Tuesday, July 08, 2008

حائط صد

" عارف , على الرغم من أختلافى الشديد مع السلفيين الأسلاميين فى كل الى بيعملوه , و أختلافى الأشد مع بتوع الصخرة المتزمتين * , بس عارف لولاهم و لولا إن بيتعمل ليهم حساب بدون ما حد يشعر , كنا عشنا فى مسخرة , صحيح هم بيغالوا فى بعض ردود أفعالهم , لكنهم برضه يعتبروا حائط صد , بيشيل بلاوى , بنبقى مستريحين ان فى حد بيشيل قرف الى جى من بره و زبالة الفكر الى جوه , و فى نفس الوقت بنقدر نهاجمهم على تزمتهم الزيادة ده , لأن من جواك , صراحة يعنى , بتبقى مبسوط مهما حصل منهم , ان لما المسخرة حتزيد حتلاقى حد يشيل عنك و يقف وقفة تصد كل الزفت و المسخرة . كل الى بيهاجموهم بيبقوا موافقين على كده من جواهم , و لا أنت أيه رأيك ؟ "

--

سؤال موجه لى من صديق مسيحى فى حوار لم ينته أبداً

===

* : بتوع الصخرة المتزمتين ... لفظ يطلق على المتشددين الأورتودوكس

للتدليل على مدى تزمت هولاء الأورتودوكس , اقدر اقول انكم لو قارنتوا بينهم و بين الجماعات السلفية الأسلامية , ممكن المسيحيين الأورتودوكس يتهموا الجماعة الأسلامية و الجهاد الأسلامى و الأخوان المسلمين و التكفير و الهجرة بأنهم ليبراليين منحلّين !!! .

 

 

21 comments:

The Innocent said...

قال حائط صد قال، يا عم دا حائط يستحق تطرطر عليه الكلاب.
لم احتاج الكثير من الوقت او التفكير لكي اطرح الفكر الارثوذكسي من عقلي. كانت اقل كنيسة قضيت فيها وقت، سنتين تقريبا. سنتين من التخلف والتشدد والحرفية، عليكم اللعنة ايتها الحيات اولاد الأفاعي.

Bastawisi said...

أهى النوعية دى بتاعة صاحبك نوعية شاذة تستمتع بالذل و الاضطهاد زى اللى عنده شذوذ جنسي بالظبط بس ده نقدر نقول عليه عنده شذوذ فكري

بس انا اعتقد ان لو ماكانش فى ارهابيين مسلمين كان زمان الارهابيين المسيحيين طلعوا عين ابونا

جبهة التهييس الشعبية said...

اما والله فكرة

بص انا لسة ما قررتش انا موافقة على الكلام ده وللا لا

استنى كده
بس الكلام عمل لي فجوة وعايزة اخد وادي مع نفسي
زي ما انت بقى
خمس سنين وراجعة لك

Founoon said...

بالرغم من اني في فترة نقاهة الا اني بقالي يومين بقرأ مدونتك من اولها لاخرها لانها شدتني فوق ما تتخيل

ولما انتهيت من القراءة ورجعت الصفحة الاولى لاقيتك نزلت الموضوع دا قلت خلاص ما بدهاش انا هعلق دلوقتي وخلاص

ردا على الموضوع المطروح ...ردي هوا اسم الموضوع السابق بتاعك :)احيه بجد

اكرر ..انا سعيدة بوصولي مدونتك وفعلا استمعت بمحتواها وقرائت كل مواضيعها باغلب الردود كمان (شفت الصبر )

ارجوا اني ماكونش ضيف تقيل عليك وتحملني لاني ناوية اكرر الزيارة

بنت القمر said...

تلات قوي تطرف اسلامي مسيحي مدعي ليبراليه
فقط هي لعبه الكراسي الموسيقيه
كل جهه بتطرح نفسها كمنقذ وطريق خلاص عشان تشفط الناس ولما يقعوا بين ضروسها تطحنهم براحتها
ما بقاش في اعتدال في مصر ولا يتهيالي في اي مكان كمان في العالم
يمكن الاسكيمو
:))

HafSSa said...

حائط صد؟؟
المتشددين من الطرفين بيمثلوا لينا حائط صد ضد ما نتعرض له من افكار زبالة؟؟؟
امال مين اللي افكارهم زبالة؟؟
المعلم حكشة و لا الواد تفاهة مثلا؟؟
صاحبك ده بيتكلم من انهي منطق؟؟
الكلام بيدخله من فين قبل ما بيوصل لمخه؟

يعني صاحبك عاوز يفهمني انه لو المتشديين من الجانبين مش موجودين، الناس اللي بره حتهاجمنا كده كده في جميع الاحوال؟؟

و بعدين ايه كم الانفصام اللي عنده ده؟؟
ازاي يعني اكون مختلفة مع شخص لدرجة اني عارفة انه ممكن يبيح قتلي او يكفرني
و مع ذلك مستريحة لوجوده في المجتمع نفسه اللي بعيش فيه عشان يتحمل عني ترهات الاخر؟؟
و نفس الوقت ارجع ادينه عشان اخلص ضميري؟؟
صاحبك ده هربان من الخانكة ولا ايه يا قداستك؟؟

ايه كمية التناقضات دي؟؟

انت لو فضلت مصاحبه انا بهددك بقطع العلاقات معاك

اه الحكاية مش ناقصة مرضى نفسيين
كفاية اللي الواحد بيشوفهم في البلؤات

تحياتي
عكرت لي صباحي عالصبح

The Alien said...

حائط صد للحاجات اللي ممكن تضرهم هما .. طظ ف المجتمع والناس .. دي ناس بتاعت مصلحتها .. وعمر مصلحتها ما كانت ولا هتكون مع الناس

بيتعملهم حساب ! طب ليه؟ عشان الخوف .. دول ممكن ببساطة وبدون أي تأنيب ضمير يقتلوني .. بالعكس، هيكونوا مبسوطين وفخورين باللي بيعملوه

وبعدين إزاي ههاجمهم وأنا موافق علي اللي بيعملوه؟ هو إيه اصله ده

المسخرة هي اللي إحنا عايشينه واللي بنسمعه من أمثال صاحبك دا
تحياتي

أبوفارس said...

والله ياباشمهندس أنا جديا حاولت أفهم صاحبك ده عاوز يقول أيه ولم أستطع..!!إذا كان قصده إن اﻷصوليه الدينيه حائط صد أمام محاولات التحديث واﻷقكار العصريه فهو كلام صحيح
ان الموقف ده هو موافق عليه فهى وجهة نظر أظنها خاطئه
لو قصده إن الأصوليين المسلمين قدروا يصدوا الهجمه العسكريه على الشرق اﻷوسط ف العراق مثلا
فهذا قصر نظر شديد ﻷنه أستراتيجيا اﻷمبراطوريه اﻷمريكيه أخذت ماتريد وهو أكبر مخزون بترولى ف العالم رغم مظاهر الفشل التكتيكى
اﻷهم أنه تم أطلاق مايمكن تسميته تفاعل متسلسل
chain reaction
سيستمر لعقود مقبله ﻷعادة تشكيل المنطقه كلها وهو ماكان يجب أن يحدث من عقود..
حدوثه اﻷن
أولا تمنه عالى جدا
تانيا يتم فى لحظه تاريخيه غير مناسبه
العالم كله يتجه فى أتجاه مخالف تماما
هل تتابع مثلا أجتماع الناس المهمه
G 8 Plus...
أخيرا ف اليابان وهل لفت نظرك عدم وجود أى دوله من المنطقه فيه
ﻷننا كلنا غير مهمين ولاوزن لنا
ورغم ذلك سندفع تمن هذه التوجهات العالميه
..أخيرا الكلام المرصوص جنب بعضه ده
والغير متسق ولامفهوم دليل أخر على حالة التوهان الواضحه ف كل الناس..
تحياتى ونهارك سعيد..مع ملاحظه فروق التوقيت..خالد

على باب الله said...

حائط صد ؟

هو مين بقي اللي ها يلعب الفاول ؟

عباس العبد said...

البرىء
شوف يا سيدى , انا مقدرش افيدك لأن ده راى واحد أعرفه , و مش حقدر ادافع عنه , لكن أقدر اقولك حاجة مهمة , تتعلق بنقطة اخرى لاحظتها , انت عارف طبعاً انى متابع لمدونتك , فى نقطة عايزه اوضحها لاحظتها و هى مشكلة ان فى خلط رهيب بين
تعليم الكنيسة و
فكر الأكليروس و
الرؤية الشخصية لرجل الدين او للعلمانى المسيحى .
--
انا مش عارف الخلط ده جى منين و ليه الشخصنة الى بتمارسها الكنيسة , و مع ان الكنيسة الاورتودوكسية بترفض نظريات تأليه الأنسان الا أن الأكليروس الأورتودوكسى بيمارس تأليه او تقديس الذات بطريقة يصعب معها الفصل بينه و بين تعليم الكنيسة , و نفس المشكلة عند المسلمين لو هاجمت فلان يبقى بتهاجم الاسلام , او لو أختلفت مع علان يبقى بترفض الدين الأسلامى , مش عارف الشخصنة دى منين , هل الأسلام بهت على المسيحية و لا المسيحية هى الى بهتت على الأسلام , و لا ده موروث مصرى من قديمه من أيام الفراعنة , عيب اصيل فينا , مش عارف , بس كل مشاكلك كانت مع الأكليروس او مع الرؤية الشخصية , و دى مصيبة , انا نفسى بعانى منها .
===
بسطويسى
منورنى
بس انا مقدرش ارد عن صاحبى لأنى مختلف معاه , بس محبش حد يهاجمه , سامحنى .
===
جبهة
أنا مستنى قراءتك الشخصية للموضوع .
===
فنون
انتى تنورينى فى أى وقت
شرفتينى و شرفتى المدونة .

عباس العبد said...

بنت القمر
مبقاش فى أعتدال فى أى حتى فى العالم يا بنت القمر .
الناس بقت بتدور على الى أقل تطرفاً و تشدد و دى حاجة مش مفهومة , البركة فى بتوع تحليل النص و قراءة الحدث و مناخوليا التفكيك , ربنا يستر على عقولنا .
===
حفصت
هو مش صديقى " انتيخى " , هو صاحبى , معرفة يعنى . و انا احب اناقش كل الناس و اعرف كل الأفكار , ما أنتى عارفة , انا عملت أيه فى المؤتمر , بس فى نقطة , انا مش حقدر ادافع عنه , لنى مختلف معاه , و مش حعرض وجهة نظرى , علشان انا حاطط النقطة دى , علشان أخد رأيكم و تشوفوا ناس تانية بتفكر ازاى .
مش اكتر
===
اليان
انا كمان مختلف معاه , لكن لو سمحت محبش حد " يهاجمه " فى غيابه , بس خلاص
===
أبو فارس
لأ , هو قصده النقطة الأولى , الغرب و الى بييجى منه , عرى و إباحية , افكار هدامة , ( متنساش انه مسيحى , بيخاف من الكاتوليكية و البروتستانتية ) و حركات قرعة , و أفكار ضد قناعاته , كل الحاجات دى , متنساش يا ابو فارس , ان المسيحى المتدين ضد العولمة و ضد العالمانية زيه زى المسلم , هو ضد العولمة , لانه بيخاف على قناعاته الدينية , و ضد العالمانية لانها ضد مرجعيته , هو بيشترك مع المسلم السلفى او الملتزم , فى كل حاجة مع عدا العقيدة
===
على باب الله
هم , هم الى حيلعبوا الفاول .

mohra said...

الاختلاف حق مكفول للجميع و الايمان بالحريه يفرض على الانسان تقبل وجود الاخر سواء كان حائط صد او ماكنش

المهم الايمان بحق كل انسان انه يعبر عن رأيه ايا كان الرأى ده

Anonymous said...

يمكن يقصد خبر زي ده

http://www.almesryoon.com/ShowDetails.asp?NewID=51022&Page=1

Anonymous said...

كفاية


قد


اعذر


من


انذر

Foxology said...

بعد ما قريت الكومنتات احب اقول ان العيب فينا احنا !!!

لو كل واحد فكر بعقله شوية بعيد عن اى ضغوط ومن غير ما يسيب ودانه ودماغه لأى حد يلعب فيهم هيبقى هو نفسه حائط صد لنفسه وللناس اللى حواليه ولا ايه ؟؟؟؟

تحياتى :)

Wandering Scarab said...

سؤال.. هي إيه الحاجات اللي بتيجي من برا اللي المفروض يكون لها حائط صد؟ و بلاش والنبي حد يقول لي العري والكلام دة.. أنا واحدة عايشة برا في بلد علماني لا هو مسيحي ولا مسلم ولا يهودي، و كل الستات اللي ماشيين في الشارع هنا لابسين لبس عادي جداً.. ولا هي لازم يكون شكلها زي اللهو الخفي عشان تبقى محتشمة؟

بالنسبة لصديقك.. أنا طبعاً معرفش خلفيته إيه و ظروفه إيه، انما فكره دة مش مقتصر عليه هو بس، دة في ناس مسلمين كثير بيفكروا كدة بردو، أنا شايفة إن دة إنفصام في شخصية المجتمع المصري، لهو عارف راسه من رجليه.

حـنــّا السكران said...

بتصدّق يا رامز ..أنا صار الدين بالنسبة إلي مصدر رعب حقيقي ..و أنا ما بقصد الدين اللي في الكتب السماوية ..لا ... الدين اللي على وجوه الناس و في عقول الناس و في تصرفات الناس و في كره الناس ...يا رجل أنا لما حدّ يسألني عن ديانتي و أنا على فكرة ما بيمر اسبوع من دون ما انسأل هيدا السؤال عشر مرات لأني بشتغل في بلد عجيب غريب في المسائل دي ..لما بنسأل هيدا السؤال بشعر انه حدا بيحاول يغتالني والله ..اغتيال انساني و معنوني ويكاد يصبح جسدي من كتر الإنزعاج من هالمواضيع و الأسئلة ..هلّئ حدا بيجي بيقول ..انت لازم تفتخر بدينك و تقول على طول ..يا أخي أنا بدي افتخر بيني و بين حالي ..ضروري تفتخر معي انت يعني ؟؟ يعني البني اّدم اللي بيسألني بيسأل عشان نعمل احتفال فخر جماعي مثلا ؟؟
ـ حائط صدّ .. هيدا حائط مبكى ..جدار برلين ..دشمة وراها بواريد و كره و غباء و موت أحمر

حداويت said...

هو صاحبك يقصد المتدينين بجد ؟ و الا مستخدمي الدين كلافتة تحدد نوع البضاعة التي يعرضونها ؟
اصل انا بصراحة بالنسبة لي كل اللي شايلين يفط و ماشيين زاعقين في الدنيا مش بحبهم و لا بقتنعم باللي بيقولوه ..
يعني مش بعتبرهم بيمثلوا حاجة أصلاً ؛ إلا إنهم بيمثلوا علينا و على أنفسهم ..
اللي جاي من برّه لو حقيقي و غير مفتعل ؛ عمر ما هيقدر يقف قدامه أي شيء و يكون حائط صد حقيقي إلا إذا كان هو كمان شيء حقيقي ..
يعني مش مهم بيقول إيه .. المهم هل هو مؤمن و مصدق اللي بيقوله و الا لأ ؟
مش عارف قادر اقول اللي عايزه و الا مش عارف ابعبر ..
المسألة باختصار : لو كان في ربع أو تمن حائط صد حقيقي ماكناش وصلنا أبداً للي احنا فيه ده .

The Alien said...

فين هجومي علي صاحبك؟
أنا قلت:
"المسخرة هي اللي إحنا عايشينه واللي بنسمعه من أمثال صاحبك دا"
أنا بتكلم عن أفكاره وكلامه اللي بنسمعه
يعني مقلتش إنه هو مسخرة
أنا بهاجم فكره مش شخصه

تحياتي

ذو النون المصري said...

السلفيين و التكفير و الهجره ليبراليين منحلين!!!!!!!!!!!
ليه هما بتوعا لصخره دول يطلعوا مين عندكم؟؟؟؟؟؟؟؟؟

عباس العبد said...

مهرة
كلامك صح , الأختلاف حق مكفول للجميع و علشان كده انا نشرت وجهة نظره , لأنها تستحق التأمل , و فى نفس الوقت يبقى عرفنا وجهات نظر جديدة .
==
فوكسولوجى
و هو ده كان رأى مع بعض التغييرات الطفيفة , أنا مرجعيتى مش جماعات دينية , انا مرجعيتى النص الدينى نفسه , و ضميرى و روحى الى زرعهم فىّ الله . و بالتالى أنا حائط صد نفسى , مش مستنى ناس تيجى تقولى الصح و الغلط .
==
ويندرينج سكاراب
الصراحة انا مسافرتش بره , و معرفش الناس بتعيش ازاى , بس هو خايف من حاجات كتيرة زى ما كتبتها لعمنا أبو فارس , و هى فعلاً عملية إنفصام حاد فى المجتمع .
==
حنا السكران
بتصدق أنت يا حنا , انا حاسس ان الدين فى شكله الحالى و منتجه الفكرى الحالى جاب تخلف عقلى للبشر , مكنش كده زمان , او يمكن معرفش , لكن بجد فى مأساة محدش فاهمها , أى حاجة دلوقتى تلاقى واحد طلعلك يسئلك رأى الدين أيه ؟ , رأى الدين ايه يا عم , هو انت متعرفش تفكر , فى حاجات لو سئلت و طلبت فيها رأى الدين , يبقى بتعلن بكل بساطة انك حمار غير متدين لأنك مش عارف الأجابة , مش حمار و بس لأ , ده ان كمان غير متدين .
الى بيسألك على دينك بيبقى عايز يطمن على العدد , العدد تمام و لا يبدوا يقلقوا , الله يسامح الى كان السبب .
الا هو دينك أيه بالظبط ؟ هههههههه
==
حدوايت
بتشكك فى وجود حائط صد من أساسه !!!!!
==
اليان
ماشى يا سيدى , وصلت الفكرة
==
ذو النون المصرى
أنا حقولك حاجة بسيطة , تسخين كده يعنى
الناس الى بتكلم عليهم دول , ما عندهمش لا تلفزيون و لا راديو علشان حرام , دى البداية , و خد من ده كتير , لغاية الحاجات الكبيرة الى مش مجال نحكيها هنا .