Friday, September 14, 2007

ابو الرخريخ و الصحافة المصرية

هذه التدوينة اهداء الى تهييس و مراقب

لعلهما يتعلما كيف تكون الكتابة الصحفية

على المتغطى

يا لئيم

...........

فى فيلم جرى الوحوش

يقف ابو الدهب – نور الشريف و يطلب من خولى المزرعة ابو الرخريخ

شد حيلك معايا يا ابو الرخيخ

متقلقش يا سعادة البيه انا حجيبلك لورى محمل تيران بشرية

و عدساية الواحد فيهم تملا العين

.............

يعانى ابو الدهب من العقم و مستعد تمام الاستعداد للتضحية

بكل شىء للانجاب

يعود الدكتور نبيه – حسين فهمى من الخارج و معه كشف علمى

جديد يمكن العقيم من الانجاب و ذلك بأن يقوم بزرع قطعة

قد العدساية من تورلوب واحد بيخلف لتورلوب واحد مبيخلفش

.............

يبحث ابو الدهب و الدكتور نبيه على شخص يريد التبرع بقطعة من التورلوب

قد العدساية مقابل مبلغ من المال

فيجدوا عبد القوى شديد – محمود عبد العزيز ... منجد

قام ابوه بتنجيد و عزق جهاز بنت مأمور قسم الشرابية سنة 60

..........

يشاهد عبد القوى شديد القردين العليل و السليم فى الاقفاص

و يشاهد القرد و هو بيتنطط

فيطمئن قلبه

الا ان عبد الحكيم – حسين الشربينى يرفض تلك العملية

لأنه يرى بان ارادة الله فوق كل شىء و ان العقيم سيظل عقيما

و لا يمكن للعلم ان يغير ارادة الله

الا ان امام اصرار عبد القوى على الحصول على المال

و اصرار ابو الدهب على الانجاب

تتم العملية و تثبت التحاليل ان صحة عبد القوى و ابو الدهب سليمة تماما

.................

و لكى تكتمل المؤامرة

فان زوجة ابو الدهب – هدى رمزى من قلة الانجاب اصيبت بحالة

امينوروهيا واضحة --- مش حتخلف يعنى

و اصبح عبد القوى شديد كما يقول انا مش انا يا دكتور

و خاصة ان نواشى --- نورا زوجته ترى انه لم يعد كما السابق

و انه بنات بلاد بره ريحوه عن زمان

...........

كثرة الدواء تدمر جهاز المناعة لدى ابو الدهب فيصاب بشلل

و كثرة المال و قلة العمل تصيب عبد القوى بالجنون

.....

بينما يقبع ابو الدهب على سرير المرض فى لحظاته الاخيرة

يطلب من الدكتور نبيه

انا عايز اشوف القرد ... انا عايز اشوفه ... عايز اطمن عليه

عايز اعرف .... القرد لسه بيتنطط و لا بطل تنطيط

القرد لسه بيتنطط و لا بطل تنطيط

.............

و هكذا تنتصر ارادة الله على رغبات البشر

فأرادة الله بان يظل القرد بيتنطط و ابو الدهب عقيما

قد اصبحت واضحة

بجنون عبد القوى شديد و شلل ابو الدهب و امينوروهيا زوجته

و طلاق نواشى

التى ترى كما قالت انه

يالهوى يا لهوى ... و الخيبة طرحت من سهوى

و انها لابد ان

اعلى و اعلى و اعلى ... لحد المستور ما يدلى

و خاصة ان كل ذلك حدث

بسبب ان ام سبروت سرقت الغويشة الدهب و ابدلتها باخرى نحاس

............

و هكذا نتعلم انه لابد للصحفى قبل ان يكتب عن اى شىء

و خاصة رؤساء التحرير قبل ان يكتبوا شيئا

عليهم ان يتأكدوا ان

القرد لسه بيتنطط و لا بطل تنطيط

القرد لسه بيتنطط و لا بطل تنطيط

لأنه فى حالة انه لسه بيتنطط

يبقى ممكن تتطلب من ابو الرخريخ ... لورى محمل تيران بشرية

و عدسايتهم تملا العين

فقد رأت نواشى ان جوزها افسدته بنات بلاد بره و انه لم يعد كما كان

انا مش انا يا دكتور

انت سليم يا عبد القوى و التحاليل بتقول كده

صدق العليل و لا تصدق التحاليل يا بغددة

.........

و بما ان ارادة الله ان يظل ابو الدهب عقيما

فقد تكون ارادة الله ان يسجن بعض كتاب الرأى و الصحفيين

اى انهم محتاجون الى نقل

تورلوب كاتب قومى الى تورلوب كاتب خاص

............

لكن سيظل السؤال الى الابد

هل

القرد لسه بيتنطط و لا بطل تنطيط ؟

.................

على جبهة التهييس و مراقب

ان يجيبا .......

القرد لسه بيتنطط و لا بطل تنطيط ؟

8 comments:

مراقب مصري said...

بلا شك السؤال فلسفي وأزلي أبدي وعميق في فحواه عمق الأزل السحيق نفسه وفيه تتمحور البؤرة المركزية لمشيئة الآلهة السرمدية في الأفق اللا محدود في واقع السيطرة على البشر والتحكم في مصائرهم في ظل انبساط الإرهاصات الأبدية المسيرة لحياة البشرية

وطبعا بما إن مراة أبو الدهب دخلت ي حالة أمينوروهيا واضحة وأبو الدهب نفسه اتشل وما عادش قادر يقوم بمهامه الأزلية يبقى عليه العوض با معلم!!

وعبد القوي شديد سيبقى ضحية لصراع القوى الأزلية للسيطرة على مصير البشرية... وسيبقى في حالة جنونه حتى قيام الساعة وهيفضل هو مش هو يا دكتور

وفي هذا الزخم الدراماتيكي يتحول السؤال عن تنطيط القرد سؤالا عبثيا لا محل له من الإعراب لأن القرد وإن توقف عن التنطيط أو حتى ظل يتنطط زي القرد فبرضو المحصلة النهائية واحدة

إن إرادة الله لابد أن تنتصر في النهاية ويبقى العقيم عقيما ويبقى العنين عنينا ولن تفيدك العدساية شيئا... وحتى إن خسرت عدسايتك وأعطيتها لآخر فإن هذا الآخر لن تفيده العجساية في شيء فسيجري أبو الدهب جري الوحوش وغير رزقه لن يحوش

الأزمة يا عباس يا اخويا إن البلد كلها دخلت في حالة أمينوروهيا واضحة وباتت لا علاج ولا رجا منها... وحتى لو زرعنا لها عدساية أو تورلوب أو حتى عملنالها زرع مبايض فاللي فيها فيها

البلد دي عايزة تموت وتتولد من جديد
وعبد القوي خلاص ما بقاش فارق عن أبو الدهب وإذا كنا بنتضامن أو نتعاطف مع عبد القوي فدا مش عشان فيه منه رجا بس عشان الموقف الأخلاقي يا عزيزي!!

ههههههههههههههه
تحياتي لسؤالك الفلسفي العميق وأتمنى أن أكون لامست بإجابتي أفق الحقيقة وحدود السرمدية الأزلية وشفيت ولو جزءا ضئيلا من غليلك للمعرفة السفسطائية في ظل هيمنة المنغولية العقلية

رمضان كريييييييم ومبارك كمان

mary victor said...

تدوينة عبقرية و متعة الصراحة

كراكيب نـهـى مـحمود said...

بسم الله الرحمن الرحيم الاجابة - برنامج البيت بيتهم
زووم بقى ولقطة من فيلم العار
الله يخليك يا رامز سيب القرد في حاله
عضته وحشة وبتجيب كوليرا

محمد المصري said...

متهيألي أنا فاهم انتَ تقصد إيه
بس زي ما قلتلك عندي : القرد من الأول مكنش بيتنطط
عيبكم بس إنكم بتصدقوا

بس بوست حلو الصراحة

تــسنيـم said...

بأمانة القرد لسه بيتنطط اومال هما سجنوهم لييييييه

إنسان || Human said...

صباح الخير بالليل ...إيه التهييس ده ..الفيلم حلو أه ...بس أنا مش فاهم حاجه ..

zenzana said...

ههههههههههههه
القرد عمره طبعا ما هيبطل تنطيط

ههههه
جامدة طحن

Unknown said...

طب القرد لسه بيتنطط ولا بطل تنطيط