Thursday, September 11, 2008

كابوتشينو بالشوكولا و البندق

مدخل

فى أحدى الكافيهات , سمعت أحدهم يجيب أخر  بأن المنطقة المنهارة تسمى الدويقة جنب منشية ناصر . يصمت السائل قليلاً متذكراً و يخبره : أه , عرفتها , عرفتها .. دى منطقة بيئة طحن .. حاجة قرف أوى , ناسها بيئة و زبالة , كلهم حرامية و قتالين قتلة و عواطلية . عبيد يعنى . ربنا رحمهم و رحمنا .. أستريحوا من القرف اللى عايشينه و معيشنّا فيه .

--

-1-

" ... هذا السبب في وجود المذهب الصوفي في الإسلام حيث يرى الإنسان أنه في الأصل كان في الجنة ثم نزل للحياة الدنيا و يحن للعودة إلى الآخرة فوجوده حالياً هو اغتراب. "

--

-2-

فى اوقات كثيرة يكون البحث عن الكمال هو هدم للكمال نفسه . فى اوقات كثيرة يكون البحث عن كمال الصورة هو تمزيق كامل للصورة .. لأن فى اوقات كثيرة يكون البحث عن شىء , فى ذاته , هو محاولة لفقدانه .

--

-3-

صديقتى تخبرنى بأننى اصبحت " بيئة "  لانى لا أحتسى المشروب الجديد , كابوتشينو بالشوكولا و البندق . فتهدينى علبة صفيح مكعبة مكتوب عليها مستورد من انجلترا .. نجلس فى احدى الكافيهات , فتطلب " هوت - شوكلِت ويز نو اويل " ( كاكاو منزوع الزيوت – دايت يعنى ) , و لما أجابها الولد أنه مش موجود , طلبت منى الرحيل و ترك الكافيه لأنها و على حد تعبيرها " كافيه بيئة " .

--

-4-

فى لحظة زمنية – مكانية ما هاربة من قلب التاريخ , تنهار احدى الصخور الضخمة ** فوق منازل احدى احياء مصر العشوائية مما يحرم هؤلاء السكان من مشاهدة الجزء الثانى من برنامج " توك شو " الذى يعرض على قناة موجة كوميدى . ندخل الزمان و المكان و نخرج منه و لم نتعلم شىء . جدى مات قبل أن يدخل الدِش البيت . يا لخسارتك يا جدى !! .

--

-5-

"الاغتراب" مصطلح مشتق من الغربة ، و فى ترجمة أخرى لنفس الأصل الأوروبي "الاستلاب" المشتق من السلب ، هو تعبير عن حالة الإنسان العقلية عندما يدخل فى أى علاقة اجتماعية ، تجبره على أن يسلك لا وفق ما يريد بالفعل بل ما يريد الطرف الآخر فى العلاقة ، متوهما أحيانا أن ما قد سلكه نابع من إرادته الحرة ، ومن هنا يصبح سلوكه و وعيه الظاهرى غريبا و منفصلا عن إرادته و وعيه الباطنى ، بمعنى آخر يصبح الإنسان المغترب مسلوب الإرادة و الحرية و الوعى ، وما هو أسوء فى الاغتراب ليس فى تلك الحالة من القهر الخفي فقط ، بل فى القبول به وسعى الإنسان الحثيث للوقوع فيه ، والدفاع عن العلاقات الاجتماعية التى تخلقه ، و مدحها وقبولها وحبها والخوف من التحرر منها ، و اعتبارها الوضع الطبيعى السعيد والمرغوب فيه ، ومن ثم عدم الاستياء منه و لا الإحساس ببشاعاته ، برغم أن واقع الحال يؤكد أن هذا القهر الخفي ، يفجر بدوره رفضا خفيا عند نفس الإنسان المتكيف مع هذا القهر ، يتجلى لدى الإنسان المغترب فى سلوك مضطرب و وعى زائف و منطق معوج ، و كما يظهر هذا الرفض  فى صور مختلف الاضطرابات النفسية والعقلية وشتى الانحرافات السلوكية والأخلاقية المختلفة .

--

-6-

يتعجب صديقى من أن الجبل أنهار متأخراً و لم ينهار من زمن !! . فالتربة التى بُنى عليها هى حجر جيرى فوق طمى و طين " طمى ويز نو ووتر " ( تربة طينية بلا ماء – منزوع الماء ) طمى متماسك . و لكن نتيجة البناء و سقى الحدائق و الصرف الصحى , و نتيجة لأن التربة الجيرية مسامية فأن الماء يتسرب للطبقة الطينية و يردها الى أصلها طين سائب غير متماسك فتصبح التربة الجيرية كأنها معلقة فى الهواء و هنا تحدث الكارثة . و لما سئلته مستنكراً : يعنى هم مكنوش عارفين و سابوهم يبنوا ؟  . يجيبنى ساخراً بأنى ساذج و برىء و مش فاهم أى حاجة فى حياتى .

--

-7-

اخرج مع صديقتى فتخبرنى اننا لن نذهب لتلك الكافيه لأن مفيهاش " كاكاو ويز نو اويل " و لازم نشوف كافيه تانية . أضحك و اتذكر كلام صديقى و اخبرها : كافيه مفهاش " كاكاو ويز نو اويل " تبقى كافيه بيئة , و منطقة مبنية على " طمى ويز نو ووتر " يبقى اللى بيبنوا عليها ناس بيئة  !! . و ربنا يرحمنا .

--

-8-

أبحث دائماً عن الكمال و خاصة فى عملى . و لأن بعض الاحداث و المشاهد التى تمر امامى تدفعنى للتأمل فى " عدم إكتمالها " . تدفعنى للتساؤل لماذا لا تكتمل دائماً الأساطير ؟ . لماذا دائماً هناك من يعكر صفو الألهه و يجبرها فى لحظة زمكانية أن تكون عادلة و هى كما نعرف ليست من شيم الألهة !! .

السؤال و بصيغة أكثر وداً و حباً و تعاطفاً : لماذا لا يخرج هشام طلعت مصطفى براءة من القضية ؟ فالقبض عليه و الزج به فى السجن يخل بالصورة العامة , يهدم الكمال المرسوم فى ذهن الناس البيئة بأن هناك دائماً من هم فوق القانون حتى لو تسببوا فى وفاة 1000 شخص من الأبرياء , فما بالك بالذى قتل أنثى هى فى ذهن العامة ستدخل جهنم اكيد , كده كده ,  لأنها مغنية سافرة و راقصة عارية ***!! .

صراحة , أشعر بالأغتراب نتيجة للقبض على هشام و الزج به فى السجن و محاكمته . اشعرب بالأغتراب و عدم الراحة , فبصفتى انسان بيئة لا أصدق بأن دولتى التى جعلتنى بريئاً , ساذجاً و مش فاهم حاجة , و التى زرعت صورة ذهنية معينة عنها فى عقلى , تخل بهذا الكمال الذى اعتدناه منها , تخل به و تهدمه فى لحظة ما من التاريخ و تحاكم قاتل له نفوذ و مقرب من الألهة !! .

للأمانة , لا أرتاح لهذا الحدث و كل ما أتمناه الأن , ان تُفرج الألهة عن هشام حتى تظل صورتهم فى ذهنى كاملة , ان يخرج من سجنه بريئاً حتى تظل فكرتى عنهم ثابتة . فأنا , كما تعلمون عنى , أكره " عدم الكمال "  . و الزج به الى محاكمة " عادلة " يهدم هذا الكمال و هو ما يؤلمنى و بشدة !! .

--

-9-

إذا كان الألحاد هو ان تعلن أنك ستقف بمفردك فى مواجهة الكون بدون إله . فأن الأيمان هو ان تعلن انك ستقف بمفردك فى الكون فى مواجهة الألهة .

--

-10-

قصدت باب الكريم

كل سنة و أنتم طيبين



lililileli.mp3 -

 --

** تركت الجرائد عمليات التنقيب عن جثث السكان و أهتمت بخبر جعلنى أشمئز و بشدة . تركت الصحف و وسائل الأعلام الناس مدفونين و بدأت فى تقليل تغطيتها للحدث , و ذهبت الى المفتى تسئله : هل اللذين ماتوا شهداء أم لا ؟ . اجابهم المفتى بكل إيمان : شهداء !!!!!!!!!!!!!! . لا أدرى حتى الأن اهمية هذا السؤال فى هذا التوقيت .

*** كتب أحدهم فى أحدى المواقع بأن سوزان تميم تستحق القتل لأنها .. و لأنها .. و لأنها ..  ( أنتم فاهمين بقى ) .



19 comments:

TAFATEFO said...

قصران متجاوران .. بديعا البنيان .. تحيط بهما حديقتان .. تضفيان على مظهريهما جمالا يفوق الوصف.
مر بجوارهما رجل فقير .. رقيق الحال .. متسخ .. رث الثياب .. اعياه التعب فجلس مسندا ظهره لشجرة في بستان القصر الأول .. مستظلاً بظلها .. رآه صاحب القصر الذي كان يجلس في شرفة القصر مستمتعاً بمظهر حديقته وقصره .. فوجده قد أفسد جمال الصورة بمظهره المثير للغثيان.. فأمر الحراس بطرد الرجل من بستانه حتى لا يفسد المظهر الجميل.

فما كان من الفقير إلا أن انقاد للأمر .. ولكنه متعب .. فمشى قليلاً .. وسرعان ما جلس مستظلاً بشجرة في بستان صاحب القصر المجاور للأول .. والذي كان صاحبه يجلس في الشرفة مستمتعاً بجمال بستانه .. ورأى الرجل المتسخ رث الثياب يفسد المنظر البديع للقصر والبستان بمظهره المثير للشفقة فأمر الحراس .. فأطعموا الرجل وأحسنوا نظافته .. وكسوه حلة نظيفة جميلة .. وأعطاه من المال ما يكفيه مذلة السؤال.

TAFATEFO said...

-مدخل-
حال مثير للغثيان .. حال مثير للشفقة
الفرق .. من ينظر للحال

-1-
ربما .. لكنها رؤية قاصرة
المذهب الصوفي ليس مقتصراً على الإسلام .. بل أراه في كل الأديان .. وغير السماوية منها أيضاً

-2-
طبعاً .. الكمال البشري لا يحصل إلا بالنقصان.

-8-
متقلقش خالص .. مش هيدوم إحساسك بالغربة .. وهينزلوا على رغبتك

-9-
في مواجهة الإله(الآلهة) !!؟؟

بنت القمر said...

عندي شك جامد في صالح هشام طلعت مصطفي لو انت مكانه ها تكلف واحد يقتل عشيقتك بنفسك ولا عبر وسيط ؟؟
ها تضغط عليها بكل السبل وانت تقدر تدمرها ولا ها تستعمل طريقه الافلام العلابي... وعموما الغباء برضه ليه ناسه...جايز
----------------------
بالنسبه للقبض عليه وفكرة العداله الغائبه والناس البيئه اللي ماتوا... عارف المشكله اننا لينا منطقنا عن العدل المطلق... اللي ممكن ما تكونش صحيحه عشان كده ناس بتكفر وناس بتلحد
يعني مين قال ان موتهم شيئ وحش ؟؟ عشان كانت حياتهم جميله مثلا ولا عشان مفروض محدش يموت اصلا؟
مش عارفه
كنت بفكر فيهم يا تري اتألموا ومقدار الالم كان عميق بمقدار عذاباتهم ولا عذاباتهم كانت اعمق .. فاكر اكثم بتاع الزلزل؟
يمكن منتهي الرحمه ان انتقلوا لمكان اخر قد يكون افضل...
الايمان ليس لن تقف في مواجهة اله او الهه الايمان ان تسلم بالمشيئه الالهيه مع عدم فهم حكمتها وكنها وعدم التمرد عليها... مواجهة ايه مش فاهمه؟؟
الايمان مش سهل صعب جدا جدا زي الحريه تمنها دم كمان الايمان تمنه جنون احيانا عارف اكيد
قصه موسي مع الخضر
احيانا ترك الامور تمر بهدوء وانسيابيه بيكون منتهي الحكمه.. بس اللي يقدر عليه
الناس بتسأل المفتي عن الشهاده لانها كفرت بحياتها ومستنيه افضل زي ما تكون جاي اسكندريه وتسأل محصل التذاكر هو القطر ده رايح اسكندريه تلاتين مره عشان تتأكد لانك متعجل تسيب القاهرة فقط مش لانك عاوز تروح اسكندريه تحديدا
------------
بخصوص صاحبتك
طب بالذمه دي بت تتصاحب.. هي الدنيا ناقصه خنقه:))
قريبه من القاهرة عزمتها في اليكس علي قهوة في احد مولات اليكس المتواضعه وعملت مع الجارسون بوليكه
عشان القهوة مش اكسيبريسو دي مجرد بلاك امريكان كافي.!!.. رغم ان اصولها الاجتماعيه متواضعه جدا بس مجرد نوع من الكبر السخيف علي الولد ولفت النظر في الكافيه ... الله ياخد المناظر دي:((
مش طالبه خنقه... خد واحده بيئه احسن تطلب شاي بلبن في الكافيه عشان متخنقكش.. انا والله مره في لوبي فندق شيك اوي قفلت معايا وطلبت شاي بلبن
واخيرا لي لي لي سيدي لي لي لي روحي لي لي لي:))

Alkomi said...

أحلى حاجة عجبتني

إذا كان الألحاد هو ان تعلن أنك ستقف بمفردك فى مواجهة الكون بدون إله . فأن الأيمان هو ان تعلن انك ستقف بمفردك فى الكون فى مواجهة الألهة


بس مين اللي يفهم يا رامز

Bella said...

فى اوقات كثيرة يكون البحث عن الكمال هو هدم للكمال نفسه . فى اوقات كثيرة يكون البحث عن كمال الصورة هو تمزيق كامل للصورة .. لأن فى اوقات كثيرة يكون البحث عن شىء , فى ذاته , هو محاولة لفقدانه .

------

أمثر جزء عجبني هو هذا الجزء

اما بالنسبة لحبيبك هشام كلعت فماتقلقش

ح يطلع

والتمهيد لطلوعه باين من حملات اعلامية واعلانية مالية الدنيا
وبكرة افكرك ان مجرد القبض عليه كان اللقمة اللى بيلهوا بيها الناس الجعانة لغاية اللحمة ماتتفرق

بس خلاص

Moon-baby said...

"فى اوقات كثيرة يكون البحث عن الكمال هو هدم للكمال نفسه . فى اوقات كثيرة يكون البحث عن كمال الصورة هو تمزيق كامل للصورة .. لأن فى اوقات كثيرة يكون البحث عن شىء , فى ذاته , هو محاولة لفقدانه . "

اتفق نسبيا...هدم الصورة الموروثة عن الكمال...و بناء صورة جديدة..صورة نتيجة بحثنا و تجاربنا و اختباراتنا

عجبني تعريف الاغتراب و شرحه؟ ده كلامك انت؟
الاغتراب ده حالة الواحد بيحس بيها لما بينتمي انتماء كامل و تام-بارادته او بالقهر الخفي او الظاهر- لجماعة ما او فرد ما و في وسط الطريق ينسى معالمه وان كل شخص فريد...يطمس معالمه الخاصة و يضحي بالصدق مع ذاته في سبيل التأقلم مع "المجموعة" او مع فرد ما

قرأت هذا التعليق عن سوزان تميم و اندهشت..و اذا كان ذلك التعليق يعبر عن "اذهان العامة" ،اذن فاذهان العامة مختلة ظالمة...

عباس العبد said...

مصطفى
انا متكلمتش على المذهب الصوفى و قصره على الأسلام , الفقرتين اللى باللون الازرق دول منقولين من مقال فى تعريف الأغتراب , فالراجل كان بيكتب مداخل و شروحات من ضمنها مدخل و شرح عن الأغتراب فى الفكر الدينى فأتكلم عن الصوفية فى الأسلام نموذجاً , بس . لكن الفكر ده موجود فى كل الأديان طبعاً , و موجود فى تاريخ الكنيسة و فى فكر الأباء , ده نص لتقريب الفكرة بس , مش نص له دلالة خفية و لا حاجة . اللى قصدته أنهم اهتموا بالشهادة و اهتموا بالموت حتى الناس بدل ما تشفق عليهم قالت أنها أستريحت . كله اخرويات , حتى الأهالى أهتموا بنهاياتهم و مش بدنيتهم .
--
لازم يطلع لأنه مفيش سبب , دينياً الرجل لم يرتكب جرم فى نظر " الفكر الدينى " , سمعت واحد بيقول و خد بالك من النص اللى جى ده لانه النص اللى بيحكم حياتنا , سمعت واحد بيقول :
" فاسد و حرامى قتل رقاصة و واحدة شرم.... ولاد كلب فى بعض , ربنا بيخلص فى الأرض "
تخيل ده لما يكون الأطار اللى حاكم حياتك و دى نظرة ناس ليك , يبقى عايز أيه تانى ؟
يبقى قول على الدنيا السلانكاتيه .
--
فى مواجهة الآلهه مش الآله , و مشروح فى الفقرة اللى قبليها مين هم الآلهه .

عباس العبد said...

بنت القمر
مين اللى قال ان موتهم شىء وحش ؟ هو محدش قال ان موهم شىء وحش . كل الناس اللى فى الطبقة الأعلى أجتماعياً اجمعت " أنها نضافة " و البلد أستريحت شوية من " القرف " , و اللى ضميره وجعه شوية و مش قادر يتعامل مع الموت بالأستهانة دى , حللها بنظرية دينية و قال أن قضاء الله و قدره دائماً لصالح الأنسان , يعنى ربنا قاصد " خير بموتهم ده !!! " . إعادة أنتاج و شرح النص دينى " شرح طبقى " – " خدوا الشر و راحوا " . تفتكرى لو الجزء اللى وقع و انهار ده , كان الجزء بتاع " أعمار – الفيلات " اللى فى المقطم , الناس كانت حتقول إيه ؟ ..
اقولك كانت حتقول إيه ؟ الغلابة كانوا حيقولوا على الأغنياء : ربنا انتقم منهم دول حرامية ولاد كلب و يستحقوا اللى بيحصلهم .. و الأغنياء كانوا حيقولوا ده اهمال و الدولة عمرها ساعتها ما كانت حتفكر توقف البحث و التنقيب على الجثث زى ما بتفكر تعمل دلوقتى فى حادث الدويقة . غير أنه أصلاً الجكومة سابت العشوايات تطلع فى منطقة غير صالحة للبناء و أن " إعمار – مصر " عمرها ما حتبنى فى منطقة " خطيرة " . كل واحد حيفسر النص الدينى و يعيد أنتاجه حسب موقعه الأجتماعى " تفسير النص الدينى حسب الصراع الطبقى و الموقع الأجتماعى " .. فى كتاب أسمه وعاظ السلاطين جامد , أقريه بجد .
انتى لأنك ليكى نزعة دينية و مش من طبقتهم الأجتماعية فسرتيه بأسلوب و حسب مرجعية دينية و جبتى قصة " الخضر و موسى و قتل الغلام " تناسب تفسيرك و هم فسروه أنه أبتلاء و قضاء و قدر " على أساس انهم الفقراء الغلابة المستضعفين الشهداء و بالتالى يبقوا مقربين لله و مؤمنين " , والأغنياء قالوا " خدوا الشر و راحوا .. البلد نضفت من العواطلية و الحرامية – و حسب نصهم الدينى حيلاقوا تفسير مناسب " . أحنا الدولة الوحيدة فى العالم اللى فقرائها غلابة و مؤمنين و مظلومين بحكم مسبق و تلقائى و طبيعى و نهائى .. و أغنيائها حرامية ولاد ستين كلب كفره برضه بحكم مسبق و تلقائى و طبيعى و نهائى .
علشان كده انا كنت مصمم فى البوست اللى فات أن اللى يحلل الأزمة بتوع الجيولوجيا , بلاش نخضع لبتوع النص الدينى علشان دول عندهم مناخوليا , سوزان تميم شهيدة , بتوع الدويقة شهداء , خالتى حموقة شهيدة , كل ضرب ضرب مفيش شتيمة .
انا أعتقدت انهم خلوهم شهداء علشان ما يبقاش موت و خراب ديار , يعنى عايشين ضايعين و يموتوا ضايعين , ما يصحش طبعاً .
--
صاحبتى حرة , تشرب هوت – شوكلوت , تشرب زفت هى حرة , على العموم انا عملت بنصيحتك و قلتلها عيشى عيشة أهلك , و هى سمعت الكلام و سابتنى و راحت تعيش مع أهلها فعلاً .
هههههههههه

عباس العبد said...

محمد الكومى
مين اللى يفهم فعلاً .
=======
بيلا
بجد انا حسيت مع هشام , انه " أتظلم " , من غير ضحك و لا سخرية . يعنى اكتر من كده و ربنا بيزيح عن غيره , جت عليه هو فى حادث قتل مغنية و يتمسك , ده ظلم , انا شايف انه لازم يخرج لأنها حادثة تافهة لا تذكر , لدرجة ان بعض الناس و المشايخ قالوا انها قاصة عارية و ربنا بيخلص و عقبال ما تيجى مصيبة و تاخد هيفاء !!!! .
--
افرجوا عن هشام
انا بفكر أعمل حملة للأفراج عن هشام لأنه بالقبض عليه " بيسيىء لسمعة النظام " اللى أحنا متعودين عليها . يعنى يقولوا لا سمح الله أن النظام بقى عادل , ما يصحش أبداً , دى سمعة ناس .
ههههههه
=======
مون- بيبى
للأسف , يا مون يا بنتى , تعريف الأغتراب ده مش لىّ , ده منقول من نص بيشرح الأغتراب , علشان كده حطه بلون مختلف . هو انا يوم ما أشرح الاغتراب بالللغة و القدرة دى , حبقى مدون ؟ . حسيب التدوين و أبقى عالم و اطلع فى التلفزيون يا بنتى .
--
التعليق بتاع سوزان تميم , و لا يهزك و لا يدهشك و لا يفرق معاكى , هو ده نتيجة ان اللى بيفسر النص الدينى متدينين !!!!!!!! . متسألنيش ازاى لأنى مش عارف .
اذهان العامة مشوشة دينياً لانه للاسف احنا الدولة الوحيدة اللى عندها حكم دينى مسبق على كل حاجة , فقرائها غلابة و مؤمنين و مظلومين بحكم مسبق و تلقائى و طبيعى و نهائى .. و أغنيائها حرامية ولاد ستين كلب كفره برضه بحكم مسبق و تلقائى و طبيعى و نهائى . كل واحد عاف دوره كويس فى منظومة الكفر و الأيمان , طبعاً احنا لسه بيعاد تشكيلنا و يعاد النظر فى وضعنا لسبب بسيط اننا طبقة متوسطة , مخلوطة , هويتنا مش واضحة كفره و لا مؤمنين . و احنا الشريحة اللى بيتوجه ليها الوعظ والأرشاد على أساس اننا بنرقص على السلم , مش بقولك كل حاجة جاهزة و مسبقة فى البلد . ربنا يرحمنا جميعاً .
=======

بنت القمر said...

انا مقلتش ان ربنا موتهم عشان هما فقرا وغلابه.. ولا عندي حكم مسبق بأنهم غلابه ولا ان الاغنياء ولاد كلب
انا مش من طبقتهم ولا من الطبقه الاخري... انا زيي زيك طبقه متوسطه جداوإن كان معدل الفقر عمال بيزيد فهي تميل للستر

!!
انا بقول انا مش عارفه ربنا عمل كده ليه
مقلتش عشان هما طيبين ولا اشرار
انا زيي زيك مش فاهمه انا اللي بقوله انه ربنا ليه حكمه... ولازم تؤمن بكده
لإنه البديل ان الدنيا دي تكون ماشيه عبثيا.. وساعتها الواحد يتجنن
انا قلت الخضر وسيدنا موسي انه في حكمه خافيه علينا
ايه هي معرفهاش!!
الحكومه مسئوله وفي اهمال وبتوع التفسير الديني ولاد ستين كلب عشان بيقدموا تفسيرات وتبريرات خلاص
بس في الاخر في حاجات بتحصل مش مسئوليه حد
متقدرش تشيلها لحد
ممكن ننحي التفسير الديني علي جنب ونقول الحكومه هي السبب ولازم يتعدموا
اوكيه
وبعدين
والالاف الحاجات والاحداث اليوميه
البت الصغيره اللي عندها سرطان اللي بتيجي ساعه الادان وبتقول مش ها اقول تاني
ليه جالها سرطان
ولو ماتت ليه ماتت
ليه
واشمعني ديه
لاهي غنيه ولا فقيره ولا ضايقت حد
ولا مرضها بسبب اهمال الحكومه
زي اللي بيموتوا في حوادث
ها اجيب الذنب في رقبه مين
مفيش
عشان متجننش واكفر لازم بقا ارجع للتفسير الديني
لاني مش ها الاقي غير انه ربنا عاوز كده
ليه معرفش
هو عاوز كده وخلاص
طب هو عاوز وانا مش عاوزة
ومش قابله... ها اعمل ايه
ها ادور علي اتخن حيطه ارزع راسي فيها
يبقا عشان ارتاح وما اموتش كمدا لازم افسر ديني واقول اكيد في حكمه بس انا مش عارفاها
زي الخضر وموسي
انا اديت المثل ده تدليللا علي الحكمه الخفيه للقدر اللي ممكن محناش فاهمينها
مش تبرير لموت الغلابه ولا الاغنيا
يا ريت اكون واضحه

بنت القمر said...

ممكن انا اعتبرك برضه ذو نزعه دينيه
واكتر مني عارف ليه
عشان انت عاوز تقول الحكومه بنت كلب
قتلت مرتين
مرهانها سابتهم يعيشوا في المكان ده ثم تقاعسها عن انقاذ البقيه منهم
الحكومه مسئوله ووحشه ربنا ملوش دعوة
ربنا بعيد عن اهمال البشر
ربنا طيب وكويس
لكن الناس اللي وحشه واشرار
يبقا مين اللي عنده نزعه دينينه يا باشا؟
:(
انت
عشان بتنسب الشرور للناس مش لرب الناس
منتش متصور الشرور تيجي منه او بسبب قضائه.. اعتقد انه ده برضه منتهي الايمان بشكل ما
وهنا ارجع اقولك والشرور اللي بتحصل بدون تدخل بشري تبقا ايه ونرجع للتعليق الاول

حـنــّا السكران said...

مولانا

كيفك ..أطال الله بقائك ..
انت دماغ زي ما بيقولوا عندكم ..و الله العظيم انت دماغ ..دماغ مسلطن كمان .

ـ هي مصر فيها وزارة بيئة ولاّ لا؟ و إن وجدت ..هل هذه الكافيهات تتبع لها أم لوزارة السياحة؟ و أقصد تحديدا الكافيهات اللي ما فيها هوت شوكليت ويز نو اويل .
و لماذا لا تطالبوا بالإفراج عن هشام طلعت و تعيينه وزيرا للبيئة بما انه عرف عنه أنه رجل صرّيف و ممكن يوفـّر كل هذه الأشياء للكافيهات البيئة لتصبح كافيهات ليست بيئة .
انتم عندكم مصطلحات تخلـّي الواحد يلفّ حوالين نفسه .
سؤال لأصحاب نظرية ان سوزان تستحق القتل لأنها كذا و كذا ,, هل يستحق القاتل أيّاً كان .. الثواب و المكافأة و الثناء لأنه طبّق فيها ما تستحق دينيا ( من وجهة نظرهم ) ..؟هل يمكن اعتباره اّمراً بالمعروف و ناه ٍ عن المنكر ؟
دي فتوى بيئة على فكرة ..فتوى ويز نو ريليجن ات اول .

عباس العبد said...

بنت القمر
انت بتزعقيلى فى التعليق ؟
ماشى يا ستى .. المهم
انا قلت فى ردى بالظبط :
" انتى لأنك ليكى نزعة دينية و مش من طبقتهم الأجتماعية فسرتيه بأسلوب و حسب مرجعية دينية و جبتى قصة " الخضر و موسى و قتل الغلام " تناسب تفسيرك " .
فين الغلط فى كلامى ؟ انا مش من طبقتهم الأجتماعية برضه , و لى تفسير مخلف تماماً للّى حصلهم و ده مش معناه انى حاططهم فى قوالب جاهزة . انتى علشان مبتحبيش " العبثية " و " اللا-تفسير " للحوادث الغير المنطقية زى الناس اللى بتموت من غير سبب و زى البنت اللى جالها سرطان . فلجئتى ل- قصة سيدنا موسى و الخضر . انا معنديش تفسير أقدر أقولهولك لحاجات كتير و مش حقدر أفيدك فى حاجات أكتر . بس مش معناه أننا مختلفين .. لأننا متفقين أن ساعات ميبقاش فى تفسير لموت الناس .
--
لكن كل التبعات اللى صدرت بعد حادثة الدويقة , كانت أبعد عن حتى اننا ممكن نسميها " تفسير " . شهداء , الحكومة السبب , هم السبب , ربنا عايز كده , الفساد هو السبب , كل ده ماله بأن الصرف الصحى و المياه وصلت للطبقات السفلى فتخلخلت و اتحركت و ادت الى أنهيار الصخور , و ليه يكون بحثنا عن حل مشكلتهم بأننا نريحهم و نخدرهم و نستهبل و نقول " أنهم شهداء " , كأنهم لما اخدوا الشهادة كده خلاص الدنيا بقت تمام و الطبقات الجيرية و الصخور حتتكسف من نفسها و متنهارش تانى ؟ . ليه ما يكونش فى قانون يحمل المخالف مسئوليته , أو منع البناء على مناطق زى دى , او أى حاجة تكون أكثر انضباطاً ... فاهمه قصدى , ليه نلجأ للتفسير البعييييييييييييييييييييييد و اللى مش حنقدر نضبطه زى التفسير الدينى .. و نسيب التفسير القريب الواضح ؟ ده قصدى . بس .
--
و بعدين انا فعلاً مرجعيتى دينية , و علشان كده رفضت التفسير الدينى . لأن بكل بساطة : الله لا يستطيع أن يفعل الا ما يستطيع أن يفعله فقط .
و نرجع لأى تفسير , مش الأول بس يا فندم
لكن فى نقطة مهمة جداً , أن زى ما فى تفسير مريح ليكى , فى تفسير مريح لىّ . بس و ده كان قصدى .

عباس العبد said...

حنا باشا
منورنى و ليك شوقة , بقالك مدة مزرتنيش , لعل المانع خير .
انا بحضر لحملة للأفراج عنه , يعنى واحد تسبب فى موت 1000 شخص و خرج عادى , و هشام قتل رقاصة و يتسجن , ظلم فعلاً .
السؤال ده مش حقدر أفيدك فيه , لأنه سؤال ويز نو ميرسى .

أبوفارس said...

مساء الفل ياهندزه..
أولا أيه النشاط التدوينى المحترم ده..
على بال مالحق أقراء واحده تدخل علينا بتانيه أنقح من اﻷولى بسم الله ماشاء الله عليك ياباشمهندس..
فاكر لما قلت لك فى جلستنا الطوووويله الممتعه..
لما تواجه فى المحروسه حدث أو ظاهره غير قابله للتفسير المنطقى تفسيرها يكون أيه...؟؟؟
ألقى نظره هنا حاتفتكر أحنا قلنا أيه..!! http://lastknight1964.blogspot.com/2008/09/blog-post.html

وتحياتى يازعيم..خالد

أبوفارس said...
This comment has been removed by the author.
Alexandrian far away said...

جميل
بجد جميل يا رامز

عباس العبد said...

أسكندرانى
الله يكرمك يا ابا الحج
--
أبو فارس
منورنى اولاً و قبل كل شىء
قريت التدوينة و فهمت قصدك من ايام المانجة و الليمون
ربنا يستر بجد ربنا يستر
بس انت لازم تكتب و تشرح الموضوع ده
لأنك حتكتبه أفضل منى .

SaSo said...

موش هما 70
مليون
50
مليون
يتكلو على الله ويوسعو مكان لل20
مليون


يعيشو عيشه نضيفه
انتخبونى انتو بس
وانا اوعدكو انى اخلصكو منها بموته نضيفه من غير الم