Friday, April 03, 2009

بعضشى و ابو شأفة


-1-

تكنيك نضال البروليتاريا الثورى

حرق 3 منازل للبهائيين  :  

قام مجهولون يوم الثلاثاء الماضى ، بإشعال النار فى ثلاثة منازل يمتلكها بهائيون فى قرية الشوارنية التابع لمركز المراغة بمحافظة سوهاج، عقب ظهور أحد البهائيين فى برنامج الحقيقة على قناة دريم الذى قدمه الإعلامى وائل الإبراشى، والذى استضاف الصحفى جمال عبد الرحيم الذى هاجم البهائيين، ووصفهم بالكفر عقب احتفالات البهائيين بعيد النيروز فى حديقة الميرلاند فى مصر الجديدة.

وعلق محمد يسري، أمين شباب الحزب الوطني بقرية الشورانية، أحد زوار مدونة «جمال عبدالرحيم» علي مقالته المعنونة بـ"مغالطات زعيمة البهائية"  بقوله: "تجمع أهالي القرية مساء أمس الأول، ردا علي ظهور أحد البهائيين في قناة دريم، وأحرق الأهالي بيوت البهائيين، وضربناهم وطردنا المرتدين من قريتنا بمن فيهم الأطفال الرضع، وأحببت أن أبلغكم بهذا، وأنا علي استعداد لأي معلومات" .

أكدت الدكتورة بسمة موسى الناشطة البهائية ، أن ما حدث من إحراق منازل البهائيين بسوهاج الذى تم أمس، كان بفعل التحريض ضد البهائيين من قبل الصحفى جمال عبد الرحيم فى برنامج الحقيقة، الذى يذاع على قناة دريم، ومقاله الذى نشر فى جريدة الجمهورية .

وتؤكد بسمة أن اختلاف العقيدة لا يعنى الكراهية وحرق بيوتنا وطردنا وأشارت إلى أنها تعرضت لتهديدات بالقتل فى أحد البرامج مطالبة الدولة بحمايتها من بعض المتشددين الذين يتهمونهم بالكفر، مؤكدة أنها تقوم بإجراء عمليات جراحية لمواطنين مصريين من مختلف الديانات مؤمنة بدورها تجاه المجتمع .

--

علشان ينبسط بتوع حركة الجماهير و اندفاع الجماهير . انبستطوا !! اهى اتحركت الجماهير اهو و حرقت بيوت الناس و الدكتورة بتكلمهم عن قبول الأخر !! .. لأ و التحريض جى من صحفى !! سلملى على تنوير البروليتاريا..  علشان يفرحوا بتوع كارل ماركس ابو شأفة و ثورة الجماهير .

-2-

سكمن بكمن

مترو :

تنظر محكمة جنح قصر النيل ، القضية رقم 4732 لسنة 2008 جنح قصر النيل، والمتهم فيها كلا من"مجدى الشافعى" مؤلف رواية "مترو"، و"محمد الشرقاوى" ناشر الرواية ،بعد أن احالتهم نيابة حوادث القاهرة للمحاكمة بعد أن اتهمتهم بأنهم" صنعا وحازا بقصد الاتجار والتوزيع مطبوعات منافية للآداب العامة بأن قام المتهم الأول(مجدى الشافعى) بتأليف كتاب"مترو" وضمنه عبارات منافية للآداب العامة وقدمه المتهم الثانى(محمد الشرقاوى) الذى قام بطباعته ونشره وتوزيعه .. !!

--

الا ما سمعنا حاجة من " الأدباء و المثقفين " إياهم  و الّلى كل يوم ليهم إصدار و كل يوم حفل توقيع و كل يوم ندوة و كل يوم نشر فى الجرايد ,  كل واحد عاملى فيها كاتب ذو رؤية تقدمية ثورية و بيحلل المواقف و يحلل التحاليل و بيحافظ على كتاباته من النشر دون أذن , لأ ما انشرش , لأ لازم يستأذنونى .. كل واحد عامل فيها شكسبير .. و لما زميل وقع فى مشكلة كلهم " سكمن بكمن " .. فالحين بس يلقحوا بالكلام على خلق الله و فى الجد طلعوا شكسبير بعضشى !! .

---

سلطة الخطاب

"  أفترض أن إنتاج الخطاب في كل مجتمع٬هو في نفس الوقت إنتاج مراقب ٬ومنتقى ومنظم ومعاد توزيعه من خلال عدد من الإجراءات التي يكون دورها الحد من سلطاته ومخاطره٬التحكم في حدوثه المحتمل وإخفاء ماديته الثقيلة والرهيبة .إننا نعرف طبعا٬ في مجتمع كمجتمعنا٬ إجراءات الاستبعاد. وأكثر هذه الإجراءات بداهة٬ وأكثرها تداولا كذلك هي المنع ..

من مدونة خماسين







37 comments:

Bella said...

حلوة قوي بعضشي وأبو شأفة

الله يجازيك يارامز ايها التفكيكي الجبار

هههههههههههههههههه

karakib said...

motafek ma3ak

DIDON said...

ان مراقبة الانتاج الادب سببها مشاركة المؤسسة الدينية في مصر في السلطة المدنية وفي ادارة شؤون المواطنين الا ان هذا لايعني وانه في الدول التي تسمي نفسها دولة القانون والمؤسسات لا تخلو فيها للسلطة الدينية من سلطان
شيء آخر مهم جدا وهو اسبقية الادب على الدين والاخلاق والقانون ...وذلك لسبب بسيط وهو انه لولا الانتاج الادب لما كان هنالك كتب سماوية ولا حتى مؤسسة اسمها مجتمع او عائلة او مدرسة او دولة ولا حتى شيء اسمه "عقيدة"ولا فكر ولا انسانية
مالا يقدر المتدينون فهمه، وما تستغله السلطة السياسية لبسط نفوذها، هو ان الدين هو آخر ابداعات الانتاج الادب للبشرية جمعا

Anonymous said...

لا شعب متسامح فعلا

Hend.feps said...

انا بس عايزة اقول شكرا

بنت القمر said...

علي فكرة
التدوينة كلها كأنها موجهه لشخص ما
بقالك فترة بتدور في اسر مخاطبته وتحديه ومقارعته
-
ملحوظه جانبيه
جالي 66 دعوة من اشخاص مختلفين عشان اتضامن مع مجدي الشافعي وروايته
انت عاوز مين تحديدا اللي يتضامن؟؟

وشايف انه مقصر
وايه دخل الناس اللي اتسرقت تدويناتها في واحد عمل قصه اتصادرت عشان اتهمت انها مخله
هو المثقف ولا الكاتب ولا المدون لازم يبقي حامل دوما لواء الاعتراض
حتي لو كان الامر لا يهمه بنفس الدرجه مع الاخرين

Unknown said...

ايه ياعم رامز

البعير كان أرحم ياشيخ

عباس العبد said...

بيلا
بالعكس يا بيلا انا مش شايف انها حلوة .. تقدرى تقولى سخرية سوداء
شر البلية ما يضحك
انه ضحك حتى البكاء
الناس بقت عايشة فى رعب
تغذية العقول و الصوت الأعلى للتعصب
الجماهير بقى عندها خطاب انتحارى بمعنى الكلمة
احنا وصلنا لأسوأ انواع الخطابات
الناس بتتحرك فى همجية شديدة و عنف رهيب و تعصب أعمى و مع ذلك فى ناس بتطالب بكل هدوء بأنتفاضة جماهيرية فى دولة بتعانى من احتقان طائفى .. بالذمة ده كلام ؟ يرضى مين ؟
الأخوان خطاب تحريضى , الناصريين خطابهم تحريضى , حتى اليسار بفرقه و شيعه خطابهم تحريضى .. مش حاسين بالنار
اللى بيكوى فى الأخر هو المواطن المصرى مش التحريضيين اللى بيقبضوا من بره و من جوه
بجد حاجة تحزن جداً
===
هانى
ايه يا مواطن ؟ مالك كئيب كده ؟
لونك حزاينى ليه ؟
===
mra
مش حكاية تحكم و فرض سلطة و بسط نفوذ
هم ما بيقروش ادب ؟
خلاص نلغى بقى ادريس و السباعى و محفوظ و صنع الله و قصص امنا الغولة و ابو رجل مسلوخة
بجد فى حاجة مش مفهومة
ده شىء مش طبيعى و زاد عن الحد جداً

عباس العبد said...

بسطاويسى
متسامح على الأخر الصراحة
هههههههه
:(
===
هند
لا شكر على واجب
بس ممكن اعرف ليه ؟
===
بنت القمر
انا اول ما دخلت المدونة لقيتها منورة
قلت مش معقول تكون بنت القمر علقت عندى .. دى مقاطعة التعليقات و المدونة خالص
و لما شفت تعليق حضرتك قلت يادى النور يادى النور
بجد .. نورتى المدونة و شرفتيها بتعليق حضرتك

نخش فى التعليق بقى

انا ما اقصدش حد معين و لو حضرتك شايفة انى بوجه كلامى لشخص ما فياريت تقولى مين الشخص ده و اشمعنى حسيتى انى بوجه كلامى له
اما لو حضرتك زى حالاتى مبتحبيش تجيبى فى سيرة الناس ., او فى أحراج اننا نتكلم عليه لأنه ممكن ما يكونش هو .. فممكن تبعتيلى على الميل شكوكك او تكهناتك و انا افهم من حضرتك و لو فى توضيح اقوله لحضرتك

اما بالنسبة لموضوع الناس اللى اتسرقت تدويناتها فهى مبدئياً متسرقتش لأن الراجل حاطط اسم المدونة و اللينك ليها و أسم المدون فهو مسرقش
اما لو قصدك انه " اقتطع " منها اجزاء تفيد قضيته و هم محموقين علشان " اقتطع " تلك الأجزاء لأنه بال"اقتطاع " اساء للنص الأصلى و غير معناه فده اولى بنفس الناس انها تقف جنب الشافعى و الشرقاوى لأن المحاكمة مبنية على " اجزاء مقتطعة " من النص الأصلى و محطوطة بطريقة تسىء الى الكاتب و الناشر
يعنى نفس مشكلتهم .. فهمتى قصدى ؟
لكن لأن كتير من الناس دى مش محموق فعلياً على " الأقتطاع " قد ما محموق على الشهرة , فهو مش فارق معاه اللى بيحصل لغيره و هو ده اللى انا قلته فى تدوينة انطولوجيا التدوين
انا مش عايز اطول و مستنى رد حضرتك لو فى توضيح زيادة منى او تعليق من حضرتك

عباس العبد said...

م5م
حمد الله على السلامة الأول
فينك من زمان
ليه بقى عَقَل البعير أحسن ؟
يعنى انت عاجبك حرق بيوت الناس ده ؟
و عاجبك سجن الناس ؟
يا راجل ده لو انت عايش وسط ملحدين مش حيتمنوا حرقك .. يقوم الشخص المتدين اللى بيعرف يعنى ايه اختلاف و بيقبل الأخر لأنه ده من صلب تعاليم دينه .. يحرض على حرق بيوت ناس مختلفة معاه ؟

حـنــّا السكران said...

كيفك يا مولانا

وحشتني كتاباتك و هالمرّة واضح انه فاتني كتير .

كان واحد كاتب لينك للخبر بتاع حرق بيوت البهائيين قبل يومين عند نوارة أعتقد , و فتحت و قريته في جريدة مصرية .. صدّقني لو قلت لك اني حسّيت برعب حقيقي و أنا بقرأ التعليقات على الخبر .. أكتر من إحساسي بالخبر نفسه . لأنه ممكن واحد لوحده جاهل , يحرق بلد . بس لما تقرأ كلام أشخاص كثر , بيباركوا و بيأمنوا , هون الرعب يا صديقي . ثقافة الرفض و الحظر على الناس , السائدة بشكل مخيف , هنا مصدر الرعب .و هنا الطامة الكبرى التي ستمنع أي خطوة جديّة و جيدة إلى الأمام .نحو احترام الإنسان كإنسان و قبوله كما هو ما دام لا يؤذي أحداً , هذا أبسط حق في السـلـّم الإنساني , المكسور و المخلوع عندنا من زمان , و حتى زمان طويل قادم على ما يبدو .
و سأتكلم عن نفسي هنا . هؤلاء الناس عملوا عندي ما يشبه الإنفصام , بقدر ما أعشق الحرية و الديمقراطية بقدر ما بيظهروا فجأة و بيخوّفوني من كلّ حاجة , من أيّ نسمة حريّة تتيح لهم فعل ما يريدون, على طول بتخيّل الوضع متل العراق أو متل عندنا أيام الحرب الأهلية ( التي لم تنته على فكرة و لن تنتهي قبل أن ينهي الناس أفكارها و أدبياتها من عقولهم المريضة لأ، الحرب الأهلية و الكره الطائفي لا يأت من العدم ).و أنا أتخدث عن الجميع , و ليس عن دين أو طائفة معينة , فالحمد لله عندنا كلّ طائفة و كل مذهب يختزن من المصائب ما يحرق بلداً .

و بخصوص بعض المثقفين ( المذاهب الجديدة خصوصاً ما دمنا عم نحكي عن المذاهب و التطرف ), كمان بقيت بخاف من الكلمة دي ( المثقفين ) بس مش على طريقة هتلر طبعا ,, و لا بمعنى إن أنا أحسن من غيري .. أحسن ما حدا يفهمني غلط .لأني لا أصنف نفسي كمثقف , بل أقلّ من ذلك بكثير ( أتكلم عن المثقف الحقيقي , لا هؤلاء المصائب المتنقلة بين الكتب ) .

تحياتي يا رامز

أرجع بقى أقرأ اللي فاتني عندك .

ـ هو سؤال جدّي لو سمحت :

شو يعني ـ بعضشي و أبو شأفة ؟

شقفة يعني شقفة ؟

بنت القمر said...

رامز
=======
انا مش مقاطعة المدونة وانت فاهم كده
بس بعلق لما اكون عاوزة افهم نقطة محدده او اسجل اعتراض او اشيد بالنص
لكن متابعة ربنا يخلي الريدر بشوف كل كلمة بتنكتب
-2_انا مش بحب سلاسل التدوينات عموما بحس ان الواحد عشان يجمع فكرتها علي مدي اسبوعين شيئ مش لطيف ابدا طبعا بالنسبة لي
-انا متابعة السلسه اللي فاتت واحيانا بقرا التعليقات كمان بس هي مش محتاجة اي نباهة يا رامز عشان الواحد يعرف مين اليساريين بتوع او شقفه اللي مستنيين ثورة الجماهير
ولو اني مش مقتنعه ان اي ثورة للجماهير اللي بينادي بيها البعض معناه حركه"عدوانيه وغبية"زي حرق بيوت البهائيين بس دي مش نقطه خلاف
لاني ها تفتح جدل ابن ***هو الجماهير لازم تتحرك لوحدها ولا لازم يكون في قياده ثورية تسوقها وتوجهها والقياده دي لازم تكون في درجه وعي
قدايه ؟؟.
والثورات اللي حصلت في العالم كله من الثورة الفرنسيه الي 1952 كانت فيها قياده وحصل فيها عنف وتجاوز ولالا
والبديل ايه نقعد نستني لما جمال مبارك يعصر علي نفسه لمونه ويمسك البلد؟
ولا ده نظام فاسد وكفايه عليه كده والناس لازم تتحرك وتاخد حقوقها
- يعني جدل ملوش اخر
_ ولكن
اللي عاوزة افهمه
مين الناس اللي اعترضت علي سرقه وبرضه انا مصرة لنها سرقه تدويناتها ومش متعاطفه مع مترو
يا ابني ده الفيس بوك في 5000 جروب تضامنا مع مترو وعلي راي ربيع تضامنا مع اسماك البحر الحوامل في بحر قزوين
ده حتي التعاطف مجاني وببلاش ولا انت مش عارف
:)
- حكايه بقي الناس اللي عاوزة شهرة دي مش عجباني برضه يعني مختار العزيزي ولا شقير ولا غيرهم اللي حطوا بانر غير مرحب لجريده كذا انها تاخد من مدونتي رغم ان تدويناتهم نزلت باسمائهم ولينكاتهم غاويين شهرة
انا مثلا غاويه شهرة؟؟
مش عارفه يعني ازاي يا رامز
انت عارف اني مش كده ونزلت لي تدوينتين في جرنالين وتدوينه في كتاب
ولو كنت عاوزة اطلع في دريم مثلا انت ممكن تسال هاني كانت دريم تحت رجلي اظهر فيها وانا مرضتش
يبقي شهرة ايه فهمني
عشان كده مش هاممني رواية مترو
انا مقرتش الروايه ولا شفتها القضيه بشكل عام ممكن ما تاخدش نفس حيز الاهتمام عندي اللي ممكن تاخده قضيه تانيه يعني انت ممكن تتعاطف مع اطفال الشوارع_لكن لا ينفي انك برضه متعاطف مع المراة المعيله
ما هو مش لازم كل اللي اعترضوا علي مرمطه تدويناتهم زيي ينزلوا تدوينه ويعملوا جروب تضامنا مع مترو ولا يبقوا غاووين شهرة!!!
المنطق بيقول ان نزول تدويناتهم شهرهم كان يبقوا مقبول ومفهوم لو تقول هما عاوزين فلوس
يبقي تحليل منطقي
انا زعلانه عشان مقبضتش-لكن شهرةّ!!عجيبة دي حضرتك!!! طيب هاني اهو نزلت له تدوينه صدفه عرف عنها واضايق جدا لان محدش قال له ولا عرفه هو كمان معملش حاجه تضامنا مع مترو يبقا ايه
يعني انا مش فاهمه يا رامز انت ليه مصر تدوس علي رجلين الناس وانت ماشي بدون سبب يعني مزاج مثلا؟؟
اصر اصرارا والح الحاحا!
ماشي يا سيدي براحتك خلينا نشوف
اخرتها معاك ايه
تحياتي

karakib said...

بنت القمر ... انا مينفعش اتضامن مع كل حاجة و اي حاجة ... لسه ما وصلتش لدرجة اني ابقي موجود في مكانين او اكتر في نفس الوقت ... لأنه ساعة ما عملوا الندوة و لا المؤتمر مش عارف اسمه ايه بتاع مترو كان عندي حاجات مهمه تانيه باعملها
اما عن انضمامي للجروب و انه هو ده التضامن فاسمحي لي ... ما كانش حد غلب
التضامن الالكتروني دي حاجة جميلة خالص و مناسبة لناس كتير ... بس لا تناسبني انا نهائيا
بالنسبة للشهرة و الفلوس و الكلام ده
للمرة الاربعين الف باقول انه لا جرنال بيشهر و لا توك شو و لا فيلم تسجيلي حتي ... طلعت في فيلمين تسجيليين و حوالي خمس قنوات تليفزيون و سبع برامج و نزل لي في جرايد كلام و مش مشهور اهه و لا حاجة ... حتي الراجل المكوجي اللي تحت بيتنا اللي بيتفرج عالتليفزيون طول النهار ده و اللي انا بقي لي بتاع خمسة و عشرين سنه ساكن قدامه ... بيقعد يبص في وشي كل ما اكلمة و يقول لي انت ابن مين !؟ يعني مش عارفني حتي بعد ما صفحة الفيس بووك بتاعتي و الستيتس فيها ... عملت حملة تضامن مع اسماك بحر القزوين الحوامل لأن مزرعة الكافيار بتاعة ربيع باشا الكافيار فيها ماسخ ..و ده لنقص الرعاية الصحية للاسماك الحوامل ... و لازم كلنا نقف جنبهم
المهم ... نبطل تهريج و نتكلم جد بقي
بلاش كل ما نقرا نص نسقطه علي نفسنا او علي صاحبه ... مش كل حاجة بتتكتب ضروري تبقي لأن صاحبها بيعاني من ازمة عاطفية أو لأنه عايز يشتم حد
و بيتهيألي اللي كتبه رامز كان عام اوي ... بيتكلم بشكل عام و مايقصدش حد بعينه ... بيتكلم عن موقف ... هو ده اللي انا فهمته بصراحة

Unknown said...

رامز باشا
.........
طبعا مش مبسوط من حرق بيت أى بنى أدم أو ترويعه والاعتداء على حريته لكن دعنا نتفق أولا أن ذللك ليس سلوكا عاما أو رغبة عامة للمسلمين ولكنه تصرف تغلب عليه النزعة القبلية الصعيدية وتلك النزعة أثارها شيئين : أولا الشخص الصعيدى المستفز اللى كان فى حلقة وائل الأبراشى ومحاولته تأكيد ان قريته كلها بهائيين وثانيا الصحفى الضعيف جمال عبدالرحيم اللى كان جاى يتناقش بأسلوب النواصى :ياكافرة يافاسق يامرتدة ولم يحاول مناقشة أى فكر أو منطق فبالتالى نفذ بسطحيته الى النزعة السطحية أو القشرة السطحية للتدين عند بسطاء الشورانية فخرجوا تحت تأثير هذين السببين

والحقيقة أنا مش فاهم لغاية الأن ايه اللى استفاده وائل الابراشى من فتح الموضوع بهذه السطحية؟ ماسك فى كام صورة للناس فى الحديقة وعمال يضخم فى الموضوع كأنهم كانوا بيخططوا لقلب نظام الحكم مع ان المنظر كان عادى جدا ومافيهوش حاجة مستفزة (اللهم الا الجدع اللى كان بيغنى ع الجيتار اللى شكله رخم قوى وعايش فى دور مصطفى قمر)...وبعدين ليه الصعيدى اللى جابه ده؟ كان كفاية جدا بسمة موسى وقصادها حد عاقل غير جمال ده اللى مش فاهم ازاى يكون عضو مجلس نقابة الصحفيين

...............

بالنسبة للموضوع التانى فأنا من رأى بنت القمر أن هذا الموضوع ليس شرطا أن يكون ضمن دائرة اهتمام كل شخص أو أولوياته تحت مسمى التضامن مع المثقفين
وحاقول لك مثال: أنا وانت مهندسين فهل ده معناه ان أى مهندس يعمل تصميم غلط أو خطأ مهنى جسيم ويتحاسب لازم أنا وانت نتضامن معاه؟
ده مش حكم على مجدى الشافعى لكن وضع لموضوعه فى مساره الواقعى بدون تهويل أو مبالغة

..............

فهمت ليه البعير كان أرحم؟
ع الأقل ماكنتش فاهم منك حاجة

Bella said...

انا يارامز لما كنت باضحك باضحك على الاسماء اللى انت اخترتها لنموذج الاديب الذي لايشق له غبار وفي نفس الوقت اذا قرات له وجدت كمية اخطاء لغوية تهد جبال
وضحكت على اختيارك لاسم المتضامن المنظر بس

ومش عارفة ايه جاب موضوع الشروق في الموضوع ومستغربة قوي انك بتتكلم عن البحث عن الشهرة وانت عارف كويس جدا اني لست من الباحثين عنها

وبالنسبة للتضامن مع مجدي الشافعي ومحمد شرقاوي معلش يعني يبدو اني مضطرة اقول لك اني رحت حضرت الندوة التي اقيمت في مركز هشام مبارك للتضامن معهما الاسبوع الماضي

ولأني لست من هواة الشهرة لم اذكر هذا الامر معتبرة ان التضامن المباشر افضل مليون مرة من كلمتين والسلام

عموما ياعم رامز قلت اقول لك الكلمتين دول بدل ماازعل منك على كلامك عن الشهرة والناس اللى اتنشر لهم في الشروق باعتباري من المتضريين من السرقة اللى حصلت من جانب الشروق واللى باعتبرها سرقة حتى لو انت شايفها غير كده

معلش يعني صداقتنا لاتمنعني من الاختلاف معك والاختلاف بشدة اذا لزم الامر

وبس خلاص

^ H@fSS@^ said...
This comment has been removed by the author.
Unknown said...

حفصة
......

أعتقد كلامى واضح بدون هجوم وبدون خناق..أنا ماعجبنيش استضافة الشخص ده لأنه ماكانش ليها معنى يعنى لاهو رمز للبهائيين ولا متحدث ولا ناشط يعنى كان كفاية بسمة موسى وهى لبقة ومهذبة وان كان ولابد من أخر فليكن بهائى مصرى المدون المعروف

أما الراجل الصعيدى ده فكان مستفز جدا وكان بيحاول يدعم كلامه بالقرأن وده زاد من استفزاز المواجه له.

الصحفى اسمه جمال عبدالرحيم مش عبدالحميد

الحرق والترويع أنا قلت أول كلامى انه غير مقبول نهائيا

أيوه ماكانش ليها لزمة الحلقة لعدة أسباب أول سبب ضعف وعدم تكافوء الأطراف ثانى سبب تهافت الموضوع لأن الحلقة ماكانتش بتناقش البهائية أو الحكم القضائى ولكن كان كل موضوع الحلقة "مامعنى الاحتفال بعيد النيروز فى حديقة الميريلاند".... بالذمة مش دى هيافة؟

...................
وياريت ياحفصة تقرى الكلام قبل ماتتخانقى وتتريقى

وشكرا

^ H@fSS@^ said...
This comment has been removed by the author.
عباس العبد said...

جو
إيه الأخبار ؟ عامل ايه ؟
تصدق انا كمان بقى عندى نفس القلق و الواحد بيتكلم عن حرية التعبير و حرية الرأى و حرية نشر المعلومات و حرية الأفكار .. لنه معنى كده انك حتعطى بعض الناس امثال هؤلاء المجانين حرية لأن يفعلوا ما يشاءوا من همجيات
الحرية لها وجهين .. وجه ناعم باسم ضاحك مقبل على الحياة يحافظ عليها و يحافظ على كرامة البشر و وجه اسود عابس قذر لا يرى دنيا و لا دين و لا يراعى حرمات الانسان
ربنا يستر
بالنسبة لأبو شأفة و بعضشى
فأبو شأفة دى متاخدة من فيلم محامى خلع .. عوض ابو شأفة كان بيتحاكم لأن مراته بتطلع عريانة تغسل الحلل و العيال كانت بتقف تتفرج عليها .. و عوضده كان عامل فيها مثقف و بيهاجم العمدة
اما لبعضشى
فده اسم ابو شويكار فى مسرحية " سيدتى الجميلة " لما كانت بتقول انها سمعت بعض العبارات اللى بتردد قادمها فى رواية لشكسبير و هى اصلاً ما بتعرفش تتكلم و كانت بتشتغل حرامية , فرد عليها حسن مصطفى و قالها : ايون ايون .. شكسبير بعضشى .
===

عباس العبد said...

بنت القمر
شوفى , حقولك حاجة مهمة
انا مقصدش حد معين او بأشير لحد فى أى تدوينة من اللى انا بكتبهم و الناس اللى بتستنتج هى حرة فى ما تستنتجه , اما اللى بياخد الكلام على نفسه و بيحس انه هو المقصود بالكلام ده , فدى مشكلته , ده راجع لسببين فى رأيى
السبب الأول
أن الناس دى عندها الأنا متضخمة بزيادة و انها فاكرة من كتر ثقافتها !! أصبحت هى مرجعية نفسها , و بالتالى بتعتبر أن أى اختلاف مع افكارها هو هجوم على شخصها , فبتنفعل و تهاجم او تاخد الكلام على جوه و دى مش مسئوليتى دى مسئولية الطب النفسى , يروحوا يتعالجوا
أما السبب التانى
ففى ناس مبتقراش و بينحسر تفكيرها فى ابسط الحاجات الا و هى النت و التدوين و بيتحول ليها النت مرجعية و كأن التدوين هو ثقافة فى ذاته
يعنى ناخد مثال , مين اللى بينادى بتحرك الجماهير ؟
اولا انا مقلتش يساريين انا قلت فى ناس بتنادى بتحرك الجماهير , انا مقصدش مدونين بكل بساطة لأسباب كتير
اولا : عندك عبد الحليم قنديل فى كل كتاباته من ساعة ما كان فى العربى الناصرى و بعدها راح الكرامة و بعدها ماسك صوت الأمة
جريدة الكرامة الناطقة بأسم الحزب فيها تحريض على تحرك الجماهير
العربى الناصر : كثير من كتابها
جريدة الأهالى و الأشتراكيين الثوريين و الأشتراكيين الجدد و حركة كفاية نفسها كانت عايزة تعمل مسيرة مليونية للقصر الجمهورى
الماركسيين الجدد بينادوا بأنتفاضة شعبية حتى حزب التجمع و حتى الأخوان المسلمين بينادوا ب" هبة جماهيرية " .., و كل جماعة و ليها ادبياتها ...
تقدرى تقوليلى انا أقصد مين فى دول
؟
دى مش مسئوليتى ان الناس ما بتشوفش الصورة العامة و مخها بيتقفل على حاجة معينة
اما بالنسبة للتدوين , فلأن اسكندرانى كاتب تدوينة فيها كلام مشابه لكلامى و اننا مختلفين
فأولا اسكندرانى هو اللى ابتدا السلسلة بتاعته
ثانيا و بعلم اسكندرانى و ممكن تسئليه انا قلته و احنا بنتكلم انى حكتب سلسلة بختلف فيها معاك فى الرأى قالى اكتب و ورينى حتقول إيه ؟ و ممكن تسئليه
يعنى هو عارف و الكلام ده مش سر و لا حاجة خبيثة
اما حكاية انى اقصد حد معين فأنا مقصدش حد معين و لا بلقح بالكلام لأن تلقيح الكلام له ناسه المحترفين اللى بيغمزوا و يلمزوا و دى برضه حريتهم الشخصية

يتبع

بنت القمر said...

طب ما انا حسيت انك بتخاطب اسكندراني بالسلسه اللي فاتت
ولا نه يصنف يساري يعني
وبرضه بيقول ثورة الجماهير قلت انك بتوجه كلامك ليه
وواقع في اسار مقارعته وتحديه
يبقي تخميني في محله
الحمدلله_طبعا انت حر تقول اللي انت عاوزة وتوجه التدوينه لاي حد ان شا الله لعبحليم أنديل نفسه
:)

عباس العبد said...

بنت القمر
ننتقل لنقطة تانية
حكاية الشهرة
مفهوم الشهرة دى يبقى يشرحولك عبده باشا فى تدوينة هوا بيكتبها اساساً و محبش اقطع عليه
هههههههه
لكن فكرة الشهرة مش الطلوع فى التلفزيون و الناس تمشى تشاور عليكى
الشهرة المقصودة هو انه يبقى ليك مريدين و دراويش
اذا كنتى شايفة ان شقير و مختار عندهم رغبة يبقى لهم مريدين و دراويش فيبقوا غاويين شهرة
اما اذا كانت دريم تحت جزمتك فده حرية دريم و دى حرية لجزمتك دى حاجة متخصنيش
اما حكاية الطلوع فى التلفزيون و هذا الأشياء فمتفتكريش انك الوحيدة اللى جالك الموضوع ده حتى النشر كلنا اتعرض علينا النشر و كلنا اتعرض علينا الطلوع فى التلفزيون , و منهم فيلم بالأشتراك مع هانى و انا مرضتش لأنى ما بحبش التصوير و اسئلى هانى
بالنسبة لموضوع النشر
انا مش شايف انها سرقة لأسباب كتير انها مواضيع عادية لا ترقى لمستوى الخطاب و النص الواجب تحليله
كل واحد فاكر نفسه بيكتب خطاب و نص و انه لو اتقطع منه جزء حيشوه " النص الخالد " و يدمر مفهوم " الخطاب " فى التدوينة , يبقى مش فاهم حاجة فى التدوين و غاوى وجع دماغ
كل التدوين نصوص اقل من مستو ى الخطاب و اقل من مستوى تحليل النص
قوليلى كام واحد من المدونين نقدر نقول انه بيكتب " ما يسمى بالخطاب " و كام واحد من اللى نشرتلهم الشروق فى الجريدة يستحق يتقال على تدويناته خطاب واجب التحليل
انا اختلفت مع غادة علشان ندوة هى اتكلمت فيها و قالت الكلام اللى قالته , و من قبل موضوع الشروق و انا شايف انه لا مؤاخذة يعنى يوم ما حيبقى فيه ناس بتكتب كلام جد يرتقى لمستوى الخطاب مش حيتعدوا 5 او ست انفار
فبلاش الباقيين يوجعوا دماغنا
صحيح إن كل الكلام مهم و كل الكلام اتكتب بمجهود من صاحبه و اقتطع من وقته علشان يكتبه لكن مش معنى كدا نهيص
انا بتكلم عن اللى بيهيصوا
شقير و مختار و قلم جاف ما اتشرلهمش ليه و اتنشر كتاب لغادة ؟
سياسية الشروق غير ما احنا فاكرين
تقدرى تقولى ايهما يرقى لمستوى الخطاب : الدين و الديناميت و لا عايزة اتجوز ؟

يتبع

عباس العبد said...

اما حكاية التضامن مع مجدى و الشرقاوى
فأنا لا اعرف الشافعى و لا شفته و لا قريتله الكوميكس
الفكرة بأن المحاكمة مبنية على " اقتطاع " جزء من النص زى ما حصل مع " الثوريين " فالمفروض اللى بيثور بيثور على كله
اما نشوف حيعمله ايه مع ايهاب عمر
اهو واقع فى حاجة ازفت من الشافعى , على الأقل دار النشر واقفة جنب الشافعى
اما فى حالة إيهاب فدار النشر باعته
حنشوف
اما حكاية انى ماشى بدوس رجلين الناس فده مش صحيح
الناس هى اللى ماده رجليها اكتر من حقها و فى اماكن مش بتاعتها و كمان مش عاجبها و بتعلى صوتها يبقى يداس على رجلها علشان تبعدها عنى و تلم نفسها
نورتى المدونة

عباس العبد said...

بنت القمر
رد سريع على تعليقك الصغير قبل ما أسافر كمان ساعة
انا مكنتش بخاطب اسكندرانى
احنا كنا بنتكلم قبل كده عن الفكرة دى و قلتله انى بحضر مجموعة زى كده فقالى انه حيكتب حاجة شبيهة بالموضوع ده و قاللى اكتب و انا حكتب و نشوف بس هو كان اسرع منى فى النشر على المدونة
نشر قبل منى لأسباب كتير
ابسطها انه اكثر معرفة منى و اكثر اطلاعاً و اسرع ترتيب للأفكار
انا اخدت وقت لأنى كنت محتاج اقرا مش لأنى كنت مستنى علشان ارد عليه
و بعدين ده كان من زمان مش بكتب ارد على حد و احنا مكناش نعرف كل واحد حيكتب يقول ايه ؟
انا لا بلقح بالكلام و بزق بالكتف
فى ناس محترفة جداً فى الموضوع ده
===
بعتذر للجميع عن عدم تكملة الردود لأنى مسافر كمان ساعة
و لما ارجع إن شاء الله
حكمل رد

انكسارات .. احمد البوهى said...

يمكن ده اول تعليق ليا هنا لكن هعتبر البيت بيتى :)
ــــــــــــ
الأول بالنسبة لمسألة البهائيين الحقيقة حاجه يرثى لها بجد وشايف أن الامر أكبر من مسألة وائل الابراشى او الصحفى اللى تم استضافته المشكلة فى ثقافة الناس اللى حرقت دى لأن للأسف هناك من هم على شاكلتهم كثيرين شايف ان العملية محتاجه تغير جذرى فى الثقافة دى لأن قبول الاخر وتقديره من بديهيات الانسانية ... لكن فعلا اللى يخليك تحزن ان اللى بيهاجم وبيحرض ورافض للبهائيين شغال صحفى .. للأسف شىء محزن فعلا

ــــــــــــ
بالنسبة للجزء التانى من التدوينة
فأنا مستغرب أن مافيش تضامن بشكل كبير على مستوى المدونين فعلا حتى يوم المحكمة عرفت ان اللى راح من المدونين مهنى والغزالى بس .. فحزنت جدا
.
.
لكن الحقيقة مفهمتش وجهة نظرك قوى فى الجزء اللى يخص المدونيين اللى رفضو ان يتاخد حاجه من مدوناتهم بدون اذنهم
وياريت تصححلى لو فهمت خطا .. اللى استوعبته انك بتتهكم على صمتهم وعدم تضامنهم مع شرقاوى واللى انت شايف انه من باب اولى انهم يتضامنو لتشابه السبب وهو اقتطاع جزء من المكتوب
.
.
لكن مفهمتش قوى برضوانت على يقين فعلا ان محدش منهم تضامن ولا لأ ؟؟
لأن اعرف ناس بيكون ليها وقفات جاده كتير بدون بانرات او تدوينات ترصد حاله وبدون مايكون ليهم صوت عالى او بهرجه.. لأن التضامن مش دايما بالشعارات
فأنا عن نفسى مشوفتش حد من اللى اتاخد منهم تدوينات طلب تضامن هما رفضو ده على مدوناتهم واعلنوه لأنهم هما المتضررين من ده وتضامن معهم اللى اقتنع بالفكرة واقتنع بأحقيتهم

ــــــــ
فى شىء أخير ياريت برضو تصححهولى لو أختلط عليا الأمر
اللى فهمته من تدوينتك انك متضامن مع شرقاوى لكن مش متضامن مع اللى اقتطع من مدوناتهم وتم النشر بدون اذنهم مع انك شايف ان الحالتين فيهم تشابه وهو اقتطاع جزء من التدوينه
ــــــــــــ
آخر شىء انا عرفت ان شرقاوى الجلسه بتاعته اتأجلت فأتمنى لو تقوم بدعوة للمدونين للتضامن معاه واحنا معاك ياريس :) واعتقد ان اللى يقدر يقدم شىء مش هيتأخر
ـــــــــــ
آسف لو اسهبت فى التعليق

Unknown said...

حفصة
....

الله ينور عليكى...ده اللى عايز أقوله...وائل الابراشى تعمد اضعاف طرفى النقاش عشان يسخن الحلقة ويعملها حلقة مشطشطة يقطع عليها كل 5 دقايق بالمارشات العسكرية بتاعته وهو منوقع الناس قاعدة مستنية الكمالة فمافيش مانع وهما مستنيين يقلبوا فى كام اعلان لدريم وأهو كله مكسب
..........
ههممممممممممم

سؤالك خبيث وحاسس فيه انك عاوزة توقعينى فى الفخ... وعموما أنا حاقول رأيى ورزقى على الله ....فى رأيى السبب فى عدم ثورة مسيحيى سوهاج سببين : الأول هو أن البهائيين أغلبيتهم مسلمين أو كانوا مسلمين أو يحملون أسماء اسلامية...فليس فى الأمر مايستفز الأقباط بل ربما كان يسعدهم
السبب الثانى أن المسيحيين عموما من طبعهم عدم الدخول فى مواجهات مالم يشعروا أنهم انتهكوا أو استضعفوا..مش معنى كده انهم مسالمين أكتر لكن معناه انهم ملتزمين بمبدأ "التقية" أكثر

عموما أنا واثق فى سعة أفقك وانك طبعا فاهمة ان التصرف الهمجى ينسب لأفراد ولا ينسب لدين هؤلاء الأفراد

محمد

mohra said...

لا اظن ان حرق بعض الناس لبيوت غيرهم يعد نوع من حركه الجماهير

^ H@fSS@^ said...
This comment has been removed by the author.
Monzer said...

مش عارف ليه جماهيرنا العظيمة مش بتتحرك غير فى الاتجاه الغلط

مع ان حصل ميت حاجة زي الزفت من ناس زي الزفت كان الأولي بيهم انهم يولعوا فيهم بجاز وسخ

البوصلة بايظة تقريبا ولا مافيش بوصلة أصلا

تحياتي لأسلبك الهادئ البديع

ممكن يكون ده أول تعليق لكني متابع باستمرار

ودمت بكل خير

Unknown said...

حفصة
.....

مش عارف ليه حاسس انك بتناقشينى بمبدأ "وكمان بتقوللى صباح الخير...طخ"..لأنك عمالة تمسكى فى ديول كلام وتفتحى بيها مواضيع جانبية

أنا ماعممتش على أقباط مصر ولكن بنتكلم عن أقباط سوهاج .. ده أولا

ثانيا : أنا قلت "ربما كان يسعدهم"ولم أقل "بالتأكيد يسعدهم".. والفرق كبير بينهما
ثالثا : ولكى نكون صرحاء مع أنفسنا قد يسعد بعض الأقباط خروج مسلم من دينه لحساب دين أخر حتى لو لم يكن المسيحية.. وهذا ليس اهانة للمسيحيين ولكن مصارحة مع الواقع

أخيرا : التصرفات الهمجية من مسلم لا تدين الاسلام والتصرفات الهمجية من المسيحيين لا تدين المسيحية

وهذا مبدأ عام يا عزيزتى

^ H@fSS@^ said...
This comment has been removed by the author.
Unknown said...

حفصة
.....

على فكرة انتى حولتى مسار الموضوع تماما
عموما أنا حابب ألخص ردى عليكى في نقاط كمايلى :

1- أنا ماباتعمدش أحط مخلل أو فلفل فى كلامى
2-أنا لا أستثير مشاعر أحد وليس ذلك فى ضميرى أو من غاياتى

3- أنا عمرى ماتعاملت مع رامز فى مدونته على أنه قبطى وأنا مسلم بل اننى دائما أراهن على عقله وفهمه للأمور بما يتخطى هذا التصنيف الدينى الضيق

4- أنا لايعنينى أن يغضب من كلامى عابر سبيل قبطى يقرأ بعينيه ولايقرأ بعقله كما لايعنينى كذلك عابر سبيل مسلم من نفس النوعية فأنا يا عزيزتى لم أتكلم عن المسيحية بما يسوء أهلها فان كان قولى يغضب أحدا فهذا غضب خارج السياق... تماما كما لايعنينى أن يفسر قارىء مسلم انتقادى للابراشى وجمال عبدالرحيم ورفضى لما حدث على أنه دفاع عن البهائيين وهجوم على المسلمين...فذلك التفسير أيضا سيكون خارج السياق

أرجو أن أكون واضحا بمايكفى لوقف هذا النقاش العبثى الفرعى والعودة لمناقشة صلب التدوينة اذا أردتى

مع تحياتى

أبوفارس said...

والله العظيم أنت شربات يارامز..ياعم هو المفروض تكون مغسل وضامن جنه...الكتب التى تفضلت بأهدائها لى أثناء لقائنا بالقاهره كانت هديه جميله..
*********
**********
ده بدايه ردى على تعليقك اﻷخير عندى..باقى التعليق عندى ف الدكانه بتاعتى...تحياتى وصادق مودتى..خالد

أبوفارس said...

أنا قريت الخبر ف البديل وبعده حوالى ستين تعليق..التعليقات هى ماأصابتنى بالفزع...وهنا أتفق معك ومع السيد حنا السكران..نحن فى مأزق تاريخى محكم بالضبه والمفتاح وعلى مستويات عده..والخروج منه -للأسف- سيكون تمنه مرتفع جدا..ولكنه تمن تاريخى واجب الدفع..خالد

عباس العبد said...

م5م
الأستفادة الواضحة اللى استفدها وائل الأبراشى استفادة واضحة الا و هى ضمان مرتبه اخر كل شهر , المهم يقدم اربع حلقات يبقوا مهمين يبقوا تافهين ما تفرقش . المهم الأربع حلقات
بالنسبة للنقطة التانية
انا مش حتضامن أكيد مع مهندس عمل تصميم غلط و لا أنا شخصياً أعرف مجدى الشافعى و لا شفته قبل كده و لا قريت الرواية المصورة . الفكرة بأن الواحد بيسمع زعيق فى أوقات الهدوء و تلاقى هدوء فى عز الازمات و دى حاجة محدش فاهمها
.
===
بيلا
انا مقلتش أسمك فى التدوينة و لا كنت أقصد حد معين و لا جبت سيرة الناس أصلاً . انا قلت كلام عام . أكيد فى ناس من اللى أعترضوا على الشروق برضه معترضين على اللى حصل للشافعى و الشرقاوى . لكن انا بتكلم على اللى الناس اللى مقضياها و اللى انت قريتلهم , بتوع الهيصة
ده غير انى شايف أن موضوع الشروق مش سرقة
===
حفصة
انا مش فاهم انتى حودتى جامد بالموضوع كده ليه ؟
غيرتى مساره و بقيتى تحللى حلقة وائل و أعتقد ان وائل ببرنامجه ما يستهلوش ان حد يتكلم عليهم

عباس العبد said...

البوهى
منور المدونة
انا مش متضامن و لا حتضامن مع حد و فى نفس الوقت متضامن مع كل حد
انا مقلتش انه اقتطاع من المدونات , هم الى شايفين انه اقتطاع من المدونات و سرقة و انا شايف ان الشروق نشرتلهم و خلاص , لا هى سرقت منهم و لا اقتطعت أجزاء . حكاية النشر و السرقة و الأقتباس فدى ظاهرة جديدة اخرها زى ما بيقولوا شوية نقاشات و خلصت , لكن مترو و الشافعى و الشرقاوى و كمان إيهاب عمر و مجلة إبداع , فيها مصادرة و ناس حتتحبس مش حتة صغيرة مقطوعة من مدونة بيقراها 200 او 300 واحد بالكتير , لازم ناخد بالنا و الا الفكرة الرئيسية من النشر حتروح مننا .
===
مهرة
ما هو لا يعد فعلاً من تحركات الجماهير , بس فى ناس فعلاً عايزة ده يكون النموذج المثالى لحركة الجماهير , زى الجماعات الدينية او بعض الأحزاب اليسارية او زى مقالات التحريض الى كانت بتتكتب فى جريدة العربى و بتنادى بالحريق العظيم
ربنا يستر
===
منزر
منور المدونة و تعلق فى أى وقت
انت شرفتنى

عباس العبد said...

ابو فارس
ما هى دى المصيبة يا باشا
اننا لازم ندفع تمن غالى قوى .. ليه لازم ندفع تمن ؟ ليه ما نتعلمش ؟ ليه لازم يكون فى مصايب ؟
السؤال الأكثر حرقة و بيوجعنى .. ليه الناس مش عايزة تنضف ؟