فى الحلقة الأسبوعية من برنامج " الطبعة الأولى " , الذى يقدمه احمد المسلمانى , و التى تذاع كل خميس الساعة 7 و نص , على قناة دريم 2 ... كان الضيف الدكتور مراد وهبة , أستاذ الفلسفة المصرى الشهير , و كان يحكى عن فترة التكوين الأولى , و عن الألحاد و علاقته بالفلسفة , و رؤية الفلاسفة ل- الله .
المهم , وصل الحديث الدكتور مراد لحياة سقراط , الذى عُقدت له محاكمة تتهمه بإنكار الألهه و إفساد عقول الشباب , و حكم عليه بالأعدام , و قيل له إذا أعلن انه سيتوقف عن التفلسف , سيوقفون حكم الأعدام , الأ إن سقراط رفض و قال أنه لن يتوقف أبداً عن التفلسف , و شرب الكأس المسمومة و مات .
علق أحمد المسلمانى , مقدم البرنامج , انه فى العصر الحالى كلمة " يتفلسف " معناها " بيقول كلام فارغ ... بطل فلسفة أو متتفلسفش ... معناها بلاش تفاهه "
ضحك الدكتور مراد و هبة و قال له : فعلاً , الكلمة أصبحت مرادف للهراء و الكلام الفارغ . و حكى التالى :
كنا قد سمعنا أن الملك قد أنشأ قرية نموذجية أسمها " بهتيم " , فقلنا نذهب و نشاهدها , فلما دخلناها , بدأ الأطفال فى قذفنا بالحجارة , و خفنا الأصابة , و أردنا تخويفهم , فأنحنيت و ألتقط حجر من الأرض لأقذفه عليهم , فوجدت فلاح خلفى يسئلنى " حتعمل إيه يا أستاذ ؟ " , فأجبته " أنت مش شايف العيال الصغيرة عمالة تحدفنا بالطوب , فقلت أخوفها أحسن تعورنا " , فقال الفلاح " معهلش يا بيه , أصل دى عيال متربتش , اهلهم بدل ما يربوهم ... علموهم الفلسفة و قلة الأدب " ... !!!
14 comments:
يعنى مش كفاية الغواية ..لافلسفة كمان....لا دى قلة ادب جامدة قوى قوى قوى...
ولما تكون زهقان او مهموم
يقلك
معلهش عنده شوية فكر
ربنا يبعد عنا الفكر وقلة الادب والفلسفه
تحياتى... خالد
طبيعي ان المتدين يخاف الفلسفة و يعتبرها رجس من عمل الشيطان بل و يعمل على تشويهها بتحويل معناها الى سبة
الفكرة مش فى الفلسفة و بس
الفلسفة تنضم الى طابور من الكلمات و المفاهيم التى تقف على بوابة عقول مغلقة بالضبة و المفتاح
الضبة هى الجهل
و المفتاح ضائع بضياع العلم و العلماء
و بالتالى فاى كلمة غامضة و او غير مفهومة بفعل الجهل
تكون بالتاكيد مرادف لخطر
و لانى جاهل لكنى لا اريد ان اعترف انى حاسس بخطر من كلمة ما بسبب جهلى بها
فالاختيار الاسهل بالنسبة لى ان اصنف الكلمة دى تصنيف اخر يشعرنى بالراحة النفسية
الافضل بالنسبة لى ان اصنف الفلسفة- طالما انااجهل ما هى الفلسفة- كقلة ادب ليس الا
تحياتى
هش
أبو فارس
فعلاً العقل المصرى ضد التفكير
عقلى زراعى حتى الرى كان بالغمر و يريحوا نفسيهم
===
بسطاويسى
لأ طبعاً مش لازم المتدين يخاف
لأن فى فلاسفة مسلمين و فلاسفة مسيحيين
الفكرة فى انه مش عايز يفكر
===
هشام
متفق معاك
===
أنا شفت الحلقة دي
ووقفت عند الحكاية دي أنا كمان
بس مش الفلسفة لوحدها اللي حصل معاها كدا
كلمات كتير مفهومة غلط لإن فيه ناس ليهم مصلحة ف كدا
تحياتي
اليان
كويس إن حد شاف الحلقة علشان المصداقية و الحاجات دى
فاهمنى طبعاً
حلقة ممتعة جداً و لسه ليها نص تانى
الفكرة الخطر فى الموضوع أن ممكن تسفه أى حاجة بأنك تربطها بحاجة سيئة
و دى مصيبة
فاكر النكتة بتاعة
" بعيد عنك أصله ديموقراطى "
عارفها دى
ممكن تتفه أى حاجة فى ثوانى
بس المشكله إن عم أيوب "مراد وهبه" يشتت الحوار فى كثير من الأحيان ربّما لغزارة فكره و كان مفروض "المسلمانى" يمارس بعض التركيز و السيطره على الحلقه أكتر من كده .. على الله يلحق فى الجزء التانى :) على فكره أخويا أمّا شاف الدكتور "مراد وهبه" قال إن "حسنى مبارك" كان هيبقى شكله لولا عمليات الشد و الجذب اللى بتتعمل له
:)))
زمان الوصل
أنتى فى حاجة مش مش واخده بالك منها أو يمكن مش عارفاها , مراد وهبة علمانى ملحد علشان كده لما سئله المسلمانى عن الألحاد و الفلسفة , رد مراد وهبة بأنه سؤاله معقد و مركب و بالتالى الأجابة حتكون معقدة و مركبة
هو كان بيتوه كتير لغزاره معارفه و عدم ترتيب الأسئلة و كمان المسلمانى مش قادر يضغط عليه علشان ميحرجوش
لا عجب يا عزيزي
فيلاسوف تعني لغويا محب الحكمة
لذلك كان من الطبيعي ونحن نعيش عصر الانتكاسة الفكرية ان يقال عن كل محب للحكمة وساعي ورائها انه تافه
وطبيعي ان توصف الفلسفة وحبة الحكمة انها قلة ادب
نحن نعيش في مجتمع معتوه
مراد وهبة من الفلاسفة القليلين الي فية تعتيم عليهم
الصراحة بفهمة بصعوبة جدا
تقيل في افكارة وكتاباتة
بس بحترمة للغاية
انا كان نفسي اشوف الحلقة دي جدا بس يوميها اتاخرت في الشغل وملحقتهاش
متعرفش هتتعاد امتي
او الجزء الثاني ليها امتي ؟
هرطقة
الحلقة جت يوم الخميس الى فات الساعة 7 و نص على قناة دريم 2
و النص التانى حيجى بكرة فى نفس التوقيت على نفس القناة
--
هو مش صعب هو تقيل شوية
بس له كتاب جامد جداً مش عارف قريته و لا لأ
أسمه " مُلاك الحقيقة المطلقة " نزل فى مكتبة الأسرة
جميل جداً
ايوة عندى الكتاب دة
جبتة من زمان بس لسة مقرتوش
انا لحقت نص الحلقة التانية
متشكرين يا فندم
:)
والله يا "عبس" أنا كنت سمعت طراطيش كلام عن موضوع إلحاده ده عشان كده كنت مستنيّه الحلقات بتاعته على أحر من الجمر .. و استجدعت "المسلمانى" جدّا لأنّه فكّر فى استضافته .. بس صدمت بشدّه أمّا لقيته بيسأل فى مواضيع لها علاقه بالسياسه أكتر من علاقتها بالفلسفه ..
طيب سيبك من دى .. أنا كان نفسى جدّا يستفيض فى الحديث عن رأيه فى الفرعونيه و ما ظلّ منها من آثار موجوده لحد دلوقت فى نظام الدوله المصريه .. على الأقل من باب التجديد بس حتى دى تاهت ..
ما هو مع مفكّر موسوعى كده لابد أن يكون هناك فكره ما أو موضوع أو موضوعات قليله محدّده يتكلّم فيها لكن مش هينفع يتكلّم فى كل حاجه أكيد التركيز هيضيع :(
Post a Comment