال و زي نائل و زي بيسو علي سبيل المثال
------------
أما عن اباء التدوين السبعة فأنا مش موافق عبد الرحمن و لا موافقك في انهم سبعة هما اكتر بكتير من سبعة ... هما حوالي عشرين أو تلاتين منهم سبعة مشاهير أو اكتر شوية أو اقل شوية
و لعلمك الشخص اللي بيحطم هذه التماثيل و بيكتب كما هو و ليس تقليدا لهم سواء في الاسلوب أو حاجات تانيه بينجح في أنه يعجب الناس .. لأنه ببساطة بيكون نفسه
----
هاكمل في الجاية

karakib said...

بالنسبة للحزق أو الزن .. فعادي كبر دماغك .. و عدد التعليقات ده عمره ما كان مقياس الا انه بيبسط ناس ... كل واحد حر يا اخي ... يعني انت اتكلمت عن دكتور ياسر ثابت ... تقريبا ما بيجيلوش تعليقات لكت اللي بيكتبه أكتر من مهم لدرجة أني ساعات بعد ما اخلص قرايته باقول لو علقت يبقي انا باسفه الكلام ... الكلام مقفول مفيهوش تعليق ... و ده شيء يزود من قيمته طبعا ... ينفع تطبق نفس المثال علي شريف عبد العزيز أو عمرو عزت أو أي اسم من الاسامي اللي بتعرف تفكر قبل ما تكتب اللي انت قلتها
------------
بالنسبة للشروق فأنا مختلف معاك ... أكيد حلو أن جريدة تنشر كلام المدونين .. حلو جدا كمان ... لكن لازم علي الاقل تقول لهم احنا هاننشر يوم كذا ... انت موافق و لا لأ ... و اكيد مينفعش يلخصوا الكلام الا بأذن صاحبه خصوصا أن تلخيصهم ما كانش تلخيص نهائي و ده لمن يفهم في التلخيص لأنه فن قائم بذاته تلخيص المقالات أو القصص أو أي حاجة ... زي شكسبير و شكسبير السمبليفايد و سمبليفايد السمبليفايد و كلهم تلخيصات مخترمة و ما بتخلش بما يريد أن يقوله الكاتب ... محدش مننا شكسبير ... بس اكيد مش لازم اكون شكسبير علشان اتضايق من أن الكلام بيتقطع بالشكل ده

karakib said...

اما بالنسبة لأنه التدوين مش مجال للشهرة ... فموافقك تماما .. و دي ماهياش حاجه عيب انه واحد نفسه يكون مشهور دي رغبة مقبولة و عادية و اللي نفسه يتشهر مش انسان وحش ابدا بالعكس ... يعني اللي نفسه يبقي غني أو قوي أو أي حاجة تانيه انسان عادي و كلها رغبات مشروعة ... بس للاسف التدوين مش سكة شهرة ابدا ... اللي نفسه يبقي مشهور لازم يكون كاتب موهوب .. أو ممثل شاطر ... أو مهندس ناجح في عمله ( زي المعماري الشهير حسن فتحي ) أو طبيب له ابحاث متميزة زي مجدي يعقوب أو دكتور جامعة ابحاثه مهمه زي د.احمد زويل
يعني من الأخر لازم يكون متميز في حاجة علشان يكون مشهور ... انما يبقي مشهور علشان عنده مدونة و بس مستحيل
ممكن يصور تلات اربع فيديو كليبات ( مش اقل من كده) و يهجص أي تهجيص و ده هيخليه فعلا مشهور

GEMYHOoOD said...

على فكرة انا اتبضنت و دة مؤشر مش كويس

TAFATEFO said...

معلش .. أنا مع رأي حضرتك في 85% مما كتبت .. لكن حضرتك تعمدت خلط الأوراق

في موضوع جريدة الشروق .. مش من حق جريدة الشروق (مش قانوناً) أو غيرها نشر التدوينات بدو إذن صاحبها .. ولكن إن استغلت غيابحفظ حقوق النشر فليس من حقها بتر التدوينات .. دي سرقة وتحريف كمان

واللي عايز يزن في الموضوع ده .. أنا شايف انه من حقه يدافع عن ما يرتئيه ملكا له


بخصوص الكلام عن المدونين .. وتعريف البعض لأنفسهم والبعض على انهم مدونين .. فأنا أتفق معك انه شئ سخيف فعلاً .. وبخصوص التعليقات وعددها والكلام الممل ده فأحب أنوه لإخواننا المدونين ان في حاجه ب**** اسمها أول تعليق - وحاجه أ*** اسمها محجوز هقرا وبعدين أعلق ولا مش عارف سايبه الحله على النار وبعدين هرجع أعلق

في حاجات كتير تشل .. أنا متفق معاك فيها قلباً وقالباً .. لكن مش متفق معاك في موضوع جريدة الشروق .. وإن كنت أحترم جداً رأيك اللي حضرتك وضحته على الجايكو بخصوص سيلان لعاب البعض على النشر هو ما أهدر الحقوق

دمت بود

karakib said...

http://al-araby.com/docs/1144/journalists/article2142180058.html
طلعت جريدة العربي بتعمل كده كمان و لقيت اسم محمود عزت منشور له كمان !!! انا محدش استأذني انه ينشر تدوينتي

محمد الكومي said...

رامز

كل اللي انت كتبته ده ماطلعتش منه غير بفايدة واحدة جديدة

مدونة بعد الطوفان

انا ماعرفتهاش غير من هنا

لذلك اكيد هتاخد ثوابي التدويني

m5m said...

فيه تدوينات طارت من عندك..ايه الحكاية

جبهة التهييس الشعبية said...

ايه ده؟
ده انا اذ بي افوجأ انك جايب سيرتي
هئهئهئهئئئئئئئئ

Bastawisi said...

ياعم حرام عليك ايه الكلكعة و العقد دي وجعت دماغنا
انطولوجية ايه و زن ايه ماياكش تولع

Yasser_best said...

أولاً، لا بد أن أشكرك أنت وكل من يرى فيما أكتبه فائدة تذكر وقيمة تبقى

أسجل احترامي أيضاً لكثير من الأسماء التي أوردتها في تدوينتك هذه

تثير قضايا مهمة تحتاج إلى تعقيب مطول، لكن دعني أقول لك بشأن حكاية "الآباء المؤسسين" والشللية التي تصيب القارىء بالشلل، إن العرب كانوا يصنعون آلهة التمر ثم يأكلونها في نهاية اليوم، وهم يقولون: ما ألذ هذا الإله!

لن أعلق على ما تكتبه الهيئات والجبهات أو ما تنشره حيوانات الصحراء والجبل بمختلف أنواعها، أو حتى ما يقوله العم والخال وعابر السبيل، وسأترك الحكم على كتاباتهم لفهم القارىء..وضمائرهم الشخصية

أما النشر الورقي الذي فتح الباب على مصراعيه فقفز البعض من النافذة، فأقول: الكم (في التوزيع والتعليقات)، و"الزن"، والضجيج المفتعل، لا يصنع فكراً ولا يقدم رؤية ولا يعد إبداعاً

عابرون في كلام عابر، كما يقول محمود درويش

وليس خافياً أن بعض الذين داخوا وسكروا من هذا الضجيج وتلك الشهرة التي هبطت من سماء التدوين، يظنون أن ما يكتبونه أدباً راقياً أو فكراً عظيماً، بدليل أن أرقام توزيعهم تفوق توزيع أدب نجيب محفوظ مثلاً

لهم الله..ولنا أيضاً

nael said...

طيب يا هاني، فيه سؤال، انا راجل باحث مثلا، وحابب اني استشهد ببيت لمحمود درويش في دراسة ليا، هل من حق محمود درويش انه يزعل علشان ماستأذنتوش قبل ما انشر الكوتيشن وما قلتلوش ان الدراسة نازلة يوم كذا، وهل من حقه انه يزعل لاني مانشرتش القصيدة كلها وانما نشرت بس الجزء اللي يخدم بحثي؟

nael said...

وإيه الفرق بين اللي عملته الشروق وبين مبدأ الاقتباس، اللي هو معمول بيه في كل مكان في حياتنا، طالما ان محتوي المقتبس منه مش سري ولا موجه لفئة معينة دون فئة أخرى؟

karakib said...

يا نائل في الحالة دي الكلام يبقي له معني ... يعني خدت شعر من محمود درويش أو رباعية لجاهين علشان تكمل معني كلامي في مقال أو أي كتابة دي حاجة ليها معني
انما علشان انشر في نصف صفحة تدوينات مبتورة .. مش متلخصة ... لأ ... مبتورة و مشوهة لأنه لما انشر نص الكلام من غير ما يكون في سياق اي حاجة يبقي اللي هيقرا هيقول دي عالم ضايعة ما اتعلموش يكتبوا حتي موضوع تعبير في المدارس انت بتتكلم في بحث أو دراسة ... انت شايف نص صفحة المدونات في الشروق كانت بحث او دراسة ؟؟ طيب كانت صحافة مثلا ؟؟ بلاش .. تقدر تقول عليها بريد قراء ؟؟ و لا ده كان اسمه ايه ؟؟

عزة مغازى said...

رامز انحنى لك تقديرا واجلالا يا فندم
رغم اختلافى معك فى قليل جدا من النقاط


سلمت كيبوردك يا هندسة

nael said...

يبقى المشكلة مش ف فكرة الاجتزاء، ومش ف فكرة النشر بدون اذن، وانما في شكل الاجتزاء، بمعنى اخر: هناك اجتزاء جيد وهناك اجتزاء سيء، ودي حاجة ممكن نتناقش حواليها للصبح

بمعنى اخر ودا رايي الشخصي: من حق الشروق، ومن حق البديل، ومن حق اي مكان ، انه ينشر اجزاء من مدونات، طالما المدونات دي مفتوحة قدام الجمهور اساسا ومحتواها مش سري، كون ان احنا شايفين ان دا اجتزاء مخل فدا رأينا، وكونهم انهم شايفينه مش مخل فدا رأيهم، لكن يظل اللي عملوه في رأيي حاجة شرعية تماما، زي شرعية الاقتباس بالضبط، حتى لو ماعجبتنيش انا شخصيا

karakib said...

ازاي بقي يا نائل !؟ يعني اخد نص الكلام و اقول ده اجتزاء و وجهات نظر؟
اديك مثال مثلا
--------
لا تغادر سيارتك ابدا , الا بعد أن تغلق ابوابها جيدا.
-------
اجتزاء مخل للجملة
------
لا تغادر سيارتك ابدا .
---------
مثال أخر
--------
لا تقود سيارتك ابدا , الا بعد أن تربط حزام الأمان .
-------
اجتزاء مخل للجملة
------
لا تقود سيارتك ابدا .
---------
---------
لسه شايفها وجهات نظر ؟؟ ثم الاقتباس يتم بعد الاشارة للنص الاصلي زي ما المصري اليوم بتعمل في أخر صفحة
أو يتم في سياق مقال له نفس معني النص المقتبس منه الجملة
الاقتباس شيء و تشويه و بتر النصوص شيء اخر

عباس العبد said...

عبده باشا
الله يكرمك يا ريس
انا كمان بتخنق من الجماعية , فكرة القطيع بتخوفنى , لأن القطيع سهل السيطرة عليه . بتحسسك أن فى سر و إن فى الموضوع . فى حاجة ورا القصة كلها
===
آبى
انا اسف يا فندم
اوعدك انى حبطل زن انا كمان
===
حفصت
انا مش ضد فكرة النشر . انا بالعكس مع النشر قلباً و قالباً . فكرة النشر مغرية و التدوين بما أنه " نشر الكترونى " فمغرى جداً كبوابة للنشر الورقى . لا أعتقد و قد أكون مخطىء فى أعتقادى , أن حد لما ابتدا يدون كان فاكر انه حيوصل للنشر الورقى . معتقدتش مثلاً ان فى حد لما ابتدا و قعد يقول لنفسه : انا موهبة مدفونة و خلال سنة اكيد حيجيلى تعليقات تقول انى موهبة و فى الغالب حيجيلى فوق ال60 تعليق و احتمال فى المستقبل تصدر جريدة , ممممم , حيبقى تقريباً اسمها الشروق القديم او الشروق الجديد , و احتمال تاخد منى جزء من تدوينة علشان انا مشهور , و انشر بقى و ابقى مشهور , قشطة يعنى .
انا معاكى فى نقطة تانية و هى ان أى حاجة بتدخل المنطقة العربية , لازم نسىء استخدمها .

عم مينا said...

احلي حاجة فيك يا رامز انك بتقول الكلام اللي من الآخر.. مع احترامي لجميع المدونين يعني بس هو من امتي لازم حد يستأذن قبل ما ينقل عن مدونة.. ما كل المدونين بينقلوا من بعض و بعدين يعني هم المدونين يعني احسن من الأدباء؟ أي واحد ممكن يكتب كتاب و ينقل فيه كلام عن نجيب محفوظ بشرط انه يقول مصدر الكلام اللي هو جايبه

أما بالنسبة لموضوع ان جرنال الشروق بيختصر المدونة و يخرجها عن سياقها فهم بيحطوا لينك المدونة علشان اللي عاوز يقرأ الكلام بالتفصيل يقراه

Ahmed Al-Sabbagh said...

لا تعليق
سلام

ذو النون المصري said...

انا قرات الموضوع كله و عرفت غرضك و المشكله التي تتحدث عنها
لكن انا ليس لي رد او تعليق عنه سوي اني اوافقك علي رايك في ما كتبت

dr.lecter said...

اللي عاوز يعمل حجه يعملها احنا مش هنزن عليهم واللي حخصل مع الشروق فضيحه طبعا بس خلاص الموضوع اتحل وبطلوا ينشروا خلاص

اما بالنسبه للهبل التاني فلا تعليق عليه

Che_wildwing said...

جميل جدا
ده التعليقات عندك 29 تعليق
وبتعليقى هيبقوا 30
شكلك مدون جامد على كده
بس نفسي أعرف
هما مين السبعة الكبار
.......
على فكرة
أنا من وجهة نظري المتواضعة ومن غير زن
التدوين هبط بعد ما مختار بطل يدون زي زمان واكتفى بقوايم المشتريات بتاعت المعرض
لو ليك علاقة بيه ياريت تقوله اعقل وارجع
عشان الواحد بطنه وجعته من الموجود في السوق

Alexandrian far away said...

معلش يا هندسه
أنت مش شايف أنك متخنها شويه؟
أيه الشبوره دي يا عمي؟
الموضوع ابسط من كده كتييييييييييييير

عباس العبد said...

77
انا نسيت الموضوع ده فعلاً . حكاية انا اول تعليق " هيه " , ظاهرة غريبة محدش قدر يفهمها لحد دلوقتى . التصنيف فى دمنا فعلاً . ربنا يرحمنا . هههههههههههه
===
فنون
انا معاك ان المدون يكون مبسوط , لازم ينبسط . و انا معنديش مشكلة ضد النشر , بالعكس أى حد ينشر أى حاجة , ده شىء جميل , و مفيهاش حاجة ان واحد يكون فرحان ان تدوينة له او كتاب له يتنشر . لكن ما يعملناش أديب او مثقف او مفكر او صاحب رؤية تقدمية , ما كلنا بنكتب , مش هو بس . افرح بس ما توجعش دماغنا . فاهمة قصدى ؟
===
كراكيب
انا مش شايف اختلاف فى كلامك عن كلامى علشان تبقى مختلف معايا . انا مقلتش ان التدوين صحافة او سياسة بس , انا قلت ان التدوين كل ده و اكتر . و ما أنكرتش ان فى أدب , بس ما اسموش ادب مدونات . محمود عزت " شاعر " و بيدون , مش العكس , لكن مش كل مدون كتب شعر بقى شاعر , و لا كل مدون كتب " مقالات سياسية تحليلية " بقى مفكر سياسى !!! ..
اما بالنسبة لحكاية المقلدين , فبلاش انت تتكلم فى النقطة دى , ما هو انت ليك مريدين و مقلدين دلوقتى و بيكتبوا بنفس أسلوبك روق نفسك يا عم . هههههههههههههه
انا مقلتش ان النشر عيب و لا الشهرة حرام , انا قلت ان كل حاجة بتتعمل لازم يتزن عليها كأنها أختراع و هى شىء عادى !!! .

عباس العبد said...

جيمى باشا
ليه كده بس ؟
===
مصطفى
انا حاخد منك جملة واحدة تلخص ما قد اطلت انا فى شرحه :
" سيلان لعاب البعض على النشر هو ما أهدر الحقوق "
شكراً ليك
===
محمد الكومى
انت كده اخدت احسن استفادة

عباس العبد said...

م5 م
انا اخدت بالى , بس مهتمتش . مش قضية كبيرة
حشوف قصتهم و ربنا يسهل و ارجعهم .
===
جبهة
انتى " نوارة " التدوين يا جبهة . لازم طبعاً نجيب سيرتك .
===
بسطاويسى
نأسف لدماغك الى اتوجعت .

عباس العبد said...

د. ياسر
متشكر جداً على زيارتك و متشكر اكتر على تعليقك . و انا فى انتظار ما وعدتنا به من تدوينة و شكراً جزيلاً على تعليق حضرتك . عابرون فى كلام عابر !!! .
===
نائل
انا معاك تماماً فى نقطة " شكل الأجتزاء " دى . لازم يكون فى امانة فى الجزء المنقول . لا يدى معنى مخالف و لا يستغل فى نص فى غير مكانه .
===
عزة
الله يخليكى يا فندم

عباس العبد said...

عم مينا
منورنى . و متشكر جداً على الأطراء ده . القصة ان لازم حد يزن على حاجة و خلاص . فاهم القصة ماشية أزاى ؟
===
الصباغ
منورنى
و عليكم السلام !!
===
ذو النون المصرى
متشكر يا فندم و سعيد ان فى حد مشاركنى فى الرأى .

عباس العبد said...

د. ليكتر
منورنى
===
ويلدينج
السبعة الكبار دول مسئولية " عبد الرحمن " لأن حقوق الطبع و الصك محفوظة . هو صاحب المصطلح و هو اللى لازم يدافع عنه و يشرحه . و بعين انا مش مدون جامد و لا حاجة , دول 30 تعليق بس , اقل من 60 ما ينفعش . ههههههههههه
===
اسكندرانى
تصدق و تؤمن بالله , ان كده غلط , احنا مش كنا بنتكلم قبل كده و كنت انت مخنوق و محموق قوى و مرمارتك مفقوعة زى زيك من اللى بيحصل ؟ و لا هو كلام و خلاص ؟

ألِف said...

لي تعليق على نقاش فرعي في التعليقات بين نائل و كراكيب بخصوص الاقتباس و إعادة النشر.

في كل النقاشات ال شهدتها، ابتداء من عند مختار العزيزي و بعدها عند عزة مغازي و العانس الحقود، ماحدّش مبدئيا شايف فرق بين إعادة نشر أعمال بكاملها، سواء كان العمل دا تدوينة من فقرتين أو كتاب أو ديوان شعر، و الاقتباس ال هو بتعريفه لا يزيد عن بضعة أسطر أو فقرة، و حيث لا يكون المقتبس\المقتطف\المسروق هو الغاية في حد ذاته!

المثال ال ساقه نائل و ال فيه أنه "يستشهد بأبيات من محمود درويش في دراسة يؤلفها" هو في رأيي مختلف عن سياق أن صحيفة تعيد نشر أعمال كاملة. بغض النظر بقى عن الجودة أو ال يستاهل أو ال ما يستاهلش.

الاختلاف في نقطتين محددتين: 1. كمّ المنقول و نسبته إلى إجمالي العمل. 2. الهدف من النشر: سياق أمثلة للاستشهاد، أو كنماذج لتحليها و التعليق عليها، في مقابل إعادة نشر عمل بكامله بدون تعليق، أي أن المنشور هو الهدف في حدّ ذاته.

بغض النظر عن الهدف إن كان لخدمة الإنسانية التدوينية، أو لتحقيق ميزة تنافسية في سوق أصبح فيه دا هو العرف.
و بغض النظر عن مهارتهم في التلخيص أو الاجتزاء.

ماحدّش معترض على الاقتباس بالمفهوم دا. لكن مش دا ال بتعمله الصحف. لو كانوا بينشروا أَنطولوجيا (مش أُونطولوجيا) للمدونات فيها أجزاء من كمّ كبير من المادة ال كانت منشورة في مدونات كثير و بيعلقوا عليها - يأرخوا لها أو ينقدوها - كان الموضوع اختلف لأن فيه قيمة مضافة من عندهم، و ساعتها يكون الاقتباس لأجل الدراسة، كما في مثال نائل.

لا مؤاخذة، أنا مش عارف التعليقات هنا حديثة و لا عتيقة لأن التواريخ مش ظاهرة، لكن أتمنى أني ما أكونش تأخرت على النقاش كثير كالعادة.

المدونون يتبعهم الغاوون
:)