Sunday, January 13, 2008

عن ولاد الكلب



ولاد الكلب

هم و الكلمة نفسها ... بقالهم شهر

مش عايزين يطلعوا من دماغى

افتح التلفزيون الاقيهم جايبين فى سيرتهم

اقرأ الجريدة ... سيرتهم

كتاب , اصدقاء , ندوات , حفلات , قعدة حلوة

مفيش حد مش جايب فى سيرتهم

.......

1-

تسمع سياسى حكومى بيتكلم

يقولك سبب التخلف و التأخر الى احنا فيه هم

و انهم مش بشتركوا و لا بيقدروا الى بتعمله الحكومة

و علطول طلبات

2-

تسمع سياسى معارض

يقولك برضه هم السبب ... مش ايجابيين

معندهمش بطاقة انتخابية ... الحكومة بتشتريهم

مفيش فكر سياسى منظم

3-

تسمع المثقفين ... نفس الكلام

سلبيين ... اغبياء ... جهلاء ... بيمشوا ورا الخرافات

و مبيقروش و معندهمش حس ثقافى

4-

تسمع الثوريين ... علشان مش بيطلعوا فى مظاهرات

قاعدين فى بيوتهم .. خايفين على لقمة عيشهم

5-

رجال الدين ... برضه بيتهموهم نفس الاتهامات

السبب فى تخلفنا الدينى هم ... بسبب البدع و الخرافات

و قلة الصلاة و البعد عن الله

6-

و لو واحد سلفى مش بس بيقول عليهم ولاد كلب

لأ ده بيكفر المجتمع كله و يهجره

7-

و طبعا لو سمعت واحد غنى حتلاقيه برضه شايفهم ولاد كلب

جعانين ... شحاتين ... عينهم فارغة ... و مبيشبعوش

و طماعين و عايزين يعيشوا

8-

الفنانين و الادباء بيقولوا برضه ان ولاد الكلب هم السبب فى انحطاط

الذوق فى الفن والادب

ده حتى المغنيات و الرقاصات

بيقولوا ان السبب فى انحطاط الاغنية المصرية و فن الاستعراض

الذوق السىء لولاد الكلب دول

9-

و المدونين .... قريت عند مدون ان السبب فى كل مصايبنا هما برضه

ملهمش حل

انا مش عارف ازاى ولاد الكلب دول مستحملين كل الكلام ده

و مش بيعملوا حاجة يدافعوا بيها عن نفسهم غير انهم

يزيدوا فى انهم يبقوا ولاد الكلب !!!!؟

........

انا نسيت اقولكم

انا بتكلم عن الشعب

مفيش حد مش بيتهمه بانه شعب ابن كلب واطى

بيجرى ورا لقمة العيش و مش عايز ينزل مظاهرات و يثور على الحاكم

و يغضب و يقاطع و يسمع موسيقى كويسة و يقرأ الادب و يتذوق الفن

اغرب جملة قريتها فى الموضوع ده و جننتنى

هى من مدون يتهم الشعب انه مقصر فى المقاطعة و مش بيقاطع البضائع الامريكانى

و الدليل انتشار العربيات الشيفروليه !!!!؟

شفتوا الجمال

شعب غريب فعلا

1-

الشعب الغلبان بيشترى عربيات شيفروليه لأبنه و بنته

علشان المرسيدس الالمانى غالية على الفاضى

و لما العيال تكبر بقى تبقى تجيب هى المرسيدس

2-

الشعب الغلبان مشتراش شيكاغو ب40 جنيه

و موسوعة اليهود و الصهيونية للمسيرى بالف جنيه

و لا المجموعة الكاملة لنجيب محفوظ ب950 جنيه

علشان يبقى مثقف و قارى و مطلع و عارف حقوقه .... جاهل صحيح

لكن بيشترى ترجمات دار رياض الريس لكافكا و دوريس ليسينج

و فن الادارة من العبيكان

هم السبب فعلا فى الانثقاف الغربى و الانكسار الحضارى

3-

الشعب الغلبان مش بيشترى السى دى بتاع روتانا دلوقتى بعد ما رخصوه

للمطربين المصريين علشان يحافظ على الهاى فاى بتاعه

لكن بيسمع كراوية و لينا شماميان و metallica و Carlos Santana

فعلا ذوق منحل و طغيان شديد للثقافة الغربية و محو للهوية الوطنية

4-

الشعب الغلبان بيلبس بنطلون Levi’s و بدلة Marco ferri

و هو رايح الشغل و مش بيرضى يشترى الصناعة المحلية

فاسد ... بيخرب اقتصاد بلده

5-

و بيشرب شاى ليبتون دابل باكت الخرز و قهوة تركى بالموس او شوكولا

بدل العروسة و شاى كده

و قهوة عم جمال على قهوة الطلبة علشان يا عينى بيقرف

6-

اسكتوا !

مش انا شفت الشعب الصايع ابن الكلب ده امبارح

قاعد فى ستار باكس بياكل chicken caeser salad

و معاها hot chocolate

And for dessert a big chocolate cake with double portion of crème

شعب نجس فعلا معندهوش اى احساس بالمسئولية

.......

حاجة حقيرة فعلا انى اتهم الشعب بالتقصير

الطبقة المتوسطة

الراجل و الست الى عندهم عندهم ولد و بنت و بيصحوا بدرى

يودوهم المدرسة و يروحوا شغلهم

و عايشين على القد

و يرجعوا من الشغل الام تطبخ و تذاكر للأولاد

و الاب ينزل الشغل بتاع بعد الضهر

تقدر تقنعوه بأنه يسيب كل ده و يطلع مظاهرة

او ان ابنه الى شايف مستقبله كله فى عينيه

و يتمناله انه يطلع احسن منه

يقنعه بانه يبقى ثورى و امن الدولة يقبض عليه و يضيعله مستقبله

اى اب او اى اسرة عايشة على قدها

تقدر تشتمها و تتهمها انها بنت كلب ... سهلة

بدل ما انزل و اسمع انين الناس فى الشوارع

و صراخهم و احساسهم بالغضب و الفقر و الاحتياج ... لأ

اقعد اتهمهم بالتقصير لأنهم و لأراحة ضميرى ... ولاد الكلب المسئولين عن كل المصائب الى حلت على نافوخ البلد و كمان هم حيتشتموا و مش حيتكلموا و حيسكتوا

و الحكومة شاطرة .... لا بتجوعه فيثور عليها و لا بتشبعه فيطالب ببقية حقوقه

لأنى لو عذرتهم و قدرتهم و حسيت بيهم

حيطلع فى ناس تانية هى الى بنت كلب

و الناس دى احنا مش قد عضتها و لا حتى هوهوتها

فخلينا فى الغلابة دول

و الدليل على انهم ولاد كلب ... انهم ساكتين ... مش برضه ؟

.....

طبعا ... يدخل فى اعداد المصيبة و ربما الكارثة

لو الى بيتهم الناس بأنهم ولاد كلب

هم رجال الدين او الى معتبر نفسه واعظ

انتم مبتصلوش .... مابتراعوش ربنا .... فبينتقم منكم ... كلكم زنا و فجر و كفر

لكن المصيبة فى رجل الدين انه بيشتم بأسم الله

يعنى الله جل جلاله هو الى قرفان من الشعب

يا نهار اسود ... يا نهار اسود

و تتحل ازاى دى ؟

اصله حتى لو الشعب الواطى ده ثار

عمره ما حيثور على رجل الدين

يا خرابى .... يا ا..

.....

و العمل ايه ؟

و العمل فى الشعب ابن الكلب ده ايه ؟

مش برضه !؟

....

52 comments:

محمد المصري said...

عندي امتحان كمان شوية يخرب بيتك

أنا زهقت من الكلام في الموضوع ده وأفتكر إننا اتكلمنا فيه بشكل مباشر كتير .. سواء بشكل مكتوب في المندرة أو في العموم

يعني مش جاي أرغي ، أنا جاي أقولك بوست حلو أوي

حاسس يا رامز بتغيُّر في توجهاتك .. فضلك زقة وتعود لدين آباءك وتعتبر الناس - ولاد الكلب - كويسين فعلاً ولسه فيهم خير كتير

nourita said...

الشعب الصايع ابن الكلب

the post is wonderful :)

مصطفى اسماعيل said...

بوست حلو يا رامز

وعلى رأى الواد محمد عن منير انه قال
الناس الناس
فتافيت الماس

معلش سؤال لنوريتا
يعنى ايه الشعب الصايع ابن كلب
مش فاهم بجد

ذو النون المصري said...

ايه رايك ان ولاد الكلب دول هعما نفسهم بيقولوا عن نفسهم انهم ولاد كلب يعني هما نفسهم مقرين و معترفين باصلهم الكلبي
كمان بيقولوا كده عن بلدهم كلها و شعبهم كله
.....................
تدوينه ممتازه
و الموسيقي فعلا ماشيه مع البوست وروعه

nourita said...

Im just quoting...
it is not my sentence, if u re-read the post, u will find it

sorry for the confusion

Amr Ahmed said...

بجد
برافو عليك

رااااااااااااااااائع

ماهم ولاد الكلب هما اللي شايلين الطين في كل الحالات

Anonymous said...

على فكرة يا رامز البوست ده حلو أوي
خصوصا إني لسة متخانق مع واحد من نفس العينة اللي إنت إتكلمت عنها بيقوللي الشعب المصري شعب زبالة

إيه الناس دي يا جدع

ماما نونو said...

تحفة
تعبت دماغى يا اخى
انا نفسى ابقى تافهة و ما افكرش لكن البوست بتاعك رغم انه كوميدى خلانى افكر
مبروك البوست

DantY ElMasrY said...

الشعب المصرى ابن كلب ...عجيبة!!!!!
دا شعب بصراحة ظلم كبير للشعب
وحتى اللى قال انه شعب زبالة ظلمه
الشعب المصرى شعب فقى مالوش غير انه يقرا على الميتين وينتظر حسنة من اهل الميت
عمرك شفت فقى يرجع حسنة ولا حتى يبص فيها

Unknown said...

مش برضه دى بتاعتى يارامز..ليا حق الاقتباس
...................................
أنا الحقيقة من ساعة المرسيدس ما بقت بيئة والشيفروليه خدتها المدام بقيت أركب جاجوار..هى دى العربيات يا برنس
...................................
مين ياخويا المسيرى وكاكا اللى بتقول عليهم دول؟ ياعيب الشوم..فى سنك ده ولسه بتقول كاكا؟
..................................
الشاى بقى انا باشرب دلما..ابقى جربه بعد سندوتش الفول
...................................
ستار باكس ده رحته مرة وعيطت بعدها 3 أيام من اللى دفعته....وخد بالك دول يهود (ششش..ماتقولش لحد)..!
..................................مما سبق..يتضح لك انهم فعلا.....ولاد كلب

Unknown said...

على فكرة انا مبسوط انك علقت عندى أخيرا ورديت عليك هناك..ابقى شوف ناتى

وعلى فكرة فيه حاجات تانية يمكن تعجبك..قلب انت بس

^ H@fSS@^ said...

الله يعني انا لما كنت بقول اني مش حروح مظاهرات و خليني في السليم احسن كان بيتقال عليا اني بنت عدم اللا مؤاخذة كلب!!؟؟؟
خياااانة
تبا
اللعنة
مش قادرة
اييييي
لا بجد
اصل انا كانت ليا نظرة في موضوع الوقفات التضامنية و المظاهرات قال ايه السلمية و بحت بيها لشخص اثق في رايه فقالي لو قلتي الكلام ده علنا حتتشخرمي و تربي مشاكل مع عداوات بنت جاهل
و حيصدر امر بفعص دمل وشك من شانه ايقاف اثر الانتشيبيوتيك اللي باخده
لكن لو دي نظرة الناس فينا احنا اولاد اياه تبقى نصيييباااه
طيب يا جدعان ما تيجوا بينانقوم قومة رجل واحد نروح نتظاهر قدام قسم بوليس ولا حاجة منه نشيل التهمة و يمكن ربنا يرضى علينا و حد فينا يتمسك و الباقي يشتغلولوه بانرات و حملات و بوستات الحرية و الطعمية؟؟
الا صحيح اخبار حملة الحرية لاصابع قدمك ايه يا عبس؟؟
قلعت الشراب و لا لسه؟؟
على العموم انا لسه معاك

عباس العبد said...

محمد المصرى
مشكرين على زيارة حضرتك
يعنى مقلتليش رأيك فى الكتب بعد ما نشرت الصور
طمنى عليك فى الامتحانات
شد حيلك
اما حكاية حوارنا فدى موتناها حديث و رغى على رأيك
ربنا يوفقك
....
نوريتا
انا فهمت طبعا انك بتقتبسى من كلامى
و متنسيش اول ما تنوى تيجى مصر
قداستى تحت امرك
...
مصطفى
موشكر على الزيارة و الاطراء يا باشا

عباس العبد said...

ذو النون
هم بيقولوا على نفسهم ولاد كلب
لأن الانتلجنسيا او من تعتبر نفسها الانتلجنسيا هى الى اقنعتهم بكده
لدرجة انهم بيرددوا الكلام ده بدون وعى
و دى ازمة حقيقية
انا نفسى مش عارف
صحيح ان العقل الجمعى فى مصر ممكن السيطرة عليه و توجيهه
بس الفرصة لما تيجى لحد و يقدر يخرج منه زى المثقفين و الفنانين و الادباء
فالمفروض انها فرصة للمواجهة مش للأنغماس فى مزيد من الفساد و التوجيه لهذا العقل
زى بالضبط لما تلاقى مثقف باع نفسه للسلطة و بينظرها و هو عارف انه بيكتب كلام غريب
الناس جعانة و هو بيكتب عن الرخاء
و فى نموذج تانى زى حضرتك مثلا
و الدور الى بتقوم بيه فى تلخيص مجموع قراءاتك و ملخاص لكتب مفيدة
ده تنوير يحسب لك
لأن فى ناس غير قادرة على شراء الكتب
فهمت قصدى
انما الخازوق الاكبر
الاختراع الجديد الى اسمه التيارات الفكرية
كل مجموعة مناخوليا و بتهجس و مش فاهمة حاجة
او حتى بتتكلم ضد ثوابت او قيمة مصرية و بتنسفها من اساسها
يقولك
اصل ده تيار فكرى جديد حداثى بنيوى تفكيكى سيريالى عولمى ماوراء خرم الاوزون
و هو ده الى مخلى السلفية الدينية صوتها اعلى لأنهاا بتلعب على الثابت الوحيد فى حياة الناس
الدين
حتى الدين مسابهوش
ابتدى تيارات فكرية جديدة
و مش حنخلص
و مش عارف
و كفاية كده
علشان طولت عليك

عباس العبد said...

عمر احمد
دول مش شايلين طين
دول شايلين زفت و قطران على نافوخهم
...
يحيى المصرى
انت اتخانقت مع شخص
انا بقولك قريته عند مدون بيتهم المصريين بانهم فشلوا فى المقاطعة و انه بصفته متدين حق بينصحهم بالعودة للمقاطعة لأرضاء الله
و الدليل ان شكرة بيبسى مقفلتش و الدليل الاكبر انتشار العربيات الشيفروليه
الطم و لا اقطع هدومى
المدونين صرخة جديدة و هامش من التضامن مع المواطن بقينا نكفره
مش عارق احنا رايحين لفين بعد كده
....

عباس العبد said...

نهى حماد
حمد الله على السلامة
يا تافه دى مش غريبة على :)
...
دانتى المصرى
!!!!؟!!!
انا مش متفق نوهائى مع حضرتك
هو شعب صايع ممكن لكن مش اهبل
راجع الحوار الى دار بين المواطن و الديكتاتور فى مرسحية محمد صبحى
تخاريف
....
م5م
مبسوط يا سيدى
بس ده موضوع غريب و صعب جدا
ربنا يصبرك على ردود الناس
...

عباس العبد said...

حفصة
انا لى نظرة فى الموضوع ده
الوقفات التضامنية و الكلام الهجص ده انا ضده
و محبوش و محبش المظاهرات و الكلام الانتيخ ده
و كله فى الكلتش
انا اؤمن بنظرية
كن انت التغيير الذى تؤيد ان تراه فى الاخرين
ده شعارى فى الحياة
لو انا شايف حد غلطان قبل م الومه اشوف لو انا بعمل زيه ابطله و لو مش بعمل بسكت و مش بنقد غير فى العام لأن اكيد انا لى اخطائى و محدش حب ينقدنى بطريقة جارحة
الى اكد لى ان الى بيطلعوا مظاهرات دول مخهم ضارب و شباب و طلبة لا يستأمنوا على مستقبل حركات سياسية او حتى حركات نص كم
هى مظاهرة كانت فى اواخر شهر مايو من سنتين كده
يعنى فى عز الامتحانات و مكنش فى مصيبة ولا البلد حتولع و لا اى حاجة
مجرد وقفة احتجاجية طول اليوم
و كانت المظاهرة كلها طلبة
و اكيد طبعا سايبن مذاكرتهم
فتخيلى واحد حتى مش امين فى مذاكرته و لا مستقبله
سايب مذاكرته ليلة الامتحان و نازل يضيع يوم بحاله فى وقفة احتجاجية
ده تستأمنيه ازاى على مستقبل وطن
...
شوفى حقولك حاجة تانية
فى احدى حركات المعارضة انا اتعرفت على مجموعة من " الثوريين " او الى بيسموا نفسيهم كده و عددهم كان بتاع من 7 الى 10 تقريبا
المهم
كان فى منهم فشلة فى الدراسة و اتنين مش مكملين تعليمهم و تلاتة اربعة مش بيشتغلوا و بيقبضوا من تحت الترابيزة من قائد الثورة و المفروض انى كنت حنضم لأحدى الحلقات الثورية التى بتضم مجموعة منهم
فتخيلى واحد زى بيشتغل من 12 الى 18 ساعة فى اليوم يكون رئيسه عيل فاشل مش متعلم و كمان عواطلى حتى مش صنايعى كسيب او بيشتغل اى شغلانة فى وقت فراغه و هو بيعيد السنة
على الاقل كنا نقول المجتمع ظلمه او معاه عذره و اهه بينفع نفسه
لأ ده طالب و فاشل و مش حتى بيشتغل و بيقبض من تحت الترابيزة و المفروض ابقى انا الى شقيان و طلعان عينى فرد تحت ايده
و الاسخم من كده
ان الاخ العواطلى ده الجاهل
خدى بالك من الى جى
بيتهم الشعب المصرى بانه واطى و ابن كلب علشان ساكت على الى بيحصله
و انه هو المناضل يا عينى الى بيضحى فى سبيل الوطن و الاوسخ من كده
انه بيقول انه مناضل من وهو طالب و زيه زى المناضل احمد عبدالله رزة
و لما قلت قدامه انه ازاى يساوى نفسه باحمد عبد الله رزة
ده راجل كان رئيس اتحاد طلبة و كمان معاه دكتوراه و بيشتغل و بيخدم المجتمع بمركز خدمة عمله
الناس قفشتو القعدة اتكهربت
و كان حاضر اللقاء حتى ابقى اسأليه
محمد المصرى و احمد ساندريل و الراجل الى بياكل القوطة
المشكلة بقى دلوقتى ان كل الى عاملين ثوريين
فشلة و صيع و مش متعلمين و لا حتى بيشتغلوا و كمان حرامية و بياخدوا فلوس
و كمان بيتهمه الشعب انه ابن كلب
تعرفى تحليها
ثوريين فشلة
بيتهمه ناس شقيانة و طلعان عينهم بالحيوانية
تفتكرى انهى انضف
الى صابر و ساكت و بيشقى علشان يربى عياله
و لا واحد عاملى ثورى و هو واطى
قوليلى انتى ؟
يمكن انا غلطان

Anonymous said...

لا طبعا انت صح و انا متفقة مع قداستك
عارف انا اول ما نزلت البورصة و وسط البلد
مع اني منزلتش كتير بس اللي شفته كان كفيل انه يعرفني قد ايه الناس بتقول غير ما بتفعل
هيييييييييييه
دا انا شفت بلاوي
و يقولك متفتحين و متحرريين و ثوريين و هما اول ناس حتبيع القضية اللي الفمروض هما بيتبعوها عشان حفنة من المال او المم

تحياتي

حفصة طبعا بس مكسلة ادخل باليوزر

Anonymous said...

كنت أعرف واحد برضه عامل مناضل حافظ كتاب البيان و متخيل كده إنه وصل لأسمى درجات النضال كان بيقول لك مشكلة مصر الحقيقية هي إن الناس عندنا في مصر بيستهلكوا كتير و كان مثلا لما ييجي ياخد منديل يقطعه نصين يستعمل نصه و يشيل الباقي بإعتبار إن كده بيقلل الإستهلاك و بيقول الشعب المفروض يعمل زيه يعني

Anonymous said...

مش قادر احدد ملتك يا استاذ عباس


بس عموما اظن مهما كنت اكيد سمعت الاية دي ذات مرة


إِنَّ اللّهَ لاَ يُغَيِّرُ مَا بِقَوْمٍ حَتَّى يُغَيِّرُواْ مَا بِأَنْفُسِهِمْ

والحديث

اعملوا فكل ميسر لما خلق له


فالمدون اياه - واخد لي بالك انت - كان بيتكلم عن جزئية معينة خاصة بطائفة معينة...فكل ميسر لما خلق له وبما اعطاه الله من الادوات


لكن ان تكلم مرة اخرى في جزئية اخرى ...فسيتكلم بما يناسب من يتكلم عنهم وقتها


فلا تخلوا اي امة - مجتمع - من طوائف متباينة كما قال الله تعالى


أَهُمْ يَقْسِمُونَ رَحْمَةَ رَبِّكَ نَحْنُ قَسَمْنَا بَيْنَهُم مَّعِيشَتَهُمْ فِي الْحَيَاةِ الدُّنْيَا وَرَفَعْنَا بَعْضَهُمْ فَوْقَ بَعْضٍ دَرَجَاتٍ لِيَتَّخِذَ بَعْضُهُم بَعْضًا سُخْرِيًّا وَرَحْمَتُ رَبِّكَ خَيْرٌ مِّمَّا يَجْمَعُونَ


لاحظ العبارة الأخيرة

وَرَحْمَتُ رَبِّكَ خَيْرٌ مِّمَّا يَجْمَعُونَ


اي
إِنَّ أَكْرَمَكُمْ عِندَ اللَّهِ أَتْقَاكُمْ إِنَّ اللَّهَ عَلِيمٌ خَبِيرٌ


سواء كان من اصحاب الشفروليه او اصحاب المترو



هو فاهم كده كويس...لا تقلق...مابيعتبرهمش ولاد كلب


وان فعل الجميع - جميع الطوائف في اي امة ما عليهم لجاءهم نصر وفضل الله


وَلَوْ أَنَّ أَهْلَ الْقُرَى آمَنُواْ وَاتَّقَواْ لَفَتَحْنَا عَلَيْهِم بَرَكَاتٍ مِّنَ السَّمَاء وَالأَرْضِ وَلَـكِن كَذَّبُواْ فَأَخَذْنَاهُم بِمَا كَانُواْ يَكْسِبُونَ



فلا توجد امة تاخذ باسباب الصلاح كلها كما يجب وتخسر....وحتى من يعمولن للدنيا فقط ...فيكسبون طالما صار بينهم العدل....ولكن لا يتفوقوا على ذوي الدين ممن يعدون للامور ما استطاعوا من قوة







لعلك تفهم هذه المرة


وبالمناسبة..الصور والفيديوهات اللي حضرتك حاططها حرام في اي شرع ..وتأخذ ذنب الغواية على نفسك وعلى من تغويهم

karakib said...

وبالمناسبة..الصور والفيديوهات اللي حضرتك حاططها حرام في اي شرع ..وتأخذ ذنب الغواية على نفسك وعلى من تغويهم
---------
بعد ما قريت اخر جملة في التعليق الاخير
و بعد ما كنت عايز اقول لك
انه نفس اللي بيقولوا شعب ولاد كلب
هما اللي بيقولوا ان كان لك عند الكلب حاجة قول له يا سيدي
بقيت عايز اقول لك
البوست ده حرام لأنك بتغوينا يا بشمهندس رامز
ايه الغوايه دي كلها يا عم :)

karakib said...

نسيت اقول لك
الصورة اللي انت حاططها من الصور الغريبة جدا
فيها كلاب جيرمن شيبرد متدربة تدريب عالي اوي !! لأنهم ما بيهجموش علي القطة و واقفين كلهم في وضع استعداد
و برضك الصورة دي حرام فيها غواية
و الطشت قال لي
الطشت قال لي

Hypatia said...

والنبى يا رامز يا اخويا نسيت كنت عاوزه اقولك ايه ع البوست لما قريت البوقين بتوع الصور و الفيديوهات الحرام اللى عندك هو انت يا شرقاوى عندك مدونه تانيه ولا عامل صور وفيديوهات هنا وانا مش شايفاها ابقى قولى على مكانها
انا عاوزه اشووووووف

اه بالنسبه لولاد الكلب والله يارامز كلهم خير وامل بس محدش شايف ولا حاسس بيهم بس اكيد حيييجى يوم نحس ونشوف والبوست بتاعك ده اكبر دليل انك ابتديت تحس

احييك بجد بوست فوق الروعه

سلام

Anonymous said...

مش عارف فيه ناس بتحب تكتب عشان تتريق وبس...ما بتحاولش تبص حواليها شوية
(:


الصورة اللي في اعلى صفحة البلوج.....مش صورة الكلاب في البوست...والفيديوهات مش في البوست وطالما ماخدتوش بالكم منها يبقى احسن

عباس العبد said...

انونيموس
انا مش عارف انت بتكلم على مين
لانى الى اقصدهم مدونين كتير
و بيقولوا على الناس انهم ميسووش حاجة و ولاد كلب
بس بما انك كتبت ايات من القرأن الكريم فانا اعتقد انك تقصد شخص انا علقت عنده
و رديت عليه فى الموضوع بتاعه بأسمى مش بانونيموس لانى مش داخل علشان اهينه و لا بهاجم حد علشان يزعل
ده رأى و عبرت عنه و لو اخدت بالك حتلاقينى كاتب فى اول ردى
كلمة " انا اعتقد " لأن الاراء بتختلف
انا مكتبتش بصيغة التأكيد كأنى عارف كل حاجة زى ما حضرتك كتبت
انا كتبت " اعتقد " فى اول كلامى
و انا مقصدش تشهير
و الدليل انى مذكرتش مين الى قريت عنده كلمة شيفروليه و ليكن نسميه " ص" واخدلى بالك
خد كمان
و انا لما كتبت التدوينة دى
كان لانى كان فاض بى و مكنتش قادر اسكت على اهانة الناس
يعنى كلامه كان القشة التى قصمت ظهر البعير و انا رديت على كلامه فى مدونته و مذكرتهوش عندى
و بعدين
مش هو بس الى بيقول كده و لو انت قريت الردود كنت تعرف انى عشت مع ناس من النوع الى بيشتم الناس
اقرأ ردى التانى على حفصة
و مقدرتش اكمل
تخيل حضرتك تنزل من بيتك الساعة 7 او 8 الصبح و ترجع 10 بالليل و ممكن متاخدتش اجازات
و ييجوا واحد لا هو متعلم و لا حتى بيشتغل عايز يعمل عليك ثورى و مناضل و كمان يبقى رئيس عليك و الاسخم
انه بيتهم الشعب بالتقصير و قلة الحيلة
حيكون رد فعلك ايه ؟
فلما قريت حكاية الشيفروليه كنت خلصت
و انا بعتذر ل"ص " لو فهم انى بهاجمه
لأن لو كده انا عندى الانسان اهم من الكلام
يعنى لو الجملة دى مزعلاه اشيلهه من البوست
الشخص اهم من اى كيبور
و لو المدونة دى حتخلينى اخسر 3 او اربعة لأ اقفلها و اكسبهم احسن
....
" وبالمناسبة..الصور والفيديوهات اللي حضرتك حاططها حرام في اي شرع ..وتأخذ ذنب الغواية على نفسك وعلى من تغويهم "
الصورة الى فى اعلى البلوج دى راقصات باليه و الكلمة الى مكتوبة من فيلم الناظر
و مش حقعد اشرح ايه علاقة ده بده لأن الى شاف الفيلم فاهم
اما حكاية الذنب و الغواية فديه مش حرد عليها لأنى مش فاهمها اساسا
قصدك ايه ؟؟؟؟؟
علشان اعرف ارد
....
اعتقد يا جماعة انه يقصد الكليبات بتاعة الاغانى الى بحطها
....
يا ريت نتعرف على حضرتك
خش اكتب بأسمك
شكرا مقدما
....
" مش قادر احدد ملتك يا استاذ عباس "
انا مش فاهم
انت تقصد ايه ؟
اهانة و لا بتسأل عن دينى ؟

The Alien said...

ماله الكلب أنا عايز أفهم

بنت القمر said...

عباس العبد
انا شفت الموضوع بتاعه لما نزل وشفت تعليقك عليه
وعشان تتأكد هو ص...ح..ي..ي.أ
ده اسمه طالما انت مش عاوز تصرح عارف انا استغربت من ايه؟؟
انك هناك
انت رحت هناك ليه؟؟
الخطوط بعيده اوي يا عباس واللغه والنهج زي قضبان القطار المتوازيه
لا انت غلط ولا هو لكن كل واحد بيتكلم من خلفيه معينه
ومن منطلق مختلف خالص
يبقا لازم السلك يشرز
والترباس يعصلج
بص انا مش بدافع
انا اعتقد انه بينتقد نوع من السلبيه موجوده في المجتمع لانه شايف انه لازم يكون في ايجابيه
انت شايف ان الناس طافحه الدم وزي ما قلتله انزل من برجك العاجي واقعد مع الناس علي القهاوي
وده من حب رحمه بالناس
طول بالك يا عباس
وما تبقاش حمقي
وما تلعبش مع الانينيموس ولا تخلي حد يلاعبك في ايات وقرآن
وفئه ومش فئه والكلام يخش في مناطق ملهاش لازمه
انت عارف انا بحترمك اد ايه؟؟
متخليش حد يجرك لغلط او يستفزك
بس علي فكرة الشاي الديلما تحفه
جربه تحياتي

عباس العبد said...

بنت القمر
حقولك حاجة بس متضحكيش على
انا بخش على النت بحاجة اسمها
flock
انضف و احسن مليون مرة من الاكسبلورر و الفاير فوكس و فى خاصية ال
rss feed
و بيجمعلى كل الجديد الى فى اى مدونة اخدت منها الفيد
زى الجوجل ريدر بس احسن شوية
انتى عارفة يا بنت القمر انا واخد كام فييد من كام مدونة
فوق ال 350 فييد
من 350 مدونة
حتقوليلى وصلتلهم ازاى
حقولك
انا دخلت مثلا عند بنت القمر
لقيت 10 او 15 ردين عليكى فى بوست
اتشديت ل7 او 8 منهم من اجابتهم
سواء بالاعجاب او بالاندهاش او حتى بالاختلاف الكامل
فبروح عنده المدونة
و اتابع كتاباته لمدة 7 او 8 بوستات
و يا اما اشيله بعد كده من على الفييد يا اما اثبته على الفييد
و انا تابعت كتاباته مش فاكر عند بلوستون تقريبا
الى انا اتعرفت عليكى منها برضه
و رحت متابعه شخصيا على المدونة و رديت عنده
و فى بداية كلامى قلتله "اعتقد" لو انتى قريتى ردى
يعنى انا بقوله كلامى ممكن يبقى غلط
التدوينة الى رديت عليه فيها و الى قلت له فى بداية كلامى و بكررها للمرة العشرين
اعتقد انك مخطىء يا سيدى الفاضل
و اعتذرتله عن عصبيتى فى اخر ردى
اعمل ايه تانى ؟
....
اما انى قلتله انه بيستخدم ايات قرأنية فده علشان ادلل على شخص معين و انى اقصده بعينه
و لو انا قصدى تشهير
كنت كتبت اسمه
انما انا مقصدهوش خالص
انا اديتث مثال لجملة مش لشخص
....
و عامة انا الى بيكلمنى بأيات دينية او قرأنية
انا مبردش عليه و لا بخش معاه فى جدل
لسبب
انه فى ايمانى
لا يجوز الجدل بكلام مقدس
يعنى مينفعش من نفس المصدر الالهى اجيب كلام يرد على كلامك و اطلعك بيه غلطان
حرام على
انا مقدرش اعمل كده
فتخيلى بقى لو الشخص مختلف معايا دينيا
فاكيد مش حخش فى حوار من النوع ده
....
صدقينى
هو الفضول الى خلانى اروح اقرأ له و ارد عنده بس

أبو عمر - الصارم الحاسم said...

محسسني اني قطعته وشلفطته ويعني كلامي ده ياكل من اللحم الحي..واني باعاقبه عشان دخل عندي وقال رأيه
(:



اولا
اكتب براحتك يا استاذ عباس...ومن غير زعل طالما بتعرض وجهة نظر بشكل محترم حتى وان كان عصبي..مفيش مشاكل خاااالص...في تعليقي على تعليقك عندي لم اشر على الاطلاق للاسلوب ..دخلت في الفكرة علطول...وهنا ايضا


ثانيا

اسلوبك هنا كان مليان تهكم...وعرضته باسلوب ضحك الناس....وفرغ كلامي من مضمونه...مش انا اللي كتبت كده...فما تزعلش اما اخش لك بانينموس واعقب على كلامك


انا مستغرب كلام الاخت بنت القمر...خش براحتك يا عم وانتقد براحتك...ايه المشكلة يعني


ثالثا
دخلت بانينموس بما انك لم تذكر المدونة مباشرة...عشان مكبرش الموضوع...وواضح انا مين...لكن حتى دي زعلتك

اعمل انا ايه بقى اللي انت بتتهكم على الفكرة في حوالي تلت التدوينة
(:


رابعا
باستخدم حاليا ملتك مش ديانتك لان دخل على الخط لا يدنيين من الاساس...فبأفضل استخدم ملتك..وان كنت خمنت انك نصراني..اهلا وسهلا...مفيش مانع خااالص

خامسا
وتهكمك على هلال شهر يناير ده مش يثير حساسيات

وعموما..صدقني دماغي-دماغنا - اكبر من كده...خد راحتك

واتناقش براحتك مش حرام عليك ولا حاجة...بس اتناقش مش اتريق


سادسا

انظر للآيات اللي جبتها بغير منظار ديني..انظر لقيم والشرح الذي فيها وستجد اننا ان شاء الله لن نختلف

يعني مثلا اما انا اسمع الأثر عن سيدنا عيسى بتاع ما اشد بياض عينيه.لا اظن اننا نختلف عليه والله اعلم...وهذا هو الحكم الشرعي في الكلام المعقول الذي لا يناقض اساسيات الدين عندنا

يا ريت تعيد قراءة الآيات على هذا الاساس

سابعا
الصور مكشوفة شوية كتير حتى وان كن راقصات باليه..واللا ايه


والفيديوهات اظن لن نختلف عليها...ابدا

يعني انا افتكرت الفيديو الأخير فيه خدعة ..وقلت من طريقة مناقشته مش معقول يكون حاطط حاجة وحشة...لكن فوجئت بالفيديو

مش بأدعي اني الشيخ الفقيه..لكن ادينا بنحاول..وربنا يعين ويغفر ويرحم


واخيرا
لو مش هتنورني عندي..كده كده هاجي انا اغلس عليك كل شوية
(:

بس اكتب براحتك برضه...وانا كمان اكيد هكتب براحتي عندي في لاالمدونة



تحياتي يا استاذي

بنت القمر said...

الصارم الحاسم
اولا :بما ان حضرتك ذكرتني صراحه وشكلك والله اعلم زعلان وانا اكتر حاجه اكرهها اني ابرر موقفي واقعد اوضح لكن احيانا بيكون شر لابد منه
انا لم اذكرك بسوء وانا متابعه كويس لكتابه حضرتك حتي لو ما سبتلكش تعليق وحتي التعليقات بقراها وبحترم برضه كتابتك والحقيقه اني كمان متابعه عباس العبد كل ما يكتب وكل من يعلق له
انا مش بحب اني اصنف الناس واقول ده مسيحي وده اخوان وده ملحد وكده مش اختصاصي
لكن اقدر اكون وجهه نظر عن المدون واحتفظ بيها لنفسي
ده بدايه مهمه
تالتا احساسي وتقييمي ان خط حضرتك واللي باين في كتابتك بعيد شويه عن خط عباس العبد وده مجرد احساس
وده مش عيب لا فيك ولا فيه
وانت عارف اني اتشرفت بالتعليق عندك قبل كده
لما وجهت كلامي ليه المره دي اني استغربت تواجده عندك مش انتقاص من حضرتك لكن ناتج عن احساسي بتباعد الاتجاهات والافكار
وان كنا كلنا نجتمع علي حب الوطن واحترام الذات والاخرين وسلامه المنطق ورقي الحوار
مش عارفه كلامي وتعليقي غلط في ايه انت بتنتقد سلبيه الناس وان المقاطعه موسميه
وهو ليه وجهه نظر شرحهها كل واحد بيحب البلد والناس بطريقته
قلت ايه تاني؟
زي قضبان القطار
ما هي القضبان يا اخي عمرها ما بتتقابل لكن كلها متجهه نفس الاتجاه
حكايه الانينموس
بص بصراحه انا عندي حساسيه من المجاهيل وعشان ماظنش سوء في حد لاغياه من مدونتي اللي عاوز يكلمني بشخصه اهلا واللي مش عاوز اوكيه برضه
انا من وجهه نظري الخاصه لما واحد يدخل بمجهول ويكتب بالقرآن ممكن هه
واحتمال الطرف الاخر يغلط ويبقا الدين اتاخد وسيله للاستفزازا والاستفزاز المضاد
طب ما نكلم باسامينا ايه المشكله
انت كتبت حاجه معجبتوش وهو رد الموضوع كان بعيد عن موضوع الدين انت انتقدت السلبيه وهو بيدافع عن الشعب
ايه دخل القرآن بقا
انا اثق في عباس انه بيحترم زوارة المسلمين وبيحترم دينهم وقرآنهم زي ما هما بيحترموة
بس من باب عشم واخوة
نصحته انه الموضوع ما ينقلبش تلاسن بالاديان والقران ونفضل في صلب الموضوع اللي هو تدوينه حضرتك الاصليه
لولا كامل احترامي لشخصك وانك زرت مدونتي البوست السابق
عشان كده وضحت يا رب ما يكونش في سوء تفاهم تاني
اشكر حضرتك وتحياتي

عباس العبد said...

الصارم الحاسم
اولا منور المدونة
و المدونة دى بيتك و تتفضل فى اى وقت ان شاالله حتى لو عايز تكتب
دى حاجة تشرفنى انى يكون بيكتب عندى و يعلق عندى كل التيارات
اختلاف الفكر لا يفسد للود قضية بل يزيد الفكر ثراء
انا اتعلم حاجة و انت تتعلم حاجة
و كله يستفيد
....
انا مزعلتش من فكرة انونيموس
انا اتضايقت من اثارة جدل وهمى او جدل انونيموسى
فاهم قصدى
انا معرفش مين الى بيتكلم
و لا اقدر احدد
فلا اقدر اقول اعتذار مثلا و لا حتى اجادل
بس
....
اما حكاية الصورة فاكيد مش مكشوفة علشان مرسومى باليد
دى رسم مش تصوير
اما حكاية الفيديو
فدى انا بعملها كل فترة لرصد مستوى الاغنية
و مدى انحدارها
فخللى بالك الفيديو الى جى حيبقى اكثر انحدارا
هههههههههه
........
انا بعلق عند اى حد و انت تشرف فى اى وقت
.............
بنت القمر
تانى
يا مرحبا يا مرحبا
انا جايلك دلوقتى

Anonymous said...
This comment has been removed by a blog administrator.
^ H@fSS@^ said...

المدون الصارم الحاسم هل فعلا حضرتك صاحب التعليقين الانونيموس؟؟
بالذات التعليق اللي بيبتدي ب
"

مش عارف فيه ناس بتحب تكتب عشان تتريق وبس...ما بتحاولش تبص حواليها شوية
(:

"
لو حضرتك يبقى انت غلطت في حق عباس لسبب بسيط
ان تدوينته دي مالهاش اي علاقة بالتتريقة
بس هي سخرية سوداء
يعني الموضوع مؤلم جدا و هو جابه باسلوب كوميديا سوداء
ده شئ الشئ التاني ان حضرتك بتقول يا ريت الناس تبص حواليها شوية
طيب ما هو ده اللي عمله عباس يعني هو برضو لاحظ ان الناس شقيانة و تعبانة و من هنا كان اساس التدوينة دي
يعني اسمحلي بس اسلوبك في الكثير من الغرور و انك شايف نفسك احسن من غيرك
طبعا انت عارف ان اكتر صفة مكروها عند ربنا عز و جل هي الغرور
او الاستعلاء
و انها ممكن تذهب بعمل الانسان الصالح مهما اكثر من الصلاة و الصيام و السجود و الركوع و الخ الخ الخ و انت عارف بقية الوصفة يعني
حاجة كمان اذا مسموح لي
انت معترض على تدوينة هلال شهر يناير و شايف انها مثيرة للحساسيات
طيب انا رحت مدونتك و فوجئت الصراحة بكذا تدوينة من شانهم عمل فتنة متنيلة بنيلة
و مشفتش اي تعليق لعباس
يمكن غيره بس مش هو
فليه مستكتر عليه يهزر في موضوع احنا نفسنا المسلمين بنتريق عليه بينا و بين بعض لكن شايف انه عادي اوي تكتب موضوع مثلا على سبيل المثال مش الحصر
زي موضوع المترو؟؟
مش ده فيه اساءه لمشاعر النصارى؟؟ و ممكن يثير حساسيات و لا احنا بس اللي عندنا التهاب جيوب انفيه
شكرا

عين فى الجنة said...

مرة كنت باعلق عند نوارة عن الطبقة المتوسطة لقيت وائل عباس شحصية العام فى ال
cnn
بيقول لى يا حاج راجى الطبقة المتوسطة دى اللى انا منها طبقة بنت وسخة بتبيع اى حاجة عند المفرق
ده نص كلامه
ونوارة واعتقد انها محسوبة على الطبقة المتوسطة ايضا، برضه علقت وقالت ان الطبقة المتوسطة دى من المهندسين والدكاترةبيشتغلوا زى الحيوانات 18 ساعة كل يوم عشان ولادهم يدخلوا مدارس لغات ويقولوا بابى ومامى
ده كلام اتنين من اهم المدونين فى مصر بغض النظر عن اتفاقى معهم او لا
سوق عربيتك كده فى شوارع القاهرة او اسكندريةولاحظ كمية العداء والاستعداد دائما للدخول فى معارك ان لم تكن بالايدى فبما لذ وطاب من فحش القول
الجو العام مدخن وشايط
البوست بتاعك يستحق انحنائة من العبد لله لقداستك
على الماشى
من فضلك ابقى احكى ل
m5m
عن كافكا اللى قراها كاكا ينوبك ثواب

أبو عمر - الصارم الحاسم said...

الاستاذ عباس

همشيها انحطاط الاغنية
(:

اوعى تاخدك وتنزل بس
(:



شكرا جزيلا

تحياتي


الاخت بنت قمر

مفيش زعل خاالص...ده كان بس اعتراض على مبدأ بما اننا مختلفين فماينفعش نتكلم


كل ده كلام مايزعلش.نقطة ومن اول السطر


الكلام اللي يزعل بقى

الأخت حفصة

فعلا انا المجهول التاني برضه

الكلام اللي حضرتك اعترضتي عليه ما كانش موجه خاالص للاستاذ عباس وكان واضح جدا من سياق التعليقات ..الكلام كان موجه للاتنين الاخوة المدونين اللي دخلوا اتريقوا على موضوع الصور والفيديوهات

فعلى الرغم من وضوح تعليقي المجهول الأول ...ووضوح تعليقي المجهول التاني برضه...الناس بتخش تدي كلام وتخرج خلاص


يمكن ده اللي بيولد اولا حمد لله وشكره علتى نعمة الموضوعية والتعمق والتفكير فيما يقال وقبول الحق فيه..وثانيا الثقة بالنفس وبما وهبه الله للعبد لله



وهذه الثقة الواحد بيحاول يوجهها فيما يفيده ويفيد الناس حوله


ولكن مش غرور


الله يسامحك


الاستاذ راجي


كونك اوردت لكلام كده بدون تعليق يدل على انك موافق عليه او مؤيد لشئ تريد ان تقوله

ومش كل الطبقة المتوسطة كده

مش كل الطبقة المتوسطة بتبيع اي حاجة عند المفرق...ومفيش مشكلة ان كنت قادر اما اعلم ابني - اما يبقى فيه ان شاء الله - تعليم نضيف مفيد له وللاهداف والمبادئ اللي هعلمهاله أيضا


و مش حرام ان الواحد يشتغل 18 ساعة او حتى 24 عشان يعف نفسه عن المسألة


لكن اما نقعد في الجامع 24 ساعة نبقى متدرويشين وبنسئ للدين ومش فاهمين ديننا كويس

عين فى الجنة said...

السيد صارم
مين قال انى موافق على كلام وائل ونوارة؟اعد القراءة تجد انى لم اتفق معهما فى ما ذهبا اليه
انا يا عزيزى مهندس انتمى وبفخر الى الطبقة البرجوازية الشهيرة بالمتوسطة ، رمانة الميزان فى البلد
وكنت اقصد توضيح حالة التوتر التى وصلت الى حافة الهاوية فى مصر
بس كده والله

أبو عمر - الصارم الحاسم said...

يبقى فهمتك غلط وباعتذر

بس يمكن لانك قلت بالنص
ده كلام اتنين من اهم المدونين فى مصر بغض النظر عن اتفاقى معهم او لا


وبالمرة اوضح حاجة

اما قلت "تعليم نضيف" ده مش تقليل من شأن التعليم العادي ومن يتعلمونه...وانا متعلم تعليم حكومي عادي..والحمد لله كنت متفوق فيه


لكن تعليم ينمي فعلا الثقافات والمهارات والابتكارات وطريقة التفكير وهو صعب جدا وجوده في المدارس الحكومية للاسف..وفي كثير من المدارس الخاصة ايضا ...واللي اساسا غير متفوق بيبان ده فيه جدا لان طريقة التعليم في اغلبية المدارس لا تتيح التفوق الا للمتفوق ذو القدرات الذهنية العالية طبيعي ولكن لا تنميها

^ H@fSS@^ said...

متشكرة على الدعاء و ربنا ان شاء الله حيسامحني
اصله رحيم و رحمن كمان
انا واثقة من ده جدا
:D

أبو عمر - الصارم الحاسم said...

:)
:D

ردك بارد اوي
:)


مكنتش مستني منك اعتذار....خالص....لكن توقعت انك هتتكسفي شوية بعد ما طلع كل اللي قلتيه مبني على افتراض غلط....ووضح انك ما بتقريش كويس


وبإذن الله هيسامحك..طالما انا سامحتك..فالحق مرتبط بي


فكل يعبر عن اخلاقه وخلفيته
والحمد لله في الأولى والاخرة
(:


تحياتي

^ H@fSS@^ said...

مكنتش مستني مني اعتذار؟؟؟ و مين قال لجنابك اني بعتذرلك اصلا
انا قلت متشكرة تعرف ايه الفرق بين الاعتذار و الشكر؟؟
شكلك انت اللي مش بتعرف تفرق بين معاني الكلمات مش انا اللي مش بعرف اقرا
و اصلا اصلا انامش شايفة اني غلطت في حقك عشان تقلي ان ربنا حيسامحني عشان انت سامحتني مادام الغلط مرتبط بيك
غلط مين يا فندم اللي مرتبط بيك
و ربنا ان شاء الله مستني منك موافقة عشان يسامحني و لا ميسامحش
مش بقلك مغرور و عايش في ناطحة سحاب و مش شايف حد صح غير نفسك؟؟
و لعلمك عمرك ما حتبقى صارم و او حاسم طول ما انت بالبرود ده و ردي مهما كان بارد مش ابرد منك فعمرك ما حتبقى صارم او حاسم
انت بعيد عنهم اوي
و الحمدلله اخلاقياتي كويسة جدا و مش واحد زيك هو اللي يحكم عليا
بس يلا هي جت عليك
ياما دقت على الراس طبول
و فارغة كمان

أبو عمر - الصارم الحاسم said...

:)))))))))))))

هدي اعصابك يا فندم
:D


هو اما بتغلطي في حد بدون خلفية كافية..ده مش غلط في حقه


من ناطحة السحاب بقولك اني قريتك من تاني رد وفهمتك.وعرفت انك تختلفي عن الناس اللي بنتكلم مع بعض هنا

اكدتي لي انك ما بتفهميش الكلام اللي بيتكتب كمان غير احكامك الغلط ان شاء الله..اي اعتذار يا استاذة

يبقى ابعتي ميل لاستاذ عباس وهو يفهمك انا كنت بقول ايه





عرفتي بقى انك اما بتغلسي على حد ممكن هو يرد لك الصاع صاعين

وممكن ارد على وصلة الردح بتاعة حضرتك انا كمان بأشد منها

لكن اخلاقي ماتسمحليش..الحمد لله رب العالمين
:)



نصيحة بره الخناقة دي اعصري على نفسك لمونة واسمعيها...بغض النظر عن قائلها

خليكي دائما موضوعية وناقشي الافكار ثم الاحداث في نطاق ضيق وليس الاشخاص الا في نطاق ضيق جدا جدا...واقري الكلام وافهمي اللي قدامك كويس ...قبل ما تبني عليها مواقف

زي الحوار اللي بيني وبين الاستاذ عباس هنا....بنناقش فكرة في المقام الاول


انا بالنسبة لي الموقف ده خلص...والله يسامحني ويسامحك
(:

سلام

^ H@fSS@^ said...

سيبتلك يا خويا الاخلاق الحميدة و الموضوعية و الرزالة و قلة الذوق تتهنى بيهم

عباس
عذرا ان النقاش تحول لكده و محاولة الرد على شخصيات ربنا يرحمها
ويرحمنا
امين

Anonymous said...

بجد الله ينور عليك يارامز...لعلمك انا بقالى شهور عايزة اعمل مدونة واكتب فيها اللى ييجى على بالى بس مش عارفة اعملها بسببك...
اولا :انت معقدنى بجد باسلوبك وطريقة طرحك للمواضيع فاقول لنفسى انا هاجى فين فى الجمال ده..
ثانيا:كل ماافكر فى حاجة الاقيك انت كتبتهاوقلت كل اللى عايزة اقوله..
فخلاص قررت ماعملهاش واديك انت بتكتب بالنيابة عنى ...
باحييك مرة تانية عالبوست الرائع ده والله انت قلت بجد كل اللى انا حاسة بيه...خلاص.

Anonymous said...

حاجة كمان نسيت اقولهالك..انا جوزى اتخانق معايا بسببك وقاللى :(انتى ايه اللى يخليكى تقرى الحاجات دى؟دى حاجات تبوز الدماغ.)
لذلك انا عايزة اشكر سيادتك على تبويز دماغى..خلاص.

MerMaid said...

قعلا احنا السبب في كل اللي بيحصل ده
احنا فعلا ولاد كلب

أبو عمر - الصارم الحاسم said...

البصل الأخضر منور
(:
وكل ما يخلقه الله حسن

عباس العبد said...

انونيموس
انا مش عارف ابقى زعلان ولا مبسوط
ابقى مبسوط علشان المدح العظيم ده الى ممكن يصيبنى بالغرور و ما اجمل الغرور
و لا ابقى حزين علشان ضيعت فرصة ان ممكن نزيد مدونة
و مستفيد من افكار جديدة
اما موضوع تبويز النافوخ
فانا تحت امرك
هههههه
بس بقى ليا طلب
بدل مفيش مدونة حتعمليها
يبقى لازم تشاركينا بتعليقاتك علطول
و لو فى اى حاجة عايزة تنشريها
ابعتيهالى ميل
مش انتى بتقولى نفس الافكار
تشرفينى فى اى وقت
....
......

Alexandrian far away said...

عباس يا عزيزي
والله لك وحشه
عندي تعليق صغير زانقني من فتره
من ساعة ما قريت التدوينه دي

هو حضرتك فعلا شايف الأمور بالسطحيه دي؟

عباس العبد said...

اسكندرانى
تبقى مصيبة لو مفهمتش قصدى من التدوينة
كان واضح فى اخر فقرتين
و اعتقد انت فاهم اسلوبى كويس
و جايز اكون سطحى ,,, محدش عارف !!! مش برضه ؟
و لا انت داخل تنكشنى علشان بقالنا مدة مرغيناش عند بعض ؟
على العموم
اهم من ده كله
حمد الله على السلامة
و منور مدونتك التانية
بس
الصراحة انا مشتاق لتدوينة جامدة من بتوع زمان
و خد بالك انت لسه عليك تدوينة مخلصتش
كتبت فيها بوستين بس و مكملتهاش
متنساش

Anonymous said...

وانتوا مش من ولا د الكلب برضه ولا انتوا ولاد كلب تاني

أحمد منتصر said...

كلامك حلو أوي :)

الدرويش المرووش said...

كلام كبير
و موقف خطير
يدعو إلى التفكير

بكل أسف دى دوامه حقيقيه
ربنا يطلعنا منها