Friday, September 05, 2008

عصير من غير سكر

" كل حاجة ممكن تكونى فكرتى فيها , انا عملتها , انا – الحمد لله - عملت كل حاجة , خروج و فسح و سينما و سفر , مفيش فيلم فوته و لا حته فى مصر مروحتهاش و مفيش حاجة معملتهاش , و دماغك متروحش بعيد طبعاً , هههه , أنا محترم جداً .

عارفه انا لى صحاب كتير و بنخرج و بنتفسح , فى منهم المتجوز و العازب زى حالاتى , و بتنقابل مرتين كل أسبوع , مع المتجوزين , مرة مع العيلة كلها , بينتقابل فى حتة نضيفة , هم و مراتاتهم و عيالهم الصغيرة , و مرة على القهوة رجالة لوحدينا . بتنكلم و نضحك و ننبسط , و مرات ده تشوف عروسه لده , و ده يلاعب أبن صاحبه , و دى تلاعب بنت صاحب جوزها , أكتر واحدة بحبها بنت شكرى , عندها 3 سنين بس زى العسل , تلعبى معاها , اخر شقاوة , ربنا يخليهاله , بأسم الصليب عليها زى القمر .

تاخدى سيجارة ؟ ... ملكيش فيهم ؟ , كويس ...

عارفه الواحد فى شغله مطحون طول الأسبوع , بنزل من سبعة الصبح , أرجع 7 و تمانية بالليل , علاقاتى بالناس فى الشغل تمام , الناس الى شغال معاهم , ربنا كرمنى و انا الى منقيهم , و متفاهمين مع بعض , هو شغلنا صعب , بتتعاملى طول النهار مع صنايعية و عمال , بس أنا منقيهم و الحمد الله , فمتفاهمين كويس , بنتشغل تيم  واحد , بس مش حقولك على الشقا , ههههه , برجع على 9 بالليل كده , خلصان .

طيب أجيبلك بيبسى ؟ ... ريجيم , مممم ... خلاص عصير من غير سكر .

بقولك بقى , برجع مش شايف , أمى ست طيبة جداً , بلاقى الأكل جاهز , بكلمهم قبل ما أوصل , الو يا ماما , أنا قدامى نص كده , تقوم علطول مسخنة الأكل , الله يخلى الموبايلات , أمال أنتى موبايلك إيه ؟ , ممم , نوكيا زيى , ههههههه . برجع مهدود , على الدُش علطول , أطلع اتعشى , و اخش الأوضة , أتفرج على الدِش لو فيه حاجة , او أقعد اقرأ , لغاية 12 و لا حاجة و أنام على طول , أنتى بتحبى القراية برضه زى ما فهمت ... و بتسهرى برضه ل12 , طيب كويس .

أنا أقرأ فى أى حاجة , بس بحب بالأكتر محمود السعدنى و نجيب محفوظ , أحمد عبد الله رزة , صنع الله أبراهيم طبعاَ , محمد مستجاب , إبراهيم أصلان , إيه ؟ ..... ههههههه , و بحب رفعت إسماعيل طبعاً ببذلته الكحلية التى تجعله فاتناً *  , قصص زمان دى , انا كبير صحيح بس مقدرش عن رفعت إسماعيل , بقية الحاجات بطلتها , رجل المستحيل و الكلام ده .

معلهش انا بحكى كتير , صدعتك , أحنا فى الأساس كتير بس أصدقائى المقربين , 3 , واحد سافر قطر , و التانى أتجوز و قعد فى الهرم , و التالت فتح شركة فى الغردقة , الدنيا بتتغير , شريف , صديقى الحالى , هو الى بحكيله , زمان كنا بنقعد نحكى , كلنا , بس دلوقتى الحاجات بقت اكثر خصوصية , فبحكى مع شريف بس , الواحد بيرجع من الشغل ساعات مخنوق , او بتحصل معاه مواقف تخلى الواحد يتعصب , بس لازم حد تحكيله , كلنا بنتقابل , و بنسافر , المجتمع مهم , كلنا بناخد اجازتنا فى وقت واحد , 7 أيام فى اخر شهر سبعة قبل صيام العدرا , نطلع الغردقة او شرم , رفيق مدير شركة سياحة , بيحجزلنا فى الفندق الى تبع الشركة , اللّمة حلوة , ميه و شمس و هوا , و اكل و رقص و فسح , بس احنا العزاب بتنتهى ليلتنا سكر , و المتجوزين فى احضان عيالهم .

انا ؟ ... انا صاحبت 3 مرات , الأولى كنت فى اولى ثانوى , اول مرة اشعر بالحب و الحاجات دى , انبهار جامد , كانت لدغا و كانت بتنطق أسمى بلدغتها , بتقول الره غين , كنت بموت , بس صغيرين بقى , و طبعاً مكملناش , و التانية فى الكلية , عادى بقى صحوبية كلية , و التالتة قعدت معاها 3 سنين , بس بعد كده , أكتشفت أن الكلام حلو , بس الأمكانيات طبعاً , كان لازم اركز فى الشغل , فباظت العلاقة , ابويا و امى و عمّاتى و خالاتى , كل شوية يجيبولى عروسة , عايزين يجوزونى , هههه , ابويا عاوز يجوزنى علشان عايز يشوف أحفاده ,  امى عايزه تفرح بأبنها قبل ما تموت , أنا مش كبير , صحيح فى صحابى متجوزين و مخلفين , بس كلنا صحاب , محدش بيسيب حد , و بعدين انا زى ما قلتلك , عملت كل حاجة , خروج و فسح و سفر , و سهر , كل يومين تلاتة بنروح القهوة بلاقى العيال , غير الأجازة كل أسبوع بنتقابل زى ما قلتلك قبل كده , يعنى مش ناقصنى حاجة , و الأرتباط ييجى براحته , كل شىء قسمة و نصيب و لا أيه الكلام ؟ , و لا أنتى شايفه أنى كبرت ؟ .

حولع سيجارة تانية ؟ ... بلاش !!! ... خلصان علشان خاطرك .

هى دى المشكلة , ايوه بأمانة , ميغركيش أنى شديد فى الشغل و ان كل حاجة موجودة عندى , عربيتى تحت رجلىّ و الشقة موجودة , بس انا مخنوق , مخنوق جداً , أمال انا بحكيلك ليه ؟ , مش عايز أدوشك معايا , دى تالت مرة نتكلم فيها بس .

 معهلش دموعى نزلت قدامك , ممكن المنديل الى جنبك ... ميرسى جداً .

انا لى صحاب كتير صدقينى , أغلبيتهم متجوزين و أحنا بتاع 4 لسه عزّاب , بنتقابل و بنحكى و بنتفسح , بس ... بس أنا وحيد , مش بلاقى حد أحكى معاه , إحنا كبرنا , بقعد مع شريف نحكى بالساعات و بيقف جنبى , بلعب مع بنت شكرى , و طول النهار فى الشغل مع الصنايعية , اليوم مشحون , و الأسبوع مشغول , و الأجازة فى العين السخنة أو العجمى , بس مش هو ده الى أنا عايزه , مش عارف , فى حاجة ناقصة , فى الأخر بروح و أقعد على السرير , بحس انى وحيد , مش لاقى حد أكلمه , زمان مكنتش حاسس كده , بس دلوقتى , مش لاقى حد أكلمه , و لا احكيله , أنا عايز بنى أدم أحكيله , بنى أدم يقولى كلام تانى , يبقى جنبى بس ما يكونش جنبى , مش عارف انا عايز أحكيله أيه , و لا أقوله أيه , بس عارفه , بحكى مع صحابى , مش عايز أحكى الحكى ده , و لا أقول الكلام ده , خلاص زهقت من حكى الصحاب , عايز كلام جديد , و ودن جديدة , كل صحابى ما ينفعوش , عايز حد يطبطب على , مش أيد رامى الطرشة , و حد يضحك معايا , بس مش ضحكة رفيق المجلجلة , عايز حد يتمشى معايا بس ميكونش شكرى بمشيته الجد , حد أعيط قصاده زيك كده , و يعيط معايا مش زى جرجس من غير ما يسخر منى و لا يتريق علىّ زى ما كلنا بنعمل فى بعض من زمان . زمان كنا لما حد تحصله حاجة , كنا بنتريق عليه لغاية ما يخرج من الموود , دلوقتى أنا مش عايز كده ...   مش عارف انا عايز مين و لا أيه , بس عايز إنسان جديد , انا مخنوق و وحيد , خلاص بجد , زهقت ..  سامحينى أنى بعيّط قدامك , ما يصحش طبعاً , بس الوحدة صعبة جداً , انا سعيد انك بتسمعينى ... و سعيد أكتر أنك مقدره موقفى , متشكر جداً إنك أستحملتينى .... ففففف .... بجد أنا أستريحت شوية ... , إنتى طيبة أوى , و بتسمعى كويس , و عندك طولة بال , و ضحكتك بتنورنى , أنا سعيد بمعرفتك .

بجد انا مبسوط قوى أنهاردة , و حطلب منك طلب معهلش .

شوفى انا لازم اسيبك حالاً علشان عندى شغل بكره , مفيهاش زعل , لازم انام علشان حصحى بدرى , لازم أطفيكى دلوقتى و أنام علشان حصحى 7 الصبح , بس انا عارف أنى لما أرجع حتكونى هنا , جنبى , و منورالى الأوضة , هههه ,  و لما أرجع بكره نكمل رغى ... فففف , ماشى , يلا تصبح على خير يا جميل "

===================

* رفعت إسماعيل : بطل سلسلة روايات ما وراء الطبيعة للكاتب أحمد خالد توفيق .

 

17 comments:

TAFATEFO said...

(**) لا تعليق

karakib said...

لازم تبتدي تفكر تكتب سيناريو و حوار

Moon-baby said...

:)

قريتها من ساعتين و مقدرتش اعلق...قعدت افكر بس الكلام كان مخنوق

اولا: سردك للتفاصيل و تكرار تفاصيل معينة و تأكيدك ان عندك كل حاجة دي شيء موجع...انسان عنده كل حاجة مادية و معنوية بوجود الاصدقاء و لكن ينقصه ذلك الرباط و العناق الذي لا بديل له

و ليه ميصحش تعيط؟ الراجل انسان و من حقه يعيط...لا ينتقص ذلك من رجولته شيئا....العياط بيريح

وجعتني يا رامز....اول مرة تعمل زووم لجواك بالطربقة دي....شكرا انك بتشارك ده مع المحبين لمدونتك

ربنا يرزقك بواحدة تقدرك و تعرف قيمتك ...علشان هو ده الحب الصح..انك تعرف قيمة اللي قدامك كويس جدا

و ليك عليّ يا رامز يا ابن ....لو لقيت واحدة مناسبة مش هاتأخر .. بس تفكك انت من مارلين مونرو :)))

ربنا يفرح قلبك

HafSSa said...

انا لى صحاب كتير صدقينى , أغلبيتهم متجوزين و أحنا بتاع 4 لسه عزّاب , بنتقابل و بنحكى و بنتفسح , بس ... بس أنا وحيد , مش بلاقى حد أحكى معاه , إحنا كبرنا , بقعد مع شريف نحكى بالساعات و بيقف جنبى , بلعب مع بنت شكرى , و طول النهار فى الشغل مع الصنايعية , اليوم مشحون , و الأسبوع مشغول , و الأجازة فى العين السخنة أو العجمى , بس مش هو ده الى أنا عايزه , مش عارف , فى حاجة ناقصة , فى الأخر بروح و أقعد على السرير , بحس انى وحيد , مش لاقى حد أكلمه , زمان مكنتش حاسس كده , بس دلوقتى , مش لاقى حد أكلمه , و لا احكيله , أنا عايز بنى أدم أحكيله , بنى أدم يقولى كلام تانى , يبقى جنبى بس ما يكونش جنبى , مش عارف انا عايز أحكيله أيه , و لا أقوله أيه , بس عارفه , بحكى مع صحابى , مش عايز أحكى الحكى ده , و لا أقول الكلام ده , خلاص زهقت من حكى الصحاب , عايز كلام جديد , و ودن جديدة , كل صحابى ما ينفعوش , عايز حد يطبطب على , مش أيد رامى الطرشة , و حد يضحك معايا , بس مش ضحكة رفيق المجلجلة , عايز حد يتمشى معايا بس ميكونش شكرى بمشيته الجد , حد أعيط قصاده زيك كده , و يعيط معايا مش زى جرجس من غير ما يسخر منى و لا يتريق علىّ زى ما كلنا بنعمل فى بعض من زمان


ده نفس حالة واحدة اعرفها كويس اوي
:(

مش قادرة اعلق اكتر من كده مع ان جوايا كلام كتير اوي

تحياتي

جابري said...

yabn ellazena
enta gamed ya3ni bgad

cigarti heyya cigartak ya m3allem

Ahmed Nasr said...

لازم اطفيكي!!..مش للدرجة دي يا رامز يعني في إيه!!
ياراجل انت بتتكلم في وضع أغلب الناس دلوقتي يعني مش لدرجة (أطفيكي) يعني ما كلنا شايفين!!

دي مؤامرة بجد..عايزين تخوفوا الشباب من الحرية عشان يتوكسوا يتجوزوا :S

Moon-baby said...

صحيح يا رامز انا مش فاهمة تقصد ابه او مين "باطفيكي"؟ !

*Wonders*

TAFATEFO said...

بيتهيألي بيكلم الأباجوره اللي جنب السرير .. وان كنت في أول البوست افتكرته بيكلم السيجاره .. بس آخر فقره بتقول انها الأباجوره.

sandrill said...

البتاعة دي أعظم حاجة قريتها السنة دي على الأقل

بس المهم انت فين ياأخ ,, أنا مسافر كام يوم كده و حرجع على 17 ,, حيبقى معايا بعدها 3 أيام اجازة ,, ممكن اتنازل و اديلك يوم يعني

Nsreen Bsunee said...

مش انت بس اللى كده على فكره
:(

The Innocent said...

قطعت قلبي يا واد. ايووووه ع الحنية يا جدعان.

عباس العبد said...

تفاتيفو
لا تعليق برضه
هههههه
===
كراكيب
ايدى على كتفك يا عم
===
مون-بيبى
انا وجعتك ؟ حرام عليكى
يسمع من بقك ربنا .. بس دى حالة خاصة .. كنت فى الصحراء و كده
اما بالنوسبة لقصة مارلين مونرو ... فربنا يسهل
أطفيكى دى للأباجورة .. ما هو بعيد عنك بيتكلم مع الأباجورة
===
حفصت
و لا يهمك

عباس العبد said...

جابرى
بدل سيجارتى هى سيجارتك
طب ولع بقى ؟
===
احمد نصر
خليهم احرار كده
===
ساندريل
منور يا باشا و انا فاضى كتير فى رمضان
ارجع و نظبط علطول
===
نسرين
كله فى الهوى سوا
===
البرىء
سلامة قلبك يا حبيبى

TAFATEFO said...

أنا فعلاً حاولت أقول تعليق معرفتش

لما تقراها هتسكت .. لازم تسكت .. وتفكر شويه في حياتك .. وترجع تسكت تاني

طب اقراها (مع ان حضرتك اللي كاتبها) وقوللي حصل ايه

ihapoof said...

أباجوره !!

يا ابن اللذينه .. حلوه اوى .. أوى

بتفاصيلها الدقيقه بالمود بتاع البطل بنهايتها

فعلا حلوه :)

we2am said...

oh my god!..wag3 awe :S
bs fe3ln 3'waya..belnsba el2ny awl mra 22ra 7aga 3ndk :))

عباس العبد said...

we2am
نورتى المدونة و شرفتينى
و مبسوط امك لاقيتى حاجة عجبتك